ပြည်တွင်းကုန်သွယ်မှုသတင်း

      လားရှိုးမြို့၊ ရပ်ကွက်(၁၂)၊ နယ်မြေ(၅)ရှိ အသေးစား/အလတ်စား စက်မှုလက်မှုလုပ်ငန်းလုပ်ကိုင်နေသော “ထုံချွင်”ကြာညို့လုပ်ငန်းပိုင်ရှင်အား တွေ့ဆုံဆွေးနွေးခဲ့ရာတွင် ၎င်းလုပ်ငန်းသည်နှစ်(၅၀) ခန့်ကြာမြင့်နေပြီဖြစ်သော မိသားစုတစ်ပိုင်တစ်နိုင်စီးပွားဖြစ်လုပ်ငန်းဖြစ်ကြောင်းသိရှိရပါသည်။ ပဲပုပ်ကို အဓိကကုန်ကြမ်းအဖြစ်အသုံးပြုပြီး ကပ်စေးနှဲဖြင့်ရောနှော၍  စဉ့်အိုးထဲတွင် ရက်ကြာကြာစိမ်ထားပြီးနောက် အဆင့်ဆင့်ကြိုချက်ရကြောင်းသိရှိရပြီး ကုန်ကြမ်းများကိုလည်း သီပေါမြို့နှင့်နမ့်လန်မြို့များမှ အများဆုံးဝယ်ယူရကြောင်းသိရှိရပါသည်။ တစ်ရက်လျှင် မိုးပြဲဒယ်အိုး (၄)အိုးခန့်ကြိုချက်လျက်ရှိပြီး ပုလင်းအရေအတွက် (၆၀၀) ပုလင်းခန့်ရရှိကြောင်းသိရှိရပါသည်။ အလုပ်သမား(၆)ဦးနှင့် မိသားစုများစုပေါင်း၍ လုပ်ကိုင်လျက်ရှိသော တစ်ပိုင်တစ်နိုင်စီးပွားဖြစ် “ထုံချွင်”ကြာညို့ကို ရှမ်းပြည်နယ်(မြောက်ပိုင်း)အတွင်း အဓိကထား၍  ဖြန့်ဖြူးရောင်းချလျက်ရှိကြောင်းသိရှိရပါသည်။

DOCA(ရှမ်း)

      ကျောက်မဲမြို့နယ်၌ ဖွင့်လှစ်ရောင်းချလျက်ရှိသော ဆန်ဆိုင်များမှ စီးပွားရေးလုပ်ငန်းရှင်များအားတွေ့ဆုံပြီး လက်ရှိဆန်ဈေးနှုန်းအခြေအနေများကို စုံစမ်းမေးမြန်းခဲ့ရာတွင် ဆန်ကြမ်းတစ်အိတ်လျှင် ပျမ်းမျှအားဖြင့် (၇၀၀၀)ကျပ်ခန့် မြင့်တက်လျက်ရှိပြီး ဆန်ချောတစ်အိတ်လျှင် ပျမ်းမျှအားဖြင့် (၁၅၀၀၀)ကျပ်ခန့်အထိ မြင့်တက်လျက်ရှိကြောင်းသိရှိရပါသည်။ ဆန်အမျိုးအစားများအလိုက် ဈေးနှုန်းများမှာ ပေါ်ဆန်းမွှေး(အသစ်) (၂၄) ပြည်တစ်အိတ်လျှင် (၈၂၀၀၀)ကျပ်၊ မနောသုခ (၂၄) ပြည်ပါတစ်အိတ်လျှင် (၅၅၀၀၀)ကျပ်၊ ဒေသရှမ်းဆန် (၂၄) ပြည်ပါတစ်အိတ်လျှင် (၆၀၀၀၀)ကျပ်၊ မဂျမ်းတော (၂၄) ပြည်ပါတစ်အိတ်လျှင် (၇၅၀၀၀)ကျပ်နှင့် မှော်ဘီစူပါ (၂၄) ပြည်ပါတစ်အိတ်လျှင်  (၆၀၀၀၀)ကျပ်တို့ဖြစ်ကြောင်းသိရှိရပြီး ဆန်ဈေးနှုန်းများသည် ယခင်လထက် သိသိသာသာမြင့်တက်လျက်ရှိကြောင်းကိုလည်းသိရှိရပါသည်။

DOCA(ရှမ်း)

       ရှမ်းပြည်နယ်(မြောက်ပိုင်း)၊ ‘ဝ’ ကိုယ်ပိုင်အုပ်ချုပ်ခွင့်ရတိုင်း၊ ဟိုပန်မြို့တွင် စိုက်ပျိုးလျက်ရှိသည့်သီးနှံများအနက် ပြောင်းသီးနှံများကိုလည်းတွေ့ရှိရပါသည်။ မိုးဦးရာသီတွင် အစိုက်များပြီး ထွက်ရှိသောပြောင်းသီးနှံများကို တရုတ်ပြည်နယ်စပ်သို့ တင်ပို့ရောင်းချလျက်ကြောင်းသိရှိရပါသည်။ ရောင်းချသည့်နှုန်းထားပမာဏသည် ကီလို(၁၀၀)တွင် မြန်မာငွေ(၃၀၀၀၀)ကျပ်ရှိသည်ကိုသိရှိရပါသည်။

     ကိုဗစ် - ၁၉ ရောဂါဖြစ်ပွားနေသည့် ကာလအတွင်း စိုက်ပျိုးမှုအနည်းငယ်သာရှိပြီး ဒေသအတွင်းသာရောင်းချလျက်ရှိပါသည်။ ဟိုပန်မြို့အတွင်း ဝက်၊ ကြက်စသည့်တိရိစ္ဆာန်များ မွေးမြူထားသည့်ပြည်သူများသည် ဒေသအတွင်းရောင်းချနေသော ပြောင်းကိုဝယ်ယူပြီး မွေးမြူရေးလုပ်ငန်းများ လုပ်ကိုင်နေသည်ကိုသိရှိရပါသည်။ သာယာလှပသော တောတောင်ရေမြေအလှနှင့်အတူ စိုက်ပျိုးမှုအထွက်ကောင်းပြီး တောင်သူများအနေဖြင့် အပြုံးပန်းများဝေဆာလျက်ရှိသည်ကိုသိရှိရပါသည်။ ကိုဗစ် - ၁၉ ကာလပြီးနောက် စီးပွားရေးလုပ်ငန်းရှင်များဝယ်ယူလိုသည့် သီးနှံများကိုသာ တောင်သူများသည် အဓိကစိုက်ပျိုးသည်ကိုတွေ့ရှိရပါသည်။

DOCA(ရှမ်း)

       မကွေးတိုင်းဒေသကြီး၊ ပွင့်ဖြူမြို့နယ်ရှိ ကျေးရွာများသည် မိရိုးဖလာလယ်ယာလုပ်ငန်းအပြင် ဥယျာဉ်ခြံမြေများတွင် သီးနှံစားပင်မျိုးစုံကို စီးပွားဖြစ်စိုက်ပျိုးကြပြီး မြန်မာနိုင်ငံအနှံ့ စားသုံးမှုများ၍ ဈေးကွက်အခိုင်အမာရှိသော စားဖိုဆောင်သုံးသီးနှံဖြစ်သည့် ထောပတ်ခရမ်းကိုလည်း တစ်ပိုင်တစ်နိုင်စိုက်ပျိုးကြကြောင်းသိရပါသည်။ ခရမ်းပင်ကို နေရာဒေသမရွေး၊ ရာသီဥတုမရွေး စိုက်ပျိုးနိုင်ပြီး အောင်မြင်ဖြစ်ထွန်းလွယ်သောကြောင့် တောင်သူများအားထားစိုက်ပျိုးကြသော သီးနှံတစ်မျိုးဖြစ်ပြီး၊ ပွင့်ဖြူမြို့နယ် ယောစု၊ ပိန္နဲတော၊ ဒေးဒရဲ၊ ညောင်ကုန်း၊ ရွာသစ်နှင့် မုန်းနားစု စသောကျေးရွာများမှ တောင်သူများသည် ခရမ်းမျိုးများစွာရှိသည့်အနက် စားသုံးသူများအကြိုက်တွေ့၍ အရသာအရှိဆုံးဖြစ်သည့် ထောပတ်ခရမ်းမျိုးကို စိုက်ခင်းတစ်ခင်းလျှင် အပင်ရေ(၂၀၀)ပင်ခန့် တစ်ပိုင်တစ်နိုင်စိုက်ပျိုးကြကြောင်းသိရှိရပါသည်။

      ထောပတ်ခရမ်းစိုက်ပျိုးရာတွင် မျိုးစေ့များကို အရင်ပျိုးရကြောင်း၊ ပျိုးပင်များအရွက် (၅)ရွက်ခန့်ရရှိလျှင် စိုက်ပျိုးမည့်စိုက်ခင်းသို့ ပြောင်းရွှေ့စိုက်ပျိုးရပြီး၊ စိုက်ပျိုးရာတွင် မြေကိုဘောင်ဖော်၍ အတန်းလိုက်စိုက်ပျိုးကြကြောင်း၊ မြေအောက်ရေဖြင့် ရေသွင်းစိုက်ပျိုးကြပြီး အပင်တစ်ပင်နှင့်တစ်ပင်ကြား (၂) ပေခန့်အကွာ၊ အတန်းတစ်တန်းနှင့်တစ်တန်းကြား (၃) ပေခန့်ခွာ၍ စိုက်ပျိုးကြကြောင်း၊ ခရမ်းပင်သည် ရေဝပ်ခြင်းကိုမကြိုက်ဘဲ မြေတောင်မြှောက်ပေးခြင်း၊ ဘောင်ဆယ်ခြင်းများ ပြုလုပ်ပေးရန်လိုအပ်ပြီး အသီးသီးချိန်တွင် အသီးအလေးချိန်ကြောင့် အပင်ယိုင်လဲမှုမဖြစ်စေရန် တိုင်ထောင်ပေးရကြောင်း၊ အပင်စိုက်ပျိုးချိန်မှ (၃)လခန့်အကြာတွင် စတင်ခူးဆွတ်နိုင်ပြီး (၃)ရက်လျှင် တစ်ကြိမ်ခန့် အလှည့်ကျခူးဆွတ်နိုင်ကြောင်း၊ အပင်သက်တမ်းမှာ (၈)လခန့်ရှိပြီး၊ ထောပတ်ခရမ်း စတင်ခူးဆွတ်ချိန်တွင် ပိဿာချိန် (၃၀)ပိဿာမှ (၃၅)ပိဿာခန့်ထွက်ရှိပြီး တစ်ပိဿာလျှင် ကျပ်(၁၅၀၀) မှ ကျပ်(၁၈၀၀)အထိဈေးကောင်းရရှိကြောင်း၊ နောက်ပိုင်းတွင် အသီးအားကောင်း၍ အသီးလှိုင်လှိုင်ပေါ်ချိန်၌ တစ်ခါခူးဆွတ်လျှင် ပိဿာချိန် (၈၀) ပိဿာမှ (၈၅) ပိဿာခန့်အထိထွက်ရှိပြီး တစ်ပိဿာလျှင် ကျပ်(၈၀၀)မှ ကျပ်(၁၀၀၀)အထိရရှိကြောင်းသိရှိရပါသည်။ ပွင့်ဖြူဒေသထွက် ထောပတ်ခရမ်းများကို စလင်း၊ စကု၊ မင်းဘူး၊ မကွေးမြို့များသို့တင်ပို့ရောင်းချပြီး ကုန်ကျစရိတ်နည်းပါး၍ အကျိုးအမြတ်များစွာရရှိသောကြောင့် ပွင့်ဖြူဒေသရှိ ထောပတ်ခရမ်း စိုက်ပျိုးသူ တောင်သူများမှာ ဝင်ငွေများစွာရရှိပြီး အဆင်ပြေလျက်ရှိကြောင်းသိရှိရပါသည်။

DOCA(မကွေး)

    စစ်ကိုင်းတိုင်းဒေသကြီးအတွင်း ယခင်အပတ်တွင် ဓာတ်မြေသြဇာအမျိုးအစားများဖြစ်သည့် ပုလဲဓာတ်မြေဩဇာ(ရွှေတောင်) (50Kg) တစ်အိတ်လျှင် (၁၃၀၀၀၀)ကျပ်၊ တီစူပါ၄၆% သံကွင်း(တရုတ်) (50Kg) တစ်အိတ်လျှင် (၉၅၀၀၀)ကျပ်၊ ကျွဲနက် (၁၅း၁၅း၁၅) (50Kg)တစ်အိတ်လျှင် (၁၅၂၅၀၀)ကျပ်၊ နိုက်ထိုဖောစကာ (သြဘာ) (50Kg) တစ်အိတ်လျှင် (၁၅၇၀၀၀)၊ ပန်းဖူး(မြန်မာ့သြဘာ) (50Kg) တစ်အိတ်လျှင် (၈၈၀၀၀)ကျပ်၊ MC(ကွန်ပေါင်း) (50Kg) တစ်အိတ်လျှင် (၁၄၂၀၀၀)ကျပ်၊ ဇာမဏီ(ကွန်ပေါင်း) (50Kg) တစ်အိတ်လျှင် (၇၇၀၀၀)ကျပ်၊ ပန်းဖူး(သစ်) (တရုတ်) (50Kg) တစ်အိတ်လျှင် (၉၅၀၀၀)ကျပ်နှင့် မျှားကမ္ဘာ(တရုတ်) (50Kg) တစ်အိတ်လျှင် (၉၀၀၀၀)ကျပ်တို့ဖြင့် အရောင်းအဝယ်ရှိခဲ့ပြီး၊ ပိုးသတ်ဆေးအမျိုးအစားများ ဖြစ်သည့် စတား (အာမို) (100 CC )တစ်ဘူးလျှင် (၅၅၀၀)ကျပ်၊ လန်ဒါ (ဝိစာရ) (500 CC) တစ်ဘူးလျှင် (၁၇၅၀၀)ကျပ်၊ မိုရယ်မုန် (သြဘာ) (500 CC) တစ်ဘူးလျှင် (၂၅၅၀၀)ကျပ်၊ အစီဖိတ်(သြဘာ) (500g) တစ်ဘူးလျှင် (၁၈၀၀၀)ကျပ်၊ ရွှေတောနစ် (မြင်းကြား) (500 CC) တစ်ဘူးလျှင် (၁၁၀၀၀)ကျပ်နှင့် ဖို့စတင်း (သြဘာ) (1 liter) တစ်ဘူးလျှင် (၃၂၀၀၀) ကျပ် စသည်ဖြင့် အသီးသီးအရောင်းအဝယ်ဖြစ်ခဲ့ကြောင်းသိရှိရပါသည်။

        ယခုအပတ်တွင် ဓာတ်မြေသြဇာအမျိုးအစားများဖြစ်သည့် ပုလဲဓာတ်မြေဩဇာ (ရွှေတောင်) (50Kg)တစ်အိတ်လျှင် (၁၃၀၀၀၀)ကျပ်၊ တီစူပါ၄၆% သံကွင်း(တရုတ်) (50Kg) တစ်အိတ်လျှင်  (၉၅၀၀၀)ကျပ်၊ ကျွဲနက် ၁၅း၁၅း၁၅ (50Kg) တစ်အိတ်လျှင် (၁၅၂၅၀၀)ကျပ်၊ နိုက်ထိုဖောစကာ (သြဘာ) (50Kg) တစ်အိတ်လျှင် (၁၅၇၀၀၀)ကျပ်၊ ပန်းဖူး (မြန်မာ့သြဘာ) (50Kg) တစ်အိတ်လျှင် (၈၃၀၀၀)ကျပ်၊ MC (ကွန်ပေါင်း) (50Kg) တစ်အိတ်လျှင် (၁၄၂၀၀၀)ကျပ်၊ ဇာမဏီ(ကွန်ပေါင်း) (50Kg) တစ်အိတ်လျှင် (၇၇၀၀၀)ကျပ်၊ ပန်းဖူး(သစ်)(တရုတ်) (50Kg) တစ်အိတ်လျှင် (၉၁၀၀၀)ကျပ်နှင့် မျှားကမ္ဘာ(တရုတ်) (50Kg) တစ်အိတ်လျှင် (၈၇၀၀၀)ကျပ်တို့ဖြင့် အရောင်းအဝယ်ရှိခဲ့ပြီး၊ ပိုးသတ်ဆေးအမျိုးအစားများဖြစ်သည့် စတား (အာမို) (100 CC) တစ်ဘူးလျှင် (၅၅၀၀)ကျပ်၊ လန်ဒါ (ဝိစာရ) (500 CC) တစ်ဘူးလျှင် (၁၇၅၀၀)ကျပ် ၊ မိုရယ်မုန် (သြဘာ) (500 CC) တစ်ဘူးလျှင် (၂၅၀၀၀)ကျပ်၊ အစီဖိတ်(သြဘာ) (500g) တစ်ဘူးလျှင် (၁၈၀၀၀)ကျပ်၊ ရွှေတောနစ် (မြင်းကြား) (500 CC) တစ်ဘူးလျှင် (၁၁၀၀၀) ကျပ်နှင့် ဖို့စတင်း(သြဘာ) (1 liter) တစ်ဘူးလျှင် (၃၂၀၀၀) ကျပ်စသည်ဖြင့် အသီးသီးအရောင်းအဝယ်ဖြစ်ခဲ့သည့်အတွက် ဓာတ်မြေဩဇာနှင့် ပိုးသတ်ဆေးဈေးနှုန်းများမှာ အတက်၊ အကျအနည်းငယ်သာရှိပြီး ဈေးနှုန်းတည်ငြိမ်လျက်ရှိကြောင်းသိရှိရပါသည်။

DOCA(စစ်ကိုင်း)