ပြည်တွင်းကုန်သွယ်မှုသတင်း

          ပြည်ခရိုင်၊ ပြည်ကုန်စည်ဒိုင်တွင် အရောင်းအဝယ်ဖြစ်လျှက်ရှိသော မတ်ပဲ၊ ပဲတီစိမ်း၊ ပဲစင်းငုံ၊ ကုလားပဲ၊ ဘိုကိတ်သီးနှံများ၏ ဈေးနှုန်းများကို ယခင်လဈေးနှင့် ယခုလဈေးနှုန်းများကို နှိုင်းယှဉ် လေ့လာသိရှိရပါသည်။

မတ်ပဲ

        မတ်လပထမပတ်တွင် မတ်ပဲတစ်တင်းကို ၄၄၀၀၀ကျပ်၊ ဒုတိယပတ်တွင် ၄၅၅၀၀-၄၆၀၀၀ ကျပ်ဈေးဖြင့် အရောင်းအဝယ်သွက်ခဲ့ပြီး တစ်ရက်ကိုအိတ် ၅၀၀/၆၀၀ခန့် ရန်ကုန်အဝယ်ရှိခဲ့ပါသည်။ တတိယပတ်တွင် ပိဿာ(၂၀)ဝင် တစ်တင်းကို ၄၆၇၀၀-၄၇၀၀၀ကျပ်ဈေးဖြင့် အဝယ်ရှိခဲ့ပြီး နောက်ဆုံးပတ်တွင် မတ်လအတွင်း မတ်ပဲဈေးအမြင့်ဆုံး ၄၉၀၀၀-၄၉၅၀၀ကျပ်ဖြင့် အရောင်း အဝယ်ရှိခဲ့ပြီး တစ်ရက်လျှင်အိတ် ၄၀၀-၅၀၀ခန့် လှောင်သမားနှင့် ရန်ကုန်တင်ပို့မှုရှိခဲ့ပါသည်။ ဧပြီလပထမပတ်တွင် ပဲတစ်တင်းကို ၄၆၀၀၀-၄၆၅၀၀-၄၇၀၀၀ကျပ်ထိ ဈေးကျခဲ့ပါသည်။ ဈေးကျခဲ့ သော်လည်း ရောင်းဝယ်မှုမှာ တစ်ရက်လျှင် အိတ် ၃၀၀/၄၀၀ခန့် အဝယ်ရှိခဲ့ပါသည်။ သင်္ကြန်ပြီး ကာလတွင် မတ်ပဲဈေးပြန်တက်လာပြီး ၄၈၅၀၀-၄၉၀၀၀ကျပ်ထိ ဈေးတက်လာခဲ့ရာ တစ်ရက်ကို အိတ် ၂၀၀/၃၀၀ခန့် အဝယ်ရှိခဲ့ပါသည်။ ဧပြီလနောက်ဆုံးပတ်တွင် ပဲတစ်တင်းလျှင် ၄၈၀၀၀-၄၈၅၀၀ကျပ်ဖြင့် အဝယ်ရှိခဲ့ပြီးတစ်ရက်ကို အိတ် ၁၀၀/၂၀၀ခန့်သာ အဝယ်ဖြစ်ခဲ့ပါသည်။

ပဲစင်းငုံ

        မတ်လပထမပတ်တွင် ပဲစင်းငုံသီးနှံဈေးတက်လာပြီး ပိဿာ(၂၀)ဝင် တစ်တင်းကို ၃၈၀၀၀ မှ ၄၄၀၀၀ကျပ်ထိ၊ ဒုတိယပတ်တွင် ၄၄၅၀၀-၄၅၀၀၀ကျပ်ထိ ဈေးတက်ခဲ့ပါသည်။ အရောင်းအဝယ်ဖြစ်မှုမှာ တစ်ရက်ကိုအိတ် ၆၀၀/၇၀၀ခန့် အဝယ်ရှိခဲ့ပြီး တတိယပတ်တွင် ပဲတစ်တင်းကို ၄၄၅၀၀ကျပ်ဈေးဖြင့် အရောင်းအဝယ်ရှိခဲ့ပါသည်။ နောက်ဆုံးပတ်တွင် ပဲတစ်တင်းကို ၄၅၀၀၀ကျပ် ဈေးဖြင့် တစ်ရက်လျှင်အိတ် ၇၀၀/၈၀၀ခန့် ရန်ကုန်တင်ပို့မှုရှိခဲ့ပါသည်။ ဧပြီလအစတွင် ပဲစင်းငုံတစ်တင်းကို ၄၅၀၀၀ကျပ်မှ ၄၃၅၀၀ကျပ်ထိ ဈေးကျလာခဲ့ပြီး တစ်ရက်ကိုအိတ် ၂၀၀/၃၀၀ခန့် ရန်ကုန် အဝယ်ရှိခဲ့ပါသည်။ တတိယပတ်တွင် ပဲစင်းငုံတစ်တင်းကို ၄၂၅၀၀ကျပ်ဈေးသာရှိပြီး အရောင်းအဝယ်အနည်းငယ်သာဖြစ်ခဲ့ပါသည်။ တစ်ရက်ကိုအိတ် ၁၀၀/၁၅၀ခန့်သာအဝယ်ရှိပြီး လက်ကျန်ပဲများသာ အရောင်းအဝယ်ဖြစ်လျှက်ရှိပါသည်။ ဧပြီနောက်ဆုံးပတ်တွင် ပဲစင်းငုံတစ်တင်းကို ၄၄၀၀၀ ကျပ်ဈေးဖြင့် ရန်ကုန်အဝယ်ရှိခဲ့ပြီး တစ်ရက်ကို အိတ် ၂၀၀ခန့်သာ တင်ပို့မှုရှိပါသည်။

ကုလားပဲ

        မတ်လပထမပတ်တွင် ကုလားပဲသီးနှံဈေးမှာ မြင့်လာပြီး တစ်တင်းကို ၄၂၅၀၀-၄၄၀၀၀ ကျပ်ဈေးဖြစ်ပြီး ဒုတိယပတ်တွင် ပဲစင်းငုံဈေးမြင့်လာပြီး တစ်တင်းကို ၄၅၀၀၀-၄၅၅၀၀-၄၆၀၀၀ ကျပ်ဖြင့် အရောင်းသွက်နေခဲ့ပါသည်။ တတိယပတ်တွင် ပဲတစ်တင်းကို ၄၅၀၀၀-၄၅၅၀၀ကျပ်မှ ၄၄၀၀၀ကျပ်ထိ ဈေးကျလာခဲ့ပြီး တစ်ရက်ကိုအိတ် ၈၀၀/၉၀၀ခန့် မြို့တွင်းနှင့် ရန်ကုန် အဝယ်ရှိခဲ့ ပါသည်။ မတ်လ နောက်ဆုံးပတ်တွင် ပဲတစ်တင်းကို ၄၃၀၀၀-၄၃၅၀၀ကျပ်ထိ ဈေးကျလာခဲ့ပြီး ခွဲစက်သမားနှင့် ရန်ကုန်အဝယ်ရှိခဲ့ပါသည်။ ဧပြီ တတိယပတ်တွင် ကုလားပဲ ဈေးပြန်မြင့်လာပြီး ပဲတစ်တင်းကို ၄၅၀၀၀-၄၅၅၀၀-၄၆၀၀၀ကျပ်ဖြစ်ခဲ့ပါသည်။ နောက်ဆုံးပတ်တွင် ပဲတစ်တင်းကို ၄၅၃၀၀-၄၅၅၀၀ကျပ်ဖြင့် တစ်ရက်အိတ် ၃၀၀/၄၀၀ခန့် မြို့တွင်း ခွဲစက်သမားများ အဝယ်ရှိခဲ့ပါသည်။

ဘိုကိတ်ပဲ

        မတ်လပထမပတ်တွင် ဘိုကိတ်ပဲတစ်တင်းကို ၃၂၅၀၀ကျပ်မှ ၃၅၀၀၀ကျပ်ထိ ဈေးမြင့်လာခဲ့ပြီး ဒုတိယပတ်တွင် ပဲတစ်တင်းကို ၃၄၀၀၀ကျပ်ဈေးဖြစ်လာခဲ့ပါသည်။ တစ်ရက်လျှင် အိတ်၅၀/၁၀၀ခန့် ရန်ကုန်အဝယ်ရှိခဲ့ပါသည်။ တတိယပတ်တွင် ဘိုကိတ်ပဲဈေးပြန်တက်လာခဲ့ပြီး တစ်တင်းကို ၃၅၀၀၀-၃၅၅၀၀ကျပ်ဖြင့် အဝယ်ရှိခဲ့ပြီး စတုတ္ထပတ်တွင် ပဲတစ်တင်းကို ၃၆၀၀၀ကျပ် ဈေးထိ မြင့်လာကာ တစ်ရက်ကိုအိတ် ၄၀/၅၀ခန့် အဝယ်ရှိခဲ့ပါသည်။ ဧပြီလပထမပတ်တွင် ပဲတစ်တင်းကို ၃၅၀၀၀-၃၅၅၀၀ ကျပ်ဈေးဖြစ်ပြီး ဒုတိယပတ်တွင် ဘိုကိတ်ပဲဈေး တစ်တင်းလျှင် ၃၅၀၀၀-၃၅၅၀၀ကျပ်ဖြင့် ဈေးငြိမ်နေခဲ့ပါသည်။ တတိယပတ်တွင် ပဲတစ်တင်းကို ၃၅၅၀၀ကျပ်ဖြင့် တစ်ရက်လျှင် အိတ်၄၀/၅၀ခန့် အဝယ်ရှိပြီး နောက်ဆုံးပတ်တွင် ပဲတစ်တင်းကို ၃၄၀၀၀ကျပ်ဖြင့် ဈေးကျလာခဲ့ကြောင်းသိရှိရပါသည်။

        ပြည်ကုန်စည်ဒိုင်တွင် ယခင်လဈေးနှုန်းနှင့် ယခုလဈေးနှုန်းမှာ သိပ်မကွာခြားဘဲ အရောင်းအဝယ်ဖြစ်မှုမှာ ယခုလ သင်္ကြန်ပိတ်ရက်များကြောင့် အရောင်းအဝယ်နည်းနေပြီး ယခင်လကလောက် အရောင်းအဝယ်မဖြစ်ကြောင်းလေ့လာသိရှိရပါသည်။

DOCA(ပဲခူး)

           စစ်ကိုင်းတိုင်းဒေသကြီး မုံရွာမြို့ရှိ ဈေးများတွင် ယခုရက်သတ္တပတ်အတွင်း ခရမ်းချဉ်သီး (ပိဿာ)ကျပ် ၄၀၀ မှ ၇၀၀ အတွင်း၊ ဂေါ်ဖီထုတ်(တစ်ထုတ်) ကျပ် ၁၀၀၀ မှ ၁၂၀၀ အတွင်း ၊ ပန်းဂေါ်ဖီ ‌သေး(ထုတ်) ၂၀၀ မှ ၃၀၀ အ တွင်း၊ အားလူး (ပိဿာ) ကျပ် ၂၀၀၀ မှ ၂၄၀၀ အတွင်း၊ ငရုတ်ခြောက် (ပိဿာ) ကျပ် ၅၅၀၀ မှ ၆၀၀၀ အတွင်း၊ ပဲသီး (ပဲထောင့်ရှည်) (တစ်စီး) ကျပ် ၃၀၀ မှ ၄၀၀ အတွင်း၊ ကြက်သွန်နီ (ပိဿာ) ကျပ် ၈၀၀ မှ ၁၀၀၀ အတွင်း၊ ကြက်သွန်ဖြူ(ရှမ်းစ) (ပိဿာ) ကျပ် ၁၅၀၀ မှ ၂၀၀၀ အတွင်း၊ ကြက်သွန်ဖြူ(ကြူကုတ်) (ပိဿာ) ကျပ် ၄၅၀၀ မှ ၅၀၀၀ အတွင်း၊ ဖရဲသီး(အကြီး၊ အလတ်၊ အသေး) ကျပ် ၁၅၀၀ မှ ၅၀၀၀ အတွင်း ဈေးရှိကြောင်း သိရသည်။

          ယခင်ပတ်နှင့်နှိုင်းယှဉ်ပါက ခရမ်းချဉ်သီး ဈေးနှုန်းမှာ၁ပိဿာလျှင် ၂၀၀ ကျပ်နီးပါးဈေးတက်လာ၍ အခြားကုန်ဈေးနှုန်းများမှာ ဈေးငြိမ်နေကြောင်းသိရသည်။ ခရမ်းချဉ်သီး အဝင်နည်းပါးလာ၍ ဈေးနှုန်းတက်ရခြင်းဖြစ်ကြောင်း ဟင်းသီးဟင်းရွက် ရောင်းချသူများထံမှ သိရှိရသည်။

DOCA(စစ်ကိုင်း)

            ဆားလင်းကြီးမြို့နယ်သည် မုံရွာမြို့၏ အနောက်ဖက်ကမ်းတွင်တည်ရှိပြီး ချင်းတွင်းမြစ်ရိုး တစ်လျှောက်ရှိ နတ်ကျွန်း၊ နတ်စက်၊ ပေါင်းဝ၊ ခွန်သာ၊ သံလျှက်ကိုင်းနှင့် ဆားခါးကျေးရွာများမှာ ကိုင်းကျွန်းလယ်ယာလုပ်ငန်းများနှင့် တွဲဖက်၍ ရိုးရာသင်ဖြူးဖျာရက်လုပ်သည့်လုပ်ငန်းကို ရှေးယခင် ကတည်းက မိရိုးဖလာလုပ်ကိုင်ခဲ့ကြကြောင်း ဒေသခံများထံမှ သိရှိ ရပါသည်။ ကိုင်းကျွန်းသီးနှံများ ရိတ်သိမ်းပြီးချိန်တွင် ဒေသခံအမျိုးသားအများစုမှာ ချင်းတွင်းမြစ်အထက်ပိုင်း ကလေးဝ၊ မော်လိုက်၊ ဟုမ္မလင်းနှင့် ခန္တီးဒေသများသို့တက်ကာ အရောင်းအဝယ်သွားရောက်လုပ်ကိုင်ကြသလို အချို့မှာလည်း သစ်၊ ဝါးကြိမ်နှင့် သင်များကို ဝယ်ယူ၍ ချင်းတွင်းမြစ်အောက်ပိုင်းဒေသများသို့ ပြန်လည်ရောင်းချကြောင်းလည်း သိရှိရပါသည်။

          သင်ဖြူးဖျာရက်လုပ်သည့်သင်ထုံးများကို ချင်းတွင်းမြစ်အထက်ပိုင်းဒေသများဖြစ်သော ကလေးဝ၊ မော်လိုက်၊ ဟုမ္မလင်းနှင့် ခန္တီးဒေသများမှ ထွက်ရှိသည့်သင်ထုံးများကို မှာယူလုပ်ရကြောင်း သိရှိရသည်။ သင်ဖြူးဖျာရက်လုပ်မည့်သင်ထုံးများကို ရေထဲတွင်တစ်ညစိမ်ထားရပြီး ရေစိမ်ပြီးသည့် သင်ထုံးများကို ဓားဖြင့်အလွှာသုံးလွှာထိလွှာယူပြီး ရေစိုအဝတ်ဖြင့်ပတ်ထားရကြောင်း၊ သင်ထုံး၏ အပေါ်ယံ(အချော)ပိုင်း၊ အလယ်(အူ)ပိုင်းနှင့် အောက်(အကြမ်း)ပိုင်းတို့ကို အဆင့်အလိုက်လွှာယူ ပြီးမှရက်လုပ်ရကြောင်း၊ သင်ထုံးအပေါ်ယံ (အချော)ပိုင်းနှင့် အောက်ခံ(အကြမ်း)ပိုင်းတို့ကို သီးခြားစီ ရက်လုပ်ပြီးမှ သင်(အချော)ပိုင်းကိုအပေါ်ကထားပြီး သင်(အကြမ်း)ပိုင်းကိုအောက်ခံအဖြစ် အသုံးပြုကာနှစ်ချပ်တွဲလျှက် ကတ္တီပါအစဖြင့် အနားကွက်ချုပ်လုပ်ပြီးမှသာ သင်ဖြူးဖျာတစ်ချပ်ရရှိကြောင်း လေ့လာသိရှိရပါသည်။

          နတ်ကျွန်း၊ ပေါင်းဝနှင့် သံလျှက်ကိုင်းကျေးရွာများတွင် သင်ဖြူးဖျာရက်လုပ်ငန်းကို အိမ်တိုင်းနီးပါးရက်လုပ်ကြပြီး တစ်ယောက်အိပ်၊ နှစ်ယောက်အိပ်၊ မိသားစုအိပ်၊ တန်းလျားခင်းနှင့် နေကထိုင်ဆိုဒ်သင်ဖြူးဖျာများကို အဓိကရက်လုပ်ကြောင်း သိရှိရပါသည်။ သင်ဖြူးဖျာရက်လုပ်ရန် အတွက် သုံးတောင်သင်တစ်ထုံးကို (၂၅၀၀၀) ကျပ်နှင့် ငါးတောင်သင်တစ်ထုံးကို (၅၀၀၀၀)ကျပ်ပေး၍ ဝယ်ယူရက်လုပ်ရကြောင်း၊ သုံးတောင်သင်တစ်ထုံးကို တစ်ယောက်အိပ်သင်ဖျာ (အလျား(၄)တောင်၊ အနံ(၂)တောင်)ရက်လုပ်ပါက သင်ဖြူးဖျာ(၄) ချပ်ရရှိကြောင်း၊ မိသားစုအိပ်သင်ဖျာ (အလျား (၇)တောင်၊ အနံ (၆)တောင်) ရက်လုပ်ပါက သင်ဖြူးဖျာ (၄) ချပ်ရရှိကြောင်း၊ နှစ်ယောက်အိပ်သင်ဖျာ (အလျား(၄)တောင်၊ အနံ (၃)တောင်ရက်လုပ်ပါက (၅) ချပ်ရရှိကြောင်း၊ သင်ဖြူးဖျာတစ်ချပ်ကို (၃) ရက်မျှ ရက်လုပ်ရကြောင်း လေ့လာသိရှိရပါသည်။

          လက်ရှိဒေသတွင်း၌ တစ်ယောက်အိပ်သင်ဖြူးဖျာတစ်ချပ်ကို(၁၀၀၀၀)ကျပ်၊ နှစ်ယောက်အိပ် သင်ဖြူးဖျာတစ်ချပ်ကို(၂၅၀၀၀)ကျပ်၊ မိသားစုအိပ်သင်ဖြူးဖျာတစ်ချပ်ကို (၃၅၀၀၀၀)ကျပ်ဖြင့် အရောင်းအဝယ်ရှိကြောင်း ဒေသတွင်းအော်ဒါအမှာနှင့် မုံရွာမြို့ရှိသင်ဖြူးဖျာ လက်က္ကားဆိုင်များသို့ အဓိကတင်ပို့နေရကြောင်း သိရှိရပါသည်။

          လက်ရှိအချိန်တွင် သင်ဖြူးဖျာရက်လုပ်ငန်းများမှာ ယခင်နှစ်များကကဲ့သို့ အရောင်းအဝယ် ဖြစ်မှုနည်းပါးကြောင်း၊  ဒေသတွင်း(၁၂)ရာသီပွဲတော်များမကျင်းပနိုင်ခြင်းကလည်း သင်ဖြူးဖျာရက် လုပ်ငန်းများကိုများစွာထိခိုက်ကြောင်း၊ ဒေသတွင်းအော်ဒါမှာသူများနှင့် မုံရွာမြို့ရှိ သင်ဖြူးဖျာ အရောင်းဆိုင်များကိုသာ မှီခိုနေရကြောင်း၊ သင်ဖြူးဖျာရက်လုပ်သည့်လုပ်ငန်းရှင်များထံမှ သိရှိရသည်။ ဆားလင်းကြီးဒေသတွင်းရှိ သင်ဖြူးဖျာရက်လုပ်သည့်လုပ်ငန်းများမှာ မိရိုးဖလာလုပ်ငန်းဖြစ်သည့် အလျှောက် ဒေသတွင်းမှအမျိုးသမီးများအတွက် အလုပ်အကိုင်အခွင့်အလမ်းများ ရရှိနေသော်လည်း အဘက်ဘက်မှကုန်ဈေးနှုန်းများ အဆမတန်မြင့်တက်နေသည့်အတွက် လုပ်ငန်းဖြစ်ရုံမျှသာ ဆောင်ရွက်နေရကြောင်း၊ ကုန်ကြမ်းဝယ်ယူရရှိရေးအတွက် ငွေကြေးအရင်းအနှီးနှင့် ဈေးကွက်ဝယ်လက်ဖြန့်ဖြူးရာတွင် အခက်အခဲများနှင့်ရင်ဆိုင်နေရကြောင်း သင်ဖြူးဖျာရက်လုပ်သည့်လုပ်ငန်းရှင်များထံမှ သိရှိရပါသည်။

          ဆားလင်းကြီးဒေသတွင်းမှ သင်ဖြူးဖျာရက်လုပ်ငန်းများ ရေရှည်ရှင်သန်ရပ်တည်နိုင်ရေးအတွက် သက်ဆိုင်ရာအစိုးရဌာနအဖွဲ့အစည်းများမှ ကျေးရွာတစ်ရွာထုတ်ကုန်တစ်မျိုး (OVOP) အသွင်ဖြင့် အသင်း/ အစုအဖွဲ့များဖွဲ့စည်းပြီး လိုအပ်သောအရင်းအနှီးအတွက် ချေးငွေများ၊ နည်းပညာများနှင့် ဈေကွက်ရရှိရေးကိုပါ ချိတ်ဆက်ပံ့ပိုးပေးနိုင်ပါက ဒေသတွင်းမှသင်ဖြူးဖျာရက်လုပ်သည့်လုပ်ငန်းများ ရေရှည်ရပ်တည်နိုင်ပြီး ဖွံဖြိုးတိုးတက်လာနိုင်မည်ဖြစ်ပါကြောင်း ရေးသားတင်ပြလိုက်ရပါသည်။

DOCA(စစ်ကိုင်း)

         လွိုင်ကော်မြို့တွင် စက်သုံးဆီအရောင်းဆိုင်များပုံမှန်ရောင်းချလျက်ရှိပြီး စက်သုံးဆီဈေးနှုန်းများမှာ မေလပထမပတ်အတွင်း ဒီဇယ်ရိုးရိုးတစ် လီတာကို (၂၄၇၀) ကျပ်၊ ဒီဇယ်(ပရီမီယမ်) တစ်လီတာကို (၂၅၁၅) ကျပ်၊ ဓါတ်ဆီ 92 တစ်လီတာ ကို(၂၁၂၀)ကျပ်နှင့် ဓါတ်ဆီ 95 တစ်လီတာကို (၂၂၆၅)ကျပ်တို့ဖြင့် ရောင်းချလျက်ရှိပြီး ယခင် ဧပြီလစတုတ္ထပတ်အတွင်း ဒီဇယ်ရိုးရိုးတစ်လီတာကို (၂၄၂၀) ကျပ်၊ ဒီဇယ် (ပရီမီယမ်) တစ်လီတာကို(၂၄၆၅) ကျပ်၊ ဓါတ်ဆီ 92 တစ်လီတာကို (၂၀၈၀)ကျပ်နှင့် ဓါတ်ဆီ 95 တစ်လီတာကို (၂၂၂၀) ကျပ်သာရှိခဲ့ပြီး ယခုမေလပထမပတ် နှင့် ယခင် ဧပြီလစတုတ္ထပတ်အတွင်း ဖြစ်ပေါ်နေသော ဈေးနှုန်းများကို နှိုင်းယှဉ်ကြည့်လျှင် ဒီဇယ်ရိုးရိုး တစ်လီ တာကို (၅၀) ကျပ်၊ ဒီဇယ် (ပရီမီယမ်) တစ်လီတာကို (၅၀) ကျပ်၊ ဓါတ်ဆီ 92 တစ်လီတာ ကို(၄၀) ကျပ်နှင့်ဓါတ်ဆီ (95) တစ်လီတာ ကို(၄၅)ကျပ် ကွာဟလျက်ရှိပြီး ဈေးနှုန်းအနည်းငယ် မြှင့်တက် လျှက်ရှိပါကြောင်း တွေ့ရပြီး ယခင် ဧပြီလစတုတ္ထပတ်ထက် ဈေးနှုန်းအနည်းငယ်မြင့်တက်နေခြင်းမှာ လမ်းပန်းဆက်သွယ်ရေး အခြေအနေအရ သယ်ယူပို့ဆောင်ရေးအခက်အခဲများကြောင့် သယ်ယူစရိတ် အနည်းငယ် မြှင့်တက်လာခြင်းကြောင့်ဖြစ်သည်ဟု သိရှိရပါသည်။

DOCA(ကယား)

                ဆောင်းကြက်သွန်နီ(နွေပင်လေး)ကို ၂၀၂၁ ခုနှစ် ၊ နိုဝင်ဘာလ၊ဒီဇင်ဘာနှင့်ဇန္နဝါရီ လဆန်းတို့တွင် စိုက်ပျိုးကြပြီး စိုက်ပျိုးသက်တမ်း ရက် ၉၀ ၊ ၁၀၀ တွင်ရိတ်သိမ်းကြသည်ဟု သိရှိရပါသည်။ဆောင်းကြက်သွန်နီ(နွေပင်လေး) မစိုက်ပျိုးမီ ရက် (၄၀၊၄၅) အလိုမှစ၍ ကြိုတင်၍ ၃ ပေ x ၄၀ ၊ ၃ ပေ x ၅၀ ပေ နှင့် ၃ ပေ x ၆၀ ပေ အကျယ်ဘောင်များခတ်ကာ မြေဆွေးချ၊မျိုးစေ့ချ၍ ပျိုးပင်ပေါက်များရအောင် ရေလောင်းပေါင်းသင် ပြုစုပျိုးထောင်ရသည်ဟု သိရှိရပါသည်။ ၎င်းမှ ပျိုးပင် ရက် ၄၀ ၊ ၅၀ သက်တမ်းအရောက်တွင် စိုက်ပျိုးရန်ပြုပြင်ထားသည့်မြေကွက်အတွင်းသို့ ပြောင်းရွှေ့ စိုက်ပျိုးကြပါသည်။ မိုးကြက်သွန်နီ၊ဆောင်းကြက်သွန်နီ ရာသီအမှန်စိုက်ပျိုးခြင်းကို ဒေသအခေါ်အဝေါ်အရ တော်(၂)တော်အမီ စိုက်ပျိုးကြရသည်လို့လဲ အစွဲပြုမှတ်သားထားကြပါကြောင်း မိုးကြက်သွန်နီဆိုလျှင် တော်သလင်းလနှင့် ဆောင်းကြက်သွန်နီ(နွေပင်လေး)ဆိုလျှင် နတ်တော် လတွင် စိုက်ပျိုးကြပါသည်။ မြင်းခြံခရိုင်အနေဖြင့် ဆောင်းကြက်သွန်နီ(နွေပင်လေး) စိုက်ဧက ၂၀၃၆၆ ဧက စိုက်ပျိုး ခဲ့ပြီး ၂၀၃၂၉ ဧက ရိတ်သိမ်းနိုင်ခဲ့ပါသည်။ ၂၀၂၂ ခုနှစ် မတ်လ ၂၂ ရက်နေ့တွင် နေရာအနှံ့မုန်တိုင်းငယ် ဖြတ်ကျော်ဝင်ရောက်ခဲ့သည့်အတွက် မြင်းခြံခရိုင် ၊ တောင်သာမြို့ ဆင်းတဲဝ ချောင်းစပ်၊ချောင်း ဘေးတလျှောက် ရေလွှမ်းမိုးခဲ့သည့်အတွက် စိုက်ပျိုးဧက (၃၆) ဧကနှင့် မြင်းခြံ (၁) ဧက ရေနစ်မြုပ် ပျက်စီခဲ့သည့်အတွက် (၃၇) ဧကလျော့နည်း ရိတ်သိမ်းခဲ့ရသည်ဟု သက်ဆိုင်ရာဌာနမှ ‌လေ့လာသိရှိ ရပါသည်။ ဆောင်းကြက်သွန်နီ(နွေပင်လေး)ကို မြို့နယ်အလိုက် စိုက်ပျိုးရိတ် သိမ်းထွက်ရှိမှုအနေ ဖြင့်မြင်းခြံမြို့နယ်တွင် စိုက်ပျိုးမှု ၈၆၀၀ ဧက နှင့် ရိတ်သိမ်းပြီးဧက ၈၅၉၉ ဧက ၊ တောင်သာမြို့နယ်တွင် စိုက်ပျိုးမှု ၉၂၂၄ ဧက နှင့် ရိတ်သိမ်းပြီးဧက ၉၁၈၈ ဧက ၊ နွားထိုးကြီးမြို့နယ်တွင် စိုက်ပျိုးမှု ၁၅၀၆ ဧက နှင့် ရိတ်သိမ်းဧက ၁၅၀၆ ဧကနှင့် ငါန်းဇွန်မြို့နယ်တွင် စိုက်ပျိုးပြီးဧက ၁၀၃၆ ဧကနှင့် ရိတ်သိမ်းပြီးဧက ၁၀၃၆ ဧကရှိပြီး (၁) ဧက ပျမ်းမျှအထွက်ပိဿာ ၃၄၅၄.၃၀ ပိဿာထွက်ရှိခဲ့သဖြင့် မြင်းခြံခရိုင်အနေဖြင့် ၇၀၂၂၂၅၁၆ ပိဿာ ထွက်ရှိကြောင်း သိရှိရပါသည်။ စိုက်ပျိုးထွက်ရှိသော ဆောင်းကြက်သွန်နီ(နွေပင်လေး)များအား ဈေးကွက်သို့ တင်ပို့ရောင်းချရာတွင် မြင်းခြံခရိုင် ၊ မြင်းခြံကုန်စည်ဒိုင် ကုန်အဝင်အနေဖြင့် သင်္ကြန် အခါပြီး ၁၉-၄-၂၀၂၂ ရက်နေ့တွင် ကုန်ချိန် ၆၅၀၀၀ ပိဿာ ခန့်ဝင်ရောက်ခဲ့ပြီး ဈေးနှုန်းအနေဖြင့် ကြက်သွန်အရည်အသွေးနှင့်အကြီး ၊ အသေးအပေါ်မူတည်၍ တစ်ပိဿာ ၂၅၀ ၊ ၃၀၀ ၊ ၃၅၀ ၊ ၄၀၀ ၊ ၄၅၀ ကျပ် နှင့် အမြင့်ဆုံးဈေး ၆၅၀ ကျပ် ပေါက်ဈေးရှိကြောင်းသိရှိရပါသည်။ သင်္ကြန်မတိုင်မီနှင့် သင်္ကြန်ပြီးကာလအနေဖြင့် ဈေးနှုန်းအပြောင်းအလဲမရှိ ဈေးနှုန်းတည်ငြိမ်လျက်ရှိကြောင်း ကုန်သည်လုပ်ငန်းရှင်တစ်ဦး၏ ပြောကြားမှုအရ သိရှိရပါသည်။

DOCA(မန္တလေး)