ကုန်သွယ်မှုသတင်းများ
တောင်ငူမြို့နယ်၊ စစ်တောင်းမြစ်အရှေ့ဘက်ကမ်းရှိ ပေါင်းလောင်းတိမ်ရွာသည် ဟင်းသီးဟင်းရွက်များကိုစိုက်ပျိုးလျက်ရှိရာ ကန်စွန်းရွက်စိုက်ခင်းမှ ဝင်ငွေရရှိလျက်ရှိပါသည်။ ကန်စွန်းရွက် (၀.၁၀)ဧကတွင် ရက်(၂၀)လျှင် တစ်ကြိမ်ခူးဆွတ်နိုင်ကြောင်း၊ တစ်ကြိမ်ခူးလျှင် အစည်း ၂၀၀ခန့်ရကြောင်းသိရပါသည်။
ကရင်ပြည်နယ်၊ သံတောင်ကြီးဒေသမှ ဝါးပိုးမျှစ်ချဉ်များသည် နှစ်စဉ် ဇွန်လဆန်းခန့်တွင်ထွက်ရှိပြီး ၎င်းကို တောင်ငူမြို့ အရှေ့ဘက် (၅)မိုင်ခန့်ရှိ ပွဲရုံများသို့ ပေးပို့ရောင်းချလျက်ရှိပါသည်။
တောင်ငူမြို့ ညောင်ပင်ဈေးရှိ ဘုရားပန်းဆိုင်များတွင် ပန်းထိမ်ငိုပန်းများ ရောင်းအားကောင်းလျက်ရှိပါသည်။ ပန်းထိမ်ငိုပန်းများသည် အခြားပန်းများထက်စာလျှင် ရက်တာရှည်ခံသဖြင့် လူကြိုက်များခြင်းဖြစ်ပါသည်။
တောင်ငူမြို့ ညောင်ပင်လေးဈေးသို့ အညာဒေသထွက် ပဲလိပ်ပြာများကို လာရောက်ရောင်းချလျက်ရှိပါသည်။
ယခင်နှစ်တွင် ပဲလိပ်ပြာ ၂၅ကျပ်သားလျှင် ၁၈၀၀ကျပ်၊ တစ်ပိဿာယူလျှင် ၆၀၀၀ကျပ်ရှိခဲ့ပါသည်။ ၂၀၂၄ခုနှစ်၊ ဩဂုတ်လ၊ တတိယအပတ်တွင် ပဲလိပ်ပြာ ၂၅ကျပ်သားလျှင် ၃၀၀၀ကျပ်၊ တစ်ပိဿာလျှင် ၁၀၀၀၀ကျပ်ရှိသဖြင့် ယခင်နှစ်ထက် တစ်ပိဿာလျှင် ၄၀၀၀ကျပ်ဈေးနှုန်းမြင့်တက်လာပါသည်။
ဘူးသီးသည် မြန်မာ့ခြံထွက် သစ်သီးဝလံတစ်မျိုးဖြစ်ပါသည်။ တောင်ငူမြို့အနီးရှိကျေးရွာများတွင် ဘူးပင်များကို တစ်နိုင်တစ်ပိုင်စိုက်ပျိုးကြသူများ အပိုဝင်ငွေရရှိကြပါသည်။ ယခုအခါတွင် ဘူးသီးများလှိုင်လှိုင်ပေါ်နေပြီဖြစ်ရာ တောင်ငူမြို့ပေါ်ရှိ ဈေးများတွင် ရောင်းချလျက်ရှိနေပါသည်။
