ကျန်းမာရေးအတွက် အကျိုးကျေးဇူးများစွာရရှိသော အဝါရောင်ရွှေဖရုံသီးသည် အသီးသာမက အရွက်ညွန့်နှင့် အစေ့အထိပါ အသုံးဝင်ပြီး ချိုသောအရသာရှိကာ ကလေးငယ်များအတွက် ဝါ၊ စိမ်း၊ နီ ဖြည့်စွက်စာအဖြစ် ကျွေးသင့်၍ အာဟာရဓါတ်များစွာပါဝင်သောအသီး တစ်မျိုးဖြစ်သဖြင့် ဈေးကွက်ခိုင်မာရရှိပြီးဖြစ်ကာ ပြည်ဈေးကွက်သို့ ပုတီးကုန်း၊ ဝက်ပုတ်၊ ရွှေတောင်၊ ထန်းကုန်း၊ ဇီးအုပ်၊ နတ်တလင်း စသည့်နယ်ဘက်များမှ ဝင်ရောက်လျက်ရှိပါသည်။
ရွှေဖရုံသီးကို ကြက်သားနှင့်ရော၍သော်လည်းကောင်း၊ ပါးပါးလှီး၍ဖရုံညွန့်၊ ငရုတ်သီးစိမ်း တို့နှင့် ဆီပြန်ချက်၍သော်လည်းကောင်း၊ မျှစ်နှင့် ဖရုံညွှန့်၊ ခရမ်းသီး၊ ဘူးသီးတို့နှင့်ရော၍ အရည်သောက်ဟင်းချက်၍သော်လည်းကောင်း၊ ရွှေဖရုံသီးကိုပေါင်း၍ ဆီနှင့်တို့၍သော် လည်းကောင်း၊ ဖရုံသီးအခဲ၊ အပျစ်ချက်၍သော်လည်းကောင်း၊ ကြော်စား၍သော်လည်းကောင်း စားသောက်ကြပြီး ရွှေဖရုံသီးတွင် သံဓါတ်၊ အမျှင်ဓါတ်၊ မဂ္ဂနိစ်၊ ပိုတက်ဆီယမ်၊ ပရိုတင်း Vitamin A,C,E တို့ပါဝင်၍ ရွှေဖရုံရွက်တွင် သံဓါတ်၊ ကော့ပါး၊ အမိုင်နိုအက်စစ်၊ Vitamin A,C,B6 တို့ပါဝင်ကြောင်း သိရပါသည်။
အာဟာရဓါတ်စုံလင်စွာပါဝင်သဖြင့် အမြင်အာရုံကောင်းစေခြင်း၊ နှလုံးကျန်းမာရေး ကောင်း စေခြင်း၊ ကိုယ်ခံအားကောင်းစေခြင်း၊ အရိုးအဆစ်သန်မာပြီး အဆစ်ရောင်နာကို သက်သာစေခြင်းစသည့် ခန္ဓာကိုယ်ကျန်းမာစေရုံသာမက အလှအပရေးရာများဖြစ်သော အရေးအကြောင်း၊ အစက် အပြောက်များကို သက်သာစေခြင်းနှင့် ချွေးပေါက်များကို ကျဉ်းစေကာ ဆံပင်ကျွတ်ခြင်းကို ကာကွယ်ပေးခြင်း စသည့် အကျိုးကျေးဇူးများကိုရရှိစေပါသည်။
ပြည်မြို့ပေါ်ရှိ ဈေးများတွင် ဖရုံသီးအကြီးတစ်လုံးလျှင် ကျပ် (၃၀၀၀-၃၅၀၀)ခန့် ရှိပြီး လက်လေးလုံးခန့် တစ်စိပ်လျှင် ကျပ် (၄၀၀-၅၀၀)ဖြင့် ရောင်းချကြကာ လက်တစ်ဝိုင်းစာ အလုံးသေးများလည်း ဈေးကွက်အတွင်း ရောင်းချကြပြီး တစ်လုံးလျှင် ကျပ်(၅၀၀-၆၀၀)ရှိ၍ ဖရုံညွန့် ဈေးမှာ (၅)ပင်စည်းတစ်စည်းလျှင် ကျပ် (၃၀၀)၊ (၈)ပင်စည်း တစ်စည်းလျှင် ကျပ် (၄၅၀-၅၀၀) တို့ဖြင့် ရောင်းချမှုရှိကြောင်း သိရပါသည်။
DOCA(ပဲခူး)