တောင်ငူခရိုင်၊ ဖြူးမြို့နယ်၊ ဇေယျဝတီမြို့၊ သကြားစက်လမ်းမှ တံမြက်စည်းအချောလုပ်ငန်းသည် ရောင်းအားကောင်းလျက်ရှိပါသည်။ တံမြက်စည်းပြုလုပ်ရာတွင် လိုအပ်သောကုန်ကြမ်းများကို ဖြူးမြို့၊ အနောက်ဘက် ပဲခူးရိုးမတောင်ပေါ်မှ မှာယူပြီး သိုလှောင်ထားရပါသည်။ တံမြက်စည်းပြုလုပ်ရာတွင် ကြိမ်သည် မပါမဖြစ်သောပစ္စည်းဖြစ်ပါသည်။
တံမြက်စည်းစတင်ပြုလုပ်ရာတွင် တံမြက်စည်းတံမှ အခက်လေးများကိုဖဲ့ပြီး ၇ပင်ကို အရွက်နှင့်စည်းကာ ကြိမ်နှင့်ပတ်ပြီးပါက ခေါင်းပိုင်းရရှိပြီးဖြစ်ပါသည်။ အောက်ခြေပိုင်းကို ကြိမ်နှင့်ပြန်ကွပ်ရပါသည်။ တံမြက်စည်းတစ်ချောင်းလျှင် ကြိမ် ၅ချောင်းခန့်ကုန်ပါသည်။ တံမြက်စည်းအကြမ်းထည်များအား အပေါ်အောက်ကြိမ်ကွပ်ပြီးလျှင် တံမြက်စည်းအချောထည်ရရှိပြီးဖြစ်ပါသည်။
မိသားစုလုပ်ငန်းဖြစ်သဖြင့် တစ်နေ့လျှင် တံမြက်စည်း ၂၀ချောင်းခန့်ပြီးစီးပါသည်။ တံမြက်စည်းများကို ဒေသတွင်း ဖြူးမြို့နယ်တွင် ရောင်းချလျက်ရှိသကဲ့သို့ ရန်ကုန်၊ တောင်ငူမြို့များမှလည်းမှာယူပါသည်။ တံမြက်စည်းအချော (ရိုးရိုး) တစ်ချောင်းလျှင် ၁၅၀၀ကျပ်၊ တံမြက်စည်းအချော (ရှယ်) တစ်ချောင်းလျှင် ၂၀၀၀ကျပ်ဖြင့်ရောင်းချပါကြောင်း သိရှိရပါသည် ။
တံမြက်စည်းသည် အိမ်ရှင်မများအတွက် အိမ်သန့်ရှင်းရေးပြုလုပ်ရာတွင် မရှိမဖြစ်အသုံးဝင်သကဲ့သို့ ကျောင်းများ၊ ရုံးများတွင်လည်း သန့်ရှင်းရေးပြုလုပ်ရာတွင် အသုံးဝင်ပါသည်။ ဈေးနှုန်းသင့်တင့်သည့်တံမြက်စည်းများအား မြန်မာနိုင်ငံအနှံ့အပြားတွင် ကျယ်ကျယ်ပြန့်ပြန့်အသုံးပြုလျက်ရှိကြောင်း သိရပါသည်။
DOCA(ပဲခူး)