![](http://www.doca.gov.mm/sites/default/files/styles/consumer_inner_image__847x424_/public/ကုလားပဲရွက်_0.jpg?itok=7I4Ys0N3)
မန္တလေးတိုင်းဒေသကြီး ၊ ကျောက်ဆည်ခရိုင်တွင် ကုလားပဲ(ဆောင်း)များ စိုက်ပျိုးလျက်ရှိရာ ၂၀၂၃-၂၀၂၄ ဘဏ္ဍာနှစ်တွင် ကုလားပဲ(ဆောင်း) စိုက်ဧကအနေဖြင့် ကျောက်ဆည်မြို့နယ်တွင် (၈၂၀)ဧက၊စဉ့်ကိုင်မြို့နယ်တွင် (၁၉၄၆)ဧက၊မြစ်သားမြို့နယ်တွင် (၁၇၃၆)ဧက ၊ စုစုပေါင်း(၄၅၀၂)ဧက စိုက်ပျိုးပြီးဖြစ်ကြောင်း ၊လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၏ စာရင်းများအရ သိရှိရပါသည်။ ကျောက်ဆည်ခရိုင်အတွင်းရှိ ယာမြေများ၌ အောက်တိုဘာလ တတိယပတ်တွင် ကုလားပဲကို မိုးရေအစိုဓါတ်ဖြင့် စိုက်ပျိုးကြသလို အချို့မှာ မိုးရေအစိုဓါတ်အပြင် ရေစက်များဖြင့် ရေတင်၍ စိုက်ပျိုးကြကြောင်း ၊ ရေဖြင့်ထပ်မံတင်၍ စိုက်ပျိုးသော ယာမြေများသည် မိုးရေဖြင့်စိုက်ပျိုးသော ယာမြေများထက်ပို၍ ကောင်းမွန်ပြီး အထွက်နှုန်း ပိုမိုကောင်းမွန်ကြောင်း တောင်သူများထံမှ သိရှိရပါသည်။ တောင်သူများသည် ကုလားပဲမျိုးကို မိမိ၏အိမ်တွင် သေချာစွာသိမ်းဆည်းထားပြီး မျိုးအဖြစ် အသုံးပြုကြသလို အချို့တောင်သူများသည် ဝယ်ယူ၍ စိုက်ပျိုးကြကြောင်း ၊ ယခုအချိန်တွင် ကုလားပဲအပင်များ အသီးအပွင့် ဝေဝေဆာဆာဖြင့် အောင်မြင်စွာ ဖြစ်ထွန်းနေပြီဖြစ်ကြောင်း ၊ ကုန်ကျစရိတ်အနေဖြင့် တစ်ဧကလျှင် မျိုး၊ သွင်းအားစု ၊လုပ်သားခ၊ စုစုပေါင်း(၂၅၀၀၀၀)ကျပ် ဝန်းကျင် ကုန်ကျကြောင်း ၊ ကုလားပဲသည် ကုန်ကျစရိတ်သက်သာပြီး အချိန်ကုန်သက်သာခြင်းကြောင့် ဝင်ငွေတိုးပြီး နွေရာသီသုံးငွေအဖြစ် ရရှိခြင်းကြောင့် တောင်သူအများစုမှာ အများဆုံးစိုက်ပျိုး ကြကြောင်း ၊ ယာမြေများတွင် ကုလားပဲ(၁)ဧကလျှင် (၁)တင်းနှုန်း ပတ်ကြဲရပြီး လယ်မြေများတွင် (၁)ဧကလျှင် (၁)တင်းခွဲနှုန်း ပိုမို၍စိုက်ပျိုးရကြောင်း ၊ အကြောင်းရင်းမှာ ယာမြေများသည် လယ်မြေ များ ထက်မြေသန်ခြင်းကြောင့် ဖြစ်ပါသည်။ကုလားပဲများ ထွက်ရှိခြင်းမရှိသေးသော်လည်း ယခုအချိန် တွင် ဈေးနှုန်းအနေဖြင့် ကုလားပဲ(ရိုးရိုး) တစ်တင်း လျှင်(၈၇၀၀၀)ကျပ် ၊ ကုလားပဲ(V2)တစ်တင်း လျှင်(၁၀၀၀၀၀)ကျပ် ဈေးနှုန်းများဖြင့် အရောင်းအဝယ်ဖြစ်နေကြောင်း သိရှိရပါသည်။
DOCA(မန္တလေး)