မန္တလေးတိုင်းဒေသကြီး၊ မြင်းခြံခရိုင်၊ နွားထိုးကြီးမြို့နယ်တွင် ယခုဇန်နဝါရီလမှစ၍ ပဲစင်းငုံများ ရိတ်သိမ်းထွက်ပေါ်နေပြီဖြစ်ပါသည်။ ပဲစင်းငုံသီးနှံသည် အခြားသီးနှံများနှင့်မတူပဲ(၈)လ၊ (၉)လ ခန့်စိုက်ပျိုးရသော သက်တမ်းကြာမြင့်သောသီးနှံတစ်မျိုးဖြစ်ပါသည်။ မြန်မာနိုင်ငံအလယ်ပိုင်းဒေသများတွင် အများဆုံးစိုက်ပျိုးကြပါသည်။ စိုက်ပျိုးမှုအနေဖြင့် မေလနှင့်ဇွန်လများတွင် အများဆုံးစိုက် ပျိုးကြပြီး၊ ဇန်နဝါရီလနှင့်ဖေဖော်ဝါရီလတို့တွင် ရိတ်သိမ်းထွက်ပေါ်ပါသည်။ နွားထိုးကြီးမြို့နယ်နှင့် အနီးဝန်းကျင်ဒေသများ၌ ပဲစင်းငုံသီးနှံကို နှမ်း၊ မြေပဲတို့နှင့်သီးညှပ်စိုက်ပျိုးမှုမှာများပါသည်။ နွားထိုးကြီးမြို့နယ်အနေဖြင့် ၂၀၂၃-၂၀၂၄ ခုနှစ်တွင် ပဲစင်းငုံစိုက်ပျိုးမှုအနေဖြင့် (၇၇၁၀၁)ဧကစိုက်ပျိုးခဲ့ပြီး၊ လက်ရှိရိတ်သိမ်းပြီးစီးမှုအနေဖြင့် (၅၁၀၂၄)ဧက ရိတ်သိမ်းပြီးဖြစ်ကြောင်း သိရှိရပါသည်။ တစ်ဧက ပျမ်းမျှအထွက်နှုန်းအနေဖြင့် (၈.၂၅) တင်းနှုန်းဖြင့် တင်းပေါင်း(၄၂၀၉၄၈)တင်း ထွက်ရှိပြီဖြစ်ပါသည်။ ယခင်နှစ်တွင် ပဲစင်းငုံသီးနှံကို (၇၈၀၁၁)ဧက စိုက်ပျိုးနိုင်ခဲ့ပြီး တစ်ဧကပျမ်းမျှအထွက်နှုန်းမှာ (၆.၅၅) တင်းနှုန်းဖြင့် တင်းပေါင်း (၅၁၀၉၂၇)တင်း ထွက်ရှိခဲ့ပါသည်။ စိုက်ပျိုးမှုအနေဖြင့် ယခင်နှစ်နှင့် နှိုင်းယှဉ်လျှင် ယခုနှစ်စိုက်ပျိုးမှုမှာ (၉၁၀)ဧက လျော့နည်းခဲ့ပါသည်။ ယခုနှစ်စိုက်ပျိုးမှုတွင် အခြားစိုက်ပျိုးရက်သက်တမ်းတိုသည့် သီးနှံများစိုက်ပျိုးမှုများသောကြောင့် စိုက်ပျိုးဧကလျော့နည်းရခြင်း ဖြစ်ကြောင်း သိရှိရပါသည်။
ယခင်နှစ်ပဲစင်းငုံများ စတင်ထွက်ပေါ်ချိန်တွင် တစ်ပိဿာလျှင် (၃၀၀၀)ကျပ်ဝန်းကျင်ရှိခဲ့ပြီး၊ ယခု နှစ်ပဲစင်းငုံပေါ်ချိန်တွင် တစ်ပိဿာလျှင် (၅၂၀၀)ကျပ်ဝန်းကျင်ဖြင့် စတင်ဖြစ်ပေါ်ခဲ့ပါကြောင်း၊ ယခုလက်ရှိ ဇန်နဝါရီလဒုတိယပတ်တွင် တစ်ပိဿာလျှင် (၅၃၀၀/၅၄၀၀)ကျပ် ဝန်းကျင်များရှိပြီး၊ မြို့ပေါ် ကုန်သည်များမှ ဝယ်ယူစုဆောင်း၍ မန္တလေးမြို့သို့ တင်ပို့ရောင်းချကြကြောင်း ပွဲရုံပိုင်ရှင်တစ်ဦးထံမှ သိရှိရပါသည်။
DOCA(မန္တလေး)