စီးပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့် မြန်မာနိုင်ငံ ဆီကုန်သည်နှင့် ဆီလုပ်ငန်းရှင်များအသင်းတို့ ပူးပေါင်းစီစဉ်မှုဖြင့် စားသုံးသူပြည်သူများကို သက်သာသော ဈေးနှုန်းဖြင့် ဝယ်ယူရရှိနိုင်ရန် ရည်ရွယ်၍ ဗဟိုဘဏ်မှ ရည်ညွှန်းငွေလဲနှုန်းဖြင့် တိုက်ရိုက် ရောင်းချပေးသည့် နိုင်ငံခြားငွေ အမေရိကန်ဒေါ်လာဖြင့် ပြည်ပမှ မှာယူတင်သွင်းခဲ့သည့် စားအုန်းဆီများကို တိုင်းဒေသကြီး/ပြည်နယ်များရှိ လက်ကားရောင်းချသူများသို့ သက်သာသော ဈေးနှုန်းဖြင့် ဖြန့်ဖြူးရောင်းချပေးလျက်ရှိပါသည်။
အဆိုပါစားအုန်းဆီနှင့်ပတ်သက်၍ ရွှေဘိုခရိုင်အတွက် ဖြန့်ဖြူးရောင်းချခွင့်ရသော (၁၇၅)ပေပါကို ၂၉/၃၀.၃.၂၀၂၂ရက်များတွင် ရွှေဘိုမြို့ပေါ်ရှိ ရပ်ကွက်ဈေးများနှင့် စည်ပင်သာယာဈေး၊ ကုန်းဘောင်ဈေး၊ အောင်ဇေယျဈေးများတွင် ရောင်းချပေးလျက်ရှိပြီး စားသုံးသူရေးရာဦးစီးဌာန ရွှေဘိုခရိုင်ဦးစီးမှူးနှင့် ရွှေဘိုခရိုင် ဆီလုပ်ငန်းရှင်များအသင်းတို့ ပူးပေါင်း၍ အလေးချိန်မှန်ကန်မှုရှိမရှိနှင့် ဈေးနှုန်းမှန်ကန်မှုရှိမရှိ ကွင်းဆင်းစစ်ဆေး ခဲ့ပါသည်။ လူတစ်ဦးလျင် (၃)ပိဿာမှ (၅)ပိဿာအထိနှင့် တစ်ပိဿာလျင် (၅၉၅၀)နှုန်းဖြင့် ရောင်းချပေးလျက်ရှိကြောင်း သိရှိရပြီး ဝက်လက်မြို့နယ်နှင့် ရေဦးမြို့နယ် များတွင်လည်း အလားတူ ရောင်းချပေးလျက်ရှိကြောင်း သတင်းရရှိပါသည်။