စပါးအခြေခံဈေးနှုန်း သတ်မှတ်ချက်အား မလေးရှားအစိုးရ မြှင့်တင်

          မလေးရှားနိုင်ငံ၌ စပါးစံပြုအခြေခံဈေးနှုန်းကို မက်ထရစ်တစ်တန်လျှင် ရင်းဂစ်ငွေ ၁၃၀၀ နှုန်း သတ်မှတ်ထားရာမှ ၂၀၂၅ ခုနှစ် ဖေဖော်ဝါရီလ ၁၆ ရက်နေ့မှစတင်၍ ရင်းဂစ် ၁၅၀၀ နှုန်းသို့ တိုးမြှင့်မည်ဟု စိုက်ပျိုးရေးနှင့် စားနပ်ရိက္ခာဖူလုံရေးဝန်ကြီး Datuk Seri Mohamad Sabu က ထုတ်ဖော်ပြောကြားခဲ့သည်။

          မလေးရှား အောက်လွှတ်တော် (Dewan Rakyat) ၏ အစည်းအဝေးတစ်ရပ်၌ ရှင်းလင်း ပြောကြားရာတွင် ဝန်ကြီး Mohamad က ယခုပြင်ဆင်သတ်မှတ်ချက်သည် လုပ်သားခစရိတ်များ နှင့် ဓာတ်မြေဩဇာနှင့် ပိုးသတ်ဆေးတို့ကဲ့သို့သော စိုက်ပျိုးရေးသွင်းအားစုများ မြင့်တက်မှု၊ စပါး စိုက်ပျိုးထုတ်လုပ်ရာ၌ ကုန်ကျစရိတ်များစုစုပေါင်း၏ ဈေးကွက်ဈေးနှုန်းများအပေါ် သက်ရောက်မှု တို့ကို ထည့်သွင်းစဉ်းစားထားခြင်းဖြစ်ကြောင်း၊ ရှေ့လာမည့် ၆ လအတွင်း ဆန်စပါးထုတ်လုပ်မှု တွင် အစိုးရက ရင်းဂစ်သန်း ၁၅၀ အထိ ကျခံစိုက်ထုတ်ပေးမည်ဖြစ်၍ စပါးဈေးနှုန်းမြှင့်တင်မှုသည် ပြည်တွင်းထွက် ဆန်ဖြူ ၁ ကီလိုဂရမ်လျှင် ၂.၆၀ ရင်းဂစ်နှုန်း သတ်မှတ်ချက်ကို ပြောင်းလဲစေ လိမ့်မည် မဟုတ်ကြောင်း၊ ဈေးကွက်အတွင်း ဒေသထွက်ဆန်ဖြူ ၁၀ ကီလိုဂရမ်ဝင် အိတ်ပေါင်း ၂၄ သန်းခန့်အထိ ရောင်းချနိုင်ရေး အကောင်အထည်ဖော်ဆောင်ရွက်မည့် အစီအမံကို အပြီးသတ် ရေးဆွဲလျက်ရှိပြီး မကြာမီ ဝန်ကြီးဌာနက ထုတ်ပြန်ကြေညာမည်ဖြစ်ကြောင်း တင်ပြခဲ့သည်။

          ပြည်ပမှ တင်သွင်းလာသည့်ဆန်ဖြူအတွက် မက်ထရစ်တစ်တန်လျှင် ရင်းဂစ် ၂၈၀၀ နှုန်း သတ်မှတ်ထားရှိမှုကို ပြန်လည်သုံးသပ်ရန်အတွက် မလေးရှား စိုက်ပျိုးရေးနှင့် စားနပ်ရိက္ခာ ဖူလုံ ရေး ဝန်ကြီးဌာနသည် နိုင်ငံပိုင် ဆန်စပါးကုမ္ပဏီဖြစ်သော Padiberas Nasional Berhad (Bernas) နှင့် ညှိနှိုင်းဆွေးနွေးလျက်ရှိသည်။ ထို့အပြင် စပါးစိုက်ပျိုးမှုနှင့် ဆန်လုပ်ငန်းနယ်ပယ်သို့ ဒီဇယ်ဆီ အထောက်အပံ့ပေးအပ်ရန်အတွက်လည်း ပြည်တွင်းကုန်သွယ်မှုနှင့် လူနေမှုစရိတ်ရေးရာ ဝန်ကြီးဌာန၊ ဘဏ္ဍာရေးဝန်ကြီးဌာနတို့နှင့် ဆွေးနွေးလျက်ရှိသည်။

          ကာလရှည် ပြုပြင်ပြောင်းလဲမှုများအဖြစ် ၁၉၉၄ ခုနှစ် စပါးနှင့်ဆန် ထိန်းချုပ်ရေး အက် ဥပဒေကို စက်မှုလုပ်ငန်း ပြုပြင်ပြောင်းလဲမှုများနှင့်အညီ လိုက်ပါပြင်ဆင်နိုင်ရန် သုံးသပ်လျက် ရှိကြောင်း၊ စပါးနှင့်ဆန် အပါအဝင် လယ်ယာထွက် စားသောက်ကုန်ကဏ္ဍကို ကြီးကြပ်ထိန်းသိမ်း နိုင်ရန်အတွက် မလေးရှား လယ်ယာထွက်စားသောက်ကုန် ကြီးကြပ်မှုနှင့် ဥပဒေသက်ရောက်မှု အေဂျင်စီကို တည်ထောင်ဆောင်ရွက်ရန် အစိုးရက သဘောတူခွင့်ပြုထားပြီးဖြစ်ကြောင်း၊ လယ် ယာကဏ္ဍ၌ စိုက်ပျိုးစရိတ်မြင့်တက်မှု၊ ရာသီဥတုပြောင်းလဲမှု၊ ရောဂါပိုးမွှားကျရောက်မှု၊ ဆည်ရေ ပေးဝေရေး အခြေခံအဆောက်အအုံအားနည်းမှု စသည့် စိန်ခေါ်မှုများစွာကို ရင်ဆိုင်နေရသည့် စပါးစိုက် တောင်သူလယ်သမား ၂၃၀၁၁၉ ဦး၏ သက်သာချောင်ချိရေးကို အစိုးရက အစဉ်တစိုက် အလေးပေး လုပ်ဆောင်လျက်ရှိကြောင်း၊ သို့သော် ဆန်ဈေးနှုန်းများ ကြီးမြင့်မှုကို စဉ်းစားရမည်ဖြစ် ၍ လယ်သမားများက တောင်းဆိုထားသော စပါးတစ်တန် ရင်းဂစ် ၁၈၀၀ နှုန်းအထိ တိုက်ရိုက် တိုးမြှင့်ပေးနိုင်ခြင်းမရှိကြောင်း၊ လက်ရှိကာလ၌ အစိုးရက ဝင်ရောက်ထိန်းကျောင်း လုပ်ဆောင်နေ ပြီဖြစ်၍ ယခုဆုံးဖြတ်ချက်သည် မျှတမှုရှိမည်ဖြစ်ကြောင်း၊ သို့ရာတွင် ယခုသတ်မှတ်ချက်သည် ရှေ့လာမည့် ၆ လတာ ကာလအတွက်သာဖြစ်ပြီး တုံ့ပြန်ချက်များကို လက်ခံရယူလျက် ပြန်လည် သုံးသပ်မှုများ လုပ်ဆောင်သွားမည်ဖြစ်ကြောင်း ဝန်ကြီး Mohamad က ပြောကြားခဲ့သည်။

Source: Business Today, 13 Feb 2025(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)