ပဲခူးတိုင်းဒေသကြီး၊ ပြည်ခရိုင်၊ ပြည်မြို့နယ်အတွင်းရှိ ကျေးရွာများတွင် ခရမ်းကစော့ပင်များ စိုက်ပျိုးထားကြောင်းသိရသည်။ ပြည်မြို့အတွင်းရှိ ဈေးများတွင် ခရမ်းကစော့သီးများ အရောင်း သွက်နေကြောင်းသိရသည်။ ခရမ်းကစော့သီးတွင် ဗီတာမင် A , C သံဓါတ်စသည်တို့ အကျိုးပြု ဓါတ်ပေါင်းများ ပါဝင်ပြီး အစာစားချင်စိတ်ကိုဖြစ်စေခြင်း၊ အစာချေဖျက်ခြင်းကိုကူညီပေးခြင်း၊ အစာအိမ်အနာကို ပျောက်ကင်းစေခြင်း၊ လည်ချောင်းနာခြင်းကို သက်သာစေခြင်း၊ အသားဝါခြင်းကို ကာကွယ်ပေးခြင်း၊ ကျောက်ကပ်လုပ်ဆောင်ချက်များကို လှုံ့ဆော်ပေးခြင်းစသည့် အစွမ်းသတ္တိများ ရှိကြောင်း သိရသည်။
ခရမ်းကစော့သီးများကို မီးကင်ပြီးစားလို့ရသလို ပြုတ်ပြီး တို့စရာအဖြစ်စားသုံးကြပါသည်။ ခရမ်းချည်သီးဖြင့်လည်း ချက်ပြုတ်၍စားလို့ရကြောင်းသိရသည်။ ပြည်ဈေးကွက်တွင် ရောင်းချ နေသော ခရမ်းကစော့သီးဈေးနှုန်းများမှာ (၁၀)ကျပ်သားလျှင် (၅၀၀)ကျပ်၊ (၂၅)ကျပ်သားလျှင် (၁၀၀၀)ကျပ်တို့ဖြင့် ရောင်းချနေကြောင်းသိရသည်။
DOCA(ပဲခူး)