ပြည်ပကုန်သွယ်မှုသတင်းများ

      အောက်တိုဘာလ ၂၃ရက်နေ့တွင် ဘယ်ဂျီယမ်နိုင်ငံ၊ ဘရက်ဆဲလ်မြို့တွင် ကျင်းပပြုလုပ်ခဲ့သည့် ဗီယက်နမ်-ဘယ်ဂျီယမ် စီးပွားရေးဖိုရမ်သည် နှစ်နိုင်ငံလုံးမှ လုပ်ငန်းများအတွက် အခွင့်အလမ်းနှင့် ပူးပေါင်းဆောင်ရွက်မှုအခွင့်အလမ်းများရှာဖွေစေနိုင်ခဲ့ကြောင်းသိရပါသည်။ ဖိုရမ်တွင် ဘယ်ဂျီယမ်နိုင်ငံ အထက်လွှတ်တော်ဥက္ကဋ္ဌ Andries Goyffay က ဗီယက်နမ်သည် အနာဂတ်စီးပွားရေးကြီးထွားမှုကိုမြှင့်တင်ရာတွင် အဓိကနေရာတွင် ရှိနေခြင်းနှင့်အတူ ပြည်ပရင်းနှီးမြှုပ်နှံသူများအတွက် ဆွဲဆောင်မှုရှိသောနိုင်ငံထဲမှ တစ်ခုဖြစ်လာကြောင်း၊ စီးပွားရေးတည်ငြိမ်မှု၊ မဟာဗျူဟာမြောက်တည်နေရာ၊ ကမ္ဘာလုံးဆိုင်ရာကုန်သွယ်မှုသို့ အားကောင်းစွာဝင်ရောက်လာမှု၊ နိုင်ငံရေးတည်ငြိမ်မှု၊ ငယ်ရွယ်ပြီး ကျွမ်းကျင်သော လူဦးရေမြင့်တက်လာမှုတို့သည် ဗီယက်နမ်အား နိုင်ငံတကာအသိုက်အဝန်းတွင် အလွန်ဆွဲဆောင်နိုင်စေသော အချက်များဖြစ်စေကြောင်းပြောကြားခဲ့ပါသည်။ လတ်တလောတွင် ဘယ်ဂျီယမ်ရင်းနှီးမြှုပ်နှံသူများသည် ဗီယက်နမ်၌ အမေရိကန်ဒေါ်လာ ၁.၁ ဘီလီယံတန်ဖိုးရှိသော စီမံကိန်း ၉၅ခုတွင် ရင်းနှီးမြှုပ်နှံထားနေကြောင်းသိရပါသည်။ ဘယ်ဂျီယမ်နိုင်ငံဆိုင်ရာ ဗီယက်နမ်သံအမတ်ကြီးဖြစ်သူ Nguyen Van Thao ကလည်း နှစ်နိုင်ငံကြားထောက်ပံ့ပို့ဆောင်ရေး၊ ပင်လယ်ဆိပ်ကမ်းနှင့် သန့်စင်သောစွမ်းအင်တို့တွင် ကြီးမားသောအလားအလာရှိသည့် ပူးပေါင်းဆောင်ရွက်မှုတို့ကို အသားပေးပြောကြားခဲ့ကြောင်းသိရပါသည်။ ဖိုရမ်တက်ရောက်ခဲ့သည့် South Export Alliance ၏ ညွှန်ကြားရေးမှူးဖြစ်သူ Francois Coloval က EU- ဗီယက်နမ်လွတ်လပ်သော ကုန်သွယ်ရေးသဘောတူညီချက်သည် ဗီယက်နမ်အား အိမ်နီးချင်းနိုင်ငံများထက် ယှဉ်ပြိုင်နိုင်စွမ်းပိုမြင့်စေပြီး ရင်းနှီးမြှုပ်နှံရေးဆောင်ရွက်မှုများနှင့် ဈေးကွက်တိုးချဲ့ခြင်းတို့အတွက် သင့်လျော်သောအခြေအနေများကို ဖန်တီးပေးနိုင်ကြောင်းပြောကြားခဲ့ပါသည်။ VBB ဥပဒေလုပ်ငန်းမှ Elyse Kneller က ဗီယက်နမ်လုပ်ငန်းများ ဥရောပဈေးကွက်တွင် ယှဉ်ပြိုင်နိုင်စွမ်းမြှင့်တင်နိုင်ရန်နှင့် စီးပွားရေးလည်ပတ်မှု တရားဝင်စေရန် EU ၏ Carbon Border Adjustment Mechanism ကိုလိုက်နာရန်နှင့် နားလည်သဘောပေါက်သင့်ကြောင်းနှင့် ထိုစည်းမျဉ်းများသည် ဗီယက်နမ်ကုန်ပစ္စည်းများ ဈေးကွက်ထိုးဖောက်ရန် စွမ်းရည်နှင့် ကုန်ကျစရိတ်ကို သက်ရောက်စေနိုင်ကြောင်းပြောကြားခဲ့ပါသည်။ ထိုဖိုရမ်တွင် ဗီယက်နမ်လုပ်ငန်းများသည် ၎င်းတို့၏ တမူထူးခြားသောကုန်ပစ္စည်းများကို ဘယ်ဂျီယမ်ဈေးကွက်ကို မိတ်ဆက်ခဲ့ကြောင်းသိရပါသည်။

Source : Vietnam Plus

DOCA(ရန်ကုန်)                      

        ကမ္ဘောဒီးယားကုန်သည်ကြီးများအသင်း (The Cambodia Chamber Of Commerce) (CCC) သည် မြို့တော်ရှိကုန်သည်များ၊ စီးပွားရေးလုပ်ငန်းရှင်များ၊ နိုင်ငံတွင်းနှင့် နိုင်ငံတကာ စီးပွားရေးအသင်းအဖွဲ့များအား ၎င်းတို့၏ပြဿနာများကိုဖြေရှင်းနိုင်ရန်အတွက် ထိရောက်သော ဖြေရှင်းနည်းများရှာဖွေရန်အဆိုပြုချက်များကို CCC သို့တင်ပြရန် တောင်းဆိုထားသည်။ ကမ္ဘောဒီးယားကုန်သည်ကြီးများအသင်းသည် ပုဂ္ဂလိကကဏ္ဍကို ကိုယ်စားပြုပြီး တော်ဝင်အစိုးရနှင့် လက်တွဲလုပ်ဆောင်ရမည်ဟု ကမ္ဘောဒီးယားနိုင်ငံ ကမ္ဘာ့ကုန်သွယ်ရေးအဖွဲ့ (WTO) တွင် အဖွဲ့ဝင်အဖြစ် နှစ်၂၀ပြည့်အခမ်းအနားတွင် ဝန်ကြီးချုပ် Hun Manet ကပြောကြားခဲ့သည်။ CCC မှ တနင်္ဂနွေနေ့တွင် ၎င်း၏လူမှုကွန်ရက်တွင် ဖော်ပြချက်အရ ကမ္ဘောဒီးယားကုန်သည်ကြီးများအသင်းသည် အစိုးရ-ပုဂ္ဂလိကကဏ္ဍဖိုရမ် (G-PSF) ဖြင့်ညှိနှိုင်းဖြေရှင်းရာတွင် ပုဂ္ဂလိကကဏ္ဍကို ကိုယ်စားပြုသောအဖွဲ့အစည်းဖြစ်ပြီး လုပ်ငန်း (၁၆) ခု၊ နည်းပညာဆိုင်ရာလုပ်ငန်းအဖွဲ့ (၈) ဖွဲ့ပါဝင်သည်။ ထို့ပြင် စိန်ခေါ်မှုများအတွက် အဖြေရှာရန်နှင့် ကမ္ဘောဒီးယားနိုင်ငံ ပြည်တွင်းနှင့်ပြည်ပစီးပွားရေးနှင့် ရင်းနှီးမြှုပ်နှံမှုလုပ်ငန်းများကိုမြှင့်တင်မည်ဖြစ်ကြောင်း ထုတ်ပြန်ချက်တွင် ထပ်မံပြောကြားခဲ့သည်။ ကမ္ဘောဒီးယားကုန်သည်ကြီးများအသင်းသည် နိုင်ငံတွင်းရှိ စီးပွားရေးလုပ်ငန်းများကိုပိုမိုကောင်းမွန်စေရန် ပံ့ပိုးကူညီခြင်းဖြင့် အစိုးရ၏ ပုဂ္ဂလိကကဏ္ဍနှင့် အဖွဲ့အစည်းများဖွံ့ဖြိုးတိုးတက်ရေးကို မြှင့်တင်ရန်ရည်ရွယ်ချက်ဖြင့် စီးပွားရေးလုပ်ငန်းရှင်များနှင့် ရင်းနှီးမြှုပ်နှံသူများအားလုံး၏ စိန်ခေါ်မှုများနှင့် စိုးရိမ်မှုများကိုဖြေရှင်းပေးမည် ဖြစ်ကြောင်းပြောကြားခဲ့သည်။ “ကမ္ဘောဒီးယားကုန်သည်ကြီးများအသင်းသည် နိုင်ငံတော်နှင့်လက်တွဲဆောင်ရွက်ရန် ပုဂ္ဂလိကကဏ္ဍ၏ကိုယ်စားလှယ်အဖြစ် ဆောင်ရွက်သင့်သည်” ဟု ဝန်ကြီးချုပ် Hun Manet က လေးနက်စွာပြောကြားခဲ့သည်။

Source : Khmer Time

DOCA(ရန်ကုန်) 

         ယခုနှစ်၏ ပထမ ၉လတာကာလတွင် ကမ္ဘောဒီးယား-တရုတ်ကြားကုန်သွယ်မှုပမာဏသည် အမေရိကန်‌ဒေါ်လာ ၁၁.၁၄ ဘီလီယံထိရောက်ရှိခဲ့ပြီး လွန်ခဲ့သည့်နှစ် (၂၀၂၃) ၏ တူညီသည့်ကာလထက် ၂၂.၅% မြင့်တက်ခဲ့ကြောင်း အကောက်ခွန်နှင့် အခွန်အထွေထွေဦးစီးဌာန၏ တင်ပြချက်အရသိရပါသည်။ ထို ၉လတာကာလတွင် ကမ္ဘောဒီးယားသည် တရုတ်သို့ အမေရိကန်ဒေါ်လာ ၁.၂၇ ဘီလီယံတန်ဖိုးရှိသည့် ကုန်ပစ္စည်းများတင်ပို့ခဲ့ပြီး အမေရိကန်ဒေါ်လာ ၉.၈၆ ဘီလီယံတန်ဖိုးရှိသည့် ကုန်ပစ္စည်းများပြန်လည်တင်သွင်းခဲ့ကြောင်းသိရပါသည်။ တရုတ်သို့ အဓိကတင်ပို့သည့် ကုန်ပစ္စည်းများမှာ ဆန်၊ ငှက်ပျောသီးများ၊ သရက်သီးများ၊ ပီလောပီနံ၊ ရေထွက်ကုန်နှင့် အဝတ်အထည်တို့ဖြစ်ပြီး အဝတ်အထည်အတွက် ကုန်ကြမ်းပစ္စည်းများ၊ စက်ပစ္စည်းများ၊ ယာဉ်များ၊ စားသောက်ကုန်များ၊ အီလတ်ထရောနစ်ပစ္စည်းများနှင့် ဆေးဝါးများကို ပြန်လည်တင်သွင်းကြောင်းသိရပါသည်။ ကမ္ဘောဒီးယား-တရုတ် အပြန်အလှန်ကုန်သွယ်ရေးသဘောတူညီချက်နှင့် RECP သဘောတူညီချက်တို့က ကမ္ဘောဒီးယားစိုက်ပျိုးရေးထုတ်ကုန်များ တရုတ်သို့တင်ပို့မှုအရှိန်မြှင့်တင်ရန် ကူညီပေးနိုင်မည်ဟု စီးပွားကူးသန်းဝန်ကြီးဌာန၏ ပြောခွင့်ရပုဂ္ဂိုလ် Penn Sovichect ကပြောကြားခဲ့ပါသည်။ နှစ်နိုင်ငံခေါင်းဆောင်များသည်လည်း တရုတ်-ကမ္ဘောဒီးယား ခင်မင်ရင်းနှီးမှုတည်ငြိမ်စွာဖွံ့ဖြိုးတိုးတက်ရေးအတွက် ပြောဆိုမှုများဆောင်ရွက်ခဲ့ပြီဖြစ်ပြီး “Action Plan on Building a China-Cambodia Community with a Shared Future” အကောင်အထည်ဖော်ရန်အတွက် အစိုးရအချင်းချင်းညှိနှိုင်းဆောင်ရွက်ရေးကော်မတီ၏ အခန်းကဏ္ဍကို အပြည့်အဝလုပ်ဆောင်ခွင့်ပေးရန် သဘောတူညီခဲ့ကြကြောင်းသိရပါသည်။ နှစ်နိုင်ငံ၏ အနီးကပ်ပူးပေါင်းဆောင်ရွက်ခြင်းနှင့် မျှဝေသည့် အနာဂတ်တည်ထောင်ရန် သဘောတူညီမှုတို့သည် နှစ်နိုင်ငံမှ ရင်းနှီးမြှုပ်နှံသူများနှင့် စီးပွားရေးသမားများအကြား ယုံကြည်မှုတည်ဆောက်ရာတွင် တွန်းအားပေးနိုင်မည်ဟု ကမ္ဘောဒီးယားကုန်သည်များအသင်း၏ ဒုတိယဥက္ကဋ္ဌဖြစ်သူ Lim Heng ကပြောကြားခဲ့ပါသည်။

Source : Khmer Times

DOCA(ရန်ကုန်) 

       ဗီယက်နမ်နိုင်ငံသည် ၂၀၂၄ခုနှစ်ကုန်အထိ ခန့်မှန်းချက်များအရ နိုင်ငံခြားတိုက်ရိုက်ရင်းနှီးမြှုပ်နှံမှု (FDI) တွင် အမေရိကန်ဒေါ်လာ ၃၉မှ ၄၀ဘီလီယံအထိ ဆွဲဆောင်နိုင်မည်ဟု မျှော်လင့်ထားသည်။ စီမံကိန်းနှင့် ရင်းနှီးမြှုပ်နှံမှုဝန်ကြီးဌာနအောက်ရှိ နိုင်ငံခြားရင်းနှီးမြှုပ်နှံမှုအေဂျင်စီ (FIA) က ယခုနှစ် ပထမကိုးလအတွင်း စုစုပေါင်းမှတ်ပုံတင်ထားသော နိုင်ငံခြားရင်းနှီးမြှုပ်နှံမှုမတည်ငွေမှာ အမေရိကန်ဒေါ်လာ ၂၄.၇၈ ဘီလီယံကျော်ရှိပြီး ၂၀၂၃ခုနှစ်၏ ကိုးလတာကာလထက် ၁၁.၆% တိုးလာကြောင်းသိရသည်။ စက်တင်ဘာလတစ်လတည်းတွင်ပင် BacNinh၊ Binh Duong နှင့် Dong Nai ပြည်နယ်များသည် ၎င်းတို့၏ ဖွံ့ဖြိုးတိုးတက်ရေးစီမံကိန်းကိုကြေညာခဲ့ပြီး ရင်းနှီးမြှုပ်နှံမှုမြှင့်တင်ရေးလုပ်ငန်းများလုပ်ဆောင်ခဲ့သည်။ ထိုအခမ်းအနားများတွင် ပရောဂျက်များစွာအား ရင်းနှီးမြှုပ်နှံမှုအသစ်များနှင့် တိုးချဲ့ရင်းနှီးမြှုပ်မှုလက်မှတ်များပေးအပ်ခဲ့သည်။ ထို့ကြောင့် စုစုပေါင်းမှတ်ပုံတင်ထားသော ရင်းနှီးမြှုပ်နှံမှုမတည်ငွေ သို့မဟုတ် အပိုရင်းနှီးမြှုပ်နှံမှုတို့သည် နှစ်စကတည်းက အမြင့်ဆုံးအဆင့်သို့ရောက်ရှိခဲ့သည်။ FIA ၏အဆိုအရ ၂၀၂၄ခုနှစ်၊ စက်တင်ဘာလတွင် Amkor, Luxcase နှင့် Advance Tyre Vietnam Ltd Co ၏ အဓိကပရောဂျက်သုံးခုသည် ရင်းနှီးမြှုပ်နှံမှုမတည်ငွေရင်းကိုပြောင်းလဲခဲ့ပြီး ကိုးလတာကာလအတွင်း နောက်ထပ်ရင်းနှီးမြှုပ်နှံမှုမတည်ငွေ ကန်ဒေါ်လာ ၇.၆၄ ဘီလီယံအထိရရှိခဲ့ကာ ၂၀၂၃ခုနှစ်ထက် ၄၈.၁% တိုးတက်ခဲ့သည်။ FIA ၏အဆိုအရ ၂၀၂၄ခုနှစ် ကိုးလတာကာလအတွင်း တစ်ပိုင်းလျှပ်ကူးပစ္စည်း၊ စွမ်းအင် (ဘတ်ထရီ၊ ဓာတ်အားလျှပ်စစ်ဆဲလ်များ၊ ဆီလီကွန်ဘားများထုတ်လုပ်ခြင်း)၊ အစိတ်အပိုင်းများ၊ အီလက်ထရောနစ်ထုတ်ကုန်များနှင့် အပိုတန်ဖိုးမြင့်မားသော ထုတ်ကုန်များထုတ်လုပ်သည့် နယ်ပယ်များတွင် ထပ်လောင်းရင်းနှီးမြှုပ်နှံမှုများရရှိခဲ့သည်။ နည်းပညာကော်ပိုရေးရှင်းများစွာသည်လည်း ဗီယက်နမ်တွင် ရင်းနှီးမြှုပ်နှံရန် စိတ်ဝင်စားမှုကိုပြသနေကြသည်။ Innovate Vietnam 2024 တွင် NVIDIA, Qualcomm, Intel, AMD, Samsung နှင့် Meta ကဲ့သို့သော ကမ္ဘာ့ထိပ်တန်းနည်းပညာကော်ပိုရေးရှင်းကြီးများက ၎င်းတို့၏တည်ရှိမှုကို လူသိများစေခဲ့သည်။ အခမ်းအနားတွင် ကော်ပိုရေးရှင်းခေါင်းဆောင်များသည် ဆီမီးကွန်ဒတ်တာများ၊ ဉာဏ်ရည်တု (AI) နှင့် ဆန်းသစ်တီထွင်မှုနယ်ပယ်များတွင် ရင်းနှီးမြှုပ်နှံမှုနှင့် ပံ့ပိုးကူညီရန် ကတိပြုခဲ့ကြသည်။ NVIDIA ကော်ပိုရေးရှင်း၏ ဒုတိယဥက္ကဋ္ဌ Raymond The က NVIDIA သည် ဗီယက်နမ်နိုင်ငံ၏ စက်မှုလုပ်ငန်းများတွင် ဆန်းသစ်တီထွင်မှုကို အရှိန်မြှင့်ကူညီပေးမည် ဖြစ်ကြောင်းပြောကြားခဲ့သည်။ Meta Group ၏ ကမ္ဘာလုံးဆိုင်ရာရေးရာဥက္ကဋ္ဌ Nick Clegg မှ Meta သည် ၂၀၂၅ခုနှစ်တွင် ဗီယက်နမ်၌ ၎င်း၏နောက်ဆုံးပေါ် ရောနှောထားသော Reality Headset ဖြစ်သော Quest 3s ကိုထုတ်လုပ်သွားမည်ဖြစ်ပြီး အလုပ်အကိုင်ပေါင်း ၁၀၀၀ကိုဖန်တီးပေးမည်ဖြစ်ကြောင်းပြောကြားခဲ့သည်။ ဗီယက်နမ်၏ ကာလရှည်ရင်းနှီးမြှုပ်နှံသူ Samsung Group သည် မြောက်ပိုင်း Bac Ninh ပြည်နယ်ရှိ LED ဖန်သားပြင်စက်ရုံတွင် နောက်ထပ် ဒေါ်လာ ၁.၈ ဘီလီယံရင်းနှီးမြှုပ်နှံရန် စီစဉ်ထားကြောင်းသိရသည်။

Source : vnexpress 

DOCA(ရန်ကုန်) 

        ကမ္ဘောဒီးယားနိုင်ငံသို့ နှစ်စဉ် တရုတ်ခရီးသွားအနည်းဆုံး တစ်သန်းကို လာရောက်လည်ပတ်ရန် တရုတ်ကုမ္ပဏီ ၂၂ခုကျော်က ကတိကဝတ်ပြုခဲ့ကြပြီး လာမည့်နှစ်များတွင်လည်း ထပ်မံတိုးချဲ့သွားရန် အစီအစဉ်ရှိကြောင်း ခရီသွားလာရေးဝန်ကြီး Huot Hak ကပြောကြားခဲ့သည်။ တရုတ်နိုင်ငံ Henan ပြည်နယ်၊ Zhengzhou မြို့၌ အောက်တိုဘာလ ၁၈ရက်နေ့မှ ၂၀ရက်နေ့အထိကျင်းပပြုလုပ်ခဲ့သော 13^th China Zhengzhou International Shaolin Wushu Festival တွင်ပါဝင်ဆင်နွှဲပြီးနောက် သတင်းစာရှင်းလင်းပွဲတွင် ၎င်းကပြောကြားခဲ့ခြင်း ဖြစ်သည်။ ထိုသတင်းစာရှင်းလင်းပွဲတွင် Huot Hak သည် Zhengzhou နှင့် Henan ရှိ အဓိကခရီးသွားကုမ္ပဏီ ၂၂ခုမှ လုပ်ငန်းဆိုင်ရာကိုယ်စားလှယ်များနှင့်တွေ့ဆုံခဲ့ပြီး ခရီးစဉ် Package များအားစီစဉ်ပေးခြင်း၊ အပန်းဖြေစခန်းများဆောက်လုပ်ခြင်း၊ အဆင့်မြင့်ဟိုတယ်များတည်ဆောက်ခြင်းနှင့် ဧည့်လမ်းညွှန်များထောက်ပံ့ခြင်းတို့ပါဝင်ခဲ့သည်။ တရုတ်မီဒီယာ၊ ရုပ်မြင်သံကြား၊ ရေဒီယို၊ ဟီနန်ခရီးသွားလုပ်ငန်းအသင်းနှင့် ဆက်စပ်ကဏ္ဍများမှ သက်ဆိုင်သူများနှင့်လည်းတွေ့ဆုံဆွေးနွေးခဲ့ကြသည်။ အစည်းအဝေးတွင် ကမ္ဘောဒီးယားနိုင်ငံရှိ ခရီးသွားလာရေးအလားအလာများ၊ တော်ဝင်အစိုးရ၏ မူဝါဒများအောက်တွင်ရရှိနိုင်သော ရင်းနှီးမြှုပ်နှံမှုအခွင့်အလမ်းများကိုဆွေးနွေးခဲ့ကြသည်။  ကမ္ဘောဒီးယားနှင့် တရုတ်နိုင်ငံတို့သည် နီးကပ်သောဆက်ဆံရေးကြောင့် ကဏ္ဍအားလုံးတွင် ချစ်ကြည်ရင်းနှီးမှုနှင့် ပူးပေါင်းဆောင်ရွက်မှုအသစ်များကို မြှင့်တင်ပေးကြောင်း ထပ်မံပြောကြားခဲ့သည်။  နှစ်နိုင်ငံကြားရေရှည်ဆက်ဆံရေးကိုမြှင့်တင်ရန်အတွက် ခေါင်းစဉ်အသစ်များချမှတ်ရန် နှစ်ဖက်လုံးကသဘောတူညီကြောင်းနှင့် ကနဦးအဆင့်တွင် ကမ္ဘောဒီးယားသို့ နှစ်စဉ် တရုတ်ခရီးသွားတစ်သန်းလာရောက်လည်ပတ်စေရန် ကတိပြုခဲ့ကြသည်။

Source : Khmer Time

DOCA(ရန်ကုန်)