ပြည်ပကုန်သွယ်မှုသတင်းများ

    ယခုနှစ် ပထမ ၁၁ လအတွင်း ကမ္ဘောဒီးယားနိုင်ငံအနေဖြင့် စပါးနှင့်ဆန် တင်ပို့မှုမှ ဝင်ငွေ ဒေါ်လာ ၁.၇၉ ဘီလီယံ ရရှိခဲ့သည်ဟု ကမ္ဘောဒီးယားဆန်စပါးအသင်းချုပ် (CRF) ၏ ဒီဇင်ဘာ ၅ ရက်နေ့ ထုတ်ပြန်သော အစီရင်ခံစာ၌ ဖော်ပြပါသည်။

    အဆိုပါကာလအတွင်း နိုင်ငံပေါင်း ၆၇ နိုင်ငံသို့ တန်ဖိုး ဒေါ်လာ ၄၁၃ သန်းရှိသော ဆန် တန်ချိန် ၅၇၅၅၆၂ တန် တင်ပို့ခဲ့ပြီး ယခင်နှစ်ကာလတူနှင့် နှိုင်းယှဉ်ပါက ၁.၆ ရာခိုင်နှုန်း ကျဆင်းခဲ့ ကြောင်း၊ တရုတ်နိုင်ငံသည် ကမ္ဘောဒီးယား၏ အဓိကဆန်တင်ပို့ရာဈေးကွက်ဖြစ်ပြီး ဆန် ၁၀၉၄၄၈ တန် တင်ပို့မှုမှ ဝင်ငွေ ဒေါ်လာ ၆၉ သန်းရရှိခဲ့ကြောင်း၊ ဥရောပ ၂၆ နိုင်ငံသို့လည်း တန်ဖိုးဒေါ်လာ ၂၀၇ သန်းရှိသော ဆန်တန်ချိန် ၂၈၃၉၈၁ တန် တင်ပို့နိုင်ခဲ့ကြောင်း၊ တီမောလက်စ်နိုင်ငံ အပါအဝင် အာဆီယံဒေသတွင်းရှိ နိုင်ငံ ၇ နိုင်ငံသို့ တင်ပို့မှုမှာ ဆန်တန်ချိန် ၁၁၃၇၉၂ တန်ရှိကြောင်း CRF ၏ အစီရင်ခံစာအရ သိရှိရသည်။

    ထုတ်လုပ်မှုပမာဏ၊ သိုလှောင်နိုင်မှုစွမ်းရည်နှင့် ဆန်အရည်အသွေးနှင့် စံချိန်စံညွှန်းတို့အား အဆင့်မြှင့်တင်ခြင်းက ကမ္ဘောဒီးယားဆန်၏ နိုင်ငံတကာဈေးကွက်၌ ဝင်ရောက်မှုကို တိုးမြှင့်ပေး ခဲ့ကြောင်း၊ အစိုးရနှင့် ပုဂ္ဂလိကကဏ္ဍတို့ ပူးပေါင်းဆောင်ရွက်ခြင်းဖြင့် ဆန်၏အရည်အသွေးကို တိုးတက်ကောင်းမွန်စေပြီး နိုင်ငံတကာ၏ အသိအမှတ်ပြုမှုကို ရရှိခဲ့ခြင်းဖြစ်ကြောင်းဖြင့် CRF ၏ ဥက္ကဋ္ဌ Chan Sokheang က ခမာတိုင်းမ် သတင်းဌာနသို့ ပြောကြားခဲ့သည်။

     ပြည်ပသို့တင်ပို့သည့် ဆန်များတွင် ဆန်မွှေး၊ အော်ဂဲနစ်ဆန်၊ ဆန်ဖြူ၊ ပေါင်းဆန်နှင့် ဂျပွန်နီကာဆန်များ ပါဝင်ကြောင်း၊ ယခုနှစ် ပထမ ၁၁ လအတွင်း ကမ္ဘောဒီးယား၏ စပါးတင်ပို့မှုမှာ တန်ချိန် ၄.၆ သန်းရှိပြီး ဝင်ငွေဒေါ်လာ ၁.၃၇ ဘီလီယံ ရရှိခဲ့ကြောင်း၊ ၂၀၂၄ ခုနှစ် နိုဝင်ဘာလ ၇ ရက်နေ့ ဖိလစ်ပိုင်နိုင်ငံ၊ မနီလာမြို့၌ကျင်းပသော ကမ္ဘာ့ဆန်စပါးညီလာခံ၏ ကမ္ဘာ့အကောင်းဆုံး ဆန်ပြိုင်ပွဲ၌ Malis Angkor ဟု အမည်ရသည့် ကမ္ဘောဒီးယား ပရီမီယံဆန်မွှေးသည် ဆဋ္ဌမအကြိမ်အဖြစ် ပထမဆုရရှိခဲ့ကြောင်း၊ ကမ္ဘောဒီးယားဆန်စပါးအသင်းချုပ် အနေဖြင့် ၂၀၂၅ ခုနှစ်တွင် ဆန် တန်ချိန် ၁ သန်းအထိ တိုးတက်တင်ပို့နိုင်ရေး ရည်မှန်းချက်ချမှတ် ဆောင်ရွက်လျက်ရှိကြောင်း ခမာတိုင်းမ် သတင်းဌာနက ဖော်ပြထားသည်။

Source: Khmer Times, 6 Dec 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

    ထိုင်းနိုင်ငံ၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာနသည် ယခုနှစ်အတွက် တင်ပို့နိုင်မည်ဟု ခန့်မှန်းထားသော ဆန် မက်ထရစ်တန်ချိန် ၁၀ သန်း၏အောက်သို့ လျှော့ချလျက် ၂၀၂၅ ခုနှစ်တွင် ဆန်မက်ထရစ်တန်ချိန် ၇.၅ သန်းခန့်သာ တင်ပို့နိုင်ရန် ရည်မှန်းထားကြောင်း သိရသည်။

   ယခုနှစ် ပထမ ၁၁ လအတွင်း ဆန်တင်ပို့မှုမှာ မက်ထရစ်တန်ချိန် ၉.၂၇ သန်းအထိ ရောက် ရှိခဲ့ပြီး ယခင်နှစ် အလားတူကာလနှင့် နှိုင်းယှဉ်ပါက ၁၄ ရာခိုင်နှုန်း မြင့်တက်ခဲ့ကြောင်း ပြည်ပ ကုန်သွယ်မှုဦးစီးဌာန ညွှန်ကြားရေးမှူးချုပ် Arada Fuangtong က ပြောကြားခဲ့သည်။ ထိုင်းနိုင်ငံ ၏ ယခုနှစ်ကုန်အထိ ဆန်တင်ပို့မှုသည် တန်ဖိုးအားဖြင့် အနည်းဆုံး အမေရိကန်ဒေါ်လာ ၆ ဘီလီယံဖြင့် ဆန်မက်ထရစ်တန်ချိန် ၁၀ သန်းအထိ ရောက်ရှိနိုင်ဖွယ်ရှိသည်။

     ခရစ္စမတ်၊ နှစ်သစ်ကူးနှင့် တရုတ်နှစ်သစ်ကူးကာလအထိ နှစ်ကုန်စားသုံးမှုလိုအပ်ချက်များ ပြည့်မီအောင် ဖြည့်ဆည်းရန်အတွက် ဆန်တင်သွင်းသူများထံမှ စဉ်ဆက်မပြတ် ၀ယ်လိုအား ဖြစ်ပေါ်နေခြင်းက ထိုကဲ့သို့ ဆန်ပို့ကုန်တိုးတက်မှုရရှိရန် ဦးတည်စေလျက်ရှိကြောင်း၊ ထိုင်းနိုင်ငံ၏ ဆန်ထုတ်လုပ်မှုသည် ကမ္ဘာ့ဈေးကွက်ဝယ်လိုအားကို လုံလောက်စွာ ဖြည့်ဆည်းပေးနိုင်ပြီး နိုင်ငံ၏ခိုင်မာသော ပို့ကုန်စွမ်းအားသည် ဆန်တင်သွင်းသူများထံသို့ ပုံမှန်ဖြန့်ဖြူးပေးပို့နိုင်ရေး သေချာမှုရှိစေကြောင်း သိရှိရသည်။

      ယခုနှစ်ကို ထိုင်းနိုင်ငံ၏ ဆန်တင်ပို့မှုအတွက် ရွှေရောင်လွှမ်းသည့်နှစ် တစ်နှစ်အဖြစ် မှတ်ယူ နိုင်ပြီး ပို့ကုန်ပမာဏ မက်ထရစ်တန်ချိန် ၁၀ သန်းအထိ ရောက်ရှိနိုင်ကြောင်း Mrs Arada က ပြောကြားခဲ့သည်။

    ပို့ကုန်ပမာဏ တိုးမြင့်လာမှုအပြင် ယခုနှစ် ပထမ ၁၀ လအတွက် ထိုင်းဆန်၏ ပျမ်းမျှ သင်္ဘောပေါ်အရောက်ဈေးနှုန်း (FOB price) သည် ယခင်နှစ်အလားတူကာလနှင့် နှိုင်းယှဉ်ပါက မြင့်တက်လာခဲ့သည်။ ပျမ်းမျှအားဖြင့် ထိုင်းဟုန်မာလီဆန်ဈေးသည် ၇.၅၉ ရာခိုင်နှုန်း၊ Pathum Thani ဆန်သည် ၂၄.၆ ရာခိုင်နှုန်း၊ ဆန်ဖြူသည် ၁၁.၇ ရာခိုင်နှုန်း၊ ပေါင်းဆန်သည် ၁၀.၉ ရာခိုင် နှုန်းနှင့် ကောက်ညှင်းဆန်သည် ၀.၆၂ ရာခိုင်နှုန်း အသီးသီး မြင့်တက်ခဲ့သည်။ အဓိကတင်ပို့သည့် ဈေးကွက်များမှာ အင်ဒိုနီးရှား၊ အီရတ်၊ တောင်အာဖရိက၊ အမေရိကန်နှင့် ဖိလစ်ပိုင်နိုင်ငံတို့ ဖြစ် ကြောင်း သိရှိရသည်။

    အိန္ဒိယနိုင်ငံမှ ဆန်ဖြူတင်ပို့မှု ပြန်လည်စတင်ခဲ့မှုအရ ထိုင်းကူးသန်းရောင်းဝယ်ရေးဝန်ကြီး ဌာနအနေဖြင့် လာမည့်နှစ်အတွက် ဆန်တင်ပို့ရန် လျာထားချက်ကို လျှော့ချခဲ့ခြင်းဖြစ်သည်ဟု Mrs Arada က ပြောကြားခဲ့သည်။

     ဆန်တင်ပို့မှုကို ယာယီပိတ်ပင်ခဲ့ပြီးနောက်ပိုင်းတွင် အိန္ဒိယ၏ ဆန်ထုတ်လုပ်နိုင်စွမ်းနှင့် ဆန်သိုလှောင်မှုပမာဏတို့မှာ မြင့်တက်လျက်ရှိကြောင်း သိရှိရသည်။ ထို့အပြင် မိုးခေါင်ရေရှားမှု အခြေအနေများ လျော့ပါးမှုနှင့် စိုက်ပျိုးရန် ရေရရှိမှု ပိုမိုကောင်းမွန်လာခြင်းတို့အပေါ် အခြေခံ၍ ကမ္ဘာ့ဆန်စပါးထုတ်လုပ်မှုမှာ တိုးမြင့်လာမည်ဟု မျှော်မှန်းရပြီး ကမ္ဘာ့ဆန်ဈေးကွက်၌ ပြိုင်ဆိုင်မှု ပြင်းထန်လာနိုင်ခြေရှိသည်။

    လာမည့်နှစ်တွင် ထိုင်းပြည်ပကုန်သွယ်မှုဦးစီးဌာနသည် အဓိကကုန်သွယ်ဖက်နိုင်ငံများ၌ ဆက်ဆံရေး ခိုင်မာအားကောင်းစေခြင်းနှင့် ဆန်အရောင်းမြှင့်တင်ရေးလှုပ်ရှားမှုများ ပြုလုပ်ခြင်းဖြင့် ထိုင်းဆန်တင်ပို့မှုကို မြှင့်တင်သွားရန် စီစဉ်ထားကြောင်း၊ ယခုနှစ်တွင် ဆန်တင်ပို့မှုပမာဏ ၁၂ ရာခိုင်နှုန်း ကျဆင်းခဲ့သည့် တောင်အာဖရိကနိုင်ငံသို့ အလျင်အမြန် စျေးကွက်ချဲ့ထွင်ရေးအတွက် ဆွေးနွေးပွဲများ ပြုလုပ်မည်ဖြစ်ကြောင်း၊ အမေရိကန်ဈေးကွက်၌ ထိုင်းစံပယ်ဆန်ကို ပိုမိုနှစ်သက်သော လက်တင်အမေရိကနွယ်ဖွား Hispanic လူမျိုးစုများအကြား ထိုင်းဟုန်မာလီဆန်စျေးကွက် ချဲ့ထွင်ရန် အလေးပေး လုပ်ဆောင်မည်ဖြစ်ကြောင်း သိရှိရသည်။

အင်ဒိုနီးရှား၊ တရုတ်နိုင်ငံတို့နှင့် ဆန်ကုန်သွယ်မှုဆိုင်ရာ စေ့စပ်ညှိနှိုင်းမှုများကို အရှိန်မြှင့် တင်လုပ်ဆောင်နေချိန်တွင် ၎င်း၏ အစိုးရနှစ်ရပ်အကြားညှိနှိုင်း ဆောင်ရွက်ရေး မူဝါဒများအရ ထိုင်းပြည်ပကုန်သွယ်မှုဌာန အနေဖြင့် အခြားအဓိကပစ်မှတ်ထားသည့် ဈေးကွက်များဖြစ်သော ကနေဒါနှင့် ဖိလစ်ပိုင်နိုင်ငံတို့နှင့် ဆက်လက်ညှိနှိုင်း၍ ဆန်ဈေးကွက်မြှင့်တင်မှုကို ဆောင်ရွက် မည် ဖြစ်ကြောင်း သိရှိရသည်။

Source: Bangkok Post, 4 December, 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

     ကမ္ဘာ့စားအုန်းဆီအများဆုံးထုတ်လုပ်သည့် အင်ဒိုနီးရှားနိုင်ငံနှင့် မလေးရှားနိုင်ငံတို့၌ ထုတ်လုပ်မှု တိုးတက်ခြင်းမရှိပဲ ရပ်တန့်နေခြင်းကြောင့် စားအုန်းဆီဈေးနှုန်းများသည် ၂၀၂၅ ခုနှစ်တွင် တစ်တန်လျှင် မလေးရှားရင်းဂစ် ၄၀၀၀ မှ ၅၀၀၀ အကြားရှိနိုင်မည်ဟု စားအုန်းဆီထုတ်လုပ်သော နိုင်ငံများကောင်စီ (CPOPC) က ခန့်မှန်းထားကြောင်း မလေးရှားနိုင်ငံအခြေစိုက် New Straits Times သတင်းဌာနက ဖော်ပြပါသည်။

     ကမ္ဘာ့စားအုန်းဆီဝယ်လိုအား ကြီးထွားလာသည်နှင့်အမျှ ထုတ်လုပ်မှုပမာဏ တိုးတက်မှု မရှိခြင်းက ရောင်းလိုအားပြတ်လပ်မှုကို ဖြစ်ပေါ်စေပြီး ဈေးနှုန်းများ ပိုမိုမြင့်တက်လာစေသည်ဟု CPOPC ကောင်စီမှ  ဒုတိယအထွေထွေအတွင်းရေးမှူး Mr. Datuk Nageeb Wahab က မလေးရှား နိုင်ငံပိုင် Bernama သတင်းအင်ဂျင်စီသို့ ဒီဇင်ဘာလ ၆ ရက်နေ့တွင် ပြောကြားခဲ့သည်။

    မလေးရှားနိုင်ငံတွင် ဖြစ်ပေါ်နေသော ရေလွှမ်းမိုးမှုများ၏ သက်ရောက်မှုကြောင့် မလေးရှား စားအုန်းဆီဈေးနှုန်းသည် လက်ရှိကာလ၌ တစ်တန်လျှင် ရင်းဂစ် ၅၀၀၀ ဝန်းကျင်အထိ ယာယီ မြင့်တက်လျက်ရှိကြောင်း၊ သက်တမ်းရင့် ဆီအုန်းပင်အိုစိုက်ခင်းများရှိခြင်း၊ ကြိုတင်ခန့်မှန်းမှု မပြု နိုင်သော ရာသီဥတုအခြေအနေနှင့် ဆီအုန်းစိုက်ခင်းအသစ် တိုးချဲ့နိုင်မည့် မြေဧရိယာ အကန့် အသတ်ရှိခြင်းတို့ကြောင့် စားအုန်းဆီထုတ်လုပ်ရာတွင် တိုးတက်မှုရပ်တန့်နေခြင်းက ကမ္ဘာ့ စားအုန်းဆီရောင်းလိုအားကို ထိခိုက်စေနိုင်ပြီး ဈေးနှုန်းများ ပိုမိုမြင့်တက်သွားစေသည်ဟု ယူဆ ကြောင်း Mr. Nageeb က မီးမောင်းထိုးပြောကြားခဲ့သည်။

    CPOPC တွင် လက်ရှိအဖွဲ့ဝင်များအဖြစ် မလေးရှား၊ အင်ဒိုနီးရှား၊ ဟွန်ဒူးရပ်စ်နှင့် ပါပူအာ နယူးဂီနီတို့ ပါဝင်ပြီး ကိုလံဘီယာ၊ ဂါနာ၊ နိုင်ဂျီးရီးယားနှင့် ကွန်ဂိုဒီမိုကရက်တစ်သမ္မတနိုင်ငံတို့က လေ့လာသူ အဖွဲ့ဝင်များအဖြစ် ပါဝင်ကြောင်း၊ အဖွဲ့ဝင်အဖြစ် ကမ္ဘာ့တတိယအများဆုံး စားအုန်းဆီ ထုတ်လုပ်သည့် ထိုင်းနိုင်ငံ ပါဝင်လာစေရေး ကြိုးပမ်းမှုများလုပ်ဆောင်နေကြောင်း၊ အောင်မြင်မှု ရရှိမည်ဆိုပါက CPOPC အဖွဲ့ဝင်နိုင်ငံများသည် ကမ္ဘာ့စားအုန်းဆီ ထုတ်လုပ်မှု စုစုပေါင်း၏ ၉၃ ရာခိုင်နှုန်းမှ ၉၅ ရာခိုင်နှုန်းအထိကို ထိန်းချုပ်နိုင်မည်ဖြစ်ပြီး ကမ္ဘာ့စားအုန်းဆီဈေးကွက်၌ လွှမ်းမိုး မှု သိသိသာသာ အားကောင်းလာမည်ဖြစ်ကြောင်း Mr. Nageeb က ဆက်လက်ပြောကြားသည်။

    ၂၀၁၅ ခုနှစ် နိုဝင်ဘာလ ၂၁ ရက်နေ့တွင် စတင်တည်ထောင်ခဲ့သည့် စားအုန်းဆီ ထုတ်လုပ် သောနိုင်ငံများကောင်စီ (CPOPC) သည် ဆီအုန်းထုတ်လုပ်သည့် နိုင်ငံများအကြား ပူးပေါင်း ဆောင်ရွက်မှုမြှင့်တင်ရန် ရည်ရွယ်ဖွဲ့စည်းထားခြင်းဖြစ်ပြီး အစိုးရအချင်းချင်း ပူးပေါင်းဆောင်ရွက် သော အဖွဲ့အစည်းတစ်ခုဖြစ်ကြောင်း New Straits Times သတင်းဌာန၏ ဖော်ပြချက်အရ သိရှိရပါသည်။

Source: New Straits Times, December 6^th, 2024 (လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

      ဗီယက်နမ် စိုက်ပျိုးရေးနှင့် ကျေးလက်‌ဒေသဖွံ့ဖြိုးတိုးတက်ရေး ဝန်ကြီးဌာန၏ ဖော်ပြချက် အရ ၂၀၂၄ ခုနှစ် နိုဝင်ဘာလအတွင်း ဗီယက်နမ်နိုင်ငံသည် ဆန်တန်ချိန် ၇၀၀၀၀၀ တင်ပို့လျက် ဝင်ငွေဒေါ်လာ ၄၄၅ သန်းခန့်ရရှိခဲ့ကြောင်း၊ နိုဝင်ဘာလကုန်အထိ ဆန်တင်ပို့မှုစုစုပေါင်းမှာ တန် ချိန် ၈.၅ သန်းရှိပြီး တန်ဖိုးအားဖြင့် ဒေါ်လာ ၅.၃၁ ဘီလီယံရှိကြောင်း သိရှိရသည်။

      ၂၀၂၄ ခုနှစ် ပထမ ၁၁ လအတွင်း ဗီယက်နမ် ဆန်ပို့ကုန်၏ ပျမ်းမျှဈေးနှုန်းမှာ ၁ တန်လျှင် ၆၂၇.၉ ဒေါ်လာနှုန်းသို့ ရောက်ရှိခဲ့ပြီး ယခင်နှစ်ကာလတူရှိ ပျမ်းမျှဈေးနှုန်းနှင့် နှိုင်းယှဉ်ပါက ၁၀.၆ ရာခိုင်နှုန်း တိုးတက်ခဲ့ခြင်းဖြစ်သည်။

    ဆန်ကွဲ ၅ ရာခိုင်နှုန်းပါဝင်သော ဗီယက်နမ်ဆန်သည် လက်ရှိကာလတွင် ကမ္ဘာ့ထိပ်တန်း ဆန်တင်ပို့သူများအကြား  ဈေးနှုန်းအမြင့်ဆုံးသို့ ရောက်ရှိနေသည်ဟု ဗီယက်နမ်စားသောက်ကုန် လုပ်ငန်းအသင်းက ဖော်ပြထားသည်။ အဆိုပါ ဗီယက်နမ်ဆန်၏ ဈေးနှုန်းသည် ဒီဇင်ဘာ ၃ ရက်နေ့ တွင် ၁ တန်လျှင် ၅၁၇ ဒေါ်လာရှိပြီး အလားတူအဆင့်အတန်းရှိသော ထိုင်းဆန်ထက် ၁၈ ‌ဒေါ်လာ၊ ပါကစ္စတန်ဆန်ထက် ၆၄ ဒေါ်လာနှင့် အိန္ဒိယဆန်ထက် ၆၆ ဒေါ်လာ ပိုမိုမြင့်မားလျက်ရှိသည်။

      အောက်တိုဘာ ၂၄ ရက်နေ့အထိ စာရင်းများအရ ဖိလစ်ပိုင်သည် ဗီယက်နမ်ဆန်အတွက် အကြီးမားဆုံးဈေးကွက်ဖြစ်ပြီး စုစုပေါင်းဆန်တင်ပို့မှု၏ ၄၆.၁ ရာခိုင်နှုန်းရှိကြောင်း၊ ၎င်း၏နောက် ၌ အင်ဒိုနီးရှားနှင့် မလေးရှားတို့သည် ၁၃.၅ ရာခိုင်နှုန်းနှင့် ၈.၂ ရာခိုင်နှုန်းဖြင့် အသီးသီး ရပ်တည် နေကြောင်း သိရသည်။

      ၂၀၂၃ ခုနှစ် အလားတူကာလနှင့် နှိုင်းယှဉ်ပါက ဗီယက်နမ်၏ ဆန်တင်ပို့မှုတန်ဖိုးသည် ၂၀၂၄ ခုနှစ် ပထမ ၁၀ လအတွင်း ဖိလစ်ပိုင်သို့တင်ပို့မှု၌ ၅၉.၁ ရာခိုင်နှုန်းနှင့် အင်ဒိုနီးရှားသို့တင်ပို့မှု တွင် ၂၀.၂ ရာခိုင်နှုန်း အသီးသီးတိုးတက်ခဲ့ပြီး မလေးရှားသို့ တင်ပို့မှုတန်ဖိုးမှာ ၂.၂ ဆ အထိ တိုး တက်လာခဲ့သည်။ သို့ရာတွင် တရုတ်နိုင်ငံဈေးကွက်သို့ တင်ပို့မှုမှာမူ ၇၁.၃ ရာခိုင်နှုန်းအထိ ကျဆင်း ခဲ့သည်။

      စိုက်ပျိုးရေးနှင့် ကျေးလက်‌ဒေသဖွံ့ဖြိုးတိုးတက်ရေး ဝန်ကြီးဌာန၊ ဒုတိယဝန်ကြီး Phung Duc Tien က ဗီယက်နမ်၏ ဆန်စပါးကဏ္ဍသည် လွန်ခဲ့သော ၁၁ လအတွင်း ကုန်သွယ်မှုပိုငွေ ဒေါ်လာ ၄.၀၇ ဘီလီယံဖြင့် ၁၄.၆ ရာခိုင်နှုန်း တိုးတက်မှုရရှိခဲ့သည်ဟု ထုတ်ဖော်ပြောဆိုခဲ့သည်။ အဆိုပါ ကာလအတွင်း ပြည်တွင်းစားသုံးမှုနှင့် ကုန်ထုတ်လုပ်ငန်းများ၏ လိုအပ်ချက်ကို ဖြည့် ဆည်းရန်အတွက် ဗီယက်နမ်ကုမ္ပဏီများ၏ ဆန်အဆင့်အတန်း အမျိုးမျိုးကို ပြည်ပမှ တင်သွင်းမှု တန်ဖိုးမှာ ဒေါ်လာ ၁.၂၄ ဘီလီယံ ရှိခဲ့သည်။

     ဆန်လုပ်ငန်းကျွမ်းကျင်သူများနှင့် လုပ်ငန်းရှင်များ၏ ရှင်းလင်းပြောဆိုမှုအရ ဗီယက်နမ်၏ ဆန်တင်ပို့ကုန် ဈေးနှုန်းများမှာ အခြားပြိုင်ဘက်နိုင်ငံများထက် သိသာစွာ မြင့်မားမှုရှိကြောင်း၊ ပြည်တွင်းမှ ထွက်ရှိသည့်ဆန်ကို ပြည်ပသို့ ဦးစားပေးတင်ပို့နေချိန်တွင် ဆန်ခေါက်ဆွဲနှင့် အခြား သော ဆန်အခြေခံထုတ်ကုန်များ ထုတ်လုပ်မှုအတွက် အဆင့်အတန်းနိမ့်သည့် ဆန်များအား ပြည်ပမှ ပြန်လည်တင်သွင်းခြင်းက ထုတ်လုပ်မှုစရိတ် ပိုမိုသက်သာမှုရှိကြောင်း သိရသည်။

      ဗီယက်နမ်အနေဖြင့် ကာဗွန်ထုတ်လွှတ်မှုနည်းပါးပြီး အရည်အသွေးမြင့်မားသည့် တန်ဖိုး မြင့်ဆန်များ စိုက်ပျိုးထုတ်လုပ်ခြင်းသို့ ပြောင်းလဲလုပ်ကိုင်လျက်ရှိကြောင်း၊ လက်ရှိကာလတွင် ဗီယက်နမ်စပါးမျိုးကွဲများ၏ ၉၅ ရာခိုင်နှုန်းခန့်သည် အရည်အသွေးမြင့်မားသည့် အဆင့်ရှိကြောင်း၊ ဆန်ကြိတ်ခွဲထုတ်လုပ်မှု၏ ၈၉ ရာခိုင်နှုန်းခန့်သည် အရည်အသွေးမြင့်မားသော တန်းမြင့်ဆန်များ ဖြစ်ကြောင်း၊ ဓာတ်ငွေ့ထုတ်လွှတ်မှုနည်းပါးပြီး အရည်သွေးမြင့်သော ဆန်စပါးစိုက်ပျိုးမှု ဧရိယာ ဟက်တာ ၁ သန်း စီမံချက်ကို အောင်မြင်စွာ အကောင်အထည်ဖော်နိုင်ပါက ဗီယက်နမ်၏ ဆန်စပါး ကဏ္ဍတန်ဖိုးမှာ မြင့်တက်လာမည်ဖြစ်ပြီး ကမ္ဘာ့အဆင့်၌ ဗီယက်နမ်၏ ယှဉ်ပြိုင်နိုင်မှုအားသာချက် ကို ခိုင်မာစေမည်ဖြစ်ကြောင်းဖြင့် ဒုတိယဝန်ကြီး Phung Duc Tien က ပြောကြားခဲ့သည်။

     အိန္ဒိယနိုင်ငံသည် ၎င်း၏ ဆန်တင်ပို့မှုကို ပြန်လည်စတင်လုပ်ဆောင်ခဲ့ပြီဖြစ်သော်လည်း ဗီယက်နမ်ဆန်၏ ပျမ်းမျှပို့ကုန်ဈေးနှုန်းမှာ ကျဆင်းမှုမရှိပဲ ၁ တန်လျှင် ၆၂၇ ဒေါ်လာနှုန်းဖြင့် ဆက်လက်တည်ငြိမ်မှုရရှိနေသည်ဟု Vietnamnet သတင်းဌာနက ဖော်ပြထားပါသည်။

Source: Vietnamnet Global, 6 Dec 2024(လယ်ယာထွက်ကုန်များနှင့် အဓိကသွင်းကုန်များ၏ နိုင်ငံတကာဈေးကွက်စောင့်ကြည့်လေ့လာရေးအဖွဲ့)

     စက်မှု၊ သိပ္ပံ၊ နည်ပညာနှင့် တီထွင်ဆန်းသစ်မှုဝန်ကြီးဌာန၊ ဝန်ကြီး Hem Vanndyu က FTB Bank မှ Dith Sochal နှင့်ကိုယ်စားလှယ်အဖွဲ့အား ၃-၁၂-၂၀၂၄ ရက်နေ့က ပုဂ္ဂလိက ရေလုပ်ငန်းအပါအဝင် အသေးစားနှင့်အလတ်စားစီးပွားရေးလုပ်ငန်းများအတွက် တွေ့ဆုံဆွေးနွေးမှုများ ပြုလုပ်ခဲ့သည်။ Dith Sochal သည် နိုင်ငံအတွင်းတွင် ဘဏ်ခွဲပေါင်း ၂၃ ခု နှင့် ပိုင်ဆိုင်မှုအမေရိကန်ဒေါ်လာ ၂.၂ ဘီလီယံရှိပြီး မကြာမီကာလအတွင်း နောက်ထပ်ဘဏ်ခွဲ နှစ်ခု ကိုဖွင့်လှစ်နိုင်ရန် မျှော်မှန်းထားသည်ဟု ပြောကြားခဲ့သည်။ ဘဏ်သည် ဝန်ထမ်းပေါင်း ၇၇၀ ဦး ကိုခန့်အပ်ထားပြီး ပုဂ္ဂလိကရေလုပ်ငန်း ၃၁ ခုအား ချေးငွေဒေါ်လာ ၁၅ သန်းအပါအဝင် SME ဖွံ့ဖြိုးတိုးတက်ရေးတွင် ရေးပါသောအခန်းကဏ္ဍမှ ပါဝင်ကြောင်း ပြောကြားခဲ့သည်။ Hem Vanndyu သည် SMEs နှင့် ပုဂ္ဂလိကရေလုပ်ငန်းလုပ်ကိုင်သူများအတွက် ၎င်း၏ပံ့ပိုးကူညီမှုကို ဆက်လက်ထိန်းသိမ်းထားရန် FTB Bank အား တိုက်တွန်းခဲ့ပြီး ပြည်သူ့ကျန်းမာရေး၊ စီးပွားရေးနှင့် စက်မှုလုပ်ငန်းများအတွက် ကဏ္ဍ၏အရေးပါမှုကို အလေးပေးပြောကြားခဲ့သည်။ ရေပေးဝေရေး၊ အတိုးနှုန်းသက်သက်သာသောချေးငွေများအတွက် အတိုးနှုန်းလျှော့ချရန်နှင့် ကမ္ဘောဒီးယား ချေးငွေအာမခံကော်ပိုရေးရှင်း (CGCC) ၏  ငွေကြေးဆိုင်ရာအခွင့်အလမ်းများကို တိုးချဲ့ရန် ဝန်ကြီးက FTB Bank  အား တိုက်တွန်းခဲ့သည်။

Source: Khmer Times

DOCA(ဧရာဝတီ)