ပြည်ပကုန်သွယ်မှုသတင်းများ

     ဖိလစ်ပိုင်နိုင်ငံ၌ အချို့သော လုပ်ငန်းရှင်များ၏ ဆန်ဈေးနှုန်းအပေါ် ကြိုးကိုင်ချယ်လှယ်မှု ကို တားဆီးနိုင်ရန်အတွက် ပြည်ပမှ တင်သွင်းလာသည့်ဆန်များအား ရောင်းချရာတွင် ကုန်အမှတ် တံဆိပ်များကို ဖယ်ရှားရမည်ဖြစ်သည်ဟု ဖိလစ်ပိုင်စိုက်ပျိုးရေးဌာနက ဒီဇင်ဘာ ၂၃ ရက်နေ့တွင် ပြောဆိုခဲ့သည်။

    ဈေးကွက် လေ့လာဆန်းစစ်မှုများစွာကို လုပ်ဆောင်ခဲ့အပြီးတွင် အချို့သော လက်လီရောင်း ချသူများနှင့် ကုန်သည်များသည် ဆန်ဈေးနှုန်းမြင့်မားစွာ ရရှိစေရေးအတွက် ကုန်အမှတ်တံဆိပ်ကို အကြောင်းပြလျက် စားသုံးသူများ ထင်ယောင်ထင်မှားဖြစ်စေရန် ရည်ရွယ်ချက်ရှိစွာ လုပ်ကိုင်နေ သည်ကို တွေ့ရှိရကြောင်း၊ သို့ဖြစ်ရာ တင်သွင်းလာသည့် ဆန်များ၏ အမှတ်တံဆိပ်များကို ဖယ်ရှား မည်ဖြစ်သည့်အပြင် ပရီမီယံ (premium) နှင့် အထူး (special) စသည့် ဖော်ပြချက်များကိုလည်း ဖယ်ရှားရမည်ဖြစ်ကြောင်း၊ ဆန်တင်သွင်းမှုသည် သာမန်အခွင့်အရေးမဟုတ်ပဲ အထူးအခွင့်အရေး ပေးအပ်ခြင်းဖြစ်ပြီး အကယ်၍ ကုန်သည်များအနေဖြင့် အစိုးရ၏ စည်းကမ်းချက်များကို လိုက်နာ ရန် ဆန္ဒမရှိပါက ဆန်တင်သွင်းခွင့်ပါမစ်များကို ထိန်းသိမ်းထားမည်ဖြစ်ကြောင်းဖြင့် ဖိလစ်ပိုင် စိုက်ပျိုးရေးအတွင်းဝန် Francisco Tiu Laurel Jr. က ပြောကြားခဲ့သည်။

    တင်သွင်းလာသည့်ဆန်များ၏ ဆိပ်ကမ်းကုန်ချစရိတ်နှင့် ရောင်းချသည့်ဈေးနှုန်းတို့အကြား ခြားနားမှုတန်ဖိုး ၁ ကီလိုဂရမ်လျှင် ၆ ပီဆိုမှ ၈ ပီဆိုအတွင်း နှုန်းထားသည် ကုန်ထုတ်လုပ်ရောင်း ချမှု ကွင်းဆက်၌ ပါဝင်နေသူများအားလုံး၏ လုပ်ငန်းဆောင်ရွက်မှုအတွက် အကျိုးအမြတ်ဖြစ် ထွန်းရန် လုံလောက်မှုရှိကြောင်း ဖိလစ်ပိုင်စိုက်ပျိုးရေးဌာန၏ အချက်အလက်များက ဖော်ပြလျက် ရှိသည်။ ဥပမာအားဖြင့် ဗီယက်နမ်မှ ဝယ်ယူတင်သွင်းလာသောဆန်၏ စုစုပေါင်းကုန်ကျစရိတ် သည် ၁ ကီလိုဂရမ်လျှင် ပီဆို ၄၀ ဖြစ်ပါက စားသုံးသူလက်ဝယ်အရောက် ရောင်းချသည့် ဈေးနှုန်း သည် ၁ ကီလိုဂရမ်လျှင် ၄၈ ပီဆိုထက် မပိုသင့်ကြောင်း ဖိလစ်ပိုင်စိုက်ပျိုးရေးဌာန၏ ထုတ်ပြန် ချက်၌ ဖော်ပြထားသည်။

     ဈေးနှုန်းများတည်ငြိမ်စေရေးအတွက် အရန်ရိက္ခာထားရှိမှုမှ ဖြန့်ဖြူးရန် အမျိုးသား စားနပ် ရိက္ခာအာဏာပိုင်အဖွဲ့သို့ ခွင့်ပြုသော ပြန်လည်ပြင်ဆင်ခဲ့သည့် ဆန်စပါးအကောက်ခွန်စည်းကြပ်မှု ဥပဒေအောက်ရှိ အရေးပေါ် စားနပ်ရိက္ခာဖူလုံမှု ပြဋ္ဌာန်းချက်အား ကိုးကားဆောင်ရွက်မှု အပါအဝင် ဆန်ဈေးနှုန်း မတည်ငြိမ်မှုကို ကိုင်တွယ်ဖြေရှင်းမည့် အစီအမံများစွာကို အစိုးရက လုပ်ဆောင် လျက်ရှိသည်။

    ပြည်တွင်း၌ စိုက်ပျိုးထုတ်လုပ်သောဆန်များမှာမူ ပြည်တွင်းဈေးကွက်ကို အကာအကွယ် ပေးရန်အတွက် ယခုကဲ့သို့ ကုန်အမှတ်တံဆိပ်များ ဖယ်ရှားမည့် စည်းကမ်းသတ်မှတ်ချက်များမှ ကင်းလွတ်မှုရှိမည်ဖြစ်သည်။

    ဆန်ကုန်သည်များ၏ ဘဏ္ဍာရေး မှတ်တမ်းမှတ်ရာများကို ပြည်တွင်းအခွန်များဗျူရိုဌာနက စာရင်းစစ်ဆေးရာတွင် သင့်တင့်မျှတသည့် ဈေးနှုန်းသတ်မှတ်မှု အလေ့အထများအား လိုက်နာ ဆောင်ရွက်ခြင်းကို သေချာခိုင်မာမှုရှိစေရမည်ဖြစ်ကြောင်း၊ ကုန်သွယ်ရေးနှင့်စက်မှုဦးစီးဌာနက ဈေးကွက်အတွင်းဖြစ်ပေါ်သော ဆန်ဈေးနှုန်းများအား စောင့်ကြည့်ထိန်းကျောင်းရာတွင်လည်း အလားတူ ဆောင်ရွက်သင့်ကြောင်း စိုက်ပျိုးရေးအတွင်းဝန် Laurel က ပြောကြားထားသည်။

Source: Daily Tribune, 26 Dec 2024

     သီရိလင်္ကာအစိုးရဝန်ကြီးများအဖွဲ့သည် ပုဂ္ဂလိကကဏ္ဍမှ ဆန်တင်သွင်းခွင့်ကို ၂၀၂၅ ခုနှစ် ဇန်နဝါရီ ၁၀ ရက်အထိ သက်တမ်းတိုးခွင့်ပြုခဲ့သည်ဟု ဒီဇင်ဘာ ၂၄ ရက်နေ့တွင် ကျင်းပသည့် အစိုးရအဖွဲ့ သတင်းစာရှင်းလင်းပွဲတွင် ပြောရေးဆိုခွင့်ရှိသူ ဝန်ကြီး Dr. Nalinda Jayatissa က ပြောကြားခဲ့ပါသည်။

     သို့သော် ပြည်တွင်းဈေးကွက်များတွင် ဆန်ပြတ်လပ်မှုသည် ၂၀၂၅ ခုနှစ် ဇန်နဝါရီလကုန် တိုင်အောင် ဆက်လက်ဖြစ်ပေါ်ဖွယ်ရှိသည်ကို လေ့လာတွေ့ရှိရသည်ဟု ဝန်ကြီးက မှတ်ချက်ပြုခဲ့ ကြောင်း သိရသည်။

     ကုန်သွယ်မှု၊ ကူးသန်းရောင်းဝယ်ရေး၊ စားနပ်ရိက္ခာဖူလုံရေးနှင့် သမဝါယမဖွံ့ဖြိုး တိုးတက် ရေးဝန်ကြီးမှ အဆိုတင်သွင်းခဲ့သော ပုဂ္ဂလိကကဏ္ဍမှ သွင်းကုန်လုပ်ငန်းရှင်များအား သွင်းကုန် ထိန်းချုပ်လိုင်စင် မလိုအပ်ဘဲ ဆန်တင်သွင်းခွင့်ပြုသည့် ကာလကို ၂၀၂၅ ခုနှစ် ဇန်နဝါရီလ ၁၀ ရက်နေ့အထိ တိုးမြှင့်ပေးရန် တင်ပြချက်ကို အစိုးရအဖွဲ့က အတည်ပြုခဲ့ခြင်း ဖြစ်သည်။

     ပြည်တွင်းဈေးကွက်တွင် ဆန်ပြတ်လပ်မှုဖြစ်ပေါ်လျက်ရှိရာ လက်ရှိကာလ၌ သီရိလင်္ကာ နိုင်ငံပိုင် ကူးသန်းရောင်းဝယ်ရေးကော်ပိုရေးရှင်းသည် ၂၀၂၄ ခုနှစ် ဒီဇင်ဘာ ၉ ရက်နေ့၌ ကျင်းပခဲ့ သည့် အစိုးရ အဖွဲ့အစည်းအဝေး၏ အတည်ပြုချက်ဖြင့် ဆန်မက်ထရစ်တန် ၇၀၀၀၀ ဝယ်ယူရေး လုပ်ငန်းစဉ်ကို ဆောင်ရွက်လျက်ရှိသည်။ ထို့အပြင် ပုဂ္ဂလိက လုပ်ငန်းရှင်များ အနေဖြင့် သွင်းကုန် ထိန်းချုပ်လိုင်စင် မလိုအပ်ဘဲ ဆန်တင်သွင်းနိုင်ခွင့်ကို ၂၀၂၄ ခုနှစ် ဒီဇင်ဘာလ ၂၀ ရက်နေ့အထိ အစိုးရက ခွင့်ပြုပေးထားခဲ့ကြောင်း သိရပါသည်။

Source: Ada Derana, 24 Dec 2024

      ဗီယက်နမ်နှင့် အင်ဒိုနီးရှားနိုင်ငံတို့တွင် ကော်ဖီထွက်ရှိမှု ပြန်လည်‌ကောင်းမွန်လာခြင်း ကြောင့် ကမ္ဘာ့ကော်ဖီထုတ်လုပ်မှုသည် ၂၀၂၄-၂၀၂၅ စိုက်ပျိုးရာသီတွင် သိသာစွာ တိုးတက်လာ မည်ဖြစ်ကြောင်း အမေရိကန်စိုက်ပျိုးရေးဌာန (USDA) ၏ တစ်နှစ် နှစ်ကြိမ်ထုတ်ဝေသည့် နောက် ဆုံးထုတ် အစီရင်ခံစာ၌ ဖော်ပြပါရှိပါသည်။

       ပြီးခဲ့သည့် စိုက်ပျိုးရာသီနှင့်နှိုင်းယှဉ်ပါက ကမ္ဘာ့ကော်ဖီထုတ်လုပ်မှုသည် ၆၀ ကီလိုဂရမ်ဝင် ကော်ဖီအိတ် အရေအတွက်အားဖြင့်  အိတ် ၆.၉ သန်းပိုမိုလျက်  အိတ်ပေါင်း ၁၇၄.၇ သန်းအထိ ရောက်ရှိမည်ဟု ခန့်မှန်းထားကြောင်း၊ သို့ရာတွင် ကော်ဖီသောက်သုံးမှု မြင့်တက်နေသည့်အတွက် နှစ်ကုန် ကော်ဖီသိုလှောင်မှုလက်ကျန် ပမာဏများ ဆက်လက်ကျဆင်းနိုင်ကြောင်း သိရှိရပါသည်။

    ကမ္ဘာ့ဒုတိယအကြီးဆုံးကော်ဖီထုတ်လုပ်သည့် ဗီယက်နမ်နိုင်ငံအနေဖြင့် ၂၀၂၁-၂၀၂၂ ခုနှစ် တွင် စံချိန်တင်ထွက်ရှိခဲ့သည့် အထွက်ပမာဏအောက် လျော့နည်းမည်ဖြစ်သော်လည်း ၎င်း၏ ထုတ်လုပ်မှုကို ကော်ဖီအိတ် ၂.၆ သန်း ပိုမိုတိုးမြှင့်လျက်  ၆၀ ကီလိုဂရမ်ဝင် အိတ်ပေါင်း ၃၀.၁ သန်းအထိ ထုတ်လုပ်နိုင်ဖွယ်ရှိသည်။ ဗီယက်နမ်၏ ပြည်ပသို့ ကော်ဖီစေ့တင်ပို့မှုမှာလည်း အိတ် ၁.၈ သန်း ပြန်လည်တိုးတက်လျက် စုစုပေါင်းအိတ် ၂၄.၄ သန်းအထိ မြင့်တက်နိုင်ကြောင်း သိရှိ ရပါသည်။

    အင်ဒိုနီးရှားနိုင်ငံတွင် အာရေဗီးကားနှင့် ရိုဘတ်စတာ ကော်ဖီနှစ်မျိုးပေါင်း ရိတ်သိမ်းထွက် ရှိမှုသည် အိတ်ပေါင်း ၂.၈ သန်းခန့် ပြန်လည်တိုးတက်ပြီး စုစုပေါင်း ၆၀ ကီလိုဂရမ်ဝင် အိတ် ၁၀.၉ သန်းအထိ ထုတ်လုပ်နိုင်မည်ဟု ခန့်မှန်းရသည်။ ရိုဘတ်စတာကော်ဖီ ထုတ်လုပ်မှု စုစုပေါင်း၏ ၇၅ ရာခိုင်နှုန်းခန့်ကို စိုက်ပျိုးထုတ်လုပ်သော ဆူမားတြားတောင်ပိုင်းနှင့် ဂျာဗားဒေသတို့ရှိ မြေနိမ့် ဧရိယာများတွင် စိုက်ပျိုးထားရှိသည့် ကော်ဖီစိုက်ခင်းများ၏ အခြေအနေကောင်းမွန်မှုအရ  ရိုဘတ်စတာကော်ဖီ အထွက်ပမာဏသည် အိတ် ၂.၇ သန်း ပြန်လည်တိုးတက်မှုရရှိပြီး အိတ်ပေါင်း ၉.၅ သန်းအထိကို လည်းကောင်း၊ အာရေဗီးကားကော်ဖီထုတ်လုပ်မှုမှာ အနည်းငယ်မြင့်တက် လျက် အိတ်ပေါင်း ၁.၄ သန်းအထိကိုလည်းကောင်း တိုးမြှင့် ထုတ်လုပ်နိုင်မည်ဟု ခန့်မှန်းထားခြင်း ဖြစ်သည်။ ထိုသို့ အထွက်ပမာဏ မြင့်မားရန် မျှော်မှန်းထားမှုအရ ကော်ဖီတင်ပို့မှုသည်လည်း အိတ် ၂.၂ သန်း ပိုမိုတိုးတက်လျက် စုစုပေါင်းအိတ် ၆.၅ သန်းအထိ တိုးတက်နိုင်ကြောင်းသိရှိရပါသည်။

     အလားတူ ကမ္ဘာ့ထိပ်တန်း ကော်ဖီတင်ပို့သည့် ဘရာဇီးနိုင်ငံအနေဖြင့်လည်း ၂၀၂၄-၂၀၂၅ စိုက်ပျိုးရာသီတွင် ကော်ဖီအိတ် ၁ သိန်း ပိုမိုတိုးတက်လျက် အိတ်ပေါင်း ၆၆.၄ သန်းအထိ ထွက် ရှိနိုင်ကြောင်း၊ ရိုဘတ်စတာ ကော်ဖီထုတ်လုပ်မှုတွင်  အိတ် ၄ သိန်းခန့် လျော့နည်းလျက် အိတ် ၂၁ သန်းခန့်သို့ ကျဆင်းဖွယ်ရှိသော်လည်း အာရေဗီးကား‌ကော်ဖီထုတ်လုပ်မှုမှာ အိတ် ၅ သိန်းခန့် ပိုမို လျက် အိတ်ပေါင်း ၄၅.၄ သန်းအထိ တိုးတက်ထွက်ရှိမည်ဟု ခန့်မှန်းခြင်းဖြစ်ကြောင်း၊ ကော်ဖီ အသီးကင်းဖြစ်ထွန်းစအချိန်တွင် ရာသီဥတုခြောက်သွေ့မှုနှင့် အပူချိန် မြင့်မားမှုတို့ကြောင့် ကော်ဖီ နှစ်မျိုးလုံး၏ အထွက်ပမာဏကို ယခင်အကြိမ်ခန့်မှန်းမှုအောက်သို့ လျှော့ချခဲ့ခြင်းဖြစ်ကြောင်း၊ ထိုကဲ့သို့ ကော်ဖီအထွက် သိသာစွာတိုးတက်မှု မရှိခြင်းနှင့်အတူ ယခင်နှစ်မှ ကုန်လက်ကျန် နည်း ပါးသည့် အခြေအနေအရ ရောင်းလိုအားကျဆင်းမှုဖြစ်ပေါ်ပြီး ဘရာဇီး၏ ကော်ဖီတင်ပို့မှုသည် အိတ် ၂.၆ သန်းခန့် ကျဆင်းလျက် အိတ်ပေါင်း ၄၀.၅ သန်းခန့်သာ ရှိနိုင်ကြောင်း USDA က ဖော်ပြထားသည်။

    ဘရာဇီးထံမှ ကော်ဖီတင်ပို့မှုလျော့ကျနိုင်မည့် ပမာဏထက် ဗီယက်နမ်နှင့် အင်ဒိုနီးရှားတို့မှ တိုးတက်တင်ပို့နိုင်မည့်ပမာဏက ပိုမိုသာလွန်လျက်ရှိသဖြင့် ကမ္ဘာ့ဈေးကွက်တွင် ကော်ဖီ တင်ပို့ မှု အနည်းငယ်မြင့်တက်လာဖွယ်ရှိသည်။ ဥရောပသမဂ္ဂ၊ အမေရိကန်နှင့် တရုတ်နိုင်ငံတို့တွင် စားသုံးမှု ပိုမိုလာမှုနှင့်အတူ ကမ္ဘာ့ကော်ဖီသောက်သုံးမှုသည် ကော်ဖီအိတ် ၅.၁ သန်း တိုးတက် လျက် အိတ်ပေါင်း ၁၆၈.၁ သန်းအထိ ရှိနိုင်ကြောင်းနှင့် ကော်ဖီအိတ် နှစ်ကုန်လက်ကျန်ပမာဏ သည် အိတ် ၁.၅ သန်း လျော့ကျလျက် အိတ်ပေါင်း ၂၀.၉ သန်း ရှိမည်ဟု ခန့်မှန်းထားကြောင်း သိရှိ ရပါသည်။

Source : Vietnam Plus, December 20, 2024

             တရုတ်နှင့်ပင်လယ်ကွေ့အာရပ်ဒေသအကြား စီးပွားရေးဆက်ဆံမှုများ အားကောင်းလာသောကြောင့် အထူးသဖြင့်တရုတ်နိုင်ငံရှိ ဇီဝနည်းပညာနှင့်ကျန်မာရေးစောင့်ရှောက်မှုကဏ္ဏတို့တွင် ကြီးမားသောရင်းနှီးမြုပ်နှံမှု အခွင့်အလမ်းကောင်းများကိုတွေ့ရှိခဲ့ရကြောင်း ဆော်ဒီအကျိုးတူအရင်းအနှီး ကုမ္ပဏီ KBW မှဆိုသည်။ ကဏ္ဏများစွာတွင်ပူးပေါင်းဆောင်ရွက် သွားရန် အခွင့်အလမ်းများစွာရှိကြောင်း KBW Venture ၏ ရင်းနှီးမြုပ်နှံမှုအရာရှိချုပ် Ekta Tolani မှ ဒီဇင်ဘာလ ၉ ရက်နေ့မှ ၁၂ ရက်နေ့အထိ Abu Dhabi Finance Week တွင် မေးမြန်းခဲ့သော Xinhua သတင်းဌာန၏အင်တာဗျူးအရသိရသည်။ အထူးသဖြင့် ကျန်းမားရေးစောက်ရှောက်မှုနယ်ပယ်တွင် တရုတ်နိုင်ငံသည် များစွာဖွံ့ဖြိုးတိုးတက်နေပြီဖြစ်သောကြောင့် ပူးပေါင်းဆောင်ရွက်မှုများပြုလုပ်ချင်ကြောင်း Ekta Tolani မှဆက်လက်ပြောကြားခဲ့သည်။ ဆော်ဒီအာရေဗီးယားမင်းသား Khaled bin Alwaleed bin Talal Al Saud မှတည်ထောင်သည့် KBW Ventures သည် အသွင်ပြောင်းနည်းပညာများနှင့် စီးပွားရေးပုံစံများဖြင့် ကုမ္ပဏီများကို အာရုံစိုက်လျက်ရှိကြောင်း ၎င်း၏ဝက်ဘ်ဆိုဒ်တွင် ဖော်ပြထားသည်။ အာရပ်စော်ဘွားများ ပြည်ထောင်စု (UAE) ဒူဘိုင်းတွင် ဂြိုလ်တုရုံးခွဲတစ်ခုရှိသည့်ကုမ္ပဏီသည် ဇီဝနည်းပညာ၊ ညဏ်ရည်တု၊ ထုတ်လွှင့်မှုနည်းပညာများနှင့် အခြားသောခေတ်မှီနည်းပညာကဏ္ဏများတွင် ရင်းနှီးမြုပ်နှံမှုများပြုလုပ်ထားကြောင်း သိရသည်။ ဇီဝနည်းပညာကဏ္ဏသည် ရင်းနှီးမြုပ်နှံသူများ၏ စိတ်ဝင်စားမှုကို အဆွဲဆောင်နိုင်ဆုံးဖြစ်ကြောင်း Tolani မှ မီးမောင်းထိုးပြခဲ့သည်။ တရုတ်နိုင်ငံသည် UAE ၏ အကြီးဆုံးကုန်သွယ်မှုမိတ်ဖက်နိုင်ငံဖြစ်ခဲ့ပြီး  UAE သည် တရုတ်နိုင်ငံ၏ အကြီးဆုံးပို့ကုန်စျေးကွက်နှင့် အရှေ့အလယ်ပိုင်းတွင် ဒုတိယအကြီးဆုံးကုန်သွယ်ဖက်နိုင်ငံလည်း ဖြစ်ကြောင်းသိရှိရပါသည်။

DOCA(ရန်ကုန်)

               အမေရိကန်နိုင်ငံ၏ ‌ရေနံစိမ်းတင်ပို့မှုနှင့် တင်သွင်းမှုနှစ်မျိုးစလုံးသည် ဒီဇင်ဘာလ ၆ ရက်နေ့တွင် ကုန်ဆုံးခဲ့သောသီတင်းပတ်အတွင်း ကျဆင်းသွားခဲ့ကြောင်း အမေရိကန်စွမ်းအင်သီတင်းအချက်အလက် စီမံခန့်ခွဲရေးအဖွဲ့ (EIA) ၏ ၁၁.၁၂.၂၀၂၄ ရက်နေ့(ဗုဒ္ဓဟူးနေ့)တွင် ထုတ်ပြန်သောအစီအရင်ခံစာအရသိရသည်။ အမေရိကန်နိုင်ငံ၏ ရေနံစိမ်းတင်သွင်းမှုသည် ဒီဇင်ဘာ ၆ ရက်နေ့ကကုန်ဆုံးခဲ့သော သီတင်းပတ်တွင် တစ်နေ့လျင်စည်းပေါင်း ၅.၉၈၄ သန်းတင်သွင်းခဲ့ပြီး နိုဝင်ဘာ ၂၉ ရက်နေ့ကကုန်ဆုံးခဲ့သော သီတင်းပတ်ကထက် ၁.၃၀၆ သန်း တင်သွင်းမှုကျဆင်းခဲ့သည်။ အလားတူပင် ရေနံစိမ်းတင်ပို့မှုမှာလည်း ဒီဇင်ဘာ ၆ ရက်နေ့က ကုန်ဆုံးခဲ့သောသီတင်းပတ်တွင် တစ်နေ့လျင်ပျမ်းမျှ စည်းပေါင်း ၃.၀၉၉ သန်း တင်ပို့ခဲ့ပြီး နိုဝင်ဘာ ၂၉ ရက်နေ့ကကုန်ဆုံးခဲ့သော သီတင်းပတ်ကထက် စည်ပေါင်း ၁.၁၃၆ သန်းတင်ပို့မှု ကျဆင်းခဲ့ကြောင်း ယခင်ကထုတ်ပြန်ခဲ့သော အပတ်စဉ်ရေနံအခြေအနေ အစီအရင်ခံစာအရ သိရသည်။ လွန်ခဲ့သော လေးပတ်အတွင်း အမေရိကန်နိုင်ငံ ရေနံစိမ်းပျမ်းမျှတင်သွင်းမှုသည် တစ်နေ့လျှင်စည်ပေါင်း ၆.၇၆၀ သန်းရှိပြီး ပြီးခဲ့သည်နှစ် လေးလပတ်ကထက် ၂.၅ ရာခိုင်နှုန်း တိုးတက်ခဲ့ကြောင်းသိရသည်။ တူညီသောကာလအတွင်း အမေရိကန်နိုင်ငံ၏ ရေနံစိမ်းတင်ပို့မှုသည် ၄.၀၉၄ သန်းရှိပြီး ပြီးခဲ့သည်နှစ် လေးလပတ်ကထက် ၇.၂ ရာခိုင်နှုန်းကျဆင်းခဲ့ကြောင်း အစီအရင်ခံစာတွင်ဖော်ပြချက်အရ သိရသည်။ အမေရိကန် နိုင်ငံသည် ၎င်း၏ shale ‌ရေနံ ထုတ်လုပ်မှုတိုးတက်မှုအကူအညီဖြင့် ပြီးခဲ့သောနှစ်များအတွင်း ကမ္ဘာ့ပေါ်တွင်အရေးပါသော ရေနံထုတ်လုပ်သူအဖြစ် ရပ်တည်လျက်ရှိကြောင်းသိရှိရသည်။

Source : Xinhua

DOCA(ရန်ကုန်)