HighLight News

     မကွေးတိုင်းဒေသကြီး၊ မကွေးခရိုင်၊ မကွေးမြို့၊ မြို့နယ်စုပေါင်းရုံးအစည်းအဝေးခန်းမ၌ မကွေးတိုင်းဒေသကြီးအစိုးရအဖွဲ့မှကြီးမှူး၍ ဒေသတစ်ခု ထုတ်ကုန်တစ်ခု (One Region One Product) အစီအစဉ်ဖြင့် "စွမ်းအင်ခြိုးခြံချွေတာခြင်းနှင့် စွမ်းအင်စီမံခန့်ခွဲမှုစနစ်ဆိုင်ရာဆွေးနွေးပွဲ" ကို (၃၀-၇-၂၀၂၄) ရက်နေ့၊ နံနက် (၀၉:၀၀)နာရီအချိန်တွင် ကျင်းပပြုလုပ်ခဲ့ပါသည်။

          အဆိုပါဆွေးနွေးပွဲတွင် တိုင်းဒေသကြီး MSME Agency ဥက္ကဋ္ဌ မကွေးတိုင်းဒေသကြီးအစိုးရအဖွဲ့၊ စီးပွားရေးရာဝန်ကြီး ဦးအောင်ချိန်က အဖွင့်အမှာစကားပြောကြားပြီးနောက် မကွေးတိုင်းဒေသကြီးအစိုးရအဖွဲ့အနေဖြင့် နိုင်ငံတော်ဝန်ကြီးချုပ်၏ လမ်းညွှန်မှုနှင့်အညီ နိုင်ငံ့စီးပွားရေး၏ အဓိကကျောရိုးဖြစ်သည့် MSMEs လုပ်ငန်းများဖွံ့ဖြိုးတိုးတက်ရေး၊ ကုန်ထုတ်လုပ်မှုတိုးမြှင့်ရေးအတွက် ဘက်ပေါင်းစုံမှ ပံ့ပိုးကူညီပေးလျက်ရှိကြောင်း၊ ဒေသတစ်ခု ထုတ်ကုန်တစ်ခု (One Region One Product) အစီအစဉ်ဖြင့် စိုက်ပျိုးရေးကဏ္ဍ၊ MSMEs ကဏ္ဍတို့မှ အလားအလာရှိသော ထုတ်ကုန်များကိုရွေးချယ်ပြီး လိုအပ်သည်များပံ့ပိုးပေးခြင်း၊ ချေးငွေများ ထုတ်ချေးပေးခြင်း၊ အသိပညာပေးဆွေးနွေးပွဲများကျင်းပခြင်း စသည်ဖြင့် ဆောင်ရွက်လျက်ရှိကြောင်း၊ ထုတ်လုပ်မှုနှင့် ဝန်ဆောင်မှုလုပ်ငန်းများအပါအဝင် စီးပွားရေးလုပ်ငန်းများအတွက် စွမ်းအင်သည် အဓိကအရေးပါသော သွင်းအားစုတစ်မျိုးဖြစ်ပြီး စွမ်းအင်လုံလောက်စွာရရှိရန်နှင့် ရရှိသည့်စွမ်းအင်ကို ထိထိရောက်ရောက် အကျိုးရှိစွာသုံးစွဲရန်လိုအပ်ကြောင်း၊ မကွေးတိုင်းဒေသကြီးအတွင်းရှိ MSMEs လုပ်ငန်းများအပါအဝင် စီးပွားရေးလုပ်ငန်းများအနေဖြင့် စွမ်းအင်ကို အကျိုးရှိရှိ ထိရောက်စွာသုံးစွဲခြင်းဆိုင်ရာ အသိပညာများတိုးပွားလာပြီး ထိုမှတစ်ဆင့် အကျိုးအမြတ်ဖြစ်ထွန်းအောင် ဆောင်ရွက်နိုင်စေရန်ရည်ရွယ်၍ ယနေ့ဆွေးနွေးပွဲကို ပြင်ပမှပညာရှင်များအားဖိတ်ကြားပြီး ကျင်းပပြုလုပ်ရခြင်းဖြစ်ကြောင်း၊ (Energy Saving Technology) ကို အသုံးပြုခြင်းအားဖြင့် စီးပွားရေးလုပ်ငန်းတစ်ခုချင်းစီအတွက်သာမက နိုင်ငံတော်အတွက်ပါ အကျိုးကျေးဇူးများစွာဖြစ်ထွန်းစေသောကြောင့် ဆွေးနွေးပွဲတက်ရောက်လာသည့် စီးပွားရေးလုပ်ငန်းရှင်များ၊ မန်နေဂျာများအနေဖြင့် ပညာရှင်များ၏ဆွေးနွေးချက်များကို တက်ကြွစွာပါဝင်ပြီး သိလိုသည့်အချက်များကိုမေးမြန်းဆွေးနွေးကြရန်  ပြောကြားခဲ့ကြောင်းသိရပါသည်။

    ဆက်လက်၍ Agilent Biz Engineering Co.,Ltd မှ ဦးမျိုးခန့်က စွမ်းအင်အသုံးချခြင်းဆိုင်ရာနည်းပညာများနှင့် စွမ်းအင်စီမံခန့်ခွဲမှုဆိုင်ရာစနစ်များနှင့်ပတ်သက်၍ အသိပညာမျှဝေခြင်းအား လည်းကောင်း၊ Astro Automation Co.,Ltd မှ ဦးသူရိန်အောင်က Power & Process Automation Systems ဆိုင်ရာနည်းပညာများအား အသိပညာပေးခြင်းအားလည်းကောင်း အသီးသီးဆွေးနွေးခဲ့ပြီး တက်ရောက်လာသည့် လုပ်ငန်းရှင်များက သိရှိလိုသည့်အကြောင်းအရာများအား အပြန်အလှန်ဆွေးနွေးခဲ့ကြကြောင်းသိရပါသည်။

         စက်မှုကြီးကြပ်နှင့်စစ်ဆေးရေးဦးစီးဌာန၊ တိုင်းဒေသကြီးဦးစီးဌာနမှူး ဦးဇော်ထွန်းအောင်က နိဂုံးချုပ်အမှာစကားပြောကြားခဲ့ပြီး အဆိုပါဆွေးနွေးပွဲသို့ ဌာနဆိုင်ရာတာဝန်ရှိသူများနှင့် စီးပွားရေးလုပ်ငန်းရှင်စုစုပေါင်း(၇၃)ဦးတက်ရောက်ခဲ့ကြောင်းသိရှိရပါသည်။

DOCA(မကွေး)

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနသည် စားသုံးသူကာကွယ်ရေးဥပဒေအရ စားသုံးသူကာကွယ်ရေးလုပ်ငန်းများအပြင် ဒေသတွင်းရှိ MSMEs လုပ်ငန်းများဖွံ့ဖြိုးတိုးတက်စေရေး လုပ်ငန်းရှင်နှင့်ကွင်းဆင်းတွေ့ဆုံခြင်းဆောင်ရွက်လျက်ရှိကြောင်း၊ ၂၀၂၄ခုနှစ်၊ ဇူလိုင်လ ၂၅ရက်‌နေ့၊ နံနက် ၁၁:၀၀ နာရီအချိန်အတွင် ကန့်ဘလူမြို့နယ်တာဝန်ခံ ဦးမျိုးဝင်းသန်းနှင့် ဝန်ထမ်း(၁)ဦးတို့သည် ကန့်ဘလူမြို့၊ အမှတ်(၃)ရပ်ကွက်ရှိ “သိန်းသန်းဖြိုး”ဆန်စက်လုပ်ငန်းသို့သွားရောက်ကွင်းဆင်း၍ လုပ်ငန်းရှင်နှင့်တွေ့ဆုံခဲ့ကြောင်းသိရသည်။

      ထိုသို့တွေ့ဆုံဆွေးနွေးရာတွင် မြို့နယ်တာဝန်ခံက ဆန်စက်၏လည်ပတ်ကြိတ်ခွဲနိုင်မှု၊ ကုန်ချောထွက်ရှိမှုအခြေအနေများကိုဆွေးနွေးခဲ့ရာ လုပ်ငန်းရှင်က မိမိတို့အနေဖြင့် နဝလီကြိတ်ခွဲခြင်းသာဖြစ်ကြောင်း၊ ဆန်ဈေးနှုန်းတည်ငြိမ်စေရေး သတ်မှတ်ရည်ညွှန်းဈေးနှုန်းအတိုင်း ရောင်းချပေးလျက်ရှိကြောင်းဆွေးနွေးခဲ့ကြပြီး စီးပွားရေးလုပ်ငန်းရှင်၏တာဝန်များပါ အသိပညာပေးလက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(စစ်ကိုင်း)

       စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကန့်ဘလူခရိုင်ဦးစီးမှူးရုံးအနေဖြင့် စားသုံးသူများအသုံးပြုလျက်ရှိသည့် ကုန်စည်နှင့်ဝန်ဆောင်မှုများ ဘေးအန္တရာယ်ကင်းရှင်းစေရန်ရည်ရွယ်၍ ဈေးကွက်စောင့်ကြည့်စစ်ဆေးခြင်းလုပ်ငန်းများကို လစဉ်ဆောင်ရွက်လျက်ရှိကြောင်းသိရသည်။

      ၂၀၂၄ခုနှစ်၊ ဇူလိုင်လအတွင်း စားသုံးသူရေးရာဦးစီးဌာနကဦးဆောင်ကာ မိတ်ဖက်ဌာနများနှင့်ပူးပေါင်း၍ ပြည်ပမှတင်သွင်းသော ကုန်စည်များကိုသာမက ပြည်တွင်း၌ထုတ်လုပ်သောကုန်စည်များနှင့်စပ်လျဉ်း၍ ဈေးကွက်မရောက်မီ သို့မဟုတ် ဈေးကွက်ရောက်ပြီး ကုန်စည်များ၏ ဘေးအန္တရာယ်ရှိ/မရှိစစ်ဆေးခြင်းနှင့် ကုန်အညွှန်းအမှတ်အသားတွင် ဖော်ပြရမည့်အချက်များပါဝင်မှုရှိ/မရှိစစ်ဆေးခြင်းကို ကန့်ဘလူမြို့နယ်အနေဖြင့် ကန့်ဘလူမြို့၊ မြို့မဈေးရှိ “ဒေါ်မြင့်” ကုန်စုံဆိုင်၊ အမှတ်(၄)ရပ်ကွက်ရှိ “ကိုနွေဦး+မဖြူ”ကုန်စုံဆိုင်တို့အားလည်းကောင်း ဈေးကွက်စောင့်ကြည့်စစ်ဆေးခြင်း(၂)ကြိမ်၊ ကျွန်းလှမြို့နယ်အနေဖြင့် ကျွန်းလှမြို့၊ သစ်ရာမြိုင်ရပ်ကွက်ရှိ “ဦးနိုင်မျိုးလတ် +ဒေါ်ဝင်းရွှေ”ကုန်စုံဆိုင်၊ သစ်ရာမြိုင်ဈေးရှိ “သာထက်စံ”ဆေးဆိုင်တို့အားလည်းကောင်း ဈေးကွက်စောင့်ကြည့်စစ်ဆေးခြင်း(၂)ကြိမ်နှင့် ကန့်ဘလူမြို့၊ အမှတ်(၃)ရပ်ကွက်ရှိ “ရေတမာ”စက်သုံးဆီအရောင်းဆိုင်အား အထူးဈေးကွက်စောင့်ကြည့်စစ်ဆေးခြင်း(၁)ကြိမ်၊ ကျွန်းလှမြို့နယ်၊ ရှမ်းစုကျေးရွာရှိ “UTN”  စက်သုံးဆီအရောင်းဆိုင်အား အထူးဈေးကွက်စောင့်ကြည့်စစ်ဆေးခြင်း(၁)ကြိမ်ဆောင်ရွက်နိုင်ခဲ့ကြောင်း၊  စီးပွားရေးလုပ်ငန်းရှင်များအနေဖြင့် မိမိတို့ရောင်းချသည့်ကုန်စည်များတွင် ကုန်အညွှန်းအမှတ်အသားများပြည့်စုံစွာဖော်ပြထားသည့် ကုန်စည်များကိုသာဖြန့်ဖြူးရောင်းချကြရန်၊ သက်ဆိုင်ရာဌာနများက စားသုံးရန်မသင့်ဟု ထုတ်ပြန်ထားသည့်ကုန်စည်များ၊ စံမညီဆေးဝါးများ စသည်တို့ကိုရောင်းချခြင်းမပြုကြရန် အသိပညာပေးမှာကြားခဲ့ပြီး မြန်မာနိုင်ငံစားသုံးသူကာကွယ်ရေးကော်မရှင်၏ညွှန်ကြားချက်အမှတ်(၂/၂၀၁၉)ပါ လက်ကမ်းစာစောင်များဖြန့်ဝေပေးခဲ့ကြောင်းသိရှိရပါသည်။

DOCA(စစ်ကိုင်း)

      စစ်ကိုင်းတိုင်းဒေသကြီး၊ ရွှေဘိုခရိုင်၊ မြို့ပြနှင့်အိမ်ရာဖွံ့ဖြိုးရေးဦးစီးဌာန၊ ဝန်ထမ်းအိမ်ယာရှိ ရွှေဘိုခရိုင်ဦးစီးမှူး၏တိုက်ခန်း၌ (၂၅-၇-၂၀၂၄)ရက်နေ့၊ နံနက်(၁၀:၀၀)နာရီအချိန်တွင် ရွှေဘိုခရိုင်၊ စားသုံးသူရေးရာဦးစီးဌာနမှ ဝန်ထမ်းများအား စွမ်းဆောင်ရည်မြင့်မားစေရန်ရည်ရွယ်၍ (၈/၂၀၂၄) ကြိမ်မြောက် Thursday Talk ဝန်ထမ်းစွမ်းဆောင်ရည်မြှင့်တင်ရေးအထောက်အကူပြု အသိပညာပေးဟောပြောဆွေးနွေးပွဲကျင်းပပြုလုပ်ပေးခဲ့ရာ ဝန်ထမ်း(၁၀)ဦးတက်ရောက်ခဲ့ပါသည်။

       အဆိုပါ Thursday Talk ဝန်ထမ်းစွမ်းဆောင်ရည်မြှင့်တင်ရေးအထောက်အကူပြု အသိပညာပေးဟောပြောဆွေးနွေးပွဲတွင် ဟင်းသီးဟင်းရွက်ဆီများကို ရောနှောဆီအဖြစ် ရောစပ်ရာ၌ အရည်အသွေးအာမခံချက်နှင့် အမှတ်တံဆိပ်ကပ်ခြင်းဆိုင်ရာ သတ်မှတ်သည့်အမိန့်အကြောင်းများကိုဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)

    စားသုံးသူရေးရာဦးစီးဌာန၊ မွန်ပြည်နယ်၊  မော်လမြိုင်ခရိုင်၊ ကျိုက်မရောမြို့နယ်တာဝန်ခံသည်  ၂၉-၇-၂၀၂၄ ရက်နေ့တွင် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့တို့နှင့် ပူးပေါင်း၍ ကျိုက်မရောမြို့နယ်၊ ဘိန်းဗျောဈေးအတွင်းရှိသော ကုန်စုံဆိုင်များတွင်ရောင်းချနေသော စားသုံးဆီဘူးအမျိုးမျိုး၊ ဆီထုပ်အမျိုးမျိုးတွင် မြန်မာနိုင်ငံစားသုံးသူကာကွယ်ရေးကော်မရှင်ကထုတ်ပြန်ထားသော ကုန်စည်များပေါ်တွင် ကုန်အညွှန်းအမှတ်အသားဖော်ပြရမည့် အသေးစိတ်အချက်များနှင့်ကိုက်ညီမှုရှိ/မရှိ၊  သက်ဆိုင်ရာဌာနများ၏ ထောက်ခံချက်ရှိ/မရှိ ဈေးကွက်ကွင်းဆင်းစစ်ဆေးခြင်းများဆောင်ရွက် ခဲ့သည်။

         ထိုသို့ကွင်းဆင်းစစ်ဆေးရာတွင် အဆိုပါဆိုင်များ၌ရောင်းချနေသော စားသုံးဆီဘူးအမျိုးမျိုး၊ ဆီထုပ်အမျိုးမျိုးတွင် ကုန်အညွှန်းအမှတ်အသားပြည့်စုံစွာဖော်ပြပါရှိကြောင်းသိရှိရပါသည်။ 

DOCA(မွန်)