HighLight News

         ရခိုင်ပြည်နယ် စားသုံးသူရေးရာဦးစီးဌာန၊ အမ်းခရိုင်ဦးစီးမှူးရုံးမှ အမ်းမြို့နယ်တာဝန်ခံ ဦးအောင်မင်းခိုင်(ဒု-ဦးစီးမှူး)နှင့်ဝန်ထမ်းများသည် (၁၉-၁-၂၀၂၃) ရက်နေ့၊ နေ့လယ် (၁၃:၀၀) နာရီအချိန်တွင် တပ်တောင် အမှတ်(၂) ရပ်ကွက်ရှိ “အောင်သုခ” အိုင်အိုဒင်းဆား ထုတ်လုပ်သည့် လုပ်ငန်းသို့သွားရောက်၍ ဆားထုတ်လုပ်မှုအခြေအနေများအား ကွင်းဆင်းလေ့လာခြင်းနှင့် လုပ်ငန်းရှင်နှင့်တွေ့ဆုံဆွေးနွေးခြင်း ဆောင်ရွက်ခဲ့ပါသည်။

      “အောင်သုခ” ဆားလုပ်ငန်းရှင် ဦးသောင်းငြိမ်းသည် အိုင်အိုဒင်းဆားထုတ်လုပ်မှုလုပ်ငန်းအား ၂၀၁၈ ခုနှစ်တွင် စတင်လုပ်ကိုင်ခဲ့ပြီး နေ့စားလုပ်သားဦးရေ (၈) ဦးခန့်ဖြင့် လုပ်ကိုင်ဆောင်ရွက်လျက်ရှိပါကြောင်း၊ အိုင်အိုဒင်းဆားထုတ်လုပ်ရာတွင် လိုအပ်သည့် ကုန်ကြမ်းပစ္စည်းဖြစ်သည့် ဆားကြမ်းကို ကျောက်ဖြူမြို့နယ်မှ ဝယ်ယူပြီး၊ ကုန်ချောများကို (၃၀) ကျပ်သား၊ (၅၀) ကျပ်သား၊ (၁) ပိဿာဝင် ပလတ်စတစ်အိတ်များဖြင့် သေသပ်စွာထုပ်ပိုးပြီး၊ ဈေးနှုန်းများမှာ (၃၀) ကျပ်သားတစ်ထုပ်လျှင် (၁၈၀) ကျပ်၊ (၅၀) ကျပ်သား တစ်ထုပ်လျှင် (၃၀၀) ကျပ်၊ (၁) ပိဿာလျှင် (၆၀၀) ကျပ်ဖြင့် အမ်းမြို့နယ်အတွင်း ဖြန့်ဖြူးရောင်းချပါကြောင်းနှင့် မြို့နယ်တာဝန်ခံ ဦးအောင်မင်းခိုင်  (ဒု-ဦးစီးမှူး)က စားသုံးသူရေးရာဦးစီးဌာန၏ ၂၀၁၉ စားသုံးသူကာကွယ်ရေးဥပဒေ အခန်း(၁၈)၊ ပုဒ်မ(၄၁) ပါပြဋ္ဌာန်းချက်နှင့် မြန်မာနိုင်ငံစားသုံးသူကာကွယ်ရေးကော်မရှင် ၂/၂၀၁၉ ညွှန်ကြားချက်ပါ ကုန်ပစ္စည်းအမျိုးအစားအလိုက် မြန်မာဘာသာဖြင့်ဖော်ပြရန် ညွှန်ကြားချက်အရ ဟင်းလျာများတွင် အရောင်၊ အနံ့၊ အရသာအတွက် အသုံးပြုသောပစ္စည်းများတွင် ဖော်ပြရမည့်အချက်များအား သိရှိလိုက်နာဆောင်ရွက်မှုရှိစေရေး ထုတ်လုပ်သည့်ကုန်ပစ္စည်းများအား အရည်အသွေးပိုမိုကောင်းမွန်စွာထုတ်လုပ်နိုင်ရေး၊ ဈေးကွက်ပိုမိုကျယ်ပြန့်စွာတိုးချဲ့ထုတ်လုပ်နိုင်ရေးနှင့် စားသုံးသူများအနေဖြင့် ဈေးနှုန်းချိုသာစွာ ဝယ်ယူသုံးစွဲနိုင်ရေးစသည့်အချက်များအား ဆွေးနွေးခဲ့ပါကြောင်းသတင်းရရှိပါသည်။

DOCA(ရခိုင်)

         တနင်္သာရီတိုင်းဒေသကြီး၊ မြိတ်ခရိုင်စားသုံးသူရေးရာဦးစီးဌာနမှ ခရိုင်ဦးစီးမှူးနှင့်ဝန်ထမ်းများသည် (၁၈-၁-၂၀၂၃)ရက်နေ့၊ မွန်းလွဲ (၂း၃၀) နာရီအချိန်တွင် မြိတ်မြို့၊ ဘုရားကိုင်ရပ်၊ စိန်ပန်းပြာလမ်းရှိ Hello အမှတ်တံဆိပ် ပေါင်းမုန့်အမျိုးမျိုးထုတ်လုပ်သည့် လုပ်ငန်းရှင်နှင့်တွေ့ဆုံ၍ စားသုံးသူကာကွယ်ရေးဥပဒေပါ ကုန်အညွှန်းအမှတ်အသားနှင့်ပတ်သက်၍ တွေ့ဆုံဆွေးနွေးခဲ့ကြပါသည်။

    အဆိုပါလုပ်ငန်းအတွက် မြန်မာစာဖြင့် ပြည့်စုံစွာဖော်ပြနိုင်ရေး၊ ကုန်အညွှန်းအမှတ်အသားလျှောက်ထားရန်နှင့် အစားအသောက်သန့်ရှင်းလတ်ဆတ်ရေးအား အလေးထားဆောင်ရွက်ရန်၊ စီးပွားရေးလုပ်ငန်းရှင်များလိုက်နာဆောင်ရွက်ရမည့် စည်းကမ်းနှင့် သက်ဆိုင်ရာဌာနများ၏ဥပဒေ၊ လုပ်ထုံးလုပ်နည်းများကိုလည်း လိုက်နာဆောင်ရွက်နိုင်ရန်၊ ကုန်အမှတ်တံဆိပ်မူပိုင်ခွင့်ဥပဒေနှင့်အညီ မှတ်ပုံတင်လျောက်ထားနိုင်ကြောင်းတို့ကို တွေ့ဆုံဆွေးဆွေးခဲ့ပါသည်။

DOCA(တနင်္သာရီ)

       ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဟင်္သာတခရိုင်ဦးစီးမှူးရုံးအနေဖြင့် ထုတ်ကုန်များလုံခြုံစိတ်ချရမှုရှိစေရန်၊  ဟင်္သာတမြို့နယ်တာဝန်ခံသည် ၂၀၂၃ ခုနှစ် ဇန်နဝါရီလ(၁၇) ရက်နေ့ နေ့လယ်(၁၄:၃၀)နာရီအချိန်တွင် ရွာသာကုန်းကျေးရွာအုပ်စု၊ ဦးမြင့်စိုး၏ မုန့်ဖက်လုပ်ငန်း၌ လုပ်ငန်းရှင်နှင့်တွေ့ဆုံဆွေးနွေးဆောင်ရွက်ခဲ့ပါသည်။

       ထိုသို့ဆွေးနွေးခဲ့ရာတွင် မုန့်ဖက်လုပ်ငန်း၏ တစ်ရက်တာထုတ်လုပ်မှု၊ ဖြန့်ဖြူးရောင်းချမှုနှင့် သန့်ရှင်းလတ်ဆက်မှုရှိစေရေး၊ ဓာတုဆေးဝါးများကင်းရှင်းစေရန်၊ ပတ်ဝန်းကျင်အားထိခိုက်စေနိုင်သည့် ရေဆိုးရေညစ်နှင့် အနံ့များကို စနစ်တကျစွန့်ပစ်ရန်၊ စားသုံးသူများအတွက် ဘေအန္တရာယ်ကင်းရှင်းစေရန် စီးပွားရေလုပ်ငန်းရှင်များလိုက်နာရမည့်တာဝန်များ၊   စားသုံးကာကွယ်ရေးဥပဒေပါ စားသုံးသူအခွင့်အရေးနှင့် တာဝန်များအကြောင်း၊ တားမြစ်ချက်များအကြောင်း၊ ကုန်စည်(သို့မဟုတ်) ဝန်ဆောင်မှုကို ဝယ်ယူအသုံးပြုခြင်းကြောင့် ဖြစ်ပေါ်လာသည့်နစ်နာဆုံးရှုံးမှုများနှင့်စပ်လျဉ်း၍ ကုစားခွင့်ရရှိခြင်းများအကြောင်း၊ ပြစ်မှုနှင့်ပြစ်ဒဏ်များအကြောင်းတို့ကို အသေးစိတ်ရှင်းလင်းဆွေးနွေးခဲ့ပြီး လုပ်ငန်းရှင်ဘက်ကလည်း သိလိုသည်များကိုမေးမြန်း၍ စားသုံးသူကာကွယ်ရေးအသိပညာပေး လက်ကမ်းစာစောင်များကို ဖြန့်ဝေပေးခဲ့ကြကြောင်းသိရှိရပါသည်။

DOCA(ဧရာဝတီ)

      ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံး၊  မအူပင်မြို့နယ်ဦးစီးမှူး ဦးအောင်ဇော်ဦးနှင့် ဝန်ထမ်းများသည် (၁၇-၁-၂၀၂၃) ရက်နေ့ (၁၀:၀၀)နာရီအချိန်တွင် မအူပင်မြို့ပေါ်ရှိ ဆေးမျိုးစုံရောင်းချသည့်ဆိုင်များအား မိတ်ဖက်ဌာနဖြစ်သော FDA၊ ကျန်းမာရေးဦးစီးဌာန၊ စည်ပင်သာယာရေးအဖွဲ့တို့နှင့်အတူပူးပေါင်း၍ ဈေးကွက်စောင့်ကြည့်စစ်ဆေးခဲ့ကြပါသည်။

    ကွင်းဆင်းစစ်ဆေးရာတွင် မအူပင်မြို့ပေါ်ရှိ ဆေးအမျိုးမျိုးရောင်းချနေသော ဆေးဆိုင်(၈)ဆိုင်မှ ကုန်စည်များတွင် မြန်မာနိုင်ငံစားသုံးသူရေးရာကော်မရှင်၏ ညွှန်ကြားချက်အမှတ်( ၂/၂၀၁၉)ပါ ကုန်အညွှန်အမှတ်အသားသတ်မှတ်ချက်များနှင့် ကိုက်ညီမှုရှိသည့်ကုန်စည်များကို ရောင်းချနေကြောင်း စစ်ဆေးတွေ့ရှိရပြီး၊ အစားအသောက်နှင့်ဆေးဝါးကွပ်ကဲရေးဦးစီးဌာနမှ တာမြစ်ထားသောဆေးဝါးများကို ရောင်းချခြင်းမရှိကြောင်း စစ်ဆေးတွေ့ရှိရပါသည်။ ဆက်လက်၍ ဆေးဆိုင်ရှင်များကိုလည်း ကုန်အညွှန်းအမှတ်အသား သတ်မှတ်ချက်ပြည်စုံစွာ ဖော်ပြထားခြင်းမရှိသောဆေးဝါးများကို မရောင်းချရန်၊ ဌာနများ၏တားမြစ်ကုန်စည်များကိုလည်း မရောင်းချရန်နှင့် သတ်မှတ်ချက်စည်းကမ်းများနှင့် မကိုက်ညီသောကုန်စည်များကို ရောင်းချခြင်းမျိုးစစ်ဆေးတွေ့ရှိပါက အရေးယူဆောင်ရွက်ခြင်း၊ ပြစ်မှု၊ ပြစ်ဒဏ်များခံရမည်ဖြစ်ကြောင်း လုပ်ငန်းရှင်များလိုက်နာရမည့်တာဝန်များ၊ စစ်ဆေးရေးအရာရှိများ၏ လုပ်ငန်းတာဝန်များအကြောင်းကို ရှင်းလင်းဆွေးနွေး၍ အသိပညာပေးခဲ့ကြောင်းသိရှိရပါသည်။

DOCA(ဧရာဝတီ)

       ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဝါးခယ်မမြို့နယ် တာဝန်ခံ ဦးအောင်မိုးသည် (၁၈-၁-၂၀၂၃)ရက်နေ့ မွန်းလွဲ(၁၅:၀၀)နာရီအချိန်တွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာနတို့နှင့်ပူးပေါင်းကာ စားသုံးသူပြည်သူများအား ဝါးခယ်မမြို့နယ်၊ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ လူထုအခြေပြုဗဟိုဌာန၊ Community Center ခန်းမတွင် စားသုံးသူအသိပညာပေး  Talk  Show  ပြုလုပ်ခဲ့ပါသည်။

       ထိုသို့ ဟောပြောဆွေးနွေးရာတွင် ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ မြို့နယ် ဦးစီးမှူးက  စားသုံးသူအသိပညာပေး Talk Show ပြုလုပ်ရခြင်း၏ရည်ရွယ်ချက်ကို ရှင်းလင်းပြောကြားပြီး၊ စားသုံးသူရေးရာဦးစီးဌာန မြို့နယ်တာဝန်ခံက ဌာန၏မျှော်မှန်းချက်၊ ရည်မှန်းချက်များကို ရှင်းလင်းပြောကြားခဲ့ပြီး၊ စားသုံးသူကာကွယ်ရေးဥပဒေ အခန်း(၉)ပါ စားသုံးသူ၏အခွင့်အရေးနှင့်တာဝန်များ၊ ဥပဒေအခန်း(၁၀)ပါ စီးပွားရေးလုပ်ငန်းရှင်၏တာဝန်များနှင့် ပြစ်မှုပြစ်ဒဏ်များ၊ တားမြစ်ချက်များ စားသုံးသူကာကွယ်ရေးဥပဒေအခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ မည်သည့်စီးပွားရေးလုပ်ငန်းရှင်မဆို ပုဒ်မ-၄၁ ပုဒ်မခွဲ(ခ) နှင့်(ဆ)တို့ပါ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့) တစ်ခုထက်ပို၍တွဲလျက်ဖြစ်စေ ရေးသားဖော်ပြရမည်ဖြစ်ပြီး၊ ကုန်စည်အမျိုးအစားအလိုက် သတ်မှတ်ထားသည့်ဥပဒေများနှင့်အညီ လိုက်နာဆောင်ရွက်ကြရန် ဥပဒေတားမြစ်ချက်များကို လိုက်နာဆောင်ရွက်မှုမရှိပါက ပြစ်မှုပြစ်ဒဏ်များအတိုင်း ဆောင်ရွက်သွားမည်ဖြစ်ကြောင်း၊ စီးပွားရေးလုပ်ငန်းရှင်များအနေဖြင့် ဥပဒေပါအချက်အလက်များကို သိရှိလိုပါက မြို့နယ် စားသုံးသူတာဝန်ခံရုံးတွင်လည်းကောင်း၊ စားသုံးသူရေးရာဦးစီးဌာနရုံးချုပ်၏ www.doca. gov.mm website တွင် ဝင်ရောက်လေ့လာနိုင်ပါကြောင်း၊ စားသုံးသူများနစ်နာမှုရှိလာပါက စားသုံးသူသတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ CICC သို့ လူကိုယ်တိုင်ဖြစ်စေ၊ တယ်လီဖုန်းဖြင့်ဖြစ်စေ တိုင်ကြားနိုင်ကြောင်း အသိပညာပေးဆွေးနွေးခဲ့ကြောင်းသိရှိရပါသည်။

DOCA(ဧရာဝတီ)