၂၀၂၀ ပြည့်နှစ်၊ မတ်လ ၁၁ ရက်နေ့တွင် “ကုန်စည်လုံခြုံစိတ်ချရမှုအစ ကုန်အညွှန်းအမှတ်အသားက” ခေါင်းစဉ်ဖြင့် Media Campaign မိတ်ဆက်ရှင်းလင်းပွဲအခမ်းအနားကို နေပြည်တော် ရုံးအမှတ်(၅၂)၊ စားသုံးသူရေးရာဦးစီးဌာနခန်းမ၌ ကျင်းပပြုလုပ်ခဲ့ရာ အဆိုပါအခမ်းအနားသို့ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ပြည်ထောင်စုဝန်ကြီး ဒေါက်တာသန်းမြင့်၊ စားသုံးသူရေးရာဦးစီးဌာနမှ ညွှန်ကြားရေးမှူးချုပ် ဦးမြင့်လွင်၊ ကုန်သွယ်ရေးဦးစီးဌာနမှ ညွှန်ကြားရေးမှူးချုပ် ဦးမင်းမင်း၊ စားသုံးသူရေးရာဦးစီးဌာနမှ ဒုတိယညွှန်ကြားရေးမှူးချုပ် ဦးမြင့်ချို၊ မြန်မာကုန်သွယ်မှုမြှင့်တင်ရေးအဖွဲ့မှ ဒုတိယညွှန်ကြားရေးမှူးချုပ် ဒေါ်နော်မူတာကပေါ၊ စားသုံးသူရေးရာဦးစီးဌာနမှ ညွှန်ကြားရေးမှူးများနှင့် တာဝန်ရှိသူများ၊ ဖိတ်ကြားထားသော မီဒီယာများ တက်ရောက်ခဲ့ကြပါသည်။
အဆိုပါ အခမ်းအနား၌ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန ပြည်ထောင်စု ဝန်ကြီး ဒေါက်တာသန်းမြင့် က အဖွင့်အမှာစကားပြောကြားရာတွင် စားသုံးသူရေးရာဦးစီးဌာနအနေဖြင့် စားသုံးသူကာကွယ်ရေးဥပဒေကို ၂၀၁၉ ခုနှစ်၊ မတ်လ ၁၅ ရက်နေ့တွင် ပြဌာန်းခဲ့ပါကြောင်း၊ ယင်းဥပဒေတွင် စားသုံးသူအကာအကွယ်ပေးမည့် လုပ်ငန်းစဉ်များအတွက် “ကုန်အညွှန်းအမှတ်အသားဖော်ပြခြင်း” ကို အခန်း တစ်ခန်းအနေဖြင့် ရေးဆွဲပြဌာန်းထားပါကြောင်း၊ စားသုံးသူကာကွယ်ရေးဥပဒေ၊ အခန်း ၁၈ ပါ ကုန်အညွှန်းအမှတ်အသားဖော်ပြခြင်းဆိုင်ရာ ပြဌာန်းချက်များအရ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသားဖော်ပြထားခြင်းကို စီးပွားရေးလုပ်ငန်းရှင်များ အဆင်ပြေစွာ ဆောင်ရွက်နိုင်ရန်အတွက် ကုန်စည်များအပေါ်ဘာသာပြန်ဆိုထားမှုနှင့် ဥပဒေပါပြဌာန်းချက်များ ကိုက်ညီမှုရှိ/မရှိကိုလည်း စားသုံးသူရေးရာဦးစီးဌာနမှ စိစစ်ဆောင်ရွက်ပေးလျက်ရှိပါကြောင်း၊ တိုင်းဒေသကြီးနှင့် ပြည်နယ်အသီးသီးတွင်လည်း စစ်ဆေးရေးအရာရှိများ ခန့်အပ်ပြီး စျေးကွက်စောင့်ကြည့်စစ်ဆေးခြင်းများ ဆောင်ရွက်လျက်ရှိပါကြောင်း၊ ယခုကဲ့သို့ စားသုံးသူရေးရာဦးစီးဌာနက ကျင်းပပြုလုပ်မည့် “ကုန်စည်လုံခြုံစိတ်ချရမှုအစ၊ ကုန်အညွှန်းအမှတ်အသားက” Media Campaignသည် လုပ်ငန်းရှင်များအနေဖြင့် မိမိတို့၏ ကုန်စည်များတွင် သတ်မှတ်ထားသည့် ကုန်အညွှန်းအမှတ်အသားများ၌ မဖြစ်မနေထည့်သွင်းရမည့်အချက်များကို သိရှိလိုက်နာဆောင်ရွက်နိုင်စေရန်နှင့် စားသုံးသူများအနေဖြင့် ကုန်စည်များ ဝယ်ယူရာတွင် ကုန်အညွှန်းအမှတ်အသားများကို သတိပြု၍ ဖတ်ရှုတတ်သည့် အလေ့အထကောင်း ရရှိစေနိုင်သည့်အပြင် စားသုံးသူများအနေဖြင့် မိမိတို့၏လိုအပ်ချက်နှင့် ကိုက်ညီသည့်ကုန်စည်များကို ရွေးချယ်ဝယ်ယူနိုင်စေရန် ရည်ရွယ်ချက်ဖြင့် ကျင်းပပြုလုပ်ရခြင်းဖြစ်ပါကြောင်း ပြောကြားခဲ့ပါသည်။
ဆက်လက်၍ စားသုံးသူရေးရာဦးစီးဌာန ညွှန်ကြားရေးမှူးချုပ် ဦးမြင့်လွင်က ရှင်းလင်း ပြောကြားရာတွင် စားသုံးသူရေးရာဦးစီးဌာန၏ ရည်မှန်းချက်တာဝန်တစ်ခုဖြစ်သော ထုတ်ကုန် လုံခြုံစိတ်ချရမှုရှိစေရေးဆောင်ရွက်ရန် ဟူသောတာဝန်အပေါ် အကောင်အထည်ဖော်ဆောင်ရွက်မှု အနေဖြင့် စားသုံးသူပြည်သူများ လုံခြုံစိတ်ချရမှုမရှိသော ကုန်စည်များ စားသုံးခြင်းနှင့် အသုံးပြုခြင်း မဖြစ်စေရေး အကာအကွယ်ပေးရန်အတွက် စျေးကွက်စောင့်ကြည့်လေ့လာစစ်ဆေးခြင်းများကို ဆောင်ရွက်လျက်ရှိရာမှာ ၂၀၁၉ ခုနှစ်၊ ဇန်နဝါရီလ(၁)ရက်နေ့မှ ဒီဇင်ဘာလ (၃၁)ရက်နေ့အတွင်း စားသောက်ကုန်စည် (၁၀၅၁)မျိုး နှင့် အခြားကုန်စည်(၃၉၈)မျိုး စုစုပေါင်း ကုန်စည်(၁၄၄၉)မျိုးကို စျေးကွက်အတွင်းမှ တားမြစ်သိမ်းဆည်းခြင်းများ ဆောင်ရွက်နိုင်ခဲ့ပါကြောင်း၊ စားသုံးသူကာကွယ်ရေးဥပဒေ၊ အခန်း ၁၈ ပါ ကုန်အညွှန်းအမှတ်အသားဖော်ပြခြင်း ဆိုင်ရာပြဌာန်းချက်များအရ ကုန်စည်များတွင် မြန်မာဘာသာဖြင့် ကုန်အညွှန်းအမှတ်အသား ဖော်ပြထားခြင်းကို အတည်ပြုစိစစ်ဆောင်ရွက်ခဲ့ရာ၌ ၂၀၁၉ ခုနှစ်၊ မတ်လမှ ဒီဇင်ဘာလအထိ ကုမ္ပဏီ(၂၂၅)ခုမှ တင်ပြလျှောက်ထားသည့် ကုန်ပစ္စည်းအမျိုးပေါင်း (၂၂၉၀)မျိုးကို စိစစ် ဆောင်ရွက်ပေးနိုင်ခဲ့ပါကြောင်း၊ စားသုံးသူရေးရာဦးစီးဌာနအနေဖြင့် ထုတ်ကုန်လုံခြုံစိတ်ချရမှုရှိ စေရေးအတွက် စျေးကွက်စောင့်ကြည့်စစ်ဆေးခြင်း (Market Surveillance) လုပ်ငန်းများကို စဉ်ဆက်မပြတ် ဆက်လက်ဆောင်ရွက်သွားမည်ဖြစ်ပါကြောင်း၊ ဥပဒေကို အတည်ပြု ပြဌာန်းနိုင် ခဲ့ပြီးနောက်တွင် စားသုံးသူကာကွယ်ရေးနည်းဥပဒေများပြဌာန်းနိုင်ရေးနှင့် လိုအပ်သည့်အမိန့် ညွှန်ကြားချက်များထုတ်ပြန်နိုင်ရေးအတွက် ဆောင်ရွက်လျက်ရှိပါကြောင်း၊ စားသုံးသူများအနေဖြင့် ကုန်စည် (သို့မဟုတ်) ဝန်ဆောင်မှုများဝယ်ယူသုံးစွဲခြင်းနှင့်ပတ်သက်၍ နစ်နာဆုံးရှုံးမှုများ တစ်စုံတစ်ရာပေါ်ပေါက်လာပါက မြန်မာနိုင်ငံတစ်ဝှမ်းရှိ စားသုံးသူရေးရာဦးစီးဌာန၊ တိုင်းဒေသကြီး/ပြည်နယ်ဦးစီးမှူးရုံးများ၊ ခရိုင်ဦးစီးမှူးရုံးများတွင် ဖွင့်လှစ်ထားရှိသော စားသုံးသူ သတင်းပြန်ကြားရေးနှင့် တိုင်ကြားမှုလက်ခံဆောင်ရွက်ရေးစင်တာ (CICC)များသို့ လူကိုယ်တိုင် သွားရောက်တိုင်ကြားနိုင်သည့်အပြင် အွန်လိုင်းမှတစ်ဆင့်တိုင်ကြားလိုပါက စားသုံးသူရေးရာဦးစီးဌာန၏ Websiteတွင် ၎င်း ၊ DOCA Myanmar Mobile Application နှင့် စားသုံးသူရေးရာဦးစီးဌာန Facebook Page တွင်၎င်းတိုင်ကြားနိုင်ပါကြောင်း ပြောကြားခဲ့ပါသည်။
ထို့နောက် တက်ရောက်လာသော မီဒီယာများက သိရှိလိုသည်များကို မေးမြန်းခဲ့ပြီး ပြည်ထောင်စုဝန်ကြီး၊ စားသုံးသူရေးရာဦးစီးဌာန ညွှန်ကြားရေးမှူးချုပ်နှင့် ဒုတိယညွှန်ကြားရေးမှူးချုပ်တို့က ပြန်လည်ဖြေကြားပေးခဲ့ပါသည်။
အဆိုပါ စားသုံးသူအသိပညာပေးကမ်ပိန်းကျင်းပပြုလုပ်မည့် ကာလမှာ ၂၀၂၀ ပြည့်နှစ်၊ မတ်လ ၁၅ ရက်နေ့မှစတင်၍ ရက်သတ္တပတ်(၆)ပတ်ကြာမြင့်မည်ဖြစ်ပြီး နိုင်ငံပိုင်ရုပ်သံမီဒီယာများနှင့် လူမှုကွန်ယက်များ၌ ကုန်စည်များတွင် ကုန်အညွှန်းအမှတ်အသားဖော်ပြခြင်းနှင့်ပတ်သက်သော အသိပညာပေး ရုပ်သံဇာတ်လမ်းတိုအား ထုတ်လွှင့်ပြသသွားမည်ဖြစ်ကြောင်းနှင့် စားသုံးသူရေးရာဦးစီးဌာန Facebook Page တွင်လည်း အသိပညာပေးရုပ်သံဇာတ်လမ်းတိုနှင့် အသိပညာပေး Post များကို တင်ပြသွားမည်ဖြစ်ကြောင်း သတင်းရရှိပါသည်။
ITQM
