သတင်းနှင့် လှုပ်ရှားမှုများ

        မွန်ပြည်နယ် စားသုံးသူရေးရာဦးစီးဌာနမှ ပြည်နယ်ဦးစီးမှူး ဦးခင်အောင်သွင်၊ မော်လမြိုင် ခရိုင်ဦးစီးမှူး ဒေါ်ခင်နွဲ့မူဆွေဦး၊ ဦးစီးအရာရှိ ဒေါ်ဝါဝါမြိုင်နှင့်ဝန်ထမ်းများသည် ၂၀၂၀ ပြည့်နှစ် မတ်လ ၁၇ ရက်နေ့၊ နံနက် ( ၁၀ ၀၀)နာရီအချိန်တွင် မွန်ပြည်နယ်၊ မော်လမြိုင်မြို့၊ အမှတ်(၁) ဈေးကြီး၊ ဓမ္မာရုံ၌၊ မော်လမြိုင်မြို့ အမှတ်(၁)ဈေးနှင့် မြိုင်ရတနာ၄ထပ်ဈေးမှ လက်လီ၊ လက်ကား ရောင်းချလျက်ရှိသော စီးပွားရေးလုပ်ငန်းရှင်များကို စားသုံးသူကာကွယ်ရေးဥပဒေ အခန်း (၁၈)ပါ ကုန်အညွှန်းအမှတ်အသားဖော်ပြခြင်းနှင့် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက် (၂/ ၂၀၁၉)အား ရှင်းလင်းဆွေးနွေးပွဲဆောင်ရွက်ခြင်းနှင့် ဈေးအတွင်းရှိဆိုင်များအား ကွင်းဆင်းလေ့လာစိစစ်ခြင်း၊ လက်ကမ်းစာစောင်များကို ဖြန့်ဝေပေးခြင်း ဆောင်ရွက်ခဲ့ပါသည်။

      အဆိုပါ ဆွေးနွေးပွဲတွင် စားသုံးသူရေးရာဦးစီးဌာန ပြည်နယ်ဦးစီးမှူး ဦးခင်အောင်သွင်က တက်ရောက်လာသည့် လက်လီ၊ လက်ကားရောင်းချလျက်ရှိသော စီးပွားရေးလုပ်ငန်းရှင် ( ၆၀)ဦး ခန့်ကို စားသုံးသူကာကွယ်ရေးဥပဒေ(၂၀၁၉)၊ အခန်း(၁၈)ပြဌာန်းချက်ပါ ကုန်အညွှန်းအမှတ် အသားဖော်ပြခြင်းနှင့် မြန်မာနိုင်ငံစားသုံးသူကာကွယ်ရေးကော်မရှင်၏ ညွှန်ကြားချက်အမှတ်            (၂/ ၂၀၁၉)ပါရှိသော ကုန်စည်များတွင် မြန်မာဘာသာဖြင့်ဖြစ်စေ၊ မြန်မာဘာသာနှင့်အခြားဘာသာ တွဲလျက်ဖြစ်စေ ဖော်ပြရာ၌ စီးပွားရေးလုပ်ငန်းရှင်များ၊ လိုက်နာဆောင်ရွက်နိုင်ရေး၊ စားသုံးသူ ကာကွယ်ရေး ဥပဒေပြဌာန်းချက် အခန်း(၁၈)စတင်အာဏာသက်ဝင်လာပြီဖြစ်ကြောင်းနှင့် စီးပွားရေးလုပ်ငန်းရှင်အတွက် တားမြစ်ချက်၊ ပြစ်မှုပြစ်ဒဏ်များအကြောင်းကို အသေးစိတ် power point ဖြင့် ရှင်းလင်းပြောကြားပါသည်။ ယင်းနောက် တက်ရောက်သူများက ကုန်စည်အုပ်စု အလိုက် မြန်မာဘာသာဖြင့် ကုန်အညွန်းအမှတ်အသားဖော်ပြရမည့်အသေးစိတ် စိစစ်ချက်၊ ကုန်စည်အုပ်စု(၈)စုမှ မိမိတို့နှင့် သက်ဆိုင်သည့်အုပ်စုတို့ကို ဆောင်ရွက်ထားရှိမှုနှင့် ဆက်လက် ဆောင်ရွက်ရန်လိုအပ်ချက်တို့အား မေးမြန်းမှုတို့အပေါ် ပြည်နယ်ဦးစီးမှူး ဦးခင်အောင်သွင်က ပြန်လည်ဖြေကြးပေးခဲ့ပြီး၊ မြန်မာနိုင်ငံစားသုံသူကာကွယ်ရေးကော်မရှင်၏ ညွှန်ကြားချက် (၂/၂၀၁၉) လက်ကမ်းစာစောင်နှင့် စားသုံးသူကာကွယ်ရေးဥပဒေ၊ စီးပွားရေးလုပ်ငန်းရှင်များ သိကောင်းစရာ လက်ကမ်းစာစောင်တို့ကို ဖြန့်ဝေပေးခဲ့ပါသည်။

မွန်ပြည်နယ်

စားသုံးသူရေးရာဦးစီးဌာန

       ၂၃.၃.၂၀၂၀ရက်နေ့တွင် စားသုံးသူရေးရာဦးစီးဌာနမှ ဒုတိယညွန်ကြားရေးမှူးချုပ်ဦးအောင်မောင်းသည် ပဲခူးတိုင်းဒေသကြီးစားသုံးသူရေးရာဦးစီးဌာနမှ တိုင်းဒေသကြီးဦးစီးမှူးဦးကျော်စွာဝင်းနှင့်အတူ ပဲခူးမြို့ ကန်တော်ကြီးသစ်တောကြိုးဝိုင်းအနီးရှိ (Bago art group) ပဲခူးလက်မှုအနုပညာ အသင်းမှ ဥက္ကဌဦးဝင်းနိုင်နှင့် အတွင်းရေးမှူး ဦးခင်မောင်ဝင်းတို့အားတွေ့ဆုံ၍ ပဲခူးလက်မှုအနုပညာအသင်းအနေဖြင့် လက်မှုထည်နှင့် ပရိဘောဂလုပ်ငန်းများအတွက် လိုအပ်သည့်အခြေခံသစ်ကုန်ကြမ်း စဉ်ဆက်မပြတ်ရရှိရေးရည်ရွယ်၍ မန်ဂျန်ရှားသစ်စိုက်ပျိုးမှု အခြေအနေနှင့်ရာသီပေါ်သီးနှံ ဖြစ်သည့်ဒန့်ဒလွန်သီးနှံစိုက်ပျိုးမှုအခြေအနေတို့အား ဆွေးနွေးခဲ့ ကြောင်းသတင်းရရှိပါသည်။

ပဲခူးတိုင်းဒေသကြီး

စားသုံးသူရေးရာဦးစီးဌာန

        ၁၆.၃.၂၀၂၀ ရက်နေ့တွင် ကချင်ပြည်နယ်၊ ဗန်းမော်ခရိုင် စားသုံးသူရေးရာ ဦးစီးဌာနမှ တာဝန်ရှိသူများသည် ဗန်းမော်ခရိုင် အစားအသောက်နှင့်ဆေးဝါး ကွတ်ကဲရေးဦးစီးဌာနမှ ဝန်ထမ်းများနှင့် ပူးပေါင်းပြီး မံစီမြို့နယ် မံစီစည်ပင်သာယာဈေးသို့ သွားရောက်၍ ရွေ့လျားဓာတ်ခွဲယာဉ်ဖြင့် အစားအသောက်များ တွင် အန္တရာယ်ဖြစ်စေသော ဓာတုပစ္စည်း (၇)မျိုး ပါဝင်ခြင်းရှိ/မရှိ ကွင်းဆင်း စစ်ဆေးခြင်းများ ဆောင်ရွက်ခဲ့ပါသည်။

        ထို့နောက် ၁၇.၃.၂၀၂၀ ရက်နေ့တွင် ကချင်ပြည်နယ် ဗန်းမော်ခရိုင် မိုးမောက်မြို့နယ် မိုးမောက်စည်ပင်သာယာဈေးတွင် မိုးမောက်မြို့နယ် ဌာနဆိုင်ရာများနှင့်ပူးပေါင်း၍ ကုန်စုံဆိုင်များတွင် စစ်ဆေးခြင်း၊ ကုန်အညွှန်းအမှတ်အသားဖော်ပြခြင်းဆိုင်ရာ အသိပညာပေးလက်ကမ်းစာစောင်များ ဖြန့်ဝေခြင်းများ ဆောင်ရွက်ခဲ့ပါသည်။

   အလားတူ ၁၈.၃.၂၀၂၀ ရက်နေ့တွင် အမှတ်(၁) ကက္ကိုတောဈေးတွင် ရွေ့လျားဓာတ်ခွဲယာဉ်ဖြင့် အစားအသောက်နမူနာများ ဓာတ်ခွဲစစ်ဆေးခြင်း၊ စားသုံးသူကာကွယ်ရေးဉပဒေတွင်ဖော်ပြထားသည့် စီးပွားရေးလုပ်ငန်းရှင်များ ၏တာဝန်များနှင့်ကုန်အညွှန်းအမှတ်အသားဖော်ပြခြင်းဆိုင်ရာ အသိပညာပေးလက်ကမ်း စာစောင်များဖြန့်ဝေခြင်းများ ဆောင်ရွက်ခဲ့ပါသည်။

ကချင်ပြည်နယ်

စားသုံးသူရေးရာဦးစီးဌာန

       ၂၀၂၀ပြည့်နှစ်၊ မတ်လ (၃) ရက်နေ့တွင် ကရင်ပြည်နယ်အတွင်းရှိ စီးပွားရေးလုပ်ငန်းရှင်များကို စားသုံးသူကာကွယ်ရေးဉပဒေနှင့်အညီ ကုန်စည်အမျိုးအစားအလိုက် ကုန်အညွှန်းအမှတ်အသားဖော်ပြခြင်းဆိုင်ရာ  ရှင်းလင်းဆွေးနွေးပွဲကို စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးတွင် ကျင်းပပြုလုပ်ရာ ကရင်ပြည်နယ် အတွင်းရှိ စီးပွားရေးလုပ်ငန်းရှင် (၃၆)ဦး တက်ရောက်ခဲ့ကြပါသည်။

     ဆွေးနွေးပွဲတွင် ညွှန်ကြားရေးမှူး ဦးရဲထွဋ်နိုင်က စားသုံးသူကာကွယ်ရေးဉပဒေနှင့်အညီ ကုန်စည်အမျိုးအစားအလိုက် ကုန်အညွန်းအမှတ်အသားဖော်ပြခြင်းနှင့်စပ်လျဉ်း၍ စီးပွားရေး လုပ်ငန်းရှင်များ လိုက်နာဆောင်ရွက်ရမည့် အကြောင်းအရာများအား အသေးစိတ် ဆွေးနွေးရှင်းလင်းခဲ့ပြီး တက်ရောက်လာသူလုပ်ငန်းရှင်များက သိလိုသည်များကို မေးမြန်းခဲ့ရာ ညွှန်ကြားရေးမှူး ဦးရဲထွဋ်နိုင်က ပြန်လည်ရှင်းလင်းဆွေးနွေးခဲ့ပါသည်။ ထို့နောက် လုပ်ငန်းရှင်များအနေဖြင့် အခက်အခဲများရှိပါက စားသုံးသူရေးရာဦးစီးဌာနသို့ တင်ပြကြရန်နှင့် ဉပဒေနှင့်အညီ ကူညီဆောင်ရွက်ပေးသွားမည်ဖြစ်ကြောင်း ပြောကြားခဲ့ပါသည်။

          ဆက်လက်၍ စားသုံးသူကာကွယ်ရေးနည်းဉပဒေ(မူကြမ်း)နှင့်စပ်လျဉ်းသည့် ရှင်းလင်းဆွေးနွေးပွဲကို ကျင်းပခဲ့ရာ ညွှန်ကြားရေးမှူး ဦးရဲထွဋ်နိုင်နှင့်ဝန်ထမ်းများ၊ စားသုံးသူရေးရာဦးစီးဌာန၊ ကရင်ပြည်နယ်အတွင်းရှိ စစ်ဆေးရေးအရာရှိများ၊ ကရင်ပြည်နယ်ဦးစီးမှူးရုံးနှင့် ခရိုင်ဦးစီးမှူးရုံးရှိ ဝန်ထမ်းများ၊ ကော့ကရိတ်၊ ကြာအင်းဆိပ်ကြီး၊ ဖာပွန်၊ လှိုင်းဘွဲ့၊ သံတောင်ကြီး မြို့နယ် တာဝန်ခံများ တက်ရောက်ခဲ့ကြပါသည်။

        ညွှန်ကြားရေးမှူး ဦးရဲထွဋ်နိုင်က ကုန်အညွှန်းအမှတ်အသားဖော်ပြခြင်းဆိုင်ရာ ပြဌာန်းချက်များနှင့်စပ်လျဉ်း၍ ဆက်လက်ဆောင်ရွက်ရမည့်လုပ်ငန်းစဉ်များကို ဝန်ထမ်းများအား ရှင်းလင်းဆွေးနွေးခဲ့ပြီး  လက်ထောက်ညွှန်ကြားရေးမှူး ဦးထက်ဝင်းအောင်က စားသုံးသူကာကွယ်ရေးနည်းဉပဒေ(မူကြမ်း)နှင့်စပ်လျဉ်း၍ ရှင်းလင်းဆွေးနွေးခြင်း၊  ဦးစီးအရာရှိ ဒေါ်ကေဇင်ယုက စားသုံးသူကာကွယ်ရေးဉပဒေနှင့်အညီ ဈေးကွက်စုံစမ်းစစ်ဆေးခြင်းလုပ်ငန်း များနှင့် စပ်လျဉ်း၍ အသေးစိတ်ရှင်းလင်းဆွေးနွေးခဲ့ပြီး ကရင်ပြည်နယ်ဦးစီးမှူးရုံးမှ ဝန်ထမ်းများ က သိလိုသည်များ မေးမြန်းဆွေးနွေးခဲ့ခြင်းနှင့် တာဝန်ရှိသူများက ပြန်လည်ဆွေးနွေးခြင်းများ ဆောင်ရွက်ခဲ့ကြကြောင်း သိရှိရပါသည်။

ကရင်ပြည်နယ်

စားသုံးသူရေးရာဦးစီးဌာန

           ကရင်ပြည်နယ်၊ မြဝတီမြို့တွင် ပြောင်းလုပ်ငန်းရှင်များအသင်း ဖွဲ့စည်းနိုင်ရေးနှင့် ပြောင်းကုန်စည်ဒိုင် ဖွင့်လှစ်နိုင်ရေး ညှိနှိုင်းအစည်းအဝေးကို မြဝတီမြို့၊   ၂၀၂၀ ပြည့်နှစ်၊ မတ်လ(၂)ရက်နေ့ ၊ နေ့လယ် (၁)နာရီအချိန်၌ ကျင်းပခဲ့ပါသည်။ အဆိုပါ အခမ်းအနားသို့ ကရင်ပြည်နယ်၊ ပြည်သူ့လွတ်တော်ကိုယ်စားလှယ် ဦးသန့်ဇင်အောင်၊ မြန်မာနိုင်ငံပြောင်း လုပ်ငန်းရှင်များအသင်းမှ ဉက္ကဌ ဦးမင်းခိုင်နှင့် အဖွဲ့ဝင်များ၊ မြဝတီမြို့ နယ်စပ်ကုန် သည်ကြီးများအသင်းမှ ဉက္ကဌ ဒေါ်သင်းသင်းမြတ်၊ မြဝတီမြို့ရှိ ပြောင်းကုန်သည်လုပ်ငန်း ရှင်များ၊ ဌာနဆိုင်ရာမှ တာဝန်ရှိသူများ၊ စုစုပေါင်း (၅၀)ဦး တက်ရောက်ခဲ့ကြပါသည်။

        ရှေ့ဦးစွာ ဆွေးနွေးပွဲတွင် ပြည်နယ် လွှတ်တော်ကိုယ်စားလှယ် ဦးသန့်ဇင်အောင်နှင့် ခရိုင်အုပ်ချုပ်ရေးမှူး ဦးတေဇာအောင်တို့က နှုတ်ခွန်းဆက် အဖွင့်အမှှာစကား ပြောကြား ခဲ့ပြီး မြန်မာနိင်ငံ ပြောင်းလုပ်ငန်းရှင်များအသင်း ဉက္ကဌ ဦးမင်းခိုင်မှ ကရင်ပြည်နယ် ပြောင်းလုပ်ငန်းအသင်းနှင့် ပြောင်းကုန်စည်ဒိုင် ဖွင့်လှစ်ရခြင်း၏ ရည်ရွယ်ချက်များကို လည်းကောင်း၊ မြဝတီမြို့ နယ်စပ်ကုန်သည်ကြီးများအသင်းမှ ဉက္ကဌ ဒေါ်သင်းသင်းမြတ် က မြန်မာ-ထိုင်း နယ်စပ် မြဝတီမြို့မှ တစ်ဖက်ထိုင်းနိုင်ငံသို့ ပြောင်းဆံတင်ပို့နေမှု အခြေအနေများကိုလည်းကောင်း၊ ကုန်သွယ်ရေးဦးစီးဌာန၊ မြဝတီကုန်သွယ်ရေးဇုံမှ ညွှန်ကြားရေးမှူး ဦးမင်းအောင်အေးက ပြောင်းကုန်စည်နှင့် ပတ်သတ်၍ ကုန်သွယ်ရေး ဆိုင်ရာ ဖြေလျော့ပေးမှု အခြေအနေများကိုလည်းကောင်း၊ စိုက်ပျိုးရေးဦးစီးဌာန၊ မြဝတီ ခရိုင်ဦးစီးမှူး ဦးစောလှကြည်က အစေ့ထုတ်ပြောင်းနှင့် ပတ်သက်၍ စိုက်ပျိုးရေးဆိုင်ရာ ဆောင်ရွက်ရမည့် သီးနှံဆိုင်ရာ အသိပညာအကြောင်းအားလည်းကောင်း၊ မြဝတီမြို့နယ် အကောက်ခွန်ဦးစီးဌာနမှ လက်ထောက် ညွှန်ကြားရေးမှူး ဦးလှမျိုးအောင်က အစေ့ထုတ်ပြောင်းနှင့် ပတ်သက်၍ အကောက်ခွန်ဆိုင်ရာ ကျသင့်ကောက်ခံမှု အခြေအနေများကို လည်းကောင်း၊ စားသုံးသူရေးရာ ဦးစီးဌာန၊ မြဝတီခရိုင်ရုံးမှ ဦးစီးမှူး ဦးမျိုးဝင်းနိုင်က ကုန်စည်ဒိုင်တွင် လိုက်နာရမည့် မှန်လေးမှန်ဖြစ်သည့် ပစ္စည်းမှန်၊ ဈေးနှုန်းမှန်၊ အလေးချိန်မှန်၊ အရောင်းအဝယ်မှန်ဖြစ်ရမည့် အကြောင်းအရာများ၊ ကုန်စည်ဒိုင်၏ စည်းမျဉ်းစည်းကမ်းများ၊ အသင်းဖွဲ့စည်းရာတွင် လိုက်နာရမည့် စည်းမျဉ်းစည်းကမ်းများ အကြောင်း သိကောင်းစရာများ ကိုလည်းကောင်း အသီးသီး ဆွေးနွေးခဲ့ကြပါသည်။

ဆက်လက်၍ မြဝတီမြို့နယ် ပြောင်းလုပ်ငန်းရှင်များအသင်း ဖွဲ့စည်းနိုင်ရေးနှင့် ပြောင်းကုန်စည်ဒိုင် ဖွင့်လှစ်နိုင်ရေးတို့အား မူအားဖြင့် သဘောတူဆုံးဖြတ်ချက်ချမှတ်နိုင် ခဲ့ပြီး မြဝတီပြောင်းကုန်စည်ဒိုင် ဖွင့်လှစ်နိုင်ရေးအတွက် ဦးဆောင်ကော်မတီကို ပုဂ္ဂိုလ် (၅) ဦးဖြင့် ဖွဲ့စည်းပြီး မြဝတီကုန်စည်ဒိုင်ဖြစ်မြောက်ရေးကော်မတီကို ပုဂ္ဂိုလ်(၁၄)ဦးဖြင့် ဖွဲ့စည်းဆောင်ရွက် ခဲ့ကြောင်း သတင်းရရှိခဲ့ပါသည်။

ကရင်ပြည်နယ်

စားသုံးသူရေးရာဦးစီးဌာန