သတင်းနှင့် လှုပ်ရှားမှုများ

            ၂၀၂၂ခုနှစ်၊ ဇူလိုင်လ (၂၀)ရက်နေ့ နံနက်(၀၉:၃၀)နာရီအချိန်တွင် မကွေးတိုင်းဒေသကြီးအစိုးရအဖွဲ့ စီးပွားရေးရာဝန်ကြီး ဦးအောင်ချိန်၊ မကွေးတိုင်းဒေသကြီး စားသုံးသူရေးရာဦးစီးဌာန တိုင်းဒေသကြီးဦးစီးမှူး ဦးမြင့်ဝင်း၊ စားသုံးသူရေးရာဦးစီးဌာန မကွေး ခရိုင်ဦးစီးမှူး ဒေါ်တင်တင်လှနှင့် တာဝန်ရှိသူတို့သည် ရေနံချောင်းမြို့နယ် အထွေထွေအုပ်ချုပ်ရေးဦးစီးဌာန အစည်းအဝေးခန်းမတွင် ရေနံချောင်းမြို့နယ်ရှိ ကုန်သည်များနှင့် စက်မှုလက်မှု လုပ်ငန်းရှင်များနှင့် တွေ့ဆုံခဲ့ကြကြောင်း သိရှိရပါသည်။

            အဆိုပါတွေ့ဆုံပွဲတွင် ဌာနဆိုင်ရာမှ တာဝန်ရှိသူ(၁၁)ဦး၊ ကုန်သည် စက်မှုလက်မှု လုပ်ငန်းရှင်များ (၃၇)ဦးတို့ တက်ရောက်ခဲ့ကြပြီး တိုင်းဒေသကြီးအစိုးရအဖွဲ့ စီးပွားရေးရာဝန်ကြီး ဦးအောင်ချိန်က ဒေသအလိုက်ကုန်စည်ဒိုင်အသင်းအဖွဲ့များ  ရေရှည်တည်တံ့ခိုင်မြဲပြီး ဒေသဖွံ့ဖြိုးတိုးတက်တိုးတက်အောင် ဆောင်ရွက်ရေး၊ မကွေးတိုင်းဒေသကြီး ကုန်သည်များနှင့် စက်မှုလက်မှု လုပ်ငန်းရှင်းများ  အသင်းအားပြန်လည်ဖွဲ့စည်းရာတွင်ဒေသစုံ၊ကဏ္ဍစုံမှ ကုန်သည်/လုပ်ငန်းရှင်များအားလုံး ပူးပေါင်းပါဝင် ဆောင်ရွက်နိုင်ရေးတို့ကိုအကျယ်တဝင့် ဆွေးနွေးခဲ့ပါသည်။

           ဆက်လက်၍ နေ့လယ် (၁၃:၃၀)နာရီအချိန်တွင် မကွေးတိုင်းဒေသကြီး အစိုးရအဖွဲ့ စီးပွား ရေးရာဝန်ကြီးနှင့် မကွေးတိုင်းဒေသကြီး၊ စားသုံးသူရေးရာဦးစီးဌာန တိုင်းဒေသကြီးဦးစီးမှူး၊ စားသုံးသူရေးရာဦးစီးဌာန မကွေးခရိုင်၊ ပခုက္ကူခရိုင် ဦးစီးမှူးနှင့် ဝန်ထမ်းများသည် ဆိပ်ဖြူမြို့နယ် အထွေထွေ အုပ်ချုပ်ရေးဦးစီးဌာန ငွေသဲဖြူခန်းမ၌လည်း ဆိပ်ဖြူမြို့နယ်နှင့် ချောက်မြို့နယ်ရှိ ကုန်သည် စက်မှုလက်မှု လုပ်ငန်းရှင်များနှင့် တွေ့ဆုံ၍ ကုန်စည်ဒိုင်ဖွံ့ဖြိုးတိုးတက်ရေးလုပ်ငန်းများ ပူးပေါင်း ပါဝင်ဆောင်ရွက်ရေး၊ ကျေးလက်နေ တောင်သူများလူမှုဘဝမြင့်မားတိုးတက်စေရေး၊ ဒေသတွင်းတည်ငြိမ် အေးချမ်းရေးနှင့် မိမိတို့အရပ်ဒေသတွင် ကျစ်လစ်ခိုင်မာသည့် ကုန်သည်နှင့် စက်မှုလက်မှုလုပ်ငန်းရှင် အသင်းဖော်ဆောင် နိုင်ပြီး တိုင်းဒေသကြီးအဆင့် ကုန်သည်နှင့်စက်မှုလက်မှုလုပ်ငန်းရှင်များ အသင်းအဖွဲ့ ဖွဲ့စည်းနိုင်ရေးနှင့် ထိုသို့ဖွဲ့စည်းရာတွင် တိုင်းဒေသကြီးအဆင့်တွင် အဖွဲ့ဝင်များပါဝင်နိုင်ရေး သက်ဆိုင်ရာ မြို့နယ် ကုန်စည်ဒိုင်များက သင့်တော်သည့် ကုန်သည်နှင့် စက်မှုလက်မှုလုပ်ငန်းရှင်များအားရွေးချယ်၍ ကိုယ်စားလှယ်စာရင်းများကို တိုင်းဒေသကြီးသို့ ပေးပို့ဆောင်ရွက်နိုင်ရေး လမ်းညွှန်ဆွေးနွေးပြောကြားခဲ့ပါသည်။ 

             ထို့နောက် တက်ရောက်လာကြသည့် ကုန်သည်နှင့် စက်မှုလက်မှုလုပ်ငန်းရှင်များမှ ဒေသတွင်း စီးပွားရေးလုပ်ငန်းများနှင့် ကုန်စည်ဒိုင်များ ဖွံ့ဖြိုးတိုးတက်ရေး လုပ်ငန်းများကို အသီးသီး တင်ပြ ဆွေးနွေးခဲ့ကြပြီး တိုင်းဒေသကြီးအစိုးရအဖွဲ့ စီးပွားရေးရာဝန်ကြီးမှ သက်ဆိုင်ရာ ခရိုင်/မြို့နယ် စီမံအုပ်ချုပ်ရေး အဖွဲ့ဝင်များနှင့် ပေါင်းစပ်ညှိနှိုင်း ဆောင်ရွက်သွားရန် လမ်းညွှန်ဆွေးနွေးခဲ့ပါသည်။ အဆိုပါ တွေ့ဆုံဆွေးနွေးပွဲသို့  ဌာနဆိုင်ရာတာဝန်ရှိသူ(၂၀)ဦးနှင့်ချောက်၊ ဆိပ်ဖြူမြို့နယ်တို့မှ ကုန်သည် လုပ်ငန်းရှင် (၄၅)ဦး တက်ရောက်ခဲ့ကြကြောင်း သတင်းရရှိပါသည်။

DOCA(မကွေး)

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ မကွေးတိုင်း ဒေသကြီး၊ တိုင်း/ခရိုင်ဦးစီးမှူး၏ လမ်းညွှန်ချက်ဖြင့် ပခုက္ကူခရိုင်ဦးစီးမှူးရုံးမှ ဒုတိယခရိုင်ဦးစီးမှူး ဒေါ်မွန်မွန်စိုးဦးဆောင်၍ မြို့နယ်တာဝန်ခံ ဦးဇော်မင်းဦးနှင့်ဝန်ထမ်းများအဖွဲ့သည် စားသုံးသူ ကာကွယ်ရေး ဥပဒေ (၂၀၁၉)  အခန်း(၁၈) ပါ ကုန်အညွှန်းအမှတ်အသား ပြည့်စုံစွာဖော်ပြခြင်းဖြင့် ဈေးကွက်အတွင်းရှိ မိမိတို့ထုတ်ကုန်များမှာ စားသုံးသူများအား ဘေးအန္တရာယ်ကင်းရှင်းစေနိုင် ကြောင်းကို သုံးစွဲသူကသိရှိလာပြီး စီးပွားရေးလုပ်ငန်းရှင်များအနေဖြင့်လည်း ဈေးကွက်များပိုမိုရရှိ လာစေရေးရည်ရွယ်ပြီး ဇူလိုင်လ(၇)ရက်နေ့၊နံနက်(၉:၀၀) အချိန်မှစတင်၍ ပခုက္ကူမြို့ပေါ်ရှိ "ရွှေလီ"ကိတ်နှင့်မုန့်မျိုးစုံလုပ်ငန်း၊ "အောင်ကမ္ဘာ"ဆားလှော်လုပ်ငန်း၊ "အောင်သစ္စာ" ဆီးယို/ဆီးထုပ် လုပ်ငန်း၊ "ဂွတ်ရှယ်"နှင့် "စတား-ရွှေ"ပဲကြော်လုပ်ငန်းများ၊"New Power" သောက်ရေသန့်လုပ်ငန်း စသည့် လုပ်ငန်းများအားကွင်းဆင်း၍ လုပ်ငန်းရှင်များနှင့် တွေ့ဆုံ ဆွေးနွေးခဲ့ပါသည်။

       ဒု-ခရိုင်ဦးစီးမှူးမှ လုပ်ငန်းရှင်များအား စားသုံးသူကာကွယ်ရေးဥပဒေပါ စီးပွားရေးလုပ်ငန်း ရှင်၏တာဝန်များ၊ မြန်မာနိုင်ငံ စားသုံးသူကာကွယ်ရေးကော်မရှင်၏ ညွှန်ကြားချက် (၂/၂၀၁၉) ပါ ကုန်စည်အုပ်စု(က)ရှိအရန်သင့်အစားအစာအမျိုးမျိုး၊  အသင့်စားမုန့်အမျိုးမျိုး၊ သောက်ရေသန့်တို့တွင် မြန်မာဘာသာဖြင့် ထည့်သွင်းရမည့်အချက်များ၊ ကုန်အညွှန်းအမှတ်အသားဖော်ပြခြင်းနှင့် ပတ်သက် သည့် ဥပဒေပြဌာန်းချက်များ၊ စီမံခန့်ခွဲရေးနည်းလမ်းအရအရေးယူခြင်း၊ တားမြစ်ချက်များ၊ ပြစ်မှုနှင့် ပြစ်ဒဏ်များအကြောင်း သိရှိလိုက်နာစေရန် အသေးစိတ်ရှင်းလင်းဆွေးနွေးခဲ့ပြီး မြန်မာနိုင်ငံ စားသုံးသူကာကွယ်ရေးကော်မရှင်၏ ညွှန်ကြားချက် (၂/၂၀၁၉) လက်ကမ်းစာစောင်များ ဖြန့်ဝေခဲ့ ပါသည်။

        သောက်ရေသန့်လုပ်ငန်း၏ ကုန်အမှတ်တံဆိပ်အား လေ့လာရာတွင် သောက်ရေသန့်မှာ စားသုံးသူကာကွယ်ရေးဥပဒေအရ ကုန်အညွှန်းအမှတ်အသားဖော်ပြချက်နှင့် ကိုက်ညီမှုရှိကြောင်း တွေ့ရှိရပါသည်။

        ဆက်လက်၍ "ဂွတ်ရှယ်" ပဲကြော်လုပ်ငန်းနှင့် "စတား-ရွှေ"ပဲကြော်လုပ်ငန်းများမှ ယခုအချိန် တွင် လက္ကားဖြန့်ဖြူးရောင်းချကြောင်း၊ ထိုမှတစ်ဆင့် လက်လီရောင်းချနိုင်ရန်နှင့် ရောင်းချချိန်တွင် မြန်မာဘာသာဖြင့် ထည့်သွင်းရမည့်အချက်များ၊ ကုန်အညွှန်းအမှတ်အသားဖော်ပြခြင်းနှင့် ပတ်သက် သည့် အလေးချိန်ပမာဏအလိုက် ခွဲခြား၍ ကုန်အမှတ်တံဆိပ်ရိုက်နှိပ်ဖြန့်ဖြူးသွားမည်ဖြစ်ကြောင်း ဈေးကွက်အနေဖြင့် ပခုက္ကူဒေသတွင်းနှင့် မုံရွာမြို့သို့ ဖြန့်ဖြူးရောင်းချကြောင်း၊ လုပ်သားဦးရေ (၁၀) ဦး ခန့်စီရှိပြီး နေ့စားလုပ်အားခအနေဖြင့် ( ၃၀၀၀ မှ ၅၀၀၀ ) ကျပ်ထိ ပေးရကြောင်းလုပ်ငန်းရှင်၏ ပြောကြားချက်အရ သိရှိရပါသည်။

DOCA(မကွေး)

         တနင်္သာရီတိုင်းဒေသကြီး မြိတ်ခရိုင်စားသုံးသူရေးရာဦးစီးဌာန မှ ခရိုင်ဦးစီးမှူးနှင့်ဝန်ထမ်း များသည် (၂၁.၇.၂၀၂၂)ရက်နေ့၊ နံနက်(၉း၃၀)အချိန်တွင် မြိတ်မြို့၊ မြစ်ငယ်ရပ်၊ အမှတ်(၁)၊ အခြေခံပညာအထက်တန်းကျောင်းသို့ သွားရောက်၍ ကျောင်းသူ၊ ကျောင်းသားများ ဘေးအန္တရယ်ကင်းရှင်း စွာ‌ ရွေးချယ်ဝယ်ယူစား‌သောက်နိုင်ရေးအတွက် စားသုံးသူကာကွယ်ရေး အသိပညာပေးဟောပြောပွဲ ကျင်းပဆောင်ရွက်ခဲ့ကြပါသည်။

       အဆိုပါဟောပြောပွဲတွင် စားသုံးသူရေးရာဦးစီးဌာနဖြစ်ပေါ်လာပုံ၊ မျှော်မှန်းချက်၊ ရည်မှန်းချက်အပါအဝင် အစားအသောက်များရွေးချယ်ဝယ်ယူစားသောက်ရာတွင် အစားအသောက်နှင့်ဆေးဝါးကွပ်ကဲရေးဦးစီးဌာန ထောက်ခံချက်ရရှိထားသော စားသောက်ကုန်နှင့် မြန်မာဘာသာဖြင့်ဖော်ပြ ထားသော စားသောက်ကုန်များသာရွေးချယ်ဝယ်ယူရန်၊ စားသုံးသူထိခိုက်နစ်နာမှုရှိခဲ့ပါက စားသုံးသူ ရေးရာဦးစီးဌာနသို့တိုင်ကြားရန်၊ စားသောက်ကုန်များအား သက်တမ်းကုန်ဆုံးရက်ကြည့်ရန်၊ ဟင်းသီးဟင်းရွက်၊ အသီးအနှံများကို ရေဖြင့်သေချာစွာ ဆေးကြောပြီးမှစားရန်၊ ပလပ်စတစ်အိတ်များအား အပူဖြင့်ထည့်၍ မစားသောက်ရန်နှင့် ဆိုးဆေးအန္တရာယ်များအား ဟောပြောပို့ချခဲ့ပြီး ကျောင်းသူ ကျောင်းသားများ ဘေးအန္တရာယ်ကင်းရှင်းစွာ စားသောက်နိုင်ရန် ကျောင်းပတ်ဝန်းကျင်ရှိ မုန့်စျေးတန်းအား ကွင်းဆင်း စစ်ဆေးခြင်း ဆောင်ရွက်ခဲ့ကြောင်းသိရှိရပါသည်။

DOCA(တနင်္သာရီ)

            စားသုံးသူရေးရာဦးစီးဌာန၊ ကရင်ပြည်နယ်၊ ကော့ကရိတ်မြို့နယ်တာဝန်ခံ ဦးသက်လွင်သည် ၂၂-၇-၂၀၂၂ ရက်နေ့ နံနက် (၀၇:၀၀) နာရီအချိန်တွင် မြို့နယ်အထွေထွေအုပ်ချူပ်ရေးဦးစီးဌာန၊ စည်ပင်သာယာရေးအဖွဲ့၊ ရပ်ကျေးအဖွဲ့ဝင်တို့ပူပေါင်း၍ အမှတ် (၁) စည်ပင်သာယာဈေးနှင့် အမှတ် (၂) ကမ်းနားဈေးရှိဆိုင်များတွင်ရောင်းချလျက်ရှိသော ကုန်ပစ္စည်းများကို စားသုံးသူပြည်သူများ ဘေးအန္တရာယ်ကင်း၍ လုံခြုံစိတ်ချရမှုရှိစေရေးအတွက် သက်တမ်းလွန်အစားအသောက်များ ဈေးကွက်အတွင်း ရှိ/မရှိ နှင့် ၂၀၁၉ စားသုံးသူကာကွယ်ရေး ဥပဒေ အခန်း (၁၈) ပါ ကုန်အညွှန်း အမှတ်အသားဖော်ပြခြင်းနှင့်စပ်လျဉ်း၍ ပြည့်စုံမှန်ကန်မှု ရှိ/မရှိ တို့ကို ဈေးကွက်ကွင်းဆင်းစစ်ဆေးခြင်းလုပ်ငန်းများ ဆောင်ရွက်ခဲ့ကြောင်း သိရှိရပါသည်။

DOCA(ကရင်)

          စားသုံးသူရေးရာဦးစီးဌာန ၊ မိတ္ထီလာခရိုင်၊ ခရိုင်ဦးစီးမှူး၏ လမ်းညွှန်မှုဖြင့် ခရိုင်ဦးစီးမှူးရုံးမှ စစ်ဆေးရေးအရာရှိနှင့် ဝန်ထမ်းများသည် ၂၀၂၂ခုနှစ်၊ ဇူလိုင်လ ၂၀    ရက်နေ့ (၁၀း၀၀)အချိန်တွင် မိတ္ထီလာမြို့နယ်၊ ကျောက်ဖူးရပ်ကွက်အတွင်းရှိ စတိုးဆိုင်၊ ကုန်စုံဆိုင်များသို့သွားရောက်၍ စားသောက်ကုန်နှင့် မုန့်မျိုးစုံတို့တွင် ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍ ပြည့်စုံစွာထည့်သွင်းဖော်ပြခြင်းရှိ /မရှိ စျေးကွက်စောင့်ကြည့်စစ်ဆေးခဲ့ပါသည်။

          စားသုံးသူရေးရာဦးစီးဌာနသည် စားသုံးသူအခွင့်အရေးများကို သိရှိနားလည်စေရန် စားသုံးသူကာကွယ်ရေးအသိပညာပေးဟောပြောပွဲလုပ်ငန်းများ ဆောင်ရွက်ခြင်းနှင့် စားသုံးသူများဘေးအန္တရာယ် ကင်းရှင်းရေး၊ ထုတ်ကုန်လုံခြုံစိတ်ချရမှုရှိစေရေးအတွက် ဈေးကွက်စောင့်ကြည့်စစ်ဆေးခြင်း လုပ်ငန်းများ လုပ်ဆောင်လျက်ရှိပြီး စားသုံးသူပြည်သူများ နေ့စဉ်ဝယ်ယူစားသုံးနေသော ကုန်စည်များ နှင့်ပတ်သက်သော သတင်းအချက်အလက်များကို စားသုံးသူပြည်သူများအား မှန်ကန်စွာသိရှိစေရေး၊ လုပ်ငန်းရှင်များအနေဖြင့် ကုန်အညွှန်းအမှတ်အသားများကို ဖော်ပြရာတွင် ၂၀၁၉ စားသုံးသူ ကာကွယ် ပေးရေး ဥပ‌‌ဒေပြဌာန်းချက်များကို လိုက်နာပြီးထုတ်ကုန်လုံခြုံ စိတ်ချရမှုရှိသော ကုန်ပစ္စည်းများကို ထုတ်လုပ်အသုံးပြုနိုင်ရေးနှင့် စားသုံးသူအခွင့်အ‌ရေးများ နစ်နာဆုံးရှုံးမှုမရှိစေရေးအတွက် ရည်ရွယ်၍ ကွင်းဆင်းဆောင်ရွက်ခဲ့ပါသည်။

                      ထိုသို့ဈေးကွက်စောင့်ကြည့်စစ်ဆေးခဲ့ရာတွင် ကုန်စည်များ ထုတ်လုပ်ရောင်းချရာ၌ ကုန်အညွှန်းအမှတ်အသား ပြည့်စုံစွာဖော်ပြထားခြင်းရှိ/မရှိ စစ်ဆေးခဲ့ပြီး၊ ဈေးဆိုင်လုပ်ငန်းရှင်များအား ကုန်အညွှန်း အမှတ်အသား‌ဖော်ပြခြင်းနှင့်ပတ်သက်သည့် အမိန့်ညွှန်ကြားချက်သည် ၂၀၂၀ခုနှစ်၊ မတ်လ(၁၆)ရက်နေ့မှစ၍ စတင်အာဏာသက်ရောက်နေပြီဖြစ်ကြောင်းနှင့် ကုန်အညွှန်းအမှတ်အသား ပြည့်စုံစွာမပါရှိပါက မည်သည့်စီးပွားရေးလုပ်ငန်းရှင်မဆို စားသုံးသူကာကွယ်ရေး ဥပဒေပုဒ်မ (၇၃)အရ (၂)နှစ်ထက်မပိုသော ထောင်ဒဏ်ဖြစ်စေ ၊ ကျပ်သိန်း (၂၀၀)ထက် မပိုသောငွေဒဏ်ဖြစ်စေ ၊ ဒဏ်(၂)ရပ်လုံးဖြစ်စေအရေးယူမှုများပြု လုပ်နိုင်ကြောင်း အသိပညာပေးဆွေးနွေး ပြောကြားခဲ့ပြီး  ကုန်အညွှန်းအမှတ်အသားတပ်ဆင်ရန် အခက်အခဲရှိပါက စားသုံးသူရေးရာဦးစီးဌာနသို့ လာရောက်တိုင်ပင်ဆွေးနွေးနိုင်ကြောင်း၊ လုပ်ငန်းရှင်များအနေဖြင့်လည်း မိမိတို့ ကိုယ်တိုင် စာသုံးသူများဖြစ်ကြောင်း ၊ စာသုံးသူအခွင့်အရေး ဆုံးရှုံးနစ်နာမှုများရှိခဲ့လျှင် DOCA Myanmar Application နှင့်စားသုံးသူရေးရာဦးစီးဌာန၏ Website www.doca.gov.mm တွင် ဝင်ရောက်လေ့လာ တိုင်ကြားနိုင်သည်ကို ဆွေးနွေးပြောကြားခဲ့ပြီး လက်ကမ်းစာစောင်များအား ဖြန့်ဝေခဲ့ကြောင်း သိရှိရပါသည်။

DOCA(မန္တလေး)