သတင်းနှင့် လှုပ်ရှားမှုများ

             စားသုံးသူရေးရာဦးစီးဌာန ၊ ပဲခူးတိုင်း‌ဒေသကြီး ၊ သာယာဝတီခရိုင်အတွင်းရှိ မြို့နယ်များတွင် စားသုံးသူကာကွယ်ရေး လုပ်ငန်းများကို ကျယ်ကျယ်ပြန့်ပြန့် ဆောင်ရွက်လာသည်နှင့်အမျှ စားသုံးသူကာကွယ်ရေးနှင့်စပ်လျဉ်း၍ အသိပညာရှိမှုနှင့် စွမ်းဆောင်ရည်မည်မျှရှိသည်ကို သိရှိနိုင်ရန်အတွက် စားသုံးသူစွမ်းဆောင်နိုင်မှု အညွှန်းကိန်းစစ်တမ်းများ  ကောက်ယူနေကြောင်း သိရှိရပါသည်။

          သာယာဝတီခရိုင်အတွင်းရှိ  မြို့နယ် (၈)မြို့နယ်တွင် စားသုံးသူအသိပညာပေးမှုလုပ်ငန်းများ ၊ စားသုံးသူနစ်နာမှုနှင့် စပ်လျဉ်း၍ သိရှိမှု ၊ ထိခိုက်နစ်နာမှုများရှိပါက တိုင်ကြားနိုင်မှု ၊ ကုန်အညွှန်း အမှတ်အသားနှင့် စပ်လျဉ်းသည့် စားသုံးသူများသိရှိရမည့် သတင်းအချက်အလက်များ ၊ စားသုံးသူ ကာကွယ်ရေး ဥပဒေပါ စားသုံးသူအခွင့်အရေးနှင့် တာဝန်များ သိရှိနိုင်မှု ၊ စီးပွားရေးလုပ်ငန်းရှင်များ၏ တာဝန်များအပေါ် သိရှိနိုင်မှု အခြေအနေများနှင့်ပတ်သက်၍  စစ်တမ်းအား (၄.၅.၂၀၂၂) ရက်နေ့တွင် လက်ပံတန်းမြို့၌လည်းကောင်း ၊ (၆.၅.၂၀၂၂) ရက်နေ့တွင် သာယာဝတီမြို့နှင့် နတ္တလင်းမြို့၌ လည်းကောင်း ၊ (၁၀.၅.၂၀၂၂)ရက်နေ့တွင် မင်းလှမြို့နှင့် ဇီးကုန်းမြို့၌လည်းကောင်း ၊ (၁၁.၅.၂၀၂၂) ရက်နေ့တွင် ကြို့ပင်ကောက်မြို့၌ လည်းကောင်း ၊ (၂၀.၅.၂၀၂၂)ရက်နေ့တွင် မိုးညိုမြို့၌လည်းကောင်း၊ (၂၉.၅.၂၀၂၂)ရက်နေ့တွင် အုတ်ဖိုမြို့၌လည်းကောင်း စားသုံးသူစွမ်းဆောင်နိုင်မှု အညွှန်းကိန်း စစ်တမ်းကောက်ယူခဲ့ကြောင်း သတင်းရရှိပါသည်။

DOCA(ပဲခူး)

          (၂၈.၅.၂၀၂၂) ရက် စနေနေ့ နံနက်(၉)နာရီအချိန်တွင် ဘီးလင်းမြို့နယ်ရှိ ရွှေစင်ဦး ဟိုတယ်ခန်းမ၌ (၅)ရက်တာ လုပ်ငန်းခွင်စွမ်းဆောင်ရည်မြှင့် သင်တန်းကို National Enlightenment Institute (NEI) နှင့် မော်လမြိုင်ကုန်စည်ဒိုင်တို့ပူးပေါင်း၍ ဖွင့်လှစ်ခဲ့ပါသည်။ အဆိုပါသင်တန်းကို မော်လမြိုင်ကုန်စည်ဒိုင် အသင်း၏ အလုပ်အမှုဆောင်အဖွဲ့ဝင်များ၊ NEI မှတာဝန်ရှိပုဂ္ဂိုလ်များ၊ နည်းပြဆရာ၊ ဆရာမများ၊ သင်တန်းသား သင်တန်းသူ စုစုပေါင်း(၅၃)ဦး တက်ရောက်ခဲ့ပါသည်။

         ထိုလုပ်ငန်းခွင်ဝင်စွမ်းဆောင်ရည်မြှင့်သင်တန်းသည် မွန်ပြည်နယ်အတွင်းရှိ ကျေးလက်ဒေသနေ လူငယ်များနှင့်အမျိုးသမီးများ၏ အလုပ်အကိုင်စွမ်းဆောင်ရည် ပိုမိုမြင့်တက်လာစေရန်နှင့် ဒေသ၏    လူမှုစီးပွားရေးနှင့်ဖွံ့ဖြိုးမှုဆိုင်ရာ လုပ်ငန်းနယ်ပယ်များတွင် ဦးဆောင်ဝင်ရောက်လုပ်ကိုင်လာနိုင်စေရန် ရည်ရွယ်၍ ခေါ်ယူသင်ကြားပေးခဲ့ခြင်းဖြစ်ပြီး (၁.၆.၂၀၂၂)ရက် ဗုဒ္ဓဟူးနေ့ ညနေ(၄)နာရီအချိန်တွင် သင်တန်းဆင်းပွဲပြုလုပ်ခဲ့ကြောင်း သိရှိရပါသည်။ ရှေးဆက်၍ ကျိုက်ထိုမြို့နယ်၊သံဖြူဇရပ်မြို့နယ်၊ ပေါင်နယ်၊  သထုံမြို့နယ်တို့တွင်လည်း အပတ်စဉ်(၂)မှ(၈)အထိ ခေါ်ယူသွားရန်ရှိကြောင်း  စီစဉ်လျှက် ရှိပါသည်။

DOCA(မွန်)

              ၁.၆.၂၀၂၂ ရက်နေ့ နံနက် ၁၀:၀၀ နာရီတွင် စားသုံးသူရေးရာဦးစီးဌာန၊ မုဒုံမြို့နယ် တာဝန်ခံရုံး၌ မုဒုံမြို့နယ် ဆန်စက်လုပ်ငန်းရှင်များအသင်း ပြန်လည်ဖွဲ့စည်းခြင်း အစည်းအဝေး ပြုလုပ်ခဲ့ရာ အဆိုပါအစည်းအဝေးသို့ စားသုံးသူရေးရာဦးစီးဌာန၊ မွန်ပြည်နယ်ဦးစီးမှူး၊ မုဒုံမြို့နယ်တာဝန်ခံ၊ မော်လမြိုင်မြို့နယ်တာဝန်ခံနှင့် ဝန်ထမ်းများ၊ မွန်ပြည်နယ်ဆန်စက်လုပ်ငန်းရှင်များ အသင်း ဥက္ကဌနှင့် ဆန်စက်လုပ်ငန်းရှင်များ တက်ရောက်ခဲ့ကြကြောင်း သိရှိရသည်။

          ထို့ပြင် နေ့လည် ၁၄:၀၀ နာရီတွင် ချောင်းဆုံမြို့နယ် ဆန်စက်လုပ်ငန်းရှင်များအသင်း ပြန်လည်ဖွဲ့စည်းခြင်းအစည်းအဝေးကို ချောင်းဆုံမြို့နယ် ပြန်ကြားရေးနှင့် ပြည်သူ့ဆက်ဆံရေး ဦးစီးဌာန၊ လူထုအခြေပြုဗဟိုဌာနတွင် ကျင်းပပြုလုပ်ခဲ့ရာ စားသုံးသူရေးရာဦးစီးဌာန၊ ချောင်းဆုံမြို့နယ် တာဝန်ခံ၊ မော်လမြိုင်မြို့နယ်တာဝန်ခံနှင့် ဝန်ထမ်းများ၊ မွန်ပြည်နယ်ဆန်စက်လုပ်ငန်းရှင်များအသင်း ဥက္ကဌနှင့် ချောင်းဆုံမြို့နယ်မှ ဆန်စက်လုပ်ငန်းရှင်များ တက်ရောက်ခဲ့ကြကြောင်း သိရှိရသည်။

          ရှေးဦးစွာ ပြည်နယ်အသင်းဥက္ကဌ ဦးခိုင်ဦးက ဆန်စက်လုပ်ငန်းရှင်များအသင်း ဖွဲ့စည်းရခြင်း ရည်ရွယ်ချက်အားလည်းကောင်း၊ ကော်မတီရွေးချယ်တင်မြှောက်ခြင်းကို (၃) နှစ်လျှင် တစ်ကြိမ် ရွေးချယ်တင်မြှောက်ကြောင်း၊ ယခုရွေးချယ်တင်မြှောက်ခြင်းသည် (၂၀၂၂ မှ ၂၀၂၅) ခုနှစ်အထိ သက်တမ်းရှိကြောင်း ရှင်းလင်းပြောကြားပြီးနောက် တက်ရောက်လာကြသည့် ဆန်စက်လုပ်ငန်းရှင်များမှ ကော်မတီဝင်များရွေးချယ်တင်မြှောက်ကြပြီး ကော်မတီများမှ ရှေ့ဆက်လုပ်ဆောင် သွားမည့် လုပ်ငန်းအကြောင်းအရာများအား ဆွေးနွေးခဲ့ကြောင်း သိရှိရပါသည်။

DOCA(မွန်)

            စားသုံးသူရေးရာဦးစီးဌာန၊ ရန်ကုန်တိုင်းဒေသကြီး၊ အရှေ့ပိုင်းခရိုင်ဦးစီးမှူးရုံးမှ ဝန်ထမ်းများသည် စားသုံးသူပြည်သူများ၏ စားသုံးသူကာကွယ်ရေးလုပ်ငန်းစဉ်များနှင့် စပ်လျဉ်း၍ အသိပညာဗဟုသုတရှိမှုနှင့် စွမ်းဆောင်ရည်မည်မျှရှိသည်ကို တစ်နိုင်ငံလုံးအတိုင်းအတာဖြင့် သိရှိနိုင်ရန်အတွက် 16.5.2022 ရက်မှစ၍ 28.5.2022 ရက်ထိ မြို့နယ်၊ ရပ်ကွက်များရှိ စားသုံးသူပြည်သူများနှင့် Online ပေါ်ရှိ စားသုံးသူပြည်သူများထံ စားသုံးသူစွမ်းဆောင်နိုင်မှု အညွှန်းကိန်းစစ်တမ်းအား ကောက်ယူ‌ဆောင်ရွက်ခဲ့ကြပါသည်။

          ထိုသို့ စစ်တမ်းကောက်ယူရာတွင် စားသုံးသူရေးရာဦးစီးဌာန၊ ရန်ကုန်အရှေ့ပိုင်းခရိုင်အတွင်း မြို့နယ်ပေါင်း (၁၃) မြို့နယ်ရှိ သက်ဆိုင်ရာမြို့နယ်တာဝန်ခံများသည် မိမိတာဝန်ကျမြို့နယ်အတွင်း ကွင်းဆင်း၍ စစ်တမ်းများကောက်ယူရာတွင် အသက်အပိုင်းအခြားအလိုက် ကျား/မ မရွေးစားသုံးသူကာကွယ်ရေးလုပ်ငန်းများ အသိပညာပေးမှုနှင့် ပတ်သက်ပြီး နားလည်သိရှိနိုင်မှုစားသုံးသူအခွင့်အ‌ရေးနှင့် တာဝန်များ၊ ကုန်စည်နှင့် ဝန်ဆောင်မှုများအပေါ် သတင်းအချက်အလက်များမည်မျှနားလည်ထား ရှိမှု၊ နစ်နာဆုံးရှုံးမှုများရှိခဲ့ပါက တိုင်ကြားနိုင်မည့်နည်းလမ်းများနှင့် ကုန်စည်များဝယ်ယူရာတွင် ကုန်အညွှန်းအမှတ်အသားအချက်အလက်များ ပါ/မပါ ရေးသားထားရှိမှုများကို သိရှိထားခြင်း ရှိ/မရှိ နှင့် Online  မှတဆင့် ဈေးဝယ်ယူမှုများရှိခဲ့ပါက မိမိစိတ်ကျေနပ်မှု ရှိ/မရှိ၊ စားသုံးသူတစ်ဦးချင်းစီအတွက် မေးမြန်းခြင်းနှင့် Online  မှတဆင့် မေးမြန်းခြင်းများကို ဆောင်ရွက်ခဲ့ကြရာ မြို့နယ်အလိုက်တစ်ဦး ခြင်းမေးမြန်းခြင်း (75) ဦးကို စားသုံးသူကာကွယ်ရေးဥပဒေပါ အခွင့်အရေးနှင့် ပြဌာန်းချက်များအပေါ် သိရှိမှုအခြေအနေစသည့်အချက်များကို အခြေခံသည့် စစ်တမ်းမေးခွန်းများကို တိုက်ရိုက်ကောက်ယူခဲ့ကြောင်းနှင့် Online မှတဆင့် မေးမြန်းခြင်း (၃၈) ဦးတို့ကို စားသုံးသူစွမ်းဆောင်နိုင်မှု အညွှန်းကိန်းစစ်တမ်းများ ကောက်ယူနိုင်ခဲ့ကြောင်း သိရှိရပါသည်။

DOCA(ရန်ကုန်)

            ၂၀၂၂-၂၀၂၅ သက်တမ်းကာလအတွက် မြန်မာနိုင်ငံဆန်စက်လုပ်ငန်းရှင်များအသင်း (ကရင် ပြည်နယ်အသင်းခွဲ)၏ ဆန်စက်လုပ်ငန်းရှင်များအသင်း ပြန်လည်ဖွဲ့စည်းခြင်းအခမ်းအနားကို ကရင်ပြည်နယ်၊ စားသုံးသူရေးရာဦးစီးဌာန၊ ပြည်နယ်ဦးစီးမှူးရုံး၌ ဇွန်လ (၂) ရက်နေ့ နံနက် (၁၀:၀၀) နာရီ အချိန်တွင်ကျင်းပခဲ့ရာ  အခမ်းအနားသို့ ကရင်ပြည်နယ် ကုန်သည်များနှင့် စက်မှုလက်မှုလုပ်ငန်းရှင်များအသင်းမှအလုပ်အမှုဆောင်အဖွဲ့ဝင်များ၊ ပြည်နယ်ဆန်စက်လုပ်ငန်းရှင်များအသင်းကိုယ်စားလှယ် များ၊ကရင်ပြည်နယ်အတွင်းရှိ ဆန်စက်လုပ်ငန်းရှင်များ၊  အသင်းအဖွဲ့များ၊ အသင်းဖွဲ့စည်းမှုကြီးကြပ် ရေးအဖွဲ့ ဌာနဆိုင်ရာတာဝန်ရှိသူများ စုစုပေါင်း ( ၃၇ ) ဦးတက်ရောက်ခဲ့ကြောင်း သိရပါသည်။

         အဆိုပါ အခမ်းအနားတွင် စက်မှုကြီးကြပ်ရေးနှင့်စစ်ဆေးရေးဦးစီးဌာန၊ ကရင်ပြည်နယ်ဦးစီးမှူး ရုံးမှ ပြည်နယ်ဦးစီးမှူး ဦးစိန်လွင်က အဖွင့်အမှာစကားပြောကြားရာတွင် ကရင်ပြည်နယ်တွင် ဆန်ကြိတ်ခွဲထုတ်လုပ်မှုလုပ်ငန်း ဖွံ့ဖြိုးတိုးတက်ရေးတွင် ဆန်စက်လုပ်ငန်းဖွံ့ဖြိုးရေးသည် မရှိမဖြစ်ဆောင်ရွက်ရမည့် လုပ်ငန်းစဉ် ဖြစ်သည့်အပြင် ရေရှည်တွင် ဆန်ကြိတ်ခွဲမှုအရည်အသွေးနှင့် အထွက်နှုန်းကောင်းမွန်သည့် ဆန်စက်များ ပေါ်ထွက်လာရေးသည် အရေးကြီးပါကြောင်း၊ သို့ဖြစ်ပါ၍ ယခု ၂၀၂၂-၂၀၂၅ သက်တမ်းအတွက် ကရင်ပြည်နယ်အသင်းခွဲ၏ အမှုဆောင်သစ်ရွေးချယ်ခြင်းဖြစ်ပါ ကြောင်း၊ ယခုလိုရွေးချယ်တင်မြှောက်ဖွဲ့စည်းခြင်းဖြင့်  ကရင်ပြည်နယ်အတွင်း ဆန်စက်ကြိတ်ခွဲ ထုတ်လုပ်မှုလုပ်ငန်း ခေတ်မီတိုးတက်စေခြင်း၊ ဆန်စက်လုပ်ငန်းရှင်အချင်းချင်း စည်းလုံးညီညွတ်စေ၍ စိုက်ပျိုးထုတ်လုပ်သူများ၏ ကုန်ထုတ်စွမ်းအားတိုးတက်မြင့်မားစေပြီး ဆန်နှင့်ဆန်ထွက်ပစ္စည်း များ၏ ဈေးကွက်ဝင်အရည်အသွေး ပြည့်မီလာမည်ဖြစ်ပါကြောင်းပြောကြားခဲ့ပြီး ကရင်ပြည်နယ် စိုက်ပျိုးရေးဦးစီးဌာန၊ ဦးစီးအရာရှိ ဦးစန်းအေးက စိုက်ပျိုးရေးနှင့်ပတ်သက်သော အကြောင်းအရာများ ကိုရှင်းလင်းခြင်း၊ မြန်မာ့ကုန်သွယ်မှုမြှင့်တင်ရေးအဖွဲ့ ဇွဲကပင်ကုန်သွယ်မှုဗဟိုဌာနတာဝန်ခံ ဦးခင်မောင်မောင်အုန်းက မိမိဌာနသည် ဒေသထွက်ကုန်များနှင့်ပတ်သက်၍ ဈေးကွက်ရရှိရေး ချိတ်ဆက်ဆောင်ရွက်ပေးလျက်ရှိကြောင်းနှင့် မိမိဌာန၏ လုပ်ငန်းဆောင်ရွက်မှုအခြေအနေများအား ရှင်းလင်းပြောကြားခဲ့ပြီး စားသုံးသူရေးရာဦးစီးဌာန၊ ပြည်နယ်ဦးစီးမှူး ဦးသန်းဦးက ကရင်ပြည်နယ် ဆန်စက်လုပ်ငန်းရှင်များအသင်း ပြန်လည်ဖွဲ့စည်းရသည့် အကြောင်းအရာများအား ရှင်းလင်းခြင်း ၊ ရွေးချယ်တင်မြှောက်မည့်အစီအစဉ်များ၊ အသင်း၏ စည်းမျဉ်းစည်းကမ်းများကို ရှင်းလင်း ဆွေးနွေးခဲ့ပါ သည်။

        ဆက်လက်၍ တက်ရောက်လာသူများမှ ၂၀၂၂-၂၀၂၅ သက်တမ်းကာလ ကရင်ပြည်နယ် ဆန်စက်လုပ်ငန်းရှင်များအသင်းအတွက် အမှုဆောင်သစ်များအား အဆိုပြုခြင်း၊ ထောက်ခံခြင်း စနစ်ဖြင့် ဥက္ကဋ္ဌ၊ ဒု-ဥက္ကဋ္ဌ အပါအဝင် အဖွဲ့ဝင် (၁၇)ဦးအား ရွေးချယ်တင်မြှောက်ခဲ့ကြပြီး ရွေးချယ်ခံ ကရင်ပြည်နယ် ဆန်စက်လုပ်ငန်းရှင်များအသင်း ဥက္ကဋ္ဌ(သစ်) ဦးအောင်ဇော်ထက်မှ နှုတ်ခွန်းဆက် စကားပြောကြားခဲ့ပြီး အဖွဲ့လိုက်မှတ်တမ်းတင်ဓါတ်ပုံများ ရိုက်ကူးကြကာ အခမ်းအနားကို နေ့လည် (၁၂:၀၀) နာရီအချိန် တွင် ရုပ်သိမ်းခဲ့ကြောင်း သတင်းရရှိပါသည်။

DOCA(ကရင်)