သတင်းနှင့် လှုပ်ရှားမှုများ

         ကျိုင်းတုံဒေသအတွင်း ရေ မြေ ရာသီဥတုနှင့်ကိုက်ညီသည့် စျေးကွက်ဝင် နှစ်ရှည်သီးနှံများ တိုးချဲ့စိုက်ပျိုးနိုင်ရေးရည်ရွယ်၍ ကျိုင်းတုံကော်ဖီအစုအဖွဲ့နှင့် GIZ အဖွဲ့တို့ပူးပေါင်း၍ (Coffee Innovation Fund Project) အဖြစ် (၁၄-၁-၂၀၂၀)ရက်နေ့တွင် ကျိုင်းတုံမြို့ မိုင်းဇင်းကျေးရွာအုပ်စု၊ ဂျဒယ် အာခါရွာ စိုက်ပျိုးရေးခြံတွင် နည်းပညာပံ့ပိုးနိုင်ရေးအစီအစဉ်တစ်ရပ်ကျင်းပခဲ့ပါသည်။ အဆို ပါနည်းပညာပေးရေးအစီအစဉ်သို့ အာခါတိုင်းရင်းသားရေးရာဝန်ကြီး၊ ပြည်နယ်လွှတ်တော်ကိုယ်စား လှယ်၊ ပြည်နယ်ဒုတိယအုပ်ချုပ်ရေးမှူး၊ မြန်မာနိုင်ငံကော်ဖီအသင်းနာယကနှင့် ဌာနဆိုင်ရာများ၊ အာခါယာဉ်ကျေးမှု့အဖွဲ့အသင်းမှတာဝန်ရှိသူများ သစ်သီးဝလံအသင်းမှ တာဝန်ရှိသူများနှင့် ကော်ဖီ စိုက်ပျိုးသူ ဂျဒယ်ကျေးရွာတောင်သူများ တက်ရောက်ခဲ့ကြပါသည်။

          ကျိုင်းတုံဒေသအနေဖြင့် ကောဖီ၊ ​ရော်ဘာ၊ လက်ဖက် အစရှိသည့် နှစ်ရှည်သီးနှံများ ရေ မြေ ရာသီဥတုနှင့် ကိုက်ညီစွာ စိုက်ပျိုးနိုင်သောလည်း စိုက်ဧကနည်းပါး၍ အထွက်နှုန်းနည်းခြင်း၊ အရည် အသွေးပေါ်မူတည်၍ ဈေးကွက်တန်းဝင် ကော်ဖီစိုက်ပျိုးထုတ်လုပ်နိုင်ရေး နည်းပညာလိုအပ်ခြင်း တို့ကြောင့် ကျိုင်းတုံကော်ဖီအစုအဖွဲ့နှင့် GIZအဖွဲ့အစည်းတို့မှ ကော်ဖီကဏ္ဍအတွက် ဆန်းသစ် သောဒီဇိုင်း၊ အလေ့အကျင့်ကောင်းများဖြင့် လိုအပ်သည့်နည်းပညာ၊ စက်ကိရိယာများပံ့ပိုး တိုးမြင့်ပေးခြင်းဖြစ်ပြီး ပုဂ္ဂလိကစီးပွားရေးကဏ္ဍ ဖွံ့ဖြိုးရေးအတွက်ဆောင်ရွက်ခြင်းဖြစ်ကာ ထောက် ပံ့မှုပေးရာ၌လူတစ်ဦး (သို့) အဖွဲ့အစည်း တစ်ဖွဲ့လျှင် ယူရိုငွေ (၅၀၀၀၀)တန်ဖိုးနှင့်ညီသည့်  သွင်း အားစုများကို ထောက်ပံ့ပေးသည့် အစီအစဉ်ဖြစ်ကြောင်းသိရှိရပါသည်။၎င်းအပြင် ကော်ဖီဈေးကွက် ရှိရာ နိုင်ငံများကဲ့သို့ စိုက်ပျိုးထုတ်လုပ်မှု့နည်းပညာဖြင့် အရည်းအသွေးကောင်း ကော်ဖီများ ထုတ် လုပ်၍ ဈေးကွက်ချိတ်ဆက်နိုင်ရေးကိုလည်း ကူညီပံ့ပိုးပေးရန်ဖြစ်ကြောင်းနှင့် ဂျဒယ် အာခါရွာကို အစွဲပြု၍ “ JADAE” အမှတ်တံဆိပ်အဖြစ် နိုင်ငံတကာစျေးကွက်တန်းဝင် ကော်ဖီအရည်အသွေး ကောင်းများ ပိုမိုစိုက်ပျိုးထုတ်လုပ်လာနိုင်ရေး ဒေသနေပြည်သူတို့ အလုပ်အကိုင်အခွင့်အလမ်းရရှိပြီး လူ့စွမ်းအား အရင်းအမြစ် ဖွံ့ဖြိုးတိုးတက်ရေးတို့အတွက် အထောက်အကူပြုဆောင်ရွက်သွားမည့် လုပ်ငန်းဖြစ်ကြောင်း သိရပါသည်။

ရန်နောင်

ကျိုင်းတုံ

       ၁၀.၁.၂၀၂၀ ရက်နေ့ တွင် မွန်ပြည်နယ်စားသုံးသူရေးရာကော်မတီ၏ လုပ်ငန်းညှိနှိုင်းအစည်းအဝေးကို စားသုံးသူရေးရာဦးစီးဌာန ပြည်နယ်ဦးစီးမှူးရုံးတွင်ကျင်းပပြုလုပ်ခဲ့ရာ ပြည်နယ်စားသုံးသူရေးရာ ကော်မတီ ဥက္ကဌ ပြည်နယ်စီမံဘဏ္ဍာဝန်ကြီးက အမှာစကားပြောကြားပြီး အတွင်းရေးမှူး ဦးခင်အောင်သွင်က ကော်မတီဖွဲ့စည်းမှုဥပဒေပါပြဌာန်းချက်များ၊ ဌာန၏ လက်ရှိဆောင်ရွက်မှု အခြေအနေများရှင်းလင်းဆွေးနွေးကာ ကော်မတီဝင်များမှအကြံပြုဆွေးနွေးကြပြီး နောက်ဝန်ကြီးမှ ဆက်လက်အကြံပြုနိဂုံးချုပ် စကားပြောကြားခဲ့ပါသည်။

           ၂၀၂၀ ပြည့်နှစ်၊ ဇန်နဝါရီလ ၈ ရက်နေ့တွင် တနင်္သာရီတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဒေသကြီးဦးစီးမှူးရုံးမှ ဝန်ထမ်းများသည် တိုင်းဒေသကြီး အစားအသောက်နှင့် ဆေးဝါးကွပ်ကဲရေးဦးစီးဌာန၊ စည်ပင်သာယာရေးအဖွဲ့၊ ကျန်းမာရေးဦးစီးဌာန၊ အထွေထွေအုပ်ချုပ်ရေးဦးစီးဌာန၊ တိုင်းရင်းဆေးပညာဦးစီးဌာန၊ စိုက်ပျိုးရေးဦးစီးဌာနတို့နှင့် ပူးပေါင်း၍ DDPC နှင့် အလှသစ် Shopping Centre ရှိ ဈေးဆိုင်များတွင် အများပြည်သူစားသုံး/သုံးစွဲရန် မသင့်သော အစားအသောက်များ ရောင်းချနေမှုမရှိ/မရှိ ရှောင်တခင်ကွင်းဆင်းစစ်ဆေးခဲ့ပါသည်။

          ထို့သို့ ကွင်းဆင်းစစ်ဆေးရာတွင် ထုတ်ကုန်လုံခြုံစိတ်ချရမှုရှိစေရန်၊ စားသုံးသူနှင့် လုပ်ငန်းရှင်တို့အကြား ဖြစ်ပွားတတ်သော အငြင်းပွားမှုအခြေအနေများ၊ ကုန်ပစ္စည်းများတွင် မြန်မာဘာသာနှင့် အခြားဘာသာတွဲလျက်ဖြစ်စေ ဖော်ပြရန်စသည်တို့ကို ဆွေးနွေးပြောကြားခဲ့ကြောင်း သတင်းရရှိပါသည်။

          စားသုံးသူကာကွယ်ရေးဥပဒေပါ ကုန်အညွှန်းအမှတ်အသား (Labelling) အကြောင်း ရှင်းလင်းဆွေးနွေးပွဲကို တောင်ကြီးမြို့ ကမ္ဘောဇကုန်သွယ်မှုဗဟိုဌာန အစည်းအဝေးခန်းမတွင် ဇန်နဝါရီလ (၉) ရက်နေ့ နံနံ (၉:၃၀) နာရီအချိန်က ကျင်းပပြုလုပ်ခဲ့ရာ ရှမ်းပြည်နယ်် လက်လီရောင်းချသူများအသင်း ဥက္ကဌ ဦးအောင်ဝင်းကြီးက အဖွင့်အမှာစကား ပြောကြားခဲ့ရာ၌ ယခုအခမ်းအနားကျင်းပရခြင်းသည် စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန၊ စားသုံးသူကာကွယ်ရေးဥပဒေပါ ကုန်အညွှန်းအမှတ်အသား(Labelling) အကြောင်း အသေအချာ သိရှိနားလည်စေရန် ရည်ရွယ်၍ ကျင်းပခြင်းဖြစ်တယ်လို့ ပြောကြားခဲ့ပါတယ်။

          ဆက်လက်၍ ရှမ်းပြည်နယ် စားသုံးသူရေးရာဦးစီးဌာန ပြည်နယ်ဦးစီးမှူး ဦးတင့်လွင်ဦးက စားသုံးသူ၏ အခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ၏ တာဝန်နှင့်တားမြစ်ချက်များ၊ ပြစ်မှုပြစ်ဒဏ်များ၊ အခန်း(၁၈) ပုဒ်မ(၄၁) ပါကုန်စည်တွင် ကုန်အညွှန်းအမှတ်အသား(Labelling) ပြည့်စုံမှန်ကန်စွာ ထည့်သွင်းဖော်ပြနိုင်ရန်အချက်များ၊ မြန်မာစာဖြင့်ထည့်သွင်းဖော်ပြရန် လိုအပ်သော အချက်များ၊ မြန်မာနိုင်ငံ စားသုံးသူကာကွယ်ရေးကော်မရှင်ကထုတ်ပြန်ထားသည့် ညွှန်ကြားချက်များ၊ လုပ်ငန်းရှင်များအနေဖြင့် ကုန်အညွှန်းအမှတ်အသားအချက်အလက်များ ထည့်သွင်းပြီးပါက ပြည့်စုံမှုရှိ/မရှိကို စစ်ဆေးပေးစေလိုပါက အခမဲ့ စစ်ဆေးပေးသွားမည် ဖြစ်ပါကြောင်းနှင့် ၂၀၁၉ စားသုံးသူကာကွယ်ရေး ဥပဒေအရ ၂၀၂၀ မတ်လ(၁၆) နောက်ပိုင်း ကုန်အညွှန်းအအမှတ်အသားပြည့်စုံမှုမရှိသော ကုန်စည်များကို အရေးယူဆောင်ရွက်မှုများပြုလုပ် ရမည် ဖြစ်ပါကြောင်းရှင်းလင်းဆွေးနွေးပါတယ်။

          ထို့နောက် အစားအသောက်နှင့်ဆေးဝါးကွပ်ကဲရေးဦးစီးဌာနမှ ဒေါက်တာအောင်စိုးမင်းက အမျိုးသား အစားအသောက် ဥပဒေကို ရှင်းလင်းဆွေးနွေးခဲ့အပြီးတွင် မေးမြန်းမှုများကို အပြန်အလှန် ဆွေးနွေးကြပါတယ်။

          အခမ်းအနားအပြီးတွင် စီးပွားရေးလုပ်ငန်းရှင်များ၏ အစားအသောက်နှင့် လူသုံးကုန် ပစ္စည်းများထုတ်လုပ်ပြီးဈေးကွက်အတွင်းဖြန့်ချီထားသော နမူနာပစ္စည်းများကို တက်ရောက်လာသူ များက ကြည့်ရှုလေ့လာခဲ့ကြပြီး စားသုံးသူကာကွယ်ရေးလက်ကမ်းစာစောင်များကို ဖြန့်ဝေပေး ခဲ့ကြပါတယ်။ အခမ်းအနားသို့ တောင်ကြီးမြို့ပေါ်မှ လက်လီရောင်းသူများနှင့် စီးပွားရေးလုပ်ငန်းရှင် (၁၈၀)ဦးခန့်တက်ရောက်ခဲ့ကြတယ်လို့ သတင်းရရှိပါသည်။

(စောမောင်)

ဦးစီးအရာရှိ

            စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဉီးစီးဌာန၊ ရန်ကုန်တိုင်းဒေသ ကြီး၊ မြောက်ပိုင်းခရိုင်ဉီးစီးမှူးရုံးမှ ဝန်ထမ်းများသည် နိုဝင်ဘာလ (၂၂)ရက်နေ့တွင် အင်းစိန်မြို့နယ် အတွင်းရှိ ပုဂ္ဂလိကဘဏ်များဖြစ်သည့် ဧရာ၀တီဘဏ်နှင့် မြန်မာ့ရှေ့ဆောင်ဘဏ်များသို့ စားသုံးသူ ကာကွယ်ပေးရေးဆိုင်ရာ အသိပညာပေးဟောပြောပွဲများ ကျင်းပခဲ့သည်။

            ရှေ့ဉီးစွာ အင်းစိန်မြို့နယ် ဧရာ၀တီဘဏ်တွင် စားသုံးသူကာကွယ်ရေးဆိုင်ရာ အသိပညာပေး ဟောပြောပွဲကျင်းပခဲ့ရာ မြောက်ပိုင်းခရိုင်ဉီးစီးမှူးရုံးမှ ဒုတိယခရိုင်ဉီးစီးမှူး ဒေါ်ထားထားလှိုင်က စားသုံး သူကာကွယ်ရေးဥပဒေ (၂၀၁၉)ပြဌာန်းချက်ပါ ရည်ရွယ်ချက်၊ ကုန်စည်/ဝန်ဆောင်မှု၏ အဓိပ္ပါယ်ဖော်ပြ ချက် စားသုံးသူ၏အခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏တာဝန်များ၊ စီးပွားရေးလုပ်ငန်း ရှင်က ဝန်ဆောင်မှုနှင့်စပ်လျဉ်း၍ အာမခံချက်များတွင် ဖော်ပြရမည့်အချက်အလက်များ၊ ဝန်ဆောင်မှု လုပ်ငန်းနှင့် စပ်လျဉ်း၍ စားသုံးသူက တောင်းဆိုနိုင်သည့်အခွင့်အရေးများ၊ ကုန်စည်/ဝန်ဆောင်မှုနှင့် စပ်လျဉ်း၍ စားသုံးသူများ၏ တိုင်ကြားခဲ့မှုများအပေါ် ဖြေရှင်းဆောင်ရွက်ပေးသည့်ဖြစ်စဉ်များ ယခုအခါ တွင် ငွေကြေးဝန်ဆောင်မှုနှင့်ပတ်သက်၍ ပုဂ္ဂလိကဘဏ်များသည် ကြော်ငြာပါအချက်များနှင့်အညီ ဝန်ဆောင်မှု မရှိခြင်း၊ ငွေကြေးများ မှားယွင်းဖြတ်တောက်ခြင်း၊ Account တစ်ခုမှ အခြားAccountတစ်ခုသို့ ငွေလွှဲပြောင်းသော်လည်း စာရင်းရောက်ရှိလာမှုမရှိခြင်း၊ Call Center များအနေဖြင့် စားသုံးသူများအပေါ် မလေးစားပြောဆိုမှု၊ ဖြေရှင်းပေးမှုမရှိခြင်း၊ ဗဟိုဘဏ်၏ညွှန်ကြားမှုများ မရှိဘဲ ဒေါ်လာအကြွေများ ထည့်သွင်းပေးအပ်သည့်အတွက် တိုင်ကြားလာခြင်းများရှိသည့်အတွက် လာရောက်ဟောပြောခြင်း ဖြစ်ကြောင်း၊ ပုဂ္ဂလိကဘဏ်များအနေဖြင့် စားသုံးသူ၏လိုအပ်ချက်များကို လေးစားစွာဝန်ဆောင်မှု ပေးစေလိုကြောင်း၊ ယခုဟောပြောချက်များကို ဂရုပြုဆောင်ရွက်ပြီး ဆင့်ပွားအသိပညာပေး စေလိုကြောင်း၊ ဘဏ်ဝန်ထမ်းများကလည်း ကုန်စည်/ဝန်ဆောင်မှုများနှင့်ပတ်သက်၍ နစ်နာဆုံးရှုံးမှုများရှိပါကလည်း မိမိတို့၏ဌာနကို အထောက်အထားပြည့်စုံစွာဖြင့် တိုင်ကြားနိုင်ပါကြောင်း ဆွေးနွေးခဲ့သည်။

            ဆက်လက်၍ မြန်မာ့ရှေ့ဆောင်ဘဏ်သို့လည်း ဟောပြောဆွေးနွေးခဲ့သည်၊ ဟောပြောပွဲသို့ ဧရာဝတီဘဏ်မှ မန်နေဂျာ (၁)ဉီး၊ ဝန်ထမ်း(၂၁)ဉီး၊ မြန်မာ့ရှေ့ဆောင်ဘဏ်က မန်နေဂျာ(၁)ဉီး၊ ဝန်ထမ်း (၉)ဉီးတက်ရောက်ခဲ့ပြီး လက်ကမ်းစာစောင်များ ဖြန့်ဝေပေးခဲ့သည်။

            အလားတူ တိုက်ကြီးမြို့နယ်အတွင်းရှိ ပုဂ္ဂလိကဘဏ်များဖြစ်သည့် ကမ္ဘောဇဘဏ်၊ ဧရာ၀တီ ဘဏ်၊ မြဝတီဘဏ်၊ CB ဘဏ် စုစုပေါင်း (၄)ဘဏ်နှင့် အင်းစိန်မြို့နယ်အတွင်းရှိ CB ဘဏ်သို့လည်း စားသုံးသူကာကွယ်ရေးဥပဒေ(၂၀၁၉)ပါ ပြဌာန်းချက်များကို အသိပညာပေးဟောပြောခဲ့သည်။

            အလားတူ အသိပညာပေးဟောပြောပွဲကို နိုဝင်ဘာ (၂၇)ရက်တွင် အင်းစိန်မြို့နယ်အတွင်းရှိ ပုဂ္ဂလိဘဏ်ဖြစ်သည့် ကမ္ဘော့ဇဘဏ်နှင့် လှည်းကူးမြို့နယ်ရှိ CB ဘဏ်၊ ဧရာ၀တီဘဏ်များသို့ စားသုံးသူ ကာကွယ်ရေးဆိုင်ရာ အသိပညာပေးဟောပြောပွဲကျင်းပခဲ့ရာ မြောက်ပိုင်းခရိုင်ဉီးစီးမှူးရုံးမှ ဒုတိယ ဉီးစီးမှူး ဒေါ်နီလာဉီးက ဆွေးနွေးခဲ့သည်။

နီလာဉီး

(ရန်ကုန်)