သတင်းနှင့် လှုပ်ရှားမှုများ

             စားသုံးသူရေးရာဦးစီးဌာန၊ ကယားပြည်နယ်ဦးစီးမှူးရုံးအနေဖြင့် ဝန်ထမ်းများ လူ့ စွမ်းအားအရင်းအမြစ်များ ဖွံ့ဖြိုးတိုးတက်စေရေး၊ ဦးစီးဌာန၏ မျှော်မှန်းချက် (Vision)၊ ရည်မှန်း ချက် (Mission) များကို အောင်မြင်စွာ အကောင်အထည်ဖော်နိုင်ရေး ရည်ရွယ်၍ ဝန်ထမ်းစွမ်းဆောင်ရည်မြှင့်တင်ရေးသင်တန်း(၁/၂၀၂၂)ကို ပြည်နယ်ဦးစီးမှူးရုံး အစည်းအဝေးခန်းမ၌ ၂၀၂၂ ခုနှစ်၊ ဇွန် လ (၆)ရက်နေ့မှ (၁၀)ရက်နေ့အထိ နေ့စဉ် နံနက်(၁၁:၀၀)နာရီမှ ညနေ (၁၂:၀၀)နာရီ အထိလည်း ကောင်း၊ ညနေ (၁၅:၀၀)နာရီမှ ညနေ (၁၆:၀၀)နာရီအထိ သင်ခန်းစာပို့ချပြီး (၅)ရက် တာသင်တန်းဖွင့်လှစ်ဆောင်ရွက်ခဲ့ပြီး သင်တန်းသားဦးရေ စုစုပေါင်း(၁၂)ဦး တက်ရောက်ခဲ့ပါသည်။

          အဆိုပါသင်တန်းတွင် စားသုံးသူရေးရာဦးစီးဌာန၊ ပြည်နယ်ဦးစီးမှူး ဦးမြင့်အောင်က အဖွင့် အမှာစကားပြောကြားရာတွင် လက်ရှိတာဝန်ထမ်းဆောင်နေသော ဝန်ထမ်းများနှင့် အသစ်ခန့်ထားသော ဝန်ထမ်းများအနေဖြင့် ယခုဖွင့်လှစ်တဲ့ ဝန်ထမ်းစွမ်းဆောင်ရည်မြှင့်တင်ရေးသင်တန်းမှာ  ဝန်ထမ်းများ၏အရည်အသွေးတိုးတက်စေဖို့ဖြစ်ပြီး သင်တန်းမှာပို့ချသော သင်ခန်းစာများမှာ လက်တွေ့လုပ်ငန်းခွင် ဆောင်ရွက်ရာတွင် များစွာအထောက်အကူ ဖြစ်စေမှာဖြစ်ကြောင်း၊ မိမိကိုယ်ကို တိုးတက်အောင် တစိုက်မတ်မတ် လေ့လာသွားရမည်ဖြစ်ကြောင်း၊ ဘာသာရပ်ဆိုင်ရာ သင်တန်း ဆရာများ၏ ပို့ချသော သင်ခန်းစာများကို ဂရုတစိုက် သင်ယူကြရန်လိုကြောင်း၊ ဝန်ထမ်းစည်းမျဉ်း /စည်းကမ်းများနှင့်အညီ နေထိုင်ကြရန်နှင့် ဝန်ထမ်းကောင်းများဖြစ်အောင် ကြိုးစားသင်ယူစေလိုကြောင်း ပြောကြားခဲ့ပါသည်။

          သင်တန်းတွင် ကယားပြည်နယ်ဦးစီးမှူးရုံးရှိ ပြည်နယ်ဦးစီးမှူး ဦးမြင့်အောင်မှ ရုံးလုပ်ငန်း လက်စွဲဘာသာရပ်၊ ဒေါ်မြို့ရီ(ဦးစီးအရာရှိ)မှ စီမံရေးရာဌာနခွဲဘာသာရပ်၊ နိုင်ငံဝန်ထမ်းဥပဒေ ဘာသာရပ်၊ သတင်းအချက်အလက်နည်းပညာနှင့်အရည်အသွေးစီမံခန့်ခွဲရေးဌာနခွဲ ဘာသာရပ်၊ စားသုံးသူရေးရာဌာနခွဲဘာသာရပ်၊ ထုတ်ကုန်လုံခြုံစိတ်ချရမှုဌာနခွဲဘာသာရပ်၊ ဒေါ်သစ္စာဖူး( ဦးစီးမှူး )မှ ငွေစာရင်းဌာနခွဲဘာသာရပ်၊ ပြည်တွင်းကုန်သွယ်ရေးဖွံ့ဖြိုးမှုနှင့် သုတေသနဌာနခွဲဘာသာရပ်နှင့် မူဝါဒလေ့လာရေးနှင့်စီမံကိန်းစာရင်းအင်းဌာနခွဲဘာသာရပ်များ အသီးသီးပို့ချခဲ့ပြီး၊ ဇွန်လ (၁၀)ရက် နေ့၊ ညနေ(၁၆:၀၀)နာရီအချိန်တွင် သင်တန်းပြီးဆုံး၍ သင်တန်းဆင်းပွဲ အခမ်းအနားတွင် ပြည်နယ်ဦးစီးမှူးက နိဂုံးချုပ်အမှာစကား ပြောကြားခဲ့ပြီး ဝန်ထမ်းစွမ်းဆောင်ရည်မြှင့်တင်ရေးသင်တန်းကို ပြီးမြောက်အောင်မြင်အောင် ဆောင်ရွက်နိုင်ခဲ့ကြောင်း၊ ဝန်ထမ်းများအနေဖြင့် (၅)ရက်တာ တက်ရောက်ခဲ့သော ဝန်ထမ်းစွမ်းဆောင်ရည်မြှင့်တင်ရေးသင်တန်းမှ ဌာနခွဲအလိုက်ပို့ချသော သင်ခန်းစာများမှ သိသင့်သိထိုက်သည်များ သိရှိရပြီး လုပ်ငန်းများဆောင်ရွက်ရာတွင် အထောက်အကူပြုသည့် သင်ခန်းစာများရရှိကြောင်း သိရှိရပါသည်။

DOCA(ကယား)

            စားသုံးသူရေးရာဦးစီးဌာန၊စစ်ကိုင်းတိုင်းဒေသကြီး၊ မုံရွာခရိုင်ဦးစီးမှူးရုံးမှ ခရိုင်ဦးစီးမှူးနှင့် ဝန်ထမ်းများသည် ဇွန်လ (၈) ရက်နေ့တွင် မုံရွာမြို့၊ ကွေ့ကြီးရပ်ကွက်ရှိ “သိန်းသန်းစိုး” ယိုစုံလုပ်ငန်းရှင်နှင့် တွေ့ဆုံ၍ စားသုံးသူကာကွယ်ရေးဥပဒေ(၂၀၁၉)၊ အခန်း(၁၈)အရ ကုန်အညွှန်းအမှတ်အသားဆိုင်ရာ ပြဋ္ဌာန်းချက်များနှင့် ပတ်သက်၍စီးပွားရေးလုပ်ငန်းရှင်များ သိရှိလိုက်နာဆောင်ရွက်နိုင်စေရန်အတွက် အသိပညာပေးဆွေးနွေးခဲ့ပါသည်။

       ထိုသို့တွေ့ဆုံဆွေးနွေးရာတွင် မုံရွာခရိုင်ဦးစီးမှူးက စားသုံးသူကာကွယ်ရေးဥပဒေပါ စားသုံးသူ၏အခွင့်အရေးနှင့် တာဝန်များ၊ စီးပွားရေးလုပ်ငန်းရှင်၏ တာဝန်များ၊ ကုန်အညွှန်းအမှတ်အသားဖော်ပြခြင်း၊ ပြစ်မှုပြစ်ဒဏ်များ၊ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းနှင့် ပတ်သက်၍ ပုဒ်မ၄၁။ (ခ) နှင့်(ဆ) တို့တွင်ဖော်ပြထားသည့် ကုန်စည်၏အမျိုးအမည်၊ အရွယ်အစား၊ အရေအတွက်နှင့် အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ကျန်းမာ‌ရေး ဆိုင်ရာဘေးထွက်ဆိုးကျိုး သို့မဟုတ် ဓာတ်မတည့်ကြောင်းဖော်ပြချက်နှင့် ကြိုတင်သတိပေးချက် တို့ကို မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု သို့မဟုတ် တစ်ခုထက်ပို၍ ဖြစ်စေ၊ ရေးသားဖော်ပြရမည်ဖြစ်ကြောင်း၊ ကုန်အညွန်းအမှတ်အသားနှင့် ပတ်သက်၍ ဌာန အတည်ပြုချက်ရယူလိုသည့် လုပ်ငန်းရှင်များရှိပါက မိမိတို့ဌာနမှ ဆောင်ရွက်ပေးနေကြောင်း တဆင့်စကားပါးစေလိုကြောင်း၊ တိုင်းဒေသကြီး စားသုံးသူရေးရာကော်မတီ(၅/၂၀၂၂)ကြိမ်မြောက် အစည်းအဝေးမှ ကုန်စည်များကို ဦးစားပေးကုန်စည် သတ်မှတ်၍ ကုန်အညွန်းအမှတ်အသား ပြည့်စုံနိုင်ရေး ဆောင်ရွက်သွားမည်ဖြစ်ကြောင်းကိုလည်း  အသိပညာပေးဆွေးနွေးခဲ့ပါသည်။

          “သိန်းသန်းစိုး” ယိုမျိုးစုံလုပ်ငန်းကို အမျိုးသမီးအလုပ်သမားဦးရေ(၁၅)ဦးဖြင့် လည်ပတ်ဆောင်ရွက်နေ‌ကြောင်း၊ ယိုစုံပြုလုပ်ရာတွင်အသုံးပြုသော ဇီးသီးကုန်ကြမ်းကို  ယင်းမာပင်ခရိုင်နှင့် မုံရွာခရိုင်ရှိ ဇီးစိုက်တောင်သူများထံမှ ဝယ်ယူပြီး သံပုရာကုန်ကြမ်းကို မုံရွာမြို့ပေါ်ရှိ သီးနှံပွဲရုံများမှ ဝယ်ယူအသုံးပြုကြောင်း၊ ထွက်ရှိသော ကုန်ချောယိုစုံများကို စစ်ကိုင်းတိုင်းအထက်ပိုင်း၊ ခင်ဦးနှင့် ရေဦးမြို့နယ်များ၊ မြို့ပေါ်ဈေးဆိုင်များသို့ ဖြန့်ဖြူးရောင်းချပါကြောင်း၊ ယိုစုံများ၏(၁)ထုပ်တန်ဖိုးမှာ လက်ကားဈေး (၃၅)ကျပ်-လက်လီဈေး(၄၀)ကျပ်ဖြစ်ပြီး စားသုံးသူအရောက်(၅၀)ကျပ်ဖြစ်ကာ ကျောင်းဖွင့်ရာသီဖြစ်၍ အဆင်ပြေနေကြောင်း၊ (၁)ရက်လျှင် ဇီးသီးယို(အစို) (၁၀၀၀)ထုပ်၊ အခြောက် (၂၅၀)ထုပ်နှင့် သံပုရာ (၂၅၀)ထုပ် ပြုလုပ်ရောင်းချလျှက်ိကြောင်း သိရှိရပါသည်။

DOCA(စစ်ကိုင်း)

           စားသုံးသူရေးရာဦးစီးဌာန၊ စစ်ကိုင်းတိုင်း‌ဒေသကြီး၊ စစ်ကိုင်းခရိုင်ဦးစီးမှူးဦးဆောင်၍ ဒု-ခရိုင်ဦးစီးမှူးနှင့် ဝန်ထမ်း (၂)ဦးတို့သည် ဈေးကွက်အတွင်း ထုတ်ကုန်လုံခြုံစိတ်ချရမှုရှိစေရန် ရည်ရွယ်၍ မြို့နယ်စီမံအုပ်ချုပ်ရေးအဖွဲ့၊ ခရိုင်ကျန်းမာရေး၊ မြို့နယ်စည်ပင်သာယာရေးအဖွဲ့တို့နှင့် အတူ ဇွန်လ ၇ ရက်နေ့တွင် စစ်ကိုင်းမြို့ပေါ်ရှိ ဆေးဆိုင်များအား  ဈေးကွက်စောင့်ကြည့် စစ်ဆေးခဲ့သည်။ 

          Bella Plus Plasterသည် ထုတ်လုပ်သည့်နိုင်ငံ၊ ထုတ်လုပ်သည့်ကုမ္ပဏီ၊ တင်သွင်းသည့်ကုမ္ပဏီ၊ ဆေးဝါးမှတ်ပုံတင်အမှတ်နှင့် Import Registration No.(IR) များ ဖော်ပြထားခြင်းမရှိဘဲ ဈေးကွက်အတွင်း ရောင်းချလျက်ရှိသောကြောင့် တရားဝင်တင်သွင်းရောင်းချနေသည့် ကုမ္ပဏီများ အနေဖြင့် အကျိုးစီးပွားထိခိုက်နစ်နာမှုများကြုံတွေ့နေရ၍ ဥပဒေနှင့်အညီ စိစစ်အရေးယူရန် အကြောင်းကြားလာပါသဖြင့် စစ်ကိုင်းမြို့ပေါ်ရှိ ဆေးဆိုင်များအား ကွင်းဆင်း၍ ဈေးကွက် စောင့်ကြည့်စစ်ဆေးခဲ့ရာ တရားဝင် မှတ်ပုံတင်ထားခြင်းမရှိသည့် Bella Plus Plasterအား ရောင်းချ မှုမရှိကြောင်း စိစစ်တွေ့ရှိရ၍  ခရိုင်ဦးစီးမှူးက ရောင်းချသည့်ဆေးဆိုင်ပိုင်ရှင်များအား တရားဝင် မှတ်ပုံတင်ထားသည့် လူသုံးကုန်နှင့် အိမ်သုံးဆေးဝါးများကိုသာ ရောင်းချရန် အသိပညာပေး ဆွေးနွေးခဲ့ကြောင်း သတင်းရရှိပါသည်။

DOCA(စစ်ကိုင်း)       

          စားသုံးသူရေးရာဦးစီးဌာန၊ ကရင်ပြည်နယ်ဦးစီးမှူးရုံးမှ ဦးစီးအရာရှိ ဦးမျိုးဝင်းနိုင်နှင့် ဝန်ထမ်းများသည် မိတ်ဖက်ဌာနများဖြစ်သော အစားအသောက်နှင့် ဆေးဝါးကွပ်ကဲရေးဦးစီးဌာန၊ အ‌ထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့၊ မြန်မာနိုင်ငံရဲတပ်ဖွဲ့ နှင့် သက်ဆိုင်ရာ ရပ်/ကျေးအဖွဲ့ဝင်များနှင့် ပူးပေါင်း၍ ၉-၆-၂၀၂၂ ရက်နေ့၊ နံနက် (၀၉:၀၀ )နာရီအချိန်တွင် အစားအသောက်နှင့်ဆေးဝါးကွပ်ကဲရေးဦးစီးဌာနမှ ထုတ်ပြန်ထားသော စားသုံးရန်မသင့်သည့် အေးခဲအသားချောင်းထုပ်များ ဈေးကွက်အတွင်း ရောင်းချမှု ရှိ/ မရှိကို ဘားအံမြို့ရှိ အမှတ်(၁) စံပြဈေးတွင် ကွင်းဆင်းစစ်ဆေးဆောင်ရွက်ခဲ့ကြောင်း သိရသည်။

         ထိုသို့ ကွင်းဆင်းစစ်ဆေးဆောင်ရွက်ရာတွင် ဈေးကွက်အတွင်း စားသုံးရန်မသင့်သည့် အေးခဲအသားချောင်းထုပ်များ ရောင်းချဖြန့်ဖြူးနေကြောင်း စစ်ဆေးတွေ့ရှိရပါသည်။ ထို့ကြောင့် အစားအသောက်နှင့်ဆေးဝါးကွပ်ကဲရေးဦးစီးဌာနမှ ဒေါ်မေသူနွယ်က ရောင်းချနေလျက်ရှိသော  စားသုံးရန်မသင့်သည့် အေးခဲအသားချောင်းထုပ်များကို ထပ်မံရောင်းချခြင်း မပြုရန် ဝန်ခံကတိ လက်မှတ်ရေးထိုးစေခဲ့ပြီး ရှောင်တခင်စစ်ဆေးချိန်တွင် တွေ့ရှိခဲ့သည့် အသားချောင်းထုပ်များကို သိမ်းဆည်းခဲ့ပါသည်။ သိမ်းဆည်းရမိသော အေးခဲအသားချောင်းထုပ်များဖြစ်သည့် 7Star (ဘဲဥအတု)၊ Super Pork (ဝက်ဥချောင်း)၊ UF (BBQ Shrimp)၊  SV (ရေညှိအသားချောင်း)၊ Thai Star (အနီရောင်ဟော့ဒေါ့)၊ ကြက်ဖပုံ (အနီရောင်အသားချောင်း) စုစုပေါင်းအမျိုးအစား(၆)မျိုးကို မိတ်ဖက်ဌာနများနှင့်ပူးပေါင်း၍ ဈေးအတွင်းရှိ စွန့်ပစ်ပစ္စည်းများ ထားရှိသည့်နေရာတွင် စနစ်တကျ မီးရှို့ဖျက်ဆီးခဲ့ကြောင်း သိရှိရပါသည်။

DOCA(ကရင်)

             စားသုံးသူရေးရာဦးစီးဌာန၊ရခိုင်ပြည်နယ်၊ မြောက်ဦးခရိုင် ၊ကျောက်တော်မြို့နယ် ၊ မြို့နယ်တာဝန်ခံ ဦးလှမောင် (ဦးစီးမှူး)နှင့် ဝန်ထမ်းများသည် ကျောက်တော်မြို့နယ်အထွေထွေအုပ်ချုပ်ရေးဦးစီးဌာန၊ မြန်မာနိုင်ငံရဲတပ်ဖွဲ့၊ စည်ပင်သာယာရေးအဖွဲ့၊ ကျန်မာရေးဦးစီးဌာနတို့နှင့် ပူးပေါင်း၍ (၉-၆-၂၀၂၂)ရက်နေ့ နေ့လည်(၁၀:၀၀)ခန့်အချိန်တွင် ကျောက်တော်မြို့မဈေးအတွင်းသို့ သွားရောက်၍ ဈေးအတွင်းရောင်းချနေသော စားသောက်ကုန်/အလှကုန်ပစ္စည်းများအား စားသုံးသူများ ဘေးအန္တရာယ်ကင်းရှင်းစွာ သုံးစွဲနိုင်ရေးနှင့် ကုန်စည်များတွင်ဖော်ပြရမည့် ကုန်အညွှန်းအမှတ်အသားများ ပြည့်စုံစွာပါဝင်မှုရှိ/မရှိ ကုန်ပစ္စည်းအရောင်းဆိုင်များသို့ ဈေးကွက် စောင့်ကြည့်စစ်ဆေးခြင်းများ ဆောင်ရွက်ခဲ့ပါသည်။

           ထိုသို့စစ်ဆေးဆောင်ရွက်ရာတွင် မြို့နယ်တာဝန်ခံ ဦးလှမောင် (ဦးစီးမှူး)မှ ဈေးဆိုင်ပိုင်ရှင်များအား ရောင်းချနေသောကုန်စည်များသည် ဝယ်ယူစားသုံးသူ မိဘပြည်သူများအား ဘေးဉပါဒ်မဖြစ်စေရန် အလွန်အရေးကြီးပါကြောင်း ဤကဲ့သို့ ဘေးဉပါဒ်မဖြစ်စေရေးအတွက် မိမိတို့နိုင်ငံမှ သက်ဆိုင်ရာဌာနများ၏ ထောက်ခံချက်ပါရှိမှု ကုန်အညွှန်းအမှတ်အသားများကို မြန်မာဘာသာဖြင့်(သို့) မြန်မာဘာသာနှင့်အခြားဘာသာတွဲလျှက် ဖော်ပြထားသော ကုန်ပစ္စည်းများကို ဦးစားပေးရောင်းချရန်လိုအပ်ပါကြောင်း စားသုံးသူရေးရာဦးစီးဌာန၏ ၂၀၁၉ စားသုံးသူကာကွယ်ရေးဉပဒေအရ မည်သည့်စီးပွားရေးလုပ်ငန်းရှင်မဆို  ကုန်ပစ္စည်းများတွင် ကုန်အညွှန်းအမှတ်အသားဖော်ပြခြင်းနှင့် စပ်လျဉ်း၍  ကုန်စည်အမျိုးအစားအလိုက် သက်မှတ်ချက်များနှင့်အညီ ဖော်ပြရန်လိုအပ်ပြီး မြန်မာဘာသာ(သို့) မြန်မာဘာသာနှင့်အခြားဘာသာတွဲလျှက် ဖော်ပြရမည့်ဖြစ်သည့်အတွက် ရောင်းချသည့် ဈေးဆိုင်လုပ်ငန်းရှင်များအနေဖြင့် စားသုံးသူကာကွယ်ရေးဉပဒေပါ ပြဌာန်းချက်များအား လိုက်နာဆောင်ရွက်ရန်လိုအပ်ပါကြောင်း အသိပညာပေးပြောကြားပြီး ဈေးကွက်စောင့်ကြည်စစ်ဆေးခြင်း ဆောင်ရွက်ခဲ့ပါကြောင်း သတင်းရရှိပါသည်။

DOCA(ရခိုင်)