သတင်းနှင့် လှုပ်ရှားမှုများ

           မွန်ပြည်နယ်၊ ဆန်စက်လုပ်ငန်းရှင်များအသင်း ၂၀၂၂-၂၀၂၅ ခုနှစ်၊ နှစ်ပတ်လည်အသင်း စုံညီနှင့် အမှုဆောင်သစ်ရွေးချယ်တင်မြှောက်ပွဲအခမ်းအနားကို ၇.၆.၂၀၂၂ ရက် (၁၀:၀၀) နာရီချိန်တွင် စားသုံးသူရေးရာဦးစီးဌာန၊ မွန်ပြည်နယ်၊ ပြည်နယ်ဦးစီးမှူးရုံး၌ ကျင်းပပြုလုပ်ခဲ့ရာ မွန်ပြည်နယ် ဆန်စက်လုပ်ငန်းရှင်အသင်း နာယက၊ ဥက္ကဌ၊ ပြည်နယ်စားသုံးသူရေးရာဦးစီးဌာန ၊ပြည်နယ်ဦးစီးမှူးနှင့် ဆန်စက်လုပ်ငန်းရှင်များ စုစုပေါင်း (၆၂) ဦးတက်ရောက်ခဲ့ကြောင်း သိရှိရသည်။

          အဆိုပါ အခမ်းအနားတွင် မွန်ပြည်နယ်ဆန်စက်လုပ်ငန်းရှင်များအသင်း နာယက ဦးစိုးသန်းအေးက အဖွင့်အမှာစကားပြောကြားရာတွင် ဆန်စက်လုပ်ငန်းရှင်များအသင်းဖွဲ့စည်းရခြင်း ရည်ရွယ်ချက်အား ရှင်းလင်းပြောကြားခဲ့ပါသည်။ ဆက်လက်၍ စားသုံးသူရေးရာဦးစီးဌာန၊ မွန်ပြည်နယ်ဦးစီးမှူး ဦးဝင်းထွန်းက မိမိတို့အနေဖြင့် အသင်းအဖွဲ့များ တိုးတက်အောင် ကူညီဆောင်ရွက်ပေးလျက်ရှိကြောင်း၊ မွန်ပြည်နယ်ဆန်စက်လုပ်ငန်းရှင်များအသင်း တိုးတက်အောင် မိမိတို့ဌာနအနေဖြင့် လိုအပ်သည်များကို ကူညီဆောင်ရွက်ပေးမည်ဖြစ်ကြောင်း ဆွေးနွေးခဲ့ပါသည်။

          ထို့ပြင် ပြည်နယ်အထွေထွေအုပ်ချုပ်ရေးဦးစီးဌာန၊ လက်ထောက်ညွှန်ကြားရေးမှူး ဦးစိုးလွင် က မွန်ပြည်နယ်ဆန်စက်လုပ်ငန်းရှင်များအသင်း ဖွဲ့စည်းခြင်းနှင့်စပ်လျဉ်း၍ ဆွေးနွေးခဲ့ပြီး  မွန်ပြည်နယ်ဆန်စက်လုပ်ငန်းရှင်အသင်း ဥက္ကဌဟောင်း ဦးခိုင်ဦး ကော်မတီရွေးချယ် တင်မြှောက်ခြင်းသည် ၂၀၂၂-၂၀၂၅ သက်တမ်းအတွက် ရွေးချယ်တင်မြှောက်ခြင်းဖြစ်ကြောင်း၊ ကော်မတီဝင်များအား မိမိတို့ဆန္ဒအလျောက် အဆိုပြုနိုင်ကြောင်း ရှင်းလင်းဆွေးနွေးခဲ့ပါသည်။

          ထို့နောက် ၂၀၂၂-၂၀၂၅ သက်တမ်းအတွက် အမှုဆောင်သစ်များအား ရွေးချယ်တင်မြှောက်ကြရာ ဥက္ကဌ၊ ဒု-ဥက္ကဌ၊ အတွင်းရေးမှူး၊ တွဲဖက်အတွင်းရေးမှူး၊ ဘဏ္ဍာရေးမှူး၊ စာရင်းစစ်များ၊ အဖွဲ့ဝင်များအား အသီးသီးရွေးချယ်တင်မြှောက်ခဲ့ကြပြီး မွန်ပြည်နယ် ဆန်စက်လုပ်ငန်းရှင်အသင်းအား အဖွဲ့ဝင် (၂၃) ဦးဖြင့် ဖွဲ့စည်းခဲ့ကြကြောင်း သတင်းရရှိပါသည်။

DOCA(မွန်)

           ရှမ်းပြည်နယ်(တောင်ပိုင်း)တွင် အစေ့ထုတ်ပြောင်းများ စတင်စိုက်ပျိုးလျက်ရှိကြောင်း ပြောင်းစိုက်တောင်သူထံက သိရသည်။ အစေ့ထုတ်ပြောင်းသည် ရောင်းချရာတွင် မိသားစုဝင်ငွေ ပိုမိုရရှိစေ၍ တောင်သူများအတွက် အကျိုးပြုသည့် သီးနှံဖြစ်သောကြောင်း မိုးအစေ့ထုတ်ပြောင်းများကို ရှမ်းတောင်တွင် မိုးသီးနှံအဖြစ် စိုက်ပျိုးကြခြင်းဖြစ်ကြောင်း သိရသည်။

          မိုးသီးနှံပြောင်းစိုက်ပျိုးရာတွင် တစ်ဧကလျှင် ပြောင်းစေ့ ၄ ပြည်စိုက်ရပြီး မျိုးစရိတ်၊ မြေပြင်ခြင်း၊ အလုပ်သမား၊ မြေဩဇာ၊ ပိုးသတ်ဆေးဖိုးများ အပါအဝင် စုစုပေါင်းကုန်ကျငွေ ကျပ် ၃၂၀၀၀၀ ခန့် ကုန်ကျကြောင်း သိရသည်။

          တောင်သူများ စိုက်ပျိုးသည့် အစေ့ထုတ်ပြောင်းများမှာ CP-808၊ CP-092၊ CP-888၊ CP-222၊ CP-621၊ CP-625၊ CP-333၊ SD-5059 မျိုးများဖြစ်ပြီး ဖူးတံရှည်ကာ အဖူးလုံသည့်အတွက် မိုးရာသီတွင် စိုက်ပျိုးပါက မိုးဒဏ်ခံနိုင်ပြီး အထွက်နှုန်း ပိုမိုကောင်းမွန်သဖြင့် တောင်သူများ အများဆုံးရွေးချယ် စိုက်ပျိုးကြကြောင်း သိရသည်။

          အစေ့ထုတ်ပြောင်း စိုက်ပျိုးရာတွင် ပင်ကြားတန်းကြား အကွာ ၁ ပေ မှ ၂ ပေ အကွာကြား စိုက်ပျိုးကြပြီး ကွန်ပေါင်းဓာတ်မြေဩဇာကို တစ်သီးလျှင် ၂ ကြိမ်ကျွေးသည့်အတွက် ပြောင်းအထွက်နှုန်းမှာ ပို၍ကောင်းမွန်ကြောင်း သိရသည်။

         ပြောင်းစိုက်ပျိုးရာတွင် ဒေသအလိုက် သင့်လျော်သော အထွက်ကောင်းမျိုးများရွေးချယ် စိုက်ပျိုးကြရာ မိုးရာသီတွင် မေလမှ ဇွန်လ လကုန်ထိ စိုက်ပျိုးကြသည်။ အဆိုပါ အစေ့ထုတ်ပြောင်းများကို ရှမ်းပြည်နယ် (တောင်ပိုင်း)တွင် တောင်ကြီး၊ ရပ်စောက်၊ ဆီဆိုင်၊ နမ့်စန်မြို့နယ်တွင် အများဆုံး စိုက်ပျိုးပြီး မိုးအစေ့ထုတ်ပြောင်းများ ထွက်ရှိပါက ခူးဆွတ်ရောင်းချချိန်တွင် ဈေးကောင်းရရှိရန် ဒေသခံတောင်သူများ မျှော်လင့်လျက်ရှိကြောင်း သိရသည်။

DOCA(ရှမ်း)

            ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဖျာပုံခရိုင်ဦးစီးမှူးနှင့် မြို့နယ်တာဝန်ခံတို့သည်ခရိုင်စက်မှု ကြီးကြပ်ရေးဦးစီးဌာနတို့နှင့်  အတူ    ဇွန်လ ( ၂ ) ရက် နေ့တွ် ဖျာပုံမြို့ အောက််ကွင်းကျေးရွာရှိ ရွှေကောင်းစံဆီစက် တည်ဆောက်ထားမှုနှင့် ကြိတ်ခွဲထုတ်လုပ်နိုင်မှု၊ ဈေးနှုန်းဈေးကွက်အခြေအနေများ MSMEs လုပ်ငန်းများ ဖွံ့ဖြိုးတိုးတက်စေရေးအတွက် ကွင်းဆင်းအသိပညာပေးခြင်းများ ဆောင်ရွက်ခဲ့ကြောင်း သိရသည်။

          အဆိုပါ ဆီစက်သည် မြင်းကောင်ရေ(၅၀) HP ရှိပြီး (၂၄)နာရီကြိတ်ခွဲပါက (၃၂၀)ပိဿာ ကြိတ်ခွဲနိုင်ပြီး မြေပဲဆန်(၁)အိတ်၊(၂၅)ပိဿာကြိတ်ခွဲပါက ပဲဆီ(၁၀)ပိဿာရရှိပြီး ပဲဖက်(၁၅)ပိဿာ ရရှိပါသည်။ ပဲဆီ(၁)ပိဿာပြန်ရောင်းဈေးမှ (၁၀၀၀၀)ကျပ်ရရှိပြီး ပဲဖက်(၁)ပိဿာပြန်ရောင်းဈေး မှ(၁၆၀၀၀)ကျပ် ရရှိသဖြင့် မြေပဲဆန်(၂၅)ပိဿာ ကြိတ်ခွဲပြီးတိုင် အကျိုးအမြတ်(၂၀၀၀၀)ကျပ်နီး ပါးခန့်ရရှိပြီး အလုပ်သမားခ၊ သယ်ယူခ၊ မီတာခများ ပြန်လည်နုတ်ပါက ပျမ်းမျှ (၉၀၀၀/၁၀၀၀၀) ကျပ်ခန့်ကျန်ရှိပါသည်။ တစ်နေ့လျှင် ပိဿာ(၃၀၀)ခန့် ကြိတ်ခွဲရပါသည်။ နောက်ပိုင်း ရွှေကောင်းစံ အမှတ်တံဆိပ်ဖြင့် မူပိုင်ခွင့်လျှောက်၍ ဆီဘူးများ ထုတ်လုပ်ဖြန့်ချီသွားမည်ဖြစ်ကြောင်း လုပ်ငန်းရှင်ဦးမျိုးမင်းထွန်းထံမှ သိရသည်။

          ထို့နောက်စားသုံးသူရေးရာဦးစီးဌာနမှ ခရိုင်ဦးစီးမှူးက ဖျာပုံမြို့နယ်အနေဖြင့် ဆီနေကြာများ စိုက်ပျိုးမည့်အစီအစဉ်နှင့် ကုန်အညွှန်းအမှတ်အသားဆိုင်ရာများ၊ ထုတ်ကုန်လုံခြုံစိတ်ချရမှုရှိစေရေးတို့ကို ဆွေးနွေးကာ စားသုံးသူကာကွယ်ရေးဥပဒေပါပြဌာန်းချက်များအား ရှင်းလင်းအသိပညာပေးဆောင်ရွက်ခဲ့ကြောင်း သိရသည်။

DOCA(ဧရာဝတီ)

              ဧရာဝတီတိုင်း‌ဒေသကြီး၊စားသုံးသူရေးရာဦးစီးဌာန၊ ဖျာပုံခရိုင်ဦးစီးမှူးနှင့် မြို့နယ်တာဝန်ခံ၊ စည်ပင်သာယာရေးအဖွဲ့ဝန်ထမ်းတို့နှင့်အတူ ဇွန်(၁)ရက်နေ့နံနက်(၁၀:၀၀) နာရီအချိန်တွင်  ဈေးကွက်အတွင်းရောင်းချနေသော စားသုံးဆီ လက်လီ /လက္ကား ဆိုင်များ၊ စတိုးဆိုင်များ၊ စားဆီဖြန့်ဖြူးရောင်းချနေသော ကိုယ်စားလှယ်လုပ်ငန်းရှင်များနှင့် တွေ့ဆုံ၍ ဟင်းသီးဟင်းရွက်ဆီ( Vegetable Oil, Cooking Oil )နှင့်စပ်လျဉ်း ညွှန်ကြားချက်(   ၁/၂၀၂၁ )  အားလိုက်နာ ဆောင်ရွက်မှုရှိစေရေး လုပ်ငန်းရှင်များအား ကွင်းဆင်းထပ်မံအသိပေးခဲ့ကြောင်းသိရသည်။

          အဆိုပါလုပ်ငန်းရှင်များအား ဧပြီလ(၇)ရက်နေ့က ကုန်အညွှန်းအမှတ်အသားဖော်ပြခြင်းဆိုင်ရာ အသိပညာပေးဟောပြောခဲ့ပြီး ဖြစ်သော်လည်း ညွှန်ကြားချက်(၁/၂၀၂၁)အရ (၆)လပြည့်ရန် သုံးပတ်သာလိုတော့သဖြင့် ထပ်မံကွင်းဆင်း အသိပေးရခြင်းဖြစ်သည်။ ထို့ပြင် ဖျာပုံမြို့နယ်အတွင်း Goody စားဆီဖြန့်ဖြူးနေသည့် ကိုယ်စားလှယ်နှင့် Meizan ၊ Cook စားဆီကိုယ်စားလှယ်တို့နှင့် ခရိုင်စားသုံးသူရေးရာဦးစီးမှူးရုံး၌ ဟင်းသီးဟင်းရွက်ဆီ (  Vegetable  Oil, Cooking  Oil )နှင့်စပ်လျဉ်း၍ ကုန်အညွှန်းအမှတ်အသားဖော်ပြရာတွင် ကုန်စည်၏အမျိုးအမည်ကို တိကျစွာ မြန်မာဘာသာဖြင့် ဖော်ပြရန်နှင့် ကုန်စည်၏ အသားတင်ပမာဏနှင့် အရွယ်အစားတို့အား မြန်မာ့အလေးချိန်ယူနစ်ဖြစ်သော ပိဿာ၊ ကျပ်သားတို့ကို မြန်မာဘာသာဖြင့် ဖော်ပြရမည်ဖြစ်ပြီး ယခုလ(၂၁)ရက်နေ့ စတင်၍ အာဏာသက်ရောက်မည်ဖြစ်၍ ဆီဘူးများတွင် ညွှန်ကြားချက်အတိုင်းဆောင်ရွက်သွားရန် ဆွေးနွေးခဲ့ပါသည်။ ကိုယ်စားလှယ်များကလည်း ယခုလ(၆)လပိုင်းထွက်ရှိမည့် ဆီဘူးများတွင် ပြည့်ပြည့်စုံစုံပါရှိမည်ဖြစ်ပြီး ယခုဈေးကွက်အတွင်း တွေ့ရှိသည်မှာ လက်ကျန်အဟောင်းများသာဖြစ်၍ ညွှန်ကြားချက်အတိုင်း လက်ကျန်အဟောင်းများပါ ကုန်အညွှန်းအမှတ်အသား ပြည့်စုံစွာဆောင်ရွက်ပေးမည်ဖြစ်ကြောင်း ဆွေးနွေးပါသည်။

          ဟင်းသီးဟင်းရွက်ဆီ (  Vegetable  Oil, Cooking  Oil )နှင့်စပ်လျဉ်း၍ ညွှန်ကြားချက် (၁/၂၀၂၁)အရ(၆)လအချိန်ပေးခဲ့ပြီးဖြစ်၍ ယခုလဇွန်(၂၁)ရက်နေ့မှစတင်၍ အာဏာသက်ရောက်မည်ဖြစ်ပြီး လိုက်နာမှုမရှိပါက စားသုံးသူကာကွယ်ရေးဥပဒေအရ အရေးယူဆောင်ရွက်သွားမည်ဖြစ် ကြောင်း သိရသည်။

DOCA(ဧရာဝတီ)

            ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဟင်္သာတခရိုင်၊ မြန်အောင်မြို့နယ်တာဝန်ခံဦးမြင့်အောင်သည် (၆.၆.၂၀၂၂)ရက်နေ့ နံနက်(၁၀:၀၀) နာရီအချိန်၌ အမှတ်(၃)ရပ်ကွက်၊ နေခြည်ဈေးအတွင်းရှိ ဈေးခေါင်းရုံးတွင် ကုန်မျိုးစုံဆိုင်လုပ်ငန်းရှင် (၅) ဦးအား စားသုံးသူကာကွယ်ရေးအသိပညာပေးဟောပြောခြင်းကို ဆောင်ရွက်ခဲ့သည်။

          ဟောပြောပွဲတွင် မြို့နယ်တာဝန်ခံမှ မြန်မာနိုင်ငံစားသုံးသူကာကွယ်ရေး ကော်မရှင်၏ ညွှန်ကြားချက်အမှတ်(၂/၂၀၁၉)အကြောင်း၊ အခန်း(၁၈)ပါ ကုန်အညွှန်းအမှတ်အသား ဖော်ပြခြင်းဆိုင်ရာ စီးပွားရေးလုပ်ငန်းရှင်များလိုက်နာရမည့်အချက်များအကြောင်း၊ အခန်း(၁၀) ပါ စီးပွားရေးလုပ်ငန်းရှင်၏ တာဝန်များအကြောင်း၊ အခန်း(၂၃)ပါ တားမြစ်ချက်များအကြောင်းနှင့် စားသုံးသူရေးရာဦးစီးဌာန၏ လုပ်ငန်းဆောင်ရွက်ချက်များ အကြောင်းသိရှိလိုပါက www.doca.gov.mm Website တွင် ဝင်ရောက်လေ့လာနိုင်ကြောင်း  စသည်တို့ကို ဟောပြောခဲ့ပြီး၊ တက်ရောက်သူများမှလည်း သိလိုသည်များကို မေးမြန်း၍ စားသုံးသူကာကွယ်ရေး ဥပဒေစာအုပ်နှင့် စားသုံးသူအသိပညာပေး လက်ကမ်းစာစောင်များ ပေးဝေခဲ့ကြကြောင်း သိရှိရပါသည်။

DOCA(ဧရာဝတီ)