သတင်းနှင့် လှုပ်ရှားမှုများ

         ဧရာဝတီတိုင်းဒေသကြီး၊ ဖျာပုံခရိုင်၊ စားသုံးသူရေးရာဦးစီးဌာနမှ   ခရိုင်ဦးစီးမှူး ဦးထွေးသိမ်းနှင့်  မြို့နယ်တာဝန်ခံ ဦးမင်းဇော်တို့သည် ၂၀၂၂ ခုနှစ်၊ဖေဖော်ဝါရီလ(၁၅)ရက်နေ့တွင် ဖျာပုံမြို့နယ် ဒေါ်ညိမ်းကျေးရွာရှိ ရေလုပ်ငန်းရှင်များနှင့်ဆားထုတ်လုပ်သူ လုပ်ငန်းရှင် စုစုပေါင်း( ၁၅ )ဦးအား စားသုံးသူကာကွယ်ရေး အသိပညာပေး ဟောပြောခဲ့ကြောင်းသိရသည်။

          အဆိုပါဟောပြောပွဲတွင် ခရိုင်ဦးစီးမှူးက စားသုံးသူကာကွယ်ရေးဥပဒေပါ အခန်း(၁၀)မှ စီးပွားရေးလုပ်ငန်းရှင်၏ တာဝန်များ၊ အခန်း(၁၁) ပုဒ်မ(၂၂)(၂၃)အရ ကုန်စည်နှင့်စပ်လျဉ်း၍ အာမခံချက်ပေးခြင်းနှင့် အခန်း(၁၈) ပုဒ်မ(၄၁)(၄၃)အရ ကုန်အညွှန်းအမှတ်အသားများကို မြန်မာဘာသာဖြင့် ဖော်ပြရန် ဟောပြောဆွေးနွေးပါသည်။  ဆက်လက်၍ မြို့နယ်တာဝန်ခံကထုတ်လုပ်လျက်ရှိသော ထုတ်ကုန်များ ဖွံ့ဖြိုးတိုးတက်လာစေရေးနှင့် တန်ဖိုးမြှင့်ထုတ်ကုန်များ ထုတ်လုပ်ရန် လိုအပ်ကြောင်း၊ မိမိတို့ဦးစီးဌာနသည် ပုဂ္ဂလိကကဏ္ဍဖွံ့ဖြိုးတိုးတက်ရေးဆောင်ရွက်ရာတွင်လည်း တစ်ဖက်တစ်လမ်းမှ ကူညီဆောင်ရွက်လျက်ရှိကြောင်း၊ အသင်းအဖွဲ့များနှင့်လည်း တစ်လတစ်ကြိမ်တွေ့ဆုံ၍ ဆောင်ရွက်မှု အခြေအနေများ၊ အခက်အခဲများနှင့် ရှေ့ဆက်လက်ဆောင်ရွက်မည့် လုပ်ငန်းအခြေအနေများအား လုပ်ငန်းရှင်များနှင့်တွေ့ဆုံ၍ ဆွေးနွေးတင်ပြလျက်ရှိကြောင်း၊ လုပ်ငန်းတွင်လိုအပ်သည့် နည်းပညာနှင့်ငွေကြေးအခက်အခဲများကိုလည်း သက်ဆိုင်ရာဝန်ကြီးဌာနများနှင့်ချိတ်ဆက်၍ ကူညီဆောင်ရွက်ပေးလျက်ရှိကြောင်း၊ ထုတ်ကုန်များ ထုတ်လုပ်ရာတွင် ပတ်ဝန်းကျင်အားထိခိုက်မှုမရှိစေဘဲ သန့်ရှင်းဖို့လိုအပ်ကြောင်းနှင့် ထုပ်ပိုးမှုကအစ ဈေးကွက်ဝင်နိုင်စေရန် ဂရုပြုရန်လိုအပ်ကြောင်း၊ ထုတ်ကုန်လုံခြုံ စိတ်ချရမှုရှိစေရေးနှင့် ဈေးကွက်မရောက်မီ ကုန်စည်များ၊ ဈေးကွက်ရောက်ပြီး ကုန်စည်များကိုလည်း ကုန်အညွှန်းအမှတ်အသားဖော်ပြမှုများကို စစ်ဆေးဆောင်ရွက်လျက်ရှိကြောင်း စားသုံးသူကာကွယ်ရေးဥပဒေအခန်း(၉)ပါ စားသုံးသူ၏အခွင့်အရေးနှင့် တာဝန်များအား ဟောပြောဆွေးနွေးခဲ့ပါသည်။

          ထိုနောက် တက်ရောက်လာသူလုပ်ငန်းရှင်များမှ သိလိုသည်များမေးမြန်းမှုအပေါ် တာဝန်ရှိသူ များက ပြန်လည်ရှင်းလင်းခဲ့ပြီး စားသုံးသူကာကွယ်ရေးအသိပညာပေး လက်ကမ်းစာစောင်များဖြန့် ဝေပေးခဲ့ကြောင်း သတင်းရရှိပါသည်။

DOCA(ဧရာဝတီ)

        စီးပွားရေးနှင့်ကူးသန်းရောင်းဝယ်ရေးဝန်ကြီးဌာနနှင့် မြန်မာနိုင်ငံ စက်သုံးဆီ တင်သွင်း ဖြန့်ဖြူးရောင်းချသူများအသင်းတို့ ပူးပေါင်းစီစဉ်ကာ သက်သာသော အထူးဈေးနှုန်းဖြင့် ရောင်းချလျက်ရှိသော ကျိုက်ထိုမြို့နယ်ရှိ Denko စက်သုံးဆီအရောင်းဆိုင်နှင့် PT Power စက်သုံးဆီအရောင်းဆိုင်တို့အား သထုံခရိုင်စားသုံးသူရေးရာဦးစီးဌာန၊ ဒု-ခရိုင်ဦးစီးမှူး ဦးအောင်ကျော်မင်းနှင့် ကျိုက်ထိုမြို့နယ် တာဝန်ခံဦးဇော်ဦးတို့မှ (၁၄.၂.၂၀၂၂) ရက်နေ့တွင် သွားရောက်၍ ဈေးကွက်စောင့်ကြည့်စစ်ဆေးခြင်းများ ဆောင်ရွက်ခဲ့ကြောင်းသိရပါသည်။

         ထိုသို့သွားရောက်ကြည့်ရှု့စစ်ဆေးရာတွင် Denko ဆီဆိုင်မန်နေဂျာဦးရန်နိုင်စိုးနှင့် PT Power ဆီဆိုင် မန်နေဂျာဦးကိုကိုလေးတို့နှင့် တွေ့ဆုံပြီး ဒု-ခရိုင်ဦးစီးမှူးဦးအောင်ကျော်မင်း မှ ရောင်းချလျက်ရှိသော စက်သုံးဆီတို့၏ အရည်အသွေး၊ အချိန်အတွယ် ပြည့်ဝမှန်ကန်မှုရှိစေရေး၊ သတ်မှတ်ထားသည့် ခွဲတမ်းများ၊ ဈေးနှုန်းများမှန်ကန်မှုရှိစေရေး၊ မိမိတို့ရောင်းချသောကုန်စည်နှင့် ပတ်သက်၍ သတင်းအချက်အလက်များအားအများပြည်သူတို့ ရှင်းလင်းစွာသိရှိနိုင်ရေးအတွက်  ပြည့်စုံမှန်ကန်စွာသတင်းဖြန့်ဝေပေးရန်၊ သတ်မှတ်အရည်အသွေးပြည့်မီသော စက်သုံးဆီများကို ရောင်းချကြရန်၊ အထူးဈေးနှုန်းဖြင့် ရောင်းချလျက်ရှိသောစက်သုံးဆီများကိုလည်းစည်းကမ်းချက် များနှင့်အညီမှန်ကန်စွာရောင်းချကြရန်၊ နေ့စဉ်စာရင်းဇယားများကိုလည်း အချိန်နှင့်တပြေးညီ ပြန်လည်တင်ပြကြရန်နှင့် စားသုံးသူပြည်သူများစိတ်ချယုံကြည်မှုရှိစေရေး အလေးထားဆောင်ရွက် နိုင်စေရန် အဓိကထားဆွေးနွေးခဲ့ကြောင်းသိရပါသည်။

DOCA(မွန်)

        ဧရာဝတီတိုင်းဒေသကြီး၊ ဟင်္သာတခရိုင်၊ လေးမျက်နှာမြို့နယ်တာဝန်ခံနှင့် ဝန်ထမ်းများသည် (၁၄.၂.၂၀၂၂)ရက်နေ့ (၁၀:၀၀) နာရီအချိန်တွင် ဟံသာအေးကျေးရွာ ဦးသန့်ဇင်အောင်၏ နေအိမ်၌ ကုန်မျိုးစုံဆိုင်လုပ်ငန်းရှင်(၈)ဦးအား စားသုံးသူကာကွယ်ရေး အသိပညာပေးဟောပြောဆွေးနွေးဟောပြောခဲ့ပါသည်။

          ဟောပြောပွဲတွင် စားသုံးသူရေးရာဦးစီးဌာန၊ မြို့နယ်တာဝန်ခံဦးအောင်သန်းဌေးမှ စားသုံးသူကာကွယ်ရေးဥပဒေ အခန်း(၁၈)ပါ ကုန်အညွှန်းအမှတ်အသားဖော်ပြခြင်းဆိုင်ရာ စီးပွားရေးလုပ်ငန်းရှင်များ လိုက်နာရမည့်အချက်များအကြောင်း၊ အခန်း(၉)ပါ စာသုံးသူ၏ အခွင့်အရေးနှင့် တာဝန်များ၊ အခန်း(၁၀) ပါ စီးပွားရေးလုပ်ငန်းရှင်၏တာဝန်များအကြောင်းနှင့် မြန်မာနိုင်ငံစားသုံးသူကာကွယ်ရေးကော်မရှင်မှ ထုတ်ပြန်ထားရှိသည့် ကုန်အညွှန်းအမှတ်အသားဖော်ပြခြင်းဆိုင်ရာ ညွှန်ကြားချက်(၂/၂၀၁၉)အကြောင်း စသည့်တို့ကိုဟောပြောခဲ့ပါသည်။ ထို့နောက် တက်ရောက်သူများမှလည်း သိလိုသည်များကို မေးမြန်းခဲ့ပြီး စားသုံးသူကာကွယ်ရေးဥပဒေစာအုပ် နှင့် လက်ကမ်းစာစောင်များ ပေးဝေခဲ့ကြောင်းသိရှိရပါသည်။

DOCA(ဧရာဝတီ)

       ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ ဖျာပုံခရိုင်ဦးစီးမှူးဦးထွေးသိမ်း၊ မြို့နယ်တာဝန်ခံဦးမင်းဇော်နှင့် စည်ပင်ဈေးစားသုံးသူရေးရာအဖွဲ့တို့နှင့်အတူ ၂၀၂၂ခုနှစ်၊ ဖေဖော်ဝါရီလ(၇)ရက်နေ့တွင် ဖျာပုံမြို့မဈေးရှိ ကုန်မျိုးစုံ အရောင်းဆိုင်များအား စီးပွားရေးနှင့်ကူးသန်းရောင်းဝယ်ရေး ဝန်ကြီးဌာန၊ ညွှန်ကြားချက်အမှတ် (၁/၂၀၂၁)အား စီးပွားရေးလုပ်ငန်းရှင်များ လိုက်နာဆောင်ရွက်ရန် ကြိုတင်အသိပေးခြင်းနှင့် ကုန်စည်များအား ဈေးကွက်စောင့်ကြည့် စစ်ဆေးခြင်းများ ဆောင်ရွက်ခဲ့ကြောင်းသိရသည်။

                အဆိုပါအရောင်းဆိုင်များအား ညွှန်ကြားချက်အမှတ်(  ၁ / ၂၀၂၁  )  အရ   ဟင်းသီး ဟင်းရွက်ဆီ  (Vegetable   Oil ,  Cooking  Oil  )နှင့် စပ်လျဉ်း၍   ပင်ရင်းပါဝင်ပစ္စည်းကို  အခြေခံသော ကုန်စည်၏ အမျိုးအမည်ကို တိကျစွာ မြန်မာဘာသာဖြင့် ဟင်းသီးဟင်းရွက်ဆီ    ( စားအုန်းဆီ )၊ ဟင်းသီးဟင်းရွက်ဆီ (အဆင့်မြင့် စားအုန်းဆီ ) ဖော်ပြရမည်။ ကုန်စည်၏ အသားတင်ပမာဏနှင့် အရွယ်အစားတို့အားမြန်မာ့အလေးချိန် ယူနစ်ဖြစ်သော ပိဿာ၊ ကျပ်သားတို့ကို မြန်မာဘာသာဖြင့် ဖော်ပြရမည်ဖြစ်ကြောင်း၊ညွှန်ကြားချက်စတင် ထုတ်ပြန်သည့် ၂၀၂၁ခုနှစ်၊ ဒီဇင်ဘာလ(၂၂)ရက်နေ့မှ( ၆ ) လပြည့်ပြီးသည့်နေ့ရက်မှ စတင်အာဏာ သက်ရောက်မည်ဖြစ်ပြီး စီးပွားရေးလုပ်ငန်းရှင်များအနေဖြင့် ဂရုပြုကြရန်နှင့် လိုက်နာမှု မရှိပါက စားသုံးသူကာကွယ်ရေးဥပဒေအရ အရေးယူဆောင်ရွက်သွားမည်ဖြစ်ကြောင်းသိရှိစေရန် အသိပေးခဲ့ပြီး လက်ရှိရောင်းချနေသော ကုန်စည်များအားစစ်ဆေးရာ မြို့မဈေးနေသူရိန်လမ်း ( ၂ ) ရပ်ကွက် ကုန်မျိုးစုံ အရောင်း ဆိုင်တွင် (၁)ကီလိုဂရမ်ရှိ ထန်းသီးကျောက်ကျောပျစ်ထုပ် များတွင် ထိုင်းဘာသာ စာဖြင့်ရေးသားထားပြီး မြန်မာဘာသာဖြင့်ရေးသားထားသော စာသား များမပါရှိခြင်း၊  နေရပ်လိပ်စာ၊ ထုတ်လုပ်သည့်ရက်စွဲ၊ သက်တမ်းကုန်ဆုံးသည့်ရက်စွဲများ မပါရှိခြင်းတို့ကြောင့် စားသုံးသူကာကွယ်ရေးဥပဒေပုဒ်မ(၄၁)(၄၃)နှင့် ကိုက်ညီမှု မရှိသည့်အတွက် ၎င်းကုန်စည်အား ဆက်လက်ရောင်းချခြင်း မပြုရန် တားမြစ်ခဲ့ပြီး ဆိုင်ရှင်အား အရေးယူဆောင်ရွက်နိုင်ရေးအတွက် စစ်ဆေးတွေ့ရှိမှုအခြေအနေကို ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ တိုင်းဦးစီးမှူးရုံးသို့ ဆက်လက်တင်ပြသွားမည်ဖြစ်ကြောင်း သတင်းရရှိပါသည်။

DOCA(ဧရာဝတီ)

            ဧရာဝတီတိုင်းဒေသကြီး၊ဖျာပုံခရိုင်စီမံအုပ်ချုပ်ရေးရုံး အစည်းအဝေးခန်းမတွင် ဖျာပုံခရိုင် တရားမဝင်ကုန်သွယ်မှု တိုက်ဖျက်ရေးအထူးအဖွဲ့အစီအစဉ်ဖြင့်၂၀၂၂ခုနှစ်၊ဖေဖော်ဝါရီလ(၅)ရက်နေ့လည်(၁၃:၀၀)နာရီတွင် ဖျာပုံခရိုင်(၄)မြို့ နယ်ရှိ ဌာနဆိုင်ရာအကြီးအကဲများနှင့် စီးပွားရေးလုပ်ငန်းရှင်များအား ခရိုင်စားသုံးသူရေးရာဦးစီးဌာန၊ ပြည်တွင်းအခွန်ဦးစီးဌာနနှင့် သစ်တောဦးစီးဌာနတို့မှ အသိပညာပေးဆွေးနွေးခဲ့ကြောင်းသိရသည်။

          အဆိုပါအခမ်းအနားတွင် ဖျာပုံခရိုင်စီမံအုပ်ချုပ်ရေးအဖွဲ့ ဥက္ကဌ ဦးနေဝင်းက အဖွင့်အမှာစကားပြောကြားပြီး ခရိုင်စားသုံးသူရေးရာဦးစီးဌာနမှ ခရိုင်ဦးစီးမှူးဦးထွေးသိမ်းက ဆွေးနွေးရာတွင် စီးပွားရေးနှင့်ကူးသန်းရောင်းဝယ်ရေးဝန်ကြီးဌာနအောက်တွင် ကုန်သွယ်ရေးဦးစီးဌာန၊စားသုံးသူရေးရာဦးစီးဌာန၊ မြန်မာ့ကုန်သွယ်မှုမြှင့်တင်ရေးအဖွဲ့နှင့် မူပိုင်ခွင့်ဦးစီးဌာနတို့ရှိပါကြောင်း၊ စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်တာဝန်များ၊ စားသုံးသူကာကွယ်ရေးဥပဒေအရ ဈေးကွက်မရောက်မီ ကုန်စည်နှင့်ဈေးကွက်ရောက်ပြီး ကုန်စည်များအား ဥပဒေပုဒ်မ(၄၁)(၄၃) ကုန်အညွှန်းအမှတ်အသားဖော်ပြခြင်းဆိုင်ရာများ၊   တားမြစ်ချက်များ၊ပြစ်မှုဖြစ်ဒဏ်များ၊တိုင်ကြားစာများ းလက်ခံဆောင်ရွက်ဖြေရှင်းခြင်းများအား အကျယ်တဝင့်ရှင်းလင်းဆွေးနွေးခြင်းဖြင့်လည်းကောင်း၊ ဆက်လက်၍ ပြည်တွင်းအခွန်များဦးစီးဌာနမှ မြို့နယ်အခွန်ဦးစီးမှူးက ကောက်ခံလျက်ရှိသည့် အခွန်အမျိုးအစားများနှင့် ပတ်သက်သည့် အခွန်ကိစ္စရပ်များကို    ရှင်းလင်းဆွေးနွေးခြင်းဖြင့်   လည်းကောင်း၊   မြို့နယ်သစ်တောဦးစီး ဌာနမှ မြို့နယ်ဦးစီးမှူးက တရားမဝင်သစ်နှင့်သစ်တောထွက်ပစ္စည်းများ၊ သယ်ယူ ရွှေပြောင်း ခြင်း၊ လက်ဝယ် ထားရှိခြင်း ဆိုင်ရာဥပဒေများအား ရှင်းလင်းဆွေးနွေးခြင်းဖြင့် လည်းကောင်း၊ အသီးသီးဟောပြော ဆွေးနွေးကြပါသည်။

          ထိုဟောပြော ဆွေးနွေးမှုအပေါ် တက်ရောက်လာသူများမှ သိလိုသည်များ မေးမြန်းခြင်းကို သက်ဆိုင်ရာ တာဝန်ရှိသူများက ပြန်လည်ရှင်းလင်းခဲ့ပြီးနောက် ခရိုင်စီးမံအုပ်ချုပ်ရေးအဖွဲ့ ဥက္ကဌက နိဂုံးချုပ်စကားပြောကြားပါသည်။

          အဆိုပါအခမ်းအနားသို့ ခရိုင်/မြို့နယ်ဌာနဆိုင်ရာ အကြီးအကဲများ၊ စီးပွားရေးလုပ်ငန်းရှင်များ၊ စုစုပေါင်း(၅၅)ဦးတက်ရောက်ကြောင်း သတင်းရရှိပါသည်။

DOCA(ဧရာဝတီ)