သတင်းနှင့် လှုပ်ရှားမှုများ

၅.၁၁.၂၀၂၁ ရက်နေ့၊ နေ့လယ် (၀၂:၀၀) နာရီတွင် ပြည်ပမှတင်သွင်းသော စားအုန်းဆီ (Palm Olein Oil) အရည်အသွေးသတ်မှတ်ချက်များထုတ်ပြန်နိုင်ရေးနှင့်ပတ်သက်၍ ညှိနှိုင်းအစည်းအဝေးကို စားသုံးသူရေးရာဦးစီးဌာန၊ ညွှန်ကြားရေးမှူးချုပ်က ဦးဆောင်၍ Virtual Meeting ဖြင့်ကျင်းပပြုလုပ်ခဲ့ရာ သုတေသနနှင့်တီထွင်ဆန်းသစ်မှုဦးစီးဌာန၊ အစား အသောက်နှင့်ဆေးဝါးကွပ်ကဲရေးဦးစီးဌာန၊ မြန်မာကုန်ပစ္စည်းစစ်‌ဆေးရေးနှင့်စမ်းသပ်မှု လုပ်ငန်းလီမိတက်(MITS)၊ မြန်မာနိုင်ငံဆီကုန်သည်နှင့်ဆီလုပ်ငန်းရှင်များအသင်းတို့မှ တာဝန် ရှိသူများနှင့် ကိုယ်စားလှယ်များ တက်ရောက်ခဲ့ကြပါသည်။ အစည်းအဝေးတွင် စီးပွားရေးနှင့် ကူးသန်း‌ရောင်းဝယ်‌ရေးဝန်ကြီးဌာန၊ စားသုံးသူရေးရာဦးစီးဌာနမှ ညွှန်ကြားရေးမှူးချုပ် ဦးမြင့်ချိုက အဖွင့်အမှာစကားပြောကြားရာတွင် မြန်မာနိုင်ငံတွင် စားသုံးဆီသုံးစွဲမှုအနေ နှင့် တစ်နှစ်ကို တန်ချိန် ၁၂ သိန်းခန့်ရှိပြီး ပြည်တွင်းထုတ်လုပ်နိုင်မှု တန်ချိန် ၃ သိန်း ခန့်သာ ထုတ်လုပ်နိုင်ကြောင်း၊ စားအုန်းဆီများကိုပြည်ပမှအများဆုံးတင်သွင်းလျက် ရှိရာ ရာခိုင်နှုန်းအားဖြင့် စုစုပေါင်း စားသုံးဆီတင်သွင်းမှု၏ ၉၅.၄၆၈ ရာခိုင်နှုန်းခန့်ရှိ ကြောင်း၊ ကျန်းမာရေးနှင့်ညီညွတ်သော စားသုံးဆီများ ထုတ်လုပ်၊ တင်သွင်း၊ ဖြန့်ဖြူး ရောင်းချနိုင်ရေး၊ စားသုံးသူများ အရည်အသွေးပြည့်ဝသော စားသုံးဆီများဝယ်ယူ စားသုံးနိုင်ရေးနှင့် စားအုန်းဆီအရည်အသွေး သတ်မှတ်ချက်များအား ခေတ်နှင့်အညီ သတ်မှတ်နိုင်ရေးတို့အတွက် ပြည်ပမှတင်သွင်းသော စားအုန်းဆီ (Palm Olein Oil) အရည်အသွေးသတ်မှတ်ချက်အမိန့်ထုတ်ပြန်နိုင်ရေး ညှိနှိုင်းအစည်းအဝေး ကျင်းပ ခြင်းဖြစ်ကြောင်း အဖွင့်အမှာစကားပြောကြားခဲ့ပြီး အစည်းအဝေးသို့ တက်ရောက်လာသော သက်ဆိုင်ရာဌာနများနှင့် အသင်းအဖွဲ့များမှ ကိုယ်စားလှယ်များက စားအုန်းဆီအရည်အသွေး သတ်မှတ်ချက် (မူကြမ်း) အပေါ် ဝိုင်းဝန်းအကြံပြုဆွေးနွေးခဲ့ပြီး အစည်းအဝေးအား နေ့လယ် ၁၅:၄၅ နာရီအချိန်တွင် ရုပ်သိမ်းခဲ့ကြောင်း သတင်းရရှိပါသည်။

၂၆.၁၀.၂၀၂၁ ရက်နေ့၊ နံနက် ( ၉ : ၀၀) နာရီအချိန်တွင် ကျင်းပပြုလုပ်သော ၂၀၂၁-၂၀၂၂ ခုနှစ်၊ မိုးစပါးစံပြစိုက်ခင်း စံကွက်ရိတ်သိမ်းခြင်း အခမ်းအနားကို ပဲခူးတိုင်းဒေသကြီး၊ ပဲခူးခရိုင် ၊ ဒိုက်ဦးမြို့နယ်၊ ဒိုးတန်းကျေးရွာအုပ်စု၊ ချိုးလှကွင်း ၊ ကွင်းအမှတ် (၃၁၄.ခ) ၊ ဦးပိုင်အမှတ် (၂၃/၁) ဆင်းသုခ - မိုးစပါး စံကွက်၌ စိုက်ပျိုးရေးဦးစီးဌာနမှ ဦးဆောင်၍ မြို့နယ်စီမံအုပ်ချုပ်ရေးအဖွဲ့ ဥက္ကဌ နှင့် အဖွဲ့ဝင်များ၊ မြို့နယ် စိုက်ပျိုးရေးဦးစီးမှူးဌာန ၊ မြို့နယ် စိုက်ပျိုးမွေးမြူ ရေးနှင့် ကျေးလက်ဒေသ ဖွံ့ဖြိုးတိုးတက်ရေး ကော်မတီအဖွဲ့ဝင် ဌာနဆိုင်ရာ အကြီးအကဲများ ၊ တောင်သူများနှင့်အတူ စားသုံးသူရေးရာဦးစီးဌာန ၊ ဒိုက်ဦး မြို့နယ် တာဝန်ခံမှ ပူးပေါင်းပါဝင် တက်‌ရောက်ခဲ့ပါသည်။
ပဲခူးတိုင်း ဒေသကြီးတွင် ၂၀၂၁ ခုနှစ် ၊ မိုးစပါးစိုက်ဧက ၂၆၉၅၂၂၇ ဧက စိုက်ပျိုးထားရှိပြီး ၊ မိုးစပါး ကောက်စောစပါးများ စတင်ထွက်ပေါ်လျှက်ရှိရာ ပဲခူးခရိုင်၊ ဒိုက်ဦးမြို့နယ်၌ မိုးစပါးစံပြ စိုက်ဧက ၃၅ ဧက စိုက်ကွက် (၉)ကွက် စိုက်ပျိုးထားရှိမှုအပေါ် တောင်သူ ဦးမောင်စိုး၏ ဆင်းသုခ - မိုးစပါး စံကွက်၌ ရိတ်သိမ်းပွဲ ကျင်းပခဲ့ရာ စပါးတစ်ဧကလျှင် ပျှမ်းမျှအထွက်နှုန်းစပါးတင်း (၁၀၀.၂၈)တင်း ထွက်ရှိကြောင်း၊ သတင်းရရှိပါသည်။
စားသုံးသူရေးရာဦးစီးဌာန(ပဲခူးတိုင်းဒေသကြီး)

(၂၇.၁၀.၂၀၂၁)ရက်နေ့ တိုင်းဒေသကြီး/ပြည်နယ်များအလိုက် စားအုန်းဆီတစ်ပိဿာကုန်ကျစရိတ်တွက်ချက်မှုစာရင်းနှင့် စားအုန်းဆီ နေ့စဉ်ဈေးနှုန်းသတင်းအား အောက်ပါ PDF ဖိုင်တွင် ကြည့်ရှုလေ့လာနိုင်ပါသည်။

မကွေးတိုင်းဒေသကြီးအတွင်း အသစ်ခန့်အပ်ထားရှိသော ဝန်ထမ်းများနှင့် လက်ရှိဝန်ထမ်းများ၏ လူ့စွမ်းအားအရင်းအမြစ်များ ဖွံ့ဖြိုးတိုးတက်စေရေးအတွက်ရည်ရွယ်၍ ဝန်ထမ်းစွမ်းဆောင်ရည်မြှင့်တင်ရေးသင်တန်းကို ၂၀၂၁ ခုနှစ် အောက်တိုဘာ (၂၇) ရက်နေ့၊ နံနက် (၀၉:၄၅)တွင် စားသုံးသူရေးရာဦးစီးဌာန၊ မကွေးတိုင်းဒေသကြီး၊ တိုင်းဒေသကြီးဦးစီးမှူးရုံး အစည်းအဝေးခန်းမ၌ ဖွင့်လှစ်ကျင်းပသည်။
သင်တန်းဖွင့်ပွဲတွင် တိုင်းဒေသကြီးဦးစီးမှူးမှ အဖွင့်အမှာစကားပြောကြားရာ၌ အနာဂတ်ကာလမှာ ဌာနအတွက်ဦးစီးဦးဆောင်ပြုမည့် မျိုးဆက်သစ်ဝန်ထမ်းများကို အရည်အသွေး မြှင့်တင်ပေးသော သွေးသစ်လောင်းပေးသည့် သင်တန်းဖြစ်ပါကြောင်း၊ “ယနေ့လူငယ် နောင်ဝယ် လူကြီး” ဆိုတဲ့ ဆိုရိုးစကားရှိပါကြောင်း၊ ယနေ့ ဝန်ထမ်းငယ်များသည် နောင်တစ်ချိန်တွင် ဌာနအကြီးအကဲများအဖြစ် ပခုံးပြောင်းထမ်းဆောင်ကြရမှာဖြစ်ပါကြောင်း၊ ဌာနရဲ့ရည်မှန်းချက် တာဝန်တွေကို အကောင်အထည်ဖော်မည့် ခေါင်းဆောင်ကောင်း၊ ဝန်ထမ်းကောင်းတွေဖြစ်လာအောင် ကြိုးစားကြရမှာဖြစ်ပါကြောင်း၊ သင်ယူချင်တဲ့စိတ်၊ ကြိုးစားချင်တဲ့စိတ်၊ တတ်မြောက်ချင်တဲ့ စိတ်ကို စာတွေ့၊ လက်တွေ့ ကိုယ်တိုင်လုပ်မှ တက်သိနိုင်တဲ့ ပညာရပ်တွေကို သိရှိမှာဖြစ်ပါကြောင်း၊ သင်တန်းတွင် သင်ခန်းစာ (၁၀) ခုထည့်သွင်းထားပါကြောင်း၊ သင်တန်းဆရာများအနေဖြင့်လည်း သေသေချာချာပို့ချပေးစေလိုပါကြောင်း၊ သင်တန်း သား/သူများမှလည်း မိမိလက်ရှိမှ လုပ်ငန်းပိုင်းဆိုင်ရာ အရည်အသွေးကို မြင့်မားလာအောင် ကိုယ်တိုင်သေချာကြိုးစားကြဖို့ တိုက်တွန်းပါကြောင်း ပြောကြားခဲ့ပါသည်။
အဆိုပါ သင်တန်းတွင် သင်တန်းနည်းပြအဖြစ် ဒုတိယတိုင်းဒေသကြီးဦးစီးမှူး၊ ခရိုင်ဦးစီးမှူး (၂)ဦး၊ ဦးစီးအရာရှိ(၂)ဦးနှင့် ဌာနခွဲတာဝန်ခံ(၅)ဦးတို့မှ သက်ဆိုင်ရာဘာသာရပ်အလိုက် သင်ကြားပို့ချပေးမည်ဖြစ်ပြီး သင်တန်းသား/သူ(၂၀)ဦးတက်ရောက်ကြောင်း သတင်းရရှိပါသည်။
စားသုံးသူရေးရာဦးစီးဌာန(မကွေးတိုင်းဒေသကြီး)

(၂၅.၁၀.၂၀၂၁)ရက်နေ့ တိုင်းဒေသကြီး/ပြည်နယ်များအလိုက် စားအုန်းဆီတစ်ပိဿာကုန်ကျစရိတ်တွက်ချက်မှုစာရင်းနှင့် စားအုန်းဆီ နေ့စဉ်ဈေးနှုန်းသတင်းအား အောက်ပါ PDF ဖိုင်တွင် ကြည့်ရှုလေ့လာနိုင်ပါသည်။