သတင်းနှင့် လှုပ်ရှားမှုများ

        ရှမ်းပြည်နယ်(အရှေ့ပိုင်း)၊ ကျိုင်းတုံမြို့၊ စားသုံးသူရေးရာဦးစီးဌာန၊ ဒုတိယပြည်နယ်ဦးစီး မှူးရုံးမှ တာဝန်ရှိသူများသည် ၂၀၂၃ခုနှစ်၊ ဇန်နဝါရီလ (၁၈)ရက်နေ့ နေ့လယ် (၁၄:၃၀)နာရီ အချိန်တွင် ကျိုင်းတုံမြို့၊ ရပ်ကွက်(၁/၂/၃/၅)နှင့် ယန်းလောအုပ်စုအတွင်းရှိ လက်လီကုန်စုံဆိုင်များတွင် Coffee Shop (Very good)အမှတ်တံဆိပ်ပါ ကော်ဖီမစ်ကဲ့သို့ အန္တရာယ်ဖြစ်စေသော စားသောက်ကုန်များကို ဈေးကွက်အတွင်း တရားမဝင်ရောင်းဝယ်ဖောက်ကားမှု ရှိ/မရှိ ကွင်းဆင်း၍ ဈေးကွက် စောင့်ကြည့်စစ်ဆေးခြင်း ဆောင်ရွက်ခဲ့ပါသည်။

    ထိုသို့ ကျိုင်းတုံမြို့၊  ရပ်ကွက်အတွင်းရှိ လက်လီရောင်းချလျက်ရှိသော ကုန်စုံဆိုင် (၆)ဆိုင်ကို ဈေးကွက်စောင့်ကြည့်စစ်ဆေးရာတွင် Coffee Shop (Very good)အမှတ်တံဆိပ်ပါ ကော်ဖီမစ်ကဲ့သို့ အန္တရာယ်ဖြစ်စေသော စားသောက်ကုန်များအား ရောင်းချခြင်းမရှိကြောင်း စစ်ဆေးတွေ့ရှိရပါသည်။   

     ထို့နောက် စစ်ဆေးရေးမှူးနှင့် တာဝန်ရှိသူများသည် ရပ်ကွက်လက်လီ အရောင်းဆိုင်ရှင်များအား Coffee Shop (Very good)အမှတ်တံဆိပ်ပါ ကော်ဖီမစ်ကဲ့သို့ အန္တရာယ်ဖြစ်စေသော စားသောက်ကုန်များကို ဈေးကွက်အတွင်း ရောင်းချခြင်းမပြုရန်၊ တရားမဝင် တားမြစ်ထားသော ကုန်စည်များကို ဈေးကွက်အတွင်း ရောင်းဝယ်ဖောက်ကားမှုပြုလုပ်ခြင်း စစ်ဆေးတွေ့ရှိပါက သက်ဆိုင်ရာ ဥပဒေများနှင့်အညီ အရေးယူသွားမည်ဖြစ်ကြောင်း ရှင်းလင်းပြောကြားပြီး စားသုံးသူကာကွယ်ရေးဥပဒေ အခန်း(၁၀)ပါ“စီးပွားရေးလုပ်ငန်းရှင်၏တာဝန်များ”ကို သိရှိလိုက်နာ ဆောင်ရွက်နိုင်စေရန် အသိပညာပေးဆွေးနွေးခြင်းများ ဆောင်ရွက်ခဲ့ပါသည်။

DOCA(ရှမ်း)

       ရခိုင်ပြည်နယ် တောင်ကုတ်ခရိုင်စီမံအုပ်ချုပ်ရေးအဖွဲ့၊ တောင်ကုတ်မြို့နယ် စီမံအုပ်ချုပ်ရေးအဖွဲ့၊ ခရိုင်စိုက်ပျိုးရေးဦးစီးဌာန၊ ခရိုင်စားသုံးသူရေးရာဦးစီးဌာနနှင့် မြို့နယ်လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာနတို့ပါဝင်သော ဌာနဆိုင်ရာပူးပေါင်းဆောင်ရွက်ရေးအဖွဲ့သည် (၁၇-၁-၂၀၂၃) ရက်နေ့ နံနက်(၉:၀၀) နာရီအချိန်တွင် တောင်ကုတ်မြို့နယ် ကင်းတောင်ကျေးရွာအုပ်စုသို့သွားရောက်ပြီး နေကြာစိုက်ပျိုးထုတ်လုပ်သည့်တောင်သူများနှင့် တွေ့ဆုံဆွေးနွေး၍ အသိပညာပေးဟောပြောပွဲပြုလုပ်ခဲ့ပါသည်။

      ထိုသို့ ဟောပြောဆွေးနွေးရာတွင် တောင်ကုတ်ခရိုင်စိုက်ပျိုးရေးဦးစီးဌာန၊ ခရိုင်ဦးစီးမှူးက ရခိုင်ပြည်နယ်အနေဖြင့် နေကြာစိုက်ပျိုးသည့်ဧက (၃၀၀၀) ကျော်စိုက်ပျိုးသည့်အနက် တောင်ကုတ်ခရိုင်အနေဖြင့် ဧက(၁၅၇၀)ကျော်စိုက်ပျိုးသည့်အတွက် အများဆုံးစိုက်ပျိုးသည့် ခရိုင်ဖြစ်ပါကြောင်း၊ စပ်မျိုးနေကြာစေ့ထုတ်လုပ်နည်းစနစ်အား အကျယ်တဝင့်ရှင်းလင်းပြောကြားခြင်း၊ မြို့နယ် လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန မြို့နယ်ဦးစီးမှူးက မြေအသုံးချမှုဆိုင်ရာအကြောင်းအရာများအားလည်းကောင်း ရှင်းလင်းပြောကြားခြင်းနှင့် ဆက်လက်၍ တောင်ကုတ်ခရိုင်စားသုံးသူရေးရာဦးစီးဌာန ခရိုင်ဦးစီးမှူး ဦးကျော်မြင့်က တောင်သူများအနေဖြင့် ပိုးသတ်ဆေးဓါတ်မြေဩဇာများသုံးစွဲရာတွင် တရားမဝင်ပိုးသတ်ဆေးဓါတ်မြေဩဇာများ မသုံးစွဲစေရေး၊ သက်ဆိုင်ရာအစိုးရဌာနဆိုင်ရာများ၏ ထောက်ခံချက်ပါသော ပိုးသတ်ဆေးဓါတ်မြေဩဇာများကိုသာ သုံးစွဲကြရန်နှင့် ရိတ်သိမ်းချိန်လွန် နည်းပညာများနှင့် ဒေသတွင်း စီးပွားရေးလုပ်ငန်းမျာကိုး ထောက်ပံ့အားပေးနေမှု၊ ပြည်တွင်းကုန်သွယ်မှုဖွံ့ဖြိုးရေးနှင့် အကျိုးရှိသည့်အကြောင်းအရာများ၊ စားသုံးသူကာကွယ်ရေးလုပ်ငန်းများဖြင့်လည်း နိုင်ငံစီးပွားရေးတိုးမြှင့်ရေး ဖော်ဆောင်အားပေးကူညီဆောင်ရွက်နေမှုအခြေအနေတို့အား ဆွေးနွေးခဲ့ပါကြောင်း သတင်းရရှိပါသည်။

DOCA(ရခိုင်)

        စားသုံးသူရေးရာဦးစီးဌာန၊ မိုးညှင်းခရိုင်ဦးစီးမှူးရုံးမှ ဦးကျော်မိုးလွင်(ဌာနခွဲစာရေး) သည် ၁၇ - ၁ - ၂၀၂၃ ရက်နေ့ နံနက် ၁၀:၀၀ နာရီအချိန်တွင် မိုးညှင်းမြို့၊ နားခါ(မြောက်)ရပ်ကွက်အတွင်းရှိ ကုန်မျိုးစုံရောင်းဝယ်ရေးလုပ်ငန်းလုပ်ကိုင်သော စီးပွား‌ရေးလုပ်ငန်းရှင်နှင့် တွေ့ဆုံဆွေးနွေးခဲ့ပါသည်။

       တွေ့ဆုံဆွေးနွေးရာတွင် ဦးကျော်မိုးလွင်(ဌာနခွဲစာရေး)က စားသုံးသူကာကွယ်ရေးဥပဒေပါ စီးပွားရေးလုပ်ငန်းရှင်ဆိုသည်မှာ  ကုန်စည်ကိုထုတ်လုပ်ခြင်း၊ ဖြန့်ဖြူးခြင်း၊  သိုလှောင်ခြင်း၊ သယ်ယူပို့ဆောင်ခြင်း၊ ရောင်းချခြင်း၊ ပြုပြင်ထုတ်လုပ်ခြင်း၊ ပြည်ပသို့တင်ပို့ခြင်း၊ ပြည်တွင်းသို့တင်သွင်းခြင်း၊ ပြန်လည်ရောင်းချခြင်းကိုဖြစ်စေ၊ ထောက်ပံ့ပေးကမ်းခြင်းကိုဖြစ်စေ၊ ဝန်ဆောင်မှုပေးခြင်းကိုဖြစ်စေ၊ ကြော်ငြာလုပ်ငန်းလုပ်ကိုင်ခြင်းကိုဖြစ်စေ တစ်ဦးချင်းသော်လည်းကောင်း၊ အဖွဲ့အစည်းနှင့်သော်လည်းကောင်း ဆောင်ရွက်သူကိုဆိုလိုကြောင်း၊ စီးပွားရေးလုပ်ငန်းရှင်၏တာဝန်များဖြစ်သည့် ကုန်စည် သို့မဟုတ် ဝန်‌ဆောင်မှု၏အာမခံချက်၊ သတ်မှတ်ချက်များနှင့်စပ်လျဉ်း၍ ရိုးရှင်းမှန်ကန်သော သတင်းအချက်အလက်များပေးခြင်း၊ စားသုံးသူကိုခွဲခြားမှုမရှိဘဲ ဖြောင့်မတ်မှန်ကန်စွာဆက်ဆံခြင်း၊ စီးပွား‌ရေးလုပ်ငန်းလုပ်ကိုင်ရာတွင် စီးပွား‌‌ရေးကျင့်ဝတ်၊ စည်းကမ်းနှင့်အညီ ဖြောင့်မတ်မှန်ကန်စွာဆောင်ရွက်ခြင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ ထပ်မံပေးချေရမည့်တန်ဖိုးကို စားသုံးသူက ဝယ်ယူအသုံးမပြုမီ သိရှိစေရန် အတိအလင်းဖော်ပြပေးခြင်း၊ စားသုံးသူနစ်နာဆုံးရှုံးမှုဖြစ်ပွားစေမည့် ကုန်စည် သို့မဟုတ် ဝန်ဆောင်မှုကို တိုက်ရိုက်ရောင်းချခြင်း သို့မဟုတ် သွယ်ဝိုက်ရောင်းချခြင်းတို့ကိုရှောင်ကြဉ်ခြင်း၊ ကုန်စည် သို့မဟုတ် ဝန်ဆောင်မှုနှင့်စပ်လျဉ်း၍ ကတိပြုထားသောအာမခံချက်နှင့် ကိုက်ညီမှုမရှိပါက ကတိပြုထားသည့်အတိုင်း တာဝန်ယူဆောင်ရွက်ပေးခြင်းနှင့် ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်စည်အမျိုးအစားအလိုက် သတ်မှတ်ချက်နှင့်အညီ သိသာထင်ရှားစွာဖော်ပြရမည့်အချက်(၈)ချက်တို့ကို ရှင်းလင်းဆွေးနွေးခဲ့ပြီး ကုန်အညွှန်းအမှတ်အသားဖော်ပြခြင်းဆိုင်ရာ အသိပညာပေးလက်ကမ်းစာစောင်များ ဖြန့်ဝေပေးခဲ့ကြောင်းသိရှိရပါသည်။၊

DOCA(ကချင်)

       စားသုံးသူရေးရာဦးစီးဌာန ပြည်နယ်ဦးစီးမှူးရုံးမှ စားသုံးသူရေးရာဌာနခွဲ တာဝန်ခံဦးဆောင်သော ဝန်ထမ်းနှင့်အဖွဲ့သည် ပြည်နယ် အစားအသောက်နှင့်ဆေးဝါးကွပ်ကဲရေးဦးစီးဌာနရှိ ဝန်ထမ်းများနှင့်ပူးပေါင်း၍ စားသုံးသူကာကွယ်ရေး အသိပညာပေးဟောပြောပွဲကို မော်လမြိုင်မြို့နယ်၊ အခြေခံပညာအထက်တန်းကျောင်း အ - ထ - က(၉)၌ (၁၆-၁-၂၀၂၃)ရက်နေ့ နေ့လယ် ၁၃:၃၀ အချိန်တွင် ကျင်းပပြုလုပ်ခဲ့ပါသည်။ ရှေးဦးစွာ စားသုံးသူရေးရာဦးစီးဌာနမှ ဒေါ်ဝါဝါမြိုင် ဦးစီးအရာရှိက စားသုံးသူကာကွယ်ရေးဆိုင်ရာ ဥပဒေ၊ နည်းဥပဒေများကို ရှင်းလင်းဆွေးနွေးခြင်း၊ တိုင်ကြားနိုင်သည့်နည်းလမ်းများကို ဟောပြောဆွေးနွေးပြီး ဦးနိုင်လင်းထက် အကြီးတန်းစာရေးမှ စားသုံးသူများရရှိနိုင်သည့် အခွင့်အရေး(၈)ချက်နှင့် စားသုံးသူများလိုက်နာရမည့် တာဝန်(၄)ချက်၊ လုံခြုံစိတ်ချရမှုရှိသော ကုန်စည်နှင့်ဝန်ဆောင်မှုများအား မှန်ကန်စွာရွေးချယ်ဝယ်ယူအသုံးပြုတတ်စေရန်၊ စားသုံးသူများနစ်နာဆုံးရှုံးမှုများရှိပါက ပြန်လည်ကုစားခွင့်နှင့် တိုင်ကြားနိုင်မည့်နည်းလမ်းများ၊ ကုန်အညွှန်းအမှတ်အသားဆိုင်ရာပြဋ္ဌာန်းချက်များ ဟောပြောဆွေးနွေးခြင်း၊ FDA ဌာနမှလည်း စားသုံးသူများအနေဖြင့် သက်တမ်းလွန်သည့် အစားအသောက်များကို မစားသုံးကြရန်နှင့် အစားအသောက်များတွင်ပါဝင်သည့် ဓာတုဆိုးဆေးများ၏ ဘေးထွက်ဆိုးကျိုးများအကြောင်းတို့ကို ထည့်သွင်းဟောပြောဆွေးနွေးခဲ့ပါသည်။ ဆွေးနွေးပွဲသို့ ကျောင်းအုပ်ဆရာမကြီးနှင့် ဆရာ/ဆရာမ(၇)ဦး ကျောင်းသား/ကျောင်းသူ(၂၈၀)ဦးတက်ရောက်၍ တက်ရောက်လာသူများအား စားသုံးသူရေးရာဦးစီးဌာနက စားသုံးသူအသိပညာပေးလက်ကမ်းစာစောင်များ ပေးအပ်ခဲ့ပါကြောင်း သိရှိရပါသည်။

DOCA(မွန်)

         စားသုံးသူရေးရာဦးစီးဌာန ပြည်နယ်ဦးစီးမှူးရုံးမှ စားသုံးသူရေးရာဌာနခွဲ တာဝန်ခံဦးဆောင်သော ဝန်ထမ်းနှင့်အဖွဲ့သည် ပြည်နယ် အစားအသောက်နှင့်ဆေးဝါးကွပ်ကဲရေးဦးစီးဌာနမှ ဝန်ထမ်းများနှင့်ပူးပေါင်း၍ (၁၆-၁-၂၀၂၃)ရက်နေ့ နံနက် ၁၀:၃၀ အချိန်တွင် မော်လမြိုင်မြို့နယ်၊ အခြေခံပညာအထက်တန်းကျောင်း အ - ထ - က(၃)၌ စားသုံးသူကာကွယ်ရေး အသိပညာပေးဟောပြောပွဲကျင်းပပြုလုပ်ခဲ့ရာ စားသုံးသူရေးရာဦးစီးဌာနမှ ဒေါ်ဝါဝါမြိုင် ဦးစီးအရာရှိက ဌာန၏မျှော်မှန်းချက်၊ ရည်မှန်းချက်များ၊ စားသုံးသူများ အသိပညာရရှိစေမည့် ကုန်အညွှန်းအမှတ်အသားဆိုင်ရာပြဋ္ဌာန်းချက်များ၊ တိုင်ကြားနိုင်သည့်နည်းလမ်းများအား ဟောပြောဆွေးနွေးပြီး ဒေါ်အိအိစမ်း အကြီးတန်းစာရေးက စားသုံးသူအခွင့်အရေးနှင့်တာဝန်များ၊ လုံခြုံစိတ်ချရမှုရှိသော ကုန်စည်နှင့်ဝန်ဆောင်မှုများအား ရွေးချယ်ဝယ်ယူအသုံးပြုတတ်စေရန်၊ စားသုံးသူများ နစ်နာဆုံးရှုံးမှုများရှိပါက ပြန်လည်ကုစားခွင့်နှင့် တိုင်ကြားနိုင်မည့်နည်းလမ်းများကို ဟောပြောဆွေးနွေးခြင်း၊ FDA ဌာနမှလည်း စားသုံးသူများ ဘေးအန္တရာယ်ဖြစ်စေနိုင်သော ဓာတုဆိုးဆေးများအကြောင်းတို့ကို ထည့်သွင်းဟောပြောဆွေးနွေးခဲ့ပါသည်။ ဆွေးနွေးပွဲသို့ ကျောင်းအုပ်ဆရာမကြီးနှင့် ဆရာ၊ ဆရာမ(၂၀)ဦး ကျောင်းသား/သူ (၁၇၈)ဦးတက်ရောက်၍ တက်ရောက်လာသူများအား စားသုံးသူရေးရာဦးစီးဌာနနှင့် အစားအသောက်နှင့်ဆေးဝါးကွပ်ကဲရေးဦးစီးဌာနတို့က လက်ကမ်းစာစောင်များကိုလည်း ဖြန့်ဝေပေးခဲ့ကြောင်းသိရှိရပါသည်။

DOCA(မွန်)