သတင်းနှင့် လှုပ်ရှားမှုများ

      စစ်ကိုင်းတိုင်းဒေသကြီး၊ ကသာခရိုင်၊ ကုန်ဈေးနှုန်းတည်ငြိမ်ရေးလုပ်ငန်းအဖွဲ့၏ ကြီးကြပ်မှုဖြင့် ကသာခရိုင်၊ ကသာမြို့ပေါ်ရှိ ခရိုင်နှင့်မြို့နယ် ဌာနဆိုင်ရာဝန်ထမ်းများအား (၄.၁၂.၂၀၂၄)ရက်နေ့တွင် စားအုန်းဆီများ ရောင်းချပေးခဲ့ကြောင်း သိရှိရပါသည်။

      အဆိုပါ စားအုန်းဆီအား ကသာမြို့ ရပ်ကွက်(၇)ရှိ ဆီကုန်သည် ဒေါ်ချိုတီ၏နေအိမ်တွင် ရောင်းချပေးခဲ့ရာ ကသာခရိုင်၊ စားသုံးသူရေးရာဦးစီးဌာနရှိ ဝန်ထမ်းများမှ သွားရောက်ကြီးကြပ်ခဲ့ပြီး ဝန်ထမ်းဦးရေ (၂၂၀၀) အား သင့်တော်သော ဈေးနှုန်းဖြင့် တစ်ဦးလျှင် (၅၀) ကျပ်သားနှုန်းဖြင့် ရောင်းချပေးခဲ့ကြောင်း သိရှိရပါသည်။

DOCA(စစ်ကိုင်း)

             (၃.၁၂.၂၀၂၄)ရက်နေ့ နံနက် (၁၀:၀၀)နာရီအချိန်က စားသုံးသူရေးရာဦးစီးဌာန၊ မအူပင်မြို့နယ်ဦးစီးမှူးရုံးမှ မြို့နယ်တာဝန်ခံနှင့် တာဝန်ရှိသူများသည် မြို့နယ်စားသုံးသူရေးရာဦးစီးမှူးရုံး အစည်းအဝေးခန်းမတွင် မအူပင်မြို့နယ် စားအုန်းဆီရောင်းချသူလုပ်ငန်းရှင်(၂၇)ဦးနှင့် တွေ့ဆုံ၍ ဆီရောင်းချခြင်းနှင့် ပတ်သက်၍ ဆွေးနွေးခြင်း၊ စားသုံးသူကာကွယ်ရေး အသိပညာ ပေးဟောပြောခဲ့ကြောင်းသိရသည်။

            မအူပင်မြို့နယ်တာဝန်ခံ ဦးအောင်ဇော်ဦး ဦးစီးအရာရှိက စားသုံးသူကာကွယ်ရေး ဥပဒေ (၂၀၁၉)ကို ရှင်းလင်းဆွေးနွေးခဲ့ပြီးနောက် စားသုံးသူကာကွယ်ရေး လုပ်ငန်းစဉ်ကိစ္စရပ် ကိုရှင်းလင်းခြင်း၊ စီးပွားရေးလုပ်ငန်းရှင်၏ လိုက်နာရမည့်တာဝန်များ ကိုရှင်းလင်းခြင်း၊ လက်ရှိလုပ်ဆောင်နေမှုများနှင့် ဆက်လက်လုပ်ဆောင်ရမည့် လုပ်ငန်းများအကြောင်းကိုဆွေးနွေးပြီး လက်ရှိဆီရောင်းချသူများအနေဖြင့် မိမိတို့ရရှိသည် ဆီခွဲတမ်းအလိုက် စားသုံးသူပြည်သူများကို အပြည့်အဝဆီထုတ်ယူခွင့် စာအုပ်ဖြင့်ရောင်းချပေးပြီး စနစ်တကျဆောင်ရွက်ရန်၊ သတ်မှတ်ရက်အတွင်း ဆီထုတ်ယူခွင့်အပြည့်အဝရရှိနိုင်အောင် နာရီသတ်မှတ်၍ သတ်မှတ်အချိန်ကာလအတွင်းဝယ်ယူနိုင်ရန် ကြိုတင်သတိပေးမှုဖြင့် ဆောင်ရွက်ပေးရန်၊ ဆီရောင်းချသူလုပ်ငန်းရှင်အခြင်းခြင်း အငြင်းပွားမှုမဖြစ်စေရေးနှင့် စားသုံးသူပြည်သူများကို အလေးချိန်ပြည့်ဝစွာရောင်းချပေးနိုင်ရန်ကိုလည်းကောင်း၊  ဆီထုတ်ယူခွင့် စာအုပ်များပျောက်ဆုံးနေသဖြင့် လာရောက်ထုတ်ယူသူမှ ဆီစာအုပ်ပျောက်ဆုံးပါက သက်ဆိုင်ရာဆီဆိုင်နှင့် သက်ဆိုင်ရာဌာနများသို့ သတင်းပို့အကြောင်းကြားထားရန် မသမာသူတစ်ဦးက ဆီထုတ်ယူခွင့်စာအုပ်ပျောက်ဆုံးသူကိုယ်တိုင်ပါ စာအုပ်ဖြင့်နှစ်ကြိမ်ထုတ်ယူခြင်းများဖြစ်ပေါ်မှုကို ဟန့်တားနိုင်အောင် သေချာစိစစ်ဆောင်ရွက်ရန်တို့ကို ရှင်းလင်းပြောကြားသွားပြီး ဆီရောင်းချသူလုပ်ငန်းရှင်များကလည်း လိုအပ်သည်များဆွေးနွေးခဲ့ကြကြောင်း သိရှိရပါသည်။

DOCA( ဧရာဝတီ )

     စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ မုံရွာခရိုင်ဦးစီးမှူးရုံးအနေဖြင့် ထုတ်ကုန်များလုံခြုံစိတ်ချရမှုရှိစေရေး၊ ကုန်စည်များတွင် ကုန်အညွှန်းအမှတ်အသားများ ပြည့်စုံစွာထည့်သွင်းဖော်ပြထားခြင်းရှိ/မရှိ၊ စားသုံးသူများနေ့စဉ် အသုံးပြုလျက်ရှိသော ကုန်စည်နှင့် ဝန်ဆောင်မှုများ ဘေးအန္တရာယ်ကင်းရှင်းပြီး လုံခြုံစိတ်ချရမှုရှိ စေရေး၊ ကုန်စည်များကို သတ်မှတ်စံချိန်စံညွှန်းများ၊ညွှန်ကြားချက်များနှင့်ကိုက်ညီမှုရှိ/မရှိ ဈေးကွက် စောင့်ကြည့်စစ်ဆေးခြင်းများ ဆောင်ရွက်လျက်ရှိပါသည်။ ဈေးကွက်စောင့်ကြည့်စစ်ဆေးရာတွင် မိတ်ဘက်ဌာနဆိုင်ရာများနှင့်ပူးပေါင်း၍သော်လည်းကောင်း၊ စားသုံးသူကာကွယ်ရေးဥပဒေအရ ခန့်အပ်ထားသော စစ်ဆေးရေးအရာရှိများက ဦးဆောင်၍သော်လည်းကောင်း ဆောင်ရွက်လျက်ရှိပါသည်။

      မုံရွာခရိုင်အနေဖြင့် (၁၁/၂၀၂၄) လအတွင်း ခရိုင်ဦးစီးမှူး၊ ခရိုင်ဦးစီးမှူးနှင့် မှဦးဆောင်၍ ထုတ်ကုန်လုံခြုံစိတ်ချရမှုဌာနခွဲတာဝန်ခံနှင့် စားသုံးသူရေးရာဌာနခွဲတာဝန်ခံတို့သည် မုံရွာမြို့၊ သလ္လာရပ်ကွက်ရှိ လူသုံးကုန်နှင့် စားသောက်ကုန်ပစ္စည်းအရောင်းဆိုင်များ၊ မုံရွာမြို့၊ မြို့သစ်ရပ်ကွက်ရှိ လူသုံးကုန်နှင့် စားသောက်ကုန်ပစ္စည်းအရောင်းဆိုင်များ၊  မုံရွာမြို့ပေါ်ရှိ ဆေးနှင့်ဆေးပစ္စည်း အရောင်းဆိုင်များအား  ဈေးကွက်စောင့်ကြည့် စစ်ဆေးခြင်းများဆောင်ရွက်ခဲ့ကြပြီး ဌာန၏ ဥပဒေ၊ အမိန့်နှင့် ညွှန်ကြားချက်ပါအကြောင်းများကို အသိပညာပေးခြင်းများ ဆောင်ရွက်ခဲ့ကြကြောင်း သတင်းရရှိပါသည်။

DOCA(စစ်ကိုင်း)

         ဧရာဝတီတိုင်းဒေသကြီး၊ မအူပင်ခရိုင်၊ ဓနုဖြူမြို့နယ်ရှိ ထောက်ရှာရိုး၊ အခြေခံပညာအလယ်တန်းကျောင်းတွင် စားသုံးသူရေးရာဦးစီးဌာန၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ တိုင်းရင်းဆေးပညာဦးစီးဌာန၊ ပြည်သူကျန်းမာရေးဦးစီးဌာ တို့ ပူးပေါင်းပါဝင်၍ ကျောင်းအသိပညာပေးဟောပြောခြင်းကို (၃. ၁၂.၂၀၂၄) ရက်နေ့ နံနက်(၁၀:၀၀)နာရီအချိန်တွင် အသိပညာပေးဟောပြော ခြင်းပြုလုပ်ခဲ့ကြကြောင်းသိရသည်။

          စားသုံးသူရေးရာဦးစီးဌာနမှ မြို့နယ်ဦးစီးမှူး ဦးဝင်းမင်းစိုး(ဦးစီးအရာရှိ) သည်  စားသုံးသူကာကွယ်ရေး အသိပညာပေးခြင်းဆိုင်ရာ ဗဟုသုတများကိုရှင်းလင်းပြီး စားသုံးသူကာကွယ်ရေးပေါ်ပေါက်လာပုံ၊ သမိုင်းကြောင်းဖြစ်ပေါ်လာပုံ၊  စားသုံးသူကာကွယ်ရေးနှင့် စားသုံးသူအဓိပ္ပါယ်ဖွင့်ဆိုချက်၊ စားသုံးသူရရှိနိုင်သည့် အခွင့်အရေး(၈)ချက်နှင့် လိုက်နာရမည်တာဝန်(၄)ချက်၊ ကုန်အညွှန်းအမှတ်အသားဖော်ပြခြင်းဆိုင်ရာ သိကောင်းစရာများမှ ကုန်စည်ကိုရွေးချယ်ဝယ်ယူတက်စေရန် သိသင့်သောအချက်အလက်များ၊ FDA မှ စားသုံးရန်မသင့်ဟုကြော်ငြာထားသည့် တားမြစ်ထားသောအစားအသောက်များ၊ ခွင့်မပြုဓာတုဆိုးဆေးများ အသုံးပြုထားသောအစားအသောက်များ၊ သက်တမ်းလွန်အစားအစာများကို နံရံကပ်ဗီနိုင်းများဖြင့် ပြသရှင်းလင်းခဲ့ပြီး၊ ကုန်စည် (သို့)ဝန်ဆောင်မှုနှင့်စပ်လျဉ်း၍ သိကောင်းစရာများ၊ စားသုံးသူကာကွယ်ရေးဆိုင်ရာ လက်ကမ်းစာစောင်များ ဖြန့်ဝေအသိပညာပေးဟောပြောခဲ့ကြောင်းသိရသည်။

            ပြန်ကြားရေးနှင့်ပြည်သူ့ဆက်ဆံရေးဦးစီးဌာနမှ မြို့ဦးစီးမှူးသည် ပလတ်စတစ်၏ဆိုးကျိုးများ၊ ပလတ်စတစ်သုံးစွဲမှုလျှော့ချရေးဆိုင်ရာနည်းလမ်းများနှင့် နိုင်ငံ၏အနာဂတ်ဖွံ့ဖြိုးတိုးတက်ရေး၊ ပတ်ဝန်းကျင်သာယာလှပရေးအတွက် လူငယ်များစည်းကမ်းရှိပြီး လူ‌တော်လူကောင်းဖြစ်ဖို့ မူးယစ်ဆေးဝါးသုံးစွဲခြင်းမှရှောင်ရှားရန် လိုအပ်သည့်အကြောင်းများကို  ဆွေးနွေးပြောကြားခဲ့ပြီး ကျောင်းသား/ကျောင်းသူ-၁၃၅ဦး၊ ဆရာ/ဆရာမ-၇  ဦးတက်ရောက်ခဲ့ကြောင်း သိရှိရပါသည်။

DOCA (ဧရာဝတီ)

               ၂.၁၂.၂၀၂၄ ရက်နေ့ နံနက် (၁၀:၀၀) နာရီအချိန်တွင် မွန်ပြည်နယ်၊ စားသုံးသူရေးရာဦးစီးဌာန၊ ချောင်းဆုံမြို့နယ်တာဝန်ခံ ဒေါ်ထက်ထက်နွေဦးသည် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာနနှင့် ပူးပေါင်း၍ ချောင်းဆုံမြို့နယ်၊ အ.မ.က (ကုလားတို့) ကျောင်း၌ စားသုံးသူကာကွယ်ရေး အသိပညာပေးဟောပြောပွဲကျင်းပခဲ့ကြောင်း သိရှိရပါသည်။

             အဆိုပါ ဟောပြောပွဲတွင် ကျောင်းအုပ်ဆရာမကြီး ဒေါ်ဌေးဌေးနွယ်က အဖွင့်အမှာစကားပြောကြားပြီး စားသုံးသူရေးရာဦးစီးဌာနမှ ချောင်းဆုံမြို့နယ်တာဝန်ခံ ဒေါ်ထက်ထက် နွေဦးက စားသုံးသူရေးရာဦးစီးဌာန၏ မျှော်မှန်းချက်၊ ရည်မှန်းချက်များ၊ စားသုံးသူကာကွယ်ရေး ဥပဒေအကြောင်းပြောကြားခဲ့ပြီး အငယ်တန်းစာရေး ဒေါ်ဝင်းနန္ဒာခိုင်က စားသုံးသူအခွင့်အရေး (၈) ချက်နှင့် စားသုံးသူများလိုက်နာရမည့်တာဝန်များ၊ ကုန်စည်တစ်ခုကိုဝယ်ယူမည်ဆိုပါက စစ်ဆေးကြည့်ရှုရမည့် ကုန်အညွှန်းအမှတ်အသားပါ အချက်အလက်များ၊ စားသုံးသူများ နစ်နာဆုံးရှုံးမှုများပေါ်ပေါက်လာပါက တိုင်ကြားနိုင်သည့်နေရာ၊ Consumer Call Center (1535) သို့ဖုန်းခေါ်ဆို၍လည်း တိုင်ကြားနိုင်ကြောင်း၊ www.doca.gov.mm တွင်လည်း ဝင်ရောက်တိုင်ကြားနိုင်ကြောင်း ဟောပြောဆွေးနွေးပြီး ဌာန၏လက်ကမ်းစာစောင်များ ဖြန့်ဝေပေးအပ်ခဲ့ ကြောင်း သိရှိရပါသည်။

             အဆိုပါ ဟောပြောဆွေးနွေးပွဲသို့ ဆရာ/ ဆရာမ၊ ကျောင်းသား/ ကျောင်းသူ စုစုပေါင်း (၈၂) ဦး တက်ရောက်ခဲ့ကြောင်း သိရှိရပါသည်။

DOCA(မွန်)