ပြည်တွင်းကုန်သွယ်မှုသတင်း

တောင်တွင်းကြီးကုန်စည်ဒိုင်ဖွင့်ပွဲကို (၈.၂.၂၀၂၀)နေ့တွင် တောင်တွင်းကြီးမြို ကုန်သည်များနှင့် စက်မှုလက်မှုလုပ်ငန်းရှင်များအသင်းရုံး၌ ကျင်းပခဲ့ရာ အမျိုးသားလွှတ်တော်ကိုယ်စားလှယ် စိုက်ပျိုးရေး၊ မွေးမြူရေးနှင့်ရေလုပ်ငန်းဖွံ့ဖြိုးတိုးတက်ရေးကော်မတီ ဥက္ကဌ ဦးအောင်ကြည်ညွန့်၊ ပြည်သူ့လွှတ်တော်ကိုယ်စားလှယ် ဦးမင်းသိန်း၊ တိုင်းအဆင့် ဌာနဆိုင်ရာများဖြစ်သော မကွေးတိုင်း ဒေသကြီး စားသုံးသူရေးရာဦးစီးဌာနမှ တိုင်းဒေသကြီးဦးစီးမှူး၊ ရင်းနှီးမြှုပ်နှံမှုနှင့်ကုမ္ပဏီများညွှန်ကြား မှုဦးစီးဌာန၊ စက်မှုကြီးကြပ်ရေးနှင့်စစ်ဆေးရေးဦးစီးဌာန၊ တောင်တွင်းကြီးမြို့နယ် အထွေထွေအုပ်ချုပ် ရေးဦးစီးဌာန မြို့နယ်အုပ်ချုပ်ရေးမှူးနှင့် မိတ်ဖက်ဌာနများ၊ မကွေး၊ အောင်လံကုန်စည်ဒိုင်မှ တာဝန် ရှိသူများ၊ တောင်တွင်းကြီးမြို့နယ် ကုန်သည်များနှင့်စက်မှုလက်မှုလုပ်ငန်းရှင်များအသင်းမှ အသင်းဝင် စုစုပေါင်း(၁၂၀)ဦးတို့ တက်ရောက်ခဲ့ကြပါသည်။

အဆိုပါအခမ်းအနားတွင် အမျိုးသားလွှတ်တော်ကိုယ်စားလှယ် ဦးအောင်ကြည်ညွန့်မှ လတ်တလောတက်ရောက်လာခဲ့သည့် ပုဂ္ဂလိကကဏ္ဍဖွံ့ဖြိုးတိုးတက်ရေးကော်မတီ၏(၁၂) ကြိမ်မြောက် အစည်းအဝေးတက်ရောက်ခဲ့မှုအခြေအနေများနှင့် ပေါင်းစပ်ညှိနှိုင်းဆောင်ရွက်ပေးခဲ့၊ ဖြေလျော့ ဆောင်ရွက်ပေးခဲ့ပြီး အခြေအနေများ၊ လယ်ယာကဏ္ဍဖွံ့ဖြိုးတိုးတက်ရေးအတွက် လေ့လာရေး ခရီးစဉ်သွားရောက်ခဲ့သည့် ဒေသများမှ ဆောက်ရွက်နေမှုများအား မိမိတို့ဒေသတွင် ဆောင်ရွက် သင့်ပါက အတုယူ ဆောင်ရွက်သင့်သည့်အချက်များနှင့် တောင်တွင်းကြီးကုန်စည်ဒိုင်အား ယခုထက် စည်းလုံးညီညွတ်စွာ ပိုမိုဖွံ့ဖြိုးတိုးတက်ရေးတို့ ဆောင်ရွက်ရန် ပြောကြားခဲ့ပြီး မကွေးတိုင်းဒေသကြီး၊ တိုင်းဒေသကြီးဦးစီးမှူး ဦးမြင့်ဝင်းမှ တောင်သူလယ်သမားများ စိုက်ပျိုးထုတ်လုပ်ရာတွင် အဓိက မှန်လေးမှန်ရှိသလို ကုန်စည်ဒိုင်များတွင်လိုက်နာရမည့် မှန်လေးမှန်ဖြစ်သည့် ပစ္စည်းမှန်၊ဈေးနှုန်းမှန်၊ အလေးချိန်မှန်၊ အရောင်းအဝယ်မှန်ဖြစ်ဖို့နှင့် ကုန်စည်ဒိုင်စည်းမျဉ်းစည်းကမ်းများ၊ အသင်းဖွဲ့ စည်းမျဉ်းစည်းကမ်း မှတ်တမ်းထားရှိရမည်ဖြစ်ကြောင်းနှင့် အသင်းသားများမှ စည်းလုံးညီညွတ်စွာ ဆောင်ရွက်နိုင်ရေးတို့အား ပြောကြားခဲ့ပြီး မြို့နယ်အုပ်ချုပ်ရေးမှူး ဦးအောင်မြင်မှ ကုန်သည်များနှင့် စက်မှုလက်မှုလုပ်ငန်းရှင်များအသင်းမှ မိမိတို့နှင့်နီးစပ်သည့် တောင်သူများအား စည်းရုံးချိတ်ဆက်၍တောင်တွင်းကြီးမြို့တွင် တဆက်တစပ်တည်း ပေါင်းစည်းလယ်ယာစနစ်များ ဖြစ်ထွန်းရေးအတွက် ဆောင်ရွက်မည်ဆိုပါက မိမိတို့ဌာနဆိုင်များမှ သက်ဆိုင်ရာကဏ္ဍအလိုက် ပေါင်းစပ်ဆောင်ရွက်ပေး သွားမည်ဖြစ်ကြောင်းနှင့် ယခုတောင်တွင်းကြီး  ကုန်စည်ဒိုင်ကိုလည်း စဉ်ဆက်မပြတ် တိုးတက် ဖွံ့ဖြိုးစေရန် ဆုမွန်ကောင်းများ တောင်းပါကြောင်း၊ သက်ဆိုင်ရာဌာနများနှင့်လည်း တွေ့ဆုံဆွေးနွေး မေးမြန်းပူးပေါင်းဆောင်ရွက်ရန် လိုပါကြောင်း ပြောကြားခဲ့ပြီး အခမ်းအနားအား ပထမပိုင်း အစီအစဉ်အဖြစ် ရုပ်သိမ်းခဲ့ပါသည်။

ထို့နောက် ဒုတိယပိုင်းတွင် တောင်တွင်းကြီးကုန်စည်ဒိုင်ရုံးခန်းသစ်အား တက်ရောက်လာ သော အမျိုးသားလွှတ်တော်ကိုယ်စားလှယ် ဦးအောင်ကြည်ညွန့်၊ စားသုံးသူရေးရာဦးစီးဌာန တိုင်းဒေသကြီးဦးစီးမှူး ဦးမြင့်ဝင်း၊ တောင်တွင်းကြီးမြို့နယ်အုပ်ချုပ်ရေးမှူး ဦးအောင်မြင်နှင့် တောင်တွင်းကြီးကုန်စည်ဒိုင် ဥက္ကဌ ဦးချိုတို့မှ ဖဲကြိုးဖြတ်ဖွင့်လှစ်ပေးခဲ့ကြောင်း သတင်းရရှိပါသည်။

မကွေးတိုင်းဒေသကြီး

စားသုံးသူရေးရာဦးစီးဌာန

   မွန်ပြည်နယ်အတွင်း ဒေသထွက်ကုန်ပစ္စည်းများ ရောင်းဝယ်ချိတ်ဆက်မှု ဆောင်ရွက်နိုင်ရေးအတွက် မော်လမြိုင်ကုန်စည်ဒိုင်ကို ၂၁.၁.၂၀၂၀ ရက်နေ့တွင် ဖွင့်လှစ်ခဲ့ပြီး အဆိုပါ ဖွင့်လှစ်ပြီးခဲ့သည့်ကုန်စည်ဒိုင်၏ လုပ်ငန်းဆောင်ရွက်မှုပိုမိုကောင်းမွန်စေရန်၊ ကုန်စည်ဒိုင်သီးနှံပေါက်ဈေးနှုန်းများကို အချိန်နှင့်တပြေးညီ ထုတ်ပြန်နိုင်ရန်၊ ဒေသထွက်ကုန်များ၏ ဈေးနှုန်း၊ ဈေးကွက်၊ ကုန်စည်စီးဆင်းမှု သတင်းအချက်အလက်များကို ထုတ်ပြန်နိုင်ရေးအတွက် ညှိနှိုင်းအစည်းအဝေးတစ်ရပ်ကို ၅.၂.၂၀၂၀ ရက်နေ့က မွန်ပြည်နယ် စားသုံးသူရေးရာဦးစီးဌာန၊ ပြည်နယ်ဦးစီးမှူးရုံး၌ ကျင်းပပြုလုပ်ခဲ့သည်။

         အဆိုပါ အစည်းအဝေးတွင် သီးနှံများ၊ ဒေသထွက်ကုန်များ၏ ဈေးနှုန်းများ၊ ဈေးကွက်သတင်းအချက်အလက်များကို ထုတ်ပြန်နိုင်ရန် သက်ဆိုင်ရာကုန်သည်အသင်းအဖွဲ့အသီးသီးမှ ဈေးနှုန်းများကို တာ၀န်ရှိသူများက လက်မှတ်ရေးထိုး၍ ကုန်စည်ဒိုင်သို့ ပေးပို့ရမည်ဖြစ်ပြီး ကုန်စည်ဒိုင်မှ သတင်းအချက်အလက်များကို စုစည်း၍ အပတ်စဉ် တနင်္လာနေ့မှ သောကြာနေ့အထိ နေ့စဉ်ထုတ်ပြန်ပေးသွားမည် ဖြစ်ကြောင်း သိရှိရပါသည်။

မွန်ပြည်နယ်

စားသုံးသူရေးရာဦးစီးဌာန

စစ်ကိုင်းတိုင်းဒေသကြီး၊ စစ်ကိုင်းခရိုင်၊ မြောင်မြို့နယ်၊ လက်ယက်မကျေးရွာတွင် အိမ်တွင်းတပိုင်တနိုင် လုပ်ကိုင်ဆောင်ရွက်လျက်ရှိပါသည့်ထန်းလျက်လုပ်ငန်းရှင်အသင်းသို့ ၂၆.၁၂.၂၀၁၈ ရက်နေ့တွင် စစ်ကိုင်းခရိုင်၊ စားသုံးသူရေးရာဦးစီးဌာနမှ သွားရောက်၍ တွေ့ဆုံမေးမြန်းဆွေးနွေးခဲ့ပါသည်။

          ထန်းလျက်ကုလားထိုင်လုပ်ငန်းကို ၂၀၀၇-၂၀၀၈ ခုနှစ်မှ စတင်လုပ်ကိုင်ခဲ့ရာ ယခုအချိန်တွင် ရင်းနှီးမတည်ငွေ ၁၀၀,၀၀၀ိ/ ကျပ်မှ ၁၅၀,၀၀၀ိ/ ကျပ်ရှိပြီး (၁)ရက်လျှင် ကုလားထိုင်(၂) လုံးပြီးမြောက်ကြောင်း၊ စျေးကွက်ကုန်ချောကို မြောင်မြို့နယ်၊ မြင်းမူမြို့နယ်များသို့ ရောင်းချလျက်ရှိကြောင်း၊ ကုလားထိုင် ၁ လုံးလျှင် ၆၅၀၀ိ/ ကျပ်ရောင်းချပြီး ကုန်ကြမ်းကို ဒေသတွင်းမှာသာ ဝယ်ယူရကြောင်း၊ တစ်နေ့လျှင် ကုလားထိုင် ၂ လုံးပြီးအောင် လုပ်သား ၂ ဦး လုပ်ကိုင်ရကြောင်း၊ လုပ်ခနှုန်းမှာ တစ်နေ့လျှင် ၅၀၀၀ိ/ ကျပ် ပေးရကြောင်း၊ ကုန်ကြမ်းဝယ်ယူခနှင့် လုပ်သားခအတွက် စုစုပေါင်းကုန်ကျစရိတ်မှာ ၆၅၀၀ိ/ ကျပ် ဖြစ်ပြီး လုပ်ငန်းရှင်အတွက် အမြတ်ရငွေမှာ တစ်နေ့လျှင် ၆၅၀၀ိ/ ကျပ်ရရှိကြောင်း သိရှိခဲ့ရပါသည်။

သင်းယုနွယ်

စစ်ကိုင်း

တောင်သူတွေအကြိုက်နဲ့ စက်ပိုင်များမလိုက်သေးတဲ့ ဆင်းဧကရီ(၃)ခေါ် ဆင်း- ၃ သစ်အဖွင့်စျေး

          မြန်မာနိုင်ငံအထက်ပိုင်း၊ ကသာခရိုင်၊ ဆင်း ၃ ဆန် လွယ်ဂျယ်နယ်စပ်မှ တရုတ်သို့ တင်ပို့မှုရှိ နေလို့ တောင်သူများ စိုက်ပျိုးမှုများသလို ဒေသတွင်းဆန်စက်လိုင်ငန်းရှင်များ  ပွဲစားကုန်သည်များ  အလုပ်အကိုင်အခွင့်အလမ်းများရကြပါတယ်။ ၂၀၁၈ -၂၀၁၉ ခုနှစ်ကသာခရိုင် မိုးစပါး စိုက်ဧက (၃၆၃၆၄၄) ရှိပြီး ဆင်း- ၃ စပါးစိုက်ဧက ၇၅ ရာခိုင်နှုန်းရှိတယ်လို့ သက်ဆိုင်ရာဌာနက သိရပါ တယ်၊ အောက်တိုဘာလဆန်းပိုင်း အစောစိုက်စပါးစပေါ်ပြီဖြစ်ပြီး ယခင်နှစ်များနှင့်မတူ ဆင်း- ၃ စပါးတင်း တစ်ရာ (၇)သိန်းစျေးနဲ့ ဖွင့်လို့ တောင်သူများစျေးကောင်းရလို့ အကြိုက်တွေ့ပေမယ့် ဒေသတွင်း စက်ပိုင်ကုန်သည်အများစုမှာ စျေးမလိုက်သေးပဲ အကျစျေးစောင့်နေကြောင်းသိရပါသည်။

          ဆင်း- ၃ စပါးဟောင်းတင်းတစ်ရာ(၈.၅) သိန်းစျေး၊ ဆန်တစ်အိတ် ၃၅၀၀၀ ကျပ်ရှိနေပါတယ်။ စပါးဟောင်းစျေးမြှင့်တက်နေမှုအရှိန်နဲ့ စပါးသစ်စျေး လိုက်မြင့်နေတာဖြစ်နိုင်ပါတယ်၊ စပါးသစ်လှိုင် လှိုင်ပေါ်ချိန် နိုဝင်ဘာ၊ ဒီဇင်ဘာလများမှာ စျေးပြန်ကျသွားနိုင်ပါတယ်၊ ယခင်နှစ်စပါးသစ်ပေါ်ချိန် တင်းတစ်ရာ(၆)သိန်းစျေး၊ ဆန်တစ်အိတ် ၂၄၀၀၀ ကျပ်ရှိခဲ့ပါတယ်၊ တောင်သူများစျေးမြှင့်ရောင်းရပေ မယ့် ဆန်ဝယ်စားရာမှာ စျေးမြင့်ပြန်ဝယ်စားရလို့ သိမ်မထူးခြားပါဘူး၊ လက်လုပ်လက်စားတွေ အခက်ကြုံနိုင်ပါတယ်။တရုတ်အဆွဲများတဲ့ ဆင်း- ၃ ဆန်ကို  တရုတ်နယ်စပ်ကို ဗန်းမော် လွယ်ဂျယ် လမ်းကြောင်းနဲ့မန္တလေး မူဆည်လမ်းကြောင်းကနေ တင်ပို့နေကြပါတယ်၊ လက်ရှိစပါးသစ်(၇) သိန်း စျေးနဲ့ဖွင့်ပေမယ့် ဝယ်လိုအားနည်းနေပါတယ်၊စက်ပိုက်ကုန်သည်အများစုကပါ စပါးလှိုင်လှိုင်ပေါ်ချိန်နဲ့ စျေးအကျကို စောင့်နေကြတယ်လို့ ဆန်စက်လုပ်ငန်းရှင်များထံက သိရပါသည်။

          ကသာခရိုင်အဓိက ငွေကြေးလှည့်ပတ်စီးဆင်းရာမှာ ဆန်စပါးစိုက်ပျိုးထုတ်လုပ်တင်ပို့ရောင်းချ ရေးကအရေးပါလှပါတယ်၊ ၂၀၁၈-၂၀၁၉ ခုနှစ် ကသာခရိုင်အတွင်းမြို့နယ်အလိုက် မိုးစပါးစိုက်ပျိုးမှု မှာ ကသာခရိုင်မြို့နယ်(၃၂၈၁၃)ဧက၊ အင်းတော်မြို့နယ် (၅၆၃၉၆)ဧက၊ ဗန်းမောက်မြို့နယ် (၃၈၈၅၉) ဧက၊ ပင်လည်ဘူးမြို့နယ်(၅၈၈၁၄) ဧက၊ ဝန်းသိုမြို့နယ် (၃၈၇၃၀) ဧက၊ ကောလင်းမြို့နယ်(၉၇၇၉၅) ဧက၊ ထီးချိုင့်မြို့နယ်(၄၀၂၃၇)ဧက၊ ခရိုင်ချုပ်စုစုပေါင်း(၃၆၃၆၄၄)ဧကဖြစ်ပြီး အထွက်နှုန်း(၈၅.၇၈) တင်းဖြစ်ကြောင်း ခရိုင်စိုက်ပျိုးရေးဦးစီးဌာန စာရင်းများအရသိပါသည်။

                          ကြည်နိုင်ဦး(အင်းတော်)

          ဒီနှစ်မှာတော့ ရှမ်းပြည်နယ် (တောင်ပိုင်း) တွင် အောင်ပန်းနနွင်းထက် ဟိုပုန်းနနွင်းကပိုပြီး အရောင်းသွက်နေပါတယ်။ အောင်ပန်းစျေးကွက်မှာတော့ နနွင်းနဲ့ချင်းခြောက်က တစ်နှစ်ပတ်လုံးနီးပါး အရောင်းအဝယ်အေးသလို စျေးလည်းအေးနေတယ်လို့ သိရပါတယ်။ အောင်ပန်းစျေးကွက်ကိုဝင်တဲ့ နနွင်းကို ရန်ကုန်ဝယ်လက်ကပဲအဝယ် ရှိနေပြီး ရေကြောင်းကတဆင့် သွားရတဲ့ဝယ်လက်တွေက အဓိကဝယ်ယူကြတယ်လို့ သိရပါတယ်။ ပြည်ဝယ်လက်တွေကလည်း အနည်းအကျဉ်းဝယ်ယူနေပြီး လှောင်ဖို့အတွက်နဲ့ ဒေသတွင်းဖြန့်ဖို့အတွက် ဝယ်ယူနေတယ်လို့ ဆိုပါတယ်။

          အောင်ပန်းစျေးကွက်က နနွင်းကို ဝယ်ယူနေတဲ့ဝယ်လက်တွေက ချင်း (စို) ဝယ်ယူရင်းနဲ့ပဲ နနွင်းကိုလည်း လိုသလောက်ဝယ်ယူနေတာကြောင့် တစ်ပတ်အတွင်း နနွင်းပိဿချိန်ပေါင်း ခုနှစ်သောင်းခွဲခန့် အရောင်းအဝယ်ဖြစ်ခဲ့တယ်လို့လည်း သိရပါတယ်။ အခုလောလောဆယ်တော့ စျေးကွက်မှာ အဝင်မရှိတော့ပါဘူး၊ ပွဲရုံလက်ကျန်တွေနဲ့သာ အရောင်းအဝယ်ပြုလုပ်နေရတယ်လို့ သိရါတယ်။ ဒီတပတ်အောင်ပန်းစျေးကွက်မှာ နနွင်းတစ်ပိဿပေါက်စျေးက အနိမ့်ဆုံး ၁၀၀၀ိ/- မှ အမြင့်ဆုံး ၂၂၀၀ိ/- စျေးရှိပါတယ်။

၂၀၁၈ခုနှစ်၊ စက်တင်ဘာလ (၂၈)ရက်

ဧဧခိုင်(တောင်ကြီး)