ပြည်တွင်းကုန်သွယ်မှုသတင်း

     တောင်ငူမြို့တွင် ရွှေဘိုပေါ်ဆန်း တစ်အိတ်လျှင် ၁၁၀၀၀၀ ကျပ်၊ ဖျာပုံပေါ်ဆန်း တစ်အိတ်လျှင် ၁၀၃၀၀၀ ကျပ်၊ ဒေသပေါ်ဆန်း တစ်အိတ်လျှင် ၉၈၀၀၀ ကျပ်၊ ဧည့်မထ(မိုး) တစ်အိတ်လျှင် ၇၄၀၀၀ ကျပ်၊ ဧည့်မထ(နွေ) တစ်အိတ်လျှင် ၅၈၀၀၀ ကျပ်ဖြင့် ဈေးနှုန်း တည်ငြိမ်နေပါသည်။

  မိုးစပါးမှာ ယခင်အပတ်က တင်း ၁၀၀ လျှင် ၂၀၀၀၀၀၀ ကျပ်ရှိရာမှ ယခုအပတ်တွင် တင်း ၁၀၀ လျှင် ၂၁၀၀၀၀၀ ကျပ်ဖြင့် ဈေးအနည်းငယ်တက်သွားပြီး နွေစပါးမှာ တင်း ၁၀၀ လျှင် ၁၅၀၀၀၀၀ ကျပ်ဖြင့် ဈေးနှုန်းတည်ငြိမ်နေပါသည်။

 ဆန်ကွဲကြီး တစ်အိတ်လျှင် ၄၂၀၀၀ ကျပ်၊ ဆန်ကွဲသေး တစ်အိတ်လျှင် ၃၇၀၀၀ ကျပ်ဖြင့် ဈေးနှုန်းတည်ငြိမ်နေပြီး ဖွဲနုတစ်အိတ်လျှင် ယခင်အပတ်က ၂၇၀၀၀ ကျပ်မှ ယခုအပတ်တွင် ၂၈၀၀၀ ကျပ်ဖြင့် ဈေးနှုန်းအနည်းငယ်တက်ပါသည်။

    မတ်ပဲ(၃၀ ပိဿာအိတ်) တစ်အိတ်လျှင် ယခင်အပတ်က ၁၁၈၀၀၀ ကျပ်ရှိရာမှ ယခုအပတ်တွင် တစ်အိတ်လျှင် ၁၁၇၅၀၀ ကျပ်ဖြင့် ဈေးနှုန်းအနည်းငယ်ကျဆင်းပြီး ပဲလွန်းဖြူ(၃၀ ပိဿာအိတ်) တစ်အိတ်လျှင် ၇၀၀၀၀ ကျပ်ဖြင့် ဈေးနှုန်းတည်ငြိမ်နေပါသည်။ ပဲတီစိမ်းမှာ ယခုအပတ်တွင်လည်း အရောင်းအဝယ်မရှိကြောင်း သိရပါသည်။

DOCA(ပဲခူး)

    တောင်ငူမြို့နယ်၊ ကျွန်းကုန်းကျေးရွာအုပ်စု၊ ဇရပ်ကြီးကုန်းကျေးရွာမှ ဦးထွန်းနောင်၏ အသားတိုးကြက်‌မွေးမြူရေးလုပ်ငန်းသည် အတော်အသင့်အောင်မြင်နေသည့် လုပ်ငန်းတစ်ခုဖြစ်ပါ သည်။ လက်ရှိတွင် အသားတိုးကြက် အကောင်ရေ ၁၃၀၀ ကောင်ကို‌ မွေးမြူထားပါသည်။

     အသားတိုးကြက်မွေးမြူရေးလုပ်ငန်းအတွက် ကြက်သားပေါက်နှင့် ကြက်စာများကို သင့်တင့်သောဈေးနှုန်းဖြင့် ဝယ်ယူရရှိနိုင်ရန်အတွက် ကြက်သားပေါက်ထုတ်လုပ်သည့် ကုမ္ပဏီများနှင့် ကြက်စာထုတ်လုပ်သည့် ကုမ္ပဏီများကို ချိတ်ဆက်ဆောင်ရွက်ထားရပါသည်။

   ကြက်သားပေါက်တစ်ကောင်လျှင် ၁၀၀၀ ကျပ်နှုန်းဖြင့် ကုမ္ပဏီမှဝယ်ယူပြီးသည့် နေ့မှ စ၍ ရက် ၄၀ ပြည့်လျှင် ရောင်းတမ်းဝင်အသားတိုးကြက်တစ်ကောင်အဖြစ် ရောင်းချနိုင်ပါသည်။ ကြက်စာကို ကုမ္ပဏီမှ တစ်အိတ်လျှင် ၈၀၀၀၀ ကျပ်ဖြင့် ရောင်းချပေးပါသည်။ အသားတိုးကြက် တစ်ပိဿာလျှင် ၆၅၀၀ ကျပ်မှ ၇၀၀၀ ကျပ်အထိ ရောင်းချရပါသည်။

     ရက် ၄၀ ပြည့်၍ မွေးမြူထားသောကြက်များရောင်းပြီးသည့်အခါ အဆောက်အဦ၊ မီတာခ၊ အစာဖိုး၊ ဆေးဖိုးနှင့် အထွေထွေကုန်ကျစရိတ်ကိုနုတ်လျှင် ကျပ် ၁၀ သိန်းခန့် အမြတ်ကျန်ပါသည်။ တစ်ကြိမ်ရောင်းပြီး နောက်တစ်ကြိမ်ပြန်မွေးရန်အတွက် ရောဂါကင်းစင်စေရန် သန့်ရှင်းရေးပြုလုပ်ပြီး ၁၀ ရက်ခန့် နားထားရကြောင်း မွေးမြူရေးလုပ်ငန်းရှင် ဦးထွန်းနောင်၏ ပြောပြချက်အရ သိရပါသည်။

DOCA(ပဲခူး)

   ဆန်းသစ်သောအသွင်သဏ္ဍာန်ကြောင့် ဒီဇိုင်းလက်ရာအမျိုးမျိုးကိုပြုလုပ်နိုင်သော ပန်းထိမ် ပညာရှင်တို့ပင် ငိုကြွေးရသည်အထိ တုပ၍မပြုလုပ်နိုင်သောကြောင့် “ပန်းထိမ်ငိုပန်း”ဟု ခေါ်တွင် ကြောင်း ငယ်စဉ်ကပင်ကြားဖူးခဲ့ပါသည်။ ဈေးကွက်အတွင်း ရောင်းချလျက်ရှိသည့် ပန်းထိမ်ငိုပန်းမှာ အရောင်အသွေးစုံလင်သဖြင့် လူအများကြိုက်နှစ်သက်သလို၊ ဘုရားပန်းအဖြစ်လည်းကောင်း၊ အလှ ပန်းအိုးထိုးအဖြစ်လည်းကောင်း အသုံးပြုကြပါသည်။

    ယခုအခါ “ပန်းထိမ်ငိုပန်း”များကို ကန့်ဘလူခရိုင်၊ ကန့်ဘလူမြို့၊ အမှတ်(၂)ရပ်ကွက်၊ ဦးမိုး၏ခြံတွင်  တပိုင်တနိုင်စိုက်ပျိုးလျက်ရှိရာ ကန့်ဘလူမြို့နယ်တာဝန်ခံနှင့် ဝန်ထမ်းတစ်ဦးသည် (၁၆.၇.၂၀၂၃) ရက်နေ့တွင် ကွင်းဆင်းလေ့လာဆောင်ရွက်ခဲ့ပါသည်။ ခြံပိုင်ရှင်၏ ပြောပြချက်အရ ပန်းထိမ်ငိုပန်းကို ဥ ဖြင့်သော်လည်းကောင်း၊ ကိုင်းများကိုဖြတ်၍လည်း စိုက်ပျိုးနိုင်ပါသည်။ ဥများကို မတ်လတွင် စတင်စိုက်ပျိုးပြီး မေလကုန်တွင် ပန်းများကို  စတင်ခူးဆွတ်ရောင်းချရသည်။ ဇွန်၊ ဇူလိုင်လများတွင် လှိုင်လှိုင်ထွက်ရှိပြီး ဩဂုတ်လကုန် စက်တင်ဘာလဆန်းပိုင်းအထိ ခူးဆွတ်ရကြောင်း သိရှိရသည်။ ပန်းထိမ်ငိုပန်းအမျိုးအစား(၃)မျိုးအနက် တစ်ထပ်ပန်းထိမ်ငို၊ နှစ်ထပ်ပန်း ထိမ်ငိုများကို ဥပိဿာချိန် (၃၀)စိုက်ပျိုးထားရှိသည်။ ပန်းထိမ်ငိုပန်းများကို တစ်ကြိမ် စိုက်ပျိုးပြီးလျှင် (၃)နှစ်အထိ ခူးဆွတ်ရောင်းချရသည့်အတွက် စီးပွားဖြစ်စိုက်ပျိုးသင့်သော ပန်းတစ်မျိုးဖြစ် ကြောင်း သိရသည်။

    ခြံမှထွက်ရှိသော ပန်းထိမ်ငိုပန်းများကို ဖောက်သည်များပေးသလို ကိုယ်တိုင်လည်း မြို့မစည်ပင်ဈေးသို့ သွားရောက်ရောင်းချလျက်ရှိသည်။ နေ့စဉ်ရောင်းချရာတွင် (၃)ခက်ပါတစ်စည်းလျှင် ကျပ် (၅၀၀)နှုန်းဖြင့်ရောင်းချ၍ တစ်ရက်လျှင် ပန်းအစည်း(၃၀)ရောင်းချရပြီး တစ်ရက်ဝင်ငွေကျပ် (၁၅၀၀၀)ရရှိသဖြင့် စိုက်ပျိုးရန်သင့်တော်သော ပန်းတစ်မျိုး ဖြစ်ပါသည်။ ပန်းစိုက်တောင်သူများအနေဖြင့်လည်း ကုသိုလ်လည်းရ ဝမ်းလည်းဝသည့်အလုပ်ဖြစ်သဖြင့် ပန်းထိမ်ငိုပန်းများကို ပိုမိုတိုးချဲ့ စိုက်ပျိုးလျှင် အကျိုးဖြစ်ထွန်းမည်ဖြစ်ကြောင်း အကြံပြုရေးသားတင်ပြလိုက်ရပါသည်။

DOCA(စစ်ကိုင်း)

    စစ်ကိုင်းတိုင်းဒေသကြီး ၊ ကန့်ဘလူခရိုင်သည် စိုက်ပျိုးရေးလုပ်ငန်းများကို အဓိကအား ထားလုပ်ကိုင်သော ဒေသတစ်ခုဖြစ်ပါသည်။ ရှေးယခင်ကတည်းက သီးနှံစိုက်ပျိုးရာတွင် သဘာဝမြေဩဇာတစ်မျိုးဖြစ်သည့် နွားချေးကို အသုံးပြုစိုက်ပျိုးခဲ့ကြသော်လည်း ယခုအခါတွင် အထွက်နှုန်းများ ပိုမိုကောင်းမွန်စေရေးအတွက် စိုက်ပျိုးရေးသုံး ဓာတ်မြေဩဇာနှင့် ပိုးသတ်ဆေးများကို စိုက်ပျိုးသူတောင်သူများ ဝယ်ယူအသုံးပြုလျက်ရှိပါသည်။

       ကန့်ဘလူခရိုင်အတွင်းရှိ စိုက်ပျိုးသူတောင်သူများ ဝယ်ယူအသုံးပြုလျက်ရှိသော စိုက်ပျိုးရေး သုံးဓာတ်မြေဩဇာနှင့် ပိုးသတ်ဆေးများ၏ ဇူလိုင်လ( ၁ )ရက်နေ့မှ (၁၅)ရက်နေ့အတွင်း ဖြစ်ပေါ်ခဲ့ သော ဈေးနှုန်းများမှာ ပန်းဖူးသစ်(50)kg တစ်အိတ်လျှင် (၉၁၀၀၀)ကျပ်၊ မျှားကမ္ဘာ(50)kg တစ်အိတ်လျှင်(၇၁၀၀၀)ကျပ်၊ ကွန်ပေါင်း(10:10:5) (50)kg တစ်အိတ်လျှင်(၇၁၅၀၀) ကျပ်၊ ကွန်ပေါင်း(15:15:15) (50)kg တစ်အိတ်လျှင်(၁၂၂၀၀၀)ကျပ်၊ ပိုတက် (50)kg တစ်အိတ်လျှင်(၁၂၀၀၀၀)နှင့် ရွှေတောနစ် (၅၀၀)စီစီ တစ်ပုလင်းလျှင် (၁၀၅၀၀)ကျပ်၊ မိုရယ်မုန်း (၅၀၀)စီစီ တစ်ပုလင်းလျှင် (၂၂၅၀၀)ကျပ်၊ ဒီမင်း (၁)လီတာ တစ်ပုလင်းလျှင် (၂၀၅၀၀) ၊ အမ်မို (၁)လီတာ တစ်ပုလင်းလျှင် (၂၁၀၀၀)ကျပ်ဖြင့် ရောင်းချလျက်ရှိကြောင်း စိုက်ပျိုးရေးသုံးဆေးနှင့် ဆေးပစ္စည်းရောင်းချသည့် လုပ်ငန်းရှင်ထံမှ သတင်းရရှိပါသည်။

DOCA(စစ်ကိုင်း)       

  ကရင်ပြည်နယ်၊ ဘားအံမြို့၊ ရေပေါ်ဈေးတွင် အခြေခံစားသောက်ကုန်များ၏ နေ့စဉ်ကုန်ဈေးနှုန်းအခြေအနေများကို ကွင်းဆင်းကောက်ယူစာရင်းပြုစုလျက်ရှိရာ (၁၃-၇-၂၀၂၃) ရက်‌နေ့၏ ကွင်းဆင်းကောက်ယူမှုအရ ကြက်သွန်နီလက်လီဈေးနှုန်းအနည်းငယ်ကျဆင်းခဲ့ကြောင်းသိရသည်။

    ယခင်လတွင် ဈေးကွက်၌ ကြက်သွန်နီ (မြစ်သား) အလတ်စ ၁ပိဿာလျှင် လက်လီဈေး ၂၇၀၀ကျပ်၊ ၁၀ ပိဿာအိတ်ဆွဲတစ်တွဲလျှင် ၂၅၀၀၀ကျပ်ဖြင့် အရောင်းအဝယ်ဖြစ်ခဲ့သော်လည်း ယခုဇူလိုင်လ၊ ပထမအပတ်နှင့် ဒုတိယအပတ်အတွင်း ဈေးနှုန်းများပြန်လည်ကျဆင်းခဲ့ရာ (၁၃-၇-၂၀၂၃) ရက်နေ့၏ စာရင်းကောက်ယူမှုအရ လက်လီ ၁ပိဿာဈေးနှုန်းမှာ ၂၅၀၀ကျပ်နှင့် ၁၀ပိဿာအိတ်ဆွဲတစ်ဆွဲလျှင် ၂၃၀၀၀ကျပ်တို့ဖြစ်၍ ဈေးနှုန်းကျဆင်းခဲ့ကြောင်းသိရပါသည်။

    စာရင်းဇယားများအရ ကရင်ပြည်နယ်အတွင်း ကြက်သွန်နီဈေးနှုန်းများမှာ ၂၀၂၂ခုနှစ်၊ ဒီဇင်ဘာလအတွင်း ၁ပိဿာလျှင် ၄၅၀၀ကျပ်မှာ ဈေးနှုန်းအမြင့်ဆုံးဖြစ်ခဲ့ပြီး ယခုနှစ် ဧပြီလ၊ သင်္ကြန်မတိုင်မီအချိန်တွင်  ၁ပိဿာလျှင် ၁၂၅၀ကျပ်ဖြင့် အရောင်းအဝယ်ဖြစ်ခဲ့ကြောင်းသိရှိရပါသည်။

DOCA(ကရင်)