ပြည်တွင်းကုန်သွယ်မှုသတင်း

      မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူကြက်သွန်နီဈေးကွက်၌ ၂၀၂၄ခုနှစ်၊ အောက်တိုဘာလ (တတိယပတ်)တွင် ကြက်သွန်နီဈေးနှုန်းများမြင့်တက်၍ အရောင်းအဝယ်ဖြစ်လျက်ရှိပါသည်။ ဈေးကွက်သို့ဆိပ်ဖြူမြို့နယ်အတွင်းရှိ ကြက်သွန်နီစိုက်ပျိုးမှုများသော ကံတွင်း၊ အနောက်ကမ်းဖြူ၊ ဆင်နီတောင်၊ ဒေါသာ၊ ကစွယ်၊ ဇီးတော်ပင်၊ တပေါင်း၊ ရွာမကျေးရွာများနှင့် အခြားမြို့နယ်များဖြစ်သည့် ပခုက္ကူ၊ ချောက်၊ ဆင်ဖြူကျွန်း၊ စလင်းမြို့နယ်ဒေသထွက် ကြက်သွန်နီများလည်း ဝင်ရောက် အရောင်းအဝယ်ဖြစ်လျက်ရှိပြီး တစ်ရက်လျှင် ကြက်သွန်နီ ပျမ်းမျှကုန်ချိန်ပိဿာ(၅)သောင်း၊ တစ်ပတ် အတွင်း ပိဿာ(၄)သိန်းခန့် ဆိပ်ဖြူ ကြက်သွန်နီပွဲရုံ ဈေးကွက်တွင် အရောင်းအဝယ်ဖြစ်လျက်ရှိကြောင်း သိရသည်။

    ဈေးနှုန်းအနေဖြင့် အောက်တိုဘာလ(တတိယပတ်)တွင် ကြက်သွန်နီအရည်အသွေးနှင့် အရွယ်အစားလိုက်၍ ကြက်သွန်နီ တောဈေး(ဂျွန်) တစ်ပိဿာကျပ်(၂၆၀၀ - ၂၂၀၀)ဈေးအသီးသီးဖြင့် အရောင်းအဝယ်ဖြစ်ကြောင်း၊ ပွဲရုံများမှ ပြန်လည်သန့်စင်ပြီး ဥအကြီးအရွယ်အစား၊ အရောင်အဆင်း လိုက်၍ ကြက်သွန်နီ တစ်ပိဿာလျှင် ကျပ်(၃၅၀၀ - ၃၀၀၀) ဈေးဖြင့် ဒေသတွင်း နေရာအနှံ့အပြား ရောင်းချလျက်ရှိကြောင်း၊ ပြည်တွင်းဈေးကွက်အပြင် ပြည်ပအဝယ်လိုက်၍ ဈေးနှုန်းမြင့်တက်လာကြောင်း၊  အရောင်းအဝယ်ဖြစ်မှုများပြီး ပြည်ပအဝယ်လိုက်လာ၍ ဈေးနှုန်းမြင့်တက်လာခြင်းဖြစ်ကြောင်း၊ ဈေးကွက်သို့ ကုန်ဝင်ရောက်မှုများကြောင်း၊ ယခင်အောက်တိုဘာ(ဒုတိယပတ်)နှင့် ဈေးနှုန်းနှိုင်းယှဉ်ပါက ယခု(တတိယပတ်)တွင် ကြက်သွန်နီ တစ်ပိဿာလျှင် ကျပ်(၆၀၀)ခန့် ဈေးနှုန်းမြင့်တက်လာ ကြောင်း၊ နေ့စဉ် ဆိပ်ဖြူမြို့မှ ကြက်သွန်နီတင်ပို့မှု ကားအစီးရေ(၁၂)စီး၊ တစ်ပတ်အတွင်း အစီး (၆၀)ခန့် ကုန်စည်စီးဆင်း လျက်ရှိကြောင်း သိရသည်။

    ဈေးကွက်အနေဖြင့် ဒေသတွင်းကြက်သွန်နီများကို ရန်ကုန်ဘုရင့်နောင်ပွဲရုံ၊ ပြည်၊ ပုသိမ်မြို့များသို့ တင်ပို့လျက်ရှိပြီး ပြည်ပပို့ကုန်အဖြစ် မြဝတီ၊ မော်လမြိုင်မြို့များမှတစ်ဆင့် ထိုင်း၊ ဗီယက်နမ်နိုင်ငံများသို့ တင်ပို့လျက်ရှိကြောင်း၊ အောက်တိုဘာလ(တတိယပတ်)တွင် ကြက်သွန်နီ ကုန်ချိန်ပိဿာ (၄)သိန်း၊ တန်ချိန်အားဖြင့် (၆၅၃)တန်ခန့် ကုန်စည်စီးဆင်းခဲ့ကြောင်း ဈေးကွက်မှ  သိရှိရပါသည်။

DOCA(မကွေး)

     မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့နယ်သည် ၂၀၂၃-၂၀၂၄ ဘဏ္ဍာနှစ်တွင် ဆီထွက်သီးနှံ မြေပဲစိုက်ဧက (၅၀၀၀)ခန့် စိုက်ပျိုးခဲ့ကြောင်း၊ ဆိပ်ဖြူမြို့နယ်အတွင်းရှိ ဒေသခံ တောင်သူများသည် စိုက်ပျိုးမြေကောင်းမွန်မှုတို့ကြောင့် စိုက်ပျိုးရေးလုပ်ငန်းကို အဓိကစီးပွားဖြစ် စိုက်ပျိုးလုပ်ကိုင်ကြသည်။ မိသားစုစားသုံးဆီဖူလုံမှုအပြင် ပြည်တွင်းစားသုံးဆီဖူလုံရေးတို့အတွက် မိုးဦးရာသီစိုက်ပျိုးချိန်တွင် မြေပဲသီးနှံကို အဓိကသီးနှံအဖြစ် နှစ်စဉ်စိုက်ပျိုးခဲ့ကြောင်း၊ (၃)လပဲပင်ထောင်မျိုးကို အများဆုံးစိုက်ပျိုးကြောင်း သိရှိရသည်။

       ယခုလက်ရှိအချိန်တွင် ဆိပ်ဖြူမြို့နယ်အတွင်းရှိ ကျေးရွာများဖြစ်သည့် တပေါင်းအုပ်စု ကူရှည်၊ ရွာမအုပ်စု ကိုးတောင့်အုပ်စုအတွင်းရှိ ကျေးရွာများတွင် အောက်တိုဘာလဆန်းပိုင်းမှစ၍ မြေပဲသီးနှံ များ စတင်ထွက်ပေါ်လျက်ရှိပြီး မြေပဲတောင့်S₁ တစ်တင်းလျှင် ငွေကျပ်(၃၆၀၀၀-၃၄၄၀၀-၂၀၀၀၀)၊ မြေပဲလုံးဆံတစ်ပိဿာလျှင် ကျပ်(၈၀၀၀-၇၀၀၀)၊ မြေပဲဆီတစ်ပိဿာလျှင် ငွေကျပ်(၁၈၀၀၀) ဈေး အသီးသီးဖြင့် အရောင်းအဝယ်ဖြစ်ကြောင်း၊ စိုက်ပျိုးမှုကုန်ကျစရိတ်အနေဖြင့် တစ်ဧကလျှင် ငွေကျပ် (၈)သိန်းခန့် ကုန်ကျပြီး အထွက်တင်းအနေဖြင့် ပျမ်းမျှတင်း(၅၀)ခန့် ထွက်ရှိကြောင်း၊ ဈေးကွက်အနေဖြင့် ဆိပ်ဖြူမြို့နယ်အတွင်းရှိ တောင်သူအများစုသည် ဆီထွက်သီးနှံများကို ကြိတ်ခွဲ၍ မြို့ပေါ်ရှိ ဆီစက် များ၊ ဆားလှော်လုပ်ငန်းရှင်များ၊ ဒေသခံစားသုံးသူများနှင့် ချောက်မြို့ အေဝမ်းပွဲရုံသို့လည်း  ရောင်းချလျက်ရှိကြောင်း၊ စိုက်တောင်သူများအနေဖြင့်  ယခုနှစ် မြေပဲအထွက်ကောင်းပြီး ငွေကျပ် (၁၀)သိန်းခန့် အကျိုးအမြတ်ရရှိကြောင်း ဆိပ်ဖြူမြို့နယ်၊ ကူရှည်အလယ်စုကျေးရွာအတွင်းရှိ စိုက်တောင်သူတစ်ဦးထံမှ သိရှိရသည်။

DOCA(မကွေး)

       ခရမ်းမြို့နယ်၊ ကမာမတ်ကျေးရွာတွင် စားဖားအကောင်ဖောက်ရောင်းချခြင်းနှင့် မွေးမြူခြင်းလုပ်ငန်းများရှိပြီး ကမာမတ်ကျေးရွာမှ စားဖားသားပေါက်များအား ခရမ်းမြို့နယ်ကျေးရွာများဖြစ်သော ကျုံးကျုံးကျ၊ ကမာကလူ၊ ပေါက်ပင်၊ ကြူတော၊ ကမာစိန်ကျေးရွာများမှ ဝယ်ယူမွေးမြူခြင်းဖြင့် တစ်နိုင်တစ်ပိုင် မွေးမြူကြပါသည်။

      ကမာမတ်ကျေးရွာတွင်နေထိုင်သော ဦးနန်းဝေသည် စားဖားမွေးမြူခြင်းလုပ်ငန်းအား ၂၀၀၇ခုနှစ်မှစတင်၍မွေးမြူခဲ့ရာ မုဒုံမြို့နယ်မှစားဖားပေါက်များအား (၁)ကောင်လျှင် (၃၅၀)ကျပ်ဖြင့် ဖားအကောင်ရေ (၁၀၀၀)ဝယ်ယူခဲ့ရာ ကမာမတ်ကျေးရွာရောက်ရှိချိန်တွင် ဖားများမှခရီးဝေး၍ အများအားဖြင့် သေကုန်ပြီး အနည်းငယ်သာကျန်ရှိသော ဖားများအား မွေးမြူ၍ သားဖောက်ခြင်း၊ မွေးမြူခြင်းများလုပ်ကိုင်လျက်ရှိပါသည်။ စားဖားအမျိုးအစား(၂)မျိုးရှိရာတွင် ထိုင်းမျိုးနှင့် ကွင်းဖား(ဒေသဖား)ဟူ၍ရှိပြီး ထိုင်းမျိုးမှာ အဝါဖျော့ရောင်ရှိပြီး ကွင်းမျိုးဒေသဖားမှာ အမဲရောင်ရှိ၍ လူကြိုက်နည်းကြောင်းသိရပြီး အများအားဖြင့် ထိုင်းမျိုးများသာ အမွေးများကြောင်းနှင့် သားပေါက်ဝယ်ယူမွေးမြူရာတွင် ရက်(၄၀)မှစတင်၍ မွေးမြူကြပြီး သားပေါက်(၁)ကောင်လျှင် (၂၅၀-၃၀၀)ကျပ်ဈေးရှိပြီး ဖားသားပေါက် ရက်(၄၀)သားမှစတင်၍မွေးမြူခဲ့ရာ သက်တမ်းကာလ ရက်ပေါင်း(၁၀၀)၊ (၃)လခွဲအချိန်လောက်တွင် (၁)တစ်ကောင်လျှင် (၁၃)ကျပ်သားမှ (၁၅)ကျပ်သားထိအချိန်ရှိလာလျှင် ထုတ်ရောင်း၍ရပြီး စားဖား(၁)ပိဿာလျှင် လက်ရှိပေါက်ဈေး (၁၂၀၀၀မှ ၁၄၀၀၀)ကျပ်ထိရှိကြောင်း၊ စားဖားများအား ရန်ကုန်ကြည်မြင်တိုင်ငါးဈေး၊ လှိုင်မြို့နယ် ရွှေပိတောက်ငါးဈေးများတွင်ရောင်းချခြင်း၊ ပွဲစားများဖြင့် ရောင်းချခြင်းများရှိပါသည်။

            ဖားသားဖောက်ရာတွင် ဖားမ(၅)ကောင်လျှင် သားပေါက် (၅၀၀၀မှ ၁၀၀၀၀)ထိသာပေါက်နိုင်ပြီး သားပေါက်များ အမှီးပြတ်ချိန်တွင် တစ်ကောင်နှင့်တစ်ကောင်ကိုက်၍သေခြင်းများရှိ၍ ကောင်ရေ (၃၀၀၀)ခန့်သာကျန်ရှိတတ်ပြီး ဖားထီးနှင့်ဖားမများအားလည်းဆေးထိုး၍ အကောင်ဖောက်ခြင်းမျိုးဖားမ(၁)ကောင်အား တစ်နှစ်လျှင် (၁)ကြိမ်၊ (၂)နှစ်သား ဖောက်နိုင်ကြောင်းသိရပါသည်။

          စားဖားမွေးမြူရာတွင် (၁)နှစ်လျှင် (၄)ကြိမ်မွေးမြူနိုင်ပြီး အကောင်ရေ (၁၀၀၀)လျှင် မိသားစုလုပ်အားခမပါ၊ ခြံဖိုး၊ အစာဖိုးချန်ပြီး (၅)သိန်းခန့်အမြတ်ရရှိနိုင်ကြောင်းသိရပါသည်။

         စားဖားများအစာကျွေးရာတွင် (ငါး)စာဖြစ်သော ALLER AQUA၊ ဒီဟိုက်တံဆိပ်ပါ အစာအိတ် 25kg/ 30kg အိတ်များကျွေးရပြီး ဖားအကောင်(၁၀၀၀)အား အစာ 25kg၊ (၁)လလျှင် (၃)အိတ်နှုန်းကုန်ကျပြီး 25kg (၁)အိတ်လျှင် (၉၅၀၀၀/-) ဈေးဖြင့်ဝယ်ယူရပါသည်။

          စားဖားအကောင်(၁၀၀၀)မွေးမြူရန် ခြံဆောက်ခအနေဖြင့် တာပေါ်လင်၊ အမိုးဇာပိုက်၊ ဝါးဝယ်ယူကုန်ကျစရိတ်နှင့် ခြံဖိုးစုစုပေါင်း (၂၃၀၀၀၀)ကျပ်ခန့်ကုန်ကျ၍ ခြံမပျက်စီးမချင်း ဖားထည့်၍ မွေးမြူရပါသည်။

         ယခင်နှစ်များတွင် ဖားဈေးကောင်းရသော်လည်း ယခုနှစ်တွင် ဖားဝယ်ယူမှုလျော့နည်းလာခြင်း၊ အစာဈေးများမြင့်တက်လာခြင်းများကြောင့် ဖားမွေးမြူသူများမှာ ယခင်နှစ်များထက် လျော့နည်းခဲ့ကြောင်းသိရှိရပါသည်။

DOCA(ရန်ကုန်) 

           မကွေးတိုင်းဒေသကြီး၊ ပခုက္ကူခရိုင်အတွင်းရှိ မြို့နယ်များသည် စိုက်ပျိုးရေးကိုအခြေပြု၍ နှစ်စဉ် စပါး၊ ဝါ၊ ဆေးရွက်ကြီးနှင့် ဆီထွက်သီးနှံမျိုးစုံ၊ ပဲမျိုးစုံ၊ ကုန်စိမ်းသီးနှံများ နှစ်စဉ်စိုက်ပျိုးကြပြီး ပြည်တွင်းဈေးကွက်ဝင် ပြည်ပပို့ကုန်သီးနှံတစ်မျိုးဖြစ်သည့် အစေ့ထုတ်ပြောင်း(CP)ကိုလည်း နှစ်စဉ်စိုက်ပျိုးကြပြီး ၂၀၂၃-၂၀၂၄ ဘဏ္ဍာနှစ်တွင် ပခုက္ကူမြို့နယ်တွင် စိုက်ဧက(၂၀၀၀)၊ ရေစကြိုမြို့နယ်တွင် စိုက်ဧက (၉၀၀၀)၊ ပေါက်မြို့နယ်တွင် စိုက်ဧက(၄၀၀၀)၊ မြစ်ခြေမြို့နယ်တွင် စိုက်ဧက(၅၀၀)ခန့်စိုက်ပျိုးကြောင်း၊ တစ်ဧကစိုက်ပျိုးထုတ်လုပ်မှုကုန်ကျစရိတ်အနေဖြင့် ငွေကျပ်(၇)သိန်းကုန်ကျကြောင်း၊ အထွက်နှုန်းမှာ ပျမ်းမျှတင်း(၇၀)ခန့်ထွက်ရှိကြောင်း၊ အကျိုးအမြတ်အနေဖြင့် ကျပ်(၁၈)သိန်း ခန့်ရရှိကြောင်း သိရသည်။

           အစေ့ထုတ်ပြောင်း(CP) စိုက်ပျိုးမှုအနေဖြင့် နိုဝင်ဘာလတွင် စတင်စိုက်ပျိုးပြီး ဖေဖော်ဝါရီ၊ မတ်လတွင် သီးနှံရိတ်သိမ်းပြီး ဈေးကွက်သို့ စတင်အရောင်းအဝယ်ဖြစ်ကြောင်း၊ ဈေးနှုန်းအနေဖြင့် သီးနှံပေါ်စဒေသတွင်းဈေးကွက်တွင် အစေ့ထုတ်ပြောင်း(CP) ကျပ်(၂၀၀၀၀)ဈေးဖြင့် အရောင်းအဝယ်ဖြစ်ခဲ့ပြီး ပြည်ပအဝယ်လိုက်၍ ဈေးနှုန်းမြင့်တက်ခဲ့ရာ စက်တင်ဘာလ(ပထမပတ်)တွင် အစေ့ထုတ်ပြောင်း(CP) တစ်တင်းလျှင် ကျပ်(၃၀၀၀၀)ခန့်ဈေးဖြင့် အရောင်းအဝယ်ဖြစ်ပြီး အောက်တိုဘာ(ဒုတိယ ပတ်)တွင် တစ်တင်းလျှင် ကျပ်(၃၃၀၀၀)ဈေးဖြင့် အရောင်းအဝယ်ဖြစ်ကြောင်း၊ ဒေသတွင်း သီးနှံလက်ကျန်နည်း၍ တစ်ပတ်အတွင်းပိဿာ(၃၀)ဝင်အိတ်ရေ(၂၀၀)ခန့် အရောင်းအဝယ်ဖြစ်ကြောင်း၊ ဈေးကွက် အနေဖြင့် ပြည်တွင်းမွေးမြူရေးလုပ်ငန်းရှင်များမှ ဝယ်ယူလျက်ရှိပြီး ပြည်ပ ထိုင်း၊ တရုတ် နိုင်ငံများသို့လည်း အဓိကတင်ပို့လျက်ရှိကြောင်း၊ ယခုအချိန်တွင် ဈေးကွက်၌ အစေ့ထုတ်ပြောင်း(CP)စေ့ (အဟောင်း)များသာ အရောင်းအဝယ်ဖြစ်လျက်ရှိကြောင်း သိရသည်။

          အစေ့ထုတ်ပြောင်း(CP)ကို ပြည်တွင်းစားသုံးမှုနည်းသော်လည်း မွေးမြူရေးလုပ်ငန်းများမှ တိရိစ္ဆာန်အစာအဖြစ်အသုံးပြုပြီး အပင်မှရရှိသော အရွက်၊ အရိုး၊ အမြစ်များကိုလည်း ကျွဲ၊ နွားများအတွက် တိရိစ္ဆာန်အစားအစာအဖြစ် အသုံးဝင်သည့်အပြင် ပြည်ပပို့ကုန်အဖြစ် နှစ်စဉ်တင်ပို့လျက်ရှိ၍ ပြည်တွင်းဈေးကွက်ခိုင်မာပြီး အရောင်းအဝယ်ဖြစ်လျက်ရှိခြင်းကြောင့် စိုက်တောင်သူများအနေဖြင့် နှစ်စဉ်တိုးချဲ့ စိုက်ပျိုးလျက်ရှိကြောင်း သိရှိရပါသည်။

DOCA(မကွေး)

             မကွေးတိုင်းဒေသကြီး၊ ပေါက်မြို့နယ်သည် စိုက်ပျိုးရေးနှင့် မွေးမြူရေးကိုအခြေခံ၍ စီးပွားဖြစ်လုပ်ကိုင်ကြပြီး ရာသီအလိုက်သီးနှံမျိုးစုံကို သီးသန့်သီးညှပ်အပြင် သီးထပ်အဖြစ်လည်းစိုက်ပျိုးကြောင်း၊ ပဲမျိုးစုံစိုက်ပျိုးမှုမှ ပြည်တွင်းဈေးကွက်ဝင် ပြည်ပပို့ကုန်ပဲတစ်မျိုးဖြစ်သည့် ပဲစဉ်းငုံသီးနှံကိုလည်း ရေမြေရာသီဥတုနှင့် ကိုက်ညီ၍ စိုက်ဧကများစွာစိုက်ပျိုးကြောင်း၊ ၂၀၂၄-၂၀၂၅ဘဏ္ဍာနှစ်တွင် စိုက်ဧက (၇၀၀၀)ခန့် စိုက်ပျိုးပြီး ယခုနှစ်တွင် သီးနှံပေါ်ချိန်မှ ကုန်ဆုံးချိန်အထိ ဒေသတွင်းအရောင်းအဝယ်ဖြစ်မှုအပြင် ပြည်ပဝယ်လိုအားဈေးကွက်ကောင်း၍ အကျိုးအမြတ်များစွာရရှိခြင်းကြောင့် စိုက်ဧက(၈၀၀၀)ခန့်ထိ တိုးချဲ့စိုက်ပျိုးကြောင်း သိရသည်။

             ပေါက်မြို့နယ်အတွင်းရှိ မြောက်ဘက်၊ ရှားတောအုပ်စုအတွင်းရှိ ကျေးရွာများတွင် ပဲစဉ်းငုံသီးနှံစိုက်ဧက(၁၀၀၀)ခန့်စိုက်ပျိုးလျက်ရှိကြောင်း၊ မျိုးအနေဖြင့် အဝါ၊ အနီ အလုံးကြီးသက်ကြီးမျိုးကိုစိုက်ပျိုးကြောင်း၊ နွားရှဉ်းဖြင့်ထွန်ချောင်းဆွဲ၍ အစေ့ချစိုက်ပျိုးပြီး ပင်ကြား ၂ ပေ၊ တန်းကြား ၄ ပေအကွာ စိုက်ပျိုးကြောင်း၊ ပဲစဉ်းငုံတစ်တန်းနှင့်တစ်တန်းကြားတွင် ပဲတီစိမ်း၊ မြေပဲ၊ ပဲလွန်း၊ နှမ်း၊ နေကြာသီးနှံများ သီးညှပ်အဖြစ်စိုက်ပျိုးကြောင်း၊ တစ်ဧကကုန်ကျစရိတ် သွင်းအားစု၊ လုပ်သားခ အပါအဝင် ကျပ်(၃)သိန်း ခန့်ကုန်ကျကြောင်း သိရှိရသည်။

           စိုက်ပျိုးမှုအနေဖြင့် မိုးဦးရာသီ ဇွန်လတွင် စတင်စိုက်ပျိုးပြီး ဖေဖော်ဝါရီလတွင် သီးနှံထွက်ပေါ်မည်ဖြစ်ကြောင်း၊ တစ်ဧကတွင် အထွက်တင်း(၉-၁၀)တင်းခန့် ထွက်ရှိကြောင်း၊ တောင်သူတစ်ဦးချင်း သွင်းအားစု သုံးစွဲပုံနှင့် စိုက်ပျိုးမြေမတူညီ၍ အထွက်တင်းကွာခြားကြောင်း၊ ယခင်နှစ်သီးနှံပေါ်ချိန် ဒေသတွင်းဈေးကွက်၌ တစ်တင်းလျှင် ကျပ်(၁၂၀၀၀၀-၁၅၀၀၀၀)ဈေးအမြင့်ဖြင့် ရောင်းချရ၍ တစ်ဧက ငွေကျပ်(၁၂)သိန်းခန့် အကျိုးအမြတ်ရရှိကြောင်း၊ ယခုအောက်တိုဘာ(ဒုတိယပတ်) သီးနှံဈေးကွက်တွင် တစ်တင်းလျှင် ငွေကျပ်(၁၄၃၀၀၀)ဈေးဖြင့် သီးနှံအဟောင်းများ အရောင်းအဝယ်ဖြစ်လျက်ရှိကြောင်း၊ ဈေးကွက်အနေဖြင့် ထွက်ရှိသည့်သီးနှံများကို ပခုက္ကူမြို့ပေါ်ရှိပွဲရုံများသို့ တင်ပို့ရောင်းချပြီး ထိုမှ တစ်ဆင့် ပြည်ပ အိန္ဒိယ၊ တရုတ်နိုင်ငံများသို့ တင်ပို့လျက်ရှိကြောင်း၊ ယခုအချိန်တွင် စိုက်ပင်များအပွင့် အသီးလိုက်ပြီး အောင်မြင်ဖြစ်ထွန်းလျက်ရှိကြောင်း၊ ယခုနှစ်တွင်လည်း အထွက်နှုန်းကောင်းမွန်ပြီး သီးနှံပေါ်ချိန် ဈေးကောင်းရရှိပါက တောင်သူအဆင်ပြေမည်ဖြစ်ကြောင်း မြောက်ဘက်ကျေးရွာရှိ ဒေသခံတောင်သူတစ်ဦးထံမှ သိရှိရသည်။

             ပဲစဉ်းငုံသီးနှံသည် ပြည်ပပို့ကုန် သီးနှံတစ်မျိုးဖြစ်၍ ဈေးကွက်ကောင်းမွန်ခြင်းနှင့် စိုက်တောင်သူများအနေဖြင့် စိုက်ပျိုးစရိတ်ကုန်ကျမှုနည်း၍ အလွယ်တကူရရှိပြီး အကျိုးအမြတ်ရရှိခြင်းကြောင့် နှစ်စဉ်မပြတ် တိုးချဲ့စိုက်ပျိုးသင့်သည့် သီးနှံတစ်မျိုးဖြစ်ကြောင်း သိရှိရပါသည်။

DOCA(မကွေး)