ပြည်တွင်းကုန်သွယ်မှုသတင်း

            မြန်မာနိုင်ငံ၏ရာသီဥတုမှာ တစ်နှစ်ထက်တစ်နှစ်ပို၍ပူပြင်းလာသဖြင့် လူအများမှာ အပူဒဏ်ကို နွေရာသီရောက်တိုင်း နှစ်စဉ်လိုလိုခံစားရပါသည်။ ထိုသို့အပူဒဏ်ကို အံတုကာကွယ် နိုင်ရန်အတွက် လူတို့၏ကိုယ်ခန္ဓာတွင် အေး၍ပေါ့ပါးလွတ်လပ်သော အဝတ်အထည်များကိုရွေးခြယ်၍ ဝတ်ဆင်ကြပါသည်။  ထိုသို့ဝတ်ဆင်ကြသဖြင့် ချည်ထည်လုပ်ငန်းရက်လုပ်သော ရက်ကန်းစင်များတိုးတက်လာခဲ့ပါသည်။ ပြည်ခရိုင်အနေဖြင့် ရွှေတောင်မြို့နယ်တွင် မြန်မာရိုးရာစည်းလုပ်ငန်းလုပ်ကိုင်သူ (၆၆)ဦးခန့်ရှိကြောင်း သိရပါသည်။ ယခင်ကရွှေတောင်မြို့နယ်ရှိ ကျီးသဲရွာနှင့်မြို့မရွာတို့တွင် စီးပွားဖြစ်ရက်ကန်းစင်များရှိသလို တစ်နိုင်တစ်ပိုင် ရက်ကန်းစင်များလည်းရှိပြီး ရှေးယခင်ကပင် ရက်ကန်းလုပ်ငန်းဖြင့် ထင်ပေါ်ကျော်ကြားခဲ့ပါသည်။ ရွှေတောင် ကျီးသဲရွာတစ်ရွာလုံး၏ အသက်မွေးဝမ်းကျောင်းမှာ ပိုးထည်ရက်လုပ်ခြင်းလုပ်ငန်းဖြစ်ပါသည်။ နောက်ပိုင်းတွင် ပိုးထည်အပြင် ချည်ထည်များကိုပါ တိုးချဲ့ထုတ်လုပ်လာကြောင်း သိရပါသည်။ ထိုသို့ချည်ထည်များအဖြစ်ပြောင်းလဲထုတ်လုပ်ရာတွင် အမျိုးသားဝတ်၊ အမျိုးသမီးဝတ် ချည်ချောနှင့် ချည်ကြမ်းလုံချည်များကို ရက်လုပ်လာကြပါသည်။ ရွှေတောင်စည်းလုံချည် အဓိကပညာရပ်မှာ သားရေကွင်းဖြင့်စည်း၍ လိုချင်သောအပွင့်အမျိုးမျိုးကိုပုံဖော်ပြီး ဆေးရောင်အမျိုးမျိုးဆိုး၍ ရောင်းတန်းဝင်သော စည်းလုံချည်ကိုရရှိပါသည်။

          စက်မှုကုန်ကြမ်းသီးနှံဖြစ်သော ဝါမှတစ်ဆင့် ဝါဂွမ်း၊ ဝါဂွမ်းမှတစ်ဆင့် ချည်ငင်ပြီး ချည်ထည်များကို ယက်လုပ်၍ရောင်းချကြပါသည်။ ချည်ထည်များတွင် ၂/၈၀ နှင့် ၂/၁၀၀ ချည်ဟူ၍ရှိပြီး ၂/၁၀၀ချည်မှာ ပွဲတိုးပြီးတန်ဖိုးရှိသော ချည်အမျိုးအစားဖြစ်ပါသည်။ ယခင်က မြန်မာ့ရိုးရာလက်ရက်ကန်းစင်ပေါင်း မြောက်များစွာရှိပြီး ခေတ်မီတိုးတက်လာသည်နှင့်အမျှ လက်ရက်ကန်းများနည်းလာပြီး စက်ရက်ကန်းများဖြင့် အစားထိုးလာကြပါသည်။ ထိုသို့ စက်ရက်ကန်း များဖြင့် အစားထိုးထုတ်လုပ်လာကြသဖြင့် အသေးစား၊ အငယ်စား၊ အလတ်စား MSMEs လုပ်ငန်းများ ဖွံ့တိုးတက်လာကြပါသည်။ စက်ရက်ကန်းများဖြင့် ချည်ထည်များကို ထုတ်လုပ်လာကြသဖြင့် အချိန်တိုအတွင်း ကွင်းရေအများအပြားထုတ်လုပ်လာနိုင်ကြသလို ခေတ်မီ သေသပ်လှပသော ချည်ထည်များရရှိလာမည်ဖြစ်ပါသည်။ ထိုသို့သေသပ်လှပသော ချည်ထည် များကို ပြည်တွင်းတွင် သုံးစွဲသည့်အပြင် ပြည်ပသို့လည်းထိုးဖောက်ရန် စီစဉ်လျှက်ရှိပါသည်။ ပြည်တွင်းဈေးကွက်အနေဖြင့် ရွှေတောင်မြို့မှထွက်ရှိသော ချည်ထည်များကို ရွှေတောင်မြို့နှင့် အနီးနားရှိမြို့များ၊ ပြည်မြို့၊ ရန်ကုန်မြို့၊ မန္တလေးမြို့နှင့် နေပြည်တော်မြို့များသို့ တင်ပို့ရောင်းချကြပါသည်။ ယခင်က ကမ္ဘာလှည့်ခရီးသွားသော နိုင်ငံခြားသားဧည့်သည်များက ရက်ကန်းစင်များသို့သွားရောက်၍ မြန်မာ့ရိုးရာချည်ထည် ထုတ်လုပ်ပုံများကို လာရောက်လေ့လာ၍ နှစ်ခြိုက်စွာဝယ်ယူကြပါသည်။ စည်းလုံချည် ဈေးနှုန်းများအနေဖြင့် ၂/၁၀၀ကျစ်ပိုး စည်းဝမ်း ဆက်တစ်စုံလျှင် ၂၃၀၀၀ကျပ်၊ 3D ပိုးစည်းတစ်စုံလျှင် ၂၅၀၀၀ကျပ်၊ စည်းလုံချည် (ရိုးရိုး)ဝမ်းဆက်တစ်စုံလျှင် ၂၂၀၀၀ကျပ်ဖြင့် ရောင်းချသလို အမျိုးသားဝတ်ပုဆိုးများဖြစ်သော အင်းမပုဆိုး၊ ချည်ပုဆိုး အမျိုးမျိုးကို ထုတ်လုပ်၍ရောင်းချကြပါသည်။ အမျိုးသမီးဝတ် အင်္ကျီများကိုလည်း ပုံစံအမျိုးမျိုးချုပ်၍ ရောင်းချကြ ပါသည်။

          ပူးပြင်းသောရာသီဥတုအပြင် ကျန်မိုးနှင့် ဆောင်းလများတွင်လည်း ဝတ်ဆင်နိုင်ကြသဖြင့် ဝတ်ဆင်သူများအနေဖြင့်လည်း ပြည်တွင်းဖြစ်ကိုအားပေး၍ ဈေးသက်သာစွာဝယ်ယူဝတ်ဆင်နိုင်ကြသလို  ထုတ်လုပ်သူများအနေဖြင့်လည်း တွက်ချေကိုက်ကြပါသည်။ နိုင်ငံတော်အနေဖြင့်လည်း ဝါကုန်ကြမ်းသီးနှံမှတစ်ဆင့် တန်ဖိုးမြှင့်ထုတ်ကုန်များထုတ်လုပ်လာနိုင်သဖြင့် အသေးစား၊ အငယ်စား၊ အလတ်စား MSMEs လုပ်ငန်းရှင်များကို အားပေးကူညီလျက်ရှိရာ လုပ်ငန်းရှင်များအနေဖြင့် တန်ဖိုးမြှင့်ထုတ်ကုန်များ ပိုမိုတိုးတက်ထုတ်လုပ်လာနိုင်မည်ဖြစ်ပါက မိမိတို့အနေဖြင့်လည်း အကျိုးရှိသလို၊ နိုင်ငံတော်အနေဖြင့်လည်း  MSMEs လုပ်ငန်းများ အောင်မြင်ဖြစ်ထွန်းလာပြီး နိုင်ငံခြားဝင်ငွေများ ရရှိလာနိုင်မည်ဖြစ်ပါသည်။

          ထို့ကြောင့် ပြည်ခရိုင်အတွင်း ရွှေတောင်မြို့နယ်တွင်သာမကဘဲ အခြားမြို့နယ်များတွင်လည်း မြန်မာ့ရိုးရာချည်ထည်လုပ်ငန်းများကို တိုးချဲ့လုပ်ကိုင်လာနိုင်မည်ဆိုပါက ချည်ထည် လုပ်ငန်းအနေ ဖြင့် MSMEs လုပ်ငန်းများတိုးတက်လာနိုင်မည်ဖြစ်ပါကြောင်း လေ့လာသိရှိရပါသည်။

DOCA(ပဲခူး)

ဧရာဝတီတိုင်းဒေသကြီး၊ ဟင်္သာတခရိုင်၊ ဟင်္သာတမြို့နယ်၊ ဇလွန်မြို့နယ်နှင့် လေးမျက်နှာမြို့နယ်အတွင်းရှိ ကျေးရွာများတွင် ပီလောပီနံကိုစိုက်ပျိုးကြပြီး ဟင်္သာတမြို့နယ်တွင် ၃၇၅၆ဧက၊ ဇလွန်မြို့နယ်တွင် ၆ဧက၊ လေးမျက်နှာမြို့နယ်တွင် ၅၅၀၉ဧက၊ စုစုပေါင်းစိုက်ဧက ၉၂၇၁ဧကစိုက်ပျိုးထားရှိကြောင်းသိရသည်။
ပီလောပီနံသည် ရေမတင်သဲဆန်သည့်မြေများတွင် စိုက်ပျိုးဖြစ်ထွန်းအောင်မြင်ပြီး မြေပုံ၍စိုက်ပျိုးခြင်းနှင့် ဘောင်ခတ်စနစ်ဖြင့် စိုက်ပျိုးခြင်းဟူ၍ စိုက်ပျိုးကြကြောင်း၊ ပီလောပီနံကို မေလတွင် စတင်စိုက်ပျိုးကြပြီး ဒီဇင်ဘာလကုန်တွင် စတင်တူးဖော်ရကြောင်း၊ တစ်ဧကလျှင် အပင်ရေ ၂၄၀၀ ခန့်စိုက်ပျိုးရကြောင်း၊ အထွက်နှုန်းအနေဖြင့် တစ်ဧကလျှင် ပျှမ်းမျှပိဿာချိန် ၃၀၀၀ ခန့်ထွက်ရှိပြီး ပီလောပီနံထွက်ရှိချိန်တွင် ပီလောပီနံဥတစ်ပိဿာလျှင် ငွေကျပ် ၅၀၀-၆၀၀-၇၀၀ ဖြင့်ရောင်းချရကြောင်း၊ တစ်ဧကလျှင် ကျပ်၉သိန်းခန့်အမြတ်ရရှိပြီး ဈေးကွက်အနေဖြင့် ဟင်္သာတခရိုင်မှ ထွက်ရှိသော ပီလောပီနံများကို ဒေသတွင်းရောင်းချမှုအပြင် ရန်ကုန်ဈေးကွက်သို့ တင်ပို့ရောင်းချကြောင်းသိရှိရပါသည်။
DOCA(ဧရာဝတီ)

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် ကုန်စည်ဒိုင်များ၏ သီးနှံဈေးနှုန်းများနှင့် အရောင်းအဝယ်ဖြစ်မှုတင်း/ တန်စာရင်း တို့ကို အပတ်စဉ်၊ လစဉ်တင်ပြလျက်ရာ အောက်တိုဘာလ၊ စတုတ္ထအပတ်အတွင်း အရောင်းအဝယ်ဖြစ်သည့် သီးနှံနှင့်ဈေးနှုန်းအခြေအနေများကို ရွှေဘိုမြို့ ပဲ၊ နှမ်းကုန်စည်ဒိုင်ရှိ တာဝန်ရှိသူများနှင့် ဆက်သွယ်မေးမြန်းခဲ့ပါသည်။ အစေ့ထုတ်ပြောင်းမှာ စက်တင်ဘာလ၊ ဒုတိယအပတ်မှစတင်၍ ရွှေဘိုဈေးကွက်သို့ စတင်ဝင်ရောက်ခဲ့ပြီး အောက်တိုဘာလ၊ စတုတ္ထအပတ်တွင် အရောင်းအဝယ်ဖြစ်သည့်ဈေးနှုန်းမှာ အစေ့ထုတ်ပြောင်းတစ်တင်းလျှင် (၂၄၀၀ဝိ/-)ကျပ်ပေါက်ဈေးရှိပြီး တစ်ပတ်အတွင်း အရောင်းအဝယ်ဖြစ်မှုမှာ (၁၈၀၀၀)တင်း/ (၄၄၉)တန်ဖြစ်ကြောင်း၊ ယခင်အပတ်နှင့် ယခုအပတ်တို့၏ အရောင်းအဝယ်ဖြစ်သည့် ဈေးနှုန်းတို့ကိုနှိုင်းယှဉ်ပါက ယခင်အပတ်၌ အစေ့ထုတ်ပြောင်းတစ်တင်းလျှင် (၂၃၅၀ဝိ/-)ကျပ်ပေါက်ဈေးရှိခဲ့သဖြင့် ယခုအပတ်တွင် ယခင်အပတ်ထက် အစေ့ထုတ်ပြောင်းတစ်တင်းလျှင် (၅၀ဝိ/-)ကျပ်ပိုမိုရရှိခဲ့ကြောင်း၊ ယခင်နှစ်ကာလတူနှင့် အရောင်းအဝယ်ဖြစ်သည့် ဈေးနှုန်းတို့ကိုနှိုင်းယှဉ်ပါက ယခင်နှစ်ကာလတူ၌ အစေ့ထုတ်ပြောင်းတစ်တင်းလျှင် (၁၇၀၀ဝိ/-)ကျပ်ပေါက်ဈေးရှိခဲ့သဖြင့် ယခုနှစ်တွင် ယခင်နှစ်ကာလတူထက် အစေ့ထုတ်ပြောင်းတစ်တင်းလျှင် (၇၀၀ဝိ/-) ကျပ်ဈေးပိုမိုရရှိခဲ့ကြောင်း၊ ရွှေဘိုဈေးကွက်သို့ အစေ့ထုတ်ပြောင်းများ အဝင်များသော်လည်း ဝင်ရောက်သမျှ အရောင်းအဝယ်ဖြစ်လျက်ရှိကြောင်း သတင်းရရှိပါသည်။
DOCA(စစ်ကိုင်း)

စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေးလုပ်ငန်းများဆောင်ရွက်လျက်ရှိပြီး ပုဂ္ဂလိကကဏ္ဍဖွံ့ဖြိုးတိုးတက်ရေးအတွက် စီးပွားရေးလုပ်ငန်းရှင်များနှင့်တွေ့ဆုံ၍ အခြေခံစားကုန်ဈေးနှုန်းများ၊ ဓာတ်မြေဩဇာနှင့် ပိုးသတ်ဆေးဈေးနှုန်းများအား အပတ်စဉ်တင်ပြလျက်ရှိပါသည်။
အောက်တိုဘာလ၊ စတုတ္ထအပတ်တွင် ရွှေဘိုမြို့၌ရောင်းချလျက်ရှိသော ဓာတ်မြေဩဇာနှင့် ပိုးသတ်ဆေးဈေးနှုန်းများမှာ ဇာမဏီတံဆိပ်(၁၃:၅:၇) ကွန်ပေါင်းဓာတ်မြေဩဇာ 50kg တစ်အိတ်လျှင် (၉၇၀၀ဝိ/-)ကျပ်၊ အာမို၊ ပုလဲတံဆိပ် ကွန်ပေါင်းဓာတ်မြေဩဇာတစ်အိတ်လျှင် (၁၁၀၀၀ဝိ/-)ကျပ်နှင့် ဒီမွန် 1.8 တံဆိပ် ထိသေ/စားသေ (အဆိပ်ငွေ့) 500cc တစ်ဘူးလျှင် (၂၀၀၀ဝိ/-)ကျပ်၊ ငှက်ကြီးတောင်တံဆိပ် ထိသေ/ စားသေ(အဆိပ်ငွေ့) 100cc တစ်ဘူးလျှင် (၃၇၅၀ဝိ/-)ကျပ်၊ ဇိုင်ကလုံးတံဆိပ် ပင်လုံးပြန့်ပိုးသတ်ဆေး 500cc တစ်ဘူးလျှင် (၄၄၀၀ဝိ/-)ကျပ်ဖြင့်ရောင်းချလျက်ရှိပြီး အာမို၊ ကျွဲနက်တံဆိပ် (၁၅:၁၅:၁၅)ကွန်ပေါင်း ဓာတ်မြေဩဇာ၊ ပန်းဖူးတံဆိပ် ဓာတ်မြေဩဇာ၊ MC တံဆိပ်(၁၅:၁၅:၁၅) ကွန်ပေါင်းဓာတ်မြေဩဇာနှင့် ရှောင်လင်တံဆိပ် ထိသေ/ စားသေ(အဆိပ်ငွေ့)ပိုးသတ်ဆေးများမှာ ဈေးကွက်အတွင်း ပစ္စည်းပြတ်လျက်ရှိကြောင်း ဓာတ်မြေဩဇာနှင့် ပိုးသတ်ဆေးအရောင်းဆိုင်များမှ တာဝန်ရှိသူများနှင့်ဆက်သွယ်မေးမြန်းမှုအရ သတင်းရရှိပါသည်။
DOCA(စစ်ကိုင်း)

          တောင်ငူမြို့တွင် စက်တင်ဘာလလယ်ပိုင်းက ရေကြီးနစ်မြှုပ်မှုဖြစ်ပွားခဲ့သဖြင့် ဒေသတွင်း ဟင်းသီးဟင်းရွက်စိုက်ခင်းများပျက်စီးခဲ့ရပြီး လမ်းပန်းဆက်သွယ်ရေးပြတ်တောက်မှုကြောင့် ဟင်းသီးဟင်းရွက်များ ဈေးနှုန်းကြီးမြင့်မှုဖြစ်ပေါ်ခဲ့ပါသည်။

        ရှမ်းပြည်နယ်တောင်ပိုင်း တောင်ကြီးဒေသမှ ဝင်ရောက်လာသော ခရမ်းချဉ်သီးများမှာ အလုံးအသေး အကြီးပေါ် မူတည်၍ ယခင်စက်တင်ဘာလ နောက်ဆုံးအပတ်က တစ်ပိဿာလျှင် ၃၀၀၀ ကျပ်မှ ၅၀၀၀ ကျပ်အထိ ရှိခဲ့ရာမှ ယခုအောက်တိုဘာလ တတိယအပတ်တွင်တစ်ပိဿာလျှင် ၅၀၀၀ ကျပ်မှ ၈၀၀၀ ကျပ်အထိဖြင့် ဈေးနှုန်းတက်ခဲ့ပါသည်။

          ဒေသတွင်း ခရမ်းချဉ်သီးများမှာ စစ်တောင်းမြစ်ဝှမ်း ရေကြီးရေလျှံမှုကြောင့် စိုက်ခင်းများပျက်စီးခဲ့ရသဖြင့် တောင်ငူမြို့ရှိဈေးများ၌ ဒေသခရမ်းချဉ်သီးများ ပြတ်လပ်လျက်ရှိကြောင်းနှင့် တောင်ကြီးသီးများမှာ ဈေးမြင့်သော်လည်း အရောင်းအဝယ်မှာ ပုံမှန်အတိုင်းရှိကြောင်း သိရှိရပါသည်။

DOCA(ပဲခူး)