ပြည်တွင်းကုန်သွယ်မှုသတင်း

     ၂၀၂၄ ခုနှစ်၊ ကရင်ပြည်နယ် ဘာအံမြို့၏ ဈေးကွက်အတွင်း ဆောင်းရာသီကြံရည်ဈေးကွက်မှာလည်း ဈေးကောင်းရလျက်ရှိကြောင်း သိရသည်။ ကြံကို ဘားအံမြို့ အနီးတဝိုက် ကျေးရွာများတွင် တစ်နိုင်တပိုင်စိုက်ပျိုးကြသည့်အပြင် စီးပွားဖြစ်လည်းစိုက်ပျိုးကြသည်။ ဘားအံမြို့ ဈေးကွက်အတွင်းသို့ ဝင်ရောက်လာသော ကြံများမှာ ဘားအံမြို့အနီးရှိကျေးရွာများနှင့် မော်လမြိုင်ဘက်တို့မှ ဖြစ်သည်။

   ဆောင်းတွင်းကာလဖြစ်သော်လည်း သဘာဝဖျော်ရည်တစ်ခုဖြစ်သည့် ကြံရည်ဆိုင်လေးများ တွေ့လာရသည်။ ကြံရည်ကို ရေခဲထည့်ပြီးသောက်လို့ ရသလို သံပုရာသီး၊ ဂျင်း၊ မြင်းခွာရွက်၊ ပူစီနံရွက်နှင့်အခြားအချိုရည်အချို့နဲ့လည်း ရောထည့်ပြီးသောက်ရင် အရသာရှိသလို ရင်အေးသွားစေတဲ့ သောက်စရာ သဘာဝအဟာရအချိုရည် တစ်မျိုးဖြစ်ပါသည်။ အခြား သောက်စရာတွေနဲ့ မတူဘဲ သကြားစစ်စစ်ကနေရတဲ့ အချိုရည်ဖြစ်တာကြောင့် ခန္ဓာကိုယ် ရေဓာတ်ကိုလည်းဖြည့်ပေး နိုင်ပါသည်။

   ဆောင်းရာသီကာလတွင် ကရင်ပြည်နယ်၊ ဘားအံမြို့ဒေသထွက် ကြံဈေးနှုန်းများမှာ ၁၀ချောင်းပါ တစ်စည်းဈေးနှုန်း (၁၅၀၀၀)ကျပ်၊ ကြံရည်တစ်ခွက်ဈေးနှုန်း (၁၅၀၀)ကျပ်နှုန်း တို့ဖြင့်  အရောင်းအဝယ်ဖြစ်လျက်ရှိကြောင်း သိရှိရသည်။

DOCA(ကရင်)

        ပေါင်းတင်းဝါး (ခေါ်) ကောက်ညှင်းကျည်တောက်သည် ဆောင်းရာသီ၏ ရာသီစာအဖြစ် လူအများစားသုံးသောမုန့်ဖြစ်ပါသည်။ ကောက်ညှင်းကျည်တောက်ကို အုန်းသီး(ငချိတ်)၊ငှက်ပျောနှင့် ပဲဟူ၍ အရသာ (၃)မျိုးဖြင့်ပြုလုပ်ပြီး တချို့က နှစ်ပတ်လည်ပြုလုပ်၍ ရောင်းချကြသော်လည်း ဆောင်းရာသီ၏ ရာသီစာကောက်ညှင်းကျည်တောက်ကို နှစ်စဉ် (၉)လပိုင်း လလယ်ပိုင်းမှစ၍ (၄)လပိုင်းထိသာ ပြုလုပ်၍ ရောင်းချကြပါသည်။

            ရွှေဘိုမြို့တွင် ကောက်ညှင်းကျည်တောက် ပြုလုပ်ရောင်းချသည့်လုပ်ငန်းများပြားစွာရှိပြီး ဒေသတွင်းဝယ်ယူစားသုံးကြသည့်အပြင် အခြားမြို့နယ်များဖြစ်သော မုံရွာ၊ ရန်ကုန်၊ နေပြည်တော်၊ မန္တလေး၊ တောင်ကြီး၊ မြစ်ကြီးနားမြို့များရှိ ကိုယ်စားလှယ်များက မှာယူရောင်းချကြကြောင်း ၊ အုန်းသီး(ငချိတ်) ကောက်ညှင်းကျည်တောက် တစ်ပိဿာလျင် (၁၆၀၀၀)ကျပ်၊ ငှက်ပျောနှင့် ပဲကောက်ညှင်း ကျည်တောက် တစ်ပိဿာလျင်(၁၈၀၀၀)ကျပ်နှုန်းဖြင့် အရောင်းသွက်လျက်ရှိကြောင်း ရွှေဘိုမြို့တွင် ကောက်ညှင်းကျည်တောက် ပြုလုပ်ရောင်းချသည့်လုပ်ငန်းများမှ သတင်းရရှိပါသည်။

DOCA(စစ်ကိုင်း)

            ဧရာဝတီတိုင်းဒေသကြီး၊ မြန်အောင်မြို့နယ်၊ အမှတ်(၂)ရပ်ကွက်၊ စာတိုက်တဲကြီးကုန်းလမ်းတွင် ဒေသထွက်ကုန်ဖြစ်သော စိမ့်မြေပဲကြော်လုပ်ငန်းသည်  ဒေသတွင်းနှင့် အခြားမြို့နယ်၊ ခရိုင်များသို့ ဖြန့်ဖြူးရောင်းချလျှက်ရှိပြီး၊ ဧရာဝတီတိုင်းဒေသကြီး ပုသိမ်မြို့ SMEs ပြခန်းများတွင်လည်း သွားရောက်ပြသရပြီး ပြည်ပသို့ပါဈေးကွက်ရရှိရန် ထိုးဖောက်လျက်ရှိပါသည်။

             စိမ့်မြေပဲကြော်ပြုလုပ်ရာတွင် အဓိကကုန်ကြမ်းဖြစ်သော မြေပဲ၊ ပဲမှုန့်၊ ကော်မှုန့်၊ ဆီများ  ပါဝင်အသုံးပြုကြပါသည်။ မြေပဲကြော်တစ်ဒယ်လျှင် မြေပဲဆံ ၁ ပြည် ၄ လုံး၊ ပဲမှုန့်နှင့် ကော်မှုန့်၊ ဆီ(၅၀)သား၊ သကြား၊ ဂျင်းနှင့် ကြက်သွန်ဖြူ၊ ဆားတို့ကို သင့်တင့်မျှတစွာရောစပ်၍ ကြော်ရပါသည်။ မြေပဲကြော်ပြုလုပ်ရာတွင် လုပ်သား (၄)ဦးလိုအပ်ပြီး၊ တစ်ဒယ်စာ ကုန်ကျစရိတ် (၃၃၀၀၀/-) ကျပ်ခန့်ကုန်ကျကြောင်း သိရှိရပါသည်။ မြေပဲကြော်တစ်ဒယ်လျှင် ၁၅၀၀/- ကျပ်တန် အထုပ်(၃၀) ခန့်ထွက်ရှိပြီး အကျိုးအမြတ်အနေဖြင့် တစ်ဒယ်လျှင် ၁၂၀၀၀/- မှ ၁၅၀၀၀/- ကျပ်ထိ ရရှိပါသည်။ မြေပဲကြော်ကို တစ်ရက်ခြားကြော်ရပြီး မြန်အောင်မြို့နယ် ဒေသတွင်းနှင့် အခြားမြို့နယ်များသို့ ဒေသလက်ဆောင်အဖြစ် နေ့စဉ်အရောင်းအဝယ်ဖြစ်လျက်ရှိပါသည်။ စိမ့်မြေပဲကြော်အား သရေစာအဖြစ် ရေနွေးကြမ်းနှင့် တွဲဖက်စားသောက်သလို ထမင်းပူပူလေးနှင်လည်း စားသုံးကြပါသည်။ မြန်မာ့ရိုးရာ အစားအစာတစ်ခုဖြစ်သလို  ဒေသထွက်မြေပဲဆံကို အသုံးပြုခြင်းကြောင့် အာဟာရပြည့်ဝပြီး အရသာထူးကဲသည့်အတွက် စားသုံးသူများအကြိုက်တွေ့လျက်ရှိကြောင်း၊ မြန်အောင်မြို့နယ်၏ ဒေသလက်ဆောင်အဖြစ်လည်း ဝယ်ယူကြကြောင်း သိရှိရပါသည်။

DOCA(ဧရာဝတီ)

             ဧရာဝတီတိုင်းဒေသကြီး၊ ကျုံပျော်ခရိုင်၊ ကျောင်းကုန်းမြို့နယ်တွင် မိုးစပါး၊ နွေစပါး စိုက်ပျိုးဖြစ်ထွန်းအောင်မြင်သော မြို့နယ်ဖြစ်သည်။ ၂၀၂၄ ခုနှစ်၊ မိုးစပါး၊ ကောက်စောစပါးများ စတင်ရိတ်သိမ်းနေပြီဖြစ်ပါသည်။

           ကျောင်းကုန်းမြို့နယ်၊ စားသုံးသူရေးရာဦးစီးဌာနသည် ဇရပ်ကွင်းကျေးရွာအုပ်စု၊ ဆုမန်တောင်ကွင်းကျေးရွာမှ ၂၀၂၄ ခုနှစ်၊ မိုးစပါးကောက်စောရိတ်သိမ်းသည့် တောင်သူဦးမျိုးမြင့်၏ GW-11 စပါးရိတ်သိမ်းမှုအား ကွင်းဆင်းဆွေးနွေးဆောင်ရွက်ရာ တောင်သူအနေဖြင့်GW-11 စပါး (၃) ဧကစိုက်ပျိုးပြီး၊ စပါးစိုက်ပျိုးရန် ထယ်ခွဲ၊ မြေပြင်ချိန်မှစ၍ ပျိုးထောင်၊ ပျိုးနုတ်၊ ကောက်ရိတ်၊ မြက်ကောက်၊ ရိတ်သိမ်းခြင်းလုပ်ငန်းအပါအဝင်၊ မျိုးစပါးဘိုး၊ ဓာတ်မြေဩဇာဘိုးအပါအဝင် ရိတ်သိမ်းပြီးသည်အထိ တစ်ဧကစိုက်ပျိုးထုတ်လုပ်မှု ကုန်ကျစရိတ် (၈၀၅၀၀၀) ကျပ်ခန့် ကုန်ကျပြီး စပါး (၁) ဧက စက်ကျအစိုတစ်တင်းပေါင် (၅၀) နှုန်းဖြင့် စပါးတင်းထွက်ရှိပြီး ပေါင် (၅၀) စပါး (၁) တင်း စက်ကျအစို (၁၅၃၀၀) ကျပ်ရောင်းရကြောင်း၊ လယ်တစ်ဧကအထွက်စပါး (၁၀၀) တင်း (၁၅၃၀၀၀၀) ကျပ်ရရှိသဖြင့် လယ်တစ်ဧက အကျိုးအမြတ် (၇၂၅၀၀၀) ကျပ်ရရှိကြောင်း မြို့နယ်အတွင်းရှိ ဆန်စက်များမှဝယ်ယူကြောင်း တောင်သူထံမှ သိရှိရပါသည်။

DOCA(ဧရာဝတီ)

         မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့၊ ဇေယျာသီရိဈေးတွင်  ကြက်ဥ၊ ဘဲဥ၊ ငုံးဥနှင့်ဆေးဘဲဥများကို မကွေးမြို့နှင့် မန္တလေးမြို့တို့မှ မှာယူရောင်းချလျက်ရှိကြောင်း သိရှိရပါသည်။

          ၂၀၂၄ခုနှစ်၊ အောက်တိုဘာလ(စတုတ္ထပတ်)တွင် ကြက်ဥအလုံးကြီး(၁၀)လုံးလျှင် ကျပ်(၃၈၀၀ -၄၀၀၀)၊ အလုံး အလတ် (၁၀)လုံးလျှင် ကျပ်(၃၅၀၀)၊ ဘဲဥ(၁၀)လုံးလျှင် ကျပ်(၆၀၀၀)၊ ငုံးဥ(၁၅)လုံးလျှင် ကျပ် (၁၀၀၀)၊ ဆေးဘဲဥ(၁၀)လုံးလျှင် ကျပ်(၇၀၀၀)ဈေးနှုန်းများဖြင့် အရောင်းအဝယ်ဖြစ်လျက်ရှိပြီး ယခင် (တတိယပတ်)နှင့်နှိုင်းယှဉ်လျှင် ယခုတစ်ပတ်တွင် ကြက်ဥ ကျပ်(၄၀၀ မှ ၅၀၀)၊ ဘဲဥ ကျပ် (၁၀၀၀)၊ ဆေးဘဲဥ ကျပ်(၂၀၀၀)ဈေးနှုန်းမြင့်တက်ခဲ့ပြီး ငုံးဥမှာဈေးနှုန်းတည်ငြိမ်လျက်ရှိကြောင်း၊ ဥစားကြက်မွေးမြူးရေးခြံများ၌ ကြက်ဥအထွက်နှုန်းလျော့ကျလာခြင်းအပြင် သယ်ယူစရိတ်မြင့်မားခြင်းကြောင့် ကြက်ဥ၊ ဘဲဥနှင့် ဆေးဘဲဥဈေးနှုန်းများမှာ မြင့်တက်ရခြင်းဖြစ်ကြောင်း ဇေယျာသီရိဈေးအတွင်းမှ သိရှိရပါသည်။

DOCA(မကွေး)