ပြည်တွင်းကုန်သွယ်မှုသတင်း

ပဲဇောင်းလျားပင်ကို နေရာအနှံ့အပြားတွင် စိုက်ပျိုးကြပါသည်။ ပဲဇောင်းလျားသီးကို ပြုတ်၍သော်လည်းကောင်း၊ သုပ်၍သော်လည်းကောင်း၊ သီးစုံဟင်းချက်၍သော်လည်းကောင်း၊ အချဉ်ဖတ်ပြုလုပ်၍သော်လည်းကောင်း ချက်ပြုတ်စားသောက်ကြပါသည်။
ပဲဇောင်းလျားမြစ်သည် လူတိုင်းစားသုံးကြသည့် ပဲမြစ်ပင်ဖြစ်ပါသည်။ ပဲဇောင်းလျားပင်ကို ဇွန်လ၊ ဇူလိုင်လတွင် စတင်စိုက်ပျိုးပြီး ရက် (၉၀)အကြာတွင် စတင်ခူးဆွတ်နိုင်ပြီဖြစ်ပါသည်။ ပြည်မြို့ပေါ်ရှိဈေးများတွင် တောင်သူများက ပဲဇောင်းလျားသီးအတောင့် (၁၀၀)လျှင် ကျပ်(၂၀၀၀-၂၅၀၀)ကျပ်ဖြင့်သွင်းရပြီး ပြန်လည်ရောင်းချရာတွင် အတောင့် (၁၀၀)လျှင် အကြီး၊ အသေးခွဲ၍ (၃၀၀၀-၃၅၀၀-၄၀၀၀) ကျပ်တို့ဖြင့် ပြန်လည်ရောင်းချကြောင်းသိရသည်။ ပဲဇောင်းလျားသီးအမြစ်ကျသွားလျှင် ပဲမြစ်တူးဖော်၍ ရောင်းချနိုင်သဖြင့် အမြစ်အထိ ဝင်ငွေရရှိသည့်အတွက် စီးပွားဖြစ် အကျိုးဖြစ်ထွန်းစေ၍ စိုက်ပျိုးသင့်သော သီးနှံတစ်မျိုးဖြစ်ကြောင်းသိရပါသည်။
DOCA(ပဲခူး)

တောင်ငူမြို့ရှိ စစ်တောင်းမြစ်နှင့် ခပေါင်းချောင်းဆုံရာ ဒေသအနီးရှိ ကျေးရွာများတွင် ကန်စွန်းစိုက်ခင်းများ၊ ချဉ်ပေါင်စိုက်ခင်းများ အောင်မြင်ဖြစ်ထွန်းလျက်ရှိရာမှ ယခင်လက တောင်ငူခရိုင်အတွင်းရှိ စစ်တောင်းမြစ်ဝှမ်းတစ်လျှောက် ရေကြီးနစ်မြှုပ်မှုများဖြစ်ပေါ်ခဲ့ခြင်းကြောင့် ကန်စွန်းခင်းများနှင့် ချဉ်ပေါင်ခင်းများပျက်စီးခဲ့ရသဖြင့် ကန်စွန်းရွက်နှင့် ချဉ်ပေါင်ရွက်များ ဈေးနှုန်းမြင့်တက် လျက်ရှိပါသည်။
ယခင်ကလအစောပိုင်းက ကန်စွန်းရိုးနီတစ်စည်းလျှင် ၁၀၀ကျပ်၊ ၁၀စည်းယူလျှင် ၈၀၀ကျပ်ရှိခဲ့ရာမှ ယခုအပတ်တွင် တစ်စည်းလျှင် ၂၀၀ကျပ်၊ ၁၀စည်းယူလျှင် ၁၈၀၀ကျပ်ဖြင့် ဈေးနှုန်းနှစ်ဆခန့်မြင့်တက်လာပါသည်။ တရုတ်ကန်စွန်းမှာ ယခင်လအစောပိုင်းက တစ်စည်းလျှင် ၂၀၀ကျပ်၊ ၁၀စည်းယူလျှင် ၁၈၀၀ကျပ်ရှိခဲ့ရာမှ ယခုအပတ်တွင် တစ်စည်းလျှင် ၃၅၀ကျပ်၊ ၃စည်းယူလျှင် ၁၀၀၀ကျပ်၊ ထိုင်ဝမ်ကန်စွန်းမှာ ယခင်လအစောပိုင်းက တစ်စည်းလျှင် ၂၀၀ကျပ်၊ ၁၀စည်းယူလျှင် ၁၇၀၀ကျပ်ရှိခဲ့ရာမှ ယခုအပတ်တွင် တစ်စည်းယူလျှင် ၄၀၀ကျပ်၊ ၁၀စည်းယူလျှင် ၃၅၀၀ကျပ်ဖြင့် ဈေးနှုန်းမြင့်တက်ပါသည်။
ချဉ်ပေါင်ရွက်မှာ ယခင်လအစောပိုင်းက တစ်စည်းလျှင် ၁၀၀ကျပ်၊ ၁၀စည်းယူလျှင် ၈၀၀ကျပ်ရှိခဲ့ရာမှ ယခုအပတ်တွင် တစ်စည်းလျှင် ၃၅၀ကျပ်၊ ၁၀စည်းယူလျှင် ၃၀၀၀ကျပ်ဖြင့် ဈေးနှုန်းမြင့်တက်ကြောင်းနှင့် ကန်စွန်းရွက်၊ ချဉ်ပေါင်ရွက်များဈေးနှုန်းမြင့်တက်သော်လည်း အရောင်းအဝယ်မှာ ပုံမှန်အတိုင်းရှိကြောင်း ညောင်ပင်ဈေးရှိ ဟင်းသီးဟင်းရွက်ဆိုင်များမှသိရပါသည်။
DOCA(ပဲခူး)

၂၀၂၄ ခုနှစ်၊ အောက်တိုဘာလ ၂၉ရက်နေ့၊ နံနက်(၀၈:၃၀)နာရီအချိန်တွင် စားသုံးသူရေးရာဦးစီးဌာန၊ စစ်ကိုင်းတိုင်းဒေသကြီး၊ ကန့်ဘလူမြို့နယ်တာဝန်ခံ ဦးမျိုးဝင်းသန်းသည် ကန့်ဘလူမြို့ပေါ်ရှိ ဘိလပ်မြေနှင့် အိမ်ဆောက်ပစ္စည်းရောင်းချသည့်ဆိုင်များသို့ အပတ်စဉ်သွားရောက်၍ ကွင်းဆင်းစစ်ဆေးခြင်းဆောင်ရွက်လျက်ရှိကြောင်းသိရသည်။
ထိုသို့ကွင်းဆင်းစစ်ဆေးရာတွင် ကန့်ဘလူမြို့ပေါ်ရှိ ဘိလပ်မြေရောင်းချသည့်ဆိုင်များ၏ ဘိလပ်မြေဝယ်ယူရရှိမှုအခြေအနေ၊ လက်ကျန်အခြေအနေနှင့် ဈေးနှုန်း၊ ဈေးကွက်အခြေအနေတို့ အား ကွင်းဆင်းစိစစ်ခဲ့ရာ ဘိလပ်မြေနှင့်ဆောက်လုပ်ရေးလုပ်ငန်းသုံးပစ္စည်းများကို မန္တလေးမြို့မှ ဝယ်ယူရကြောင်း၊ ဈေးနှုန်းအနေဖြင့် “CROWN”အမှတ်တံဆိပ် ဘိလပ်မြေ‌တစ်အိတ်လျှင် ငွေကျပ် (၂၀၅၀၀)နှင့် “ကြံ့နှစ်ကောင်” အမှတ်တံဆိပ် ဘိလပ်မြေဈေးနှုန်းမှာ တစ်အိတ်လျှင် ငွေကျပ် (၁၉၅၀၀)ဖြင့်ရောင်းချကြောင်း၊ အောက်တိုဘာလ စတုတ္ထပတ်ဈေးနှုန်းများနှင့်နှိုင်းယှဉ်ပါက ယခု နောက်ဆုံးပတ်အတွင်း ဘိလပ်မြေဈေးနှုန်းများတည်ငြိမ်၍ အရောင်းအဝယ်ဖြစ်လျက်ရှိကြောင်း လုပ်ငန်းရှင်များထံမှသိရပါသည်။
DOCA(စစ်ကိုင်း)

         ဧရာဝတီတိုင်းဒေသကြီး၊ မြန်အောင်ခရိုင်၊ မြန်အောင်မြို့နယ်၏ ဂုဏ်သတင်းကျော်ဇောမှုများအနက်မှ ကယေကယာမုန့်သည် တစ်ခုအပါအဝင်ဖြစ်ပါသည်။ မြန်အောင်မြို့နယ်၏ MSMEs ပြပွဲ၊ ဈေးရောင်းပွဲတော်များမှတစ်ဆင့် ခရိုင်၊ ခရိုင်မှတစ်ဆင့် တိုင်းဒေသကြီးအတွင်း၊ တိုင်းဒေသကြီးမှတစ်ဆင့် မြန်မာပြည်အနှံ့သို့ ဂုဏ်သတင်းကျော်ကြားခဲ့သည့် မြန်မာ့ရိုးရာ စားစရာ ကယေကယာပင် ဖြစ်ပါသည်။

            ကယေကယာ၏ အဓိကပါဝင်ပစ္စည်းများမှာ ကောက်ညှင်းဆန်ကို အမှုန့်ပြုလုပ်ထားသည့် ကောက်ညှင်းမုန့်၊ အုန်းသီး၊ သကြား၊ နိူ့ဆီ၊ ထောပတ်၊ ဆား စသည့် ပစ္စည်းများပါဝင်ပါသည်။ ထိုပါဝင်ပစ္စည်းများကို မျှတစွာရောစပ်ပြီး အပူပေးကြိုချက်ရာတွင် မန်ကျည်းသားထင်းကိုအဓိကထား အသုံးပြုသည့်အတွက် ရရှိထွက်ပေါ်လာသော ကယေကယာ၏ အရောင်၊ အနံ့၊ အရသာမှာ တမူထူးကဲခြင်းတို့ကြောင့် ထင်ပေါ်ကျော်ကြားခဲ့ခြင်းဖြစ်ပါသည်။

               ကယေကယာကို  မြန်အောင်မြို့နယ်၏ အဓိကထွက်ရှိသောဒေသထွက်ကုန်များကိုဦးစားပေးထည့်သွင်း စီမံထုတ်လုပ်ခဲ့သည့်အတွက် ဒေသထွက်ကုန် MSMEs အဖြစ် အမည်တွင်ခဲ့သည်မှာ နှစ်ပေါင်းကြာခဲ့ပြီ ဖြစ်ပါသည်။ မြန်အောင်မြို့၏ ဒေသလက်ဆောင် MSMEs တွင် ကယေကယာကို ချန်လှပ်၍မရပါကြောင်း တင်ပြအပ်ပါသည်။

DOCA(ဧရာဝတီ)

မန္တလေးမြို့အတွင်းသို့ ပြင်ဦးလွင်ဒေသမှထွက်ရှိသည့် ကြက်ဥ၊ CP ကြက်များနှင့် မန္တလေးအနီးတဝိုက်ရှိ ရမည်းသင်း၊ ပျော်ဘွယ်မြို့နယ်များမှ တစ်နိုင်တစ်ပိုင် မွေးမြူထားသည့် ဗမာကြက်များ ဈေးကွက်အတွင်းသို့ နေ့စဉ်ဝင်ရောက်လျက်ရှိပြီး ပြင်ဦးလွင်မှ CP ကြက်တစ်နေ့လျှင် (၆)ဘီးကား (၃)စီးခန့်၊ ကြက်ဥမှာ (၆)ဘီးကား (၁၅)စီးခန့်၊ ဗမာကြက်များမှာ တစ်နေ့လျှင် ကား(၃)စီးခန့် ဝင်ရောက်လျက်ရှိပါသည်။ နေ့စဉ်ဝင်ရောက်လျက်ရှိသော်လည်း ကြက်ဥဈေးများနှင့် ကြက်သားဈေးများမှာ ဈေးတက်လျက်ရှိပြီး ကြက်ဥဈေးမှာ ယခင်နှစ်က (၁၀)လုံးလျှင် ၃၅၀၀/၃၀၀၀/၂၅၀၀ ကျပ်အထိဈေးရှိခဲ့ပြီး ယခုနှစ်တွင် (၁၀)လုံးလျှင် အကြီးအသေး အရွယ်အစားအလိုက် ၅၀၀၀/၄၅၀၀/၄၀၀၀ ကျပ်အထိဖြင့် အရောင်းဝယ်ဖြစ်နေကြောင်းသိရှိရပြီး ကြက်ဥတစ်ပိဿာဈေးနှုန်းအနေဖြင့် ယခင်နှစ်က ၆၀၀၀/၇၀၀၀ ကျပ်ဈေးရှိခဲ့ပြီး ယခုနှစ်တွင် တစ်ပိဿာလျှင် (၁၀၄၀၀)ကျပ်ရှိကြောင်းသိရှိရပါသည်။ CP ကြက်သားဈေးနှုန်းအနေဖြင့် တစ်ပိဿာလျှင် ယခင်နှစ်က CP ကြက်သားတစ်ပိဿာလျှင် ၈၀၀၀ကျပ်မှ ၁၀၀၀၀ကျပ်၊ ဗမာကြက်တစ်ပိဿာလျှင် ၁၁၀၀၀ကျပ်မှ ၁၂၀၀၀ကျပ်အထိရှိခဲ့ပြီး ယခုနှစ်တွင် CP ကြက်သားတစ်ပိဿာလျှင် ၂၀၀၀၀ကျပ်၊ ရင်အုပ်တစ်ပိဿာလျှင် (၂၄၀၀၀)ကျပ်၊ ဗမာကြက်တစ်ပိဿာလျှင် (၂၅၀၀၀)ကျပ်၊ ရင်အုပ်ပိုင်း တစ်ပိဿာလျှင် (၂၈၀၀၀)ကျပ်ရှိသဖြင့် ကြက်သားဈေးမှာ ယခင်နှစ်ထက် မြှင့်တက်ခဲ့ကြောင်းသိရှိရပါသည်။ ယခုနှစ် ကြက်ဥဈေးနှင့် ကြက်သားဈေးတက်ရခြင်းသည် လမ်းပန်းဆက်သွယ်ရေးခက်ခဲခြင်း၊ မွေးမြူရေးအစားအစာနှင့် ဆေးဝါးများဈေးမြင့်တက်ခြင်း၊ သယ်ယူစရိတ်ကြီးမားခြင်းတို့ကြောင့်ဖြစ်ပါသည်။ နယ်စပ်မြို့ကလေးများသို့တင်ပို့မှုမှာ ယခုကာလအတွင်း အနည်းငယ်သာရှိပြီး ကြက်သားဈေးမြင့်တက်ခြင်းကြောင့် ဝယ်ယူသူနည်းပါးပြီး အရောင်းအဝယ်အေးလျက်ရှိကြောင်း ကြက်သားဒိုင်များမှသိရှိရပါသည်။
DOCA(မန္တလေး)