၂၉.၁၁.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-
မန္တလေးတိုင်းဒေသကြီး၊ ကျောက်ဆည်ခရိုင်၌ ကုလားပဲ(ဆောင်း)များစတင်စိုက်ပျိုးလျက်ရှိရာ (၂၀၂၃-၂၀၂၄) ဘဏ္ဍာနှစ်တွင် ကုလားပဲ(ဆောင်း) လျာထားစိုက်ဧက(၆၈၂၇၇)ဧကရှိပြီး ယခုအချိန်၌ ကျောက်ဆည်မြို့နယ်တွင် (၈၂၀)ဧက၊ စဉ့်ကိုင်မြို့နယ်တွင် (၉၀၅)ဧက၊ စုစုပေါင်း (၁၇၂၅)ဧကစိုက်ပျိုးပြီးဖြစ်ကြောင်း၊ လယ်ယာမြေစီမံခန့်ခွဲရေးနှင့်စာရင်းအင်းဦးစီးဌာန၏ စာရင်းများအရသိရှိရပါသည်။ ကျောက်ဆည်ခရိုင်အတွင်းရှိ ယာမြေများ၌ အောက်တိုဘာလ တတိယပတ်တွင် ကုလားပဲကို မိုးရေအစိုဓာတ်ဖြင့်စိုက်ပျိုးကြပြီး တချို့မှာ မိုးရေအစိုဓာတ်အပြင် ရေစက်များဖြင့် ရေတင်၍စိုက်ပျိုးကြကြောင်း၊ ရေဖြင့် ထပ်မံတင်၍စိုက်ပျိုးသောယာမြေများသည် မိုးရေဖြင့်စိုက်ပျိုးသည့် ယာမြေများထက် ပို၍ကောင်းမွန်ပြီး အထွက်နှုန်းပိုမိုကောင်းမွန်ကြောင်း တောင်သူများထံမှသိရှိရပါသည်။ တောင်သူများသည် ကုလားပဲမျိုးကို မိမိ၏အိမ်တွင် သေချာစွာသိမ်းဆည်းထားပြီး မျိုးအဖြစ်အသုံးပြုကြပြီး တချို့တောင်သူများမှာ ဝယ်ယူ၍စိုက်ပျိုးကြကြောင်း၊ ယခုနှစ်စိုက်ပျိုးချိန်တွင် ကုလားပဲမျိုးဈေးနှုန်းအနေဖြင့် ကုလားပဲ(ရိုးရိုး) တစ်တင်းလျှင် (၇၈၀၀၀)ကျပ်၊ ကုလားပဲ(V2)တစ်တင်းလျှင် (၈၆၀၀၀) ကျပ်ဈေးနှုန်းတို့ဖြင့် ရောင်းဝယ်လျက်ရှိကြောင်း၊ ကုန်ကျစရိတ်အနေဖြင့် တစ်ဧကလျှင် (၂၅၀၀၀၀)ကျပ်ခန့်ကုန်ကျကြောင်း၊ ကုလားပဲသည် ကုန်ကျစရိတ်သက်သာပြီး အချိန်ကုန်သက်သာမှုကြောင့် ဝင်ငွေတိုးပြီး နွေရာသီသုံးငွေအဖြစ်ရရှိသည့်အတွက် တောင်သူအများစုမှာ အများဆုံးစိုက်ပျိုးကြကြောင်း၊ ယာမြေများတွင် ကုလားပဲ(၁)ဧကလျှင် (၁)တင်းနှုန်းပတ်ကြဲရပြီး လယ်မြေများတွင် (၁)ဧကလျှင် (၁)တင်းခွဲနှုန်းပိုမို၍စိုက်ပျိုးရကြောင်း၊ အကြောင်းရင်းမှာ ယာမြေများသည် လယ်မြေမျာထက် မြေသန်ခြင်းကြောင့်ဖြစ်ပါသည်။ ယခုအခါ ကုလားပဲအပင်ပေါက်များအောင်မြင်စွာဖြစ်ထွန်းနေပြီး ကုလားပဲရွက်များခူး၍ ဈေးထဲတွင် ရောင်းချလျက်ရှိကြောင်း၊ ကုလားပဲရွက် (၁)ပိသာလျှင် ဖောက်သည်ဈေးမှာ (၉၀၀၀)ကျပ်ရှိပြီး လက်လီဈေးအနေဖြင့် ကုလားပဲရွက် (၁၀)ကျပ်သားလျှင် (၁၀၀၀)ကျပ်ဖြင့်ရောင်းချလျက်ရှိပါသည်။ ကုလားပဲရွက်ကို ဟင်းချိုရည်အဖြစ်လည်းကောင်း၊ အသုပ်သုပ်၍လည်းကောင်း၊ ကြော်ချက်၍လည်းကောင်း စားသုံးကြပါသည်။ ကုလားပဲကိုကြိတ်ခွဲလျှင် ကုလားပဲဆံကိုရရှိပြီး ကုလားပဲဆံကို အလှူပွဲများတွင် ပဲနှပ်အဖြစ် မပါမဖြစ်ချက်ပြုတ်ကျွေးမွေးကြကြောင်း၊ ကုလားပဲဆံဖြင့် မုန့်အမျိုးမျိုးပြုလုပ်၍ လည်းရောင်းချလျက်ရှိကြောင်း၊ ဈေးနှုန်းအနေဖြင့် ယခုအချိန်တွင် ကုလားပဲများထွက်ရှိခြင်းမရှိသေးသော်လည်း ယခင်နှစ်တွင်ထွက်ရှိခဲ့သော ကုလားပဲဈေးနှုန်းများမှာ ကုလားပဲ(ရိုးရိုး)တစ်တင်းလျှင် (၆၅၀၀၀)ကျပ်၊ ကုလားပဲ(V2)တစ်တင်းလျှင် (၇၀၀၀၀) ကျပ်ဈေးနှုန်းတို့ဖြင့် ရောင်းချလျက်ရှိကြောင်းသိရှိရပါသည်။
DOCA(မန္တလေး)
စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန မကွေးတိုင်းဒေသကြီး၊ မင်းဘူးခရိုင်၊ ပွင့်ဖြူမြို့နယ်၊ မြို့နယ်တာဝန်ခံ ဒုတိယဦးစီမှူးဒေါ်ဌေးဌေးဝင်းသည် (၂၀.၁၁.၂၀၂၃) ရက်နေ့၊ နံနက်(၀၉:၀0)နာရီအချိန်တွင် ပွင့်ဖြူမြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့၊ မြို့နယ်ပြည်သူ့ကျန်းမာရေးအဖွဲ့နှင့်ပူးပေါင်း၍ ပွင့်ဖြူမြို့မဈေးအတွင်း ရောင်းချနေသောဆီအရောင်းဆိုင်များနှင့် မြို့ပေါ်ရပ်ကွက်များရှိ ဆီအမျိုးမျိုးရောင်းချနေသော စားသုံးဆီအရောင်းဆိုင်(၁၀)ဆိုင်အား တရားမဝင်တင်သွင်းထားသော "ပုဇွန်" အမှတ်တံဆိပ်များအား ဈေးကွက်အတွင်းရောင်းချခြင်းရှိ/မရှိ ကွင်းဆင်းစစ်ဆေးခဲ့ပါသည်။
ထို့သို့ကွင်းဆင်းစစ်ဆေးခဲ့ရာတွင် စားသုံးသူရေးရာဦးစီးဌာန၊ မြို့နယ်တာဝန်ခံ ဒုတိယ ဦးစီးမှူး ဒေါ်ဌေးဌေးဝင်းနှင့် ဌာနဆိုင်ရာများမှ စားသုံးဆီအမျိုးမျိုးရောင်းချနေသော လုပ်ငန်းရှင်များအား တရားမဝင်တင်သွင်းလာသော "ပုဇွန်"အမှတ်တံဆိပ်ဆီများအား ရောင်းချခြင်းမပြုကြရန်နှင့် စားသုံးသူကာကွယ်ရေးဥပဒေပါ လုပ်ငန်းရှင်များလိုက်နာရမည့် အခန်း(၁၀)၊ ပုဒ်မ(၂၁)အား အကျယ်တဝင့် ရှင်းလင်းဆွေးနွေးခဲ့ပြီး လက်ကမ်းစာစောင်များ ဖြန့်ဝေပေးခဲ့ကြောင်း သိရှိရပါသည်။
DOCA(မကွေး)
မြန်မာနိုင်ငံ စက်သုံးဆီတင်သွင်း၊ သိုလှောင်၊ ဖြန့်ဖြူးခြင်း လုပ်ငန်းကြီးကြပ်ရေးကော်မတီမှ တိုင်းဒေသကြီး၊ ပြည်နယ်အလိုက်မြို့ကြီးများ၏ စက်သုံးဆီ ရည်ညွှန်းလက်ကားဈေးနှုန်းများအား နေ့စဉ်ထုတ်ပြန်ပေးလျက်ရှိပါသည်။
မင်းဘူးမြို့နယ်တွင် စက်သုံးဆီဆိုင်(၁၆)ဆိုင်ရှိရာ ဆိုင်များအားလုံး ပုံမှန်ဆိုင်ဖွင့်ရောင်းချ လျက်ရှိပြီး ၂၀၂၃ခုနှစ် နိုဝင်ဘာလ(ဒုတိယပတ်)နှင့် (တတိယပတ်) စက်သုံးဆီဈေးနှုန်းများမှာ ဓာတ်ဆီ(92) (၁)လီတာလျှင် ယခင်အပတ်တွင် ကျပ်(၂၁၈၅)ဖြစ်ပြီး ယခုအပတ်တွင် ကျပ်(၂၁၅၅) ဖြစ်၍ ကျပ်(၃၀)ဈေးလျော့ခဲ့ကြောင်း၊ ဓာတ်ဆီ(95) (၁) လီတာလျှင် ယခင်အပတ်တွင် ကျပ် (၂၃၀၅)ဖြစ်ပြီး ယခုအပတ်တွင် ကျပ်(၂၂၈၅)ဖြစ်၍ ကျပ်(၂၀)ဈေးလျော့ခဲ့ကြောင်း၊ ဒီဇယ်(ရိုးရိုး) (၁) လီတာလျှင် ယခင်အပတ်တွင် ကျပ်(၂၁၉၅)ဖြစ်ပြီး ယခုအပတ်တွင် ကျပ်(၂၁၇၀)ဖြစ်၍ ကျပ်(၂၅) ဈေးလျော့ခဲ့ကြောင်း၊ ဒီဇယ်(ပရီမီယမ်)(၁)လီတာလျှင် ယခင်အပတ်တွင် ကျပ်(၂၃၀၅)ဖြစ်ပြီး ယခုအပတ်တွင် ကျပ်(၂၂၆၀)ဖြစ်၍ ကျပ်(၄၅)ဖြင့် ဈေးနှုန်းအသီးသီးလျော့ကျလာကြောင်း စက်သုံးဆီအရောင်းဆိုင်များမှ သိရှိရပါသည်။
DOCA(မကွေး)
မကွေးတိုင်းဒေသကြီး၊ မင်းဘူးခရိုင်၊ ဆင်ဖြူကျွန်းမြို့ စလင်းချောင်းအနောက်ဘက်ရှိ နွယ်တမယ်၊ ချောင်းဖြူ၊ ချောင်းကောက်၊ ညောင်ကုန်း၊ ပန်းတော၊ မြောင်းဘောင်ကျေးရွာများမှ တောင်သူများသည် စလင်းချောင်းရေကိုအမှီပြု၍ ဟင်းသီးဟင်းရွက်သီးနှံစားပင်မျိုးစုံကို တစ်ပိုင်တစ်နိုင်စိုက်ပျိုး လုပ်ကိုင်လျက်ရှိသည်။ ယခုနှစ်တွင် စားသုံးသူများပြား၍ ဈေးကွက်အခိုင်အမာရှိ သော စားဖိုဆောင်သုံးကာလတိုသီးနှံဖြစ်သည့် တိုင်ထောင်ပဲမှာ ဈေးကောင်းရ၍ တောင်သူများပိုမို တိုးချဲ့ စိုက်ပျိုးလျက်ရှိကြောင်းသိရသည်။
တိုင်ထောင်ပဲသည် နှုန်းမြေနှင့်ကိုင်းကျွန်းမြေများတွင် ကောင်းစွာဖြစ်ထွန်းကြောင်း၊ စိုက်ပျိုးရာတွင် မြေကိုဘောင်ဖော်၍ အတန်းလိုက်စိုက်ပျိုးကြပြီး တစ်ပင်နှင့်တစ်ပင်(၁)ပေခွဲအကွာ၊ တစ်တန်းနှင့်တစ်တန်း(၂)ပေခန့်အကွာ စိုက်ပျိုးရကြောင်း၊ သို့မှသာလေဝင်လေထွက်ကောင်း၍ နေရောင်ခြည်ကောင်းစွာရရှိကာ အပင်ဖြစ်ထွန်းကြောင်း၊ စိုက်ပျိုးပြီးအပင်များ နွယ်တက်လာသောအခါ အပင်ခြေရင်းတွင် ဝါးများဖြင့်တိုင်ထောင်ပေးရကြောင်း၊ အပင်သက်တမ်း (၂)လခန့်အကြာတွင် စတင်ခူးဆွတ်နိုင်ပြီး (၁)ဧကလျှင် ပိဿာချိန်(၅၀)ခန့်ထွက်ရှိကြောင်း၊ နောက်ပိုင်းပဲသီး အထွက်နှုန်းကောင်းချိန်တွင် တစ်ခါခူးဆွတ်လျှင် ပိဿာချိန်(၁၅၀)မှ (၂၀၀)ခန့်အထိ ထွက်ရှိကြောင်း၊ တိုင်ထောင်ပဲသီးနှံကို နေ့စဉ်ခူးဆွတ်ရောင်းချရပြီး နှစ်လကြာအထိ ခူးဆွတ်ရောင်းချရကြောင်း၊ နေ့စဉ်ခူးဆွတ်ခြင်းမပြုပါက အခွံအကြောများရင့်မာသွားပြီး အသီးများပွကာ ရောင်းချရာတွင် ဝယ်ယူသူများကြိုက်နှစ်သက်မှုနည်းသဖြင့် ဈေးကောင်းမရကြောင်း စိုက်ပျိုးတောင်သူ တစ်ဦးထံမှ သိရှိရသည်။ ဆင်ဖြူကျွန်းဒေသထွက် တိုင်ထောင်ပဲသီးနှံကို ချောက်၊ စလင်း၊ ပွင့်ဖြူ၊ မင်းဘူး၊ မကွေးမြို့များသို့ တင်ပို့ရောင်းချကြပြီး ပေါ်ဦးပေါ်ဖျားအချိန် ၂၀၂၃ခုနှစ်၊ သီတင်းကျွတ်လဆန်း တွင်မူ တိုင်ထောင်ပဲတစ်ပိဿာလျှင် ကျပ်(၃၅၀၀)ခန့်အထိ ဈေးကောင်းရရှိကာ နောက်ပိုင်းပဲသီး လှိုင်လှိုင်ပေါ်ချိန်တွင် တစ်ပိဿာလျှင် ကျပ်(၂၅၀၀)ခန့်ရရှိ ကြောင်းသိရှိရသည်။ တိုင်ထောင်ပဲ စိုက်ပျိုးခြင်းဖြင့် စိုက်ပျိုးတောင်သူမျာအဖို့ပုံမှန်ဝင်ငွေရရှိကာ စားသုံးသူဈေးကွက်၌လည်း အရောင်းသွက်လျက်ရှိသောကြောင့် ဆင်ဖြူကျွန်းဒေသရှိ တိုင်ထောင်ပဲစိုက်ပျိုးသူ တောင်သူများအနေဖြင့် ဝင်ငွေအဆင်ပြေလျက်ရှိကြောင်း သိရှိရပါသည်။
DOCA(မကွေး)
မွန်ပြည်နယ်၊ စားသုံးသူရေးရာဦးစီးဌာန၊ ချောင်းဆုံမြို့နယ်တာဝန်ခံနှင့်ဝန်ထမ်းများသည် (၂၂-၁၁-၂၀၂၃) ရက်နေ့တွင် မြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်စည်ပင်သာယာရေး ဦးစီးဌာနတို့နှင့်ပူးပေါင်း၍ ချောင်းဆုံမြို့နယ်အတွင်းရှိ အများပြည်သူများထံသို့ ချောင်းဆုံမြို့နယ်အတွက် ခွဲဝေရရှိသောစားသုံးဆီများကို သက်သာသောဈေးနှုန်းဖြင့် ရောင်းချပေးနေမှုအား ကွင်းဆင်းစစ်ဆေးဆောင်ရွက်ခဲ့ကြောင်းသိရှိရပါသည်။
ထိုသို့ကွင်းဆင်းစစ်ဆေးရာ၌ စားအုန်းဆီ (၁)ပိဿာလျှင် ၅၂၀၀ကျပ်ဖြင့် စားအုန်းဆီပိဿာချိန် (၁၁၀၀) ကို ချောင်းဆုံမြို့နယ်၊ တောင်စွန်ကျေးရွာ၊ ဒေါင်းရပ် (အရှေ့)ကျေးရွာ၊ သက္ကောကျေးရွာနှင့် ကရင်ဝင်းစိန်ကျေးရွာများသို့သွားရောက်၍ ရောင်းချပေးခဲ့မှုအခြေအနေတွင် ပြည်သူများအဆင်ပြေစွာဝယ်ယူခွင့်ရရှိရေး၊ သက်သာသောဈေးနှုန်းဖြင့် သတ်မှတ်အရေအတွက်အတိုင်း ဝယ်ယူခွင့်ရရှိရေး ကွင်းဆင်းကြီးကြပ်ခဲ့ကြကြောင်း သတင်းရရှိပါသည်။
DOCA(မွန်)
ပြည်ခရိုင်၊ ပြည်မြို့သစ်ဈေးတွင် ၂၀၂၃ခုနှစ်၊ နိုဝင်ဘာလ တတိယပတ်အတွင်း အခြေခံစားသောက်ကုန်များဖြစ်သော ရွှေဘိုပေါ်ဆန်းတစ်ပြည်လျှင် (၅၄၀၀)ကျပ်၊ ပုသိမ်ပေါ်ဆန်းဆန်တစ်ပြည်လျှင် (၅၀၀၀)ကျပ်နှင့် ရိုးရိုးပေါ်ဆန်းတစ်ပြည်လျှင် (၄၈၀၀)ကျပ်တို့ဖြင့် အရောင်းအဝယ်ဖြစ်နေပါသည်။ ကြက်သွန်နီ (ကြီး/လတ်/သေး) တစ်ပိဿာလျှင် ကျပ်(၃၈၀၀-၃၉၀၀)/ (၄၀၀၀-၄၁၀၀)/ (၄၂၀၀-၄၃၀၀)၊ ကြက်သွန်ဖြူ (ရှမ်း) တစ်ပိဿာလျှင် လက်လီဈေး (၁၅၀၀၀)၊ ကြက်သွန်ဖြူ (ကြူကုတ်) တစ်ပိဿာလျှင် လက်လီဈေး (၁၇၀၀၀)ကျပ်၊ အာလူးတစ်ပိဿာလျှင် (၄၀၀၀)ကျပ်မှ (၄၂၀၀)ကျပ်အထိ၊ ချင်းတစ်ပိဿာလျှင် (၆၀၀၀)ကျပ်မှ (၆၅၀၀)ကျပ်အထိတို့ဖြင့် အရောင်းအဝယ်ဖြစ်လျက်ရှိသည်။
ကြက်ဥ လက်လီဈေးမှာ အကြီးတစ်လုံးလျှင် (၂၈၀)ကျပ်၊ အလတ်တစ်လုံးလျှင် (၂၆၀)ကျပ်၊ အသေးတစ်လုံးလျှင် (၂၄၀)ကျပ်၊ ဘဲဥ လက်လီဈေးမှာ အကြီးတစ်လုံးလျှင် (၃၅၀)ကျပ်၊ အသေးတစ်လုံးလျှင် (၃၀၀)ကျပ်၊ အသားငါးဈေးနှုန်းများမှာ ကြပ်သား (CP)တစ်ပိဿာလျှင် (၁၂၀၀၀)ကျပ်၊ ဝက်သားသုံးထပ်သားဈေးတစ်ပိဿာလျှင် (၁၈၀၀၀)ကျပ်၊ အမဲသားတစ်ပိဿာလျှင် (၁၅၀၀၀)ကျပ်၊ ဆိတ်သားတစ်ပိဿာလျှင် (၂၅၀၀၀)ကျပ်၊ ငါးမြစ်ချင်းတစ်ပိဿာလျှင် (၉၀၀၀)ကျပ်၊ ငါးကြင်းတစ်ပိဿာလျှင် (၁၃၀၀၀)ကျပ်တို့ဖြင့် ရောင်းဝယ်နေကြောင်းသိရပါသည်။
စားသုံးဆီဈေးနှုန်းများမှာ မြေပဲဆီသန့်တစ်ပိဿာလျှင် (၁၃၀၀၀)ကျပ်၊ နှမ်းဆီတစ်ပိဿာလျှင် (၁၂၅၀၀)ကျပ်နှင့် စားအုန်းဆီတစ်ပိဿာလျှင် (၅၃၀၀)ကျပ်ဖြင့် အရောင်းအဝယ်ဖြစ်လျက်ရှိကြောင်းသိရှိရပါသည်။
DOCA(ပဲခူး)
ပြည်ခရိုင်အတွင်းရှိ ပြည်ကုန်စည်ဒိုင်သည် လမ်းပန်းဆက်သွယ်ရေးကောင်းသော ပြည်မြို့တွင်ရှိသောကြောင့် ပဲအရောင်းအဝယ်သွက်လျက်ရှိကြောင်းသိရှိရသည်။
မတ်ပဲ
၂၀၂၃ခုနှစ်၊ နိုဝင်ဘာလ ဒုတိယပတ်တွင် ပြည်ကုန်စည်ဒိုင်၌ မတ်ပဲဈေးတက်နေပြီး ပဲတစ်တင်းကို (၉၃၀၀၀-၉၄၀၀၀)ကျပ်ခန့်ဖြင့် ရန်ကုန်အဝယ်တစ်ရက်လျှင် ပိဿာ(၂၀)ဝင် အိတ်(၂၀၀)ခန့်ရှိပါသည်။ နိုဝင်ဘာလ တတိယပတ်တွင် မတ်ပဲတစ်တင်းကို (၉၂၅၀၀)ကျပ်ဖြင့် အရောင်းအဝယ်တစ်ရက်လျှင် ပိဿာ(၂၀)ဝင် အိတ် (၁၀၀-၂၀၀)ခန့်အဝယ်ရှိလျက်ရှိပါသည်။
ပဲတီစိမ်း
နိုဝင်ဘာလ ဒုတိယပတ်တွင် ပန်းတောင်းဘက်မှ ပဲတီစိမ်းသစ်များအဝင်ရှိလာပြီး ပဲတစ်တင်းလျှင် (၅၄၀၀၀)ကျပ်ဖြင့် ဈေးစဖွင့်ခဲ့ပါသည်။ တစ်ရက်လျှင် ပဲတီစိမ်းသစ် ပိဿာ(၂၀)ဝင်အိတ် (၁၀၀ - ၂၀၀)ခန့်ဝင်စပြုနေပြီး လှောင်သမားများသာအဝယ်ရှိပြီး တစ်ရက်လျှင် ပိဿာ(၂၀)ဝင်အိတ် (၁၀၀ -၂၀၀)ခန့်သာမြို့တွင်းအဝယ်ရှိပါသည်။ နိုဝင်ဘာလ ဒုတိယပတ်တွင် ပဲတီစိမ်းဈေးတက်လာပြီး တစ်တင်းကို (၉၄၀၀၀)ကျပ်ဖြင့်အရောင်းအဝယ်ရှိပြီး တစ်ရက်လျှင် ပိဿာ(၂၀)ဝင်အိတ် (၁၀၀ - ၂၀၀)ခန့် မန္တလေးအဝယ်ရှိခဲ့ပါသည်။
ပဲစင်းငုံ
နိုဝင်ဘာလ ဒုတိယပတ်တွင် ပဲစင်းငုံတစ်တင်းကို (၉၃၀၀၀)ကျပ်ဖြင့် တစ်ခါတစ်ရံ၌ ရန်ကုန်အဝယ်တစ်ရက်လျှင် ပိဿာ(၂၀)ဝင်အိတ်(၂၀၀)ခန့်ရှိပါသည်။ နိုဝင်ဘာလ တတိယပတ်တွင် ပဲစင်းငုံဈေးအေးနေခဲ့ပြီး တစ်ခါတစ်ရံ၌ ပဲတစ်တင်းလျှင် (၉၃၀၀၀)ကျပ်ဖြင့် ဈေးအေးနေခဲ့ကာ ရန်ကုန်အဝယ်ရှိခဲ့ပါသည်။
ကုလားပဲ
နိုဝင်ဘာလ ဒုတိယပတ်တွင် ကုလားပဲ(HL) တစ်တင်းကို (၉၂၅၀၀)ကျပ်၊ မြကြေးမုံတစ်တင်းကို (၉၅၅၀၀)ကျပ်ဖြင့် မြို့တွင်းပဲစက်သမားများ တစ်ရက်လျှင် ပိဿာ(၂၀)ဝင် အိတ် (၂၀၀ - ၃၀၀)ခန့်အဝယ်ရှိပါသည်။ နိုဝင်ဘာလ တတိယပတ်တွင် မတ်ပဲဈေးကျပြီး ကုလားပဲ (HL) တစ်တင်းကို (၉၀၅၀၀)ကျပ်၊ မြကြေးမုံတစ်တင်းကို (၉၀၅၀၀)ကျပ်ဖြင့် မြို့တွင်းခွဲစက်သမားနှင့် ရန်ကုန်ဝယ်လက်တစ်ရက်လျှင် ပိဿာ(၂၀)ဝင် အိတ်(၃၀၀)ခန့်အဝယ်ရှိခဲ့ပါသည်။
ပဲကြီး
နိုဝင်ဘာလ ဒုတိယပတ်တွင် ပဲကြီးဈေးတက်နေပြီး ပဲကြီး (ရွှေကျွန်း) တစ်တင်းကို (၁၃၀၀၀၀)ကျပ်၊ ပဲကြီး (ကုန်းပဲ)တစ်တင်းကို (၁၂၇၀၀၀)ကျပ်ဖြင့် မြို့တွင်း ပဲကြော်သမားများအဝယ်ရှိပြီး တစ်ရက်လျှင် ပိဿာ(၂၀)ဝင်အိတ်(၃၀၀)ခန့်အဝယ်ရှိပါသည်။ နိုဝင်ဘာလ တတိယပတ်တွင် ပဲဈေးနှုန်းအေးနေပြီး ပဲကြီး (ရွှေကျွန်း)တစ်တင်းကို (၁၃၀၀၀၀)ကျပ်၊ ပဲကြီး(ကုန်းပဲ) တစ်တင်းကို (၁၂၇၀၀၀) ကျပ်ဖြင့် မြို့တွင်းအဝယ်တစ်ရက်လျှင် ပိဿာ(၂၀)ဝင် အိတ်(၃၀၀ - ၃၅၀)ခန့်အဝယ်ရှိခဲ့ပါသည်။
စားတော်ပဲ
နိုဝင်ဘာလ တတိယပတ်တွင် စားတော်ပဲတစ်တင်းလျှင် (၁၂၅၀၀၀) ကျပ်ဖြင့် မြို့တွင်းအဝယ်တစ်ရက်လျှင် ပိဿာ(၂၀)ဝင်အိတ် (၂၀-၂၅)ခန့်အဝယ်ရှိခဲ့ပါသည်။ စားတော်ပဲ (ကျွန်း)တစ်တင်းလျှင် (၁၂၅၀၀၀)ကျပ်ဖြင့် ဈေးအေးနေခဲ့ပါသည်။
ဘိုကိတ်ပဲ
နိုဝင်ဘာလ ဒုတိယပတ်တွင် ဘိုကိတ်ပဲအသစ်များအဝင်ရှိပြီး (၆၅၀၀၀)ကျပ်ဖြင့် ဈေးဖွင့်ခဲ့ပါသည်။ အရောင်းအဝယ်မှာ တစ်ရက်လျှင် ပိဿာ(၂၀)ဝင်အိတ် (၅၀-၁၀၀)ခန့် မြို့တွင်းနှင့် ရန်ကုန်အဝယ်ရှိခဲ့ပါသည်။ နိုဝင်ဘာလ တတိယပတ်တွင် ဘိုကိတ်တစ်တင်းကို (၆၅၀၀၀ - ၆၆၀၀၀)ကျပ်ဖြင့် မြို့တွင်းအဝယ်တစ်ရက်လျှင် ပိဿာ(၂၀)ဝင်အိတ် (၅၀)ခန့်အဝယ်ရှိပါသည်။
ပြည်ကုန်စည်ဒိုင်တွင်း အရောင်းအဝယ်ဖြစ်လျက်ရှိသော မတ်ပဲ၊ ကုလားပဲ၊ ပဲကြီးဈေးနှုန်းတို့မှာ မြင့်တက်လျက်ရှိပြီး စားတော်ပဲ၊ ဘိုကိတ်ပဲ၊ ပဲစင်းငုံတို့မှာ ဈေးငြိမ်လျက်ရှိကြောင်းသိရှိရပါသည်။
DOCA(ပဲခူး)
ရွှေဖရုံသီးစိုက်ပျိုးရာ၌ ပူနွေးသောရာသီဥတုတွင်စိုက်ပျိုးလျှင် ပိုမိုဖြစ်ထွန်းပါသည်။ သက်တမ်းမှာ (၄)လကြာမြင့်ပါသည်။ မြေဩဇာအနေဖြင့် နုန်းဆန်သောမြေ၊ မြေနီသဲဝန်း၊ သဲဝန်း မြေများတွင် စိုက်ပျိုးရန်ကောင်းမွန်ပါသည်။ ရွှေဖရုံသီးပင်စိုက်ပျိုးလျှင် သုံးပေခြား တစ်တန်းနှင့် တစ်တန်းကြား (၂၀)ပေခွာ၍ တစ်ကျင်းလျှင် အစေ့ (၃-၄)စေ့ချ၍စိုက်ရပါသည်။ တစ်ဧကလျှင် မျိုးစေ့ (၃)ကီလိုဂရမ်ပါဝင်ပါသည်။ ရွှေဖရုံအပင်ငယ်များ တစ်လသားခန့်ရှိသောအခါ ကြားထွန် ဝင်ပေးပြီး အပင်ခြေရင်းရှိပေါင်းများကို လက်ပေါင်းလိုက်ပေးရပါသည်။ ရွှေဖရုံသီးများကို ကောင်းစွာရင့်မှည့်မှသာ ဆွတ်ခူရန်လိုပါသည်။ ဖရုံသီးကို အညှာပါအောင်ဆွတ်ခူထားပါက ကြာရှည်ထားနိုင်ပါသည်။ ရွှေဖရုံသီးမှာ အလွန်အာဟာရဖြစ်သည့်အသီးဖြစ်ပြီး ကယ်လိုရီနည်းပါသည်။ ရွှေဖရုံသီးမှာ တန်ဖိုးရှိသော ဗီတာမင်နှင့် အာဟာရဓာတ်များစွာပါဝင်သောကြောင့် လူတို့စားသုံးရန်အတွက် အထူးသင့်လျော်ပါသည်။ မျက်စိကျန်းမာရေးအတွက် ကောင်းမွန်သည့်အပြင် အရေပြားကျန်းမာရေးအတွက်လည်းအသုံးဝင်ပါသည်။ ရွှေဖရုံသီးများကို ခြံဖြင့်သီးသန့်စိုက်ပျိုးကြပြီး အိမ်ခြံဝန်းအတွင်း၌လည်း စားဖိုဆောင်သီးနှံအဖြစ် စိုက်ပျိုးကြပါသည်။ ရွှေဖရုံသီးအစေ့လှော်မှာ အဆာပြေ၊ အပျင်းပြေဝါးစားရာတွင် စိမ့်သောအရသာဖြင့် အလွန်စားကောင်းပါသည်။ ရွှေဖရုံသီးပင်များကို ကျေးလက်ဒေသများတွင် တစ်နိုင်တစ်ပိုင်စိုက်ပျိုးကြပြီး စီးပွားဖြစ်စိုက်ပျိုးသော ပြည်မြို့နယ်အတွင်းရှိ မှော်ဇာကျေးရွာနှင့် တောင်လုံးညိုကျေးရွာတို့တွင် အများအပြားစိုက်ပျိုးပြီး ထွက်ရှိလာသောအသီးများကို ပွဲစားများမှတစ်ဆင့် ရန်ကုန်သီရိမင်္ဂလာဈေး၊ ဒညင်းကုန်းဈေးသို့ တင်ပို့ရောင်းချကြောင်းသိရပါသည်။ ရွှေဖရုံသီးအလုံးချောတစ်လုံးလျှင် (၂၀၀၀)ကျပ်၊ အသေးတစ်လုံးလျှင် (၁၅၀၀) ကျပ်နှုန်းဖြင့် ဈေးကွက်အတွင်း ရောင်းချကြောင်းသိရပါသည်။
DOCA(ပဲခူး)
ပြည်ဈေးကွက်သို့ ၂၀၂၃ခုနှစ်၊ နိုဝင်ဘာလ ဒုတိယပတ်အတွင်း ကြက်သွန်သီးနှံဝင်ရောက်မှုမရှိကြောင်းသိရပြီး ဈေးကွက်အတွင်းကျန်ရှိနေသည့် ပစ္စည်းလက်ကျန်များဖြင့်သာ ရောင်းဝယ်မှုရှိနေကြောင်းသိရပါသည်။ လမ်းပန်းဆက်သွယ်ရေးအခက်အခဲကြောင့် အဝင်မရှိသဖြင့် ဈေးနှုန်းမှာ နိုဝင်ဘာလဆန်းတွင် အလတ်စတစ်ပိဿာလျှင် ကျပ်၃၆၀၀နှုန်းရှိခဲ့ရာမှ ယခုအချိန်တွင် ၄၀၀၀ကျပ်နှုန်းဖြင့်ရောင်းချမှုရှိနေသည့်အတွက် ဈေးမြင့်နေကြောင်းသိရပါသည်။ အဝင်မရှိသော်လည်း အရောင်းအဝယ်မှာ ဒေသတွင်းဝယ်လက်များ၊ အိတ်ဆွဲဝယ်ရောင်းသမားများအနေဖြင့် ဧရာဝတီနှင့်ရခိုင်တို့သို့ နယ်ကျော်တင်ပို့မှုများဖြင့် ရောင်းဝယ်မှုရှိနေပြီး ယခုကာလ၌ ကြက်သွန်နီအစို့ပေါက်ထွက်ချိန် အလေးချိန်လျော့သည့်အချိန်ဖြစ်သဖြင့် ပြည်ဈေးကွက်အတွင်း ကြက်သွန်နီအရည်အသွေးပေါ်မူတည်၍ ဈေးနှုန်းခွဲခြားသတ်မှတ်ကာ ရောင်းချလျက်ရှိပါသည်။ ပြည်ပွဲရုံများနှင့် မြို့ပေါ်လက်လီဈေးများတွင် ကြက်သွန်နီကြီး/လတ်/သေးတစ်ပိဿာလျှင် လက်ကားဈေး ကျပ် (၃၅၀၀-၃၆၀၀/၃၇၀၀-၃၈၀၀/၃၉၀၀) နှုန်းတို့ရှိပြီး လက်လီဈေး ကျပ် (၃၈၀၀-၃၉၀၀/၄၀၀၀-၄၁၀၀/၄၂၀၀-၄၃၀၀ နှုန်းတို့ဖြင့် အသီးသီးရောင်းဝယ်မှုရှိနေပါကြောင်းသိရှိရပါသည်။
DOCA(ပဲခူး)
