Main menu

ပြည်တွင်းကုန်သွယ်မှုသတင်း

Powered by Drupal

ကျိုင်းတုံမြို့ ပြောင်းဈေးကွက်

                ရှမ်းပြည်နယ်(အရှေ့ပိုင်း)၊ ကျိုင်းတုံမြို့နယ်အတွင်းရှိ မိုင်းခွန်၊ တောင်ပေါ်(၅)အုပ်စု မိုင်းလပ်၊ လွယ်မွေ၊ ပန်ဝိုင်၊ မိုင်းခွန်၊ ကတ်ထိုက် အုပ်စုတို့တွင် မိုးသီးနှံဒေသထွက်ကုန်တစ်မျိုးဖြစ်သော မိုးအစေ့ထုတ်ပြောင်းကို နှစ်စဉ် တောင်ကုန်းတောင်စောင်းများ၌ အများဆုံးစိုက်ပျိုးကြပါသည်။ ကျိုင်းတုံမြို့နယ်အတွင်း၌ စိုက်ပျိုးခဲ့သည့်မိုးအစေ့ထုတ်ပြောင်း ခန့်မှန်းဧက(၄၁၆၉)ဧကစိုက်ပျိုးကြသည်ကို တောင်သူဦးကြီးများထံမှ စုံစမ်းသိရှိရပါသည်။

               ကျိုင်းတုံမြို့နယ်တွင် မိုးအစေ့ထုတ်ပြောင်းသည် ဈေးကွက်ရှိခြင်းကြောင့် တစ်နှစ်ထက်တစ်နှစ် မိုးအစေ့ထုတ်ပြောင်းကို ပိုမိုတိုးချဲ့စိုက်ပျိုးလာကြပါသည်။ မိုးအစေ့ထုတ်ပြောင်းကို နှစ်စဉ်မေ လ ၊ ဇွန်လတို့တွင် စိုက်ပျိုးပြီး အောက်တိုဘာလနှင့် နိုဝင်ဘာလတို့တွင် ခူဆွတ်ကြပါသည်။ ယခုနှစ် ၂၀၂၄ ခုနစ်တွင် မိုးအစေ့ထုတ်ပြောင်း အသစ်ကိုအောက်တိုဘာလ တတိယပတ်တွင် စတင်၍ရောင်းချပြီး မိုးအစေ့ထုတ်ပြောင်း ရောင်းချရသည့်ဈေးနှုန်းမှာ (၅၀)ကီလို တစ်အိတ်လျှင် လက်ကားဈေးနှုန်း (၅၈၀၀၀) ကျပ် ဖြင့်လည်းကောင်း လက်လီဈေးနှုန်းမှာ (၆၀၀၀၀) ကျပ် ဖြင့်လည်းကောင်း ရောင်းဝယ်လျက်ရှိကြောင်းဈေးကွက်အတွင်း ရောင်းဝယ်သူများထံမှ သိရှိရပါသည်။

DOCA(ရှမ်း)

မိုးစပါးပေါ်ထွက် စပါးဈေးနှုန်းဈေးကွက်

                ရှမ်းပြည်နယ် (အရှေ့ပိုင်း)၊ ကျိုင်းတုံမြို့၏ ၂၀၂၄-၂၀၂၅  ခုနှစ်တွင် မိုးစပါးစိုက်ဧက (၄၇၇၀၂) စိုက်ပျိုးပြီးဖြစ်၍ ၂၀၂၄ ခုနှစ်၊ နိုဝင်ဘာလ ဒုတိယအပတ်ထိ (၃၄၂၁၀)ဧက ရိတ်သိမ်းပြီးစီးကြောင်းသိရသည်။ မိုးစပါးတစ်ဧကအထွက်နှုန်း(၈၂) တင်းကျော်ထွက်ရှိပြီး စိုက်ပျိုးသောစပါးမျိုးကွဲများမှာ ဆင်းဧကရီ-၃၊ ရွှေရင်အေး၊ ဒေသမျိုးနှင့် ဆင်းရွှေဝါမျိုးတို့ စိုက်ပျိုးလျက်ရှိရာ ဆင်းဧကရီ-၃ စပါးမျိုးများကို အများဆုံးစိုက်ပျိုးကြောင်း စိုက်ပျိုးရေးဦးစီးဌာနမှ သိရှိရပါသည်။

                ယခင်နှစ် ၂၀၂၃-၂၀၂၄ ခုနှစ် မိုးစပါး စတင်ရိတ်သိမ်းချိန်တွင် စပါးတင်း(၁၀၀)လျှင်(၁၉၀၀၀၀၀/-) ကျပ်ခန့်ရှိခဲ့ပြီး ယခုနှစ် ၂၀၂၄-၂၀၂၅ ခုနှစ်တွင် မိုးစပါးတင်း(၁၀၀)လျှင် (၂၂၀၀၀၀၀/-)ကျပ်ဖြင့် အရောင်းအဝယ်ပြုလုပ်နေသောကြောင့် စပါးစိုက်တောင်သူများအနေဖြင့် ယခင်နှစ်ထက် အကျိုးအမြတ်ပိုမိုရှိကြောင်း စပါးစိုက်တောင်သူဦးကြီးများထံမှ သိရှိရပါသည်။

DOCA(ရှမ်း)

ညောင်တုန်းမြို့နယ်မှ ငရုတ်ခြောက်များ ရန်ကုန်သို့ တင်ပို့လျက်ရှိ

     ဧရာဝတီတိုင်းဒေသကြီး ညောင်တုန်းမြို့နယ်တွင် ငရုတ်အစို၊ ငရုတ်ခြောက် စိုက်ပျိုးလျက်ရှိသည်။ ညောင်တုန်းမြို့နယ်တွင် ငရုတ်စိုက်ဧက (၄၅)ဧကရှိကြောင်း သိရသည်။ ငရုတ်စိုက်ပျိုးထုတ်လုပ် အရောင်းအဝယ်လုပ်ကိုင်သူ လုပ်ငန်းရှင် တစ်ဦးအား ၂၀.၁၁.၂၀၂၄ ရက်နေ့က မေးမြန်းရာ ရန်ကုန်ဈေးကွက်သို့ အောက်တိုဘာလအတွင်း ငရုတ်သီးခြောက် ပိဿာချိန် ၈၇၀၀၀ ထိ တင်ပို့ရောင်းချနိုင်ခဲ့ကြောင်း ပြောပြသည်။  ညောင်တုန်းမြို့နယ်မှ ငရုတ်ခြောက်များကို  စက်တင်ဘာလအတွင်း ငရုတ်သီးခြောက်ပိဿာချိန် ၅၅၀၀၀ ထိသာ တင်ပို့ရောင်းချနိုင်ခဲ့ပြီး၊ အောက်တိုဘာလ တင်ပိုမှုအနေဖြင့်  ငရုတ်သီးခြောက်ပိဿာချိန် ၈၇၀၀၀ ထိ တင်ပို့ရောင်းချနိုင်ခဲ့ကြောင်း ငရုတ်စိုက်ပျိုးထုတ်လုပ်သူ ဦးဌေးဝင်းက ရှင်းလင်းပြောပြ၍ သိရသည်။

    အဆိုပါ ဒေသမှ တင်ပို့ရောင်းချခဲ့သည့် ငရုတ်သီးခြောက်ပိဿာချိန် ၁၀ လျှင် ငွေကျပ် ၈၀၀၀၀ ထိ ပေါက်ဈေးရှိကြောင်း ညောင်တုန်းမြို့နယ်က ထွက်တဲ့ငရုတ်သီးခြောက်တွေက အရည်အသွေးကောင်းပါတယ်။ လက်ရှိငရုတ်သီးခြောက်ပိဿာချိန် ၁၀ လျှင် ငွေကျပ် ၈၀၀၀၀ ထိ ပေါက်ဈေးရှိပါတယ်။ ငရုတ်ဈေးမှာ အရမ်းကြီးအတက်သလို ဈေးလည်းမကျကြောင်း။ ၁ဧက ကုန်ကျစရိတ်အနေဖြင့် ၂၅၀၀၀၀၀ ခန့်ကုန်ကျသော်လည်း၊ ၁ဧက အကျိုးအမြတ်အနေဖြင့် ၁၅၀၀၀၀၀ ခန့် အကျိုးမြတ်ရရှိကြောင်း၊ ၁ဧကအထွက်နှုန်း ၂၃၀၀ကျော် ထွက်ရှိကြောင်း စိုက်ပျိုးထုတ်လုပ်သူမှ ရှင်းလင်းပြောပြသည်။

    ငရုတ်တင်ပို့မှု ဈေးကွက်အနေဖြင့် ရန်ကုန်ဘုရင်နောင် ဈေးကွက်၊ သီရိမင်္ဂလာဈေး၊ တညင်းကုန်းဈေး ရန်ကုန်ငရုတ် ကုန်စည်ဝယ်ယူသူများထံသို့ ချိတ်ဆက်၍  ဝယ်လက်တွေနဲ့ နှစ်စဉ်တင်ပို့ရောင်းချကြောင်း ညောင်တုန်း ငရုတ်အသင်း ဥက္ကဌ ဦးဌေးဝင်းပြောပြချက်အရ သိရသည်။  

DOCA(ဧရာဝတီ)

 

တနင်္သာရီတိုင်းဒေသကြီး၊ ထားဝယ်မြို့တွင် ဝက်သားစျေးနှုန်းများတက်

        ၂၀၂၄ခုနှစ်၊ နိုဝင်ဘာလ ၁၈ရက်နေ့မှစ၍ တနင်္သာရီတိုင်းဒေသကြီး၊ ထားဝယ်မြို့တွင် ဝက်သားစျေးနှုန်းများမှာ (၂၈၀၀၀)ကျပ်မှ (၃၀၀၀၀)ကျပ်၊ ၁၉ ရက်နေ့တွင် (၃၃၀၀၀)ကျပ်အထိ မြင့်တက်ခဲ့ပြီး ယခင်လနှင့်နှိုင်းယှဥ်ပါက ၅၀၀၀ကျပ်အထိမြင့်တက်လာခဲ့ပါသည်။

         ထားဝယ်မြို့၊ ဝက်သားစျေးနှုန်းမြင့်တက်လာခြင်းမှာ ဝက်စာစျေးနှုန်းများနှင့် မွေးမြူရေးကုန်ကျစရိတ်များမြင့်တက်လာခြင်း၊ လုပ်သားအင်အားရှားပါးလာခြင်းများကြောင့် ဒေသတွင်းဝက်မွေးမြူရေးလုပ်ကိုင်သူများ လျော့နည်းလာသဖြင့် ဒေသတွင်းဝက်သားပြတ်လပ်မှုမရှိစေရေး မွန်ပြည်နယ်၊ မော်လမြိုင်မှတစ်ဆင့် ဝက်များသယ်ယူရပြီး ယခုအခါ လမ်းခရီးအခက်အခဲများနှင့် သယ်ယူမှုကုန်ကျစရိတ်များကြီးမြင့်လာခြင်းကြောင့်ဖြစ်ကြောင်း ထားဝယ်မြို့ ဝက်သားဒိုင်များထံမှသိရှိရပါသည်။

DOCA(တနင်္သာရီ)

မြင်းခွာရွက်ကောင်းကျိုးနှင့် စျေးနှုန်း

        မြင်းခွာရွက်ဟုဆိုသည်နှင့် မြန်မာလူမျိုးတိုင်း သိကြမည်ဖြစ်ပါသည်။ မြင်းခွာပင်သည် အပင်ငယ်လေးဖြစ်ပြီး မြေကြီးတွင် ကပ်လျက်ပေါက်ဖွားကာ အဆစ်အမြစ်ကလေးများထွက်လာပြီး ထိုအဆစ်ကလေးများမှ အညွန့်နှာမောင်းထွက်လာပြီး မျိုးဆက်ပွားလေ့ရှိသည်။ ‌နွေ၊ မိုး၊ ဆောင်း သုံးရာသီပတ်လုံး အလေ့ကျပေါက်ပြီး အပွင့်အဖြူရောင်ရှိကာ အစေ့မှာမူ အပြား၊ အလျားလိုက် သေးငယ်သည့်အမြှောင်း ကိုးမြှောင်းပါသည်။ မြင်းခွာပင်တွင် အရိုင်းမျိုး၊ မြင်းခွာရွက်အဖြူမျိုး၊ အနီမျိုးဟူ၍သုံးမျိုးရှိသည်။

          မြင်းခွာရွက်ကိုစားသုံးခြင်းဖြင့် ကောင်းကျိုးသာရရှိမည်ဖြစ်ပြီး ဘေးထွက်ဆိုးကျိုးမရှိသည့်အတွက် သစ္စာရှိတာဝန်သိသိ ကျေးဇူးပြုသောအပင်ဖြစ်ပါသည်။ မြင်းခွာရွက်ကိုစားပေးခြင်းဖြင့် သွေးတိုးရောဂါ၊ အဆုတ်ရောဂါ၊ ချောင်းဆိုးရောဂါ၊ ‌‌ရေငတ်ရောဂါတို့ကိုပျောက်ကင်းစေပြီး အပူငြိမ်းကာ အသက်ရှည်စေပါသည်။ ဆီးနည်း၊ ဆီးကျင်၊ ဆီးအောင့်ရောဂါများအတွက် မြင်းခွာပင်သုံးစည်း/လေးစည်းခန့်ကို ရေစင်အောင်ဆေးပြီး သန့်ပြန့်သည့် ကျောက်ဆုံနှင့်ထောင်း၍ အရည်ညှစ်ယူပြီး သကြားသင့် ယုံထည့်ကာ လက်ဖက်ရည်အကြမ်းတစ်ပန်းကန်ကို ည၊ မနက်သောက်ရမည်ဖြစ်ပါသည်။

          ထားဝယ်မြို့ရှိစျေးများတွင် မြင်းခွာရွက်စျေးသင့်လျက်ရှိပြီး ‌ဒေသဓလေ့အရ ဗန်းထဲတွင် အပုံငယ်များပုံ၍ ရောင်းချလျက်ရှိကာ တစ်ပုံလျှင် (၃၀၀မှ ၅၀၀)ကျပ်ရှိကြောင်းသိရှိရပါသည်။

DOCA(တနင်္သာရီ)

တနင်္သာရီတိုင်းဒေသကြီးထွက် ပုစွန်ခြောက် စျေးနှုန်း/စျေးကွက်

     တနင်္သာရီတိုင်းဒေသကြီးသည် မြန်မာနိုင်ငံတောင်ဘက်စွန်း ပင်လယ်ထွက်ပေါက်ရှိရာ တိုင်းဒေသကြီးဖြစ်သဖြင့် ဒေသခံအများစုသည် ပင်လယ်ပြင်သို့ ငါးဖမ်းစက်လှေအကြီး/ အလတ်/အငယ်များ တစ်နိုင်တစ်ပိုင်လှေများဖြင့် ပင်လယ်ပြင်သို့ထွက်ကာ ပုစွန်များအား ဖမ်းယူကာ ပုစွန်အစိုများအား ပြည်ပသို့တင်ပို့ခြင်း၊ ပြည်တွင်းစျေးကွက်များတွင် ရောင်းချခြင်းများ၊ နေလှန်းကာ ပုစွန်ခြောက်များ ပြုလုပ်ကာ မြန်မာနိုင်ငံနေရာအနှံ့အပြားသို့ တင်ပို့ ရောင်းချလျက်ရှိပါသည်။

     ယခု နိုဝင်ဘာလ စတုတ္ထပတ်အတွင်း ထားဝယ်စျေးကွက်တွင် ဒေသတွင်း စားသုံးမှုများသော ပုစွန်ခြောက်စျေးနှုန်းများမှာ အကောင်သေး တစ်ပိဿာလျှင်(၂၅၀၀၀ကျပ်)၊ အလတ်ဆိုဒ် တစ်ပိဿာလျှင်(၉၀၀၀၀ကျပ်)နှင့် အကောင်ကြီး တစ်ပိဿာလျှင် (၁၂၀၀၀၀ကျပ်) အသီးသီးရှိကြောင်း ထားဝယ်မြို့မစျေးကြီးနှင့် ကမ်းနားပျံကျစျေးများရှိ ပုစွန်ခြောက်ကုန်သည်များထံမှ သိရှိရပါသည်။

     ယခုကာလသည် တန်ဆောင်တိုင် ကထိန်ပွဲများကျင်းပပြုလုပ်လျက်ရှိသဖြင့် အလှူပွဲများတွင် ပုစွန်ခြောက်ငံပြာရည်ကြော်များ ထည့်သွင်းကျွေးမွေးသဖြင့် ပုစွန်ခြောက်များမှာ အရောင်း အဝယ်သွက်လျက်ရှိပြီး ပုံမှန်အရောင်းစျေးနှုန်းထက်အနည်းငယ်ခန့် တက်လျက်ရှိကြောင်း သိရှိရပါသည်။

DOCA(တနင်္သာရီ)

ပဲပင်ပေါက်စားခြင်း၏ကျန်းမာရေးနှင့် စျေးနှုန်း/စျေးကွက်

        ပဲပင်ပေါက်သည် စျေးသက်သာပြီး အလွယ်တကူဝယ်ယူရရှိနိုင်၍ ကျန်းမာရေးအတွက် အထောက်အကူများစွာပြုနိုင်သော အစားအစာတစ်ခုဖြစ်သည်။ ပဲပင်ပေါက်သည် အာဟာရဓာတ်ကြွယ်ဝပြီး ဗီတာမင်A, C နှင့် သတ္တုဓာတ်များ ကြွယ်ဝစွာပါဝင်နေသောကြောင့် ခန္ဓာကိုယ်ကို ကိုယ်ခံအားကောင်းစေပြီး ရောဂါပိုးကူးစက်မှုကို ထိရောက်စွာကာကွယ်ပေးနိုင်ပါသည်။  ဓာတ်တိုးဆန့်ကျင်အာနိသင်ပါဝင်နေသောကြောင့် ခန္ဓာကိုယ်ကိုကျန်းမာစေပြီး ဇိဝကမ္မလုပ်ငန်းစဉ်များကို အကောင်းဆုံးလည်ပတ်စေနိုင်ပါသည်။ ဗီတာမင် A ပါဝင်နေသောကြောင့် ခန္ဓာကိုယ်ကိုလည်း အကောင်းဆုံးထောက်ပံ့ပေးပါသည်။

        ပဲပင်ပေါက်ကို စီးပွားဖြစ် ဖောက်၍ရောင်းချကြပြီး ပဲပင်ပေါက်ဖောက်ရာတွင် ပဲတီစိမ်း၊ မတ်ပဲတို့ကို အများဆုံးအသုံးပြုကြသည်။ များသောအားဖြင့် စကာထဲတွင် ထည့်ဖောက်လေ့ရှိပြီး အပင်ပေါက်ချိန်သည် ၄ရက်မှ ၅ရက်ခန့်ကြာပါသည်။ ပဲစေ့များမှတဆင့်  အပင်ဖောက်၍ ရရှိလာသောအပင်များကို အထုပ်ငယ်များဖြင့် တစ်ထုပ်လျှင် (၆၀၀)ကျပ်နှုန်းဖြင့် စည်ပင်သာယာဈေးကြီးနှင့် ရပ်ကွက်ဈေးငယ်များတွင် ရောင်းချကြောင်းသိရှိရပါသည်။

DOCA(တနင်္သာရီ)

ဖရဲသီးကောင်းကျိုးနှင့် စျေးနှုန်းစျေးကွက်

         အပူပိုင်းဒေသများအတွက် ခြောက်သွေ့သည့်ရာသီ(ဆောင်းရာသီ)သည် ဖရဲသီးစိုက်ပျိုးရန်  အကောင်းဆုံးရာသီဥတုဖြစ်သည်။ ဖရဲပင်များသည် မိုးရာသီ (သို့မဟုတ်) နွေရာသီများတွင် အပူချိန်အရမ်းများခြင်း၊ အရမ်းစိုစွတ်ခြင်း စသည့်အခြေအနေများတွင် ကောင်းစွာမဖြစ်ထွန်းပါ။ ဖရဲပင်များကို မျိုးစေ့ဖြင့်စိုက်ပျိုးနိုင်ပြီး မျိုးစေ့များကို စိုက်ပျိုးရန်သင့်လျော်သည့် သတ်မှတ်ထားသော မြေနေရာတွင်စိုက်ပျိုးရသည်။ အပင်ပေါက်နှုန်းကောင်းရန်အတွက် စိုက်ပျိုးမည့်‌မြေသည် အပူချိန်(၁၈) ဒီဂရီစင်တီဂရိတ်ရှိရန်လိုအပ်ပါသည်။ ဖရဲစေ့များသည် ရက်ပိုင်းအတွင်း လွယ်လွယ်ကူကူဖြင့် လျင်လျင်မြန်မြန်အညှောင့်ပေါက်ကြသည်။ ဖရဲစိုက်ပျိုးရာတွင် မြေသားထုနက်သော၊ အဟာရပြည့်ဝသော၊ မွသောမြေကိုလိုအပ်ပါသည်။

        ဖရဲသီးသည် အခွံစိမ်းပြီး အတွင်းသားမှာ အနီရောင်ရှိပြီး အဝါရောင်လည်းရှိပါသည်။ ဖရဲသီးတွင် ရေဓာတ် ၉၂ရာခိုင်နှုန်းပါဝင်သဖြင့် အရည်ရွှမ်းပြီး ချိုမြသောအရသာရှိသောကြောင့် စားသုံးပါက ရင်ကိုအေးမြစေပြီး ရေငတ်ပြေကာ ခန္ဓာကိုယ်အတွင်းရှိ ဆုံးရှုံးသွားသောရေဓာတ်ကို ပြန်လည်ဖြည့်တင်းပေးပြီး လူကိုလည်း လန်းဆန်းအမောပြေစေပါသည်။ ဖရဲသီးတွင် အဆီနှင့် ကိုယ်လက်စထရောလုံးဝမပါရှိဘဲ ရေဓာတ် ၉၂ရာခိုင်နှုန်းပါဝင်သည်က ထူးခြားပြီး အမျှင်ဓာတ်၊ ဗီတာမင်အေ၊ ဘီနှင့် စီဓာတ်များပေါကြွယ်လှသည်။ ကယ်လိုရီအလွန်နည်းပါသဖြင့် အဟာရဖြစ်စေကာ နွေရာသီကာလတွင် ပိုမိုစားသုံးသင့်ပေသည်။

         ဖရဲသီးများကိုဝယ်ယူရာတွင် အလုံးအကြီး၊ အလတ်၊ အသေးဟူ၍ ဝယ်ယူရခြင်းဖြစ်ပါသည်။ ယခုအခါ ထားဝယ်စျေးကွက်တွင် ဖရဲသီးကို မော်လမြိုင်မြို့မှတစ်ဆင့် ဝယ်ယူ‌ရောင်းချလျက်ရှိပြီး အကြီးတစ်လုံးလျှင် (၇၀၀၀)ကျပ်၊ အလတ်တစ်လုံးလျှင် (၅၀၀၀)ကျပ်၊ အသေးတစ်လုံးလျှင် (၃၅၀၀)ကျပ်အသီးသီးရှိကြောင်း ထားဝယ်မြို့ရှိ အသီးဆိုင်များမှသိရှိရပါသည်။

DOCA(တနင်္သာရီ)

ရာသီပေါ်ဈေးကောင်းရနေသောထောပတ်သီး

              ရှမ်းပြည်နယ်(အရှေ့ပိုင်း)၊ ကျိုင်းတုံမြို့နယ်၊ လွယ်မွေအုပ်စု၊ ဟိုဂျင်းကျေးရွာနှင့် မိုင်းဇင်းကျေးရွာအုပ်စုတို့တွင် စိုက်ပျိုးရေးကိုအဓိကလုပ်ကိုင်ကြပြီး ရာသီအလိုက်သီးနှံများကို အလှည့်ကျစိုက်ပျိုးကြသည့်အပြင် နှစ်ရှည်ပင်သီးနှံများဖြစ်သော ထောပတ်ပင်များကိုလည်း စိုက်ပျိုးကြကြောင်းသိရှိရပါသည်။

             ထောပတ်ပင်ကို တောင်ကုန်းတောင်စောင်းများပေါ်တွင် အဓိကစိုက်ပျိုးကြပါသည်။ နှစ်ရှည်သီးနှံပင်များဖြစ်သည့် ထောပတ်ပျိုးပင် ရက်ပေါင်း(၉၀)ရရှိပြီဆိုပါက စိုက်ပျိုးမည့်မြေအနေအထားပေါ်မူတည်ပြီး အပင်အကွာအဝေး (၁၀)ပေခန့်ခြားကာ ကျင်းအကျယ် (၃)ပေ၊  ကျင်းအနက် (၂)ပေတူး၍ သဘာဝမြေဩဇာဖြစ်သော နွားချေးနှင့်မြေဆွေးများကိုအချိုးကျရောစပ်ကာ တူးထားသောကျင်းထဲသို့ထည့်ပြီး ပျိုးထားသောထောပတ်ပင်များကို  တစ်ပိုင်တစ်နိုင် စီးပွားရေးအဖြစ် စိုက်ပျိုးကြပါသည်။ စိုက်ပျိုးထားသည့်ထောပတ်ပင်များကို တစ်နှစ်တစ်ကြိမ် မြေဆွပေါင်းတင်ပေးရပါသည်။  ထောပတ်ပင်သည် စိုက်ပျိုးရလွယ်ကူသည့်သီးနှံများဖြစ်သည့်အပြင် ကုန်ကျစရိတ်လည်းသက်သာလျက်ရှိကြောင်းသိရပါသည်။ ထောပတ်ပင်သည် တစ်ကြိမ်စိုက်ပျိုးထားလျင် အနည်းဆုံး ၅ နှစ်မှ၍ စတင်အသီးသီးပြီး  ၁၅ နှစ်အထိ နှစ်စဉ်အသီးများကိုခူးဆွတ်ရောင်းချနေရပြီး “အချိန်ကုန် လူသက်သာ ဝင်ငွေကောင်းရ"ဟူသည့်အတိုင်း တောင်သူများအတွက် တွက်ချေကိုက်သော သီးနှံပင်တစ်မျိုးလည်းဖြစ်ပါသည်။

              ထောပတ်သီးများစပေါ်ချိန်ဖြစ်သော အောက်တိုဘာ၊ နိုဝင်ဘာလများတွင် ဈေးကွက်အတွင်းဈေးကောင်းရရှိနေပြီး အသီးအရွယ်အစားပေါ်မူတည်၍ အလုံးလှလျင်လှသလို ထောပတ်သီး (၁)ကီလို အနည်းဆုံး ၇၀၀၀ ကျပ်မှ အများဆုံး ၁၀၀၀၀ ကျပ်အထိ ဈေးကောင်းရရှိနေပါကြောင်း တောင်သူများထံမှ သိရှိရပါသည်။

DOCA(ရှမ်း)

ပန်းဂေါ်ဖီ(ခ)ဂေါ်ဖီထုပ်များဈေးကောင်းလျက်ရှိ

            ရှမ်းပြည်နယ်(တောင်ပိုင်း)၊ ဓနုကိုယ်ပိုင်အုပ်ချုပ်ခွင့်ရဒေသ၊ ပင်းတယမြို့နယ်၊ ဒေသများမှထွက်ရှိသည့်သီးနှံများကို ရာသီအလိုက်စိုက်ပျိုးကြပြီး ထွက်ရှိလာသည့်သီးနှံများအား ဒေသတွင်းနှင့် အခြားမြို့နယ်များသို့ တင်ပို့ရောင်းချလျက်ရှိသောကြောင့် ဒေသနေပြည်သူများ အလုပ်အကိုင်အခွင့်အလမ်းရရှိခြင်း၊ မိသားစုတစ်ပိုင်တစ်နိုင်ဝင်ငွေရရှိသည့် စီးပွားရေးလုပ်ငန်းဖြင့်သည့်အတွက် လုပ်ငန်းများအဆင်ပြေလျက်ရှိကြောင်းသိရှိရပါသည်။

             ပင်းတယမြို့နယ်အနီးတစ်ဝိုက်ရှိ ကျေးရွာများ၌ တောင်ယာမြေများတွင်သာမက အချို့အိမ်ခြံမြေကျယ်ဝန်းသောနေရာများရှိ မြေလွတ်များတွင်လည်း စိုက်ပျိုးကြကြောင်းသိရှိရပါသည်။ ဂေါ်ဖီထုပ်များကို တောင်ယာမြေများ၌ စိုက်ပျိုးရာတစ်ဧကတွင်အပင်ရေပေါင်း(၁၀၀၀၀)မှ(၁၂၀၀၀)ထိ စိုက်ပျိုးကြကြောင်းသိရှိရပြီး ကုန်ကျစရိတ်မှာ ဆယ်သိန်းဝန်းကျင်ခန့်ကုန်ကျကြောင်း သိရှိရပါသည်။

          ဈေးကွက်အတွင်း၌ ပန်းဂေါ်ဖီ(ခ)ဂေါ်ဖီထုပ်များသည် ပေါ်ခါစတွင်ဈေးကောင်းရလျက်ရှိပြီး ဂေါ်ဖီအကြီးတစ်ထုပ်လျှင်(၂၅၀၀)ကျပ်၊ ဂေါ်ဖီအလတ်တစ်ထုပ်လျှင်(၁၅၀၀)ကျပ်နှင့်ဂေါ်ဖီအသေး တစ်ထုပ်လျှင်(၁၀၀၀)ကျပ်နှုန်းဖြင့် ဈေးကွက်အတွင်းအရောင်းအဝယ်ဖြစ်လျက်ရှိကြောင်း သိရှိရပါသည်။

DOCA(ရှမ်း)

Pages

Subscribe to RSS - ပြည်တွင်းကုန်သွယ်မှုသတင်း