ပြည်တွင်းကုန်သွယ်မှုသတင်း

        မကွေးတိုင်းဒေသကြီး၊ ပခုက္ကူမြို့နယ် ငရုတ်သီးစိုက်ပျိုးရာဒေသများဖြစ်ကြသော ကျွန်းဦး၊ ကျွန်းညို၊ ရွာသစ်ကုန်း၊ ဆယ်ရွာ၊ ကံလှ၊ နန်းတော်ရပ်အုပ်စုဖြစ်သော ငကျော်၊ မြင်းဝင်း၊ ဘဲကြီးအုပ်စုဖြစ်သော နံကပ်ကျေးရွာ မြစ်ခြေမြို့နယ်များတွင် မြှားနီ၊ ပန်းရဲ ငရုတ်သီးများကို တကွင်းတစပ်စိုက်ပျိုးကြပါသည်။ ပခုက္ကူမြို့နယ်ဒေသထွက် ငရုတ်စိုများသာမက မန္တလေးတိုင်း ဒေသကြီးအတွင်းရှိ မိတ္ထီလာ၊ ပျော်ဘွယ်၊ ကျောက်ဆည်နှင့် စစ်ကိုင်းတိုင်းဒေသကြီးအတွင်းရှိ မုံရွာမြို့မှ ထွက်ရှိသော ရွှေအပ်သီး၊ စက္ကထာသီး၊ မိုးမျှော်သီးများ ဝင်ရောက်အရောင်းအဝယ် ဖြစ်လျက်ရှိကြောင်း သိရသည်။

       ပခုက္ကူမြို့နယ်ထွက် ငရုတ်သီးဈေးနှုန်းများမှာ ကျောက်စိမ်းသီး တစ်ပိဿာလျှင် ကျပ်(၄၀၀၀) မန္တလေးတိုင်းဒေသကြီးအတွင်းမှထွက်ရှိသော ငရုတ်သီးစိမ်းများမှာ တစ်ပိဿာလျှင် ကျပ်(၇၀၀၀) ဖြစ်ပြီး မုံရွာစက္ကထာသီးမှာ တစ်ပိဿာလျှင် ကျပ်(၈၀၀၀)ထိ ရောင်းချနေကြောင်း၊ နေ့စဉ် ကုန်ချိန် (၅၀)မှ(၁၀၀)ထိ ဝင်ရောက်အရောင်းအဝယ်ဖြစ်လျက်ရှိကြောင်း၊ ငရုတ်သီးခြောက်ဈေးနှုန်းအနေဖြင့် ပခုက္ကူဒေသထွက် ကျွန်းငရုတ်သီးအဟောင်း တစ်ပိဿာလျှင် ကျပ်(၆၀၀၀)၊ ကျွန်းအစပ်သီး တစ်ပိဿာလျှင် ကျပ်(၇၀၀၀-၉၀၀၀)ထိ ပျော်ဘွယ်၊ ရမည်းသင်းမှထွက်ရှိသော ငရုတ်သီးခြောက်များမှာ တစ်ပိဿာလျှင်ကျပ်(၁၃၀၀၀)ဖြစ်ပြီး ငရုတ်သီးခွဲကြမ်းအနုမှုန့် တစ်ပိဿာ လျှင် ကျပ်(၁၈၀၀၀)၊ ငရုတ်သီးခွဲကြမ်း အကြမ်းမှုန့် တစ်ပိဿာလျှင် ကျပ်(၁၂၀၀၀)ဖြင့် ရောင်းချနေကြောင်း၊ ကုန်ချိန်အဝင်နည်းပြီး စိုက်ခင်းများရေနစ်မြုပ်မှုများကြောင့် ကုန်ပစ္စည်းများဈေးနှုန်းကြီးမြင့်ရခြင်းဖြစ်ကြောင်း ကုန်သည်များထံမှ သိရှိရပါသည်။

DOCA(မကွေး)

         ပြည်ပဲဈေးကွက်၌ ပဲသစ်ဝင်ရောက်ခြင်းမရှိဘဲ လက်ကျန်လှောင်ပဲတချို့ဖြင့် ရောင်းဝယ်နေ ကြသော ပဲသီးနှံများထဲတွင် ဘိုကိတ်ပဲသီးနှံလည်းပါဝင်နေပြီး လက်ကားရောင်းဝယ်မှုအပြင် လက်လီသမားများလည်း နေ့စဉ်အဝယ်ရှိနေခဲ့ကြောင်းသိရပါသည်။ လက်ကားရောင်းဝယ်မှုအနေဖြင့် တစ်ရက်လျှင် အိတ်၅၀ကျော်မှ ၁၀၀ထိ ရန်ကုန်ဝယ်လက်များဖြင့် ရောင်းဝယ်ခဲ့ကြပြီး လက်လီရောင်းဝယ်မှုမှာ ဒေသတွင်းဝယ်လက်တချို့ဖြင့် တစ်ရက်လျှင် အိတ်၂၀ကျော်ရောင်းချမှုရှိခဲ့ကြပါသည်။ ဘိုကိတ်ပဲသီးနှံဈေးမှာ တစ်တင်းလျှင် ကျပ် (၁)သိန်းဖြင့် ဩဂုတ်လကုန်ပတ်၌ ရောင်းဝယ်ခဲ့ကြရသည့်အတွက် အခြားပဲများနည်းတူ ဈေးနှုန်းမြင့်တက်လာပြီး စက်တင်ဘာလကုန်ပတ်တွင် တစ်တင်း ၁၃၀၀၀၀ကျပ်ထိရရှိနေသည်ကိုတွေ့ရပါသည်။ ယခင်နှစ် ယခုကဲ့သို့သောကာလတွင် ဘိုကိတ်ပဲသီးနှံဈေးနှုန်းအနေဖြင့် တစ်တင်းလျှင် ကျပ်၆သောင်းကျော်သာရရှိခဲ့သောကြောင့် ဈေးကွက်အတွင်း ဈေးအေးခဲ့သော်လည်း ယခုနှစ်တွင် ဇူလိုင်လကတည်းက ဈေးတရိပ်ရိပ်တက်လျက်ရှိနေခဲ့ပြီး စက်တင်ဘာလကုန်ပတ်တွင်  တစ်တင်းလျှင် ၁၃၀၀၀၀ကျပ်ထိရရှိလာကြောင်းသိရပါသည်။

DOCA(ပဲခူး)

          မကွေးတိုင်းဒေသကြီး၊ ပခုက္ကူမြို့မဈေးနှင့် အမှတ်(၂)ဈေးတို့တွင် မန္တလေးတိုင်းဒေသကြီးအတွင်းရှိ ပုပ္ပါး၊ ကျောက်ပန်းတောင်းနယ်မှ ထွက်ရှိသောထိုင်ဝမ်ခရမ်းချဉ်သီး၊ ရှမ်းပြည်နယ် အင်းလေးဒေသမှထွက်ရှိသာ ထိုင်ဝမ်ခရမ်းချဉ်သီးများ ဝင်ရောက်အရောင်းအဝယ်ဖြစ်လျက်ရှိပြီး ဒေသတွင်းခရမ်းချဉ်သီးများမှာ စတင်စိုက်ပျိုးလျက်ရှိကြောင်း သိရသည်။

        ၂၀၂၄ခုနှစ်၊ စက်တင်ဘာလ(စတုတ္ထပတ်)တွင် မန္တလေးတိုင်းဒေသကြီး ပုပ္ပါး၊ ကျောက်ပန်းတောင်းမှ ထွက်ရှိသော ခရမ်းချဉ်သီးတစ် ပိဿာလျှင် ကျပ်(၂၅၀၀ မှ ၂၆၀၀)၊ ရှမ်းပြည်နယ် အင်းလေးဒေသမှ ထွက်ရှိသော ခရမ်းချဉ်သီးမှာ တစ်ပိဿာလျှင် ကျပ်(၂၀၀၀ မှ ၂၃၀၀) ဖြင့်ရောင်းချခဲ့ပြီး အောက်တိုဘာလ(ပထမပတ်)တွင် ပုပ္ပါး၊ ကျောက်ပန်းတောင်းမှ ထွက်ရှိသော ခရမ်းချဉ်သီး တစ်ပိဿာလျှင် ကျပ်(၃၀၀၀ မှ ၄၀၀၀)၊ ရှမ်းပြည်နယ် အင်းလေးဒေသမှ ထွက်ရှိသော ခရမ်းချည်သီး တစ်ပိဿာလျှင် ကျပ်(၂၅၀၀ မှ ၃၀၀၀)ဖြစ်ပြီး စက်တင်ဘာလ (စတုတ္ထပတ်)နှင့် နှိုင်းယှဉ်ပါက ကျပ်(၇၀၀-၁၄၀၀)ခန့် ဈေးတက်နေကြောင်း၊ တစ်နေ့လျှင် ပိဿာချိန်(၃၀၀၀ မှ ၅၀၀၀) ထိဝင်ရောက် အရောင်းအဝယ် ဖြစ်နေကြောင်း မြို့မ ဈေးသည်များထံမှ သိရှိရပါသည်။

DOCA(မကွေး)

        ပဲခူးတိုင်းဒေသကြီး၊ ပြည်ပဲမျိုးစုံဈေးကွက်တွင် ပြည်ပဝယ်လက်ပဲတချို့ ဈေးမြင့်တက်လာသော်လည်း ပြည်တွင်းစားသုံးမှုများသော ပြည်တွင်းဝယ်လက်သမားများ အဓိကဝယ်ယူသောပဲများထဲတွင် ပဲနီပြား၊ ထောပတ်ပဲ၊ စားတော်ပဲဈေးနှုန်းများမြင့်တက်လာခဲ့ပါသည်။ အဆိုပါပဲများထဲမှ ပဲနီပြားသီးနှံသည် ယခုနှစ်တွင် ဈေးကောင်းဝင်သော ပဲသီးနှံထဲပါဝင်နေပြီး ယခုလအတွင်း ပိဿာ (၂၀)ဝင်တစ်တင်းလျှင် ကျပ် (၁၃၄၀၀၀) ကျပ်အထိရရှိခဲ့ပါသည်။ ယခင်နှစ် စက်တင်ဘာလအတွင်း ပဲနီပြားတစ်တင်းလျှင် ၁၀၀၀၀၀ကျပ်ရရှိခဲ့သော်လည်း ယခုနှစ်လက်လီပဲဈေးကွက်မှာ ပဲသီးနှံအားလုံးနီးပါး ဈေးမြင့်တက်ခဲ့သည့်အတွက် ပဲနီပြားသီးနှံသည်လည်း ယခင်နှစ် ကာလတူအချိန်ထက် ဈေးပိုမြင့်တက်လာပါသည်။ ယခုကာလတွင် ပဲသစ်ဝင်ရောက်ခြင်းမရှိသော်လည်း ပဲဟောင်းလက်ကျန်များရှိသောကြောင့် အရောင်းအဝယ်ဖြစ်မှုအနေဖြင့်  လက်ကားဝယ်ယူမှုရှိသည့်ရက်တွင် အိတ်၁၀၀ကျော်ရောင်းချမှုဖြစ်ခဲ့ပြီး လက်လီသမားအနေဖြင့် ပုံမှန်ရောင်းဝယ်ဖြစ်နေပြီး တစ်ရက်လျှင် အိတ်၂၀ကျော် ၃၀ခန့်ရောင်းဝယ်ခဲ့ကြရကြောင်းသိရှိရပါသည်။

DOCA(ပဲခူး)

         မကွေးတိုင်းဒေသကြီး၊ အထက်မင်းလှမြို့နယ်အတွင်းရှိ ကျေးရွာဖြစ်သော မယ်ဇလီတော၊ ပန်းတော်ပြင်၊ ဥယျာဉ်၊ ရွာတော်စသည့် ကျေးရွာများတွင် သီးနှံမျိုးစုံစိုက်ပျိုးလျက်ရှိရာ ပန်းတော်ပြင်ကျေးရွာ၌ ကီလိုမာလကာသီးကို ဥယျာဉ်ခြံမြေများတွင်လည်းကောင်း၊ အိမ်ခြံဝန်းအတွင်း၌လည်းကောင်း စီးပွားဖြစ်တစ်နိုင်တစ်ပိုင်စိုက်ပျိုးလျက်ရှိကြောင်း သိရသည်။

        ၂၀၂၄ခုနှစ်၊ အောက်တိုဘာလ(ဒုတိယပတ်)တွင် ကီလိုမာလကာသီးများလှိုင်လှိုင်ထွက်ရှိလျက်ရှိရာ တစ်လုံးလျှင်  အလုံးအကြီး၊ အသေးအလိုက် လက်ကားဈေး ကျပ်(၄၀၀-၅၀၀) ဈေးရရှိကြောင်း၊ ဈေးကွက်အနေဖြင့် မင်းလှမြို့ရှိ ဇေယျာသီရိဈေးနှင့် မင်းလှ-သရက်ကားလမ်းမဘေးရှိ သစ်သီးဆိုင်များသို့ တင်ပို့ရောင်းချကြောင်း သိရှိရပါသည်။

DOCA(မကွေး)