ပြည်တွင်းကုန်သွယ်မှုသတင်း

၂၀၂၄ခုနှစ်၊ စစ်ကိုင်းတိုင်းဒေသကြီး၊ ကန့်ဘလူခရိုင်၊ ကန့်ဘလူမြို့ မြို့မစည်ပင်သာယာဈေးကွက်အတွင်းသို့ ရှမ်းပြည်နယ် အောင်ပန်းတို့မှထွက်ရှိသော ခရမ်းချဉ်သီးများကို မန္တလေးတိုင်းဒေသကြီး မှ မှာယူရောင်းချပြီး အရောင်းအဝယ်ဖြစ်လျက်ရှိကြောင်းသိရှိရပါသည်။
ခရမ်းချဉ်သီးများသည် ယခုအချိန်အခါကာလဖြစ်သည့် မိုးရာသီတွင် မိမိတို့ဒေသထွက် ခရမ်းချဉ်သီးများ ဈေးကွက်အတွင်းသို့ဝင်ရောက်လာပြီး လုံလောက်မှုမရှိသေးသည့်အတွက် ရှမ်းပြည်နယ်၊ အောင်ပန်းဒေသထွက် ခရမ်းချဉ်သီးများကို မန္တလေးမြို့မှ မှာယူရောင်းချရပါသည်။ ရှမ်းပြည်၊ အောင်ပန်းဒေသထွက် ခရမ်းချဉ်သီးများမှာ ရာသီမရွေးဝယ်ယူစားသုံးနိုင်ပြီး အခွံလည်းထူ၍ အချဉ်အရသာ နည်းသည့်အပြင် အလုံးအရွယ်အစားလှခြင်း၊ အထားခံခြင်းတို့ကြောင့် လူအများက ကြိုက်နှစ်သက်ကြပါသည်။ ယခင်အောက်တိုဘာလတွင် ခရမ်းချဉ်သီးဈေးနှုန်းများမှာ တစ်ပိဿာလျှင် (၈၀၀၀)ကျပ် ဖြစ်ခဲ့ကြောင်းသိရှိရပါသည်။
ယခုနိုဝင်ဘာလ၊ ပထမအပတ်တွင် ခရမ်းချဉ်သီးဈေးနှုန်းအနေဖြင့် တစ်ပိဿာလျှင် (၈၀၀၀)ကျပ် (၂၅)ကျပ်သားလျှင် (၂၀၀၀)ကျပ်ဈေးနှုန်းဖြင့် တည်ငြိမ်လျက်ရှိပြီး အရောင်းအဝယ်ဖြစ်လျက်ရှိကြောင်း ကန့်ဘလူမြို့ ကုန်စိမ်းသီးနှံအရောင်းအဝယ်လုပ်နေသူများထံမှသိရှိရပါသည်။
DOCA(စစ်ကိုင်း)

ပြည်ခရိုင်၊ ပေါက်ခေါင်းမြို့နယ်၊ သဖန်းချိုအုပ်စု၊ လေးကြီးကျေးရွာတွင် ရွှေဖရုံသီးများစိုက်ပျိုးထားရှိသဖြင့် ဈေးနှုန်းဈေးကွက်အခြေအနေနှင့် အကျိုးအမြတ်ရရှိမှုအားသိရှိနိုင်ပါရန် စားသုံးသူရေးရာဦးစီးဌာန၊ ပေါက်ခေါင်းမြို့နယ်တာဝန်ခံနှင့် ဝန်ထမ်းများအဖွဲ့သည် (၄-၁၁-၂၀၂၄) ရက်နေ့၊ နံနက်ပိုင်းတွင် ကွင်းဆင်းဆောင်ရွက်ခဲ့ပါသည်။
ထိုသို့ကွင်းဆင်းဆောင်ရွက်ရာတွင် စိုက်ပျိုးသောဖရုံသီးမျိုးမှာ အိုးဖရုံမျိုးဖြစ်ပြီး စိုက်ဧကမှာ (၀.၂၅ဧက) ဖြစ်ပြီး စိုက်ပျိုးထားသူနှင့် တွေ့ဆုံမေးမြန်းရာတွင် ဖရုံသီးကို စတင်စိုက်ပျိုးပြီး (၁)လ ခွဲခန့်အကြာတွင် အသီးများထွက်ပေါ်၍ ခူးဆွတ်ရောင်းချကြောင်းသိရပါသည်။ ဖရုံသီး ၀.၂၅ ဧကတွင် စိုက်ပျိုးထုတ်လုပ်ကုန်ကျစရိတ်အနေဖြင့် ၂၈၀၀၀၀ကျပ်ခန့်ကုန်ကျကြောင်းသိရပါသည်။ ဖရုံသီးများခူးယူရောင်းချချိန်၌ ၀.၂၅ ဧကတွင် အလုံးပေါင်း ၂၂၀၀ ခန့်ခူးဆွတ်ရရှိပြီး တစ်လုံးလျှင် ၄၅၀ကျပ်ဖြင့် ကုန်စိမ်းပွဲစားများက စိုက်ခင်းသို့ဆင်း၍ ဝယ်ယူကြပါသည်။ ဖရုံသီးစိုက်ပျိုးသူ တောင်သူအနေဖြင့် ဖရုံသီးရာသီချိန်တွင် ရောင်းရငွေမှာ ၉၉၀၀၀၀ကျပ်ရရှိပြီး တောင်သူ အသားတင်အမြတ်ငွေမှာ ၇၁၀၀၀၀ကျပ်ရရှိကြောင်းသိရပါသည်။
ထို့ကြောင့် ရွှေဖရုံသီးကိုစိုက်ပျိုးခြင်းဖြင့် နှစ်စဉ်ဝင်ငွေများရရှိသဖြင့် ရွှေဖရုံသီးသည် စိုက်ပျိုးသင့်သော သီးနှံတစ်မျိုးဖြစ်ကြောင်းရေးသားတင်ပြလိုက်ရပါသည်။
DOCA(ပဲခူး)

ရန်ကုန်တိုင်းဒေသကြီး၊ တွံတေးခရိုင်၊ ကော့မှူးမြို့နယ်၌ မိုးသီးနှံစိုက်ပျိုးရာသီတွင် (၂၀၂၄-၂၀၂၅) ဘဏ္ဍာနှစ် မိုးစပါးလျာထားစိုက်ဧက (၈၈၀၉၉)ဧကအား ဖြစ်ထွန်းအောင်မြင်စွာစိုက်ပျိုးနိုင်ခဲ့ကြောင်း မြို့နယ်လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာနမှသိရှိခဲ့ရပြီး ယခုအချိန်တွင် လယ်ယာမြေများ စတင်ရိတ်သိမ်းခြွေလှေ့နေပြီဖြစ်ကြောင်းသိရသည်။
ကော့မှူးမြို့နယ်၌ မိုးရာသီဒေသခံတောင်သူများ သီးနှံဝင်ငွေတိုးပွားစေရန်နှင့် ပြည်တွင်းစားသုံးမှုဖူလုံစေရန်နှင့်ပြည်ပသို့တင်ပို့နိုင်ရေးအတွက်ရည်ရွယ်၍ တစ်မြို့လုံး မိုးစပါးသီးနှံလျာထားစိုက်ပျိုးမှုအနေဖြင့် စုစုပေါင်း(၈၈၀၉၉)ဧကအား ဖြစ်ထွန်းအောင်မြင်စွာစိုက်ပျိုးနိုင်ခဲ့ကြောင်းသိရသည်။ ယခုနှစ်မိုးရာသီစာစိုက်ပျိုးခဲ့သော မိုးစပါးသီးနှံစိုက်ခင်းများကို ဒေသခံတောင်သူများအနေဖြင့် အောက်တိုဘာလကုန်ပိုင်းကာလများတွင် စတင်ရိတ်သိမ်းခြွေလှေ့လျက်ရှိပြီး တစ်ဧက ပျမ်းမျှအထွက်နှုန်းအနေဖြင့် (၇၄.၆၄)တင်းထွက်ရှိကြောင်း စိုက်ပျိုးရေးဦးစီးဌာနစာရင်းအရသိရှိခဲ့ရပြီး ယခုကဲ့သို့ သီးနှံအထွက်နှုန်းကောင်းမွန်ရန်အတွက် စိုက်ပျိုးရေးဦးစီးဌာနက လိုအပ်သောစိုက်ပျိုးရေးနည်းပညာများကို ပူးပေါင်းကူညီဆောင်ရွက်ပေးခဲ့ကြသဖြင့် မိုးစပါးသီးနှံများကို ကောင်းမွန် စွာ၊ စိုက်ပျိုးဖြစ်ထွန်းအောင်မြင်စွာစိုက်ပျိုးနိုင်ခဲ့ပြီး ယခုအချိန်တွင် ရိတ်သိမ်းခြွေလှေ့စက်ကြီးများဖြင့် စတင်ရိတ်သိမ်းခြွေလှေ့နေပြီဖြစ်ကြောင်းသိရပါသည်။
DOCA(ရန်ကုန်)

                 မြန်မာနိုင်ငံတစ်ဝှမ်းထင်ပေါ်ကျော်ကြားသော လက်မှု့လုပ်ငန်းများတွင် မန္တလေးမြို့မှ ရွှေချည်ထိုး၊ ငွေချည်ထိုးလုပ်ငန်း၊ ပုဂံမြို့မှ ယွန်းထည်လုပ်ငန်းအပြင် ဧရာဝတီတိုင်းဒေသကြီး ပုသိမ်မြို့မှ ထုတ်လုပ်လျက်ရှိသော မြန်မာ့ရိုးရာလက်မှုအနုပညာ ပုသိမ်ထီးလုပ်ငန်းသည် မြန်မာနိုင်ငံအတွင်းသာမက ကမ္ဘာမှာပင်နာမည်ကျော်ကြား၍ ပြည်တွင်း ပြည်ပဈေးကွက်တွင် လူကြိုက်များလျက်ရှိကြောင်း ထီးလုပ်ငန်းရှင်များထံမှသိရသည်၊၊

               ပုသိမ်ထီးကို အစပထမတွင် ဆီစိမ်စက္ကူဖြင့် ပြုလုပ်ခဲ့သော်လည်း နောက်ပိုင်းတွင် ဖျင်စကိုတည်ရေများသုတ်လိမ်းပြီး ဆီစိမ်ကာ ရေစိုခံအောင်ပြုလုပ်သုံးစွဲခဲ့ပြီး ပြည်တွင်းမှထွက်ရှိသော ပိတ်ရောင်စုံ၊ တက်ထရွန်ရောင်စုံဖြင့်ထုတ်လုပ်၍ နိုင်ငံခြားငွေဖြင့်ဝယ်ယူရသော ကုန်ကြမ်းပစ္စည်းများမပါဘဲ ဒေသထွက်ကုန်ကြမ်းများဖြစ်သော မအူသစ်၊ ထီးရိုးဝါး၊ သရကူဝါး ၊ မြန်မာပိတ်စများဒေသတွင်းထွက်ရှိသည့် သုတ်ဆေး၊ ဆိုးဆေးများဖြင့် အသုံးပြုကာ ထီးရွက်ပေါ်တွင် ကနုတ်ပန်းချီရေးဆွဲခြင်း၊ ရှုခင်းပုံများရေးဆွဲခြင်း၊ ရှေးခေတ်ပန်းချီလက်ရာများ ရေးဆွဲခြင်းများ၊ ဆေးဆိုးခြင်းများပြုလုပ်၍ ထီးရွက်ကိုအလှဆင်ထားသည့်အတွက် မြန်မာ့လက်မှုအနုပညာကို ဖော်ထုတ်နိုင်သည့် ရိုးရာလုပ်ငန်းတစ်ခုအဖြစ် ထင်ရှားကျော်ကြား လျက်ရှိပါသည်၊၊

             ယခုပွင့်လင်းရာသီပုသိမ်ထီးဈေးကွက်တွင် တန်ဆောင်တိုင်ကထိန်အလှူရာသီအတွက် နေပြည်တော်၊ ရန်ကုန်၊ မန္တလေး၊ စစ်ကိုင်း၊ မြဝတီနှင့်တိုင်းအတွင်းရှိ မြို့နယ်များတွင် အလှဆောင်းထီး ၁၀ လက်မခွဲ ကျပ် ၁၀၀၀၀၊ ၁၄လက်မထီး ကျပ် ၁၂၀၀၀၊ ၁၅လက်မထီး ကျပ် ၁၅၀၀၀ ဈေးဖြင့် ပြည်တွင်းဈေးကွက်သုံးစွဲရန်အမှာစာဖြင့်လည်းကောင်း လူကိုယ်တိုင်သော်လည်းကောင်း လာရောက်ဝယ်ယူလျက်ရှိပြီး ပုသိမ်ထီးဈေးကွက်မှာ အရောင်းအဝယ် သွက်လျက်ရှိကြောင်း ဟိုတယ်အလှဆင်ရန်နှင့် ကမ်းခြေသုံးထီး ၂'၊ ၃'၊ ၄' ဆိုဒ်ထီးများကိုလည်း ပြုလုပ်လျက်ရှိပြီး ရန်ကုန်မှတစ်ဆင့်ပြည်ပနိုင်ငံများသို့တင်ပို့ရန် လာရောက်ချိတ်ဆက်မှုများရှိကြောင်း ပုသိမ်မြို့ ဘန့်ဘူးဟောက် ( BAMBOO HOUSE Traditional  Umberlla Work Shop)ထီးလုပ်ငန်းရှင်ထံမှသိရှိရပါသည်၊၊

DOCA(ဧရာဝတီ)

မကွေးတိုင်းဒေသကြီး၊ ပခုက္ကူဒေသတွင် ပဲစင်းငုံနီ၊ ပဲတီစိမ်း၊ ပဲနှောက်၊ ကုလားပဲ၊ ပဲနီပြား၊ ပဲယဉ်းအမျိုးမျိုး၊ ပဲဇီးကွက်၊ အခြားပဲများနှင့်နှမ်းအမျိုးမျိုးကို စိုက်ပျိုးထုတ်လုပ်လျက်ရှိပါသည်။ အဓိကတင်ပို့သော ပဲများမှာ ပဲစဉ်းငုံနီ၊ ပဲတီစိမ်း၊ ပဲနောက်၊ ကုလားပဲ၊ ပဲနီပြား၊ ပဲယဉ်းအမျိုးမျိုး၊ နှမ်းအမျိုးမျိုးနှင့် ကြက်သွန်နီများကို အများဆုံးတင်ပို့ကြောင်း ပို့ဆောင်ဆက်သွယ်ရေးဂိတ်များမှ သိရသည်။
အခြားဒေသသို့ တင်ပို့မှုမှာ တစ်လလျှင် အနည်းဆုံး ပဲစဉ်းငုံနီအိတ်ရေ(၂၀၆၀)၊ ကုလားပဲအမျိုးမျိုး အိတ်ရေ (၅၀၀၀)၊ ပဲဇီးကွက်အိတ်ရေ(၂၈၀)၊ ထီးလင်းစားတော်ပဲအိတ်ရေ(၃၉၀)၊ ပဲယင်းနီအိတ်ရေ (၃၀၅၀)၊ ပဲတီစိမ်းအိတ်ရေ(၇၈၀၀)၊ နှမ်းအိတ်ရေ(၂၀၀၀)၊ မတ်ပဲတင်ပို့မှုအိတ်ရေ(၅၅၀)ဖြစ်ပြီး ကြက်သွန်နီတင်ပို့မှုအိတ်ရေ(၃၉၀၀)ခန့်တင်ပို့ကြောင်း၊ ယခုလတွင် တင်ပို့မှုအများဆုံးမှာ ပဲတီစိမ်း၊ ကုလားပဲနှင့်ကြက်သွန်နီတို့ဖြစ်ပြီး တင်ပို့ခမှာ ကုန်ကျစ်တစ်ပိဿာလျှင် ကျပ်(၂၀၀)၊ ကုန်ပွတစ်ပိဿာလျှင် ကျပ်(၂၅၀) ဖြစ်ကြောင်း ပို့ဆောင်ဆက်သွယ်ရေးဂိတ်များမှသိရှိရပါသည်။
DOCA(မကွေး)