ပြည်တွင်းကုန်သွယ်မှုသတင်း

      ဝါးတန်းဆန်စပါးကုန်စည်ဒိုင်သို့ (၂၆-၃-၂၀၂၄) ရက်နေ့မှ (၁-၄-၂၀၂၄) ရက်နေ့အထိ ဆန်ဝင်ရောက်မှုစာရင်းများမှာ ဧရာဝတီတိုင်းဒေသကြီး၊ ဖျာပုံ၊ မြောင်းမြ၊ ဘိုက‌လေး၊ မော်ကျွန်း၊ ကျိုက်လတ်၊ ဓနုဖြူ၊ ဟင်္သာတ၊ လပွတ္တာ၊ ပန်းတနော်၊ ညောင်တုန်း၊ အဖျောက်၊ အသုတ်မြို့နယ်များမှ ပေါ်ဆန်းမွှေး (၄၂၇၈၀) အိတ်၊ ပေါ်ကျွဲ (၅၅၀၀) အိတ်၊ ဧည့်မထ(၉၃၁၇၀) အိတ်နှင့် ဆန်ကွဲ (၂၂၄၃၀) အိတ်ဝင်ရောက်ခဲ့ပြီး ပဲခူး (အရှေ့) ညောင်လေးပင်နှင့် ဖြူးမြို့နယ်များမှ ဧည့်မထ (၆၅၈၄) အိတ်နှင့် ပဲခူးတိုင်း(အနောက်)၊ သာယာဝတီ၊ လက်ပံတန်း၊ သုံးဆယ်မြို့နယ်များမှ ဧည့်မထ (၁၈၀၆၄) အိတ်၊ ငစိန် (၁၂၅၀) အိတ်နှင့် ရန်ကုန်တိုင်း ပြင်ပမြို့နယ်များဖြစ်သော ကော့မှူး၊ လက်ခုတ်ကုန်း၊ တိုက်ကြီး၊ ပျော်ဘွယ်၊ ဥက္ကံမြို့နယ်များမှ ဧည့်မထ (၁၇၆၀၀) အိတ်တို့ဝင်ရောက်မှုရှိကြောင်း ဝါးတန်းဆန်စပါးကုန်စည်ဒိုင်၏ ပြောကြားချက်အရသိရှိရပါသည်။

DOCA(ရန်ကုန်)

      မကွေးတိုင်းဒေသကြီး၊ ပခုက္ကူခရိုင်၊ ပခုက္ကူကုန်စည်ဒိုင်တွင် ပဲမျိုးစုံဝင်ရောက် အရောင်းအဝယ်ဖြစ်လျက်ရှိရာ ၂၀၂၄ခုနှစ်၊ မတ်လ စတုတ္ထပတ်၌ ထောပတ်ပဲဈေးနှုန်းများ ယခင်အပတ်ထက်မြင့်တက်လာကြောင်း ကုန်စည်ဒိုင်မှသိရှိရပါသည်။ ထောပတ်ပဲစိုက်ပျိုးရာဒေသများဖြစ်သော ပခုက္ကူကျွန်းနယ်များ၊ ရေစကြိုဒေသဘက်မှ ကျွန်းနယ်များနှင့် ယောနယ်ဒေသမှထွက်ရှိသော ထောပတ်ပဲများ ဝင်ရောက်အရောင်းအဝယ်ဖြစ်လျက်ရှိပါသည်။ ပခုက္ကူကုန်စည်ဒိုင်သည် ပခုက္ကူခရိုင်တစ်ခုလုံး၏ စီးပွားရေးအချက်အချာကျသော နေရာဒေသတစ်ခုလည်းဖြစ်ပါသည်။

         ပခုက္ကူကုန်စည်ဒိုင်သို့ ထောပတ်ပဲဖြူ(ကျွန်း)နှင့် ထောပတ်ပဲဖြူ(ယော)များ အရောင်းအဝယ်ဖြစ်လျက်ရှိပါသည်။ ၂၀၂၄ခုနှစ်၊ မတ်လ(ပထမပတ်)တွင် ပခုက္ကူကုန်စည်ဒိုင်ပြတ်ဈေးမှာ ထောပတ်ပဲဖြူ (ကျွန်း) မှာ တစ်တင်းလျှင် ကျပ်(၁၁၇၀၀၀)၊ မတ်လ(ဒုတိယပတ်)တွင် ထောပတ်ပဲဖြူ (ကျွန်း) တစ်တင်းလျှင် ကျပ်(၁၁၈၅၀၀)၊ မတ်လ(တတိယပတ်)တွင် ထောပတ်ပဲဖြူ (ကျွန်း) တစ်တင်းလျှင် ကျပ်(၈၇၀၀၀)၊ မတ်လ(စတုတ္ထပတ်)တွင် ထောပတ်ပဲဖြူ (ကျွန်း) တစ်တင်းလျှင် ကျပ်(၉၁၅၀၀) ဖြစ်ပြီး၊ မတ်လ (တတိယပတ်)နှင့်နှိုင်းယှဉ်ပါက ထောပတ်ပဲဖြူ (ကျွန်း)တစ်တင်းလျှင် ကျပ်(၄၅၀၀) ဈေးနှုန်းမြင့်တက်ခဲ့ပါသည်။ မတ်လ(တတိယပတ်)တွင် ထောပတ်ပဲဖြူ (ယော) တစ်တင်းလျှင် ကျပ်(၁၁၅၀၀၀)၊ မတ်လ(စတုတ္ထပတ်)တွင် ထောပတ်ပဲဖြူ (ယော) တစ်တင်းလျှင် ကျပ်(၁၀၁၀၀၀) ဖြစ်ခဲ့သောကြောင့် ထောပတ်ပဲဖြူ (ယော)တစ်တင်းလျှင် ကျပ် (၁၄၀၀၀) ဈေးနှုန်းကျဆင်းနေခဲ့ပြီး အရောင်းအဝယ်ဖြစ်မှုအိတ်ရေမှာ နေ့စဉ် အိတ်(၅၀)မှ အိတ်(၄၀၀)အထိအရောင်းအဝယ်ဖြစ်နေ၍ ယခုအပတ်တွင် ထောပတ်ပဲဖြူများ အရောင်းအဝယ်သွက်လာကြောင်း  ကုန်စည်ဒိုင်မှသိရှိရပါသည်။

DOCA(မကွေး)

      မကွေးတိုင်းဒေသကြီး၊ ပခုက္ကူခရိုင်၊ ဆိပ်ဖြူမြို့ရှိ ကြက်သွန်နီကုန်စည်ဒိုင်၌ ၂၀၂၄ခုနှစ်၊ မတ်လအတွင်း မိုးကြက်သွန်နီ(ပင်စိုက်)အသစ်များစတင်ဝင်ရောက်ပြီး ဒေသတွင်းကြက်သွန် စိုက်ပျိုးထွက်ရှိရာ ကျေးရွာများနှင့် ပခုက္ကူ၊ ချောက်မြို့နယ်အတွင်းရှိကျေးရွာများမှ ဝင်ရောက်လျက် အရောင်းအဝယ်ဖြစ်ကြောင်း၊ နေ့စဉ်ကုန်ချိန်ပိဿာ (၈)သောင်းမှ (၂)သိန်းထိဝင်ရောက် အရောင်းအဝယ်ဖြစ်လျက်ရှိပါသည်။

       ဈေးနှုန်းဈေးကွက်အနေဖြင့် မတ်လ(ပထမပတ်)တွင် နွေကြက်သွန်နီများ ဒေသတွင်းသီးနှံပေါ်ချိန်အစဖြစ်၍ ဈေးမြင့်၍ အရောင်းအဝယ်ဖြစ်ခဲ့ပြီး နွေကြက်သွန်နီတစ်ပိဿာလျှင် ထိပ်စ အမြင့်ဈေး ကျပ်(၂၆၇၅)နှင့် အနိမ့်ဈေး ကျပ်(၂၁၀၀)ဖြင့် အရောင်းအဝယ်ဖြစ်ခဲ့ပြီး မတ်လ (ဒုတိယပတ်)တွင် ကုန်စည်ဒိုင်သို့ ကြက်သွန်နီကုန်ချိန်ဝင်ရောက်မှုများ၍ ဈေးအနည်းငယ်ကျဆင်းပြီး ထိပ်စတစ်ပိဿာလျှင် အမြင့်ဈေး ကျပ်(၂၂၅၀)၊ အနိမ့်ဈေး ကျပ်(၁၅၀၀)ဖြင့်အရောင်းအဝယ်ဖြစ်ကြောင်း၊ မတ်လ (တတိယပတ်)တွင် ဈေးဆက်လက်ကျဆင်းလာခဲ့ပြီး အရောင်းအဝယ်ဖြစ်လျက်ရှိသည်။ နွေကြက်သွန်နီ ထိပ်စတစ်ပိဿာလျှင် အမြင့်ဈေး ကျပ်(၂၁၅၀)၊ အနိမ့်ဈေး ကျပ်(၁၄၀၀)ဖြင့် အရောင်းအဝယ်ဖြစ်ခဲ့ကြောင်း၊ မတ်လ(စတုတ္ထပတ်)တွင် ဒေသတွင်းကြက်သွန်လှိုင်လှိုင်တူးဖော်ချိန်ဖြစ်၍ ဈေးနှုန်းမှာ တရိပ်ရိပ်ဆက်လက်ကျဆင်း၍ အရောင်းအဝယ်ဖြစ်ကြောင်း၊ နွေကြက်သွန်နီ ထိပ်စတစ်ပိဿာလျှင် အမြင့်ဈေး ကျပ်(၁၉၇၅)၊ အနိမ့်ဈေး ကျပ်(၁၄၀၀) ဖြင့် အရောင်းအဝယ်ဖြစ်လျက်ရှိကြောင်း၊ မတ်လအတွင်း နွေကြက်သွန်နီတစ်ပိဿာလျှင် ကျပ်(၃၇၅)ခန့်ဈေးနှုန်းကျဆင်း၍ အရောင်းအဝယ်ဖြစ်ကြောင်း၊ ဒေသတွင်းတူးဖော်လျက်ရှိသော နွေကြက်သွန်နီများ ဈေးကွက်သို့ ကုန်ချိန်ဝင်ရောက်မှုများပြီး ပြည်ပဝယ်လိုအားဈေးကွက်နည်း၍ ဈေးနှုန်းကျဆင်းကြောင်း ကုန်စည်ဒိုင်ဈေးကွက်မှသိရှိရသည်။

       ပြည်တွင်းဈေးကွက်အနေဖြင့် ဆိပ်ဖြူမြို့နယ်မှထွက်ရှိသည့် ကြက်သွန်နီများကို ရန်ကုန်တိုင်းဒသကြီး၊ ဘုရင့်နောင်ကုန်စည်ဒိုင်နှင့် ပြည်၊ ပုသိမ်မြို့များအပြင် ဆိပ်ဖြူမြို့မှ တိုက်ရိုက် မော်တော်ယာဉ်များဖြင့် မြဝတီ၊ မော်လမြိုင်မြို့ ဝယ်လက်များမှတစ်ဆင့် ထိုင်း၊ တရုတ်၊ ဗီယက်နမ်နိုင်ငံများသို့ တင်ပို့လျက်ရှိကြောင်း၊ ကုန်စည်စီးဆင်းမှုအနေဖြင့် ဘုရင့်နောင်ကုန်စည်ဒိုင်သို့ (၁၂)ဘီးကား (၈၅)စီး၊ ပျမ်းမျှပိဿာချိန် (၉)သိန်း၊ မြဝတီမြို့သို့ တွဲကားအစီးရေ (၃၅)စီး၊ ပျမ်းမျှပိဿာချိန် (၇)သိန်း၊ မော်လမြိုင်မြို့သို့ တွဲကားအစီးရေ (၅)စီး၊ ပျမ်းမျှပိဿာချိန် (၂)သိန်း၊ ပြည်မြို့သို့ (၆)ဘီးကားအစီးရေ (၂၅)စီး၊ ပျမ်းမျှပိဿာချိန် (၂)သိန်း၊ ပုသိမ်မြို့သို့ (၆)ဘီးကားအစီးရေ (၂၆)စီး၊ ပျမ်းမျှပိဿာချိန် (၂)သိန်း၊ စုစုပေါင်းကြက်သွန်နီပျမ်းမျှပိဿာချိန် (၂၂)သိန်း၊ တန်ချိန်အားဖြင့် (၃၅၉၂)တန်ခန့် ကုန်စည်စီးဆင်းခဲ့ကြောင်း ကြက်သွန်နီကုန်စည်ဒိုင်ဈေးကွက်မှသိရှိရပါသည်။

DOCA(မကွေး)

      မကွေးတိုင်းဒေသကြီး၊ သရက်ခရိုင်၊ အထက်မင်းလှမြို့နယ်ရှိ ပတ်ဝန်းကျင်ကျေးရွာများသည် စိုက်ပျိုးရေးကိုအဓိကထားလုပ်ကိုင်ကြပြီး ပန်းတော်ပြင်ကျေးရွာ၌ ကောက်ရိုးမှိုကို တစ်နိုင်တစ်ပိုင်စီးပွားဖြစ်စိုက်ပျိုးခြင်းဖြင့် တစ်ဖက်တစ်လမ်းမှ မိသားစုအပိုဝင်ငွေရရှိကာ အဆင်ပြေလျက်ရှိ‌ကြောင်းသိရှိရပါသည်။

     ကောက်ရိုးမှိုကို နေရာဒေသမရွေးစိုက်ပျိုးနိုင်ပြီး ၎င်းမှာ ပူအိုက်စိုစွတ်သောသဘာဝကို ကြိုက်နှစ်သက်သည့် မှိုတစ်မျိုးဖြစ်ကြောင်းသိရှိရပါသည်။ စိုက်ပျိုးရာတွင် အလျား(၇)တောင်၊ အနံ(၃)တောင်ရှိသော မှိုစိုက်ပေါင်တစ်ခုပြုလုပ်ရပြီး ဘေးပတ်လည်မှ အကျယ်(၅)လက်မ၊ အနက်(၅)လက်မခန့်ရှိသော မြောင်းကျင်းတစ်ခုတူးပေးရကြောင်း၊ မှိုစိုက်ပေါင်တစ်ခုအတွက် လိုအပ်သောကုန်ကြမ်းပစ္စည်းများမှာ နွားချေး(၁၂)တင်း၊ ဂျပ်စက္ကူ(၁၀)ပိဿာ၊ ဝါးတစ်လုံး၊ ပလတ်စတစ်အကြည်၊ မြေတွင်းပိုးသတ်ဆေး၊ မှိုမျိုးနှင့်အော်ဂဲနစ်ဖြည့်စွက်စာအားဆေးများဖြစ်ကြောင်း၊ ပထမဦးစွာ မှိုစိုက်မည့်မြေနေရာကို သေချာရှင်းလင်းပြီး မြေတွင်းပိုးသတ်ဆေးဖြန်းပေးရကြောင်း၊ ပိုးသတ်ဆေးဖြန်းထားသည့်အပေါ်သို့ နွားချေး(၁၀)တင်းခန့်ဖြန့်ခင်းထားပြီး ၎င်းနွားချေးပေါ်မှ ရေစိမ်ထားသော ဂျပ်စက္ကူ (၁၀)ပိဿာအား ချေမွ၍ဖြန့်ထားပေးရကြောင်း၊ ဂျပ်စက္ကူများအပေါ်မှ မှိုမျိုး(၆)ထုပ်ခန့်ကို အော်ဂဲနစ်ဖြည့်စွက်စာအားဆေးထုပ်(၂)ထုပ်နှင့်ရော၍ချေမွကာ ညီညာစွာဖြူးထားပေးပြီး ထပ်မံ၍ ကျန်ရှိသောနွားချေး(၂)တင်းအား အပေါ်မှဖြန့်ခင်းပေးရကြောင်း၊ ထို့နောက် ရေငါးဂါလံ (၂)ပုံးခန့်ပက်ဖြန်းပေးရကြောင်း၊ မှိုစိုက်ပေါင်အပေါ်တွင် လေလုံအောင် တစ်ပေခွဲခန့်ရှိသော ပလတ်စတစ်အကြည်ပေါင်းမိုတစ်ခုပြုလုပ်ကာ ထိုအမိုးပေါ်မှ အရိပ်ရစေရန်အတွက် သက်ကယ်ထပ်မံမိုးထားပေးရကြောင်း၊  ၎င်းသက်ကယ်ပေါ်မှ ရေငါးဂါလန်(၅)ပုံးခန့်လောင်းပေးရကြောင်း၊ စိုက်ပျိုးစဉ်တစ်လျှောက် ရာသီဥတုအပေါ်မူတည်၍ တစ်နေ့လျှင် ရေ(၃)ကြိမ်မှ (၆)ကြိမ်အထိလောင်းပေးရကြောင်း၊ မှိုစိုက်ပေါင်တစ်ခု၏ ကုန်ကျစရိတ်မှာ ကျပ်(၄၅၀၀၀)ခန့်ကုန်ကျကြောင်း၊ မှိုမျိုးကို မကွေးမြို့မှဝယ်ယူကြောင်းသိရှိရပါသည်။

       စိုက်ပျိုးပြီးနောက် (၂)ပတ်ခန့်အကြာတွင် ဈေးကွက်ဝင်ကောက်ရိုမှိုများစတင်ခူးဆွတ်၍ ရောင်းချနိုင်ပြီဖြစ်ကြောင်း၊ မှိုစိုက်ပေါင်(၁)ခု၏သက်တမ်းမှာ (၁)လခန့်ကြာမြင့်ပြီး ၎င်းသက်တမ်းအတွင်း မှိုကို (၂)ကြိမ်မှ (၃)ကြိမ်အထိခူးဆွတ်နိုင်ကြောင်း၊ အထွက်နှုန်းအနေဖြင့် မှိုစိုက်ပေါင် (၁)ပေါင်လျှင် အနည်းဆုံး(၇)ပိဿာမှ (၁၄)ပိဿာထိထွက်ရှိကြောင်း၊ မှုစိုက်တောင်သူအနေဖြင့် မှိုစိုက်ပေါင်(၁၀)ခုပြုလုပ်ထားကြောင်း၊ မှိုတစ်ပိဿာလျှင် လက်ကားဈေး ကျပ်(၈၀၀၀)ဖြင့်ရောင်းချကြောင်း၊ ဈေးကွက်အနေဖြင့် မလွန်၊ မင်းလှ၊ ဘက်စုံ၊ PIC ရှိဈေးများသို့ တင်ပို့ရောင်းချကြောင်း ပန်းတော်ပြင်ကျေးရွာနေ မှိုစိုက်ပျိုးသူ ဦးသိန်းထိုက်ထံမှသိရှိရပါသည်။

DOCA(မကွေး)

     ရန်ကုန်မြို့တွင် အိမ်ဆောက်ပစ္စည်းများဖြစ်သည့် ဘိလပ်မြေမှာ ယခုတစ်ပတ်အတွင်း ၁၈.၃.၂၀၂၄ မှ ၂၂.၃.၂၀၂၄ ထိ ဈေးနှုန်းအနည်းငယ်မြှင့်တက်လာခဲ့ကြောင်း သိရပြီး ပြည်တွင်းတည် ဆောက်ရေးလုပ်ငန်းများအနေဖြင့် ဘတ်ဂျက်ပိတ်ကာလဖြစ်၍ လုပ်ငန်းများအပြီးပြတ် ဆောင်ရွက်နေရသလို သယ်ယူပို့ဆောင်ခနှုန်းထားများကြောင့်လည်းကောင်း၊ ပြည်တွင်းကုန်ကြမ်းရရှိမှု အခက်အခဲများကြောင့်လည်းကောင်း ပြည်တွင်းစက်ရုံများမှ ကုန်ထုတ်လုပ်မှုလျော့နည်းခြင်းတို့ကြောင့် ပြည်တွင်းဈေးကွက်မှာ ကုန်ပစ္စည်းလက်ကျန်နည်း၍ ဈေးနှုန်းအနည်းငယ်မြှင့်တက်လာခြင်းဖြစ်ကြောင်း ဘိလပ်မြေအရောင်းဆိုင်များတွင် မေးမြန်းစုံစမ်းမှုအရ သိရှိရပါသည်။

       ဈေးကွက်ရှိ ဆောက်လုပ်ရေးလုပ်ငန်းများအတွက် Alpha အမျိုးအစား ဘိလပ်မြေမှာ အရည်အသွေးကောင်းမွန်သောကြောင့် သုံးစွဲသူများပြီး ဖေဖော်ဝါရီလ နောက်ဆုံးပတ်မှ မတ်လ နောက်ဆုံးပတ်အတွင်း တစ်အိတ်လျှင်  ၁၂၅၀၀ မှ ၁၆၅၀၀ အထိ မြှင့်တက်လာခဲ့ပါသည်။ ယခုအခါ Alpha အမျိုးအစားဘိလပ်မြေအပြင် အခြား AAA၊ ကြံ့နှစ်ကောင်၊ အပါချီ၊ Yojin၊ ဆင်မင်း အစရှိသည့် ဘိလပ်မြေအမျိုးအစားများကိုလည်း အသုံးပြုမှုများလာကြကြောင်း၊ ဈေးကွက်အတွင်း စုံစမ်းမေးမြန်းချက်များအရ သိရှိရပါသည်။ ယင်းအမျိုးအစားများမှာ အမျိုးအစားပေါ်မူတည်၍ တစ်အိတ်လျှင်  ၁၁၅၀၀ ကျပ် မှ ၁၅၅၀၀ ကျပ် အထိရှိကြောင်း စုံစမ်းသိရှိရပါသည်။

DOCA(ရန်ကုန်)