ပြည်တွင်းကုန်သွယ်မှုသတင်း

         ပြည်ခရိုင်၊ ရွှေတောင်မြို့နယ်အနေဖြင့် ယခုနှစ်တွင် မိုးနှမ်းစိုက်ပျိုးဧက ၃၂၂၆ဧကစိုက်ပျိုးခဲ့ပါသည်။ ဝါးတောကျေးရွာအုပ်စု၊ ဖားအိုင့်ကျေးရွာတွင် မိုးနှမ်းစိုက်ပျိုးဧက (၁၇)ဧကစိုက်ထားကြောင်းသိရှိရ၍ ကုန်ကျစရိတ်နှင့် အထွက်နှုန်း၊ ဈေးကွက်အခြေအနေများကိုသိရှိနိုင်ရန် ကွင်းဆင်းလေ့လာခဲ့ပါသည်။ မိုးနှမ်းကို ဇွန်လဆန်းတွင် စတင်စိုက်ပျိုးပြီး အောက်တိုဘာလတွင် ရိတ်သိမ်းကြပါသည်။ စိုက်ပျိုးထုတ်လုပ်ကုန်ကျစရိတ်အနေဖြင့် တစ်ဧကလျှင် (၄)သိန်းကျပ်ခန့်ကုန်ကျပြီး တစ်ဧကအထွက်နှုန်းအနေဖြင့် (၁၀)တင်းခန့်ထွက်ရှိကြောင်းသိရပါသည်။ ရောင်းချ သောဈေးနှုန်းအနေဖြင့် တစ်တင်းလျှင် (၁၅၀၀၀၀)ကျပ်နှုန်းဖြင့်ရောင်းချရ၍ အသားတင်အမြတ်အနေဖြင့် တစ်ဧကလျှင် ၁၁၀၀၀၀၀ကျပ်ရရှိကြောင်းသိရပါသည်။ ယခင်နှစ်တွင်လည်း ယခုနှစ်ကဲ့သို့ မိုးနှမ်းတစ်ဧကကုန်ကျစရိတ်အနေဖြင့် ကျပ်(၄)သိန်းခန့်ကုန်ကျပြီး အထွက်နှုန်းမှာ ၁၀တင်းခန့်ထွက်ရှိသော်လည်း ဈေးနှုန်းမှာတစ်တင်းလျှင် (၁)သိန်းကျပ်သာရရှိ၍ ဈေးနှုန်းကွာခြားသဖြင့် တောင်သူအကျိုးအမြတ်အနေဖြင့် ကျပ်(၆)သိန်းသာရရှိ၍ ယခုနှစ်တွင် တောင်သူများ အကျိုးအမြတ်ပိုမိုရရှိကြောင်းသိရှိရပါသည်။

DOCA(ပဲခူး)

         ပဲခူးတိုင်းဒေသကြီး၊ ပြည်ခရိုင်၊ ပြည်မြို့တွင် ယခုတန်ဆောင်မုန်းကာလ တန်ဆောင်မုန်းပဲသီးများကို ဈေးကွက်အတွင်းသို့ တင်ပို့ရောင်းချလျက်ရှိပါသည်။ တန်ဆောင်မုန်းပဲကို ဝါခေါင်လမှစတင်၍ စိုက်ပျိုးပြီး (၄)လအကြာ တန်ဆောင်မုန်းလတွင် အသီးများကို စတင်ခူးဆွတ်ရောင်းချကြပါသည်။ တန်ဆောင်မုန်းပဲသီးများကို မှော်ဇာ၊ တွင်းမြည်း၊ တောင်လုံးညို၊ ဇီးအုပ်၊ ပေါက်တော၊ မြောင်းငယ်လှ၊ ပေါက်ခေါင်းစသောဒေသများတွင် အဓိကထားစိုက်ပျိုးလျက်ရှိသည်။ ယခင်နှစ်ဈေးနှုန်းအနေဖြင့် တန်ဆောင်မုန်းပဲသီး (၈)တောင့်တစ်စည်းလျှင် ကျပ်(၃၀၀)မှ ကျပ်(၄၀၀)အထိရှိခဲ့ပြီး၊ ယခုနှစ်ဈေးနှုန်းမှာ (၈)တောင့်တစ်စည်းလျှင် (၅၀၀)ကျပ်မှ (၆၀၀)ကျပ်အထိရောင်းချလျက်ရှိကြောင်းသိရှိရပါသည်။

DOCA(ပဲခူး)

   စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာန၊ ရွှေဘိုခရိုင်ဦးစီးမှူးရုံးအနေဖြင့် စားသုံးသူကာကွယ်ရေးလုပ်ငန်းများအပြင် ပြည်တွင်းကုန်သွယ်မှုဖွံ့ဖြိုးရေးလုပ်ငန်းများ ဆောင်ရွက်လျက်ရှိပြီး ပုဂ္ဂလိကကဏ္ဍဖွံ့ဖြိုးတိုးတက်ရေးအတွက် စီးပွားရေးလုပ်ငန်းရှင်များနှင့် တွေ့ဆုံ၍ အခြေခံစားကုန်ဈေးနှုန်းများ၊ ဓါတ်မြေဩဇာနှင့် ပိုးသတ်ဆေးဈေးနှုန်းများအား အပတ်စဉ်တင်ပြလျက်ရှိပါသည်။

    အောက်တိုဘာလ၊ လကုန်အပတ်တွင် ရွှေဘိုမြို့၌ ရောင်းချလျက်ရှိသော ဓါတ်မြေဩဇာနှင့် ပိုးသတ်ဆေးဈေးနှုန်းများမှာ အာမို၊ ကျွဲနက်တံဆိပ် (၁၅:၁၅:၁၅) ကွန်ပေါင်းဓါတ်မြေဩဇာတစ်အိတ်လျှင် (၂၀၀၀၀ဝိ/-)ကျပ်၊ ဇာမဏီတံဆိပ် (၁၃:၅:၇) ကွန်ပေါင်းဓါတ်မြေဩဇာ 50kgတစ်အိတ်လျှင် (၉၅၀၀ဝိ/-) ကျပ်၊ အာမို၊ ပုလဲတံဆိပ် ကွန်ပေါင်းဓါတ်မြေဩဇာတစ်အိတ်လျှင် (၁၁၀၀၀ဝိ/-)ကျပ်နှင့်  ဒီမွန် 1.8တံဆိပ် ထိသေ/စားသေ (အဆိပ်ငွေ့) 500cc တစ်ဗူးလျှင်(၂၃၀၀ဝိ/-)ကျပ်၊ ငှက်ကြီးတောင်တံဆိပ် ထိသေ/စားသေ(အဆိပ်ငွေ့) 100ccတစ်ဗူးလျှင်(၃၇၅၀ဝိ/-)ကျပ်၊ ဇိုင်ကလုံးတံဆိပ်ပင်လုံးပြန့်ပိုးသတ်ဆေး တစ်လီတာတစ်ဗူးလျှင်(၇၃၀၀ဝိ/-)ကျပ်ဖြင့် ရောင်းချလျက်ရှိပြီး ပန်းဖူးတံဆိပ်ဓါတ်မြေဩဇာ၊ MCတံဆိပ် (၁၅:၁၅:၁၅) ကွန်ပေါင်းဓါတ်မြေဩဇာနှင့် ရှောင်လင်တံဆိပ် ထိသေ/စားသေ(အဆိပ်ငွေ့)ပိုးသတ်ဆေးများမှာ ဈေးကွက်အတွင်း ပစ္စည်းပြတ်လျက်ရှိကြောင်း ဓါတ်မြေဩဇာနှင့် ပိုးသတ်ဆေးအရောင်းဆိုင်များမှ တာဝန်ရှိသူများနှင့် ဆက်သွယ်မေးမြန်းမှုအရ သတင်းရရှိပါသည်။

DOCA(စစ်ကိုင်း)

      ပြည်ခရိုင်တွင် မိုးစပါးများစတင်ထွက်ပေါ်နေပြီဖြစ်ပါသည်။ ပြည်ခရိုင်တွင် မိုးစပါးစုစုပေါင်းစိုက်ဧက (၂၂၆၄၉) ဧကရှိပါသည်။ ယခင်နှစ်မိုးစပါးပေါ်စအချိန်တွင် (၄၆)ပေါင်ပါ တင်း (၁၀၀)လျှင် (၁၆၅၀၀၀၀)ကျပ်ရှိခဲ့ပြီး ယခုနှစ် စပါးပေါ်စအချိန်တွင် (၁၅၅၀၀၀)ကျပ်ဈေးရှိပြီး အစို(၂၀%) ရှိပါသည်။ ယခင်နှစ်တွင် စပါးအထွက်နှုန်း (၈၉.၇၅)ရှိခဲ့ပြီး တောင်သူများ တစ်ဧကလျှင် ကုန်ကျစာရိတ် ကျပ်(၈၀၀၀၀၀)‌ကျော်ကုန်ကျပါသည်။ ယခင်နှစ်စပါးဈေးမှာ တင်း(၁၀၀)လျှင် (၁၆၅၀၀၀၀)ကျပ်ရှိသည့်အတွက် တစ်ဧကလျှင် ကျပ်(၁၄၀၀၀၀၀)သိန်းကျော်ဝင်ငွေရရှိသည့်အတွက် တစ်ဧကလျှင် (၆၀၀၀၀၀)‌ ကျပ်အကျိုးအမြတ်ရရှိပါသည်။ အရောင်းအဝယ်အနေဖြင့် စတင်ထွက်ပေါ်ချိန်ဖြစ်သည့်အတွက် အနည်းငယ်သာရှိနေပါသည်။ ပြည်ခရိုင်မှ အခြားတိုင်းသို့ ဆန်တင်ပို့မှုအနေဖြင့် တစ်ပတ်လျှင် အိတ် (၁၇၀၀)တင်ပို့ရောင်းချမှုရှိပြီး မကွေးတိုင်းသို့ တစ်ပတ်လျှင် အိတ်ရေ (၄၀၀၀)ခန့်တင်ပို့ရောင်းချလျက်ရှိပါသည်။ ဆန်ဈေးနှုန်းအနေဖြင့် ပျမ်းမျှ (၇၂၀၀၀-၇၅၀၀၀)ကျပ်ဈေးဖြင့် တင်ပို့ရောင်းချလျက်ရှိကြောင်းသိရပါသည်။

DOCA(ပဲခူး)

        ပြည်ဈေးကွက်အတွင်း ရှမ်းပြည်နယ်တောင်ကြီးဘက်မှအဝင်ရှိနေသော မုန်လာဥနီများ (၅)ရက်ခြားလျှင် တစ်ကြိမ်အဝင်ရှိကာ ၁ဖာလျှင် (၆)ပိဿာဝင်ဆံ့သည့် (၅)ဖာခန့်အဝင်ရှိနေ သည်။ ယခုအောက်တိုဘာလ နောက်ဆုံးပတ်တွင် မုန်လာဥနီ (၁၀)ကျပ်သားလျှင် ကျပ် ၁၄၀၀/ ၁၅၀၀ နှုန်းရှိပြီး  ယခင်ဈေးမှာ ကျပ်(၅၀၀-၆၀၀)ခန့်သာရှိသဖြင့် ဈေးနှုန်းမှာ (၃)ဆခန့်မြင့် တက်သွားပြီး အရောင်းအဝယ်မှာ ဝင်ရောက်မှု၏ ထက်ဝက်ခန့်သာ အရောင်းအဝယ်ဖြစ်လျက်ရှိနေကြောင်းသိရပါသည်။

DOCA(ပဲခူး)