ပြည်တွင်းကုန်သွယ်မှုသတင်း

ဧရာဝတိုင်းဒေသကြီး၊ ညောင်တုန်းမြို့နယ်၊ သောင်းတန်းကျေးရွာ၊ ပေစိကျေးရွာ၊ ရှမ်းစု ကျေးရွာများ တွင် သီးနှံမျိုးစုံ စီးပွားဖြစ်စိုက်ပျိုးသူ များပြားပြီး သခွားသီးနှံကို နှစ်စဉ်စိုက်ပျိုး တိုင်ထောင် စနစ်ဖြင့် စိုက်ပျိုးလျှက် ရှိသည်။  ဟင်းသီးဟင်းရွက်စိုက်ဧက ၁၂၅ ဧကရှိပြီး သခွား  စိုက်ဧက ၂၀ ခန့် စိုက်ပျိုးကြောင်း သိရသည်။

          မျိုးအနေဖြင့် (1181) မျိုးကို စိုက်ပျိုးပြီး ယခု စိုက်ဧက ၀.၅၀ဧကအား သခွားမျိုးဈေး တစ်ထုတ်ကို ငွေကျပ် ၁၁၀၀၀/-ဖြင့် ဝယ်ယူစိုက်ပျိုးရသည်။  စိုက်ခင်း ဧက ဝက်ဖြစ်သော (၀.၅၀)ဧကကို မျိုးထုတ် ၁၀ထုတ်စိုက်ပျိုးသည်။  ဒီဇင်ဘာလ တွင် စိုက်ပျိုးပြီး ဇန်နဝါရီလတွင် ထွက်ရှိသောကြောင့် ၁လခွဲသက်တမ်းတွင် သီးနှံထွက်ရှိသည်။ စိုက်ပျိုးထုတ်လုပ်မှု ကုန်ကျစရိတ် အနေဖြင့် မျိုး၊ သွင်းအားစု၊ လုပ်သားခ၊ ထွန်ယက်ခ၊ ရေတင်ခ အပါအဝင်  ဧကဝက်တွင်  ငွေကျပ် ၃၀၀၀၀၀ ဝန်းကျင်ခန့် ကုန်ကျကြောင်း၊ အထွက်နှုန်း အနေဖြင့် အလုံးရေ ၃၀၀၀ခန့် ထွက်ရှိကြောင်း သိရသည်။

          ဈေးနှုန်းအနေဖြင့် ဇန်နဝါရီလတွင် လက်ကားဈေး သခွားအလုံး ၁၀၀ကို ငွေကျပ် ၂၀၀၀၀ ဖြင့် ရောင်းချရကြောင်း၊  ယခု စိုက်ခင်း ဧကဝက်တွင် ငွေကျပ် ၆ ၀၀၀ ၀၀၀ ရရှိ၍ ငွေကျပ် ၃၀၀ ၀၀၀ ခန့် အကျိုးအမြတ်ရရှိကြောင်း၊ ဈေးကွက်အနေဖြင့် ရန်ကုန်မြို့သို့ အဓီက တင်ပို့ရောင်းချသည်။  ရန်ကုန်မှ အခြားနယ်မြေများသို့လည်းတင်ပို့ကြောင်း သိရသည်။ သခွားသီးနှံသည် ကုန်ကျ စရိတ် သက်သာပြီး အကျိုး အမြတ်များ ပိုမိုရရှိသောကြောင့် နှစ်စဉ်တိုးချဲ့ စိုက်ပျိုး လျက်ရှိကြောင်းနှင့် မိုးသီးနှံ ဆောင်သီးနှံအဖြစ်လည်း တစ်နှစ်ကို ၂ကြိမ် သို့ မဟုတ် ၃ကြိမ်စိုက် ပျိုးကြောင်း စိုက်ပျိုးသူ ဒေါ်ကြင်မြထံမှ သိရသည်။

DOCA (ဧရာဝတီ)

ဧရာဝတီတိုင်းဒေသကြီး၊ မအူပင်ခရိုင်၊ မအူပင်မြို့နယ်၌ ဟင်းသီးဟင်းရွက် သီးနှံစုံကို စိုက်ပျိုးနေပြီး စိုက်ဧက ၁၆၀၂ ဧကစိုက်ပျိုးပြီး ငရုတ်သီးစိမ်း စိုက်ဧကအနေဖြင့်  ၁၀ ဧက၊ စိုက်ပျိုးလျက်ရှိသည်။  မအူပင် မြို့နယ် အတွင်းရှိ ဒေသခံတောင်သူများသည် ငရုတ်စိမ်း သီးနှံ တစ်မျိုးတည်းကိုသာ ကို စီးပွားဖြစ် နှစ်စဉ် စိုက်ပျိုးကြကြောင်း သိရသည်။

            မအူပင်မြို့နယ် ထနီးကျေးရွာတွင် ငရုတ်စိမ်း ၁ဧကစိုက်ခင်းတွင် ငရုတ်မျိုး ကျားခေါင်း 0.4 မျိုးကို စိုက်ပြီး ဈေးနှုန်း ၁ထုတ် ၁၆၅၀၀ကျပ်ဖြင့် ၁ဧကတွင် မျိုးထုတ် ၁၀ထုတ်စိုက်ပျိုးသည်။ ငရုတ်မျိုးကို ၁လ ပျိုးထောင်ပြီး ၉လပိုင်းက ပျိုးထောင်ပြီး ၁၀လပိုင်း မှ စတင်မြေချ စိုက်ပျိုးကြောင်း၊၂၀၂၅ခုနှစ် ဇန်နဝါရီလတွင် စတင်ခူးရပြီး ၁ဧက ပိဿာချိန်  ၅၀၀ ခန့် ထွက်ရှိနိုင်ကြောင်း၊ ယခင်နှစ်က ပိဿာ ၄၅၀ ထိ ထွက်ရှိခဲ့ကြောင်း၊ စိုက်ပျိုးမှု  မျိုး၊ သွင်းအားစု၊ လုပ်သားခ၊ ထွန်ယက်ခ၊ ရေတင်ခ၊  အပါအဝင်ကုန်ကျစရိတ် ငွေကျပ် ၅၀၀၀၀၀ ကျပ်ခန့် ကုန်ကျစရိတ်ရှိ သည်။   ငရုတ်သီးစိမ်း ဈေးနှုန်းအနေဖြင့် လက်ကားဈေး ၁ပိဿာ ၂၅၀၀ကျပ် ဈေးဖြင့်ရောင်းချနေပြီး ငွေကျပ် ၇၅၀၀၀၀ အကျိုးအမြတ်ရရှိကြောင်း စိုက်ပျိုးတောင်သူ ဦးလှမြင့် ထံမှ သိရသည်။

ဈေးကွက်တင်ပို့မှု အနေဖြင့် ရန်ကုန်မြို့သို့ အဓိက ထား ရောင်းချတင်ပို့လျှက် ရှိသည်။ မြို့နယ်အတွင်း ရောင်းချပါက ဈေးပိုရ၍ အကျိုးအမြတ်ပိုမိုရပြီး၊ ရန်ကုန်တင်ပါက ဈေးအနည်းငယ် သာရရှိကြောင်း  သိရသည်။

DOCA (ဧရာဝတီ)

ဧရာဝတီတိုင်းဒေသကြီး၊ ဟင်္သာတခရိုင်၊ ဇလွန်မြို့နယ်တွင် တောင်သူများသည် လယ် ယာစိုက်ပျိုးရေးအပြင် ကြက်သွန်နီနှင့်ငရုတ်နှင့် ပဲမျိုးစုံသီးနှံများကိုလည်းစိုက်ပျိုးကြပါသည်။ ဇလွန် မြို့နယ်အနေဖြင့် (၂၀၂၃-၂၀၂၄) ဘဏ္ဍာနှစ်တွင် ငရုတ် စိုက်ဧက (၂၁၀၃)ဧက စိုက်ပျိုးပြီး မြေနု ကျွန်းများမြစ်ရေကျချိန်၂၀၂၄ ခုနှစ် စက်တင်ဘာလဆန်းတွင်စတင်စိုက်ပျိုး၍ ၂၀၂၅ ခုနှစ် ဇန်နဝါရီ လဆန်းတွင် စတင်အသီး ဆွတ်ခူးနိုင်ပြီဖြစ်ပါသည်။

          စားသုံးသူရေးရာ ဦးစီးဌာနမှ ဦးစီးအရာရှိ ဦးဝင်းအောင်သည် (၁၆.၁.၂၀၂၅ ) နေ့တွင် ဇလွန်မြို့ နယ် ကျုံအီကျေးရွာရှိ မြေနုကျွန်းတွင် ငရုတ်တစ်ဧက စိုက်ပျိုးထားသော တောင်သူ ဦးထွန်းဝင်း၏ ငရုတ်စိုက်ခင်းသို့သွားရောက်၍ စိုက်ပျိုးထွက်ရှိမှု ဈေးနှုန်းဈေးကွက် အခြေအနေများကို ကွင်းဆင်း လေ့လာခဲ့ပါသည်။

          ကွင်းဆင်းဆွေးနွေးမှုအရ တောင်သူဦးထွန်းဝင်းအနေဖြင့် ကိုင်းမြေတစ်ဧကပေါ်တွင် အိန္ဒိယ မြှားနီမျိုးငရုတ်အပင် တစ်သောင်းကို စိုက်ပျိုးထားပြီး ယခုအခါ အသီးစတင် ခူးဆွတ လျက်ရှိပါသည်။ ငရုတ်တစ်ဧက စိုက်ပျိုးရန်အတွက် မြေပြင်၊ မျိုး၊ သွင်းအားစု၊ ရေတင် ၊ ပေါင်းလိုက် ၊ခူးဆွတ်ခြင်း အတွက် တစ်ဧက ပျမ်းမျှ ၂၅ သိန်းကျပ်ခန့် ကုန်ကျပါသည်။ ရက်ပတ်အလိုက်အသီးခူးပြီး တစ်ဧက ပျမ်းမျှ ငရုတ်အစို ပိဿာ ၅၀၀၀ခန့်ခူးဆွတ်ရပါသည်။ ငရုတ်အစို တပိဿာလျှင် ၁၇၀၀ ကျပ်၊ အခြောက်တပိသာလျှင် ၆၀၀၀ ကျပ်ဈေး ပေါက်လျက်ရှိပြီး တောင်သူများအနေဖြင့် အခြောက်လှမ်း ပါက လုပ်သားခ ပိုမိုကုန်ကျခြင်း၊ တလင်းလိုအပ်ခြင်း၊အချိန်ကြာခြင်း၊ အစိုဈေးနှုန်းမှာလည်း တောင်သူတို့ အကျိုးအမြတ်ရှိပြီး ဈေးကောင်းရသည့်အတွက် အချိန်ကုန်သက်သာပြီး ငွေရမြန်သော ငရုတ်စိုအမှည့်များကို ရောင်းချလျက်ရှိကြောင်း ဆွေးနွေးသိရှိရပါသည်။

DOCA(ဧရာဝတီ)

ဧရာဝတီတိုင်းဒသကြီး၊ မြန်အောင်ခရိုင်၊ ကြံခင်းမြို့နယ်တွင် စာဖိုဆောင်သုံး သီးနှံဖြစ်သော ခရမ်းချဉ်သီးနှံကို စီးပွားဖြစ် စိုက်ပျိုးလျက်ရှိပါသည်။ ခရမ်းချဉ်သီးနှံကို စက်တင်ဘာလတွင် စတင် စိုက်ပျိုးပြီး ဒီဇင်ဘာလ ပထမပတ်တွင် စတင်ခူးဆွတ်ကြကြောင်းသိရှိရပါသည်။ ဒေသမျိုး(ဂျပ်ပြား) နှင့် ထိုင်ဝမ်မျိုးများကိုအဓိကစိုက်ပျိုးကြပြီး၊ စိုက်ပျိုးမှု အနေဖြင့် မျိုးစေ့ကို ပျိုးထောင်ကာ  အပင် သက်တမ်း တစ်လခန့် အချိန်တွင် မြေချစိုက်ပျိုးရပါသည်။ ခရမ်းချဉ်စိုက်ခင်း တစ်ဧကလျှင် မျိုးစေ့ ထုတ် ၆-၇ ထုတ်ခန့် စိုက်ပျိုးရကြောင်း၊ အထွက်နှုန်းအနေဖြင့်စတင်ခူးဆွတ်ချိန် တစ်ဧကလျှင် ၃၀ ပိဿာမှ ၅၀ပိဿာခန့် ထွက်ရှိပြီး တစ်ပတ်ထက်တစ်ပတ် ပိုမိုထွက်ရှိသောကြောင့် တစ်ရက်ခြား တစ်ကြိမ် ခူးစွတ်ရပါသည်။ စိုက်ပျိုးမှုကုန်ကျစရိတ်အနေဖြင့် ဒေသမျိုး(ဂျပ်ပြား)တစ်ဧကလျှင် ၁၂ သိန်းခန့်၊ ထိုင်ဝမ်မျိုး တစ်ကဧလျှင်၁၅သိန်းခန့် ကုန်ကြပြီး၊ ဈေးနှုန်းအနေဖြင့် ဒေသမျိုး(ဂျပ်ပြား) ဒိုင်သွင်းဈေးအနေဖြင့် တစ်ပိဿာလျှင် ၂၂၀၀ ကျပ် မှ ၂၄၀၀ ကျပ်ခန့် နှင့်  ထိုင်ဝမ် ဒိုင်သွင်းဈေး အနေဖြင့် တစ်ပိဿာလျှင် ၁၄၀၀ ကျပ်မှ ၁၅၀၀ ကျပ်ခန့် ရရှိကြောင်း၊  အကျိုးအမြတ်အနေဖြင့် ဒေသမျိုး(ဂျပ်ပြား) တစ်ဧကလျှင် ၂၅၀၀၀၀၀/-ကျပ်ခန့်၊ ထိုင်ဝမ်မျိုး တစ်ဧကလျှင် ၂၈၀၀၀၀၀/-ကျပ်ခန့်ရရှိပြီး တွက်ခြေကိုက်လျက်ရှိကြောင်း ခရမ်းချဉ်သီးစိုက် တောင်သူတစ်ဦး၏ပြောကြားချက် အရသိရှိရပါသည်။

DOCA(ဧရာဝတီ)

ဧရာဝတီတိုင်းဒေသကြီး၊ ကြံခင်းမြို့နယ်တွင် ကွမ်းကို တစ်နိုင်တစ်ပိုင် အနေဖြင့်သော် လည်းကောင်း၊ စီးပွားဖြစ်သော်လည်းကောင်း စိုက်ပျိုးကြပြီး မိုးစိုက်နှင့်ဆောင်းစိုက် ဟူ၍ စိုက်ပျိုး ကြရာ မိုးရာသီစိုက်ပျိုးမှုမှာ ပိုးကျလွယ်ပြီး ပျက်စီးဆုံးရှုံးမှုများသဖြင့် ဆောင်းရာသီစိုက်ပျိုးမှုကိုသာ ပိုမိုစိုက်ပျိုးကြကြောင်း၊ ကြံခင်းမြို့နယ်အနေဖြင့် ကွမ်းစိုက်ဧက ၁၆၀ ဧက ရှိကြောင်း မြေစာရင်း ဦးစီးဌာနမှသိရသည်။

          ကွမ်းကိုစိုက်ပျိုးရန်အတွက် ကွမ်းမျိုးဖြစ်သည့် ဗမာကွမ်း(ရိုးစိမ်း)နှင့် ကွမ်းနုဝါ(ရိုးဝါ)တို့ကို ကွမ်းညွန့်တစ်ညွန့်လျှင် လက်ကားဈေး ငွေကျပ် ၃၅၀-၄၀၀ ကျပ်ခန့်ဖြင့် မြို့နယ်တွင်း ကွမ်းညွှန့်မျိုး သီးသန့် ရောင်းသည့် ခြံများမှ ဝယ်ယူကာ တစ်ဧက၏ လေးပုံတစ်ပုံခန့် ၀.၂၅ ဧက အကျယ်ရှိ ကွမ်းခြံ၌ ကွမ်းအညွန့် ၃၀၀၀-၃၅၀၀ ခန့် စိုက်ပျိုးကြပါသည်။ မျိုးအနေဖြင့် ကွမ်းနုဝါမျိုးကို အများဆုံး စိုက်ပျိုးကြပြီး၊ ကွမ်းကို စိုက်ပျိုးပြီး ၅-၆ လခန့်အကြာတွင် စတင်ခူးဆွတ်နိုင်ပါသည်။  နေရာဒေသ၊ မြေအနေအထားနှင့် ကွမ်း မျိုးကောင်း မျိုးသန့်အပေါ်မူတည်၍  ၃ နှစ်မှ ၄ နှစ်အထိ ခူးဆွတ် ရရှိနိုင်ကြောင်း၊  စိုက်ပျိုးမှုကုန်ကျစရိတ်အနေဖြင့် မျိုး၊ သွင်းအားစု၊ လုပ်သားခအပါအဝင် တစ်ဧက၏ လေးပုံတစ်ပုံခန့် ၀.၂၅ ဧကလျှင် ငွေကျပ် ၂၅ သိန်းခန့် ကုန်ကျကြောင်းသိရှိရပါသည်။ အထွက်နှုန်း အနေဖြင့် ကွမ်းရွက်ကို ၁၀ ရက်ခြား တစ်ကြိမ် ခူးဆွတ်ရပြီး တစ်ကြိမ် ခူးဆွတ်လျှင် ၂၅ - ၅၀ ပိဿာခန့် ထွက်ရှိ၍ တစ်လလျှင် ပိဿာချိန် ၁၀၀ - ၁၅၀ ခန့် ထွက်ရှိရာ ကွမ်းပင်များ ဖြစ်ထွန်း အောင်မြင်မှုအပေါ် မူတည်၍ အထွက်နှုန်းကွာခြားမှုရှိကြောင်း၊ ဈေးနှုန်း ဈေးကွက်အနေဖြင့် ဇန်နဝါရီလ ဒုတိယပတ်တွင် လက်ကားဈေး ကွမ်းရွက် ရိုးစိမ်းတစ်ပိဿာလျှင် ငွေကျပ် ၄၀၀၀-၅၀၀၀ နှုန်း ၊ကွမ်းနုဝါ တစ်ပိဿာလျှင် ငွေကျပ် ၅၀၀၀-၆၀၀၀နှုန်းဖြင့် ကြံခင်းမြို့ပေါ်ရှိ လက်လီ/လက်ကား အရောင်းဆိုင်များသို့ တင်ပို့ရောင်းချရပါသည်။ ဟင်္သာတမြို့၊ ဥသျှစ်ပင်မြို့၊ နေပြည်တော်မြို့တို့ရှိ ကွမ်းဒိုင် များသို့လည်း တင်ပို့ကြောင်း၊ အအေးဓာတ်ဝင်လျှင် ကွမ်းအထွက်နှုန်း နည်းသွားသည့် အတွက် ဆောင်းတွင်းကာလများတွင် ဈေးနှုန်းအနည်းငယ်မြင့်တက်လာနိုင်မည် ဖြစ်ကြောင်း ကွမ်း စိုက်တောင်သူများထံမှသိရှိရပါသည်။

DOCA(ဧရာဝတီ)