ပြည်တွင်းကုန်သွယ်မှုသတင်း

    ရန်ကုန်တိုင်းဒေသကြီး၊ မန္တလေးတိုင်းဒေသကြီး၊ စစ်ကိုင်းတိုင်းဒေသကြီး၊ မကွေးတိုင်းဒေသကြီးတို့ရှိ ပြည်နယ်နှင့်တိုင်းဒေသကြီးအသီသီးရှိ MSMEs စီးပွားရေး လုပ်ငန်းရှင်များ အဆင်ပြေလွယ်ကူချောမွေ့စွာ လုပ်ငန်းလုပ်ကိုင်နိုင်စေရန်အတွက် စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနနှင့် မြန်မာနိုင်ငံဆီကုန်သည်နှင့် ဆီလုပ်ငန်းရှင်များအသင်းတို့ပူးပေါင်းပြီး စားသောက်ဆိုင်၊ လက်ဖက်ရည်ဆိုင်၊ ဟိုတယ်၊ စားသောက်ကုန်ထုတ်လုပ်ရောင်းချသူများ၊ စားသောက်ကုန် ထုတ်လုပ်သည့် အသေးစား၊ အလတ်စား စားသောက်ကုန်လုပ်ငန်းများအတွက် စက်မှုကုန်ကြမ်းသုံး စားအုန်းဆီများကို ၁ ပိဿာလျှင် ၆၀၅၀/ ၆၀၇၅ / ၆၁၂၀ ကျပ်၊ ဈေးနှုန်းများဖြင့် ကြည်မြင့်တိုင်မြို့နယ်ရှိ HTOO စားအုန်းဆီကန်အပါအဝင် အခြားဆီကန်များမှ စီးပွားရေးလုပ်ငန်းရှင်များသို့ ၂၀၂၃ ခုနှစ်၊ ဒီဇင်ဘာလ တတိယပတ်အတွင်း နေ့စဉ်ထုတ်ပေးလျက်ရှိကြောင်း သိရှိရပါသည်။

DOCA(ရန်ကုန်)  

     ၂၆.၁၂.၂၀၂၃ ရက်နေ့တွင်  တိုင်းဒေသကြီး/ပြည်နယ်များရှိ ကုန်စည်ဒိုင်များတွင် ဖြစ်ပေါ်နေသော မတ်ပဲ၊ ပဲတီစိမ်း နှင့် ပဲစဉ်းငုံ တစ်တန် ဈေးနှုန်းများအား ယခင်နှစ်၊ ယခင်လ၊ ယခင်အပတ်၊ ယခင်နေ့၊ ကာလတူ ဈေးနှုန်းစာရင်းအား နှိုင်းယှဉ်ချက်အား အောက်ပါ .pdf တွင် ဝင်ရောက်ကြည့်ရှုနိုင်ပါသည်။

    ၂၆.၁၂.၂၀၂၃ ရက်နေ့တွင် တိုင်းဒေသကြီးနှင့်ပြည်နယ် မြို့နယ်အလိုက် ဆန်၊ ဆီ၊ မီးဖိုချောင်သုံးပစ္စည်းများ၊ သားငါး၊ စက်သုံးဆီ၊ ရွှေ၊ ဒေါ်လာ ဈေးနှုန်းများအား အောက်ပါ .pdf တွင် ဝင်ရောက်ကြည့်ရှုနိုင်ပါသည်-

    ပဲခူးတိုင်းဒေသကြီး၊ ရွှေတောင် မြို့နယ်တာဝန်ခံနှင့်ဝန်ထမ်းများသည် (၁၉-၁၂-၂၀၂၃) ရက်နေ့၊ နံနက် (၁၀:၃၀)နာရီအချိန်တွင် ရွှေတောင်မြို့နယ်၊ ဇယ်မအုပ်စု၊ ဘို့လည်ကုန်းရွာရှိ တောင်သူဦးအေးဝင်း၏ ပန်းဂေါ်ဖီစိုက်ခင်းသို့သွားရောက်၍ကွင်းဆင်းမေးမြန်းခဲ့ပါသည်။ ပန်းဂေါ်ဖီကို အစိုဓာတ်ရှိသော မေလတွင်စိုက်ပျိုးကြပြီး ပန်းဂေါ်ဖီစိုက်ပျိုးရန် ပျိုးပေါင်ကို မြေစိုင်ခဲလေးများရလာအောင်ပြုပြင်ပေးမှသာ လေဝင်လေထွက်ကောင်း၍ အညှောင့်ပေါက်အားကောင်းလာမည်ဖြစ်ပါသည်။ ပန်းဂေါ်ဖီပင်စိုက်ပျိုးရာတွင် ပျိုးပေါင်ကို (၂)လက်မခြားမြောင်းများတူးပြီးမှ မျိုးစေ့ကို ညီညာအောင်ချရပါသည်။ ထို့နောက် မျိုးစေ့ပေါ်တွင် မြေဆွေးမှုန့်ပါးပါးအုပ်ပြီး ၎င်းအပေါ်မှ သန့်စင်ပြီးသောကောက်ရိုးခြောက်များကို ပါးလွှာအောင်ဖုံးအုပ်၍ ရေရွဲရွဲလောင်းပေးရပါသည်။ မျိုးစေ့ချပြီး (၃/၄)ရက်အကြာတွင် အညှောင့်ပေါက်ပါသည်။ ပျိုးသက် (၄၅)ရက်ပြည့်မှ စိုက်ခင်းသို့ပြောင်းရွှေ့၍ စိုက်ပျိုးရပါသည်။ စိုက်ခင်းသို့ပြောင်း၍ စိုက်ပျိုးရာတွင် ညနေ(၃)နာရီနောက်ပိုင်းတွင် ပြောင်းရွေ့စိုက်ပျိုးသင့်ပြီး မြေဩဇာကို စုစုပေါင်း (၃)ကြိမ်ကျွေးရပါသည်။ ရေကို တစ်ပတ်(သို့) နှစ်ပတ်တစ်ကြိမ် ရေသွင်းပေးရပါသည်။ အပွင့်၏အချင်းမှာ (၂/၃)လက်မအရွယ်ရောက်လျှင် အပြင်အရွက်များကို စည်းပေးရပါသည်။ (၂)လခွဲကြာလျှင် ပန်းပွင့်ကိုခုတ်ယူ၍ ရောင်းချရပါသည်။ ပန်းဂေါ်ဖီကို တစ်နေ့လျှင် အပွင့်၁၀၀အနည်းဆုံးခုတ်ယူရကြောင်းသိရပါသည်။ ဈေးနှုန်းအနေဖြင့် စိုက်ခင်းတွင် အခင်းပြတ် အပွင့်အကြီးအသေးသောင်းပြောင်းတစ်ပွင့်လျှင် ၈၀၀ကျပ်ဖြင့် လာရောက်ဝယ်ယူကြပါသည်။ ဈေးများတွင် လက်လီဈေးမှာ အပွင့်အကြီးတစ်ပွင့်လျှင် ၁၀၀၀ကျပ်၊ အသေးတစ်ပွင့်လျှင် ၇၀၀ကျပ်ဖြင့်ရောင်းချကြပါသည်။ ဈေးကောင်းများရရှိသောကြောင့် အကျိုးအမြတ်များများရရှိကြောင်းလည်းသိရပါသည်။

DOCA(ပဲခူး)

    ပြည်မြို့ပေါ်မြို့မဈေးကြီးနှင့် ရပ်ကွက်ဈေးများသို့ ပြည်ခရိုင်အတွင်း ပုတီးကုန်း၊ သဲကုန်း၊ အင်းမနယ်ဘက်များမှ ဝင်ရောက်မှုရှိပြီး ဒေသထွက်ပန်းဂေါ်ဖီကို ဗမာပန်းပွင့်၊ ခြံပန်းပွင့် စသည်ဖြင့် ခေါ်ဝေါ်ရောင်းချကြောင်းသိရပါသည်။ ခြင်းများဖြင့်ဝင်ရောက်မှုရှိပြီး တစ်ခြင်းလျှင် အပွင့်(၂၀-၂၅)ခန့်ကို အပွင့်အချော၊ အညှက်ပေါ်မူတည်ကာ ပါဝင်သည့်အတွက် တစ်ပတ်လျှင် ရက်ခြား (၄)ခြင်း (၅)ခြင်းခန့်ဝင်ရောက်မှုရှိကြောင်းသိရပါသည်။ ဒေသထွက်ဗမာပန်းဂေါ်ဖီမှာ ရှမ်းပြည်မှလာသော ပန်းဂေါ်ဖီနှင့်မတူဘဲ အရိုးတံရှည်ကာ ပိုမိုနူးညံ့မှုရှိကြောင်းသိရပါသည်။ ပန်းဂေါ်ဖီမှာ အမျှင်ဓာတ်ကြွယ်ဝသဖြင့် အစာအိမ်အူလမ်းကြောင်းရောင်ရမ်းမှုကိုကျဆင်းစေခြင်း ဗီတာမင်စီဓာတ်လည်းကြွယ်ဝသဖြင့် ကိုယ်ခံအားကိုတိုးတက်စေခြင်း၊ ကယ်လိုရီပါဝင်မှုလည်းနည်းသဖြင့် ကိုယ်အလေးချိန်လျှော့ချမှုကို အထောက်အကူပြုခြင်း စသည့်အကျိုးကျေးဇူးများကိုရရှိမည်ဖြစ်ပါသည်။ ဈေးနှုန်းအနေဖြင့် ဒေသထွက်ဗမာပန်းပွင့်မှာ တစ်ပွင့်လျှင် ကျပ်(၁၀၀၀-၁၂၀၀) နှုန်းရှိပြီး ရှမ်းပွင့်မှာ ကျပ် (၁၈၀၀-၂၀၀၀)ခန့်ရှိကာ ရှမ်းပန်းဂေါ်ဖီမှာ (၅)ရက်ခြားတစ်ခါသာ ပြည်ဈေးကွက်သို့အဝင်ရှိ၍ တစ်ခါဝင်လျှင် အပွင့် (၁၅၀/၂၀၀) ခန့်အဝင်ရှိကြောင်းလည်းသိရပါသည်။

DOCA(ပဲခူး)