ပြည်ပကုန်သွယ်မှုသတင်းများ

     ဗီယက်နမ်နိုင်ငံသည် ကမ္မာ့ရှစ်ခုမြောက် အကြီးမားဆုံးလက်ဖက်ခြောက်တင်ပို့သူဖြစ်ပြီး ယခုနှစ်၏ ပထမ ၇ လတွင် လက်ဖက်ခြောက်တင်ပို့မှုမှတစ်ဆင့် အမေရိကန်‌ဒေါ်လာ ၁၃၅ သန်း ရရှိခဲ့ကာ လွန်ခဲ့သည့်နှစ် တူညီသည့်ကာလထက် ၃၄.၈ % မြင့်တက်လာခဲ့ကြောင်း သိရပါသည်။ ဗီယက်နမ်၏ လက်ဖက်ခြောက်တင်ပို့သည့် ပျမ်းမျှဈေးနှုန်းသည် တစ်တန်ကို ၁၂၇၂.၇ အမေရိကန် ဒေါ်လာရှိခဲ့ပြီး ၁.၆ % မြင့်တက်ခဲ့ကြောင်း သိရပါသည်။ ဇူလိုင်လ(၁)လတည်းတွင် လက်ဖက်ခြောက် တင်ပို့မှုတန်ချိန် ၁၆၀၀၀ ရှိခဲ့ပြီး အမေရိကန်ဒေါ်လာ ၂၉ သန်း ဝင်ငွေရရှိခဲ့ကာ ၁၄.၅% နှင့် ၆.၈% အသီးသီးမြင့်တက်ခဲ့သည်ဟု စက်မှုနှင့်ကုန်သွယ်ရေးဝန်ကြီးဌာန၏ ပြည်ပကုန်သွယ်ရေး အေဂျင်စီ၏ အချက်အလက်များအရ သိရပါသည်။ ဗီယက်နမ်တင်ပို့သည့် လက်ဖက်ခြောက်ထုတ်ကုန်များတွင် Green tea ၊ Black tea နှင့် Oolong tea တို့ ပါဝင်ကြောင်း သိရပါသည်။ ဗီယက်နမ်သည် ကမ္ဘာ့အကြီးမားဆုံးလက်ဖက်ခြောက်တင်ပို့သူများထဲတွင် ပါဝင်နေသော်လည်း အဓိကတင်သွင်းသည့် ဈေးကွက်များသို့ ဗီယက်နမ်လက်ဖက်ခြောက်တင်ပို့မှု ပမာဏမှာ သင့်ရုံမျှ ပမာဏသာရှိကြောင်း သိရပါသည်။ သို့သော် ဗီယက်နမ်၏ တင်ပို့မှုပမာဏမြင့်တက်လာရန် သိသာထင်ရှားသည့် အခွင့်အလမ်းများရှိကြောင်း သိရပါသည်။ အထူးသဖြင့် ယခုနှစ်၏ ပထမ (၄)လတွင် ကမ္ဘာ့အကြီးဆုံးလက်ဖက်ခြောက်တင်သွင်းသည့် ဥရောပသမဂ္ဂ၏ တင်သွင်းမှုတန်ဖိုးမှာ အမေရိကန် ဒေါ်လာ ၄၀၁ သန်းရှိပြီး  ထိုပမာဏထဲမှ ၀.၁၉ %ကို သာ ဗီယက်နမ်ထံမှ တင်သွင်းကြောင်း သိရပါသည်။ သို့သော် ဥရောပသမဂ္ဂသည် လက်ဖက်ခြောက်အရည်အသွေးအတွက် မြင့်မားသည့် လိုအပ်ချက်များကို မြှင့်တင်ခဲ့သောကြောင့် တင်ပို့သူများမှာ စည်းမျဉ်းသစ်များအပေါ် ၎င်းတို့ကိုယ်တိုင် ပြုပြင်မွမ်းမံကြရတော့မည် ဖြစ်ပါသည်။ ပါကစ္စတန်သည် ကမ္ဘာ့ဒုတိယအကြီးမားဆုံး လက်ဖက်ခြောက်တင်သွင်းသူဖြစ်သော်လည်း အဆိုပါဈေးကွက်သို့ ဗီယက်နမ် လက်ဖက်ခြောက်တင်ပို့မှုမှာ ဈေးကွက်သတင်းအချက်အလက် ရရှိမှုကင်းမဲ့ခြင်းကြောင့် သင့်ရုံမျှသာရှိကြောင်း သိရပါသည်။ အမေရိကန်နှင့် ဗြိတိန်ကဲ့သို့သော အခြားအဓိကတင်သွင်းသူများ၏ ဝယ်လိုအားမှာ မြင့်တက်လျက်ရှိသောကြောင့် ဗီယက်နမ်အတွက် ဈေးကွက်တိုးချဲ့ရန် သိသာသည့် အခွင့်အလမ်းများရှိနေကြောင်း သိရပါသည်။ သုတေသနနှင့် ဈေးကွက်လေ့လာမှု အချက်အလက်များအရ ကမ္ဘာ့လက်ဖက်ခြောက်ဈေးကွက်သည် ၂၀၁၆ ခုနှစ်တွင် အမေရိကန် ဒေါ်လာ ၂၄.၃ ဘီလီယံရှိရာမှ ၂၀၂၅ ခုနှစ်တွင် အမေရိကန်ဒေါ်လာ ၃၇.၅ ဘီလီယံရောက်ရှိရန် မျှော်လင့်ရကြောင်း သိရပါသည်။

Source: Vietnam Plus

DOCA(ရန်ကုန်)

     အဓိကဈေးကွက်များထံမှ ဝယ်လိုအားနှင့် ဘတ်ငွေတန်ဖိုးအားပျော့မှုတို့ ကျေးဇူးကြောင့် ထိုင်းနိုင်ငံသည် ယခုနှစ်တွင် မူလခန့်မှန်းထားသည့် ဆန်တန် ၇.၅ သန်းကို ကျော်လွန်၍ ဆန် တန်ချိန် ၈.၂ သန်းကို ပြည်ပသို့တင်ပို့နိုင်မည်ဟု မျှော်လင့်ရကြောင်း ထိုင်းနိုင်ငံ စီးပွားကူးသန်းဝန်ကြီးဌာနအဆိုအရ သိရပါသည်။ ထိုင်းနိုင်ငံ ပြည်ပကုန်သွယ်ရေးဦးစီးဌာန၏ ညွှန်ကြားရေးမှူးချုပ် Ronnarong Phoolpipet က ယခုနှစ်၏ ပထမနှစ်ဝက်တွင် ဆန်တန်ချိန် ၅.၀၈ သန်း တင်ပို့ခဲ့ရာမှ ဘတ် ၁၁၇.၈ ဘီလီယံရရှိခဲ့ပြီး လွန်ခဲ့သည့်နှစ် တူညီသည့်ကာလကထက် ၂၅.၁% အသီးသီးမြင့်တက်ခဲ့ကြောင်း ပြောကြားခဲ့ပါသည်. ဆန်တင်သွင်းသူများသည် စားသုံးရန် နှင့် စားနပ်ရိက္ခာဖူလုံစေရေးအတွက် သိုလှောင်ထားရန်အတွက် တင်သွင်းရန် အလိုရှိကြကြောင်း ၎င်းက ဆက်လက်ပြောကြားခဲ့ပါသည်။ အိန္ဒိယ၏ ဆန်တင်ပို့မှု ကန့်သတ်ခြင်း နှင့် တစ်ဒေါ်လာ ကို ၃၆-၃၇ ဘတ်အထိ တန်ဖိုးကျဆင်းမှုကလည်း ထိုင်းဆန်ဈေးနှုန်း၏ ယှဉ်ပြိုင်နိုင်စွမ်းကို ဆက်လက်ထိန်းသိမ်းရန် ကူညီစေခဲ့ကြောင်း သိရပါသည်။ ဌာနအနေနှင့်လည်း ထိုင်းနိုင်ငံဆန်တင်ပို့သူများ အသင်းနှင့် ဒုတိယနှစ်ဝက်အတွက် ဆန်တင်ပို့မှုအခြေအနေနှင့် ပတ်သက်၍ ဆွေးနွေးရန် ဇူလိုင်လ ၂၅ ရက်နေ့က အစည်းအဝေးပြုလုပ်ခဲ့ကြောင်း သိရပါသည်။ ဖိလစ်ပိုင်နှင့် အင်ဒိုနီးရှားတို့ အပါအဝင် ထိုင်းနိုင်ငံ၏ အဓိကတင်ပို့သည့် ဈေးကွက်များမှာ ငွေကြေးဖောင်းပွမှုနှင့် မိုးခေါင်ခြင်းတို့ကြောင့် ဆန်ဝယ်လိုအား ဆက်လက်မြင့်တက်ရန်ရှိကြောင်း သိရပါသည်။ ဖိလစ်ပိုင်နိုင်ငံသည် ဩဂုတ်လ အစောပိုင်းကာလမှ စတင် သက်ရောက်ပြီး ၂၀၂၈ ခုနှစ်အထိ ကြာမြင့်မည့် ဆန်တင်သွင်းသည့် အကောက်ခွန်ကို ၃၅% မှ ၁၅% ထိ လျှော့ချမည်ဟု တရားဝင်ကြေညာထားကြောင်း သိရပါသည်။ Mr. Ronnarong က ယခုနှစ်တွင် ဖိလစ်ပိုင်နှင့် အင်ဒိုနီးရှားတို့သည် ၎င်းတို့၏ ဆန်တင်သွင်းမှုကို တန်ချိန် ၄.၇ သန်းနှင့် တန်ချိန် ၃.၆ - ၄.၃ သန်း အသီးသီးမြင့်တက်မည်ဟု မျှော်လင့်ရကြောင်းနှင့် ထိုင်းအပါအဝင် ဆန်တင်ပို့သည့် နိုင်ငံများအတွက် အခွင့်အလမ်းတစ်ခုဖြစ်ကြောင်း  ပြောကြား ခဲ့ပါသည်။ သို့သော် ယခုနှစ် ဒုတိယနှစ်ဝက်အတွက် ထိုင်းနိုင်ငံဆန်တင်ပို့ရာတွင် များစွာသော စွန့်စားရနိုင်သည့်အချက်များ ရှိနေကြောင်း သိရပါသည်။ အထူးသဖြင့် အိန္ဒိယနိုင်ငံက ဆန်တင်ပို့ရာတွင် ကန့်သတ်ထားမှုအား ပြန်လည် ဆန်းစစ်နိုင်ချေရှိခြင်း၊ ဗီယက်နမ်၊ ပါကစ္စတန်၊ မြန်မာနှင့် ကမ္ဘောဒီယားတို့တွင် ဆန်ထုတ်လုပ်မှုမြင့်တက်လာသည့်အတွက် ကမ္ဘာလုံးဆိုင်ရာ ထောက်ပံ့နိုင်စွမ်းမြင့်တက်လာပြီး ဈေးနှုန်းယှဉ်ပြိုင်ရမှု မြင့်တက်လာနိုင်ခြင်းနှင့် ပထဝီနိုင်ငံရေး တင်းမာမှုများ ဖြစ်ပေါ်နေခြင်းနှင့် သင်္ဘောတင်ပို့နှုန်းများ မြင့်တက်လာခြင်း အစရှိသည့်အချက်များ ပါဝင်ကြောင်း သိရပါသည်။ ထိုင်းနိုင်ငံဆန်တင်ပို့မှုအခြေအနေသည် ကောင်းမွန်နေလျက်ရှိနေသေးပြီး တင်ပို့သူများသည် ပမာဏများပြားသည့် ဆန်များကို အင်ဒိုနီးရှား၊ ဖိလစ်ပိုင်နှင့်  မလေးရှားတို့ပါဝင်သော အာဆီယံနိုင်ငံများနှင့် အရှေ့အလယ်ပိုင်းစသည့် ဒေသ များသို့ ဖြန့်ဖြူးလျက်ရှိကြောင်း သိရပါသည်။ Mr. Ronnarong က ဌာနအနေဖြင့် ဆန်တင်ပို့မှု အရှိန်မြှင့်တင်ရန်အတွက် သက်ဆိုင်ရာအစိုးရ ထိုင်းနိုင်ငံဆန်တင်ပို့သူများအသင်း ပါဝင်သော ပုဂ္ဂလိကကဏ္ဍများနှင့် နီးကပ်စွာ အလုပ်လုပ်သွားရန် အဆင်သင့်ဖြစ်နေကြောင်း ပြေားကြား ခဲ့ပါသည်။ ဌာနအနေဖြင့်လည်း တောင်အာဖရိက၊ ဟောင်ကောင်၊ ဂျပန်၊ စင်္ကာပူ၊ မလေးရှား၊ ဖိလစ်ပိုင်အစရှိသည့် အဓိကဈေးကွက်များတွင် ဆန်ဈေးကွက်ထပ်မံတိုးချဲ့၍ ရင်းနှီးကျွမ်းဝင်မှု အားကောင်းရန်အတွက် အစီအစဉ်များရှိနေပြီး ကမ္ဘာလုံးဆိုင်ရာဈေးကွက်သို့ ထိုင်းဆန်ကြေညာမြင့်တင်ရန် များစွာသော ကုန်စည်ပြပွဲများတွင် ပါဝင်သွားမည်ဖြစ်ကြောင်း သိရပါသည်။

Source: Bangkok Post

DOCA(ရန်ကုန်)

     တရုတ်နိုင်ငံ အီလက်ထရောနစ်နှင့် အိမ်သုံးပစ္စည်းကုမ္မဏီဖြစ်သည့် Haier သည် ဘတ် ၁၀ ဘီလီယံရင်းနှီးမြှပ်နှံမည့် ၎င်းတို့၏ ပထမဆုံး ari- con ထုတ်လုပ်မည့် စက်ရုံကို ထိုင်းနိုင်ငံတွင် တည်ဆောက်သွားမည်ဖြစ်ပြီး လျှင်မြန်စွာ ကြီးထွားလာသည့် ဘတ်  ၁၀ ဘီလီယံတန်ဖိုးရှိသော ထိုင်းနိုင်ငံ  air- con ဈေးကွက်သို့ ဝင်ရောက်လာမည်ဟု သိရပါသည်။ Haier ၏ အရှေ့တောင် အာရှတွင် ပထမဆုံး စက်ရုံကို ချောင်ဘူရီပြည်နယ်၏ WHA အရှေ့ပင်လယ်ကမ်းခြေ စက်မှုဇုန်တွင် တည်ဆောက်မည်ဟု သိရပါသည်။ Haier အုပ်စု၏ ဘုတ်အဖွဲ့ဥက္ကဌဖြစ်သူ Zhou Yunjie ကထိုင်းနိုင်ငံတွင် စက်ရုံတည်ဆောက်ရခြင်းသည် အိမ်နီးချင်းနိုင်ငံများသို့ ကောင်းမွန်သော ချိတ်ဆက်ပေးနိုင်မည့် ထိုင်းနိုင်ငံ၏ ဗျူဟာမြောက် ပထဝီမြေနေရာအားသာချက်ကြောင့် ဖြစ်ကြောင်း ပြောကြားခဲ့ပါသည်။ ဆောက်လုပ်ရေး လုပ်ငန်းများကို အဆင့် ၃ ဆင့်ဖြင့် ဆောင်ရွက် သွားမည်ဖြစ်ပြီး ၂၀၂၇ ခုနှစ်တွင် ပြီးဆုံးရန်မျှော်လင့်ရကြောင်း သိရပါသည်။  နှစ်စဥ် Air-con အလုံးရေ ၃ သန်းထုတ်လုပ်နိုင်ရန် ရည်မှန်းထားသည့် ပထမအဆင့်ကို ၂၀၂၅ ခုနှစ် စက်တင်ဘာလတွင် စမည်ဖြစ်ပြီး ဒုတိယအဆင့်နှင့် တတိယအဆင့်တို့မှာ ၂၀၂၆ ခုနှစ်နှင့် ၂၀၂၇ ခုနှစ် တို့တွင် အသီးသီးပြီးပြတ်မည်ဟု သိရပါသည်။ အပြည့်အဝအသုံးပြုနိုင်ပြီဆိုပါက ထိုစက်ရုံ သည် အရှေ့တောင်အာရှတွင် အကြီးမားဆုံး air- con ထုတ်လုပ်သည့် စက်ရုံဖြစ်လာမည်ဖြစ်ပြီး Haier ၏ ပြည်ပအကြီးမားဆုံး air- con ထုတ်လုပ်ရာ စက်ရုံဖြစ်လာမည်ဟု သိရပါသည်။ Haier အနေဖြင့် စက်မှုလုပ်ငန်းကဏ္ဍနှင့် ပြည်တွင်းအဖွဲ့အစည်းများအကြား ပူးပေါင်းဆောင်ရွက်၍ အားကောင်းပြီး စွမ်းဆောင်နိုင်သော လုပ်သားထုကို ဖန်တီးသွားမည်ဟု Mr- Zhou က ပြောကြား ခဲ့ကြောင်း သိရပါသည်။ လာမည့်(၂)နှစ်အတွင်း စက်ရုံအပြည့်အဝ လည်ပတ်နိင်ပြီဆိုပါက စီးပွားရေးတန်ဖိုး ဖန်တီးပေးခြင်း၊ ဒေသခံများကြား ဝင်ငွေရရှိစေခြင်း၊ ချောင်ဘူရီတွင် အလုပ်အကိုင် ၃၀၀၀ စီစဉ်ပေးနိုင်ခြင်းတို့အပြင် ထိုင်းနိုင်ငံ၏ စီးပွားရေး ဖွံ့ဖြိုးတိုးတက်မှုကို ပံ့ပိုးပေးနိုင်ရန် မျှော်မှန်းရကြောင်း ကုမ္ပဏီက ပြောကြားခဲ့သည်ဟု သိရပါသည်။

Source: Bangkok Post

DOCA(ရန်ကုန်)

       လက်ရှိအရှိန်အဟုန်နှင့် လတ်တလောအချိန်များအတွင်း တည်ငြိမ်သော နှစ်ဆခန့် ကြီးထွားလာမှုကြောင့် ၂၀၂၄ ခုနှစ်တွင် ဗီယက်နမ်နိုင်ငံ၏ သစ်သီးနှင့်ဟင်းသီးဟင်းရွက်တင်ပို့မှုမှာ စံချိန်တင်အမေရိကန်ဒေါ်လာ ၇ ဘီလီယံထိ ရရှိနိုင်ကြောင်း သိရပါသည်။ ၂၀၂၄ ခုနှစ်၏ ပထမ ၇ လတွင်  ဗီယက်နမ်နိုင်ငံသည် သစ်သီးနှင့်ဟင်းသီးဟင်းရွက်တင်ပို့မှုမှတစ်ဆင့်  အမေရိကန်ဒေါ်လာ ၃.၈ ဘီလီယံရရှိခဲ့ပြီး လွန်ခဲ့သည့်နှစ် တူညီသည့်ကာလထက် ၂၄ ရာခိုင်နှုန်း မြင့်တက်ခဲ့ကြောင်း သိရပါသည်။ ထို့ပြင် အဆိုပါကဏ္ဍသည် တင်ပို့သည့်ထိပ်ဆုံးဈေးကွက် ၁၀ ခုတွင် နယ်သာလန်မှလွဲ၍ ကိန်းဂဏန်း ၂ ဆထိ ကြီးထွားမှုပြခဲ့ကြောင်း သိရပါသည်။  ဗီယက်နမ်နိုင်ငံ သစ်သီးနှင့်ဟင်းသီးဟင်းရွက်အသင်း၏ အဆိုအရ တောင်ကိုရီးယားနှင့်ဂျပန်သို့ ဗီယက်နမ်သစ်သီးနှင့် ဟင်းသီးဟင်းရွက် တင်ပို့သည့်တန်ဖိုးမှာ အမြင့်ပိုင်းတွင်ရှိနေကြောင်း သိရပါသည်။ တရုတ်ဈေးကွက်တွင်လည်း အမှတ်တံဆိပ်နှင့်နေရာတစ်ခုကို တည်ဆောက်နေပြီး သစ်သီးနှင့် ဟင်းသီးဟင်းရွက်ကဏ္ဍသည် အာရှအရှေ့မြောက်ဒေသတွင် ပိုမိုတိုးချဲ့လျက်ရှိကြောင်း သိရပါသည်။ တရုတ်နိုင်ငံသည် အာရှအရှေ့မြောက်ဒေသတွင် ဗီယက်နမ်သစ်သီးနှင့် ဟင်းသီးဟင်းရွက်အား  အကြီးမားဆုံးတင်သွင်းသူဖြစ်ပြီး စုစုပေါင်းတင်ပို့မှု၏ ၆၄ ရာခိုင်နှုန်းရှိကာ လွန်ခဲ့သည့်နှစ် တူညီသည့်ကာလထက် ၂၂ ရာခိုင်နှုန်းမြင့်တက်ခဲ့ကြောင်း သိရပါသည်။ တောင်ကိုရီးယားနိုင်ငံ၏ တင်သွင်းမှုမှာ လွန်ခဲ့သည့်နှစ်တူညီသည့်ကာလထက် ၅၅ ရာခိုင်နှုန်း မြင့်တက်ခဲ့ကြောင်း သိရပါသည်။ ဒေသတွင်းကျယ်ပြန့်သော စီးပွားရေးအဖွဲ့အစည်း၏ သဘောတူညီချက်နှင့်အတူ ဗီယက်နမ်နိုင်ငံသည် တရုတ်နိုင်ငံသို့ သစ်သီးထုတ်ကုန် ၁၂ မျိုး တရားဝင်တင်ပို့ခွင့်ရထားကြောင်း သိရပါသည်။ ထို့ပြင် တရုတ်နိုင်ငံသည် ဗီယက်နမ် သလဲသီးများနှင့် အုန်းသီးများကို ယာယီနှင့် ရှေ့ပြေးအနေဖြင့် တင်သွင်းရန်ခွင့်ပြုထားကြောင်း သိရပါသည်။

Source: Vietnam Plus

DOCA(ရန်ကုန်)

      Oppo သည် ၂၀၂၄ ခုနှစ် ဒုတိယသုံးလပတ်တွင် ဗီယက်နမ်စမတ်ဖုန်းဈေးကွက်၌ ပထမဆုံးအကြိမ်အဖြစ် Samsung ကို ကျော်တက်သွားခဲ့သည်။ တရုတ်စမတ်ဖုန်းအမှတ်တံဆိပ် Oppo ၏ ရောင်းအားသည် တစ်နှစ်ထက်တစ်နှစ် ၁၁၀ ရာခိုင်နှုန်းတက်လာပြီး ဈေးကွက်ဝေစု ၂၇ ရာခိုင်နှုန်းရှိကြောင်း ဈေးကွက်ခွဲခြမ်းစိတ်ဖြာရေးကုမ္ပဏီ Canalys မှ ပြောကြားခဲ့သည်။ ၎င်း၏နောက်တွင် တောင်ကိုးရီးယားကုမ္ပဏီ Samsung မှ ၂၁ ရာခိုင်နှုန်း၊ တရုတ်ကုမ္ပဏီ Xiaomi မှ ၂၀ ရာခိုင်နှုန်း ၊ အမေရိကန်ကုမ္ပဏီ Apple မှ ၁၆ ရာခိုင်နှုန်း၊ တရုတ်ကုမ္ပဏီ Vivo မှ ၆ရာခိုင်နှုန်းနှင့်အခြားကုမ္ပဏီများမှာ ၁၀ ရာခိုင်နှုန်းတို့ဖြင့် အသီးသီးရပ်တည်လျက်ရှိကြသည်။ ဈေးကွက်အတွင်းရှိ ထိပ်တန်း စမတ်ဖုန်း အမှတ်တံဆိပ် ငါးမျိုးထဲမှ Samsung သာလျှင် တိုးတက်မှုအနှုတ်လက္ခဏာပြနေခဲ့ခြင်း ဖြစ်သည်။

     Samsung သည်ဗီယက်နမ်နိုင်ငံဈေးကွက်ကို နှစ်ပေါင်းများစွာဦးဆောင်နေခဲ့ပြီး ပထမသုံးလပတ်တွင် ဈေးကွက်ဝေစု ၂၈ ရာခိုင်နှုန်း၊ Xiaomi က ၁၉ ရာခိုင်နှုန်းဖြင့် ရပ်တည်ခဲ့သည်။ အရှေ့တောင်အာရှဈေးကွက်တွင် Samsung သည်ဒုတိယသုံးလပတ်တွင် ထိပ်တန်းနေရာ၌ ဆက်လက်တည်ရှိနေပြီး Oppo က ၎င်း၏‌ နောက်တွင်ရပ်တည်နေခဲ့သည်၊ Canalys ၏အဆိုအရ အရှေ့တောင်အာရှဈေးကွက်တစ်ခုလုံးတွင် တစ်နှစ်ထက်တစ်နှစ် ၁၄ ရာခိုင်နှုန်း(သို့)ယူနစ် ၂၃.၉ သန်းအထိ တိုးတက်လာခဲ့သည်။ AI ၏ စွမ်းရည်များပါဝင်သည့် အဆင့်မြင့်ထုတ်ကုန်များကို အာရုံစိုက်လျက်ရှိသော Samsung မှဦးဆောင်သည့် အမေရိကန်ဒေါ်လာ ၆၀၀ ကျော်တန်ဖိုးရှိသည့်ဖုန်းများပါရှိသော ပရီမီယံအပိုင်းသည်လည်း ၁၈ ရာခိုင်နှုန်း တိုးတက်လာခဲ့သည်။

SourceVneXpress

DOCA(ရန်ကုန်)