ပြည်ပကုန်သွယ်မှုသတင်းများ

          ကမ္ဘောဒီးယားဖွံ့ဖြိုးတိုးတက်ရေးကောင်စီ(CDC) ၏အဆိုအရ ၂၀၂၄ ခုနှစ်အတွင်း နိုင်ငံတော်၏ အထူးစီးပွားရေးဇုန်များ(SEZs) သည် အမေရိကန်ဒေါ်လာ ၁၁.၇ ဘီလီယံတန်ဖိုး ရှိသော စီမံကိန်းပေါင်း ၈၃၅ ခုကိုရရှိခဲ့သည်။ (CDC) ၏ ၁၂-၁-၂၀၂၅ ရက်နေ့ကထုတ်ပြန်ခဲ့သော ထုတ်ပြန်ချက်အရ ကမ္ဘောဒီးယားနိုင်ငံအတွင်း လက်ရှိလည်ပတ်နေသည့် အထူးစီးပွားရေးဇုန် ၂၈ ခုနှင့် ဆောက်လုပ်ဆဲစီမံကိန်း ၅၂ ခုရှိပြီး နိုင်ငံခြားရင်းနှီးမြှုပ်နှံမှုများကို ဆွဲဆောင်သည့်အပြင် ဒေသခံများအတွက် အလုပ်အကိုင်အသစ်များဖန်တီးပေးရာတွင် အရေးပါသောအခန်းကဏ္ဍမှ ပါဝင်နေကြောင်းသိရသည်။ လက်ရှိတွင်ကမ္ဘောဒီးယားနိုင်ငံအတွင်း လည်ပတ်လျက်ရှိသော အထူးစီးပွားရေးဇုန်များတွင် ရင်းနှီးမြှုပ်နှံမှုစီမံကိန်းစုစုပေါင်း ၈၃၅ ခုရှိပြီး တန်ဖိုးအားဖြင့် ကန်ဒေါ်လာ ၁၁.၇ ဘီလီယံရှိကာ ဒေသခံအလုပ်သမား ၁၉၅,၀၀၀ ခန့်ကို အ လုပ်အကိုင်များကို ဖန်တီးပေးထားသည်။ Svay Rieng ပြည်နယ်တွင် လုပ်ငန်းလည်ပတ်နေသော အထူးစီးပွားရေး ဇုန် ၁၂ ခုရှိပြီး ကန်ဒေါ်လာ ၃ ဘီလီလီယံတန်ဖိုးရှိသော စီမံကိန်းပေါင်း ၂၈၀ ဖြင့် အလုပ်သမား ၉၈,၀၀၀ ကိုအလုပ်အကိုင်များဖန်တီးပေးထားသည်။ လက်ရှိတွင် Xin Bavet SEZ သည် ကမ္ဘောဒီးယားနိုင်ငံတွင် နည်းပညာမြင့်စက်မှုလုပ်ငန်းအသစ်ဖြစ်သည့် တာယာထုတ်လုပ်မှုတွင် အဓိကကျသောစီမံကိန်း ၁၁ ခု လည်ပတ်လျက်ရှိသည်။

DOCA(ရန်ကုန်)

          ဥဇဘတ်ကစ္စတန်နိုင်ငံသည် ၂၀၂၄ ခုနှစ် ဇန်နဝါရီမှ နိုဝင်ဘာလအထိ အမေရိကန်ဒေါ်လာ ၇၀.၃ သန်းတန်ဖိုးရှိ ချယ်ရီသီးများကိုတင်ပို့ရောင်းချနိုင်ခဲ့ကြောင်းနိုင်ငံ၏ စာရင်းအင်းအေဂျင်စီကို ကိုးကား၍ ၁၃.၁.၂၀၂၅ ရက်နေ့ (တနင်္လာနေ့) တွင်ပြည်တွင်းမီဒီယာများကဖော်ပြခဲ့သည်။

          အဆိုပါကာလအတွင်း ချယ်ရီသီးတန်ချိန် ၃၂၂၀၀ ဝန်ကျင်အားတင်ပို့နိုင်ခဲ့ကြောင်း သတင်းများအရသိရသည်။

          ကိန်းဂဏန်းများအရ ဥဇဘတ်ကစ္စတန်နိုင်ငံမှချယ်ရီသီးများအား အဓိကဝယ်ယူတင်သွင်း သောနိုင်ငံမှာရုရှားနိုင်ငံဖြစ်ပြီး ချယ်ရီသီးတန်ချိန် ၂၅၄၂၅ တန်ရှိကြောင်းသိရသည်။ ၎င်း၏နောက် ကာဇက်စတန်မှ ထုထည် ၃၅၂၁ တန်ဖြင့်ဒုတိယ ၊ ကာဂျစ္စတန်က ၂၇၅၅ တန် ဖြင့်တတိယ နေရာတို့ဖြင့် ရပ်တည်လျှက်ရှိပြီး တရုတ်နိုင်ငံမှ ချယ်ရီသီးတန်ချိန် ၉၁ တန်ဖြင့်အဆင့်ခြောက် နေရာတွင်ရပ်တည်လျှက်ရှိကြောင်း သိရသည်။

DOCA(ရန်ကုန်)

အင်ဒိုနီးရှားနိုင်ငံသည် နှစ်နိုင်ငံကြား ပူးပေါင်းဆောင်ရွက်မှုမှတစ်ဆင့် အမေရိကန်သို့ ကုန်သွယ်မှုခွန် လျှော့ချရေး အဆိုပြုရန် စီစဉ်နေကြောင်း အင်ဒိုနီးရှား စီးပွားရေးရာ ညှိနှိုင်းရေး ဝန်ကြီး Airlangga Hartarto က ၁၃.၁.၂၀၂၅ ရက်နေ့တွင် ပြောကြားခဲ့သည်။

ယခုလုပ်ဆောင်မှုသည် ဇန်နဝါရီ ၂၀ ရက်တွင် စတင်တာဝန်ယူမည့် အမေရိကန် ရွေးကောက် ခံသမ္မတ ဒေါ်နယ်ထရမ့်၏ အုပ်ချုပ်ရေးအဖွဲ့၏ မျှော်မှန်းထားသော သွင်းကုန် အကောက်ခွန်မူဝါဒများ ကို လျော့ပါးသက်သာစေရန် ရည်ရွယ်ခြင်းဖြစ်ကြောင်းသိ ရသည်။

အကောက်ခွန်များ လျှော့ချရန် နှင့် နှစ်နိုင်ငံ စီးပွားရေး ပူးပေါင်းဆောင်ရွက်မှုအား တောင်းဆိုနေကြောင်း ဝန်ကြီးက ပြောကြားခဲ့သည်။

ထရမ့်သည် ရာထူးမတက်ရသေးသော်လည်း US မှ ဖိနပ်နဲ့ အဝတ်အစားများကဲ့သို့သော အင်ဒိုနီးရှားထုတ်ကုန်များအပေါ် အခွန်ကောက်ခံထားပြီးဖြစ်ကြောင်း Airlangga ၏ အဆိုအရ သိရသည်။

ထရမ့်သည် ၂၀၂၄ ခုနှစ် အမေရိကန်သမ္မတရွေးကောက်ပွဲတွင် အနိုင်ရခဲ့ပြီး လာမည့် သီတင်းပတ်တွင် ကျမ်းသစ္စာကျိန်ဆိုမည်ဖြစ်သည်။

DOCA(ရန်ကုန်)

          ဗီယက်နမ်နှင့်အမေရိကန်အကြား ကုန်သွယ်ရေးပူးပေါင်းဆောင်ရွက်မှုသည် များပြား သော အခွင့်အလမ်းနှင့် သိသာထင်ရှားသောစိန်ခေါ်မှုနှစ်မျိုးစလုံးရှိနေကြောင်း သိရပါသည်။ လတ်တ လောတွင် အမေရိကန်သည် ဗီယက်နမ်၏အကြီးမားဆုံး ကုန်သွယ်ရေးမိတ်ဖက်အဖြစ် ရပ်တည် နေပြီး နိုင်ငံသည် အမေရိကန်ထံမှ မိုက်ခရိုချပ်စ်နှင့် ဆီမီးကွန်ဒတ်တာကဲ့သို့သော နည်းပညာမြင့် ကဏ္ဍများတွင် ဆက်လက်ဆွဲဆောင်နေလျှက်ရှိကြောင်း သိရပါသည်။ ၂၀၂၄ ခုနှစ် အချက် အလက်များအရ နှစ်နိုင်ငံအပြန်အလှန်ကုန်သွယ်မှုသည် အမေရိကန်ဒေါ်လာ ၁၃၂ ဘီလီယံ ရှိခဲ့ ကြောင်းသိရပါသည်။ ထိုပမာဏထဲတွင် ဗီယက်နမ်၏အမေရိကန်သို့တင်ပို့မှုမှာ အမေရိကန် ‌ဒေါ်လာ ၁၁၉ ဘီလီယံ(၂၃.၃ ရာခိုင်နှုန်းမြင့်တက်) ရှိခဲ့ပြီး ပြန်လည်တင်သွင်းမှုမှာ အမေရိကန် ဒေါ်လာ ၁၃ ဘီလီယံ(၇.၃ ရာခိုင်နှုန်းမြင့်တက်) ရှိခဲ့ကြောင်း သိရပါသည်။ ၂၀၂၄ နိုဝင်ဘာလ အထိတွင် အမေရိကန်သည် ဗီယက်နမ်နိုင်ငံတွင် အမေရိကန်ဒေါ်လာ ၁၂ ဘီလီယံနီးပါး ရှိသော စီမံကိန်း ၁၄၀၀ ခုရှိကြောင်း သိရပါသည်။ အမေရိကန်- ဗီယက်နမ်စီးပွားရေးကောင်စီ၏ ဥက္ကဌ ဖြစ်သူ Kevin Morgan ကအမေရိကန်အစိုးရအသစ်၏ ကုန်သွယ်ရေးနှင့်အကောက်ခွန်မူဝါဒ သစ်များချမှတ်နိုင်မှုသည် မသေချာကြောင်းနှင့် ဈေးကွက်အတွင်း ထိရောက်စွာဆက်လက် လည်ပတ်နိုင်ရန် များစွာသောဖြစ်နိုင်ချေများအတွက် စီစဉ်ထားသင့်ကြောင်း ပြောကြားခဲ့ပါသည်။ အမေရိကန်ကုန်သွယ်ရေးမူဝါဒများ ပြောင်းလဲနိုင်မှု သည် များစွာသော လွတ်လပ်သော ကုန်သွယ် ရေးသဘောတူညီချက်များတွင် ပါဝင်ထားသည့် ဗီယက်နမ်အတွက် အခွင့်အလမ်းသာမက စိန်ခေါ်မှုပါရှိနိုင်ကြောင်း သိရပါသည်။ သို့သော် အမေရိကန်၏ ရှုပ်ထွေးသောဥပ‌‌ဒေမူဘောင်က ဈေးကွက်သည် စွန့်စားရမှုများရှိနိုင်သည်ကို ဆိုလိုကြောင်းသိရပါသည်။ ဗီယက်နမ်လုပ်ငန်းများ သည်လည်း အမေရိကန်တွင် သွင်းကုန် လုပ်ငန်းရှင်များ၊ ဖြန့်ဖြူးရေးသမားများနှင့် ပူးပေါင်း၍  ပြောင်းလွယ်ပြင်လွယ်ရှိသော ငွေပေးချေမှုစနစ်ကိုရှာဖွေသင့်ကြောင်း သိရပါသည်။ စိုက်ပျိုး မွေးမြူရေးနှင့် အစားအစာ ထုတ်ကုန်များအတွက် စီးပွားရေးလုပ်ငန်းများသည် အဓိကအမေရိကန် ဆိပ်ကမ်းများတွင် များစွာသော ထုတ်ကုန်အမျိုးအစားများကို ကိုင်တွယ်နိုင်စွမ်းရှိစေရန်အတွက် ဖြန့်ဖြူးရေး စင်တာများ တည်ထောင်ရန် အအေးသိုလှောင်ခန်းဝန်ဆောင်မှုများ၌ ရင်းနှီးမြှုပ်နှံ သင့်ကြောင်း သိရပါသည်။ ထိုဆောင်ရွက်မှုသည် ၎င်းတို့အား ကုန်ကျစရိတ်များလျှော့ချရန်နှင့် ဈေးကွက်သို့ တင်ပို့သည့်အခါ ထောက်ပံ့မှုကွင်းဆက်အပေါ် ထိန်းချုပ်နိုင်စွမ်းအားကောင်းစေရန် ကူညီပေး နိုင်မည်ဟုသိပါသည်။ ထို့ပြင်ကျွမ်းကျင်သူများက ကုန်သွယ်ရေးမူဝါဒသစ်များသည် ကုန်သွယ်ရေး၊ အကောက်ခွန်၊ နည်းပညာ၊ ဘဏ္ဍာရေး နှင့် ရင်းနှီးမြှုပ်နှံမှု အစရှိသည့် ဧရိယာများတွင် ဗီယက်နမ်စီးပွားရေးလုပ်ငန်းများကို သက်ရောက်မှုရှိနိုင်ကြောင်း ပြောကြားခဲ့ပါ သည်။ ပြည်တွင်းလုပ်ငန်းများ အထူးသဖြင့် အသေးစား- အလတ်စားလုပ်ငန်းများသည် ထွန်းသစ်စခေတ်ရေစီးကြောင်းများနှင့်အညီ ရင်ဘောင်တန်းနေသင့်ပြီး အနာဂတ်စီးပွားရေး ပူးပေါင်း ဆောင်ရွက်မှုအရှိန်မြှင့်တင်ရန် ချိတ်ဆက်မှုအားကောင်းသင့်သည်ဟု သိရပါသည်။

DOCA(ရန်ကုန်)

          ဗီယက်နမ်နိုင်ငံ Bac Lieu ပြည်နယ်သည် ၂၀၂၅ ခုနှစ်တွင် ၎င်းတို့၏စုစုပေါင်းတင်ပို့မှု တန်ဖိုး၏ ၉၅ ရာခိုင်နှုန်းရှိသည့် ပုဇွန်တင်ပို့မှုမှတစ်ဆင့် ၁.၂ ဘီလီယံ ရရှိရန် ရည်မှန်းထား ကြောင်း သိရပါသည်။ လတ်တလောတွင် တစ်နှစ်လျှင် တန်ချိန် ၂၉၄၀၀၀ တန် ပြုပြင်ထုတ်လုပ် နိုင်စွမ်းရှိသည့် ခေတ်မီနည်းပညာများတင်ဆင်ထားသည့် ပင်လယ်စာပြုပြင်ထုတ်လုပ်သည့် စက်ရုံ ၄၈ ခုရှိကြောင်း သိရပါသည်။ ပြည်နယ်၏ရေထွက်ကုန်တင်ပို့မှုသည် ၂၀၂၄ ခုနှစ်တွင် အမေရိကန်ဒေါ်လာ ၁.၁၈ ဘီလီယံထိ ရောက်ရှိခဲ့ပြီး အေးခဲထားသောပုဇွန်တင်ပို့မှုမှာ အမေရိကန်ဒေါ်လာ ၁.၁၃ ဘီလီယံ တန်ဖိုးရှိကာ ၂၀၂၃ ခုနှစ်ကထက် ၁၆ ရာခိုင်နှုန်းမြင့်တက် ခဲ့ကြောင်း သိရပါသည်။ ဒေသတွင်းပြုပြင်ထုတ်လုပ်ထားသည့် ပုဇွန်ထုတ်ကုန်များသည့် ဂျပန်၊ အမေရိကန်၊ ဥ‌ရောပသမဂ္ဂ၊ တရုတ်၊ ‌တောင်ကိုရီးယားနှင့် များစွာသောကမ္ဘာ့ဈေးကွက်များ အစ ရှိသည့် ဈေးကွက်များသို့ထိုးဖောက်ဝင်ရောက်ခဲ့ကြောင်း သိရပါသည်။ ရေထွက်ကုန် အဓိက အားဖြင့် ပုဇွန်မွေးမြူရေးသည် ဒေသစီးပွားရေး၏ အခြေခံအုတ်မြစ်ဖြစ်ကြောင်း သိရပါသည်။ ပြည်နယ်စိုက်ပျိုးမွေးမြူရေးနှင့် ကျေးလက်ဒေသဖွံ့ဖြိုးတိုးတက်ရေး ဝန်ကြီးဌာန၏ ဖော်ပြချက် အရ ၂၀၂၄ ခုနှစ်တွင် ရေလုပ်ငန်းကဏ္ဍ၌ မွေးမြူရေးဧရိယာ ၁၅၀၀၀၀ ဟတ်တာရှိကြောင်း သိရ ပါသည်။ များစွာသော စီးပွားရေးလုပ်ငန်းများက ဆန်းသစ်တီထွင်မှုများပြုလုပ်လာမှုနှင့်အတူ ဒေသခံများသည်လည်း သန့်ရှင်းသောအော်ဂဲနစ်နည်းပညာမြင့် မွေးမြူရေးပုံစံကို ကျင့်သုံးလာ ကြောင်း သိရပါသည်။ ယနေ့အချိန်အထိ Bac Lieu တွင် စိုက်ပျိုးမွေးမြူရေးနှင့် ကျေးလက် ဒေသ ဖွံ့ဖြိုးရေးဝန်ကြီးဌာနနှင့် ပြည်နယ်ပြည်သူ့ကော်မတီထံမှ နည်းပညာမြင့်စိုက်ပျိုးမွေးမြူမှု ကျင့်သုံးသည့်အတွက် ထောက်ခံချက်လက်မှတ်ရရှိထားသည့် ကုမ္ပဏီ ၆ ခုနှင့် BAP၊ GlobalGAP နှင့် ASC အစရှိသည့် နိုင်ငံတကာထောက်ခံချက်လက်မှတ်များ ရရှိထားသည့် စီးပွားရေးလုပ်ငန်း နှင့် ကော်ပိုရေးရှင်း ၂၃ ခုနှင့် တစ်နိုင်တစ်ပိုင်လုပ်ငန်း ၃၁၆ ခုရှိကြောင်း သိရပါသည်။ ထိုအောင်မြင်မှုများရှိနေသော်လည်း ပြည်နယ်သည် နိုင်ငံ၏အဓိကပုဇွန်မွေးမြူရာ အချက်အချာ ဖြစ်လာရန်အတွက် သဘာဝပတ်ဝန်းကျင်ပြသနာ၊ ရောင်းလိုအား-ဝယ်လိုအားချိတ်ဆက်မှု အားနည်းမှုနှင့် အချက်အလက်ဖြည့်သွင်းမှုကုန်ကျစရိတ်မြင့်တက်လာမှု ပါဝင်သည့် များစွာသော စိန်ခေါ်မှုများနှင့် ရင်ဆိုင်ရလျှက်ရှိကြောင်း သိရပါသည်။ Bac Lieu ပြည်နယ် စိုက်ပျိုးမွေးမြူရေး နှင့် ကျေးလက်ဒေသဖွံ့ဖြိုးတိုးတက်ရေးဦးစီးဌာန၏ ဒုတိယညွှန်ကြားရေးမှူးဖြစ်သူ Pham Van Muoi က ထိုစိန်ခေါ်မှုများရှိနေခြင်းကြောင့် စိုက်ပျိုးမွေးမြူရေးကဏ္ဍသည် ခေတ်မီသန့်ရှင်းပြီး တည်ငြိမ်သော ဖွံ့ဖြိုးတိုးတက်မှုရရှိရေး ဆောင်ရွက်သွားမည်ဖြစ်ကြောင်း၊ နည်းပညာမြင့် ပုဇွန် မွေးမြူခြင်း၊ ခေတ်မီစီမံခန့်ခွဲခြင်း၊ တန်ဖိုးကွင်းဆက်သို့ဝင်ရောက်ခြင်းနှင့် သန့်စင်သော ထုတ်လုပ် ခြင်းတို့သည် ဖွံ့ဖြိုးတိုးတက်မှုတွင် အဓိကကျကြောင်းနှင့် ပြည်နယ်သည် ပုဇွန်၊ ဂဏန်းတို့ပါဝင်သည့် အဓိကရေထွက်ကုန်များ ဖွံ့ဖြိုးတိုးတက်ရေးကို ဆက်လက်ဆောင်ရွက် သွားမည် ဖြစ်ပြီး မွေးမြူရေးသမားများနှင့် စီးပွားရေးလုပ်ငန်းရှင်များ နှစ်ဖက်စလုံး အကျိုးအမြတ် ရရှိစေရန် ဆက်လက်ပံ့ပိုးပေးမည်ဟု ပြောကြားခဲ့ပါသည်။

DOCA(ရန်ကုန်)