HighLight News

          ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ လပွတ္တာခရိုင်၊ မော်ကျွန်းမြို့နယ်တာဝန်ခံ ဦးမင်းဇော်လတ်သည် (၁၀.၂.၂၀၂၆)ရက်နေ့ နေ့လယ်(၁၃:၀၀)နာရီအချိန်တွင်  မြို့နယ်စည်ပင်သာယာရေးအဖွဲ့နှင့် ပူးပေါင်း၍ ဗိုလ်ချုပ်ဈေးရှိ ကုန်မျိုးစုံနှင့် မုန့်မျိုးစုံဆိုင်ရှင်များအား စားသုံးသူကာကွယ်ရေး အသိပညာပေးဟောပြောပွဲ ဆောင်ရွက်ခဲ့ပါသည်။

         ထိုသို့ဟောပြောဆွေးနွေးရာတွင် စားသုံးသူရေးရာဦးစီးဌာန၊ မြို့နယ်တာဝန်ခံမှ စားသုံးသူရေးရာဦးစီးဌာန၏ လက်ရှိဆောင်ရွက်နေသော   လုပ်ငန်းတာဝန်များ၊   ရှေ့ဆက်လက်ဆောင်ရွက်ရမည့်   လုပ်ငန်းတာဝန်များအား ဦးစွာရှင်းလင်းပြောကြားပြီးစီးပွားရေးနှင့် ကူးသန်းရောင်းဝယ်ရေးဝန်ကြီးဌာနမှ ထုတ်ပြန်ထားသော စားသုံးသူကာကွယ်ရေး ဥပဒေ၂၀၁၉ပါ ပြဌာန်းချက်များမှ စားသုံးသူ၏အခွင့်အရေးနှင့်တာဝန်များ၊ စီးပွားရေးလုပ်ငန်းရှင်များ၏ တာဝန်များ၊ တားမြစ်ချက်များ၊ ပြစ်မှုပြစ်ဒါဏ်များအား အသေးစိတ်ရှင်းလင်းဟောပြောခဲ့ပြီး ဆိုင်ပိုင်ရှင်များမှ သိရှိလိုသည့် မေးမြန်းဆွေးနွေးချက်အား ပြန်လည်ရှင်းလင်းဆွေးနွေးခဲ့ပါသည်။ ဟောပြောပွဲသို့ ကုန်မျိုးစုံနှင့်မုန့်မျိုးစုံ လုပ်ငန်းရှင်(၂၀)ဦး တက်ရောက်ခဲ့ကြောင်း သိရှိရပါသည်။

DOCA (ဧရာဝတီ)

         ဧရာဝတီတိုင်းဒေသကြီး၊ မအူပင်ခရိုင်၊ ညောင်တုန်းမြို့၌  မြို့ပေါ်ရပ်ကွက်များရှိ မုန့်ဆိုင်နှင့် စတိုးကုန်စုံဆိုင်များမှ အသင့်စားမုန့်အမျိုးမျိုးတို့အား ကုန်အညွှန်းအမှတ်အသား ပါဝင်မှုရှိ/ မရှိ ဈေးကွက်စောင့်ကြည့် ကွင်းဆင်းစစ်ဆေးခြင်းကို စားသုံးသူရေးရာဦးစီးဌာန၊ မြို့နယ်ထွေထွေ အုပ်ချုပ်ရေးဦးစီးဌာန၊ မြို့နယ်စည်ပင်သာယာရေးအဖွဲ့ ပူးပေါင်းအဖွဲ့သည် (၁၀-၂-၂၀၂၆) ရက်နေ့ (၁၀း၀၀)နာရီအချိန်တွင် ကွင်းဆင်းစစ်ဆေးခဲ့ကြသည်။

       စစ်ဆေးရာတွင် စားသုံးသူရေးရာဦးစီးဌာမှ ဒေါ်ချိုမီဇင် ဒုဦးစီးမှူးက မြို့ပေါ်ရပ်ကွက် မုန့်မျိုးစုံဆိုင်များမှ ရောင်းချနေသော ဈေးကွက်အတွင်း အသင့်စားမုန့်အမျိုးမျိုး ကုန်စည်များအား ကုန်အညွှန်းပြည့်စုံမှု ရှိ/ မရှိတို့ကို စစ်ဆေးခြင်း၊ သက်တမ်းလွန်မုန့်များ ဈေးကွက်အတွင်း ရောနှောရောင်းချခြင်းမျိုးရှိ/ မရှိ၊ အများပြည်သူ အန္တရာယ်ဖြစ်စေနိုင်သည့် စားသောက်ကုန်များ၊ သက်တမ်းလွန် အသင့်စားအစားအစာများ ရောင်းချမှုရှိ/ မရှိ လိုက်လံစစ်ဆေးခြင်း၊ ဆိုင်ရှင်များကို ပြည်တွင်းနှင့် ပြည်ပမှ ထုတ်လုပ်တင်သွင်း ရောင်းချသည့် မုန့်မျိုးစုံနှင့် စားသုံးရန် မသင့်သည့်မုန့်များ မရောင်းချရန်တားမြစ်ခြင်း၊ သိမ်းဆည်းခြင်းနှင့် အသိပညာပေးခြင်းလုပ်ငန်းများ ဆောင်ရွက်ခဲ့ပြီး စားသုံးသူကာကွယ်ရေးဥပဒေပါ ကုန်အညွှန်းအမှတ်အသား ဖော်ပြပါဝင်ရမည့် အချက်အလက်များနှင့် ကိုက်ညီသောမုန့်များနှင့် စီးပွားရေးလုပ်ငန်းရှင် လိုက်နာရန်အချက်များအကြောင်းတို့ကို ဆိုင်ရှင်များအား ရှင်းလင်းအသိပေးခဲ့ကြောင်း သိရှိရပါသည်။

DOCA(ဧရာဝတီ)

            စားသုံးသူရေးရာဦးစီးဌာန၊ မအူပင်ခရိုင်၊ ပန်းတနော်မြို့နယ် တာဝန်ခံနှင့်ဝန်ထမ်းတို့သည် ၂၀၂၆ ခုနှစ်၊ ဖေဖော်ဝါရီလ (၁၀) ရက်နေ့၊ နေ့လယ် (၁၁:၃၀) နာရီအချိန်တွင် ပန်းတနော်မြို့နယ် ကျေးရွာများရှိ ဆန်စက်သို့နှင့် သိုလှောင်ရုံများ  ဆန်/စပါးလက်ကျန်စာရင်းကောက်ယူခြင်းနှင့် MSMEs ဖွံ့ဖြိုးတိုးတက်ရေး ကွင်းဆင်းစိစစ်ခဲ့ကြောင်း သိရသည်။

        အဆိုပါ ကွင်းဆင်းစိစစ်ရာတွင် ပန်းတနော်မြို့နယ် ကျေးရွာများတွင် တည်ဆောက်ထားသည့် ဆန်စက်များနှင့် သိုလှောင်ရုံများမှ  ဆန်စပါးကြိတ်ခွဲလည်ပတ်မှုကို ကြည်ရှုစစ်ဆေးခြင်း၊ ဖေဖော်ဝါရီလအတွက် ဆန်စက်၊ သိုလှောင်ရုံများမှ လဆန်း(၇)ရက်မှ ၁၀ရက်အတွင်း မြေပြင် လက်ကျန်အခြေအနေမှန်ကို MYRO တွင် ဖြည့်သွင်းဆောင်ရွက်ရန်နှင့် သိုလှောင်မှု အမှန်တကယ်အခြေအနေများကို စာရင်းကောက်ယူနိုင်ရန် စစ်ဆေးဆောင်ရွက်ခြင်း၊ စပါး၊ ဆန် ဈေးနှုန်း ဈေးကွက် အခြေအနေများနှင့် ထုတ်ပိုးမှု စနစ်များလုံခြုံစိတ်ချရမှုရှိစေရေး၊ ခေတ်မှီစက် ကိရိယာ များ Gasifier, စပါးအခြောက်ခံစက်၊ ဆန်စက်ကီး၊ လတ်စာရင်းအတိုးလျော့ ဆန်စက်ဖျက်သိမ်းစက်များရှိ/မရှိကို အဖွဲ့စုံဖြင့် စိစစ်ခဲ့ကြပါသည်။ ဆန်စက်ကြိတ်ခွဲရာမှ ထွက်ရှိလာသော စွန့်ပစ်ပစ္စည်းများကိုလည်း စနစ်တကျ စွန့်ပစ်ထားခြင်းရှိ/ မရှိ၊ MSMEs လုပ်ငန်းဖွံ့ဖြိုးတိုးတက်ရေး ကွင်းဆင်းစိစစ်ခဲ့ကြောင်း သတင်းရရှိပါသည်။

DOCA(ဧရာဝတီ)

        စားသုံးသူရေးရာဦးစီးဌာနသည် စားသုံးသူများ၏ နစ်နာဆုံးရှုံးမှုများကို ကုစားပေးလျက်ရှိပြီး စားသုံးသူအသိပညာပေးခြင်းလုပ်ငန်းများနှင့် စားသုံးသူနစ်နာမှုများအား ကူညီဖြေရှင်းဆောင်ရွက်ပေးလျက်ရှိရာ “စားသုံးသူအခွင့်အရေး အလေးထားဆောင်ရွက်လျက်ရှိရာ" စားသုံးသူ ပြည်သူများ စားသုံးသူကာကွယ်ရေးနှင့် စပ်လျဉ်း၍ ကျယ်ကျယ်ပြန့်ပြန့် သိရှိနိုင်စေရန် အသိပညာပေးဆောင်ရွက်လျက်ရှိပြီး မအူပင်မြို့နယ် သုံးခွဆိုင်ကျေးရွာ အုပ်ချုပ်ရေးမှူးရုံးတွင် ​ကျေးရွာ​နေပြည်သူ (၇၉)ဦးအား ၉.၂.၂၀၂၆ ရက်နေ့ (၁၃:၀၀) နာရီအချိန်တွင် စားသုံးသူကာကွယ်ရေးအသိပညာပေး ဟောပြောခဲ့ကြောင်း သိရသည်။

        အသိပညာပေးဟောပြောရာတွင် မအူပင်ခရိုင် စားသုံးသူရေးရာဦးစီးဌာနမှ ဒုခရိုင်ဦးစီးမှူး ဦးအောင်ဇော်ဦးမှ စားသုံးသူအခွင့်အရေး (၈) ချက် ကုန်ပစ္စည်းများ၏ အရည်အသွေး၊ သတင်းအချက်အလက်ပြည့်စုံမှုနှင့် လုံခြုံစိတ်ချရမှုကို တောင်းဆိုနိုင်ခြင်းအကြောင်းကိုလည်းကောင်း၊ ကုန်ပစ္စည်းရွေးချယ်ရာတွင် ကုန်အညွှန်းအမှတ်အသား (Label) များတွင် ထုတ်လုပ်ရက်၊ သက်တမ်းကုန်ဆုံးရက်နှင့် ပါဝင်ပစ္စည်းများကို သေချာဖတ်ရှုရန်ကိုလည်းကောင်း၊ စားသုံးသူအခွင့်အရေး အမှန်တကယ်နစ်နာမှုရှိပါက တိုင်ကြားနိုင်ခြင်းနှင့် စပ်လျဉ်း၍ မသမာသော ကုန်သွယ်မှုများပြုလုပ်ခြင်း၊ ကုန်စည်ကြောင့် အခွင့်အရေးနစ်နာမှုရှိပါက မြို့နယ်စားသုံး သူရေးရာဦးစီးဌာနသို့ တိုင်ကြားနိုင်ကြောင်း အသိပညာပေးခြင်း တိုင်းကြားနိုင်သည့် နည်းလမ်းများဖြစ်သော စားသုံးသူရေးရာဦးစီးဌာနသို့ နစ်နာမှုများအတွက် တိုင်ကြားနိုင်သည့်နည်းလမ်းများမှာ ခရိုင်ဦးစီးမှူးရုံးတွင် ဖွင့်လှစ်ထားသော CICC၊ လူကိုယ်တိုင်၊ ဖုန်း၊ အီးမေးလ်၊ ဝက်ဘ်ဆိုက်နှင့် လူမှုကွန်ရက်များမှတစ်ဆင့် တိုင်ကြားနိုင်ကြောင်း၊ Consumer Call Center 1535 သို့အလွယ်တကူ ဆက်သွယ်တိုင်ကြားနိုင်ကြောင်း အကျယ်တဝင့်ဟောပြောခဲ့ပြီး ဟောပြေပွဲမှ တက်ရောက်သူ ကျေးရွာနေပြည်သူများမှ ဤဟောပြောပွဲများမှတစ်ဆင့် ကျေးလက်နေပြည်သူများအနေဖြင့် လုံခြုံစိတ်ချရသော စားသောက်ကုန်များကို သတိပြုရွေးချယ်လာနိုင်ကြောင်း ပြန်လည်တင်ပြဆွေးနွေးကြပြီး တက်ရောက်သူများအား စားသုံးသူကာကွယ်ရေး အသိပညာပေး လက်ကမ်းစာစောင့်များဖြန့်ဝေခဲ့ကြောင်း သိရှိရပါသည်။

DOCA(ဧရာဝတီ)

        စားသုံးသူရေးရာဦးစီးဌာန၊ မြန်အောင်ခရိုင်၊ ကြံခင်းမြို့နယ်တာဝန်ခံသည်(၁၁.၂.၂၀၂၆) ရက်နေ့ နံနက်(၁၀:၀၀) နာရီအချိန်တွင် မြို့နယ်ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ လူထုအခြေပြု ဗဟိုဌာန(Community Centre)ခန်းမ၌ စားသုံးသူကာကွယ်ရေးဥပဒေဖော်ပြချက်ပါ တားမြစ်ချက်များအား အသိပညာပေး Talk Show အစီအစဉ်ကို ဆောင်ရွက်ခဲ့ပါသည်။

         အဆိုပါအစီအစဉ်တွင် မြို့နယ်တာဝန်ခံ ဦးကျော်နိုင်ဝင်းက  ၂၀၁၉ခုနှစ် မတ်လ(၁၅)ရက်နေ့တွင်  ပြဌာန်းခဲ့သောစားသုံးသူကာကွယ်ရေးဥပဒေ၏ အခန်း(၂၃)ပါ  တားမြစ်ချက်များဖြစ်သော ပုဒ်မ ၆၃ အရ  စီးပွားရေးလုပ်ငန်းရှင်များအနေဖြင့် ကုန်စည်၏အရည်အသွေး၊ အရေအတွက်၊ ပါဝင်သောပစ္စည်းများ၊ အသုံးပြုပုံ၊ ဈေးနှုန်း၊  ဝန်ဆောင်မှုနှုန်းထား၊ ကုန်စည် သို့မဟုတ် ဝန်ဆောင်မှု၏ အာမခံပေးထားမှု၊ ပေးအပ်နိုင်သည့်အချိန်နှင့် စပ်လျဉ်း၍ လိမ်လည်လှည့်ဖြားခြင်းပြုထားသော ကြော်ငြာများ၊ မဟုတ်မမှန်သော သတင်းအချက်အလက်များ၊ အသုံးပြုခြင်းဖြင့် အန္တရာယ်ရှိမှုကို စားသုံးသူအား အသိပေးခြင်းမရှိသော ကြော်ငြာများ၊ တည်ဆဲဥပဒေများ၊ လူမှုကျင့်ဝတ်များနှင့် ကိုက်ညီမှုမရှိသော ကြော်ငြာများကိုမပြုလုပ်ရန်နှင့် ကုန်စည် သို့မဟုတ် ဝန်ဆောင်မှုကို သတ်မှတ်ထားသောကာလအတွင်း ကြော်ငြာထားသောပမာဏ၊ အရေအတွက်အတိုင်းရောင်းချရန် အစီအစဉ်မရှိဘဲ အချိန်ကာလတစ်ခုအတွင်း အထူးဈေးနှုန်းဖြင့်ရောင်းချရန် ကမ်းလှမ်းခြင်း၊ ကုန်စည်တစ်ခုကို ဆုကြေး သို့မဟုတ် အခမဲ့ဝန်ဆောင်မှုပေးရန် ကတိပြုထားသော်လည်း အမှန်တကယ်ပေးအပ်နိုင်ခြင်းမရှိဘဲ ရောင်းချခြင်း၊ စားသုံးသူ၏ ရုပ်ပိုင်းဆိုင်ရာကိုဖြစ်စေ၊ စိတ်ပိုင်းဆိုင်ရာကိုဖြစ်စေ အနှောင့်အယှက်ဖြစ်စေမည့် နည်းလမ်းများဖြင့် အရောင်းမြှင့်တင်ခြင်းမပြုရန် ပုဒ်မ ၆၄ အရ တားမြစ်ထားကြောင်း၊ ထိုပုဒ်မ ၆၃နှင့် ၆၄ ပါ တားမြစ်ချက်တစ်ရပ်ရပ်ကို ဖောက်ဖျက်ကျူးလွန်၍ ပြစ်မှုထင်ရှားစီရင်ခြင်းခံရလျှင် ပုဒ်မ ၇၀ အရ  ခြောက်လထက်မပိုသော ထောင်ဒဏ်ဖြစ်စေ၊ ကျပ်သိန်း ၂၀ ထက်မပိုသော ငွေဒဏ်ဖြစ်စေ ပြစ်ဒဏ်ချမှတ်နိုင်ကြောင်းတို့အားလည်းကောင်း၊ စီးပွားရေးလုပ်ငန်းရှင်များအနေဖြင့် အထက်ပါ ပြစ်ဒဏ်များအား စီရင်ခြင်းခံရပြီးနောက် အဆိုပါပြစ်မှုကို ထပ်မံကျူးလွန်ကြောင်း ပြစ်မှုထင်ရှား စီရင်ခြင်းခံရလျှင် တစ်နှစ်ထက်မပိုသော ထောင်ဒဏ်ဖြစ်စေ၊ ကျပ်သိန်း ၁၀၀ ထက်မပိုသော ငွေဒဏ်ဖြစ်စေချမှတ်နိုင်ကြောင်း တို့အားလည်းကောင်း အကျယ်တဝင့် ရှင်းလင်းဆွေးနွေးခဲ့ကြောင်း သိရှိရပါသည်။

DOCA (ဧရာဝတီ)