အာဆီယံ-ဂျပန်စင်တာ၏ ၂၀၂၅ ဘဏ္ဍာရေးနှစ် ရန်ပုံငွေဖြင့် စီးပွားရေးနှင့် ကူးသန်းရောင်း ဝယ်ရေးဝန်ကြီးဌာန၊ စားသုံးသူရေးရာဦးစီးဌာနက ဦးဆောင်၍ မြန်မာ့စိုက်ပျိုးရေးထွက်ကုန်များ ဘေးကင်းလုံခြုံစေခြင်းဖြင့် ပို့ကုန်တည်မြဲမှုကို တည်ဆောက်ခြင်း အလုပ်ရုံဆွေးနွေးပွဲ အခမ်းအနား ကို ၂၀၂၆ ခုနှစ်၊ ဖေဖော်ဝါရီလ ၂၇ ရက်နေ့တွင် ရန်ကုန်မြို့၊ Summit Parkview Hotel ၌ ကျင်းပ ပြုလုပ်ခဲ့ပါသည်။
အဆိုပါ စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ စားသုံးသူရေးရာဦးစီးဌာနမှ ညွှန်ကြားရေးမှူးချုပ်၊ မူပိုင်ခွင့်ဦးစီးဌာနမှ ညွှန်ကြားရေးမှူးချုပ်၊ ဒုတိယညွှန်ကြားရေးမှူးချုပ်များ၊ စားသုံးသူရေးရာဦးစီးဌာနမှ ညွှန်ကြားရေးမှူးများနှင့် တာဝန်ရှိသူများ၊ အာဆီယံ-ဂျပန်စင်တာမှ Program Director ဒေါ်အိအိခင်၊ ကမ္ဘောဒီးယားနိုင်ငံ နည်းပညာတက္ကသိုလ်မှ တွဲဖက်ပါမောက္ခ Dr. Yoeun Sereyvath၊ ဖိလစ်ပိုင်နိုင်ငံ၊ စိုက်ပျိုးရေးနှင့်အစားအစာသိပ္ပံဌာနမှ တွဲဖက်ပါမောက္ခ Dr. Justine Bennette H. Millado၊ အာဆီယံ-ဂျပန်စင်တာမှ Program Officer Dr. Razel Andrea D. NAVALTA၊ ပြည်ထောင်စုသမ္မတမြန်မာနိုင်ငံကုန်သည်များနှင့် စက်မှုလက်မှုလုပ်ငန်းရှင်များအသင်း ချုပ်၊ မြန်မာနိုင်ငံဆန်စပါးအသင်းချုပ်၊ မြန်မာနိုင်ငံပဲမျိုးစုံ၊ ပြောင်းနှင့် နှမ်းကုန်သည်များအသင်းမှ တာဝန်ရှိသူများ၊ စိုက်ပျိုးရေးဆေးတင်သွင်းဖြန့်ဖြူးရောင်းချလျက်ရှိသည့် ကုမ္ပဏီများမှ တာဝန်ရှိသူ များ၊ ပို့ကုန်တင်ပို့သူများ၊ အဝယ်ဒိုင်များ၊ တောင်သူများနှင့် ဖိတ်ကြားထားသည့် ဧည့်သည်တော်များ တက်ရောက်ခဲ့ကြပါသည်။
အဆိုပါအခမ်းအနားတွင် ဂျပန်နိုင်ငံဆိုင်ရာ မြန်မာသံအမတ်ကြီး ဦးကျော်ထွန်းက Online မှ တစ်ဆင့် ဝမ်းမြောက်ကြောင်း အမှာစကား ပြောကြားခြင်း၊ စီးပွားရေးနှင့် ကူးသန်းရောင်းဝယ်ရေး ဝန်ကြီးဌာန၊ စားသုံးသူရေးရာဦးစီးဌာန၊ ညွှန်ကြားရေးမှူးချုပ်က အမှာစကားပြောကြားခြင်း၊ အာဆီယံ-ဂျပန်စင်တာမှ Program Director ဒေါ်အိအိခင်က အမှာစကားပြောကြားခြင်း၊ စားသုံးသူ ရေးရာဦးစီးဌာနမှ ညွှန်ကြားရေးမှူး ဦးဆန်းမြင့်က အရည်အသွေးမြင့် ဈေးကွက်များသို့ တင်ပို့နိုင် ရေးအတွက် အစားအစာဘေးကင်းလုံခြုံရေးဆိုင်ရာ ကိစ္စရပ်များနှင့်စပ်လျဉ်း၍ ရှင်းလင်းပြောကြား ခြင်း၊ ကုန်သွယ်ရေးနှင့် ရင်းနှီးမြှုပ်နှံမှုဆိုင်ရာ အကြံပေး Mr. Makoto Nakamura က ဂျပန်နိုင်ငံ စျေးကွက်၏ ဝယ်လိုအား၊ အရည်အသွေးနှင့် အစားအစာဘေးကင်းလုံခြုံရေးဆိုင်ရာ မျှော်မှန်းချက် များနှင့်စပ်လျဉ်း၍ အွန်လိုင်းမှတစ်ဆင့် ဆွေးနွေးခြင်းများကို ဆောင်ရွက်ခဲ့ကြပါသည်။
ထို့နောက် တွဲဖက်ပါမောက္ခ Dr. Dr. Justine Bennette H. Millado ဦးဆောင်၍ ထုတ်လုပ်မှုမှ စားသုံးမှုထိ တန်ဖိုးကွင်းဆက်တစ်လျှောက် ချိတ်ဆက်ပုံဖော်ပြသခြင်းခေါင်းစဉ်ဖြင့် Technical Session ကို ဆက်လက်ဆောင်ရွက်ခဲ့ရာ အလုပ်ရုံဆွေးနွေးပွဲသို့ တက်ရောက်လာ ကြသည့် သက်ဆိုင်ရာဌာန၊ အဖွဲ့အစည်း များမှ ကိုယ်စားလှယ်များနှင့် MSEMs လုပ်ငန်းရှင်များက စားပွဲဝိုင်းအုပ်စုအလိုက် ဆွေးနွေးခြင်းများဆောင်ရွက်ခြင်း၊ ဖိလစ်ပိုင်နိုင်ငံ၊ စိုက်ပျိုးရေးနှင့်အစား အစာသိပ္ပံဌာနမှ တွဲဖက်ပါမောက္ခ Dr. Justine Bennette H. Millado က GAP Re-Tooling & ကောင်းမွန်သော စိုက်ပျိုးရေးဆိုင်ရာ အလေ့အကျင့်များအား ပြန်လည်ချိန်ညှိမွမ်းမံခြင်း၊ အာဆီယံ စိုက်ပျိုးမှုဆိုင်ရာ အလေ့အကျင့်ကောင်းများနှင့် ဂျပန်နိုင်ငံ၏ ပိုးသတ်ဆေးထိန်းချုပ်မှုစနစ်များ အကြောင်း ရှင်းလင်းဆွေးနွေးခြင်းများကိုဆောင်ရွက်ခဲ့ပြီး Dr. Millado က Facilitator အဖြစ် ဦးဆောင်၍ Dr. Yoeun Sereyvath၊ Myat Taw Win Magway Co., Ltd. မှ မန်နေဂျင်းဒါရိုက်တာ ဦးမြင့်အောင်၊ Greenish Sagaing Region Co., Ltd. မှ CEO ဒေါ်စွမ်းရည်ဇော် တို့ပါဝင်သည့် Multi-Stakeholder Dialogue ကို ဆက်လက်ကျင်းပခဲ့ရာ တက်ရောက်လာကြသည့် ပဲတီစိမ်းတင်ပို့သူ များ၊ အဝယ်ဒိုင်များနှင့် တောင်သူများ၊ MSMEs လုပ်ငန်းရှင်များနှင့် စိုက်ပျိုးရေးဆေး တင်သွင်း ဖြန့်ဖြူး ရောင်းချသည့် ကုမ္ပဏီများမှ တာဝန်ရှိသူများက သိရှိလိုသည်များ မေးမြန်းခဲ့ကြကြောင်း သတင်းရရှိပါသည်။
