သတင်းနှင့် လှုပ်ရှားမှုများ

           ဟင်္သာတခရိုင်သည် နှစ်စဉ် မိုးစပါးစိုက်ဧက ၅၃၂၃၀၇ ၊နွေစပါးစိုက်ဧက ၃၈၈၈၀ နှင့် ပဲမျိုးစုံ စိုက်ဧက ၆၁၁၅၀၃ နှစ်စဉ်စိုက်ပျိုးလျက်ရှိပြီး၊ ပြည်တွင်းကုန်သွယ်မှုဖွံ့ဖြိုးရေးအနေဖြင့် ထွက်ရှိလာသော ဆန်၊ပဲမျိုးစုံတို့ကို ဒေသတွင်း စားသုံးမှု့ဖူလုံရုံသာမက ပိုလျှံသည့် ကုန်စည်များကိုလည်း နှစ်စဉ်တိုင်း/ပြည်နယ်များနှင့်ပြည်ပသို့ တင်ပို့လျက်ရှိနေပါသည်။

          ယခုနှစ်တွင် ဧရာဝတီတိုင်းဒေသကြီးအစိုးရအဖွဲ့လမ်းညွှန်ချက်နှင့်အညီ ပြည်ပသွင်းကုန် အစားထိုးသီးနှံများ စိုက်ပျိုးထုတ်လုပ်နိုင်ရေး ပြည်တွင်းစားသုံးဆီဖူလုံရေးနှင့် စားသုံးသူ ပြည်သူများ ဈေးနှုန်းသက်သာစွာ ဝယ်ယူစားသုံးနိုင်ရေးနှင့် ပြည်ပမှတင်သွင်းနေရသည့် စားသုံးဆီ တင်သွင်းမှု လျော့ကျစေရန်အတွက် ဆီထွက်သီးနှံနေကြာ တိုးချဲ့စိုက်ပျိုးလျက်ရှိရာ လာမည့်ဆောင်းရာသီတွင် စိုက်ပျိုးရန်မျိုးအတွက် မြန်အောင်မြို့နယ်တွင် မိုးနေကြာ ၁၃၀၀ဧက၊ ကြံခင်းမြိုနယ်တွင် ၁၀၀၀ဧက နှင့်အင်္ဂပူမြို့နယ်တွင် ၇၀၀ဧက စုစုပေါင်း ဧက ၃၀၀၀ ရာနှုန်းပြည့် စိုက်ပျိုး ပြီးစီးကြောင်း တိုင်းဒေသကြီးစိုက်ပျိုးရေးဦးစီးဌာနမှ သိရသည်။

DOCA(ဧရာဝတီ)

        ဖျာပုံမြို့နယ် ဈေးကွက်အတွင်း ပုဇွန်နှစ်ကောင်တံဆိပ်အပါအဝင် တရားမဝင်တင်သွင်းလာသောစားသုံးဆီများအား ရောင်းချနေနေင်းရှိ /မရှိ  မြို့နယ်အထွေထွေအုပ်ချုပ်ရေးဦးစီးဌာနမှဦးဆောင်၍ စားသုံးသူရေးရာ ဦးစီးဌာန၊စည်ပင်၊ ရဲတပ်ဖွဲ့၊ မီးသတ်တပ်ဖွဲ့များ ပူးပေါင်း၍(၂၂-၈-၂၀၂၂)ရက်နေ့၊ နေ့လယ်(၁၄:၀၀) နာရီမှ နေ့လယ် (၁၆:၀၀)နာရီထိ စားသုံးဆီအရောင်းဆိုင်များအား ကွင်းဆင်းစစ်ဆေးခဲ့ကြောင်းသိ ရသည်။

         အဆိုပါအရောင်းဆိုင်များအား စစ်ဆေးရာတွင်  ပုဇွန်နှစ်ကောင်တံဆိပ်ပါ စားသုံးဆီများ ရောင်းချခြင်းမတွေ့ရှိဘဲ    Goody ၊ Meizal  ၊ Zarman ၊ Lady’ s  Choice ၊ Lotus   အမှတ်တံဆိပ် နှင့်စားဆီပုံးများ ပဲနှမ်းဆီပေပါများကိုသာ  ဈေးကွက်အတွင်း စစ်ဆေးတွေ့ရှိသဖြင့် ပုဇွန်နှစ်ကောင် အမှတ်တံဆိပ်အပါအဝင် တရားမဝင်တင်သွင်းလာသော စားသုံးဆီများ ရောင်းချခြင်းမပြုရန်နှင့် ရောင်းချခြင်းတွေ့ရှိပါက အရေးယူဆောင်ရွက်သွားမည်ဖြစ်ကြောင်း အသိပညာပေးဆောင်ရွက်ခဲ့ကြောင်း သတင်းရရှိပါသည်။

DOCA(ဧရာဝတီ)

             ဧရာဝတီတိုင်းဒေသကြီး၊ စားသုံးသူရေးရာဦးစီးဌာန၊ မအူပင်ခရိုင်ဦးစီးမှူးရုံးမှ ခရိုင်ဦးစီးမှူးဦးဇော်မင်းနှင့် ဒု-ခရိုင်ဦးစီးမှူး ဦးအောင်ဇော်ဦးတို့သည် (၂၂.၈.၂၀၂၂) နေ့လယ် (၁၃:၀၀) နာရီအချိန်တွင် မအူပင်မြို့ပေါ်ရှိ စားအုန်းဆီ လက်လီ/ လက်ကားဖြန့်ဖြူးရောင်းချသောလုပ်ငန်းရှင်(၅)ဦးအား စားသုံးသူရေးရာဦးစီးဌာန၊ ခရိုင်ဦးစီးမှူးရုံးတွင် တွေ့ဆုံ၍ ဆွေးနွေးပွဲ ပြုလုပ်ခဲ့ပါသည်။

          အဆိုပါ စားအုန်းဆီ လက်လီ/လက်ကားရောင်းချသူ ဆီကုန်သည်များနှင့် တွေ့ဆုံဆွေးနွေးပွဲတွင် မအူပင်ခရိုင်ဦးစီးမှူး ဦးဇော်မင်းက စီးပွားရေးနှင့် ကူးသန်းရောင်းဝယ်ရေးဝန်ကြီးဌာနအနေဖြင့် တင်သွင်းလာသည့် စားသုံးဆီများ အရည်အသွေးပြည့်မီရေးနှင့် ပြည်သူများ ကျန်းမာရေးနှင့် ညီညွတ်ပြီး ဘေးအန္တရာယ်ကင်းရှင်းသည့် စားသုံးဆီများသုံးစွဲနိုင်ရေးအတွက် သယ်ယူ၊ သိုလှောင်၊ ဖြန့်ဖြူးရာတွင် Good Grade ပေပါများ၊ Trankများ အသုံးပြုရေး စားသုံးသူရေးရာဦးစီးဌာန၊ (ရုံးချုပ်)၏ ညွှန်ကြားချက်များကို ရှင်းလင်းဆွေးနွေးခဲ့ပြီး ကုမ္ပဏီများမှ ဖြန့်ဖြူးသော စားအုန်းဆီလက်ခံရရှမှု အခြေအနေ၊ ရည်ညွှန်းဈေးဖြင့် ပြန်လည်ရောင်းချမှု အခြေအနေနှင့် သယ်ယူမှုအခြေအနေများကို အပြန်အလှန် ဆွေးနွေးခဲ့ကြောင်း သတင်းရရှိပါသည်။

DOCA(ဧရာဝတီ)

         ဧရာဝတီတိုင်းဒေသကြီးသည် လယ်ယာစိုက်ပျိုးရေးကဏ္ဍတွင် ဆန်/စပါး အများဆုံး စိုက်ပျိုး ထုတ်လုပ်လျှက်ရှိသော တိုင်းကြီးတစ်ခုဖြစ်သည့် အပြင် မွေးမြူရေးကဏ္ဍမှာလည်း ပြည်တွင်း စားသုံးမှု့ဖူလုံစေရန် သာမက ပိုလျှံသည့် ရေထွက်ပစ္စည်းများကို နှစ်စဉ်ပြည်ပသို့ တင်ပို့၍ ပြည်ပဝင် ငွေရှာဖွေပေးနေသော စီးပွားရေးလုပ်ငန်းတစ်ခု အဖြစ် လုပ်ကိုင်လျှက်ရှိပြီး ပုသိမ်ခရိုင်၊မအူပင်ခရိုင်၊ လပွတ္တာခရိုင်နှင့် ဖျာပုံခရိုင်အတွင်း မြို့နယ်များရှိ ပင်လယ်နှင့် နီးကပ်လျှက်ရှိသော မြို့နယ်ကျေးရွာများတွင် အဓိကမွေးမြူလျက်ရှိသော ကျားပုဇွန်၊ ရေငန် ပုဇွန်၊ရေချိုပုဇွန်ထုပ်၊ ရေချိုပုဇွန်ထုပ်ကြီး၊ ပုဇွန်မီးနီနှင့် လပွတ္တာမြို့နယ်တွင် ရွံ့ဂဏန်းများ မွေးမြူလျက်ရှိကြောင်း တိုင်းဒေသကြီး ငါးလုပ်ငန်း ဦးစီးဌာနမှ သိရသည်။

       ဧရာဝတီတိုင်းဒေသကြီးအတွင်း ၂၀၂၂-၂၀၂၃ဘဏ္ဍာနှစ်မှာ ကုမ္ပဏီ/လုပ်ငန်းရှင် ၃၁၁ ဦးမှ ကန်အရေအတွက် ၁၂၃၅ကန်နှင့် ဧရိယာ ၁၆၈၀၁ .၇၅ဧကတွင် ပုဇွန်အ‌ကောင်ရေ ၁၃၆၅၈၉၇၉၈ နှင့် ကုမ္ပဏီ/လုပ်ငန်းရှင် ၁၈ ဦးမှ ကန်အရေအတွက် ၆၇ ကန်နှင့် ဧရိယာ ၅၀၈ .၇၁ ဧကတွင် ရွှံဂဏန်း အကောင်ရေ ၁၁၈၈၂၀၀၀ မွေးမြူထားရှိကြောင်း အဆိုပါရုံးမှ သိရသည်။

        ၂၀၂၂ခုနှစ် ဇူလိုင်လအတွင်း ဧရာဝတီတိုင်းဒေသကြီးမှ ပြည်တွင်းဈေးကွက် ရန်ကုန်သို့ ငါးမြစ်ချင်း ၂၅၅၉၆၈ ပိဿာ၊ ပြည်ပသို့ ၁၃၄၇၂ ပိဿာ၊ ရန်ကုန်သို့ ငါးတန်၁၂၇၉၈၄ ပိဿာ၊ ပြည်ပ သို့ ၆၇၃၆ ပိဿာ၊ ရန်ကုန်သို့ ဂဏန်း ၆၆၂၆၂ ပိဿာ၊ ပြည်ပသို့ ၃၄၈၇ ပိဿာ၊ရန်ကုန်သို့ ပုဇွန်(ရေချို) ၆၀၂၃၅ ပိဿာ၊ ပြည်ပသို့ ၃၁၇၀ ပိဿာ ရန်ကုန်သို့ပုဇွန်(ရေငန်) ၁၃၀၁၁၈ ပိဿာ၊ ပြည်ပသို့ ၁၅၈၅ပိဿာ တင်ပို့နိုင်ခဲ့ကြောင်း တိုင်းဒေသကြီး ငါးလုပ်ငန်းဦးစီးဌာနမှ သိရသည်။

DOCA(ဧရာဝတီ)

           ရခိုင်ပြည်နယ်၊စားသုံးသူရေးရာဦးစီးဌာန၊ ဂွမြို့နယ်မှ ဦးဇော်လေးနိုင်(ဒု-ကြီးကြပ်ရေးမှူး) နှင့် ဝန်ထမ်းများသည် (၂၂-၈-၂၀၂၂)ရက်နေ့၊ နေ့လည်(၁:၀၀)နာရီအချိန်တွင် ပြန်ကြားရေးနှင့် ပြည်သူဆက်ဆံရေးဦးစီးဌာနရုံးတွင် မူးယစ်ဆေးဝါးနှင့်ပတ်သက်သည့် ဟောပြောပွဲသို့ တက်ရောက် ၍ စားသုံးသူကာကွယ်ရေး အသိပညာပေးဟောပြောခဲ့ပါသည်။

          အဆိုပါ ဟောပြောပွဲတွင် ဦးဇော်လေးနိုင်(ဒု-ကြီးကြပ်ရေးမှူး)မှ စားသုံးသူကာကွယ်ရေး ဉပဒေပါ အခန်း(၉)၊ ပုဒ်မ(၁၉)နှင့် ပုဒ်မ(၂၀)တို့တွင်ပါဝင်သည့် စားသုံးသူအခွင့်အရေးနှင့် တာဝန်များ အား ချပြဆွေးနွေးပြီး ဉပဒေအခန်း(၁၈)၊ ပုဒ်မ(၄၁)နှင့်(၄၃)အရ ကုန်အညွှန်းအမှတ်အသား ဖော်ပြရာတွင် မြန်မာဘာသာဖြင့်ဖော်ပြထားပြီး ထုတ်လုပ်သည့်ရက်စွဲ၊ သက်တမ်းကုန်ဆုံးသည့် ရက်စွဲ ဖော်ပြပါရှိသော မုန့်ပဲသရေစာများကိုသာ ရွေးချယ်ဝယ်ယူစားသုံးကြရန်နှင့် ရေခဲထုပ်၊ အချိုရည်၊ ဂျယ်လီ၊ သကြားလုံးစသည့် အချိုလွန်မုန့်ပဲသရေစာများကြောင့် ချောင်းဆိုး၊ ရင်ကြပ်၊ သွားနာ၊သွားကိုက်၊ သွားပိုးစားခြင်းစသည့် လတ်တလောရောဂါများဖြစ်ပွားနိုင်၍ ရှောင်ကြည်ကြရန် လိုအပ်ပါကြောင်းစသည့်ဖြင့် အသေးစိတ်ဟောပြောဆွေးနွေးပြီး လက်ကမ်းစာစောင်များ ဖြန့်ဝေ ပေးအပ်ခဲ့ပါကြောင်း သတင်းရရှိပါသည်။

DOCA(ရခိုင်)