ပြည်တွင်းကုန်သွယ်မှုသတင်း

ပြည်ဈေးကွက်တွင် ယခုအချိန်တွင် ဒညင်းသီးများကို မော်မြိုင်နှင့် ဒူယားဘက်မှ ဒညင်းသီးများ အဝင်လှိုင်လာသဖြင့် ဈေးနှုန်းများမှာ ယခင်ပေါ်စဈေးနှုန်းများနှင့်ယှဉ်လျှင် ဈေးများ ကျဆင်းလာခဲ့ပါသည်။ ဒညင်းသီးကို လူအများကြိုက်နှစ်သက် ကြသော်လည်း တန်ဆေးလွန်ဘေးဆိုသည့်အတိုင်း အနည်းငယ်သာ စားသုံးသင့်ပါသည်။

ဒညင်းသီးသည် ရာသီပေါ်သီးနှံဖြစ်သည့်အတွက် လူအများ နှစ်သက်ကြသော်လည်း သွေးတိုး၊ ကျောက်ကပ်သမားများ အလွန့်အကျွံ့မစားသင့်ပါ။  ဈေးကွက်တွင် ရောင်းချသော ဒညင်းသီးဈေးနှုန်းများမှာ အလုံး အကြီး/အသေး အပေါ်မူတည်၍ ဈေနှုန်းများ ကွာခြားပါသည်။ ဒညင်းသီးအချော တစ်လုံးလျှင် (၁၀၀-၁၅၀)ကျပ်၊ အလတ်တစ်လုံးလျှင် (၈၀-၁၀၀)ကျပ်နှင့် အသေးတစ်လုံးလျှင် (၃၀-၆၀) ကျပ်ဖြင့် အရောင်းအဝယ်ဖြစ်လျက်ရှိပါကြောင်း သိရှိရသည်။

DOCA (ပဲခူး)

     မြန်မာနိုင်ငံအလယ်ပိုင်းဖြစ်သည့် မကွေးတိုင်းဒေသကြီး၏ နွေရာသီအချိန်အခါတွင် ချွေးထွက်လွန်ခြင်း၊ ခြေကုန်လက်ပန်းကျခြင်း၊ နေရထိုင်ရငြီးစီစီဖြစ်ခြင်းစသည်တို့ကို ခံစားနေရသည်မှာ လူတိုင်း နီးပါးပင်ဖြစ်သည်။ ဤကာလအတွင်း စိတ်လက်တက်ကြွရွှင်လန်းစေရန် လိုအပ်သောအရာမှာ ရေဓါတ်ပြည့်ဝရန်သာဖြစ်သည်။ သို့ဖြစ်ပါ၍ အညာနွေနေပူပူတွင် ရေဓါတ်ဖြည့်တင်းနိုင်သည့်အပြင် ရင်ကို အေးမြသွားစေနိုင်သော သောက်စရာတစ်မျိုးမျိုးကို လူတိုင်းတောင့်တကြလိမ့်မည်ဟူသော ယူဆချက်မှာ လွဲမှားမည်မထင်ပေ။ ထိုကဲ့သို့သော သောက်သုံးစရာများထဲမှ ကျန်းမာရေးနှင့် ညီညွတ်သည့် သဘာဝ၏ လက်ဆောင်မွန်တစ်ခုဖြစ်သော ကြံရည်သည်လည်း တစ်ခုအပါအဝင်ဖြစ်ပေသည်။

    ကြံရည်သည် ခန္ဓာကိုယ်အား အပူဒဏ်မှ ကာကွယ်ပေးနိုင်သည့် သောက်သုံးစရာတစ်မျိုး ဖြစ် သည်။ နွေရာသီတွင် လိုအပ်သော ခန္ဓာကိုယ်အားအင်များကို ဖြည့်တင်းပေးသည့်အပြင် ကိုယ်တွင်းရေ ဓါတ်ခမ်းခြောက်ခြင်းမှလည်း ကာကွယ်ပေးပါသည်။ ကျောက်ကပ်ကျန်းမာရေးကို အထောက်အကူဖြစ် ခြင်း၊ ကိုယ်တွင်းအပုပ်အညစ်များကိုကျစေခြင်း၊ ဖျားနာနေမကောင်းဖြစ်ချိန်တွင် ပျောက်ဆုံးသွားသော ပရိုတိန်းဓါတ်နှင့် သကြားဓါတ်များကို ပြန်လည်ဖြည့်တင်းပေးခြင်း၊ အသားအရေအတွက် မရှိမဖြစ် လိုအပ်သောရေဓါတ်ကို ဖြည့်တင်းပေးခြင်း၊ အသားဝါရောဂါဖြစ်ခြင်းမှ ကာကွယ်ပေးခြင်းတို့အပြင် ကယ်လ်စီယမ်၊ ပိုတက်စီယမ်၊ သံဓါတ်၊ ဗီတာမင်ဓါတ်၊ အမျှင်ဓါတ်၊ ပရိုတိန်းဓါတ်၊ သကြားဓါတ်စသည့် ဓါတ်သတ္တိများစွာပါဝင်သည့်အတွက် အညာနွေနှင့် သကာကြံရည်မှာ ဘက်ညီလွန်းလှသည်။

   မကွေးတိုင်းဒေသကြီးအတွင်းရှိ ခရိုင်/ မြို့နယ်များတွင်လည်း ကြံပင်များကို စမ်းသပ်စိုက်ပျိုး အောင်မြင်ဖြစ်ထွန်းလျက်ရှိပါသည်။ စိုက်ပျိုးရေးဦးစီးဌာန၊ သကြားထွက်သီးနှံဌာနခွဲ(ရုံးချုပ်) အနေဖြင့် လည်း တိုင်းဒေသကြီး/ ပြည်နယ်များတွင် ကြံသီးနှံစိုက်ဧကနှင့် အထွက်နှုန်းတိုးတက်ရေး တို့အတွက် နည်းပညာပေးလုပ်ငန်းများကို ဆောင်ရွက်လျက်ရှိပါသည်။ ကြံသီးနှံသည် စိုက်ပျိုးပြီး (၉)လ သက်တမ်းရှိပါက ခုတ်ရောင်း၍ရသည့် အနေအထားမျိုးဖြစ်သည်။ ကြံသီးနှံစိုက်ပျိုးရာတွင် အရင်းအနှီး အလွန်နည်းသောကြောင့် စိုက်ပျိုးစရိတ်အကုန်အကျလည်း များစွာသက်သာနိုင်ပါသည်။ ရောင်းချသည့်အချိန်တွင်လည်း ကြံရည်ဆိုင်များနှင့် လက်လီရောင်းချသည့် ဈေးသည်များက စိုက်ခင်းသို့ လာရောက်ဝယ်ယူကြသောကြောင့် ဈေးကွက်စနစ်အခက်အခဲနည်းပါးသည်။ ကြံခင်းအား ခုတ်ရောင်းပြီးပါကလည်း ကြံငုတ်မှ ထွက်ရှိသည့် ကြံအတက်များသည် ပျိုးပင်အဖြစ် ထပ်မံရောင်းချ၍ရသောကြောင့် ကြံသီးနှံစိုက်ပျိုးသူ တောင်သူများသည် နှစ်သီးစားဝင်ငွေရရှိသူများပင် ဖြစ်ပေသည်။

    ကြံစည်းများကို (၁၀)ချောင်းစည်း တစ်စည်းလျှင် ယခင်ပေါ်ဦးပေါ်ဖျားနှုန်းထားမှာ ကျပ်(၄၀၀၀-၄၅၀၀)နှုန်း ဈေးပေးရသော်လည်း ယခုအခါကျပ်(၈၅၀၀-၉၀၀၀)ဈေးနှုန်းဖြင့် ဝယ်ယူကြရပြီး ပြန်လည်ရောင်းချရာတွင် ကြံရည်တစ်ခွက်လျှင် (၅၀၀-၆၀၀-၇၀၀)ကျပ်နှုန်းဈေးရရှိကြောင်း ကြံရည် ရောင်းချ သူများထံမှ သိရှိရပါသည်။ ထို့ကြောင့် ကြံသီးနှံသည် စိုက်ပျိုးသူရော ပြန်လည်ရောင်းချသူတို့အနေဖြင့် ပါ တွက်ခြေကိုက်သည့်အပြင် နွေနေပူပူတွင် စိတ်ရောကိုယ်ပါ ရွှင်လန်းတက်ကြွစေနိုင်ဖို့ရန် ဈေးနှုန်းသင့်တင့်သည့် ကြံရည်ချိုသည် သောက်သုံးသူများအတွက်ပါ တွက်ခြေကိုက်သည့် သဘာဝ၏ လက်ဆောင်မွန် ဖျော်ရည်တစ်ခွက်ပင်ဖြစ်ပါကြောင်း ရေးသားတင်ပြလိုက်ရပါသည်။

DOCA(မကွေး)

ယခုရာသီတွင် ပြည်မြို့ Electronic ဈေးကွက်၌ လေအးပေးစက်အမျိုးမျိုး၊ ပန်ကာအမျိုးမျိုး အရောင်းအဝယ်သွက်နေခဲ့ကြောင်း လေ့လာသိရှိရပါသည်။

လူတန်းစားအလွှာအလိုက် ငွေကြေးသုံးစွဲနိုင်မှုအပေါ်မူတည်၍ ဝယ်ယူသုံးစွဲမှု ကွာခြားကြပါသည်။ လေအေးပေးစက်များထက် ပန်ကာမျိုးစုံ ပိုရောင်းဝယ်မှုဖြစ်ကြပါသည်။ ပန်ကာများထဲမှာ အားသွင်းပန်ကာများက ပိုအရောင်းအဝယ် ဖြစ်ကြပါသည်။

ပန်ကာအမျိုးအစား အလိုက် Stand Fan များကလည်း ထုတ်လုပ်သည့် နိုင်ငံအလိုက် ကျပ်သောင်းဂဏန်းမှ သိန်းဂဏန်း အထက် ဈေးကွားခြားမှုရှိကြပြီး AC/ DC/ USB, Power Bankနှင့် တွဲသုံးရသော ပန်ကာများတွင် Portable Fan 6" တစ်လုံး 13500 ကျပ်၊ 10" တစ်လုံး ၃၃၀၀၀ ကျပ်မှစ၍ သိန်းဂဏန်းအထိ အရွယ်အစားအလိုက် ဈေးနှုန်းကွာခြားကြသလို Rechargeable  Power Bank Fan 7" တစ်လုံး  22000 ကျပ်၊ 6" တစ်လုံး 18500 ကျပ်၊ မှ 19500 ကျပ်အထိ Mini Fan 3.5" တစ်လုံး ၈၅၀၀ ကျပ်မှ ၁၁၀၀၀ ကျပ်ဖြင့် ပစ္စည်းအမျိုးအစား Quality အပေါ် မူတည်၍  ဈေးနှုန်းများကွာခြားလျက်ရှိကြကာ အလွယ်တကူ သယ်ဆောင်သွားနိုင်သော အားသွင်းပန်ကာလေးများ ပိုအရောင်းအဝယ်သွက်လျက်ရှိကြောင်း သိရပါသည်။

DOCA (ပဲခူး)

တောင်ငူမြို့သို့ ဒေသအသီးသီးမှ ရာသီအလိုက်သီးနှံများ တင်ပို့ရောင်းချလျက်ရှိရာ ပေါ်ဦးပေါ်ဖျားတွင် ဈေးကောင်းရသော်လည်း နောက်ပိုင်းလှိုင်လှိုင်ပေါ်လာပါက ဈေးနှုန်းကျဆင်းလာပါသည်။

ယခုအခါ ဈေးကွက်အတွင်း ဒူးရင်းသီးဈေးနှုန်းများမှာ ရှယ်သီးမှာ တစ်လုံးလျှင် ၁၀၀၀၀ ကျပ်မှ ၁၂၀၀၀ ကျပ်အထိရှိပါသည်။အပင်မှခူးဆွတ်ထားသည့် သာမန်အသီးမှာ အကြီးတစ်လုံးလျှင် ၆၅၀၀ ကျပ်မှ ၇၅၀၀ ကျပ်အထိ၊ အလတ်တစ်လုံးလျှင် ၄၅၀၀ ကျပ်မှ ၅၅၀၀ ကျပ်နှင့် အသေး တစ်လုံးလျှင် ၂၅၀၀ ကျပ်မှ ၃၅၀၀ ကျပ်အထိ ရှိပါသည်။အပင်မှ ကြွေကျသည့်အသီးမှာ အလုံးအလတ် (၃)လုံးလျှင် ၁၀၀၀၀ ကျပ်၊ အလုံးသေး (၂)လုံးလျှင် ၅၀၀၀ ကျပ်ရှိပါသည်။

လိုင်ချီးသီး(ခေါ်)နှင်းသီးမှာ ယခုအခါ အထုပ်အကြီးတစ်ထုပ်လျှင် ၂၅၀၀ ကျပ်မှ ၃၅၀၀ ကျပ်အထိရှိကြောင်း သိရပါသည်။

DOCA (ပဲခူး)

တောင်ငူခရိုင်တွင် တောင်ငူ၊ ရေတာရှည်၊ ထန်းတပင်၊ အုတ်တွင်းနှင့် ဖြူးမြို့နယ်များရှိ ပါသည်။ ယင်းမြို့နယ်များတွင် မတ်ပဲ၊ ပဲတီစိမ်းနှင့် ပဲလွန်းဖြူများကို အများဆုံးလျှက်ရှိရာ တောင်ငူ ခရိုင်တစ်ခုလုံးအနေဖြင့် မတ်ပဲ ၂၁၄၉၂၁ ဧက၊ ပဲတီစိမ်း ၄၅၀၅၅ ဧကနှင့် ပဲလွန်းဖြူ ၉၈၅၄ ဧက စိုက်ပျိုးထားရှိပါသည်။

သက်ဆိုင်ရာဌာနများ၏ မှတ်တမ်းများအရ မတ်ပဲ တစ်ဧကအထွက်နှုန်းမှာ ၁၂.၅၀ တင်း၊ ပဲတီစိမ်း ၁၄.၄၉ တင်းနှင့် ပဲလွန်းဖြူ ၁၄.၅၆ တင်းရှိကြောင်းသိရပါသည်။ တောင်ငူခရိုင်တွင် လူဦးရေ ၁၀၅၆၈၀၀ ဦးကျော်ကျော်ရှိရာ လက်ရှိအထွက်နှုန်းအရ မျိုး၊ အလေအလွင့်နှင့် ဒေသတွင်းစားသုံးမှုများကို ချန်လှပ်လျှင် မတ်ပဲ ၈၁၈၀၀ တန်၊ ပဲတီစိမ်း ၁၇၈၀၀ တန်နှင့် ပဲလွန်းဖြူ ၄၀၀၀ တန်ခန့် ပိုလျှံမည် ဖြစ်ပါသည်။

တောင်ငူမြို့၏ လက်ရှိဒေသပေါက်ဈေးမှာ မတ်ပဲ (တစ်တင်းခွဲအိတ်)တစ်အိတ်လျှင် ၁၀၉၀၀၀ ကျပ်၊ ပဲတီစိမ်း (တစ်တင်းခွဲအိတ်)တစ်အိတ်လျှင် ၈၅၀၀၀ ကျပ်နှင့် ပဲလွန်းဖြူ (တစ်တင်းခွဲ အိတ်)တစ်အိတ်လျှင် ၆၇၀၀၀ ကျပ်ရှိပါသည်။တောင်သူအများစုမှာ ထွက်ရှိသော ပဲများကို နီးစပ်ရာမြို့များရှိ ပွဲရုံများသို့ ရောင်းချပြီး တောင်သူလယ်သမားကြီးအချို့မှာ ထွက်ရှိသောပဲများကို ခေတ္တသိုလှောင်၍ ဈေးမြင့်တက်သည့် အချိန်ကျမှ မြို့ကြီးများရှိ ပွဲရုံကြီးများသို့ တိုက်ရိုက်ရောင်းချကြောင်း၊ ပွဲရုံကြီးများမှ ပဲများကို သန့်စင်ပြီး ရန်ကုန်မြို့သို့ တင်ပို့ရောင်းချကြောင်း သိရပါသည်။

DOCA (ပဲခူး)