ပြည်တွင်းကုန်သွယ်မှုသတင်း

    ကင်းမွန်များကို ပင်လယ်ကမ်းရိုးတန်းဒေသဖြစ်သော တနင်္သာရီတိုင်းဒေသကြီး၊ မြိတ်ခရိုင်တွင် မီးထွန်းထားသော ကင်းမွန်ဖမ်းလှေများဖြင့် ဖမ်းယူကြလေ့ရှိကြပြီး ကင်းမွန်ကိုရေခဲရိုက်၍ လည်းကောင်း အခြောက်လှန်း၍လည်းကောင်း ပြည်တွင်း/ပြည်ပနိုင်ငံများသို့ တင်ပို့ရောင်းချလျက်ရှိ ကြကြောင်း သိရှိရပါသည်။ ကင်းမွန်ခြောက်ပြုလုပ်ရာတွင် သဘာဝအလျောက်အနေဖြင့် အခြောက် လှန်းခြင်းနှင့် ပြုတ်၍အခြောက်ပြုလုပ်ခြင်းဟူ၍ (၂)မျိူးရှိကြပြီး သဘာဝအနေဖြင့် အခြောက်ပြုလုပ် ထားသော ကင်းမွန်ခြောက်များ ပြုလုပ်ရောင်းချကြကြောင်း သိရှိရပြီး ဝယ်ယူသူများများပြားကြောင်းလည်း သိရှိရပါသည်။ ကင်းမွန်ခြောက်များထဲမှ ကင်းမွန်ခြောက် အငယ်များကို သနပ်နှင့် အကြောက်အလှော်များတွင် ဈေးသက်သာသောကြောင့် သုံးစွဲလျက်ရှိကြောင်း သိရှိရပါသည်။ 

    ၂၀၂၅ခုနှစ်၊ ဇူလိုင်လတတိယပတ်တွင် မြိတ်မြို့ပေါ်ရှိ ကင်းမွန်ခြောက်အငယ်ဈေးနှုန်းများမှာ နို့စည်ဗူး တစ်ဗူးလျှင် (၅၀၀၀)ကျပ်ဖြင့်ရောင်းချလျက်ရှိကြောင်း သိရှိရပါသည်။

DOCA(တနင်္သာရီ)

     ကွမ်းရွက်သည် ဆေးဖက်ဝင်ပစ္စည်းတစ်မျိုးဖြစ်သည့်အပြင် မြန်မာလူမျိုးများ အများဆုံး စားသုံးကြသည့် ကွမ်းယာတွင်မပါမဖြစ်သော အဓိကပါဝင်ပစ္စည်းတစ်မျိုးဖြစ်သည်။ ကွမ်းရွက်ကို မိုးကာလတွင် အများဆုံးစိုက်ပျိုးကြပြီး မိုးနှင့် ဆောင်းကာလများတွင် ဈေးကောင်းရရှိကြောင်း သိရှိရပါသည်။

    ယခု၂၀၂၅ခုနှစ်၊ ဇူလိုင်လတတိယပတ်တွင် ကွမ်းရွက်အချောတစ်စည်းလျှင် (၁၁၀၀)ကျပ်ရှိ ပြီး ကွမ်းရွက်အကြမ်းတစ်စည်းလျှင် (၈၀၀)ကျပ်ရှိကြောင်း ကွမ်းရွက်ရောင်းချသူများထံမှ သိရှိရပါသည်။

DOCA(တနင်္သာရီ)

    တနင်္သာရီတိုင်းဒေသကြီး၊ မြိတ်မြို့နယ်တွင် ယခုဇူလိုင်လ၌ အိမ်ဆောက်ပစ္စည်းများ အရောင်း အဝယ်ကောင်းလျက်ရှိပါသည်။ အိမ်ဆောက်ပစ္စည်းများထဲမှ ဘိလပ်မြေသည်မရှိမဖြစ်သော အရာ ဖြစ်သည်။ ဘိလပ်မြေများကို ပြည်တွင်းဘိလပ်မြေစက်ရုံများမှ ဝယ်ယူသုံးစွဲကြသည့်အပြင် ပြည်ပ ဘိလပ်မြေများကိုလည်း ဝယ်ယူသုံးစွဲကြောင်းသိရှိရပါသည်။ ယခုမြိတ်မြို့ပေါ်တွင် ဘိလပ်မြေ ဈေးနှုန်းများ အရောင်းနည်းနေကြောင်း သိရှိရပါသည်။

     မြိတ်ခရိုင် မြိတ်မြို့နယ်တွင် ရောင်းချနေသောဘိလပ်မြေများဖြစ်သည့်  ဆင်နီ တစ်အိတ်လျှင်  (၃၂၀၀)ကျပ်၊ ကြံ့တစ်အိတ်လျှင် (၂၉၀၀၀)ကျပ်၊ Apacheတစ်အိတ်လျှင် (၂၉၀၀၀)ကျပ်ရှိကြောင်း သိရပါသည်။

DOCA(တနင်္သာရီ)

   စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့နယ်အတွင်းရှိ ကျေးရွာများ နှင့် ကျွန်းလှမြို့ပေါ်ရပ်ကွက်များတွင် စိုက်ပျိုးရေးလုပ်ငန်းများကို လုပ်ကိုင်စားသောက်ကြရာမှာ စားဖိုဆောင် သီးနှံ ဖြစ်သည့် ခရမ်းသီးများကိုလည်း တစ်ပိုင်တစ်နိုင် စိုက်ပျိုးလျက်ရှိကြောင်းသိရသည်။

 ခရမ်းသီးမှာဆိုရင် ဗီတာမင်တွေ အဟာရဓါတ်တွေနဲ့အမျှင်ဓါတ်တို့ အပြည့်အဝပါဝင်ပြီး ခရမ်းသီး က နှလုံး၊ ဦးနှောက်၊ အရေပြားနှင့်အရိုးကို အကျိုးပြုတဲ့အပြင် အစာချေစနစ်ကိုကောင်းမွန်စေပြီး ဆီးချို ရောဂါကိုပါ ထိန်းနိုင်တဲ့အစွမ်းရှိတယ်လို့ သိရသည်။ သူ့ရဲ့ကောင်းကျိုးကတော့ အဆီဓါတ် မပါရှိတာပဲ ဖြစ်ပါသည်။ မီးဖုတ်စာတာပဲဖြစ်ဖြစ်၊ ဟင်းချက်စားတာပဲဖြစ်ဖြစ် မျိုးစုံသုံးလို့ရသလို ခရမ်းသီးဟာ အဆီချ အသားကျစ်လျစ်ဖို့အတွက်လည်း အသုံးဝင်တာဖြစ်သည့်အတွက် စားသင့်သော အသီးတစ်မျိုး ဖြစ်ကြောင်း သိရသည်။

     ၂၀၂၅ ခုနှစ်၊ ဇူလိုင်လ စတုထ္ထပတ်အတွင်း ဖြစ်ပေါ်နေသော ကျွန်းလှမြို့၏ ခရမ်းသီးဈေးနှုန်း အနေဖြင့် ခရမ်းသီး လက္ကား တစ်ပိဿာလျှင်(၂၀၀၀)ကျပ်၊ ခရမ်းသီး လက်လီ တစ်ပိဿာလျှင် (၂၄၀၀)ကျပ်၊ (၅၀)ကျပ်သားလျှင် (၁၂၀၀)ကျပ်နှင့် (၂၅)ကျပ်သားလျှင်(၆၀၀) ကျပ်ဈေးနှုန်းတို့ဖြင့် ရောင်းချလျက်ရှိကြောင်း ကျွန်းလှမြို့၊ သစ်ရာမြိုင်ဈေး၌ ကုန်စိမ်းသီးနှံမျိုးစုံ  ရောင်းချနေသော ဈေးသည် တစ်ဦး ထံမှ သိရသည်။

DOCA(စစ်ကိုင်း)

 စစ်ကိုင်းတိုင်းဒေသကြီး၊ ကန့်ဘလူခရိုင်၊ ကျွန်းလှမြို့နယ်အတွင်းရှိ ကျေးရွာများ နှင့် ကျွန်းလှမြို့ပေါ်ရပ်ကွက်များတွင် စိုက်ပျိုးရေးလုပ်ငန်းများကို လုပ်ကိုင်စားသောက်ကြရာမှာ နှစ်ရှည်ပင် ဖြစ်သည့် ကြောင်လျှာသီးပင်ကိုလည်း တစ်ပိုင်တစ်နိုင် စိုက်ပျိုးလျက်ရှိကြောင်းသိရသည်။ 

  ခါးသက်သက်အရသာရှိတဲ့ကြောင်လျှာသီးမှာဆိုရင် ဘက်တီးတီးယားတွေကို တိုက်ဖျက်ပေးခြင်း၊ ဓါတ်တိုးဆန့်ကျင်အာနိသင်ရှိခြင်း၊ ရောင်ရမ်းမှုကို သက်သာစေခြင်း၊ ကျောက်ကပ်နှင့်အသည်း ကျန်းမာ စေခြင်း၊ ဆီးချို သက်သာစေခြင်း နှင့် ကိုယ်ခံအားကောင်းစေခြင်း စသည့်  ကြောင်လျှာသီးမှာလည်း ဆေးဘက်ဝင်မှုတွေရှိကြောင်း သိရသည်။

      ၂၀၂၅ ခုနှစ်၊ ဇူလိုင်လ စတုထ္ထပတ်အတွင်း ဖြစ်ပေါ်နေသော ကျွန်းလှမြို့ သစ်ရာမြိုင်ဈေး၏ ကြောင်လျှာသီး ဈေးနှုန်းအနေဖြင့် ကြောင်လျှာသီး လက္ကားဈေး အကြီး တစ်တောင့်လျှင်(၁၅၀၀)ကျပ်၊ ကြောင်လျှာသီး လက်လီဈေး အကြီး တစ်တောင့်လျှင်(၁၈၀၀)ကျပ်၊ ကြောင်လျှာသီး လက္ကားဈေး အသေး တစ်တောင့်လျှင်(၁၀၀၀)ကျပ်၊ ကြောင်လျှာသီး လက်လီဈေး အသေး တစ်တောင့်လျှင်(၁၃၀၀)ကျပ်၊ ဈေးနှုန်းတို့ဖြင့် ရောင်းချလျက်ရှိကြောင်း ယခင်အပတ်များထက် ဈေးနှုန်းအနည်းငယ်ကျဆင်းလျက်ရှိပြီး အရောင်းအဝယ်ဖြစ်လျက်ရှိကြောင်း ကျွန်းလှမြို့၊ သစ်ရာမြိုင်ဈေး၌ ကုန်စိမ်းသီးနှံမျိုးစုံရောင်းချ နေသော ဈေးသည် တစ်ဦးထံမှ သိရသည်။

DOCA(စစ်ကိုင်း)