ပြည်တွင်းကုန်သွယ်မှုသတင်း

   ကရင်ပြည်နယ်၊ ဘားအံမြို့ရှိကျေးရွာများမှ ဒေသခံတောင်သူများသည် ဒန့်သလွန်ပင်များကို စားသုံးသီးနှံအဖြစ် အပိုဝင်ငွေရရှိရန်အတွက် အိမ်ခြံဝန်းများတွင် တစ်ပိုင်တစ်နိုင် စိုက်ပျိုးထားလျက်ရှိသည်။

    ဒန့်သလွန်သီးများမှ ဒီဇင်ဘာလမှ စတင်သီးနေပြီးဖြစ်သည့်အတွက် ယခုအချိန်တွင် ဈေးကွက်အတွင်း လှိုင်လှိုင်ပေါ်လာပြီပဲ ဖြစ်ပါသည်။

    ယခင်စပေါ်ချိန် ဒီဇင်ဘာလတွင် ဒန့်သလွန်သီး ဈေးနှုန်းများမှာ တစ်တောင့်လျှင်- ၂၅၀ ကျပ်၊  သုံးတောင့်စီး(၁)စီးလျှင်- ၇၀၀ ကျပ်နှုန်းဖြင့် ဈေးရောင်းရရှိခဲ့ပြီး ယခုဒန့်သလွန်သီး လှိုင်လှိုင်ပေါ်ချိန်တွင် သုံးတောင့်စီး(၁)စီးလျှင်- ၂၀၀ ကျပ်၊ (၂)စီးလျှင် ၅၀၀ ကျပ်နှုန်းဖြင့် ရောင်းချနေပြီး ဈေးနှုန်းများကျဆင်း လျက်ရှိကြောင်း သိရသည်။

     လှိုင်လှိုင်ပေါ်နေပြီဖြစ်၍ ဈေးများတွင် အလွယ်တကူဝယ်ယူရရှိနိုင်သည့် ဒန့်သလွန်သီးကို ငါးရံ့/ ငါးခြောက်/ကြက်ဥ/ဘဲဥတို့ဖြင့် တွဲဖက်၍သော်လည်းကောင်း၊ ပဲကုလားဟင်း၊ သီးစုံချဉ်ရည်ဟင်းအဖြစ်လည်းကောင်း၊ ဒန့်သလွန်သီးတောင့်ကို အစိမ်းလိုက်(သို့မဟုတ်)မီးကင်ပြီး အတွင်းသားနှင့် အစေ့တို့ကို ဇွန်းဖြင့်ခြစ်ကာ ကြက်ဥဖြင့် မွှေကြော်၍သော်လည်းကောင်း၊ ဘူးသီးနုနုဖြင့် ကြော်ချက်ဟင်းအဖြစ် လည်းကောင်း အမျိုးမျိုးပြုလုပ်၍ စားသုံးခြင်းဖြင့်  ထမင်းမြိန်စေပြီး  အလွန်စားကောင်းတဲ့သီးနှံတစ်မျိုးပင်ဖြစ်ကြောင်း သိရသည်။  

DOCA(ကရင်)

    မန္တလေးမြို့တွင်း ဇန်နဝါရီလဆန်းမှစ၍ ပွက်သားအသစ်များ လှိုင်လှိုင်ဝင်ရောက်လျက်ရှိရာ  မန္တလေးတိုင်းဒေသကြီး၊ မတ္တရာမြို့နှင့် ပြင်ဦးလွင်မြို့နယ်များမှထွက်ရှိသော ကြံများကို ဝေမာသကြားစက် နှင့် ငွေရည်ပုလဲသကြားစက်တို့မှ ဝယ်ယူကြောင်းသိရှိရပါသည်။ယခုနှစ်ကြံတစ်တန်လျှင် ၁၂၀၀၀၀ကျပ်မှ ၁၃၀၀၀၀ကျပ်ဈေးဖြင့် ဝယ်ယူပြီး စစ်ကိုင်းတိုင်းဒေသကြီးအတွင်းရှိ ရွှေဒါး၊ငအိုး၊ရွှေကူ၊တကောင်း၊  ကြာညှပ်၊ တွင်းငယ်ကျေးရွာတို့မှ ထွက်ရှိသည့်ကြံများကို ယခင်ကဂရိတ်ဝေါသကြားစက်သို့ တင်ပို့ရောင်းချသော်လည်း ယခုနှစ်တွင်မူ ကြံသယ်ယူရာတွင် လမ်းခရီးများခက်ခဲခြင်း၊စက်ရုံယာယီပိတ်ထားခြင်းကြောင့်  ထိုဒေသထွက်ရှိသည့်ကြံများကို ကြံစိုက်တောင်သူကိုယ်တိုင် ကြံကိုပွက်သားချက်၍ မန္တလေးမြို့ပေါ်ရှိ သကာရည်ပွဲရုံများသို့ တင်ပို့ရောင်းချကြပါသည်။ကြံထွက်ရာသီဖြစ်သောကြောင့် သကြားအသစ်နှင့် ခါသကြား၊ခါရည်အသစ်များ မထွက်ရှိဘဲ လက်ကျန်သကြားများသာ ရောင်းဝယ်လျက်ရှိပါသည်။မန္တလေးမြို့မှ ယခင်ကတရုတ်နိုင်ငံသို့ သကြားများ တင်ပို့မှုရှိသော်လည်း ယခုနှစ်တွင်မူ သွားလာရန်ခက်ခဲမှုများကြောင့်   သကြားတင်ပို့မှုအနည်းငယ်လျော့ကျမှုများရှိပြီး ပြည်တွင်းစားသုံးမှုအနေဖြင့် မုန့်မျိုးစုံလုပ်ငန်း၊နို့ချက် လုပ်ငန်း၊ အချိုရည်အမျိုးမျိုးလုပ်ငန်း၊အဖျော်ယမကာအမျိုးမျိုးလုပ်ငန်းတို့တွင် သကြားကို အများဆုံးအသုံးပြုကြပါသည်။

  ပွက်သားဈေးနှုန်းအနေဖြင့် ယခင်နှစ် ၂၀၂၃ခုနှစ်၊ ဇန်နဝါရီလ ဒုတိယအပတ်တွင် ၂၆၀၀ကျပ်သာ ရှိသော်လည်း ယခုနှစ် ၂၀၂၄ခုနှစ် ၊ ဇန်နဝါရီလ ဒုတိယပတ်တွင်  သကြားဈေးမှ၃၈၅၀အထိ မြင့်တက်လာရခြင်းမှာ သကြားလက်ကျန် နည်းပါးခြင်း သကြားအသစ်ထုတ်လုပ်မှုမရှိသေးခြင်း၊ သယ်ယူစရိတ် ကြီးမားခြင်း တို့ကြောင့် သကြားဈေးမှာ ယခင်နှစ်ထက်  မြင့်မားလာရခြင်း ဖြစ်ပါသည်။ ယခုနှစ် ၂၀၂၄ခုနှစ် ၊ထွက်ရှိမည့် သကြားသစ်များကို ဗီယက်နမ်နိုင်ငံသို့ ငွေရည်ပုလဲကုမ္မဏီနှင့် သန္တာဦးကုမ္မဏီနှစ်ခုတို့သာ သကြားတင်ပို့ခွင့်ရရှိထားပြီး သကြားတန်ချိန် တစ်သိန်းကျော်တင်ပို့ခွင့်ရရှိကြောင်း မြန်မာနိုင်ငံသကြားနှင့်ကြံထွက်ပစ္စည်းလုပ်ငန်းရှင်များအသင်းမှ သိရှိရပါသည်။ (၅)နှစ်တာ ကာလအတွင်း ပွက်သားအသစ်ဈေးနှုန်းများမှာ -

 မှတ်ချက်။၂၀၂၄ တွင်-  ခါသကြားနှင့်ခါရည်ဈေးနှုန်းမထည့်သွင်းထားခြင်းမှာ သကြားအသစ်ထွက်ရှိမှု မရှိသေးခြင်းကြောင့် ဖြစ်ပါသည်။

            မန္တလေးတိုင်းဒေသကြီးတွင် ကြံသီးနှံ တိုးချဲ့စိုက်ပျိုးရန်အတွက် စိုက်ပျိုးရေးဦးစီးဌာနမှလည်း ကြံတောင်သူများအား မျိုးကောင်းမျိုးသန်းများနှင့် နည်းပညာများ ဖြန့်ဝေပေးခဲ့ခြင်းများ ဆောင်ရွက်လျက်ရှိပြီး သကြားဈေးကွက်ပိုမိုဖွံ့ဖြိုးလာစေရေး အစိုးရ၊ ပုဂ္ဂလိကဘက်မှလည်း ဝိုင်းဝန်း ပူးပေါင်းဆောင်ရွက်သင့်ပါကြောင်း အကြံပြုရေးသားလိုက်ရပါသည်။

DOCA(မန္တလေး)

     မိတ္ထီလာခရိုင်တွင် ပဲမျိုးစုံသီးနှံများမှ ပြည်ပပို့ကုန်တစ်မျိုးဖြစ်သည့် ထောပတ်ပဲကို မိတ္ထီလာ၊ သာစည်၊ မလှိုင်မြို့နယ်များတွင် စိုက်ပျိုးကြပါသည်။ ၂၀၂၃ - ၂၀၂၄ ဘဏ္ဍာနှစ်တွင် ထောပတ်ပဲ စိုက် ဧက (၄၀၄၁) ဧကရှိပြီး ၊ မိတ္ထီလာခရိုင်တွင် ရာသီပေါ်စထောပတ်ပဲခေါ်ပဲလိပ်ပြာများ ဈေးကောင်းရ လျက်ရှိကြောင်း၊ ထောပတ်ပဲကို ပြည်တွင်း၌ ပဲကြမ်းကြော်ပြုလုပ်ခြင်း၊ ပြုတ်စားခြင်း၊ ပဲမုန့်နှင့်ပဲရေပွပြုလုပ်၍ စားသုံးကြပါသည်။ ထောပတ်ပဲစားသုံးခြင်းဖြင့် မဂ္ဂနီစီယမ်နှင့် ဖောလစ်အက်ဆစ်များပါဝင်၍ ကိုလက်စရောပါဝင်မှုနည်းသဖြင့်နှလုံးအတွက်ကောင်းမွန်ကြောင်း၊ အဆီပါဝင်သည့်ပဲဖြစ်သောကြောင့် စားသုံးသူ၌ ကိုယ်အလေးချိန်မတက်ခြင်း၊ လူတို့၏ ပရိုတိန်းဓါတ်ကို ကောင်းစွာဖြည့်ဆည်းပေးသဖြင့် ကျန်းမာရေးအတွက် အာဟာရရှိသော ပဲတစ်မျိုးဖြစ်ပါသည်။ ထောပတ်ပဲကို ဒီဇင်ဘာလ စတုတ္တပတ်မှ စတင်ပေါ်ပြီး ဇန်နဝါရီလလဆန်းပိုင်းတွင် လှိုင်လှိုင်ပေါ်ပြီး၊ ပွဲရုံများတွင် အရောင်းအဝယ်ဖြစ်လျက်ရှိပါသည်။ ထောပတ်ပဲအစို တစ်ပြည်လျှင် (၅၆၀၀) ကျပ် ဈေးရှိပြီး၊ ဒေသတွင်း စားသုံးမှုအဝယ်လိုက်သဖြင့် ဈေးကောင်းလျက်ရှိကြောင်း၊ လက်ရှိဈေးကွက်အတွင်း ထောပတ်ပဲတစ်တင်းလျှင် (၁၁၀၀၀၀) ကျပ်  ဈေးဖြင့်ရောင်းဝယ်လျက်ရှိကြောင်း၊ ယခင်နှစ် ထောပတ်ပဲရာသီပေါ်ချိန်တွင် ကျပ် (၁၀၀၀၀၀) ကျပ် ခန့်သာရှိကြောင်း၊ ယခင်နှစ်နှင့် ယခုနှစ်နှိုင်းယှဉ်လျှင် ထောပတ်ပဲတစ်တင်းကျပ် (၁၀၀၀၀) ကျပ်ခန့်မြှင့်တက်လာကြောင်း သိရှိရပါသည်။ ပြည်တွင်းဈေးကွက်အနေဖြင့် ရန်ကုန်နှင့်မန္တလေးမြို့များသို့ အဓိကတင်ပို့လျက်ရှိကြောင်း သိရပါသည်။

DOCA(မန္တလေး)

   တောင်ငူခရိုင်၊ ဆီကုန်သည်နှင့်ဆီလုပ်ငန်းရှင်များအသင်းသည် စားသုံးသူပြည်သူများ စားအုန်းဆီများကို သက်သာသောနှုန်းထားဖြင့် ဝယ်ယူရရှိနိုင်ရေးအတွက် မြို့ပေါ်ရပ်ကွက်များနှင့် ကျေးရွာများသို့အရောက် မော်တော်ယာဉ်များဖြင့် ပို့ဆောင်၍ရောင်းချပေးလျက်ရှိပါသည်။

     ထိုသို့ရောင်းချရာတွင် စားအုန်းဆီတစ်ပိဿာလျှင် သတ်မှတ်ရည်ညွှန်းဈေးနှုန်းအပေါ်မူတည်၍ သယ်ယူပို့ဆောင်ခပေါင်းပြီး နှစ်ရာခိုင်နှုန်းအမြတ်ထက်မပိုသောဈေးနှုန်းဖြင့် အိမ်ထောင်စုတစ်စုလျှင် တစ်ပိဿာနှုန်းရောင်းချပေးလျက်ရှိပါသည်။

   ၂၀၂၄ခုနှစ်၊ ဇန်နဝါရီလ ၃ရက်နေ့တွင် တောင်ငူမြို့နေပြည်သူများအား စားအုန်းဆီပိဿာ ၁၀၀ကို တစ်ပိဿာလျှင် ၅၅၀၀ကျပ်နှုန်းဖြင့် လူစည်ကားရာ ဘုရင့်နောင်ဈေးအနီး၌ ရောင်းချပေးခဲ့ရာ စားသုံးသူရေးရာဦးစီးဌာန၊ မြို့နယ်တာဝန်ခံ ဦးမြင့်သူနှင့်ဝန်ထမ်းများက ကြီးကြပ်ကူညီဆောင်ရွက်ပေးခဲ့ကြောင်းသိရှိရပါသည်။

DOCA(ပဲခူး)

    တောင်ငူမြို့၊ ငါးခြောက်ဆိုင်များတွင်ရောင်းချနေသော အာဗြဲခြောက်များသည် လူကြိုက်များသော ငါးခြောက်တစ်မျိုးဖြစ်သည်။ အရသာမချိုပြီး ဆားလည်းပေါ့သဖြင့် စားကောင်းသည့် ငါးခြောက်တစ်မျိုးဖြစ်ပါသည်။

      အာဗြဲခြောက်ဈေးနှုန်းမှာ တစ်ပိဿာလျှင် အသေး ၂၄၀၀၀ကျပ်၊ အလတ် ၂၈၀၀၀ကျပ်နှင့် အကြီး ၃၅၀၀၀ကျပ်ရှိပါသည်။

  အသင့်စားအာဗြဲခြောက်ထုပ်များပြုလုပ်၍ ရောင်းချသည်များလည်းရှိပါသည်။ အသင့်စားအာဗြဲခြောက်ပြုလုပ်ရာတွင် အာဗြဲခြောက်ကို အမြီးညှပ်၊ ခေါင်းဖြတ်သန့်စင်ပြီးနောက် အနည်းငယ်ထုထောင်း၍ မီးကင်စက်ဖြင့် ကင်ရပါသည်။ ၎င်းနောက် မီးကင်စက်မှချကာ နောက်တစ်ကြိမ်ထပ်မံထုထောင်း၍ တစ်ထုပ်လျှင် ၁၀၀၀ကျပ်ဖြင့်ရောင်းချကြောင်းသိရပါသည်။

DOCA(ပဲခူး)