ပြည်တွင်းကုန်သွယ်မှုသတင်း

     ဘိုကလေးမြို့နယ်၊ စားသုံးသူရေးရဦးစီးဌာန၊ မြို့နယ်တာဝန်ခံနှင့်ဝန်ထမ်းများသည် ၂၀၂၃ခုနှစ်၊ ဒီဇင်ဘာလ(၂၁) ရက်နေ့ ၊နေ့လယ်(၁၃:၀၀) နာရီအချိန်တွင်  ကုန်မျိုးစုံရောင်းချသည့်ဆိုင်များရှိ စားသုံးဆီဘူးများတွင် ကုန်အညွှန်းအမှတ်အသားပြည့်စုံစွာဖော်ပြထားခြင်းရှိ/မရှိ ကွင်းဆင်းစစ်ဆေးခဲ့ကြပါသည်။

     ထိုသို့ကွင်းဆင်းစစ်ဆေးရာတွင် ကုန်မျိုးစုံဆိုင်များရှိ ရောင်းချနေသောစားသုံးဆီဘူးများတွင် ကုန်အညွှန်းအမှတ်အသားပြည့်စုံစွာဖော်ပြထားခြင်းရှိ/မရှိနှင့် FDA ၏ ထောက်ခံချက်များ ဖော်ပြထားခြင်းရှိ/မရှိနှင့် စားသုံးသူကာကွယ်ရေးဥပဒေ အခန်း(၁၈)ပါ ပုဒ်မ(၄၁)၊ (၄၃) အရ ကုန်အညွှန်းအမှတ်အသားဖော်ပြချက်များကို ပြည့်စုံစွာဖော်ပြနိုင်ခြင်းရှိ/မရှိ၊ သက်ဆိုင်ရာဌာနများ၏ ထောက်ခံချက်များရှိ/မရှိ၊ ကုန်အညွှန်းအမှတ်အသားဖော်ပြခြင်းနှင့်စပ်လျဉ်း၍ ကုန်ပစ္စည်းအမျိုးအစားအလိုက် သတ်မှတ်ချက်များနှင့်အညီ မဖြစ်မနေသိသာထင်ရှားစွာဖော်ပြရမည့် သတ်မှတ်ချက်များတွင် ကုန်စည်၏တံဆိပ်အမှတ်အသား၊ အမျိုးအမည်၊ အရွယ်အစား၊ အရေအတွက်နှင့်အသားတင်ပမာဏ၊ ထားသိုသိမ်းဆည်းမှုအညွှန်း၊ သုံးစွဲပုံနည်းလမ်း၊ ထုတ်လုပ်သည့်ရက်စွဲနှင့် သက်တမ်းကုန်ဆုံးသည့်ရက်စွဲ၊ ထုတ်လုပ်မှုအမှတ်စဉ်၊ ထုတ်လုပ်သည့်နေရာ၊ ပါဝင်ပစ္စည်း၏အမျိုးအမည်များနှင့် ပစ္စည်းများ၏ ပါဝင်မှုအချိုးအစား၊ ကုန်အညွှန်းအမှတ်အသားဖော်ပြရာတွင် မြန်မာဘာသာဖြင့်ဖြစ်စေ၊ မြန်မာဘာသာနှင့် အခြားဘာသာတစ်ခု (သို့မဟုတ်) တစ်ခုထက်ပို၍တွဲလျက်ဖြစ်စေ ရေးသားဖော်ပြထားခြင်းရှိ/မရှိတို့ကို ကွင်းဆင်းလေ့လာ စစ်ဆေးခဲ့ကြောင်း သတင်းရရှိပါသည်။

DOCA(ဧရာဝတီ)

    မိတ္ထီလာခရိုင်အတွင်း၌ ပဲမျိုးစုံစိုက်ပျိုးကြသည့်အနက် ပဲစဉ်းငုံမှာ ပြည်ပပို့ကုန်သီးနှံဖြစ်သည့်အတွက် အဓိကထားစိုက်ပျိုးကြပါသည်။ (၂၀၂၃-၂၀၂၄) ဘဏ္ဍာနှစ်တွင် ပဲစဉ်းငုံစိုက်ဧက(၉၆၇၄၀)ဧကရှိကြောင်း၊ ယခုနှစ် ဒီဇင်ဘာလ နောက်ဆုံးပတ်တွင် ပဲစဉ်းငုံသီးနှံစတင်ပေါ်လာပြီး ဈေးကွက်တွင် အရောင်းအဝယ်ဖြစ်လျက်ရှိပါသည်။ ပဲစဉ်းငုံမှာ မိုးသီးနှံဖြစ်၍ ဇွန်လတွင်စိုက်ပျိုးကြပြီး ဒီဇင်ဘာလနှင့်ဇန်နဝါရီလတို့တွင် ရိတ်သိမ်းကြပါသည်။ ပဲစဉ်းငုံကို ပြည်တွင်း၌ ပဲဟင်း၊ ပဲကြော်၊ ပဲသီးစိမ်းပြုတ်၍ စားသုံးကြသော်လည်း အများအားဖြင့် ပြည်ပဈေးကွက်သို့ တင်ပို့ရောင်းချမှုအတွက်သာ အဓိကစိုက်ပျိုးကြပါသည်။

      ဈေးကွက်တွင် ပဲစဉ်းငုံ (၂၀) ပိဿာဝင်တစ်တင်းလျှင် (၁၀၄၅၀၀) ကျပ်ဖြင့် အရောင်းအဝယ်ဖြစ်လျက်ရှိကြောင်း၊ ယခင်နှစ်ပဲစဉ်းငုံပေါ်ချိန်တွင် ပဲစဉ်းငုံ(၂၀) ပိဿာဝင်တစ်တင်းလျှင် (၅၀၀၀၀) ကျပ်သာရှိခဲ့ပြီး ယခင်နှစ်နှင့်ကာလတူနှိုင်းယှဉ်လျှင် ပဲစဉ်းငုံပေါ်ချိန်၌ ဈေးနှုန်းများမြင့်တက်လျက်ရှိကြောင်း၊ ဈေးကွက်အနေဖြင့် ရန်ကုန်မြို့သို့ အဓိကတင်ပို့လျက်ရှိကြောင်းသိရပါသည်။

DOCA(မန္တလေး)

     မြင်းခြံခရိုင်၊ နွားထိုးကြီးမြို့၊ မြို့မစည်ပင်သာယာဈေးအတွင်း ၂၀၂၃ခုနှစ်၊ ဒီဇင်ဘာလ စတုတ္ထပတ်အတွင်းဖြစ်ပေါ်ခဲ့သော အခြေခံစားသောက်ကုန်များ၏ လက်လီဈေးနှုန်းများမှာ ဝန်ကြီးပဒေသာတစ်ပြည်လျှင် (၆၅၀၀)ကျပ်ခန့်၊ ဧရာပဒေသာတစ်ပြည်လျှင် (၄၅၀၀)ကျပ်ခန့်၊ ပေါ်ဆန်းတစ်ပြည်လျှင် (၆၅၀၀)ကျပ်မှ (၇၃၀၀)ကျပ်၊ သုခဆန်တစ်ပြည်လျှင် (၃၂၀၀)ကျပ်မှ (၄၀၀၀)ကျပ်၊ မဂျမ်းတောတစ်ပြည်လျှင် (၄၅၀၀)ကျပ်မှ (၅၅၀၀)ကျပ်၊  သားငါးဈေးများအနေဖြင့် ငါးမြင်းတစ်ပိဿာလျှင် (၁၀၀၀၀)ကျပ်၊  ငါးကြင်းတစ်ပိဿာလျှင် (၁၅၀၀၀)ကျပ်မှ (၁၆၀၀၀)ကျပ်၊ ငါးရံ့တစ်ပိဿာလျှင် (၁၅၀၀၀)ကျပ်မှ (၁၆၀၀၀)ကျပ်၊ ငါးဖယ်တစ်ပိဿာလျှင် (၁၆၀၀၀)ကျပ်၊ ငါးတန်တစ်ပိဿာလျှင် (၁၀၀၀၀) ကျပ်၊ ငါးခူတစ်ပိဿာလျှင် (၁၀၀၀၀)ကျပ်၊ ရေချိုပုဇွန်(လတ်)တစ်ပိဿာလျှင် (၂၆၀၀၀)ကျပ်၊ ကြက်သား(ဗမာ) တစ်ပိဿာလျှင် (၁၇၀၀၀)ကျပ်၊ ကြက်သား(CP)တစ်ပိဿာလျှင် (၁၄၀၀၀)ကျပ်၊ အမဲသားတစ်ပိဿာ လျှင် (၁၆၀၀၀)ကျပ်၊ ဝက်သားတစ်ပိဿာလျှင် (၁၈၀၀၀)ကျပ်မှ (၂၀၀၀၀)ကျပ်၊ အသီးအရွက်ဈေးများအနေဖြင့် ကန်စွန်းရွက်တစ်ပိဿာလျှင် (၃၀၀)ကျပ်၊ ချဉ်ပေါင်ရွက်တစ်ပိဿာလျှင် (၂၅၀)ကျပ်၊ မုန့်ညှင်းရွက်တစ်ပိဿာလျှင် (၂၀၀၀)ကျပ်၊ ပန်းဂေါ်ဖီတစ်ပိဿာလျှင် (၁၁၀၀)ကျပ်၊ ဂေါ်ဖီထုပ်တစ်ပိဿာလျှင် (၁၀၀၀)ကျပ်၊ ဆလပ်ရွက်တစ်ပိဿာလျှင် (၁၅၀၀)ကျပ်၊ ငရုတ်သီးစိမ်းတစ်ပိဿာလျှင် (၂၅၀၀)ကျပ်၊ အာလူးတစ်ပိဿာလျှင် (၂၅၀၀)ကျပ်မှ (၃၅၀၀)ကျပ်၊ ခရမ်းချဉ်သီး(ဗမာ)တစ်ပိဿာလျှင် (၁၅၀၀) ကျပ်၊ ခရမ်းချဉ်သီး(ရှမ်း)တစ်ပိဿာလျှင် (၁၀၀၀)ကျပ်၊ ခရမ်းသီးတစ်ပိဿာ(၈၀၀)ကျပ်မှ (၁၀၀၀)ကျပ်၊ ပဲတောင့်ရှည်တစ်ပိဿာလျှင် (၂၀၀၀) ကျပ်၊ မုန်လာဥတစ်ပိဿာလျှင် (၆၀၀)ကျပ်မှ (၇၀၀)ကျပ်၊ မြေပဲဆံတစ်ပြည်လျှင် (၅၇၀၀)ကျပ်မှ (၅၈၀၀) ကျပ်၊ ပဲဆီတစ်ပိဿာလျှင် (၁၃၀၀၀)ကျပ်၊ နှမ်းဆီတစ်ပိဿာလျှင် (၁၃၀၀၀)ကျပ်၊ စားအုန်းဆီတစ်ပိဿာလျှင် (၅၅၀၀)ကျပ်တို့ဖြင့် အရောင်းအဝယ်ဖြစ်ပေါ်နေကြောင်းသိရှိရပါသည်။

DOCA(မန္တလေး)

      မြင်းခြံခရိုင်တွင် မိုးကြက်သွန်နီကို နှစ်စဉ် ဩဂုတ်လနှင့်စက်တင်ဘာလတို့တွင် စတင်စိုက်ပျိုးကြပြီး ဒီဇင်ဘာလ၊ ဇန္နဝါရီလနှင့်ဖေဖော်ဝါရီလများတွင် ရိတ်သိမ်းထွက်ပေါ်လေ့ရှိပါသည်။

     မြင်းခြံခရိုင်တွင် ယခင်နှစ်တွင် မိုးကြက်သွန်နီစိုက်ပျိုးနိုင်ခဲ့မှုအနေဖြင့် (၁၆၃၃)ဧကစိုက်ပျိုးခဲ့ပြီး၊ ယခုနှစ်မိုးကြက်သွန်နီစိုက်ပျိုးမှုအနေဖြင့် (၁၇၉၄)ဧကစိုက်ပျိုးနိုင်ခဲ့သည့်အတွက် ယခင်နှစ်ထက် (၁၆၁)ဧကပိုမိုစိုက်ပျိုးနိုင်ခဲ့ကြောင်းသိရှိရပါသည်။ ယခုနှစ်တွင် မြို့နယ်အလိုက်စိုက်ပျိုးမှု၊ ရိတ်သိမ်းပြီးစီးမှုနှင့် အထွက်နှုန်းများအနေဖြင့် မြင်းခြံမြို့နယ်တွင် (၈၃၇)ဧကစိုက်ပျိုးခဲ့ပြီး၊ ယခုဒီဇင်ဘာလ တတိယပတ်အထိ ရိတ်သိမ်းပြီးစီးမှုမှာ (၃၄၀)ဧကရိတ်သိမ်းပြီးစီးခဲ့ရာ တစ်ဧကပျမ်းမျှအထွက်နှုန်းမှာ (၂၁၀၀)ပိဿာဖြင့် ပိဿာချိန်ပေါင်း (၇၁၄၀၀၀)ပိဿာ၊ တောင်သာမြို့နယ်တွင် (၂၉၅)ဧကစိုက်ပျိုးခဲ့ပြီး လက်ရှိရိတ်သိမ်းပြီးစီးမှုမှာ (၁၀၀)ဧကရိတ်သိမ်းပြီးဖြစ်ရာ တစ်ဧကပျမ်းမျှအထွက်နှုန်းမှာ (၂၁၀၀)ပိဿာဖြင့် ပိဿာချိန်ပေါင်း (၂၁၀၀၀၀)ပိဿာ၊ နွားထိုးကြီးမြို့နယ်တွင် (၆၆၂)ဧကစိုက်ပျိုးနိုင်ခဲ့ပြီး ရိတ်သိမ်းပြီးစီးမှုမှာ (၂၃၀)ဧကရိတ်သိမ်းပြီးဖြစ်ရာ တစ်ဧကပျမ်းမျှအထွက်နှုန်းမှာ (၂၁၀၀)ပိဿာဖြင့် ပိဿာချိန်ပေါင်း (၄၈၃၀၀၀)ပိဿာထွက်ရှိခဲ့ကြောင်းနှင့်ကျန်ရှိသောစိုက်ဧကများကိုလည်း ဆက်လက်ရိတ်သိမ်းလျက်ရှိကြောင်းသိရှိရပါသည်။

       မြင်းခြံဒေသ၏ မိုးကြက်သွန်နီများမှာ ယခုဒီဇင်ဘာလ ဒုတိယပတ်မှစ၍ ဈေးကွက်အတွင်းသို့ စတင်ဝင်ရောက်လျက်ရှိရာ အသေးစတစ်ပိဿာလျှင် (၇၀၀)ကျပ်မှ (၁၂၀၀)ကျပ်၊ အလတ်စတစ်ပိဿာလျှင် (၁၇၀၀)ကျပ်မှ (၂၂၀၀)ကျပ်နှင့် အကြီးစတစ်ပိဿာလျှင် (၂၃၀၀)ကျပ်မှ (၂၅၀၀)ကျပ်တို့ဖြင့်အရောင်းအဝယ်ဖြစ်ခဲ့ပြီး ယခုတတိယအပတ်တွင် အသေးစတစ်ပိဿာလျှင် (၅၀၀)ကျပ်မှ (၁၂၀၀)ကျပ်၊ အလတ်စတစ်ပိဿာလျှင် (၁၅၀၀)ကျပ်မှ (၂၂၀၀)ကျပ်နှင့် အကြီးစတစ်ပိဿာလျှင် (၂၄၀၀)ကျပ်မှ (၂၇၀၀)ကျပ်တို့ရှိ၍ ယခင်အပတ်ထက် အကြီးစတစ်ပိဿာလျှင် (၁၀၀)ကျပ်မှ (၂၀၀)ကျပ်ခန့်အထိ ဈေးနှုန်းမြင့်တက်ခဲ့ကြောင်းသိရှိရပါသည်။

DOCA(မန္တလေး)

     ၂၀၂၃ခုနှစ် ဒီဇင်ဘာလ နောက်ဆုံးပတ်အတွင်း ရွှေဘိုမြို့နယ်တွင် အခြေခံစားကုန်များ ဖြစ်သော ရွှေဘိုပေါ်ဆန်းဆန်တစ်ပြည် ၆၅၀၀ကျပ်၊ ဧရာမင်းဆန် တစ်ပြည် ၆၅၀၀ကျပ်၊ ရွှေဘို ပေါ်ဆန်း(သစ်) တစ်ပြည် (၅၂၀၀)ကျပ်၊ ဧရာမင်းဆန် (သစ်) တစ်ပြည်လျှင် (၄၈၀၀)ကျပ်ဖြင့် အရောင်းအဝယ် ဖြစ်လျက်ရှိသည်။ကြက်သွန်နီလက်လီဈေးမှာ (ကြီး) တစ်ပိဿာ ၄၅၀၀ကျပ်၊ (လတ်) တစ်ပိဿာ ၃၅၀၀ကျပ်၊ (သေး)တစ်ပိဿာ ၂၅၀၀ကျပ်နှုန်း၊ ကြက်သွန်နီ (သစ်) တစ်ပိဿာလျှင် ၂၈၀၀ကျပ်မှ ၃၅၀၀ကျပ်ထိ အရောင်းအဝယ် ဖြစ်လျက်ရှိသည်။ ရှမ်း ကြက်သွန်ဖြူ တစ်ပိဿာ ၁၄၀၀၀ကျပ်မှ ၁၇၀၀၀ကျပ်ထိ ၊ (ကြူကုပ်) တစ်ပိဿာ ၁၃၀၀၀ကျပ်မှ ၁၅၀၀၀ကျပ်ထိ၊ ချင်းတစ်ပိဿာ ၅၀၀၀ကျပ်၊ ငရုတ်သီးခြောက် အမျိုးအစားအလိုက် ၁၇၀၀၀ကျပ် မှ ၁၈၀၀၀ကျပ်ထိ အာလူး တစ်ပိဿာ ၂၈၀၀ကျပ်မှ ၃၆၀၀ကျပ်ထိ ၊ခရမ်းချဉ်သီး တစ်ပိဿာ ၁၄၀၀ကျပ်ဖြင့် အရောင်းအဝယ် ဖြစ်နေပါသည်။

   ကြက်ဥ လက်လီဈေးနှုန်းမှာ (ကြီး)တစ်လုံး ၃၀၀ကျပ်၊ (သေး) တစ်လုံး ၂၅၀ကျပ် ၊ ဘဲဥ (ကြီး) တစ်လုံး (၃၅၀)ကျပ်၊ (သေး)တစ်လုံး (၃၀၀)ကျပ်ရှိသည်။ ရွှေဘိုမြို့၏ အသား/ငါး ဈေးနှုန်းများမှာ ကြက်သား(CP)  တစ်ပိဿာ ၁၀၀၀၀ကျပ်မှ ၁၂၀၀၀ကျပ်ထိ၊ကြက်သား (ဗမာ)တစ်ပိဿာ ၁၆၀၀၀ ကျပ်မှ ၁၈၀၀၀ကျပ်ထိ၊  ဝက်သား တစ်ပိဿာ ၂၀၀၀၀ကျပ်မှ ၂၂၀၀၀ကျပ်ထိ၊ အမဲသားတစ်ပိဿာ ၁၄၀၀၀ကျပ်မှ ၁၆၀၀၀ကျပ်ထိ၊  ငါးမြစ်ချင်း တစ်ပိဿာ ၇၅၀၀ကျပ်၊ ငါးကြင်း တစ်ပိဿာ ၇၀၀၀ကျပ်ဖြင့် ရောင်းဝယ်နေကြောင်း သိရသည်။

    စားသုံးဆီ ဈေးနှုန်းများမှာ ပဲဆီသန့် တစ်ပိဿာလျှင် ၁၃၀၀၀ကျပ်၊  စားအုန်းဆီ တစ်ပိဿာလျှင် ၅၄၀၀ကျပ်နှင့် နှမ်းဆီ တစ်ပိဿာလျှင် ၁၃၀၀၀ကျပ်ဖြင့် အရောင်းအဝယ် ဖြစ်နေကြောင်း သိရသည်။

DOCA(စစ်ကိုင်း)