ပြည်တွင်းကုန်သွယ်မှုသတင်း

         ပန်းမြို့တော်၊နှင်းမြို့တော်၊တောင်လှေကားမြို့တော်၊ မေမြို့ (သို့) ပြင်ဦးလွင် စသောအမည်များဖြင့် လူသိများထင်ရှားသော ပြင်ဦးလွင်မြို့လေးသည် ပင်လယ်ရေမျက်နှာပြင်အထက်ပေပေါင်း (၃၅၃၈)ပေမြင့်ပြီး အေးမြတဲ့ရာသီဥတုရှိသော တောင်ပေါမြို့လေးဖြစ်ပါသည်။ လမ်းပန်းဆက်သွယ်ရေး အထူးကောင်းမွန်သော မြို့လေးဖြစ်ပြီး ဒေသခံတောင်သူများမှာလည်း နှစ်ရှည်သီးနှံများ ဧကအလိုက်စိုက်ပျိုးလျက်ရှိပြီး ရာသီစာသီးနှံများကိုလည်းအလှည့်ကျ စိုက်ပျိုး၍ စီးပွားဖြစ်ထွန်းလျက်ရှိရာ ၄င်းသီးနှံများထဲမှ စတော်ဘယ်ရီသီးနှံအား တစ်ပိုင်တစ်နိုင်စိုက်ပျိုးကြပါသည်။

          ပြင်ဦးလွင်မြို့တွင်  စတော်ဘယ်ရီ စိုက်ဧက(၂၀၀)ဧကခန့် စိုက်ပျိုးလျက်ရှိပြီး ယခုအချိန်တွင် စတော်ဘယ်ရီသီးများ စတင်ထွက်ပေါ်နေပြီး တောင်သူများအနေဖြင့် အကျိုးအမြတ်ရရှိနေသည့် အချိန်ဖြစ်ပါသည်။ စတော်ဘယ်ရီသီးနှံကို သြဂုတ်လ မှ စက်တင်ဘာလအတွင်း စတင်စိုက်ပျိုးပြီး  ပျိုးပင်၊သွင်းအားစု၊လုပ်သားခအပါအဝင် တစ်ဧကကုန်ကျစရိတ်မှာ သိန်း(၅၀) မှ သိန်း(၈၀)အထိ ကုန်ကျကြောင်း သက်ဆိုင်ရာစာရင်းများအရ သိရှိရပါသည်။ တစ်ဧကလျှင် အပင်(၁၅၀၀၀)မှ (၂၀၀၀၀)အထိစိုက်ပျိုးနိုင်ပြီး စိုက်ပျိုးနည်းစနစ်မှာ ဘောင်များဖြင့်သာစိုက်ပျိုးနိုင်၍ တစ်ဘောင်လျှင် ၁၅၀ပေရှိပြီး ဘောင်(၈၀)ခန့် စိုက်ပျိုးနိုင်ပါသည်။ တစ်ဘောင်နှင့် တစ်ဘောင်ကြား (၃.၅)ပေခြား စိုက်ပျိုးပြီး တစ်ဘောင်လျှင် အပင်ရေ(၂၅၀)ခန့် စိုက်ပျိုးနိုင်ပါသည်။ စတော်ဘယ်ရီသီးနှံအား မျိုးစေ့မှတိုက်ရိုက်စိုက်ပျိုးခြင်းမဟုတ်ဘဲ စတော်ဘယ်ရီ မိခင်ပင်မကြီးမှ နွယ်သစ်များထွက်လာပြီး အပင်မျိုးရရှိပါသည်။ အဆိုပါမျိုးပင်များအား နောင်နှစ်အတွက် မျိုးဆက်ရယူစိုက်ပျိုးခြင်းဖြစ်ပါသည်။ကုန်းမြေနေရာတွင်သာ မျိုးထုတ်နိုင်ပြီး ရေဝပ်သောနေရာ ၊ ခဲမြေများပေါ်တွင် မျိုးထုတ်ယူနိုင်ခြင်းမရှိပါ။ စတော်ဘယ်ရီသီးနှံမှာ ဇန်နဝါရီလမှ ဧပြီလအတွင်း ထွက်ရှိသည့်သီးနှံဖြစ်ကာ  စျေးကွက်ဝင်ပြီး တောင်သူအကျိုးအမြတ်ရရှိသော သီးနှံဖြစ်ပါသည်။ မျိုးအနေဖြင့် ထိုင်ဝမ်မျိုး ၊ ဒေသမျိုးနှင့် Royal 1-80 ထိုင်းမျိုး(အကျွတ်)မျိုးများအား စိုက်ပျိုးလျက်ရှိပြီး စားသုံးသူများမှာလည်း အကျွတ်မျိုးများကိုသာ ပိုမိုကြိုက်နှစ်သက်ကြပါသည်။ အကျွတ်မျိုးများမှာ နို့ဆီ၊သကြားမလိုဘဲအလွယ်တကူစားသောက်နိုင်ပြီး အခြားမျိုးရင်းများထက် အချိုဓါတ် များခြင်းကြောင့်ဖြစ်ပါသည်။ဒေသမျိုးရင်းမှာ အချဉ်ဓါတ်ပါဝင်မှုများပြီး လက်ရှိထုတ်လုပ်လျှက်ရှိ သောစတော်ဘယ်ရီယို၊ဖျော်ရည်၊ဂျယ်လီ ကုန်ချောအဖြစ်ထုတ်လုပ်ပြီး စျေးကွက်အတွင်း ရောင်းချလျှက်ရှိပါသည်။စတော်ဘယ်ရီသီးနှံမှာ အလွယ်တကူအသင့်စားသီးနှံဖြစ်သောကြောင့် ရောင်းအားသွက်လျက် ရှိပါသည်။ယခု ဇန်နဝါရီလအတွင်း ထွက်ရှိသောမျိုးမှာ ထိုင်ဝမ်မျိုး နှင့် Royal 1-80 ထိုင်းမျိုး(အကျွတ်)မျိုးများဖြစ်ပြီး ဒေသမျိုးမထွက်ရှိသေးပါ။ ဒေသမျိုးမှာ ဖေဖေါ်ဝါရီလကုန်တွင် စတင်ခူးဆွတ်ရမည်ဖြစ်ပါသည်။ အထွက်နှုန်းအနေဖြင့် စတော်ဘယ်ရီ တစ်ဧကလျှင် ပိဿာချိန် (၄၀၀၀-၅၀၀၀)ပိဿာခန့်ထွက်ရှိပြီး ယခုလက်ရှိ ထွက်ပေါ်ချိန်တွင် ထိုင်ဝမ်မျိုး တစ်ပိဿာလျှင် (၇၅၀၀-၈၀၀၀)ကျပ် နှင့် Royal1-80 ထိုင်းမျိုး(အကျွတ်)မျိုးများမှာ တစ်ပိဿာလျှင်(၉၀၀၀-၁၀၀၀၀)ကျပ် ရရှိကြောင်းသိရှိရပါသည်။ နှစ်စဉ် စတော်ဘယ်ရီ စတင်ထွက်ပေါ်နေချိန်တွင်  စျေးကောင်းရရှိပြီး သီးနှံလှိုင်လှိုင်ထွက်ပေါ်ချိန်တွင် တောင်သူများ အပြိုင်အဆိုင်ရောင်းဝယ်မှုကြောင့် ဝယ်လိုအားထက် ရောင်းလိုအားများပြီး စျေးကွက်သဘာဝအရ စျေးနှုန်းကျဆင်းတတ်ကြောင်းသိရှိရပါသည်။ စျေးကွက်အနေဖြင့် ပြည်ပသို့ တင်ပို့နိုင်ခြင်းမရှိသော်လည်း ဒေသတွင်းစားသုံးမှုနှင့်ခရီးသွားလက်ဆောင်အဖြစ် ဝယ်ယူခြင်းရှိသလို ပြည်တွင်းတင်ပို့မှုအနေဖြင့် ရန်ကုန်၊ မန္တလေး၊ နေပြည်တော်၊ ပဲခူး၊ မော်လမြိုင်၊ ရခိုင်၊ ကော့သောင်း အထိတင်ပို့နေရသည့် သီးနှံဖြစ်ပါသည်။  ငှက်၊ ချ ၊ ပုရွတ်ဆိတ် ပိုးမွှားများ၏ အန္တရာယ်နှင့် မြေကြီးနှင့်တိုက်ရိုက်ထိတွေ့သည့် အသီးများအား ရောင်းတန်းမဝင်သဖြင့် လေလွင့်ဆုံးရှုံးမှုများရှိသော်လည်း စျေးနှုန်းပေါ်မူတည်ပြီး အကျိုးအမြတ်အနေဖြင့် တစ်ဧကလျှင် (၇၀-၈၀)သိန်းခန့် ရရှိပါသည် ။ ယခင်နှစ်တွင် ကိုဗစ်-၁၉ရောဂါကြောင့် ကုန်စည် စီးဆင်းမှုများကျဆင်းခဲ့သော်လည်း ယခုအချိန်တွင် လမ်းပန်းဆက်သွယ်ရေး ပြန်လည်ကောင်းမွန်လာမှုနှင့်အတူ ကိုဗစ်-၁၉ စည်းကမ်းချက်များ ပြန်လည်ဖြေလျော့ပေးမှုကြောင့် ပြည်သူများခရီးသွားလာမှုပြန်လည်ပြုလုပ်ခြင်းနှင့်အတူ ရောင်းဝယ်ဖောက်ကားမှုများ ဖြစ်ထွန်းလာမှုကြောင့် စတော်ဘယ်ရီစိုက်တောင်သူများ စျေးကောင်းရရှိလာပြီး အကျိုးအမြတ်ဖြစ်ထွန်းကာ အလုပ်အကိုင်အခွင့်အလမ်းများ ကောင်းမွန်လာမည်ဖြစ်ကြောင်း စတော်ဘယ်ရီသီးနှံစိုက်တောင်သူတစ်ဦး၏ ပြောပြချက်အရ သိရှိရပါသည်။ ပြင်ဦးလွင်နှင့် စတော်ဘယ်ရီဟာ ခွဲခြားမရသလို ပြင်ဦးလွင်မြို့၏ အထိမ်းအမှတ် သီးနှံတစ်ခုဖြစ်သောကြောင့် နောင်လာမည့်အနာဂတ်တွင်လည်း ဆက်လက်စိုက်ပျိုးထုတ်လုပ်နေမှာ အသေအချာဖြစ်ပါသည်။ ပြင်ဦးလွင်မြို့ကိုရောက်ရှိခဲ့လျှင် စတော်ဘယ်ရီစိုက်ခင်းကို ကိုယ်တိုင်လာရောက် ခူးဆွတ်ပြီး စားသောက်နိုင်သော နေရာများစွာရှိတာကြောင့် ပြင်ဦးလွင်မြို့ကို လာရောက်ပြီး နေရာစုံလည်ပတ် အပန်းဖြေရင်း စတော်ဘယ်ရီချိုချိုလေးကို လတ်လတ်ဆတ်ဆတ်၊ အရသာရှိရှိ ခူးဆွတ်စားသောက်နိုင်စေဖို့ ဖိတ်ခေါ်လိုက်ရပါသည်။

စားသုံးသူရေးရာဦးစီးဌာန

မန္တလေးတိုင်း‌ဒေသကြီး

၂၅.၁.၂၀၂၂ရက်နေ့ တိုင်းဒေသကြီး/ပြည်နယ်များအလိုက် စားအုန်းဆီတစ်ပိဿာကုန်ကျစရိတ်တွက်ချက်မှုစာရင်းနှင့် စားအုန်းဆီ နေ့စဉ်ဈေးနှုန်းသတင်းအား အောက်ပါ PDF ဖိုင်တွင် ကြည့်ရှုလေ့လာနိုင်ပါသည်-

      ရှမ်းပြည်နယ်(မြောက််ပိုင်း)၊ ကျောက်မဲမြို့၊ အမှတ်(၈) ရပ်ကွက်၊ ရွှေစေတီရပ်ရှိ တပိုင်တနိုင်လုပ်ငန်းဖြစ်သော ဒေသထွက်ဆီတို့ဟူးပြုလုပ်ရောင်းချလျက်ရှိသည့် လုပ်ငန်းခွင်သို့ သွားရောက်၍ထုတ်လုပ်နေမှု အဆင့်ဆင့်အား မေးမြန်းခဲ့ပါသည်။ ဆီတို့ဟူးရရှိရန် ပထမဦးစွာ ပဲပုပ်စေ့ကို ကြိတ်၍အရည်စစ်ရကြောင်း၊ အရည်စစ်ပြီးသည့် မုန့်အနှစ်ကို မီးဖြင့်ကျို၍ ရလာသည့်အရည်ကို အဖတ်ဖြစ်ရန် အအေးခံထားရကြောင်း၊ အအေးခံပြီးနောက် ရလာသည့်အချပ်ကို လေးထောင့်တုံးလေးများဖြစ်အောင် ညီညီညာညာလှီးဖြတ်ရကြောင်း၊ ထိုအတုံးလေးများကို ဘန်း (သို့မဟုတ်) စကောထဲသို့ ပြန် ထည့်ကာ နေပူလှန်းရကြောင်း၊ နေပူလှန်းရာတွင် နေရောင်ခြည်ပေါ်မူတည်၍ (၂) ရက် (သို့မဟုတ်) (၃) ရက်လှန်းရ‌ကြောင်း၊ နေလှန်းရာ၌ အတုံးခဲလေးများအပေါ် အမွှေးစလေးများ ပေါ်ပေါက်လာသည်အထိ နေလှန်းရကြောင်း၊ ထိုသို့အမွှေးစလေးများပေါ်လာမှသာ အရသာပေါ်လွင်၍ တာရှည်ခံကြောင်းသိရသည်။

      ထိုနေလှန်းပြီး အတုံးခဲများအား ဆား၊ ငရုပ်မှုန့်၊ ဟင်းခတ်အမွှေးအကြိုင်၊ သဘာဝအတိုင်းပြုလုပ်ထားသည့် ဆန်အရက်အနည်းငယ်တို့ဖြင့် သမအောင်နယ်ထားသော အနှစ်များဖြင့် နှပ်ထားရကြောင်း၊ ယင်းနောက်၌ ဓါတုဆိုးဆေးများကင်းစင်ပြီး ကျန်းမာရေးနှင့်ပြည့်ဝသော အသင့်စား “ဆီတို့ဟူး” ကိုရရှိကြောင်း သိရှိရပါသည်။ ဈေးကွက်အရ ဒေသတွင်းနှင့် မန္တလေးမြို့သို့ တင်ပို့ရောင်းချလျက်ရှိကြောင်းသိရှိရပြီး လက်ရှိပေါက်ဈေးမှာ ဗူးကြီး(၁)ဗူးလျှင် - (၂၅၀၀/-) ကျပ်နှင့်ဗူးသေး (၁)ဗူး လျှင် (၁၂၀၀/-) ကျပ် ဖြင့် ရောင်းချလျက်ရှိကြောင်း သိရှိရပါသည်။

စားသုံးသူရေးရာဦးစီးဌာန

ရှမ်းပြည်နယ်

                 မန္တလေးတိုင်းဒေသကြီး မိတ္ထီလာခရိုင် စားသုံးသူရေးရာဦးစီးဌာနမှ ဦးဖြိုးဓနလင်း၊    ဒု-ဦးစီးမှူးသည် ဝမ်းတွင်းမြို့၊ ရိုးစုကျေးရွာအုပ်စုရှိ သစ်တောဦးစီးဌာနပိုင် တောင်ကြီးကုန်း သစ်တောကြိုးဝိုင်းအတွင်း (CF) စနစ် ဖြင့် မြေငှားရမ်း၍ ပေါ်လိုနီးယားစိုက်ပျိုးသော တောင်သူဦးထွန်းလူနှင့် တွေ့ဆုံမေးမြန်းခဲ့ပါသည်။

            ပေါ်လိုနီးယား တစ်ဧကလျှင် (၁၉၄)ပင် ၁၅ပေခြား ဝင်ဆန့်စိုက်ပျိုးရ၍ ၂၀၂၁ခုနှစ်တွင် ပျိုးထောင်ပြီး ယခုအခါ တစ်ဧက စတင်စိုက်ပျိုးထားကြောင်း သိရှိရပါသည်။ ပေါ်လိုနီးယားမျိုးစေ့အား ထိုင်းနိုင်ငံမှရရှိ၍ အစေ့(၃၀၀)ပါ (၁) ထုပ်လျှင် တစ်သောင်းကျပ်ဖြင့် ဝယ်ယူ စိုက်ပျိုးခဲ့ကြောင်း သိရှိရပါသည်။ မိုးရေတိုက်စားမူဒဏ်ကို ကာကွယ်နိုင်ရန် ရာသီဥတုနှင့် မြေဆီလွှာပြန်လည်ထိန်းသိမ်းရန် ရည်ရွယ်ပြီးစိုက်ပျိုးခဲ့ကြောင်းသိရှိရပါသည်။ တစ်ဧကစိုက်ပျိုးစရိတ် တစ်သိန်းငါးသောင်းကျော်ကုန်ကြပြီး နှစ်အနည်းငယ်အတွင်း အကျိုးဖြစ်ထွန်းမည့် ပေါ်လိုနီးယားပင် ဖြစ်ကြောင်းသိရှိရပါသည်။

            ပေါ်လိုနီးယားပင်သည် လျှင်မြန်စွာကြီးထွားလွယ်သော သစ်မာမျိုးဖြစ်ပြီး၃ နှစ်မှ စတင်၍ခုတ်လှဲရောင်းချနိုင်သည့် သစ်မာမျိုးဖြစ်သည်။ ပေါ်လိုနီးယားသည် အရှေ့တောင် အာဖရိကမျိုးနွယ်ဝင်ဖြစ်သော်လည်း ကမ္ဘာတစ်ဝှမ်းလုံးတွင် ဆောက်လုပ်ရေးလုပ်ငန်းများ ရေလွှာလျောစီဘုတ်များမှအစ ဇီဝလောင်စာထုတ်လုပ်မူ့အထိ အသုံးပြုကြကြောင်းသိရှိရပါသည်။ ပေါ်လိုနီးယားသစ်မာအမျိုးအစားဖြစ်ခြင်းကြောင့်လည်းကောင်း ကမ္ဘာတစ်ဝှမ်းလုံးတွင် ကျေနပ်ဖွယ်ကောင်းသည့် စျေးကွက်လိုအပ်ချက်ကိုရရှိထားကြောင်း သိရှိရပါသည်။

            ပေါ်လိုနီးယားအပင်သည် မြောက်အမေရိကသစ်တောပြုန်းတီးမူ့  ပြဿနာဖြစ်ပေါ်လာချိန် နောက်ပိုင်းတွင် လျှင်မြန်စွာ ပြန်လည်ကြီးထွားနိုင်သည့် အပင်အမျိုးအစားဖြစ်ကြောင်း လေ့လာမူများပြုလုပ်သိရှိခဲ့ရသည်။ အမြစ်နက်ရှိုင်းစွာဆင်းနိုင်ပြီး အမြစ်ကုတ်အားကောင်း၍ တောင်စောင်းများတွင်လည်း ကြံ့ခိုင်စွာပေါက်ရောက်နိုင်ပါသည်။

            ပေါ်လိုနီးယားသည် အပေါဆုံးကျွန်းသစ် အမျိုးအစားအဖြစ်သိကြပြီး အလူမီနီယမ်ကျွန်းဟုပင်တင်စား ခေါ်ဝေါ်ကြသည်။ လက်ရှိအချိန်တွင် ဥရောပတွင် စိုက်ပျိုးနေသည့် အပေါဆုံးစီးပွားရေးသစ်များထက် ၃ ပုံလျှင် ၂ပုံအထိ ပိုမိုပေါသည်။ ဝက်သစ်ချပင်များထက် ၃ဆခန့် ပေါ့ပါးပြီး  ထင်းရှုးပင်ထက် ထက်ဝက်ခန့်ပေါ့ပါးကြောင်း သိရပါသည်။

            ပေါ်လိုနီးယား၏ မာကြောမူ့မှာ အလေးချိန်အချိုးတူညီသည့် အခြားသော သစ်များထက် မာကြောမူ့အရှိဆုံးဖြစ်ပါသည်။ Aubum တက္ကသိုလ်မှ တိုင်းတာခဲ့ရာ ပေါ်လိုနီးယားသည် တစ်ကုဗပေဖိအားတွင် ခံနိုင်ရည် ၁၈၁ ပေါင်ရှိကြောင်းသိရပါသည်။ စိုက်ပျိုးရာတွင်လည်း ကျင်းနက်ရှိုင်းစွာတူးရန်မလိုအပ်ပဲ စိုက်ပျိုးနိုင်သည်။ ပေါ်လို နီးယားသည် မီးမကူးနိုင်သည့် အပင်အမျိုးအစားဖြစ်သည်။ အခြားသော ဝိသေသလက္ခဏာများမှာ အသားကျစ် ခြင်း၊ အလွန်ကောင်းသည့် တည်ငြိမ်မူ့ရှိခြင်း၊ အင်းဆက်ပိုးမွှားဒဏ်ခံနိုင်ခြင်း၊ မှိုတက်ပုပ်ဆွေးခြင်းကို ခံနိုင်ခြင်း တို့ဖြစ်သည်။

            ပေါ်လိုနီးယားပင်အား တရုတ်နှင့်ဂျပန်နိုင်ငံများတွင် လွန်ခဲ့သည့် နှစ်ပေါင်း ၂၅၀၀ ကျော်ကတည်းက အသုံးပြုခဲ့ကြပါသည်။ ယခုအချိန်တွင် သြစတြေးလျ၊ အမေရိကန်နှင့် ဥရောပနိုင်ငံများသည် ပေါ်လိုနီးယားပင်၏ ထူးခြားကောင်းမွန်သော ဝိသေသလက္ခဏာများကြောင့် အဓိကသုံးစွဲလာကြသည်။

            ပေါ်လိုနီးယားဖြင့် ပြုလုပ်သော အဓိကထုတ်ကုန်များမှာ ပိုးမွှားဒဏ်ခံနိုင်ခြင်းကြောင့် အိမ်ဆောက်လုပ်ခြင်း၊ အခြားသောအဆောက်အဦးများဆောက်လုပ်နိုင်ခြင်း၊ ပရိဘောဂပစ္စည်းများ၊ ရေလွှာလျောစီးဘုတ်များ၊ အသံနှင့်ပတ်သတ်၍ ပြုလုပ်ရသော တူရိယာပစ္စည်းများ၊ စက္ကူပြုလုပ်ရန် ပျော့ဖတ်များ၊အက်စစ်နှင့်ဝိုင်များ သိုလှောင်ထားရန်စည်များ၊ ပျားအိမ်များ၊ ကြိတ်သားများအတွက် အပေါ်ယံအလွှာများ၊ လေယာဉ်ပျံများနှင့် သင်္ဘောငယ်များ အစရှိသည့်တို့တွင် ထည့်သွင်းအသုံးပြုရန် လိုအပ်သည့် ပေါ့ပါးမူ့ရှိသည့်အတွက် အစိတ်အပိုင်းငယ်များပြုလုပ်ခြင်း၊ ကြမ်းခင်းပြားများ အဓိက အသုံးပြုကြပါသည်။ ပေါ်လိုနီးယားအသားဖြင့် ပြုလုပ်ထားသည့် ရေလွှာလျောစီးဘုတ်များသည် လွန်ခဲ့သည့် နှစ်အနည်းငယ်အတွင်း နာမည်ရလာခဲ့သည်။ ပေါ်လိုနီးယားအပင်တစ်ပင် ဖြစ်ထွန်းအောင်မြင်သွားလျှင် အပင်များစွာပွားယူနိုင်ကြောင်း လေ့လာသိရှိရပါသည်။

            ပေါလိုနီးယား(ကျွန်းသစ်)သည် ယခုအချန်တွင် ရောင်းဝယ်နေသည့်ဈေးကွက် မရှိသေးသော်လည်း စိုက်ပျိုးသူတောင်သူများအနေဖြင့် ပေါလိုနီးယားကျွန်းသစ်များပေါ်ချိန်တွင် ပရိဘောဂပြုလုပ်ရာ၌ လည်းကောင်း၊ အိမ်ဆောက်ရာ၌လည်းကောင်း အသုံးပြုရန်နှင့် ပူပြင်းလွန်းသည့် ဝမ်းတွင်းဒေသအား ရာသီဥတုမျှတရန်အတွက်လည်းကောင်း၊ သဘာဝပတ်ဝန်းကျင်ထိန်းသိမ်းမှုဖြစ်ရန်အတွက် မျှော်မှန်း၍စိုက်ပျိုးကြကြောင်း စိုက်ပျိုးတောင်သူ ဦးထွန်းလူမှ စိုက်ပျိုးဖြစ်သည့် ရည်ရွယ်ချက်များအား ရှင်းလင်းပြောကြားပါသည်။ထို့ကြောင့် ပေါ်လိုနီးယား(ကျွန်းသစ်)အပင်အား တစ်ပိုင်တစ်နိုင်သာမက စီးပွားဖြစ်စိုက်ပျိုးသင့်ကြောင်း ယခုလက်ရှိ စိုက်ပျိုးနေသော တောင်သူဦးထွန်းလူပြောကြားချက်အရ သိရှိရပါသည်။

စားသုံးသူရေးရာဦးစီးဌာန

မန္တလေးတိုင်းဒေသကြီး

          စားသုံးသူရေးရာဦးစီးဌာန၊ မကွေးတိုင်းဒေသကြီး၊ မကွေးခရိုင်ဦးစီးမှူးရုံးမှ ဒု-ခရိုင်ဦးစီးမှူး ဦးမျိုးဝင်းသည် ၁၈.၁.၂၀၂၂ ရက်နေ့တွင် ရေနံချောင်းမြို့၊ စက်မှုဇုန်ရှိ (New One)စက်ရုံ၌ ကျင်းပပြုလုပ်သော တိုင်းတောင်သူ ဖွံ့ဖြိုးရေးအဖွဲ့၏ ပဲစဉ်းငုံသီးနှံစုပေါင်းရောင်းချပွဲသို့ သွားရောက်၍ ဒု-ဥက္ကဌ ဦးမြင့်ရွှေနှင့် တွေ့ဆုံမေးမြန်းခဲ့မှု ပြုလုပ်ခဲ့ကြောင်းသိရှိရပါသည်။

          မကွေးခရိုင်၊ ရေနံချောင်းမြို့နယ်နှင့် ချောက်မြို့နယ်တို့မှ တိုင်းတောင်သူ ဖွံ့ဖြိုးရေးအဖွဲ့ဝင် ပဲစဉ်းငုံစိုက်တောင်သူများမှ စုပေါင်းရောင်းချခဲ့ခြင်းဖြစ်ကြောင်း၊ တိုင်းတောင်သူဖွံ့ဖြိုးရေးအဖွဲ့၏ မျှော်မှန်းချက်အနေဖြင့် အရည်အသွေးကောင်းမွန်ပြီး ဒေသရာသီဥတုနှင့်ကိုက်ညီသည့် ဆီထွက် သီးနှံနှင့်ပဲမျိုးစုံသီးနှံများကို မျိုးကောင်းမျိုးသန့်မျိုးစေ့ထုတ်လုပ်ခြင်းဖြင့် ဈေးကွက်အာမခံချက် ရှိသော မျိုးကောင်းမျိုးသန့်များအား အဖွဲ့ဝင်တောင်သူများသို့ ပြန်လည်ဖြန့်ဝေပေးနိုင်ရန်နှင့် အဖွဲ့ဝင်များ အားလုံးစားနပ်ရိက္ခာဖူလုံပြီး ရေရှည်လူနေမှုဘဝမြင့်မားတိုးတက်လာစေရန် မျှော်မှန်းကြောင်း၊ ထွက်ကုန်နှင့်ဝန်ဆောင်မှုများအနေဖြင့် အပူပိုင်းဇုံဒေသရှိ ဆီထွက်သီးနံနှင့် ပဲမျိုးစုံသီးနှံများ စနစ်တကျဖြင့် ကျယ်ပြန့်စွာ စိုက်ပျိုးထုတ်လုပ်လာနိုင်ရန်အတွက် တောင်သူများအား စိုက်ပျိုးရေး ဦးစီးဌာနနှင့်ပူးပေါင်း၍ GAP သီးနှံများစိုက်ပျိုးလာရေး တောင်သူများအား နည်းပညာများဖြန့်ဝေ ပေးခဲ့ပါကြောင်း၊ စိုက်ပျိုးသူတောင်သူများအတွက် အရည်အသွေးပြည့်မှီသော စိုက်ပျိုးရေး သွင်းအားစု များအား အချိန်မှီရရှိစေရေးအတွက် သွင်းအားစုရောင်းချသည့်ကုမ္ပဏီများနှင့် ချိတ်ဆက်၍ အရည်အသွေးအာမခံပြီး အကြွေးစနစ်ဖြင့်ဝယ်ယူနိုင်ရေး ချိတ်ဆက်ဆောင်ရွက်ပေးခဲ့ကြောင်း၊ တောင်သူများအတွက် အတိုးနှုန်းသက်သာသောချေးငွေများ လက်လှမ်းမှီလာစေရန် ဘဏ်များနှင့် ချိတ်ဆက်ဆောင်ရွက်ခြင်းများပြုလုပ်ပေးခဲ့ပါကြောင်း၊ သီးနှံစျေးကွက်များ ကောင်းမွန်ခိုင်မာလာ စေရန်အတွက် စုပေါင်းရောင်းချသည့်စနစ်ဖြင့် ပွင့်လင်းမြင်သာစွာဆောင်ရွက်ခဲ့ကြောင်း တောင်သူ ဖွံ့ဖြိုးရေးအဖွဲ့ ဒု-ဥက္ကဌ ဦးမြင့်ရွှေ၏ ပြောကြားချက်အရ သိရှိရပါသည်။

          ရေနံချောင်းမြို့နယ်တွင် တိုင်းတောင်သူဖွံ့ဖြိုးရေးအဖွဲ့မှ ဦးဆောင်၍ ပဲစဉ်းငုံသီးနှံစုပေါင်း ရောင်းချပွဲကို (၁၅.၁၂.၂၀၂၁)ရက်နေ့မှစ၍ Export ကုမ္ပဏီများနှင့်တိုက်ရိုက် Video Conferencing ဖြင့် ချိတ်ဆက်ရောင်းချခဲ့ရာ ပဲစဉ်းငုံပိဿာ(၂၀)(၁)တင်းလျှင်(၃၅၀၀၀)ကျပ်မှ နေ့စဉ်ပေါက်ဈေးဖြင့် ရောင်းချခဲ့ရာ (၁၉.၁.၂၀၂၂)ရက်နေ့တွင် အမြင့်ဆုံး (၄၂၀၀ဝိ/-)ကျပ်ထိ ရောင်းချခဲ့ရကြောင်း သီးနှံများကို ချိန်တွယ်မှုစနစ်မှန်ကန်စွာဖြင့် ပွဲခ၊ လုပ်သားခပေးချေရခြင်းမရှိဘဲ အိတ်ခွံအတွက် (၁၂.၅)ကျပ်သားကိုသာ ပေးခဲ့ရသည့်အတွက် တောင်သူများအနေဖြင့် တစ်ဦးချင်းပွဲရုံများတွင် ရောင်းချသည်ထက် အကျိုးအမြတ်ပိုမိုရရှိကြောင်းသိရှိရပါသည်။

မကွေးခရိုင် ရေနံချောင်းမြို့နယ်နှင့် ချောက်မြို့နယ်တို့တွင် ပဲစဉ်းငုံစိုက်ဧကမှာ (၃၅၀၀၀)ဧက ဝန်းကျင်စိုက်ပျိုးခဲ့ပြီး ယခင်နှစ်(၁)ဧက စိုက်ပျိုးထုတ်လုပ်ကုန်ကျစရိတ်မှာ (၁၅၀၀၀၀ ကျပ်မှ ၂၀၀၀၀၀ ကျပ်)ကြားကုန်ကျ၍ (၁)တင်းရောင်းစျေးမှာ (၂၀၀၀၀ကျပ်မှ ၂၅၀၀၀ကျပ်) ကြားသာရှိခဲ့သော်လည်း ယခုနှစ်တွင် သွင်းအားစုဈေးနှုန်းမြင့်တက်ခဲ့သည့်အတွက် (၁)ဧက စိုက်ပျိုးထုတ်လုပ်မှု (၂၁၀၀၀၀ ကျပ်မှ ၂၅၀၀၀၀ကျပ်) ဝန်းကျင်ရှိခဲ့ပြီး (၁)ဧကအထွက်နှုန်းအနေဖြင့် (၁၀တင်းမှ၁၃တင်း) ကြား ရရှိခဲ့ပြီး ပေါ်ကာစတွင် (၃၄၀၀၀ကျပ်)ဝန်းကျင်ကျပ်ရရှိခဲ့၍ (၁)ဧက အကျိုးအမြတ်အနေဖြင့် (၁၃၀၀၀၀)ကျပ်ဝန်းကျင်ရရှိခဲ့ပါကြောင်း၊ ပဲစဉ်းငုံသီးနှံမှာ အိန္ဒိယ၏ ပဲဝယ်ယူမှုအခြေအနေပေါ် မူတည်၍ ဈေးနှုန်းအတက်အကျရှိသော်လည်း တိုင်းတောင်သူဖွံ့ဖြိုးရေးအသင်းဝင်တောင်သူများအနေဖြင့် နည်းပညာနှင့်အရည်အသွေးမှီသွင်းအားစုများအား ဈေးနှုန်းမှန်ကန်စွာဝယ်ယူရရှိခဲ့သည့်အပြင် စိုက်ပျိုးချိန်လိုအပ်သည့် ငွေကြေးအရင်းအနှီးများလည်း အတိုးနှုန်းသက်သာစွာရရှိခဲ့သည့် အတွက် တွက်ခြေကိုက်မှုရှိကြောင်း အလားတူမကွေးမြို့နယ်တွင်လည်း တိုင်းတောင်သူ ဖွံ့ဖြိုးရေးအဖွဲ့၏ သီးနှံစုပေါင်းရောင်းချပွဲကို မကွေးမြို့နယ်၊ ကံလှကျေးရွာရှိ Good Brother ကုမ္ပဏီ၏ ထွန်စက်စခန်းတွင် ပြုလုပ်ကြောင်းသိရှိရပါသည်။

 DOCA(မကွေး)