ပြည်တွင်းကုန်သွယ်မှုသတင်း

     ပြည်ခရိုင်၊ ပန်းတောင်းမြို့နယ်တွင် နွေစပါးများကို ဒီဇင်ဘာလကုန်ပိုင်းနှင့် ဇန်နဝါရီလ ဆန်းပိုင်းတွင် စတင်စိုက်ပျိုးခဲ့ရာ စိုက်ဧကမှာ(၄၅၉၄၈) ဧကစိုက်ပျိုးခဲ့ပါသည်။ ယခုအချိန်တွင် ယခင်စိုက်ပျိုးခဲ့သော နွေစပါးများအားရိတ်သိမ်းနေပြီဖြစ်သဖြင့်  ဈေးနှုန်းဈေးကွက်  အခြေအနေ များအား သိရှိနိုင်ပါရန် ကွင်းဆင်းလေ့လာခဲ့ပါသည်။

    စားသုံးသူရေးရာဦးစီးဌာန၊ ပန်းတောင်းမြို့နယ်တာဝန်ခံ ဒေါ်သန်းသန်းအေးနှင့် ဝန်ထမ်းများ သည် (၂.၈.၂၀၂၂)နေ့ နံနက် (၁၀:၃၀)အချိန်တွင် ငါးဆယ်ပေးအုပ်စုရှိ ပေကြီးကျေးရွာ၊ အုတ်ဖိုကွင်းကျေးရွာနှင့် ဘုရားပေါ်ကျေးရွာတို့တွင် နွေစပါးစိုက်ဧက (၁၀၆)ဧကစိုက်ပျိုးထားပြီး ယခုအချိန်တွင် နွေစပါး (၄၅)ဧကရိတ်သိမ်းပြီးဖြစ်ပါသည်။ ရိတ်သိမ်းသည့် စပါးမျိုးများမှာ ပင်မမွှေးမျိုး၊ ထိုင်းနှံကောက်မျိုးနှင့် ရတနာတိုးစပါးမျိုးတို့ဖြစ်ပါသည်။ နွေစပါးအထွက်နှုန်းအနေဖြင့် တစ်ဧကလျှင် တင်း(၉၀)ခန့်ထွက်ရှိသည်ဟု သိရပါသည်။ ယခုဖြစ်ပေါ်နေသော နွေစပါး ဈေးနှုန်းများမှာ ပေါင်(၅၀) တင်း(၁၀၀)လျှင် (၈၈၀၀၀၀)ကျပ်ဖြင့် ရောင်းချကြောင်း သိရပါသည်။

      နွေစပါးစိုက်ပျိုးသူတောင်သူများအနေဖြင့် ယခုနှစ်တွင် အထွက်နှုန်းလည်းကောင်းပြီး ဈေးနှုန်းမှာလည်း(၈)သိန်းအထက်ရရှိသည့်အတွက် သွင်းအားစုဈေးများ၊ ရိတ်သိမ်းခြွေလှေ့ခ ဈေးများမြင့်တက်လာသော်လည်း တွက်ချေကိုက်သောနှစ်ဖြစ်ကြောင်း သိရှိရပါသည်။

DOCA(ပဲခူး)

          ပြည်ခရိုင်၊ ရွှေတောင်မြို့နယ်တွင် တိုင်ထောင်ပဲသီးများ စိုက်ပျိုးထားရှိမှုနှင့် ဈေးနှုန်းဈေးကွက်အခြေအနေများအား သိရှိနိုင်ရန် စားသုံးသူရေးဦးစီးဌာန၊ ရွှေတောင်မြို့နယ် တာဝန်ခံရုံး ရှိဝန်ထမ်းများသည် (၁.၈.၂၀၂၂)နေ့ နေ့လယ် (၁:၃၀)တွင် ဝါးလယ်ကျေးရွာသို့ သွားရောက် ကွင်းဆင်းလေ့လာခဲ့ပါသည်။

            ရွှေတောင်မြို့နယ်၊ ဝါးလယ်ကျေးရွာရှိ တောင်သူ ဦးအုန်းနှင့် တွေ့ဆုံပြီး တိုင်ထောင်ပဲသီးများ စိုက်ပျိုးထွက်ရှိမှုအား လေ့လာရာတွင် ထိုပဲကို ဇွန်လဆန်းတွင်စတင်စိုက်ပျိုးပြီး ဇူလိုင်လတွင် စတင်ခူးဆွတ်ရသည်ဟုသိရပါသည်။ တိုင်ထောင်ပဲစိုက်ပျိုးရာတွင် တစ်ဧကကို ပဲတိုင် (၁၈၀၀)ခန့် စိုက်ပျိုးကြောင်းသိရပါသည်။ ခူးယူရရှိလာသော ပဲသီးများကို အခင်းထဲအထိ လာရောက် အဝယ်ရှိ သလို ကုန်စိမ်းဒိုင်များသို့လည်း သွားရောက်ရောင်းချရသည်ဟုသိရပါသည်။ ရွှေတောင်မြို့ရှိှ ကုန်စိမ်းဒိုင်များမှတစ်ဆင့် ရန်ကုန်မြို့ရှိ သီရိမင်္ဂလာဈေးနှင့် ဒညင်းကုန်းဈေး များသို့တင်ပို့ ရောင်းချ ကြောင်း သိရပါသည်။ တိုင်ထောင်ပဲသီးများ ပေါ်ခါစအချိန်တွင် ဈေးကောင်းနေသော်လည်း ပဲသီးအထွက်လှိုင်လာချိန်တွင် ဈေးများလျှော့နည်းလာပြီး ယခုအချိန်တွင် လက်လီဈေးမှာ တစ်စည်း လျှင် (၁၀)တောင့်ပါ (၃)စည်းလျှင် (၂၀၀)ကျပ်ဖြင့် ရောင်းချလျှက်ရှိကြောင်း သိရှိရပါသည်။

DOCA(ပဲခူး)

           တောင်ငူမြို့၏ မြောက်ဘက်အဝင် ကံရိုးကျေးရွာ တည်နေရာတွင် မြို့သူမြို့သားများ လုပ်အားတန်ဖိုးဖြင့် ဒေသန္တရ ငါးသယံဇာတ ဖွံ့ဖြိုးတိုးတက်ရေးအတွက် တူးဖော်ခဲ့သော ကန် ၁၀၀ စီမံချက်ဖြင့် ငါးမွေးမြူရေးလုပ်ငန်းအား ကေတုမတီငါးမွေးမြူရေး ကုန်ထုတ်သမဝါယမအသင်း လီမီတက်မှ နိုင်ငံတော်သို့ အသင်းမှတ်ပုံတင်ပြီး လုပ်ကိုင်ဆောင်ရွက်လျှက်ရှိပါသည်။

           အသင်းပိုင် ငါးကန် ၁၃၀ ဧကခန့်တွင် ငါးမြစ်ချင်း၊ ငါးကြင်း၊ ငါးတန်၊ ငါးမုတ်စသည့် ငါးမျိုးစုံကို မွေးမြူကာ တစ်နှစ်လျှင် အထီးနှစ်ကောင်၊ အမတစ်ကောင်ပါဝင်သည့် ငါးအစုံရေ ၇၅ စုံစီ ကို ဆေးထိုးသားဖောက်ပြီး ငါးမှုံအကောင်ရေ သိန်း ၁၀၀ ခန့်ရရှိကြောင်း၊ ငါးမှုံမှ ငါးသန်၊ ငါးသန်မှ ငါးဖျဉ်း၊ ငါးဖျဉ်းမှ အသားတိုးသည့်ကာလအဆင့်ဆင့် တစ်နှစ်ခွဲခန့်ကြာလျှင် ပိဿာချိန် ၂၁၀၀၀၀ ခန့် ရရှိလာသဖြင့် တစ်ရက်လျှင် ငါးပိဿာ ၇၀၀ ခန့် ထုတ်လုပ်နိုင်လျှက်ရှိပြီး “ပြည်သူ့အတွက် ငါးဟင်းတစ်ခွက်” အစီအစဉ်ဖြင့် ငါးမြစ်ချင်း(၄၀ ကျပ်သားအောက်) တစ်ပိဿာလျှင် ၄၄၀၀ ကျပ် နှုန်း၊ ငါးမြစ်ချင်း (၄၀ ကျပ်သားအထက်) တစ်ပိဿာလျှင် ၄၉၀၀ ကျပ်နှုန်း၊ ငါးမြစ်ချင်း (၇၀ ကျပ်သားအထက်) တစ်ပိဿာလျှင် ၅၄၀၀ ကျပ်နှုန်း၊ ငါးမုတ် တစ်ပိဿာလျှင် ၄၁၀၀ ကျပ်နှုန်းနှင့် ငါးတန် တစ်ပိဿာလျှင် ၄၁၀၀ ကျပ်နှုန်းဖြင့် ပြည်သူများအတွက် ဈေးနှုန်းချိုသာစွာဖြင့် လက်လီ လက်ကား ဖြန့်ဖြူးရောင်းချပေးလျှက်ရှိပါသည်။

        ယခုအခါ ကေတုမတီငါးမွေးမြူရေး ကုန်ထုတ်သမဝါယမအသင်း လီမီတက်နှင့် ငါးလုပ်ငန်းဦးစီးဌာနတို့ ပူးပေါင်း၍ ဒေသခံငါးမွေးမြူရေးလုပ်ငန်းရှင်များအား ငါးဆေးထိုး သားဖောက်ခြင်းလုပ်ငန်းများနှင့်ပတ်သက်သည့် နည်းပညာများ သင်ကြားပေးခြင်း၊ ငါးမျိုးရရှိရေး အကူအညီပေးခြင်းများကို ကူညီဆောင်ရွက်လျှက်ရှိပြီး ပြည်သူများအတွက် ငါးဟင်းတစ်ခွက် စားသုံးနိုင်စေရန် “ငါးသယံဇာတဖွံ့ဖြိုးတိုးတက်ဖို့ ငါးမွေးမြူရေးလုပ်ငန်းများ ဖော်ထုတ်ထိန်းသိမ်းစို့” ဆိုသည့် ဆောင်ပုဒ်နှင့်အညီ ကြိုးပမ်းဆောင်ရွက်လျှက်ရှိပါကြောင်း လေ့လာသိရှိရပါသည်။

DOCA(ပဲခူး)

              စစ်ကိုင်းတိုင်းဒေသကြီး၊ ကလေးမြို့ဈေးကွက်တွင် ချင်းတောင်မှ ထွက်ရှိသည့် ကြက်သွန်နီ၊ အာလူး၊ ပန်းမုန်လာ၊ ဂေါ်ရခါးသီးများနှင့် ခရမ်းချဉ်သီးများ အရောင်းအဝယ်ဖြစ်လျက်ရှိကြောင်း  သိရှိရပါသည်။

              ကလေးမြို့ပေါ်ဈေးကွက်တွင် တောင်ပေါ်ဒေသဖြစ်သည့် ဖလမ်းမြို့နယ်၊ ဗားလုံ၊ လုံးဟော့၊ ဇိုင်ဇော်လ်၊ လားသီး၊ လုမ်ဘန်း၊ ပါရ်သဲနှင့် ဘွာလ်ခွါကျေးရွာများတွင် အများဆုံး စိုက်ပျိုးပြီး ကလေးမြို့သို့ အဓိကတင်ပို့ရောင်းချလျက်ရှိပါသည်။ ကလေးမြို့မှတဆင့် ကလေးဝမြို့၊ တမူးမြို့များသို့လည်း တင်ပို့လျက်ရှိပြီး ခရမ်းချဉ်သီးများကို ဒေသတွင်း ဈေးနှုန်းများ ချိုသာပါက မုံရွာမြို့ဈေးကွက်တွင် အရောင်းအဝယ်ကောင်း၍ ဈေးနှုန်းရရှိပြီး တင်ပို့ရောင်းချလျက်ရှိကာ ဈေးနှုန်းမြှင့်တက်သည့်အခါများတွင် အင်းလေးဒေသမှ ထွက်ရှိသည့် ရှမ်းသီးများ ဝက်ရောက်လျက် ရှိပြီး ကလေးမြို့ဈေးကွက်အတွင်း တစ်ပိဿာ ( ၁၈၀၀ ) ကျပ် ပေါက်ဈေးနှုန်းများ ရှိပါသည်။

           ကလေးမြို့ပေါ် ဈေးကွက်တွင် ချင်းတောင်ဒေသမှ ထွက်ရှိသည့် သီးနှံရောင်းဈေးနှုန်းများအနေဖြင့် အာလူး တစ်ပိဿာလျှင် ( ၂၂၀၀ ) ကျပ်၊ ကြက်သွန်နီ တစ်ပိဿာလျှင် ( ၁၇၀၀ ) ကျပ်၊ ခရမ်းချဉ်သီး တစ်ပိဿာလျှင် ( ၂၀၀၀ ) ကျပ်၊ ပန်းမုန်လာ တစ်ပိဿာလျှင် ( ၃၀၀၀ ) ကျပ်နှင့် ဂေါ်ရခါးသီး တစ်ပိဿာလျှင် ( ၁၀၀၀ ) ပေါက်ဈေးနှုန်းများဖြင့် ရောင်းချလျက်ရှိကြောင်း ဒေါ်မိငယ်ကုန်စိမ်းပွဲရုံထံမှ သိရှိရပါသည်။

DOCA(စစ်ကိုင်း)

            နေပြည်တော်ဆီကုန်သည်နှင့်ဆီလုပ်ငန်းရှင်များအသင်းနှင့် စားသုံးသူရေးရာဦးစီးဌာန၊ နေပြည်တော်ဦးစီးမှူးရုံးမှ ဝန်ထမ်းများဦးဆောင်၍ စားသုံးသူပြည်သူများ လက်ဝယ်အရောက် ဈေးကားများဖြင့် စားအုန်းဆီများကို သက်သာသောဈေးနှုန်းများဖြင့် လှည့်လည်ရောင်းချလျက်ရှိ ပါတယ်။

         “၂၀၂၂ ခုနှစ်၊ ဩဂုတ်လ ၁ ရက်နေ့မှာတော့ ဆီလုပ်ငန်းရှင် ဦးခင်မောင်မြင့်က ပျဉ်းမနားမြို့နယ်၊ ကြိတ်အင်းကျေးရွာနှင့် ရွာသာကျေးရွာတို့တွင် ဆီပိဿာချိန် (၆၆၀)ကို ဈေးကားတစ်စီးဖြင့် လည်းကောင်း ၊ ဆီလုပ်ငန်းရှင် ဦးပြည့်ဖြိုးအောင်က ပျဉ်းမနားမြို့နယ်၊ ကြို့ပင်ကျေးရွာတွင် ဆီပိဿာချိန် (၆၆၀)ကိုလည်းကောင်း၊ ဆီလုပ်ငန်းရှင် ဦးအေးထွန်းမှ လယ်ဝေးမြို့နယ် ဘိုကတော်ကျေးရွာနှင့် ရေကာကျေးရွာတို့တွင် ဆီပိဿာချိန် (၆၆၀)ကို လည်းကောင်း၊ ဇေယျာသီရိမြို့နယ် အေးသပြေကျေးရွာတွင် ဆီလုပ်ငန်းရှင် ‌ဒေါ်ခင်နွယ်အေးမှ ဆီပိဿာချိန် (၆၆၀)ကိုလည်း‌ကောင်း” အသီးသီးရောင်းချ‌ပေးခဲ့ကြောင်း သိရှိရပါသည်။

          ထိုသို့နေ့စဉ် ကျေးရွာများသို့ ဈေးကားများဖြင့် စားသုံးသူပြည်သူများလက်ဝယ်အရောက် သက်သာသောဈေးနှုန်းဖြင့် ရောင်းချပေးနေမှုများကြောင့် ပြည်သူများအဆင်ပြေမှုများစွာရှိနေသည်ကို တွေ့ရှိရကြောင်း၊ ဆက်လက်၍ရောင်းချမည့် အစီအစဉ်များလည်း ရှိနေသေးကြောင်း နေပြည် တော်ဆီကုန်သည်နှင့် ဆီလုပ်ငန်းရှင်အသင်းထံမှ သတင်းရရှိပါသည်။

DOCA(ပြည်ထောင်စုနယ်မြေ)